Акафистник

Помочь сайту
·
·
·
·

Акафист святому равноапостольному Николаю, архиепископу Японскому

Память: 16 (3) февраля

Не утвержден для общецерковного использования.

Конда́к 1.

Избра́нный от родо́в росси́йских на благове́стие Христо́во в стране́ Япо́нстей, ду́шу свою́ полага́л еси́ за о́вцы своя́, утвержда́я и́х в ве́ре и́стинней. По́двиги твоя́ почита́юще, хва́лим тя́ си́це:

Ра́дуйся, равноапо́стольный святи́телю Нико́лае, Це́ркве Япо́нския предста́телю.

И́кос 1.

А́нгел, я́ко Тови́и, спутеше́ствовал тебе́, егда́ в млада́я ле́та своя́ напра́вил еси́ стопы́ в страну́ сию́, дале́че отстоя́щую. Сего́ ра́ди вопие́м ти́ си́це:

Ра́дуйся, Смоле́нския земли́ сла́вное порожде́ние; ра́дуйся, от младе́нчества це́рковь возлюби́вый.

Ра́дуйся, в сиротстве́ Богома́терию Смоле́нскою Одиги́триею не оста́вленный; ра́дуйся, духо́вною нау́кою умудре́нный.

Ра́дуйся, сла́дость ми́ра ни во что́ же вмени́вый; ра́дуйся, чи́на а́нгельскаго и иере́йскаго удосто́енный.

Ра́дуйся, пропове́дати Ева́нгелие вожделе́вый; ра́дуйся, к неве́дящым спасе́ния жа́лости испо́лненный.

Ра́дуйся, и да́льних, я́ко бли́жних возлюби́вый. Ра́дуйся, гоне́ния за ве́ру не страши́выйся.

Ра́дуйся, равноапо́стольный святи́телю Нико́лае, Це́ркве Япо́нския предста́телю.

Конда́к 2.

Ви́дяще по́двиги святи́теля Инноке́нтиа, богому́драго просвети́теля Сиби́рскаго и Алеу́тскаго, поревнова́ равноапо́стольный ему́, зовы́й: Аллилу́иа.

И́кос 2.

Ра́зум в смире́нии яви́л еси́, свя́тче, Го́споду моля́ся о да́ре язы́ков: ка́ко пропове́даю наро́ду чужде́му, ка́ко отве́рзу уста́ неиску́сная; слы́шаще твоя́ словеса́ боголю́бная, па́ству твою́ на наре́чии иско́нном ея́ поуча́ющая, хва́лим тя́ си́це:

Ра́дуйся, любо́вию Христо́вою побежда́вый; ра́дуйся, окормля́вый духо́вныя младе́нцы.

Ра́дуйся, супроти́вников в ча́да преложи́вый; ра́дуйся, креще́нием и́х грехи́ омы́вый.

Ра́дуйся, позна́нием ве́ру укрепля́вый; ра́дуйся, наста́вниче до́брый и рачи́тельный.

Ра́дуйся, пресви́теров япо́нских поста́вивый; ра́дуйся, церко́внаго чи́на устрои́телю.

Ра́дуйся, и на́шего Оте́чествия защи́тниче; ра́дуйся, согла́сия бра́тскаго побо́рниче.

Ра́дуйся, свети́льниче ве́ры Правосла́вныя.

Ра́дуйся, равноапо́стольный святи́телю Нико́лае, Це́ркве Япо́нския предста́телю.

Конда́к 3.

Си́ла Вы́шняго осени́ и укрепи́ тя́, о́тче, егда́ прише́л еси́ в страну́ язы́ческую, сме́ртию сыно́в свои́х казня́щую за прия́тие свята́го креще́ния. Ты́ же, ни́ву прозрева́я Бо́жию, вопия́л еси́: Аллилу́иа.

И́кос 3.

Имы́й любо́вь нелицеме́рную, мне́л страну́ сию́ бы́ти неве́стою укра́шенную, Жениха́ на бра́к ожида́ющею, и́бо ве́дала она́ обруче́ние, кро́вию му́чеников дре́вле обагре́нная, просия́вшая ста́рцы и жена́ми распя́тыми, и детьми́ Христа́ испове́давшими. Почита́юще нело́жное твое́ упова́ние, прославля́ем тя́ си́це:

Ра́дуйся, святи́телю духо́вный; ра́дуйся, си́лою Креста́ укрепле́нный.

