Конда́к 1.

Избра́ннии чудотво́рцы и уго́дницы Бо́жии, свята́я кня́жеская дво́ице, Васи́лие прехва́льне и Константи́не преди́вне, вы́, я́ко два́ столпа́ непоколеби́ма, зе́млю Яросла́вскую утвержда́ете и по́мощь всеси́льную христиа́ном да́руете; те́мже, па́мять ва́шу све́тло пра́зднующе, пе́снь хвалы́ поси́льную прино́сим ва́м и уми́льно вопие́м:

Ра́дуйтеся, Васи́лие и Константи́не, земли́ Яросла́вския чудотво́рцы прехва́льнии.

И́кос 1.

А́нгелом Небе́сным удивле́ние бы́сте, святи́и сла́внии кня́зие, Васи́лие и Константи́не, егда́ возжела́ли есте́ Христу́ со усе́рдием послужи́ти и за́поведи Его́ всеце́ло испо́лнити. Те́мже равноа́нгельно на земли́ пожи́ли есте́, ны́не же вку́пе со безпло́тными пе́снь хвалы́ Царю́ царе́й воспева́ете и моли́твы те́плыя за ны́ Бо́гу возно́сите; мы́ же, недосто́йная ча́да ва́ша, благода́рная ва́м возглаша́ем, пою́ще ра́достно похвалу́ сицеву́ю:

Ра́дуйтеся, А́нгелом Небе́сным подо́бницы; ра́дуйтеся, ве́ры правосла́вныя побо́рницы.

Ра́дуйтеся, адама́нти пресве́тлии и столпи́ Це́ркве непоколеби́мии; ра́дуйтеся, кня́зие пречу́днии, Оте́честву стено́ необори́мая.

Ра́дуйтеся, догма́тов церко́вных тве́рдии храни́телие; ра́дуйтеся, о наро́де Бо́жии те́плии попечи́телие.

Ра́дуйтеся, лучи́ духо́вныя Со́лнца Жива́го; ра́дуйтеся, хра́мины украше́нныя Ду́ха Свята́го.

Ра́дуйтеся, Васи́лие и Константи́не, земли́ Яросла́вския чудотво́рцы прехва́льнии.

Конда́к 2.

Ви́дяще, я́ко сокро́вище многоце́нное, святы́я мо́щи ва́ша, чудеса́ и исцеле́ния оби́льно подаю́щия, лю́дие с ве́рою к ни́м припа́дают и уми́льно я́ лобыза́ют, восхваля́юще ва́с, ди́внии уго́дницы Бо́жии Васи́лие и Константи́не, а́лчущих пита́телие, си́рых засту́пницы, немощны́х врачи́, Бо́гу же, дарова́вшу ва́м кре́пость и си́лу, все́м се́рдцем воспева́ют: Аллилу́иа.

И́кос 2.

Ра́зум Боже́ственный озари́ сердца́ ва́ша, святи́и благове́рнии кня́зие Васи́лие и Константи́не, егда́, ве́ру правосла́вную в наро́де свое́м утвержда́юще, пред ха́ном пред неве́рными сию́ безбоя́зненно возвести́ли есте́, сего́ ра́ди и са́ми от Христа́ просла́влени бы́сте и венце́м побе́дным от руки́ Госпо́дни венча́стеся; те́мже мо́лим вы́, святу́ю дво́ицу князе́й прехва́льных: огради́те ва́шими моли́твами гра́д Яросла́вль и все́ Оте́чество на́ше и от вся́каго наве́та вра́г ви́димых и неви́димых изба́вите ны́, ублажа́ющия ва́с похвалы́ сицевы́ми:

Ра́дуйтеся, би́сери многоце́ннии, святы́я мо́щи своя́ лю́дем дарова́вшии; ра́дуйтеся, кла́дязи неисчерпа́емии, всеси́льную по́мощь христиа́ном подаю́щии.

Ра́дуйтеся, ма́слины плодоно́сныя, исцеле́ния оби́льно источа́ющия; ра́дуйтеся, ро́ждие виногра́да Христо́ва, оби́льный пло́д благода́ти творя́щия.

