Конда́к 1.

Избра́нный уго́дниче и страстоте́рпче Христо́в, Евге́ние пресла́вне, пла́менем любви́ Христо́вой разжига́емый, на ка́мене ве́ры процве́л еси́; мно́гие ско́рби и кончи́ну лю́тую со страстоте́рпцы ца́рственными от богобо́рцев кро́тко претерпе́л еси́, ду́шу твою́ за ве́ру и пра́вду положи́л еси́. Ны́не всечестну́ю твою́ па́мять пра́зднующе, похва́льное пе́ние прино́сим ти́. Ты́ же, я́ко име́яй дерзнове́ние ко Влады́це небесе́ и земли́, от вся́ких на́с бе́д свободи́, к тебе́ ны́не зову́щих:

Ра́дуйся, святы́й новому́чениче Евге́ние, врачу́ благи́й и ми́лостивый.

И́кос 1.

А́нгел земны́й и челове́к небе́сный бы́л еси́, святы́й Евге́ние, от ю́ности бо до са́мой кончи́ны му́ченической неуста́нно Го́сподеви рабо́тал еси́, труды́ ко трудо́м прилага́я и от си́лы в си́лу восходя́, да просла́вится в тебе́ Христо́с, Врачу́ющий ду́ши и телеса́ на́ша, Его́ же ра́ди подвиза́лся еси́, Его́ же возлюби́л еси́, Его́ же Еди́наго вожделе́ душа́ твоя́, Его́ же ра́ди страда́ния мно́ги претерпе́л еси́, Его́ же благода́тию све́тло укра́шен еси́. Сего́ ра́ди тебе́, на небеси́ и на земли́ просла́вленному вопие́м си́це:

Ра́дуйся, бо́дрости и трезве́ния предо́брый учи́телю; ра́дуйся, нераде́ния и пра́здности изве́стный прогони́телю.

Ра́дуйся, трудолю́бия, е́же вся́кому бла́гу утвержде́ние, рачи́телю; ра́дуйся, богобоя́зненных миря́н скоропослу́шливый попечи́телю.

Ра́дуйся, враче́й похвало́ и новому́чеников украше́ние; ра́дуйся, неви́нно от пребеззако́нных люде́й к Христу́ пострада́вый.

Ра́дуйся, моли́твам на́шим, а́ще и немощны́м, с любо́вию вне́млющий; ра́дуйся, от всея́ души́ и се́рдца возноси́мая к ва́м проше́ния на́ша исполня́ющий.

Ра́дуйся, святы́й новому́чениче Евге́ние, врачу́ благи́й и ми́лостивый.

Конда́к 2.

Ви́дя Христо́с Бо́г ду́шу твою́, всесла́вне Евге́ние, ко прия́тию сло́ва Бо́жия предугото́ванную, просвети́ тя́ благода́тию свое́ю, ты́ бо вы́ну Пути́, И́стине и Жи́зни неизме́нно до кончи́ны му́ченическия твоя́ сле́довал еси́; ны́не же ве́ру соблю́дши, я́ко ве́рный во́ин Христо́в, ра́дуешися в Небе́сном Оте́честве, воспева́я Го́сподеви: Аллилу́иа.

И́кос 2.

Ра́зумом твои́м, честны́й Евге́ние, от дне́й ю́ности твоея́, о́бразу служе́ния отца́ твоего́ после́дуя, в иску́сстве врачева́ния возраста́л еси́, во всеучи́лище имени́тем трудя́ся усе́рдно, па́че же сего́ любо́вию к лю́дем стра́ждущим просия́л еси́, бе́дных безме́здно врачу́я и всего́ себе́ по заве́ту апо́стольскому лю́дем отдава́я. Си́це мо́лим тя́: преобрази́ ду́ши на́ша любо́вию милосе́рдою, да возмо́жем и мы́ тяготы́ бли́жних носи́ти и служи́ти и́ма нелицеме́рне, вы́ну в благода́ти Бо́жией возраста́ти, зову́ще ти́:

Ра́дуйся, роди́телей имени́тых ча́до благослове́нное; ра́дуйся, на дре́ве ро́да своего́ плодонося́щею ве́твию восцве́тший.

Ра́дуйся, дарова́нный тала́нт приумно́живый; ра́дуйся, пра́вды и и́стины всегда́ иска́вый.

Ра́дуйся, преподо́бному Ага́питу в тве́рдом упова́нии на Го́спода подража́вый; ра́дуйся, подо́бно Серафи́му ра́дость духо́вную стяжа́вый.