Ра́дуйся, сто́лпе непоколеби́мый; ра́дуйся, па́стырю небоя́зненный.

Ра́дуйся, ра́зуме несмуща́емый; ра́дуйся, пропове́дниче немо́лчный.

Ра́дуйся, никого́ не осуди́вый; ра́дуйся, и са́м не осужде́нный.

Ра́дуйся, испове́дников соприча́стниче; ра́дуйся, моли́твенниче ве́рный.

Ра́дуйся, люби́мче А́нгела Храни́теля.

Ра́дуйся, равноапо́стольный святи́телю Нико́лае, Це́ркве Япо́нския предста́телю.

Конда́к 4

Бу́рю возбуди́ша идолослужи́телие, не терпя́ще ду́ха христиа́нскаго, ви́дяще, ка́ко Це́рковь созида́ется. Ты́ же ра́дуяся терпе́нию ча́д свои́х, заключе́нных в подземе́лиих темни́чных, ку́пно с ни́ми возглаша́ше: Аллилу́иа.

И́кос 4.

Слы́шаще, я́ко уче́ние Христо́во вся́ наро́ды объе́млет и прие́млет и́х равноче́стно, и я́ко оби́тели и́м мно́ги Госпо́дь угото́вал, притека́ху к тебе́ му́жие и жены́, о́троцы и ста́рцы, па́стырю до́брый, те́м же и мы́ хва́лим тя́ си́це:

Ра́дуйся, ма́лое ста́до Христо́во собра́вый; ра́дуйся, те́сным путе́м к Бо́гу его́ приводя́й.

Ра́дуйся, це́рковь Аки́лы с Приски́ллой в подража́ние прия́вый; ра́дуйся, це́ркви дома́шния зде́ утверди́вый.

Ра́дуйся, о́бщыя трапе́зы благослови́вый; ра́дуйся, ве́рных свои́х не оставля́вый в беда́х.

Ра́дуйся, си́льным сыно́м поруча́вый слабе́йших; ра́дуйся, сла́бых держа́вый оте́ческою дла́нию.

Ра́дуйся, се́явый му́дро на ни́ве Христо́вой; ра́дуйся, стро́ивый Це́рковь на ка́мени тве́рдом.

Ра́дуйся, ра́бе усе́рдный, не скры́вый тала́нта.

Ра́дуйся, равноапо́стольный святи́телю Нико́лае, Це́ркве Япо́нския предста́телю.

Конда́к 5.

Боготе́чною звездо́ю яви́лся еси́, о́тче, Со́лнцу Пра́вды пла́менно служа́ и ко Го́споду приводя́ ве́рных, я́ко дре́вле звезда́ Вифлее́ма. Светоно́сно тобо́ю облича́еми, вопие́м Христу́: Аллилу́иа.

И́кос 5.

Ви́дев ка́пища и́дольская и па́годы будди́йския, пла́ча, моля́шеся пра́ведный: «Где́ сози́жду це́рковь Тебе́, Го́споди»? Бы́сть услы́шана у́ст твои́х моли́тва:

Ра́дуйся, я́ко еле́нь на исто́чницех водны́х; ра́дуйся, хра́м Воскресе́ния Христо́ва воздви́гий.

Ра́дуйся, Кре́ст утверди́вый над градо́м сто́льнем; ра́дуйся, зво́н колоко́льный вознесы́й до небесе́.

Ра́дуйся, пла́мень гоне́ния на христиа́н угаси́вый; ра́дуйся, до́брое и́мя стяжа́вый в лю́дех япо́нских.

Ра́дуйся, дре́вним обы́чаем не поруга́выйся; ра́дуйся, дру́га и бра́та в наро́де япо́нстем обреты́й.

Ра́дуйся, светоноси́телю, по́сланный Бо́гом; ра́дуйся, домоправи́телю Го́спода ве́рный.

Ра́дуйся, ны́не увенча́нный сла́вою небе́сною.

Ра́дуйся, равноапо́стольный святи́телю Нико́лае, Це́ркве Япо́нския предста́телю.

Конда́к 6.