Ра́дуйтеся, пода́тели боже́ственных утеше́ний; ра́дуйтеся, свети́льницы благода́тных озаре́ний.

Ра́дуйтеся, кри́ни ра́йских насажде́ний; ра́дуйтеся, сосу́ды духо́вных дарова́ний.

Ра́дуйтеся, Васи́лие и Константи́не, земли́ Яросла́вския чудотво́рцы прехва́льнии.

Конда́к 3.

Си́ла Вы́шняго с тобо́ю бе́, пресве́тлый кня́же Васи́лие, егда́ твори́л еси́ пра́вду Бо́жию, зе́млю Яросла́вскую от наше́ствия иноплеме́нных охраня́я, Це́рковь Ру́сскую в правове́рии утвержда́я и наро́д христиа́нский во благоче́стии сохраня́я; те́мже по́двизи жития́ твоего́ доброде́тельнаго воспомина́юще, Бо́га прославля́ем, пою́ще Ему́: Аллилу́иа.

И́кос 3.

Иму́ще вы́ те́плыя моли́твенники за зе́млю на́шу, во́ини Христо́вы непобеди́мии, оба́че на неви́димыя враги́ вои́телие преси́льнии, мо́лим вы́, святи́и Васи́лие и Константи́не, жи́телие пресла́внии Оте́чества Небе́снаго: воздежи́те ва́ши благоуго́днеи ру́це и воздохни́те у Престо́ла Бо́жия за ны́, пою́щия ва́м такова́я:

Ра́дуйтеся, Сло́ва Бо́жия кре́пции исполни́телие; ра́дуйтеся, во́ли Его́ неле́ностнии возвести́телие.

Ра́дуйтеся, благочести́вому житию́ усе́рднии учи́телие; ра́дуйтеся, апо́стольским дея́нием ре́вностнии подража́телие.

Ра́дуйтеся, Христу́ Бо́гу ве́рнии служи́телие; ра́дуйтеся, чино́в небе́сных сликовствова́телие.

Ра́дуйтеся, бесо́в пла́ч и зе́льное рыда́ние; ра́дуйтеся, христиа́н непрестаю́щее ра́дование.

Ра́дуйтеся, Васи́лие и Константи́не, земли́ Яросла́вския чудотво́рцы прехва́льнии.

Конда́к 4.

Бу́рю искуше́ний претерпе́л еси́, досточу́дне Константи́не, егда́ воста́ на зе́млю ру́сскую неве́рных власти́тель. Ты́ же, я́ко щи́т необори́мый, со дружи́ною на Ту́говой горе́ воздви́глся еси́ и кро́вь свою́ за Оте́чество излия́л еси́; те́мже по́двиг тво́й воспомина́ем и Бо́гу, укре́пльшему тя́, ра́достно пое́м: Аллилу́иа.

И́кос 4.

Слы́ша ева́нгельское сло́во: «Не убо́йтеся от убива́ющих те́ло», ты́, кня́же Константи́не, все́ упова́ние на Бо́га возложи́л еси́, враго́м Оте́чества твоего́ до́блественне противоста́л еси́ и жи́знь свою́ за дру́ги твоя́ положи́л еси́, те́мже со святы́ми сро́дники свои́ми в небе́сных черто́зех всели́лся еси́ и та́мо вку́пе с Васи́лием блаже́нства ра́йская вкуша́еши и мо́лишися о на́с, пою́щих ва́м такова́я:

Ра́дуйтеся, бу́рю зло́бных искуше́ний победи́вшии; ра́дуйтеся, ве́ру Христо́ву му́жественно пропове́давшии.

Ра́дуйтеся, до́блии во́ини и Оте́чества засту́пницы; ра́дуйтеся, те́плии моли́твенницы за ро́д христиа́нский.

Ра́дуйтеся, а́гнцы незло́бивии, Христу́ после́довавшии; ра́дуйтеся, же́ртвы живы́я, чи́стыя и благоуха́нныя.

Ра́дуйтеся, нищету́ духо́вную стяжа́вшии; ра́дуйтеся, бога́тство в Бо́зе ве́рою обре́тшии.