Ра́дуйся, из глубины́ неве́рия извлека́ющий; ра́дуйся, мно́гих в ра́зуме просвеща́ющий.

Ра́дуйся, святы́й новому́чениче Евге́ние, врачу́ благи́й и ми́лостивый.

Конда́к 3.

Си́ла Вы́шняго и Покро́в Цари́цы Небе́сныя осеня́ше тя́, добронра́вный Евге́ние, в годи́ну бра́ни с Япо́ниею язы́ческою, егда́ горя́ любо́вию ко стра́ждущим во́ином, ты́ служи́л еси́ и́м враче́бным иску́сством, подража́я Пантелеи́мону Цели́телю, не взира́я на опа́сности и лише́ния, непреста́нно в се́рдце Бо́гу поя́ пе́снь: Аллилу́иа.

И́кос 3.

Иму́ще да́р сло́ва, от Бо́га тебе́ да́нный, прехва́льный Евге́ние, врачу́я телеса́ стра́ждущих, ты́ не забыва́л еси́ и о душа́х и́х, утеша́я, вразумля́я, наставля́я и врачу́я от малове́рия, уны́ния и отча́яния зла́го. Сие́ же у́бо ны́не воспомина́юще, про́сим тя́: сотвори́ моли́тву за ны́ ко Врачу́ ду́ш и теле́с, да и мы́ твои́м предста́тельством изба́вимся от скорбе́й вре́менных и ве́чных, ве́дуще бо тя́ помо́щника неусы́пна, умиле́нно вопие́м ти́:

Ра́дуйся, Еди́наго Христа́ все́м се́рдцем возлюби́вый; ра́дуйся, я́ко милосе́рдный самаряни́н, бли́жним послужи́вый.

Ра́дуйся, наде́жду несомне́нную в ду́ши и́х влага́вый; ра́дуйся, от суеты́ многообра́зней у́м на́ш свобожда́ющий.

Ра́дуйся, к позна́нию блага́го Про́мысла Бо́жия на́с обраща́ющий; ра́дуйся, к неле́ностному творе́нию моли́твы привлека́ющий.

Ра́дуйся, благопло́дностию ду́ши на́ша наполня́ющий; ра́дуйся, изможде́нных го́рестьми жите́йскими укрепля́ющий;

Ра́дуйся, святы́й новому́чениче Евге́ние, врачу́ благи́й и ми́лостивый.

Конда́к 4.

Бу́рю вну́трь по́мыслов и страсте́й во́лны безбе́дно преше́д, святы́й Евге́ние, обре́л бо еси́ ти́хое приста́нище Христа́, Ему́же неле́ностно во мно́зе долготерпе́нии порабо́тал еси́; си́це мо́лим тя́: ми́ром Госпо́дним напо́лни ду́ши на́ша, благомы́слием озари́ умы́, да уда́лимся мы́ от скве́рны грехо́вныя и возмо́жем вы́ну сле́довати заве́том Спаси́теля, воспева́я Ему́ о тебе́: Аллилу́иа.

И́кос 4.

Слы́шавше о тебе́ благове́рная Цари́ца Алекса́ндра, я́ко, прехва́льне Евге́ние, зна́нием врачева́ния ины́х превосхо́диши, я́ко с усе́рдием и любо́вию во́ином стра́ждущим на по́ле бра́ни послужи́л еси́, призва́ тя́ к служе́нию в черто́ги своя́; Ца́рь же Никола́й са́ном лейб-ме́дика тя́ почти́. Мы́ же сла́вяще Бо́га, вознося́щаго смире́нных се́рдцем, и венча́ющаго и́х ми́лостию и щедро́тами, взыва́ем ти́ си́це:

Ра́дуйся, лю́тых и неисце́льных неду́гов теле́сных врачева́телю; ра́дуйся, не́мощей и страсте́й душе́вных цели́телю.

Ра́дуйся, все́м приходя́щим к тебе́ бла́г преизоби́льный пода́телю; ра́дуйся, терпе́нием и му́жеством души́ на́ша украша́ющий.

Ра́дуйся, на́с, а́лчущих и жа́ждущих пра́вды, насыща́ющий; ра́дуйся, се́рдца на́ша благода́тию Бо́жиею, ва́м да́нною, очища́ющий.

Ра́дуйся, о́чи на́ши духо́вныя к зре́нию Бо́га изощря́ющий; ра́дуйся, вражды́ и ссо́ры на́ша умиротворя́ющий.

Ра́дуйся, святы́й новому́чениче Евге́ние, врачу́ благи́й и ми́лостивый.

Конда́к 5.

