Конда́к 1.

Возбра́ннии небе́снаго Воево́ды во́и пресла́внии, досточу́днии и всехва́льнии отцы́ преподо́бнии, по́двиги и чудесы́ свои́ми зе́млю на́шу освяти́вшии и к небе́сному Оте́честву пу́ть на́м при́сно указу́ющии, пе́сньми дне́сь просла́вити ва́с дерза́ем и, я́ко моли́твенником усе́рдным пе́ние си́це прино́сим:

Ра́дуйтеся, преподо́бнии отцы́ на́ша, оби́тели Гли́нския похвало́ и ра́дование.

И́кос 1.

А́нгели земни́и и челове́цы небе́снии, преподо́бнии ста́рцы гли́нстии, небе́сным чиново́м ревну́юще, я́ко безпло́тнии безпоро́чно пожи́ли есте́ и венцы́ пра́вды восприи́мше, похвалы́ при́сно воспева́етеся си́це:

Ра́дуйтеся, от земли́ к небеси́ возше́дшии; ра́дуйтеся, о́браз подража́ния на́м яви́вшии.

Ра́дуйтеся, а́нгельским житие́м просия́вшии; ра́дуйтеся, воздержа́нием стра́сти угаси́вшии.

Ра́дуйтеся, по́двиги ва́шими всю́ зе́млю осия́ющии; ра́дуйтеся, уче́ньми свои́ми вся́ к доброде́ланию наставля́ющии.

Ра́дуйтеся, Се́верския земли́ всесла́вное огражде́ние; ра́дуйтеся, Це́ркве Ру́сския при́сное велича́ние.

Ра́дуйтеся, преподо́бнии отцы́ на́ша, оби́тели Гли́нския похвало́ и ра́дование.

Конда́к 2.

Бо́жии служи́тели всеусе́рднии и чудотво́рцы пресла́внии яви́лися есте́, преподо́бнии отцы́ на́ша, ва́ми бо науче́ны есмы́ о гресе́х свои́х покая́ние приноси́ти и Бо́га воспева́ти: Аллилу́иа.

И́кос 2.

Возсия́ сла́ва ва́ша, отцы́ на́ша достоблаже́ннии, я́ко заря́ всесла́вная, вся́ преде́лы земли́ на́шея озаря́ющая и мглу́ грехо́вную дале́че от ве́рных отгоня́ющая и все́х подвига́ющая ва́с прославля́ти пе́нием сицевы́м:

Ра́дуйтеся, всемо́щныя на́ша помо́щницы; ра́дуйтеся, всеусе́рднии о на́с моли́твенницы.

Ра́дуйтеся, от бе́д моли́твами ва́шими на́с огражда́ющии; ра́дуйтеся, от искуше́ний и собла́знов при́сно избавля́ющии.

Ра́дуйтеся, от ко́зней вселука́вых на́с му́дренне защища́ющии; ра́дуйтеся, любо́вию свое́ю ча́да своя́ обнима́ющии.

Ра́дуйтеся, пу́ть ко Христу́ все́м ве́рным показу́ющии; ра́дуйтеся, к ва́м со упова́нием притека́ющих не отверга́ющии.

Ра́дуйтеся, преподо́бнии отцы́ на́ша, оби́тели Гли́нския похвало́ и ра́дование.

Конда́к 3.

Го́споду после́дствующе и крестоноше́ния и́го благо́е и ле́гкое восприи́мше, пло́ть свою́ распя́ли есте́ со страстьми́ и похотьми́ и просла́вили Бо́га в душа́х и телесе́х ва́ших, я́же су́ть Бо́жии, пе́снь побе́дную при́сно воспева́юще: Аллилу́иа.

И́кос 3.

Дре́вним отце́м ревну́юще, пло́ть ду́ху покори́ли есте́ и, похоте́й отве́ргшеся, взошли́ есте́ на бра́к А́гнчий и от все́х пе́сньми сицевы́ми похваля́етеся:

Ра́дуйтеся, благода́тию Бо́жиею освяще́ннии; ра́дуйтеся, доброде́тельми све́тло украше́ннии.

Ра́дуйтеся, Бо́га в телесе́х ва́ших просла́вившии; ра́дуйтеся, человекозави́стца по́двиги свои́ми посрами́вши.

Ра́дуйтеся, сове́ты вселука́выя моли́твами ва́шими разори́вши; ра́дуйтеся, вся́кое искуше́ние преоборо́вшии.

Ра́дуйтеся, житие́м ва́шим светлосия́ющии; ра́дуйтеся, и на́с в доброде́лании укрепля́ющии.

Ра́дуйтеся, преподо́бнии отцы́ на́ша, оби́тели Гли́нския похвало́ и ра́дование

Конда́к 4.

Еле́ем моли́тв ва́ших ума́стите я́звы серде́ц на́ших, и́же лука́вых страсте́й и искуше́ний стрела́ми ура́нены е́сть, и предста́тельством ва́шим все́х на́с научи́те при́сно Бо́гу взыва́ти: Аллилу́иа.

И́кос 4.

Житие́ ва́ше безпоро́чно и па́мять ва́ша с похвала́ми при́сно велича́ется, ди́внии и пресла́внии отцы́ на́ша, во оби́тели Гли́нстей просия́вшии и всю́ зе́млю Слобо́дскую, я́ко светоприя́тельныя свети́льники освети́вшии, сего́ ра́ди пе́нии сицевы́ми ублажа́етеся:

Ра́дуйтеся, све́том невече́рним просвеще́ннии; ра́дуйтеся, питие́м безсме́ртия напое́ннии.