Ра́дуйтеся, Васи́лие и Константи́не, земли́ Яросла́вския чудотво́рцы прехва́льнии.

Конда́к 5.

Боготе́чныя зве́зды яви́стеся, святи́и кня́зие Васи́лие и Константи́не, вы́ бо све́том Христо́вым с небесе́ зе́млю озаря́ете, малове́рная сердца́ на́ша в ве́ре утвержда́ете, заблу́ждшия и отпа́дшия от Це́ркве Ма́тере в ло́но ея́ возвраща́ете, моля́щихся ва́м от поро́ков и вся́ких скве́рн отвраща́ете, науча́юще благода́рно Бо́гу пе́ти: Аллилу́иа.

И́кос 5.

Ви́дяще си́лу чудотворе́ний от святы́х моще́й ва́ших подава́емую и неду́ги разли́чныя врачу́ющую, лю́дие Бо́гу благодаре́ние ве́лие прино́сят, и ва́м, святи́и уго́дницы Васи́лие и Константи́не, я́ко сокро́вищницам благода́ти Бо́жия, те́пле вопию́т:

Ра́дуйтеся, сосу́ди злати́и Ду́ха Свята́го; ра́дуйтеся, жили́ща пресла́вная Бо́га Жива́го.

Ра́дуйтеся, заблу́ждших в ло́но Це́ркве возвраща́ющии; ра́дуйтеся, потемне́нных в страсте́х просвеща́ющии.

Ра́дуйтеся, от стра́сти пия́нства избавля́ющии; ра́дуйтеся, неду́жных безме́здно врачу́ющии.

Ра́дуйтеся, в по́двизех живу́щим помога́ющии; ра́дуйтеся, от лжеве́рия христиа́ны сохраня́ющии.

Ра́дуйтеся, Васи́лие и Константи́не, земли́ Яросла́вския чудотво́рцы прехва́льнии.

Конда́к 6.

Пропове́дницы сла́вы Цари́цы Небе́сныя бы́сте, святи́и богоно́снии отцы́ на́ши, Васи́лие и Константи́не, егда́ во Успе́нский хра́м Богоро́дицы Яросла́вскую Ея́ ико́ну принесо́сте, науча́юще лю́ди прославля́ти Пречи́стую Богома́терь, Сы́ну же Ея́ и Бо́гу на́шему Го́споду Иису́су Христу́ благода́рно воспева́ти: Аллилу́иа.

И́кос 6.

Возсия́ све́т в земли́ Яросла́вской, освеща́яй всю́ вселе́нную, егда́ ико́на Богоро́дицы, во хра́м ва́ми принесе́нная, озари́ благода́тию ду́ши христиа́нския, те́мже с ве́рою к не́й лю́дие притека́ют и уми́льно ю́ лобыза́ют, получа́юще от неду́гов душе́вных и теле́сных исцеле́ния, ва́с же, благослови́вших зе́млю на́шу, святи́и Васи́лие и Константи́не, похваля́ют си́це:

Ра́дуйтеся, дво́ице свята́я, кня́зие незабве́ннии; ра́дуйтеся, дарова́вшии лю́дем ико́ну Богоро́дицы в благослове́ние.

Ра́дуйтеся, сла́ву Цари́цы Небе́сныя на́м возвеща́ющии; ра́дуйтеся, ико́ною чудотво́рною зе́млю Ру́сскую благословля́ющии.

Ра́дуйтеся, в хра́ме Успе́нстем Яросла́вскую ико́ну водвори́вшии; ра́дуйтеся, ве́лию че́сть Ма́тери Бо́жией чрез ико́ну Ея́ возда́вшии.

Ра́дуйтеся, ли́к Ея́ пресве́тлый ны́не зря́щии; ра́дуйтеся, при́сно Ю́ за ны́ умоля́ющии.

Ра́дуйтеся, Васи́лие и Константи́не, земли́ Яросла́вския чудотво́рцы прехва́льнии.

Конда́к 7.