Боготе́чной звезде́, пу́ть ко Христу́ указу́ющей подо́бен вои́стину яви́лся, святы́й му́чениче Евге́ние, ты́ бо во все́ дни́ земна́го жития́ твоего́ ученико́м, друго́м и враго́м, а па́че, бли́жним твои́м явля́л еси́ о́браз доброде́тельнаго жития́, ны́не, мы́, воспомина́я по́двизи твоя́, ра́достно воспева́ем Христу́, всемогу́щему Врачу́ Ду́ш и теле́с, вы́ю твою́ свое́ю благода́тию укрепля́вшему, пе́ние благода́рственное: Аллилу́иа.

И́кос 5.

Ви́дя па́ки страда́ния во́инов во дни́ войны́ с Герма́нией, любо́вию же подвиза́ем ку́пно с Цари́цею Алекса́ндрою лече́бницу пресла́вную в Ца́рском Селе́ сотвори́л еси́, иде́же мно́гия лю́ди стра́ждущия исцеле́ния духо́вное и теле́сное обрета́ху. Мы́ же, ны́не вся́ сия́ помина́юще, про́сим тя́, святы́й Евге́ние, твое́ю моли́твою исцели́ и на́с, гре́шных, да благода́рственне зове́м ти́:

Ра́дуйся, врача́м мы́сль благу́ю на се́рдце полага́ющий; ра́дуйся, в служе́нии бли́жнему и́х при́сно укрепля́ющий.

Ра́дуйся, больны́х в кро́тости и терпе́нии утвержда́ющий; ра́дуйся, пути́ исцеле́ния все́м на́м указу́ющий.

Ра́дуйся, оста́вленных врача́ми со одра́ боле́зни воздвиза́ющий; ра́дуйся, вну́тренний мра́к ду́ш на́ших све́том Христо́вым озаря́ющий.

Ра́дуйся, отступи́вших от пра́выя ве́ры на пу́ть спасе́ния возвраща́ющий; ра́дуйся, блужда́ющих по мо́рю жития́ сего́ му́дре окормля́ющий.

Ра́дуйся, святы́й новому́чениче Евге́ние, врачу́ благи́й и ми́лостивый.

Конда́к 6.

Пропове́дника тя́ благоче́стия яви́ Госпо́дь во гра́де Петро́ве и Селе́ Ца́рском, па́че же си́х в преде́лех Сиби́рских, святы́й Евге́ние: кто́ бо не умили́тся, воспомина́я вели́кия твоя́ доброде́тели: му́дрость и любы́, кро́тость и терпе́ние, моли́тву и милосе́рдие, я́ко не то́кмо честны́м и благоро́дным житие́м просия́л еси́, но и бли́жнему безме́здно послужи́л еси́, и ве́ру Христо́ву пред лице́м вла́сти богобо́рныя испове́дал еси́: те́мже мы́, сла́вяще Бо́га, ди́внаго во святы́х Свои́х пое́м: Аллилу́иа.

И́кос 6.

Возсия́л еси́ све́том ве́ры несомне́нныя в годи́ну исптыта́ния лю́таго, прехва́льный Евге́ние, егда́ лю́дие богоотсту́пныя воздвиго́ша бра́нь проти́в Всемогу́щаго Бо́га на́шего и Пома́занника Его́, в дни́ у́бо потече́, я́ко вода́ кро́вь му́ченик и страстоте́рпцев, за Христа́ и пра́вду Его́ умерщвля́емых. Ты́ же, уго́дниче Бо́жий, изгна́ние из гра́да Петро́ва в Тобо́льск ку́пно с Царе́м Никола́ем претерпе́л еси́; сие́ же воспомина́я ны́не про́сим тебя́: обнови́ ве́ру и оживотвори́ наде́жду на́шу, да зове́м ти́ си́це:

Ра́дуйся, стра́х сме́рти и страда́ний вели́кою ве́рою в Воскре́сшаго Бо́га низложи́вый; ра́дуйся, на по́двиг духо́вный, мно́гих о́крест тебе́ су́щих воодушеви́вый.

Ра́дуйся, от тле́ющих у́глий не́нависти ду́ши на́ша омыва́ющий; ра́дуйся, да́ром бла́гости небе́сной на́с обогаща́ющий.

Ра́дуйся, от злосло́вия и осужде́ния уста́ на́ша оберега́ющий; ра́дуйся, сло́вом благи́м бли́жним служи́ть науча́ющий.