Пропове́дницы Свята́го Ева́нгелиа ра́дуются в го́рних черто́зех, прие́млюще тя́, я́ко собра́та. Мы́ же, сро́дницы твои́, ми́лость узре́вше такову́ю, Бо́гу воспои́м: Аллилу́иа.

И́кос 6.

Возсия́вый от земли́ Смоле́нския, со святы́ми земли́ Ру́сския сочетава́ешися: се́ святи́тель Дими́трий Росто́вский, цевни́ца духо́вная; се́ Задо́нская похвало́ Ти́хон, собира́тель сокро́вища у́мнаго; се́ Стефа́н, просвети́тель Пе́рмский; Се́ргий, Серафи́м, Зоси́ма и Савва́тий, утеше́ние Росси́йское; се́ святи́и, та́йнии и явле́ннии, Оте́чествия на́шего боже́ственное сия́ние. Мы́ же, вели́кия ра́дости испо́лнени, прославля́ем но́ваго уго́дника:

Ра́дуйся, сы́не се́льскаго диа́кона; ра́дуйся, убо́жество в мла́дости позна́вый.

Ра́дуйся, обе́т нестяжа́ния принесы́й; ра́дуйся, и́ночество до сме́рти соблюды́й.

Ра́дуйся, архипа́стырю в ри́зах многошве́нных; ра́дуйся, в убо́гих ке́ллиях пребыва́вый.

Ра́дуйся, в ми́ру мирска́го не иска́вый; ра́дуйся, наста́вниче новопросвеще́нных.

Ра́дуйся, крести́телю ры́барей А́инских; ра́дуйся, доше́дый до преде́лов да́льних.

Ра́дуйся, сподви́жников в шко́ле возрасти́вый.

Ра́дуйся, равноапо́стольный святи́телю Нико́лае, Це́ркве Япо́нския предста́телю.

Конда́к 7.

Хотя́й от земли́ в го́рняя пресели́тися, блаже́нный рече́: что́ ми́ те́ло сие́, не́мощми томи́мое, а́ще не могу́ рабо́тати Го́сподеви — хра́мину сию́ оставля́ю, взыва́я: Аллилу́иа.

И́кос 7.

Но́вое бы́сть торжество́ в сто́льнем гра́де Япо́нстем: пра́зднова Па́сху святи́тель в це́ркви Токи́йской собо́рней, и позна́ша лю́дие япо́нстии и́стинную Па́сху спаси́тельную. Мы́ же, помина́юще се́й де́нь, вопие́м велегла́сно:

Ра́дуйся, в ве́це жесто́цем любо́вь сохра́нши; ра́дуйся, архитрикли́не церко́внаго пи́ра.

Ра́дуйся, ста́рче, очи́ма не дава́яй дрема́ния; ра́дуйся, о́тче, срета́яй ча́да целова́нием.

Ра́дуйся, ча́да своя́ поставля́вый пред Бо́гом; ра́дуйся, Ду́ха стяжа́вый в труде́х повседне́вных.

Ра́дуйся, зре́вый плоды́ свои́х ру́к при исхо́де; ра́дуйся, се́мя гору́шное бро́сивый в зе́млю.

Ра́дуйся, дре́во прекра́сное на́м завеща́вый; ра́дуйся, мо́сте живы́й христиа́нскаго ми́ра.

Ра́дуйся, а́нгельски ра́дуяйся в де́нь Воскресе́ния Христо́ва.

Ра́дуйся, равноапо́стольный святи́телю Нико́лае, Це́ркве Япо́нския предста́телю.

Конда́к 8.

Стра́нная ви́дяще, ка́ко Япо́нская ча́да Христо́вы во́ином Ру́сским плене́нным бра́тски служа́ху, Го́споду пе́снь воспои́м: Аллилу́иа.

И́кос 8.

Ве́сь бы́л пре́дан еси́ на служе́ние Бо́гу, лю́дем та́кожде служа́ непреста́нно обоя́ за́поведи сочета́я. Ца́рский пу́ть тво́й умиле́нно прославля́ем си́це:

Ра́дуйся, у́мный Бо́гу служи́телю; ра́дуйся, архиере́йски же́ртву принося́й за наро́ды.