Хотя́ще Бо́гу уго́дная сотвори́ти и ми́лость Его́ в пакибытии́ улучи́ти, с ве́рою взира́ем на житие́ святы́х благове́рных князе́й, Васи́лия пресла́внаго и Константи́на прехва́льнаго, ти́и бо, вла́сть от Бо́га иму́ще, наро́ду своему́ ве́рно послужи́ша и оте́чество земно́е по́двиги жития́ своего́ просла́виша, те́мже, я́ко дру́зи Христо́вы, во Оте́честве Небе́снем ра́достно пою́т Бо́гу: Аллилу́иа.

И́кос 7.

Свети́льницы во гра́де Яросла́вле возсия́сте и ны́не Све́т Небе́сный на зе́млю на́шу ще́дро излива́ете, святи́и светоно́снии Васи́лие и Константи́не, Це́ркве Правосла́вныя ве́рная ча́да и земли́ на́шея преди́вное украше́ние есте́, те́мже с ве́рою на ли́ки ва́ша взира́ем и похва́льная ва́м воспева́ем:

Ра́дуйтеся, смире́ния и чистоты́ испо́лненнии; ра́дуйтеся, о́браз доброде́тельнаго жития́ явля́ющии.

Ра́дуйтеся, кня́зя горды́ни низложи́вшии; ра́дуйтеся, ко́зни его́ смиренному́дрием до конца́ разори́вшии.

Ра́дуйтеся, свети́льницы, ева́нгельски ничи́мже сокры́тии; ра́дуйтеся, на высоте́ жития́ благоче́стнаго во Оте́честве свое́м возсия́вшии.

Ра́дуйтеся, в терпе́нии ду́ши своя́ стяжа́вшии; ра́дуйтеся, спасе́ние и сла́ву от Го́спода восприе́мшии.

Ра́дуйтеся, Васи́лие и Константи́не, земли́ Яросла́вския чудотво́рцы прехва́льнии.

Конда́к 8.

Стра́нницы земни́и, Васи́лие и Константи́не блаже́ннии, зна́тность ро́да своего́ презре́вше, ко го́рдому язы́ческому власти́телю на покло́н ра́ди наро́да и бла́га Оте́чества своего́ ходи́ли есте́, и жестокосе́рднаго прави́теля ми́лостива сотвори́ли есте́, те́мже му́дрость ва́шу похваля́ем и па́мять ва́шу све́тло пра́зднуем, Бо́гу же, Влады́це все́х, пое́м ра́достно: Аллилу́иа.

И́кос 8.

Ве́сь гра́д удиви́ся, чу́до ве́лие созерца́я, ка́ко два́ сокро́вища, в земли́ сокры́тая, подо́бно двема́ со́лнцема, возсия́ста, егда́ лю́дие обрето́ша святы́я мо́щи ва́ша, чу́дная дво́ице, Васи́лие и Константи́не пресве́тлии; те́мже мо́лим вы́, Бо́жии рабо́тницы и дру́зи Христо́ви, дарова́ти гра́ду утвержде́ние, все́м ве́рою ва́с почита́ющим грехо́в оставле́ние и Ца́рствию Бо́жию присвое́ние, да воспева́ем ва́м похва́льную пе́снь сицеву́ю:

Ра́дуйтеся, стра́нницы земни́и и челове́цы Небе́снии; ра́дуйтеся, ско́рии засту́пницы на́ши и учи́телие серде́чнии.

Ра́дуйтеся, я́ко мо́щи ва́ша жи́знь ве́чную лю́дем возвеща́ют; ра́дуйтеся, я́ко ты́я ско́рбь душе́вную на ра́дость прелага́ют.

Ра́дуйтеся, кри́ни се́льнии, чисто́тою на земли́ процве́тшии; ра́дуйтеся, цве́ти прекра́снии, святы́нею жития́ своего́ возблагоуха́вшии.

Ра́дуйтеся, исто́чницы духо́внии, в жи́знь ве́чную при́сно теку́щии; ра́дуйтеся, ско́рии моли́твенницы, благода́тную по́мощь ве́рным подаю́щии.