Ра́дуйся, в ка́ждом челове́ке ви́дети о́браз Бо́жий сподвига́ющий; ра́дуйся, милосе́рдную любо́вь в сердца́х воскреша́ющий;

Ра́дуйся, святы́й новому́чениче Евге́ние, врачу́ благи́й и ми́лостивый.

Конда́к 7.

Хотя́ после́довати Христу́, подража́л Ему́ всеусе́рдно, прия́в на себя́ и́го Его́, научи́лся от Него́ кро́тости и смире́нию, возжела́л еси́ все́м се́рдцем твои́м, блаже́нне Евге́ние, еди́ному Го́споду рабо́тати, себе́ ни во что́же вмени́л еси́, труды́ к трудо́м в ду́се кро́тости и смире́ния прилага́я, дерзнове́ние в моли́тве стяжа́л еси́, бли́жних твои́х призыва́я ве́рно сла́вити Бо́га, в Тро́ице Еди́наго, и воспева́ти Ему́: Аллилу́иа.

И́кос 7.

Но́ваго свети́льника дарова́ Госпо́дь Це́ркви Росси́йской – Евге́ния, врача́ благоиску́снаго и новому́ченика всесла́внаго, ты́ бо, уго́дниче Бо́жий, ны́не в вы́шних пребыва́еши, но и на́с, ни́зших, не оставля́еши твои́ми моли́твами и предста́тельством у Христа́ – Царя́ сла́вы и Го́спода Бо́га на́шего. Сего́ ра́ди, недоуме́юще благохвали́ти тя́ по достоя́нию, со умиле́нием се́рдца, из глубины́ души́, к тебе́ взыва́ем:

Ра́дуйся, все́х с ве́рою приходя́щих к тебе́ благода́тно освяща́ющий; ра́дуйся, усе́рдно призыва́ющим тебя́ помога́ющий.

Ра́дуйся, све́том твои́м на́шу тьму́ грехо́вную разгоня́ющий; ра́дуйся, теплото́ю любви́ твоея́ на́ша хла́дная сердца́ согрева́ющий.

Ра́дуйся, ко́зни вра́жия предста́тельством твои́м разруша́ющий; ра́дуйся, сокро́вище ми́ра духо́внаго на́м открыва́ющий.

Ра́дуйся, к све́ту Христо́ву заблу́ждшия наставля́ющий; ра́дуйся, упова́нию христиа́нскому ве́рныя науча́ющий.

Ра́дуйся, святы́й новому́чениче Евге́ние, врачу́ благи́й и ми́лостивый.

Конда́к 8.

Стра́нному и неизрече́нному смире́нию воплоти́вшагося Бо́га Сло́ва подража́я, страстоте́рпче пресла́вне, са́м испо́лнился еси́ вели́каго смире́ния и незло́бия, да́же ко враго́м наро́да и Царя́ твоего́. Мы́ же ны́не мо́лим тя́, уго́дниче Бо́жий, представи́тельством твои́м небе́сным испроси́ и на́м сия́ боголюбе́зныя доброде́тели, да не порабо́тимся страсте́м грехо́вным, но испо́лнимся ду́ха любви́ и кро́тости к бли́жним на́шим и благоче́стно воспое́м Спаси́телю на́шему: Аллилу́иа.

И́кос 8.

Ве́сь испо́лнь любве́ Христо́вы, благове́рный Евге́ние, не оста́вил еси́ венцено́сную семью́ в заточе́нии су́ще, и с ве́лию любо́вию послужи́л еси́ и́ма а́ки вра́ч благи́й и му́дрый, а́ки сомоли́твенник и напе́рсник ве́рный, а́ки дру́г благогове́йный, а́ки христиа́нин пома́заннику Бо́жиему. Мы́ любве́ и ве́рности твоея́ после́довати жела́я, таковы́я похвалы́ с наде́ждою возно́сим ти́:

Ра́дуйся, томле́ния в заточе́нии от злочести́вых богоотсту́пников претерпе́вый; ра́дуйся, в ско́рбех земны́х небреги́й и ра́дость небе́сную обреты́й.

Ра́дуйся, от мра́ка земна́го к Небе́сному све́ту устреми́выйся; ра́дуйся, ве́ре пра́вой и благоче́стию на́с науча́ющий.

Ра́дуйся, наде́жду изве́стную на́м подава́ющий; ра́дуйся, любо́вь нелицеме́рную в на́с воспламеня́ющий.

Ра́дуйся, в пренесе́нии испыта́ний и гоне́ний на́с укрепля́ющий; ра́дуйся, потемне́нныя грехми́ очеса́ ду́ш на́ших све́том ева́нгельским просвеща́ющий.