Ра́дуйся, пле́нных ру́сских попечи́телю; ра́дуйся, в грозе́ вое́нной ча́д свои́х япо́нских не оста́вивый.

Ра́дуйся, Оте́чествию иско́нному ве́рность сохрани́вый; ра́дуйся, наста́вниче ми́лости и му́жества.

Ра́дуйся, уцелому́дривый ду́шы соблазне́нныя; ра́дуйся, приста́нище отве́рженных.

Ра́дуйся, сокро́вище смире́ния; ра́дуйся, черто́же покая́ния.

Ра́дуйся, любы́ непобеди́мая.

Ра́дуйся, равноапо́стольный святи́телю Нико́лае, Це́ркве Япо́нския предста́телю.

Конда́к 9.

Вся́кое дре́во по плоду́ позна́ется, пло́д же трудо́в твои́х мно́гих бы́сть спасе́ние мно́гих люде́й. Посему́ возгласи́м: Аллилу́иа.

И́кос 9

Вети́и многовеща́нныя по́двигом твои́м изумля́ются, а́нгели с тобо́ю ликовству́ют, мы́ же ве́дяще смире́нное житие́ твое́ и терпе́ние многомо́щное, хва́лим тя́ си́це:

Ра́дуйся, не дре́вле, а ны́не подвиза́выйся; ра́дуйся, о́бразе архипа́стыря правосла́внаго.

Ра́дуйся, глубо́кое на́ше обличе́ние; ра́дуйся, Христа́ безстра́шное испове́дание.

Ра́дуйся, благоразу́мия ме́ра и́стинная; ра́дуйся, сокро́вище, в ду́се собира́емое.

Ра́дуйся, сокро́вище, для бли́жних расточа́емое; ра́дуйся, прие́мляй мзду́ тысящекра́тную.

Ра́дуйся, безсме́ртныя ра́дости испо́лненный; ра́дуйся, боре́ния на́ша утиша́яй.

Ра́дуйся, моле́ния оте́чески прие́мляй.

Ра́дуйся, равноапо́стольный святи́телю Нико́лае, Це́ркве Япо́нския предста́телю.

Конда́к 10.

Спасти́ потщи́лся еси́ лю́ди отча́янныя, И́стиннаго Бо́га не ве́дящыя. Ны́не в се́ни сме́ртней све́т узре́вшии, ча́да твоя́ вопию́т: Аллилу́иа.

И́кос 10.

Стена́ еси́ Богоро́дице Де́во: те́пле моли́лся святи́тель, це́рковь свою́ утвержда́я. Я́ко на о́строве обурева́емом, среди́ инове́рных, пребыва́ла она́ без щита́ огражде́ния. Мы́ же, узре́вше ея́ кре́пость и ве́рность, пое́м ти́ си́це:

Ра́дуйся, це́рковь наде́жным покро́вом укры́вый; ра́дуйся, Ма́тери Бо́жией преда́в обраще́нных.

Ра́дуйся, отрокови́ц научи́вый моли́тися; ра́дуйся, све́т целому́дрия де́вам внуша́вый.

Ра́дуйся, бра́ком честны́м освяща́вый япо́нския семьи́; ра́дуйся, пра́вых сужде́ний свято́е зерца́ло.

Ра́дуйся, ми́р приноси́вый селе́нием и градо́м; ра́дуйся, в ну́ждах свои́х укрепля́выйся ве́рою.

Ра́дуйся, ста́рцу отцу́ помога́вый до сме́рти; ра́дуйся, в ми́ре пожи́в, но от ми́ра свобо́дный.

Ра́дуйся, по кончи́не все́ми опла́канный.

Ра́дуйся, равноапо́стольный святи́телю Нико́лае, Це́ркве Япо́нския предста́телю.

Конда́к 11.

Пе́ние вся́кое по́двигом твои́м побежда́ется, святи́телю, ко́им сло́вом обы́мем апо́стольское твое́ служе́ние; рече́м же с тобо́ю: Аллилу́иа.

И́кос 11

Светоприе́мно Це́рковь Япо́нская прия́ благове́стие на наре́чии свое́м от труда́ твоего́, просвети́телю и́стинный. Уподо́бился еси́ Вселе́нским учи́телем, обраща́я любому́драя словеса́ твоя́ на служе́ние го́рней му́дрости. Почита́юще доброде́лание твое́, хва́лим тя́ си́це:

Ра́дуйся, Свяще́нное Писа́ние уразуме́вый; ра́дуйся, ча́дом челове́ческим его́ преда́вый.