Ра́дуйтеся, Васи́лие и Константи́не, земли́ Яросла́вския чудотво́рцы прехва́льнии.

Конда́к 9.

Восхва́лятся преподо́бнии во сла́ве и возра́дуются на ло́жах свои́х, — та́ко возвести́ боже́ственный Дави́д ро́ду челове́ческому, сего́ ра́ди на до́брое житие́ ва́ше взира́юще, я́ко преподо́бных ва́с ублажа́ем, святи́и сла́внии Васи́лие и Константи́не, вы́ бо в весе́лии ве́чнем пребыва́юще, науча́ете на́с с любо́вию пе́ти Бо́гу: Аллилу́иа.

И́кос 9.

Вети́и многоглаго́ливии умолко́ша, не возмога́ют бо рещи́ сла́ву, дарова́нную ва́м от Го́спода, ю́же о́ко челове́ческое не ви́де, у́хо челове́ческое не слы́ша и я́же на се́рдце челове́ку не взы́де; те́мже вы́, я́ко фи́никси многопло́днии, во дво́рех Госпо́дних процвели́ есте́; сего́ ра́ди мо́лим вы́, святу́ю дво́ицу, Васи́лие и Константи́не, помина́йте ны́, земны́я сро́дники ва́ша, пою́щия ва́м похвалу́ сицеву́ю:

Ра́дуйтеся, му́жие сла́внии, ве́лий пло́д доброде́телей Бо́гу прине́сшии; ра́дуйтеся, мзду́ Небе́сную мно́гую от Го́спода восприе́мшии.

Ра́дуйтеся, кади́льницы златы́я, фимиа́м моли́тв Бо́гу за ны́ вознося́щия; ра́дуйтеся, зве́зды небе́сныя, во мра́це неве́рия ве́рно светя́щия.

Ра́дуйтеся, ковче́жцы златокова́ннии, сокро́вище Ду́ха Свята́го в себе́ иму́щии; ра́дуйтеся, гу́сли сладкозву́чныя, пе́снь хвалы́ Бо́гу вы́ну пою́щия.

Ра́дуйтеся, мечи́ обоюдоо́стрии, враги́ мы́сленныя посеца́ющии; ра́дуйтеся, в по́двизех духо́вных христиа́ном помога́ющии.

Ра́дуйтеся, Васи́лие и Константи́не, земли́ Яросла́вския чудотво́рцы прехва́льнии.

Конда́к 10.

Спасти́ хотя́ще ду́ши своя́, не да́ли есте́ сна́ очи́ма свои́ма, ни ве́ждома свои́ма дрема́ния, до́ндеже вообрази́ся в ва́с Христо́с, святи́и богому́дрии Васи́лие и Константи́не; те́мже, ду́ши ва́ша, я́ко неве́сты Христо́вы, укра́сили есте́, и со свети́льники горя́щими Жениха́ Церко́внаго сре́тили есте́, с Ни́мже ны́не ликовству́юще, пое́те Ему́: Аллилу́иа.

И́кос 10.

Стена́ есте́ и заступле́ние гра́ду Яросла́влю, богому́дрии уго́дницы Васи́лие и Константи́не, и прибе́жище все́м, с ве́рою призыва́ющим ва́с на по́мощь во вся́ких беда́х и напа́стех, дерзнове́ние бо ве́лие и́мате у Христа́ Бо́га, святи́и, помога́ти и спаса́ти вопию́щих ва́м такова́я:

Ра́дуйтеся, стране́ на́шей све́тлое украше́ние; ра́дуйтеся, гра́ду Яросла́влю весе́лие и ра́дование.

Ра́дуйтеся, престо́лу Го́спода сла́вы предстоя́щии и те́пле моля́щиися о душа́х на́ших; ра́дуйтеся, заре́ю Трисо́лнечнаго Све́та озаре́ннии.

Ра́дуйтеся, я́ко лице́м к лицу́ Бо́га зри́те; ра́дуйтеся, вку́пе в ра́дость Го́спода вше́дшии.

Ра́дуйтеся, я́ко су́щим в беда́х и напа́стех избавле́ние подае́те; ра́дуйтеся, я́ко и все́м тружда́ющимся ско́рии помо́щницы есте́.