Ра́дуйся, святы́й новому́чениче Евге́ние, врачу́ благи́й и ми́лостивый.

Конда́к 9.

Все́м житие́м, милосе́рдаго служе́ния и доброде́телей многоразли́чных испо́лненнаго, твои́м привле́кл еси́ к себе́ ве́лию благода́ть му́ченичества, благове́рный боля́рине Евге́ние. Навы́кл бо еси́ измла́да прилепля́тися Бо́гови се́рдцем твои́м, страстоте́рпче пречу́дный. Научи́ у́бо и ны́, недосто́йныя, иска́ти па́че всего́ Ца́рствия Бо́жия, презира́ти же преходя́щая и тле́нная, воспева́я во умиле́нии Го́сподеви: Аллилу́иа.

И́кос 9.

Вети́и многовеща́нныя не возмо́гут по достоя́нию изрещи́ пречу́днаго прославле́ния па́мяти твоея́, прехва́льный страстоте́рпче Евге́ние; мы́ же, к покая́нию тобо́ю подвиза́емии, благосе́рдию твоему́ подража́ти хотя́ще, про́сим у́бо тя́: утверди́ на́с в ве́ре и́стинней тве́рдо стоя́ти, отврати́ се́рдца на́ша от кри́вды лжепроро́ков рая́ земна́го, в и́стине ева́нгельстей утверди́ ны́, си́лу зломы́слия челове́ческаго твои́ма святы́ми моли́твами поколеби́ и разруши́, святы́й новому́чениче, бла́гостию и человеколю́бием преобрази́ изсыха́ющия души́, и приими́ многоми́лостивно велича́ния сия́:

Ра́дуйся, к Распе́ншемуся на́с ра́ди на Кресте́ ра́зум сво́й вы́ну возводи́вший; ра́дуйся, страда́льческою кончи́ною твое́ю незло́бие А́гнца Бо́жия пропове́давый.

Ра́дуйся, нести́ лю́дям Христо́в све́т призыва́ющий; ра́дуйся, благода́тную си́лу исцеле́ния прося́щим подаю́щий.

Ра́дуйся, от прока́зы грехо́вныя на́с избавля́ющий; ра́дуйся, утеше́ние благо́е в сердца́ ниспосыла́яй.

Ра́дуйся, упова́ние на милосе́рдие Бо́жие благода́тно вселя́яй; ра́дуйся, грехо́в оставле́ние и в доброде́тельном житии́ укрепле́ние на́м подаю́щий.

Ра́дуйся, святы́й новому́чениче Евге́ние, врачу́ благи́й и ми́лостивый.

Конда́к 10.

Спаси́тельнаго по́двига твоего́ сверша́я тече́ние, Евге́ние достохва́льне, отве́ргл еси́ глаго́лы богобо́рцев, принужда́вших тя́ импера́тора Никола́я, цари́цу Алекса́ндру и ча́д и́х оста́вити и служе́ние ино́е прия́ти, ты́ бо, до́лгу врача́ и че́сти дворя́нской после́дуя, во сла́ве с царе́м боговенча́нным пребы́л еси́ и в го́рести ве́рным служи́телем ему́ яви́лся еси́, на Го́спода Предве́чнаго упова́ние возлага́я, ча́д свои́х Его́ про́мыслу пре́дал еси́, та́ко бо Авраа́мову наде́жду стяжа́л еси́ и ве́рою И́ову многострада́льному уподо́бился еси́. Ны́не со все́ми пра́ведники, от ве́ка в доли́ну ве́чной ра́дости изше́дшими велича́еши Отца́ Небе́снаго пе́нием всепобе́дным: Аллилу́иа.

И́кос 10.

Стена́ кре́пкая, ухищре́ньми диа́вола не одоле́нная, пребы́л еси́ до конца́, му́чениче Христо́в Евге́ние, в до́ме Ипа́тиевом со ца́рственными му́чениками заключе́нный, взира́я на нача́льника ве́ры и соверши́теля Иису́са, за Ни́м бо после́довал еси́ да́же до сме́рти кре́стной, ве́дая у́бо я́ко Христо́с сме́ртию Свое́ю сме́рть попра́, и за Него́ убие́нныя ве́чно с Ни́м соца́рствуют в оби́телех Отца́ Небе́снаго. Почита́я же святу́ю кончи́ну твою́, покланя́емся неизсле́димому Про́мыслу Всевы́шняго, сподо́бльшаго тя́ прича́стника бы́ти неизрече́нныя сла́вы Своея́ в Иерусали́ме Небе́сном, отону́дуже приклони́ у́хо твое́ ко гла́сом на́шим, взыва́ющим ти́ си́це:

Ра́дуйся, ни́щий ду́хом, я́ко твое́ е́сть Ца́рствие Небе́сное; ра́дуйся, скорбя́щий и пла́чущий, я́ко уте́шил тя́ Госпо́дь.