Ра́дуйся, досто́йная рече́ния находи́вый; ра́дуйся, неве́рная и ле́стная отмета́вый.

Ра́дуйся, собо́рне тру́д сво́й с це́рковию мы́сливый; ра́дуйся, блаже́нно от трудо́в почи́вый.

Ра́дуйся, к наро́ду приближа́вый сло́во; ра́дуйся, богослуже́ние на наре́чии оте́ческом Япо́нстей Це́ркви дарова́вый.

Ра́дуйся, отверги́й вся́ хитросплете́ния; ра́дуйся, пита́вый и млеко́м и ме́дом.

Ра́дуйся, смири́вый го́рдость лжеиме́нных.

Ра́дуйся, равноапо́стольный святи́телю Нико́лае, Це́ркве Япо́нския предста́телю.

Конда́к 12.

Благода́ть почи́ла на тебе́, явля́ющи свя́тость твоего́ служе́ния. А́ще и чуде́с не соверша́л еси́, я́ко же и Иоа́нн Крести́тель, па́че же свиде́тельство твое́ Це́рковь новозда́нная, чу́дом Бо́жиим в дни́ после́дния утвержде́нная, да еди́ным се́рдцем с не́ю воспева́ем: Аллилу́иа.

И́кос 12.

Пою́ще прославле́ние твое́ и к ли́ку святы́х причи́сление сро́дниче на́ш и па́стырю, хва́лим тя́ си́це:

Ра́дуйся, свя́тостию твое́ю Це́рковь в после́дния дни́ утверди́вый; ра́дуйся, му́ки земны́я забве́ние.

Ра́дуйся, благода́ти ти́хое ве́яние; ра́дуйся, прибега́вших к тебе́ помо́щнице.

Ра́дуйся, подвиза́ющихся сподви́жниче; ра́дуйся, садо́вниче благи́й и цветоблюсти́телю.

Ра́дуйся, нестрое́ния на́ша исправля́яй; ра́дуйся, срета́яй ча́д свои́х в ра́йских оби́телех.

Ра́дуйся, помина́ющих тя́ помина́яй; ра́дуйся, бу́рнаго мо́ря оти́шие.

Ра́дуйся, звездо́ зака́тная и восто́чная.

Ра́дуйся, равноапо́стольный святи́телю Нико́лае, Це́ркве Япо́нския предста́телю.

Конда́к 13.

О пресвяты́й и пречу́дный, пресла́вный и преди́вный просвети́телю страны́ Япо́нския, при́сный моли́твенниче на́ш пред Престо́лом Святы́я Тро́ицы, святы́й равноапо́стольный святи́телю о́тче Нико́лае! Приими́ ны́нешнее приноше́ние на́ше и умоли́ Спаси́теля Бо́га и Его́ Пречи́стую Ма́терь, да твои́м хода́тайством просвети́т Правосла́вием обраще́нныя тобо́ю наро́ды и страну́ на́шу Росси́йскую, и изба́вит на́с от вся́ких напа́стей враго́в ви́димых и неви́димых, па́губы и крамолы́, бе́д и скорбе́й, и да́ст грехо́в оставле́ние, и ве́чных му́к избавле́ние, и Ца́рствия Небе́снаго сподо́бит, да ку́пно с тобо́ю и все́ми святы́ми Тро́ице Святе́й во ве́ки веко́в пое́м: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгел, я́ко Тови́и, спутеше́ствовал тебе́, егда́ в млада́я ле́та своя́ напра́вил еси́ стопы́ в страну́ сию́, дале́че отстоя́щую. Сего́ ра́ди вопие́м ти́ си́це:

Ра́дуйся, Смоле́нския земли́ сла́вное порожде́ние; ра́дуйся, от младе́нчества це́рковь возлюби́вый.

Ра́дуйся, в сиротстве́ Богома́терию Смоле́нскою Одиги́триею не оста́вленный; ра́дуйся, духо́вною нау́кою умудре́нный.