Ра́дуйтеся, Васи́лие и Константи́не, земли́ Яросла́вския чудотво́рцы прехва́льнии.

Конда́к 11.

Пе́снь хвалы́ и благодаре́ния прино́сим Бо́гу, ди́вному во святы́х Свои́х, я́ко дарова́ на́м таковы́я кре́пкия моли́твенники и во бране́х духо́вных помо́щники; те́мже ва́с, святи́и бра́тие, ублажа́ем и мо́лим о спасе́нии ду́ш на́ших, да вку́пе с ва́ми, блаже́ннии кня́зие Васи́лие и Константи́не, воспое́м Бо́гу: Аллилу́иа.

И́кос 11.

Свещи́ многосве́тлыя, на тве́рди церко́вней возжже́нныя, благоимени́тии Васи́лие и Константи́не, у Престо́ла Пресвяты́я Тро́ицы вы́ну предстоя́ще, испроси́те на́м неотъе́млему благода́ть Свята́го Ду́ха, да И́м уте́шеннии и просветле́ннии, воспое́м ва́м похвалу́ сицеву́ю:

Ра́дуйтеся, те́плии за ны́ к Бо́гу моли́твенницы; ра́дуйтеся, от гне́ва Бо́жия на́ши засту́пницы.

Ра́дуйтеся, о́блацы, росо́ю благода́ти испо́лненнии; ра́дуйтеся, исто́чницы, напая́ющии жа́ждущия жи́зни.

Ра́дуйтеся, кня́зие святи́и, любо́вь к Бо́гу иму́щии; ра́дуйтеся, о благоче́стии зело́ ревну́ющии.

Ра́дуйтеся, вдо́в уте́шителие и ни́щих пита́телие; ра́дуйтеся, бла́г небе́сных незави́стнии пода́телие.

Ра́дуйтеся, Васи́лие и Константи́не, земли́ Яросла́вския чудотво́рцы прехва́льнии.

Конда́к 12.

Благода́ть неизме́нно источа́ете все́м с ве́рою к ва́м притека́ющим, благове́рнии кня́зие на́ши, Васи́лие и Константи́не, мы́ же, я́ко еле́ни на исто́чники водны́я, ко святы́м моще́м ва́шим припа́даем, никто́же бо от ни́х то́щ и неуте́шен оты́де, оба́че ра́дости духо́вныя испо́лнени, в ликова́нии серде́чнем ва́м благодаре́ние прино́сим, Бо́гу же воспева́ем умиле́нно: Аллилу́иа.

И́кос 12.

Пою́ще чудеса́ и по́двиги ва́ша, блаже́ннии Васи́лие и Константи́не, диви́мся благоутро́бию Бо́жию, ка́ко си́ла благода́тная в немощны́х сосу́дех скуде́льных пребыва́ющи, вся́кую я́зю и неду́г врачу́ет, ско́рбных утеша́ет и вся́ благопотре́бная, с ве́рою прося́щим да́рует. За сию́ ми́лость благодаре́ние Бо́гу прино́сим, ва́с же ублажа́ем похвала́ми сицевы́ми:

Ра́дуйтеся, ка́мени многоце́ннии сла́вы Ца́рства Христо́ва; ра́дуйтеся, скрижа́ли заве́тныя сладча́йшаго И́мене Иису́сова.

Ра́дуйтеся, цевни́цы изря́дныя Ду́ха Свята́го; ра́дуйтеся, трубы́ громогла́сныя Бо́га Небе́снаго.

Ра́дуйтеся, се́не благоли́ственная, от зно́я страсте́й на́с покрыва́ющая; ра́дуйтеся, ве́стницы, боже́ственную во́лю на́м возвеща́ющии.

Ра́дуйтеся, хода́таи за зе́млю Ру́сскую; ра́дуйтеся, раде́телие за Це́рковь Правосла́вную.

Ра́дуйтеся, Васи́лие и Константи́не, земли́ Яросла́вския чудотво́рцы прехва́льнии.

Конда́к 13.