Ра́дуйся, страда́льче кро́ткий, я́ко Бо́гом просла́вленный; ра́дуйся, а́лчущий и жа́ждущий пра́вды, я́ко насы́тивыйся.

Ра́дуйся, ми́лостивый к стра́ждущим, я́ко Бо́гом поми́лованный; ра́дуйся, чи́стый се́рдцем, я́ко Бо́га ны́не непосре́дственно зри́ши.

Ра́дуйся, миротво́рче, сыно́м Бо́жиим нарече́нный; ра́дуйся, гони́мый за пра́вду, я́ко твое́ е́сть ны́не Ца́рствие Небе́сное.

Ра́дуйся, святы́й новому́чениче Евге́ние, врачу́ благи́й и ми́лостивый.

Конда́к 11.

Пе́ние непреста́нное Иису́су Сладча́йшему и Пречи́стей Его́ Ма́тери вознося́ще, всесла́вный Евге́ние, благословля́я уби́йц свои́х и моля́ще о проще́нии и́х, я́ко не ве́дают чию́ злу́ю во́лю творя́т, си́м и на́с науча́я враго́в свои́х благословля́ти, а не проклина́ти, воспева́я богокра́сную пе́снь: Аллилу́иа.

И́кос 11.

Светоза́рнаго свети́льника, еле́я моли́твы чи́стыя преиспо́лнена, и пла́менем ве́ры све́тло сия́юща, воздви́же тя́ Госпо́дь, святы́й новому́чениче Евге́ние, все́м благочести́вым христиа́ном, благоче́стно па́мять твою́ чту́щим. Мы́ же, оча́ми ве́ры зри́м тя́ в Тро́ическом Све́те в со́нме святы́х, в кро́ви А́гнчей ри́зы своя́ убели́вших, вы́ну пребыва́ющаго и на́м ми́ра и благоде́нствия прося́щаго. Сего́ ра́ди с наде́ждою воспева́ем ти́ си́це:

Ра́дуйся, со а́нгелы пресве́тлыми при́сно торжеству́яй; ра́дуйся, Христа́ во житии́ и страда́ниях твои́х возвели́чивый.

Ра́дуйся, к Ца́рству Небе́сному у́зким путе́м возше́ствовавый; ра́дуйся, в со́нме новому́чеников ве́чный поко́й и блаже́нство стяжа́вый.

Ра́дуйся, от страсте́й и тяго́т душе́вных на́с пресла́вно свобожда́яй; ра́дуйся, благи́я мы́сли и чу́вства в недоуме́нии су́щим внуша́яй.

Ра́дуйся, от душепа́губнаго зла́ на́с отвраща́ющий; ра́дуйся, теплоту́ душе́вную христиа́ном да́рующий.

Ра́дуйся, святы́й новому́чениче Евге́ние, врачу́ благи́й и ми́лостивый.

Конда́к 12.

Благода́ти обита́ющей в тебе́ дивя́щеся, велича́ем тя́, боля́рине Евге́ние: ве́руем, я́ко дела́ Бо́жия на земли́ соверши́в, и страда́ния ве́лия претерпе́в, ны́не с Го́сподем во оби́телех Его́ почива́еши, призира́я на на́с с высоты́ небе́сныя, и приклоня́я к на́м вы́шнее милосе́рдие. На твое́ заступле́ние наде́ющеся, и на благода́тную по́мощь твою́ упова́юще, славосло́вим Ди́внаго во святы́х Свои́х Бо́га: Аллилу́иа.

И́кос 12.

Воспева́я ди́вное и пра́ведное житие́ твое́, дела́ милосе́рдия, служе́ние твое́ бли́жним твои́м, вся́ по́двиги твоя́, и́же ве́рою, ве́рностию и трудо́м ве́лиим во сла́ву Бо́жию соверши́л еси́, восхваля́ем, почита́ем испове́дничество твое́, ублажа́ем и му́ченическую кончи́ну твою́, прехва́льный Евге́ние, про́сим и мо́лимся тебе́, помози́ на́м, святы́й засту́пниче, во многоразли́чныя искуше́ния, боре́ния и напа́сти впа́дающим. Наипа́че же укрепи́ и научи́ на́с, да возмо́жем свято́му твоему́ житию́ подража́тели бы́ти и благода́рственно восхва́лим тя́ си́це:

Ра́дуйся, пра́вило ве́ры и благоче́стия о́бразе всесоверше́нный; ра́дуйся, пла́мень, благода́тию Боже́ственнаго Ду́ха возжже́нный.