Ра́дуйся, сла́дость ми́ра ни во что́ же вмени́вый; ра́дуйся, чи́на а́нгельскаго и иере́йскаго удосто́енный.

Ра́дуйся, пропове́дати Ева́нгелие вожделе́вый; ра́дуйся, к неве́дящым спасе́ния жа́лости испо́лненный.

Ра́дуйся, и да́льних, я́ко бли́жних возлюби́вый. Ра́дуйся, гоне́ния за ве́ру не страши́выйся.

Ра́дуйся, равноапо́стольный святи́телю Нико́лае, Це́ркве Япо́нския предста́телю.

Конда́к 1.

Избра́нный от родо́в росси́йских на благове́стие Христо́во в стране́ Япо́нстей, ду́шу свою́ полага́л еси́ за о́вцы своя́, утвержда́я и́х в ве́ре и́стинней. По́двиги твоя́ почита́юще, хва́лим тя́ си́це:

Ра́дуйся, равноапо́стольный святи́телю Нико́лае, Це́ркве Япо́нския предста́телю.

Моли́тва.

О пречестна́я и свяще́нная главо́ и благода́ти Свята́го Ду́ха испо́лненная, Спа́сово со Отце́м обита́лище, вели́кий архиере́е, те́плый на́ш засту́пниче, святы́й святи́телю, равноапо́стольный Нико́лае Япо́нский! Предстоя́ у Престо́ла все́х Царя́ и наслажда́яся све́та Единосу́щныя Тро́ицы и херуви́мски со а́нгелы возглаша́я пе́снь трисвяту́ю, вели́кое же и неизсле́дованное дерзнове́ние име́я ко Всеми́лостивому Влады́це, моли́ спасти́ся обраще́нным тобо́ю ко Христу́, и всея́ па́ствы Христо́вы лю́дем. Упроси́ Вы́шняго: стра́ждущую страну́ Росси́йскую от лю́тых безбо́жник и вла́сти и́х Госпо́дь да свободи́т, и да возста́вит престо́л правосла́вных прави́телей; ве́рных рабо́в Его́, в ско́рби и печа́ли де́нь и но́щь вопию́щих к Нему́, многоболе́зный во́пль да услы́шит и да изведе́т от поги́бели живо́т на́ш, процвета́ние Правосла́вия в стране́ на́шей Росси́йстей и в земли́ Япо́нстей да утверди́т. Архиере́и благоле́пием святи́тельства да украси́т, мона́шествующыя к подвиго́м до́браго тече́ния да укрепи́т: ца́рствующыя гра́ды и вся́ гра́ды страны́ до́бре сохрани́т. О святи́телю преди́вный! Ми́р ве́сь предста́тельством твои́м умири́: от гла́да, жа́жды, па́губы и крамолы́ изба́ви ны́, от стихи́й ча́сто находя́щих на ны́, гре́х ра́ди на́ших мно́гих, от тлетво́рных ве́тр, губи́тельныя я́звы и от нападе́ния иноплеме́нных сохрани́. Ста́рыя уте́ши, ю́ныя наста́ви, безу́мныя умудри́, вдови́цы поми́луй, сироты́ заступи́, младе́нцы возрасти́, плене́нныя и в темни́це седя́щыя свободи́ и возврати́, немощству́ющыя исцели́, пла́вающым бу́ди до́брый ко́рмчий, и все́х везде́ те́пле призыва́ющих тя́ и с ве́рою притека́ющих к тебе́, и усе́рдно припа́дающих, и моля́щихся тебе́ от клеветы́ и вся́ких напа́стей, вра́г ви́димых и неви́димых, бе́д и вся́каго зла́ твои́м хода́тайством свободи́. Моли́ о на́с Всеще́драго и Человеколюби́ваго Христа́ Бо́га на́шего, да прости́т на́м вся́ грехи́, от ю́ности соде́янныя на́ми, и в де́нь стра́шнаго прише́ствия Его́ от шу́ияго стоя́ния изба́вит на́с и ра́дости святы́х прича́стники сотвори́т, да ку́пно с ни́ми сла́вим Еди́наго в Тро́ице Бо́га, Отца́ и Сы́на и Свята́го Ду́ха, во ве́ки веко́в. Ами́нь.

Yandex Metrika