О пресла́внии уго́дницы, Васи́лие и Константи́не, в земли́ Яросла́вской просия́вшии, приими́те ма́лое сие́ моле́ние на́ше, помози́те на́м, во юдо́ли скорбе́й живу́щим, испроси́те у Го́спода ми́р и ве́лию ми́лость земны́м сро́дником ва́шим, да вку́пе с ва́ми и со все́ми святы́ми сподо́бимся на земли́ живы́х пе́ти Бо́гу хвале́бную пе́снь: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгелом Небе́сным удивле́ние бы́сте, святи́и сла́внии кня́зие, Васи́лие и Константи́не, егда́ возжела́ли есте́ Христу́ со усе́рдием послужи́ти и за́поведи Его́ всеце́ло испо́лнити. Те́мже равноа́нгельно на земли́ пожи́ли есте́, ны́не же вку́пе со безпло́тными пе́снь хвалы́ Царю́ царе́й воспева́ете и моли́твы те́плыя за ны́ Бо́гу возно́сите; мы́ же, недосто́йная ча́да ва́ша, благода́рная ва́м возглаша́ем, пою́ще ра́достно похвалу́ сицеву́ю:

Ра́дуйтеся, А́нгелом Небе́сным подо́бницы; ра́дуйтеся, ве́ры правосла́вныя побо́рницы.

Ра́дуйтеся, адама́нти пресве́тлии и столпи́ Це́ркве непоколеби́мии; ра́дуйтеся, кня́зие пречу́днии, Оте́честву стено́ необори́мая.

Ра́дуйтеся, догма́тов церко́вных тве́рдии храни́телие; ра́дуйтеся, о наро́де Бо́жии те́плии попечи́телие.

Ра́дуйтеся, лучи́ духо́вныя Со́лнца Жива́го; ра́дуйтеся, хра́мины украше́нныя Ду́ха Свята́го.

Ра́дуйтеся, Васи́лие и Константи́не, земли́ Яросла́вския чудотво́рцы прехва́льнии.

Конда́к 1.

Избра́ннии чудотво́рцы и уго́дницы Бо́жии, свята́я кня́жеская дво́ице, Васи́лие прехва́льне и Константи́не преди́вне, вы́, я́ко два́ столпа́ непоколеби́ма, зе́млю Яросла́вскую утвержда́ете и по́мощь всеси́льную христиа́ном да́руете; те́мже, па́мять ва́шу све́тло пра́зднующе, пе́снь хвалы́ поси́льную прино́сим ва́м и уми́льно вопие́м:

Ра́дуйтеся, Васи́лие и Константи́не, земли́ Яросла́вския чудотво́рцы прехва́льнии.

Моли́тва.

О всехва́льнии и достоблаже́ннии кня́зие Васи́лие и Константи́не, вы́ у́бо по́двигом до́брым подвиза́стеся и житие́ свое́ в ве́ре сконча́ли есте́, ны́не же в Ца́рстве сла́вы со святы́ми весели́теся и ра́йских блаже́нств наслажда́етеся; те́мже на сла́ву ва́шу уми́льно взира́ем и ва́с, я́ко те́плых моли́твенников ублажа́ем. Е́й, всечестна́я богоуго́дная дво́ице, воззри́те на ны́ ми́лостивно и да́руйте на́м вся́ потре́бная ко спасе́нию. Еще́ же мо́лим ва́с, испроси́те у Го́спода Це́ркви ми́р и утвержде́ние, архипа́стырем и па́стырем в благода́ти хожде́ние, мона́хом во смире́нии и терпе́нии пребыва́ти и моли́тву непреста́нно твори́ти, и все́м на́м дру́г ко дру́гу любо́вь нелицеме́рную име́ти. Еще́ же да́руйте на́м мыта́рств возду́шных безбе́дное прохожде́ние и на Стра́шнем Суде́ Христо́ве одесну́ю Бо́га стоя́ние, да прославля́ем Пресвяту́ю Тро́ицу, Отца́, и Сы́на, и Свята́го Ду́ха, во ве́ки веко́в. Ами́нь.