Ра́дуйся, со семью́ новому́чениками росси́йскими торжеству́яй; ра́дуйся, с царе́м Никола́ем Па́сху ве́чную торжеству́яй.

Ра́дуйся, с цари́цею Алекса́ндрою Отца́ Небе́снаго велича́яй; ра́дуйся, со царе́внами святы́ми Ма́терь Бо́жию восхваля́яй.

Ра́дуйся, с царе́вичем Алекси́ем ми́лость Бо́жию к на́м приклоня́ющий; ра́дуйся, ско́рый послу́шниче все́х с ве́рою призыва́ющих тя́.

Ра́дуйся, святы́й новому́чениче Евге́ние, врачу́ благи́й и ми́лостивый.

Конда́к 13.

О, преди́вный и пресла́вный засту́пниче на́ш, достохва́льный новому́чениче Евге́ние! Приими́ ны́не ма́лое моле́ние сие́ на́ше, во умиле́нии серде́ц тебе́ возноси́мое, и умоли́ Го́спода на́шего Иису́са Христа́, да изба́вит ны́ от вся́кия напа́сти вра́жия, и сподо́бит на́с в непреста́нной моли́тве и покая́нии ве́ру Христо́ву до конца́ сохрани́ти и гряду́щая в Небесе́х блага́я улучи́ти, воспева́я Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгел земны́й и челове́к небе́сный бы́л еси́, святы́й Евге́ние, от ю́ности бо до са́мой кончи́ны му́ченической неуста́нно Го́сподеви рабо́тал еси́, труды́ ко трудо́м прилага́я и от си́лы в си́лу восходя́, да просла́вится в тебе́ Христо́с, Врачу́ющий ду́ши и телеса́ на́ша, Его́ же ра́ди подвиза́лся еси́, Его́ же возлюби́л еси́, Его́ же Еди́наго вожделе́ душа́ твоя́, Его́ же ра́ди страда́ния мно́ги претерпе́л еси́, Его́ же благода́тию све́тло укра́шен еси́. Сего́ ра́ди тебе́, на небеси́ и на земли́ просла́вленному вопие́м си́це:

Ра́дуйся, бо́дрости и трезве́ния предо́брый учи́телю; ра́дуйся, нераде́ния и пра́здности изве́стный прогони́телю.

Ра́дуйся, трудолю́бия, е́же вся́кому бла́гу утвержде́ние, рачи́телю; ра́дуйся, богобоя́зненных миря́н скоропослу́шливый попечи́телю.

Ра́дуйся, враче́й похвало́ и новому́чеников украше́ние; ра́дуйся, неви́нно от пребеззако́нных люде́й к Христу́ пострада́вый.

Ра́дуйся, моли́твам на́шим, а́ще и немощны́м, с любо́вию вне́млющий; ра́дуйся, от всея́ души́ и се́рдца возноси́мая к ва́м проше́ния на́ша исполня́ющий.

Ра́дуйся, святы́й новому́чениче Евге́ние, врачу́ благи́й и ми́лостивый.

Конда́к 1.

Избра́нный уго́дниче и страстоте́рпче Христо́в, Евге́ние пресла́вне, пла́менем любви́ Христо́вой разжига́емый, на ка́мене ве́ры процве́л еси́; мно́гие ско́рби и кончи́ну лю́тую со страстоте́рпцы ца́рственными от богобо́рцев кро́тко претерпе́л еси́, ду́шу твою́ за ве́ру и пра́вду положи́л еси́. Ны́не всечестну́ю твою́ па́мять пра́зднующе, похва́льное пе́ние прино́сим ти́. Ты́ же, я́ко име́яй дерзнове́ние ко Влады́це небесе́ и земли́, от вся́ких на́с бе́д свободи́, к тебе́ ны́не зову́щих:

Ра́дуйся, святы́й новому́чениче Евге́ние, врачу́ благи́й и ми́лостивый.

Моли́тва пе́рвая.

Святы́й сла́вный испове́дниче и страстоте́рпче Евге́ние! Ве́руем и упова́ем, я́ко страда́ньми и богоуго́дною жи́знию твое́ю стяжа́вый ве́лию ми́лость и дерзнове́ние у Го́спода Бо́га, не забы́л еси́ достоя́ния твоего́ земна́го, оте́чества на́шего, в не́мже обурева́еми есмы́, почита́тели твои́, мно́гими напа́стьми вра́жиими и страстьми́ жите́йскими. Те́мже про́сим тя́: моли́твами и предста́тельством твои́м умоли́ Го́спода на́шего Иису́са Христа́, да изба́вит на́с от вся́ких бе́д и злы́х обстоя́ний, от вся́ких неду́гов и боле́зней и от все́х враго́в, ви́димых и неви́димых. О вели́кий уго́дниче Бо́жий! Воздохни́ о на́с, гре́шных, ко Влады́це вся́ческих, да прости́т на́м вся́ согреше́ния на́ша и низпо́слет на ны́ благода́ть Всесвята́го Ду́ха, да преста́вше вся́каго скверноде́йства, про́чее вре́мя живота́ на́шего во вся́ком благоче́стии и чистоте́ поживе́м и, та́ко благоугоди́вше Го́споду, сподо́бимся жи́зни вечноблаже́нныя, пою́ще и воспева́юще превели́кое милосе́рдие Бо́жие и твое́ ми́лостивое предста́тельство за на́с у Престо́ла Бо́жия во ве́ки веко́в. Ами́нь.

Моли́тва втора́я.

О, пресла́вный страстоте́рпче Евге́ние, вели́кий уго́дниче Бо́жий, принеси́ на́шу сле́зную моли́тву Го́споду Бо́гу на́шему, уми́лостиви Его́ к на́м, гре́шным, да оты́мет гне́в сво́й пра́ведный и умири́т страну́ на́шу многострада́льную; да утверди́т благоде́нствие и тишину́, да низпо́слет на́м изоби́лие плодо́в земны́х и да возбрани́т враго́м на́шим оби́ду твори́ти си́рым и безпомо́щным. Те́мже, припа́дающе к ико́не твое́й, воспомина́ем с ве́рою страда́ния твоя́, за Христа́ претерпе́нная, и мо́лим тя́: не оста́ви на́с и испроси́ на́м у Го́спода блага́я вре́менная и ве́чная, да сла́вим просла́вльшаго тя́ Бо́га во ве́ки. Ами́нь.

Моли́тва тре́тия.

О, всесла́вный страстоте́рпче, достохва́льный уго́дниче Христо́в, Це́ркви Правосла́вныя побо́рниче, новому́чениче и цели́телю святы́й Евге́ние! Прекло́ньше коле́на мо́лим тя́: при́зри на ны́, гре́шныя, к заступле́нию твоему́ прибега́ющия, услы́ши сие́ ма́лое моле́ние на́ше и те́плым твои́м предста́тельством умоли́ Всемилосе́рдаго Бо́га, Ему́ же ны́не предстои́ши со А́нгелы и все́ми святы́ми, да сохрани́т на́с в едине́нии Правосла́вныя Це́ркви и утверди́т в сердца́х на́ших живы́й ду́х пра́выя ве́ры и благоче́стия, и изба́вит на́с от вся́каго искуше́ния и пре́лести бесо́вския. По вели́цей любви́ твое́й, е́юже бли́жния твоя́ возлюби́л еси́, испроси́ у Всеще́драго Бо́га Оте́честву твоему́ (и на́шему ку́пно), ми́р и благоустрое́ние; все́м же на́м, недосто́йным, усе́рдно к тебе́ прибега́ющим, богоуго́дное и безмяте́жное житие́ и до́брую христиа́нскую кончи́ну, та́йн Бо́жиих прича́стною. О святы́й засту́пниче на́ш, не оста́ви на́с, сла́бых и безпомо́щных, мо́лимся за ны́ ко Го́споду и Спа́су на́шему Иису́су Христу́, да да́рует О́н, Всеще́дрый и Премилосе́рдый Госпо́дь на́ш, вся́, я́же к по́льзе вре́менней и ве́чней поле́зная и потре́бная; да не возда́ст на́м по дело́м на́шим, но по неизрече́нному человеколю́бию Своему́ прости́т на́м грехи́ и согреше́ния на́ша, да изба́вит ны́ от вся́кия ну́жды и печа́ли, ско́рби и боле́зни; да ниспо́слет на́м благо́е наме́рение и си́лу подвиза́тися во исправле́нии жития́ на́шего, и в бу́дущем ве́це да сподо́бит на́с вни́ти в Ца́рствие Небе́сное и сла́вити ку́пно с тобо́ю Всесвято́е И́мя Отца́ и Сы́на и Свята́го Ду́ха во ве́ки веко́в. Ами́нь.