Ра́дуйтеся, одея́ния ду́ш ва́ших убели́вшии; ра́дуйтеся, на бра́к А́гнчий прера́достно возше́дшии.

Ра́дуйтеся, Небе́снаго Иерусали́ма гра́ждане пресла́внии; ра́дуйтеся, о земно́м Оте́честве ва́шем моли́твенницы усе́рднии.

Ра́дуйтеся, све́том Небе́сным на́с просвеща́ющии; ра́дуйтеся, огня́ гее́нскаго на́с избавля́ющии.

Ра́дуйтеся, преподо́бнии отцы́ на́ша, оби́тели Гли́нския похвало́ и ра́дование.

Конда́к 5.

Зми́я дре́вняго и человекоуби́йцы искони́ во́лю вселука́вую твори́ти не восхоте́ли есте́, но избра́ли есте́ во́лю Бо́жию, всеблагу́ю и всесоверше́нную, ко спасе́нию все́х приводя́щую и пе́ти науча́ющую пе́снь побе́дную: Аллилу́иа.

И́кос 5.

Ио́сифа прекра́снейшия чистоты́ и И́овля мужему́дреннаго терпе́ния насле́дницы яви́лися есте́, отцы́ духоно́снии, и Илиины́я ре́вности о Го́споде Бо́зе Вседержи́теле, сего́ ра́ди пое́м ва́м:

Ра́дуйтеся, отце́в дре́вних ревни́телие; ра́дуйтеся, по́двигом и́х продража́телие.

Ра́дуйтеся, чистоты́ и целому́дрия столпи́ непоколеби́мии; ра́дуйтеся, ратобо́рцы пресла́внии и непреобори́мии.

Ра́дуйтеся, умерщвле́нием пло́ти ва́шея стра́сти умертви́вшии; ра́дуйтеся, го́рняя па́че тле́ннаго всеусе́рдно возлюби́вшии.

Ра́дуйтеся, ко́жаныя оде́жды греха́ всему́дренно отри́нувшии; ра́дуйтеся, пра́вдою Бо́жиею, я́ко ри́зою облаче́нии.

Ра́дуйтеся, преподо́бнии отцы́ на́ша, оби́тели Гли́нския похвало́ и ра́дование.

Конда́к 6.

Крестоноше́ния по́двиг доброво́льно восприя́ли есте́ и, Подвигополо́жнику после́дствующе, воскресе́ния ве́чнаго прича́стницы яви́лися есте́, отцы́ на́ша пресла́внии, и незаходи́мыя сла́вы Его́ насле́дницы, иде́же пе́снь немо́лчную воспева́ете: Аллилу́иа.

И́кос 6.

Ли́че богоизбра́нный отце́в духоно́сных, по́лче Боже́ственный, моли́теся ко Го́споду о земно́м Оте́честве ва́шем и о любо́вию ва́с си́це воспева́ющих:

Ра́дуйтеся, Це́ркве Ру́сския кри́ни пресла́внии; ра́дуйтеся, Оте́чества плоды́ доброкра́снии.

Ра́дуйтеся, благоле́пие До́ма Бо́жия возлюби́вшии; ра́дуйтеся, суету́ селе́ний гре́шничих прему́дро отри́нувшии.

Ра́дуйтеся, броня́ми пра́вды облече́ннии; ра́дуйтеся, венце́м нетле́нным увенча́ннии.

Ра́дуйтеся, и́миже Правосла́вие утвержда́ется; ра́дуйтеся, и́миже вся́кая ле́сть отгоня́ется.

Ра́дуйтеся, преподо́бнии отцы́ на́ша, оби́тели Гли́нския похвало́ и ра́дование.

Конда́к 7.

Небе́снаго и Вели́каго Архиере́я служи́тели пресла́внии, преподо́бнии и богоно́снии отцы́ на́ша, по́двигом до́брым в житии́ ва́шем подвиза́лися есте́ и в ра́дость Го́спода своего́ вни́ти сподо́билися есте́, пе́снь непреста́нно Ему́ принося́ще: Аллилу́иа.

И́кос 7.

О́гнь искуше́ний моли́твами ва́шими угаси́те и собла́знов бу́рю неи́стовую уте́шите предста́тельством ва́шим и вся́ких бе́д свободи́те все́х, ве́рою ва́м взыва́ющих:

Ра́дуйтеся, засту́пницы на́ши пресла́внии; ра́дуйтеся, моли́твенницы о на́с преди́внии.

Ра́дуйтеся, чуде́с Христо́вых пучи́но неизме́римая; ра́дуйтеся, ми́лостей Госпо́дних реко́ неоску́дная.

Ра́дуйтеся, благода́ти кла́дезю неисче́рпный; ра́дуйтеся, даро́в Бо́жиих исто́чницы неистощи́мии.

Ра́дуйтеся, теле́с на́ших цели́телие; ра́дуйтеся, о душа́х на́ших предста́телие.

Ра́дуйтеся, преподо́бнии отцы́ на́ша, оби́тели Гли́нския похвало́ и ра́дование.

Конда́к 8.

Правосла́вия побо́рницы пресла́внии и Це́ркве Христо́выя столпи́ непоколеби́мии, отцы́ на́ша богоно́снии, воздева́юще преподо́бнии ру́це ва́ша, при́сно Го́спода моли́те да сохрани́т на́с от собла́знов и нестрое́ний, да изба́вит Це́рковь Свою́ от раздо́ров и разделе́ний, да ку́пно вси́ моли́тву твори́м: Аллилу́иа.

И́кос 8.

Ри́зы своя́ кро́вию А́гнца Заве́та ве́чнаго убели́ли есте́ и ко Го́споду невозвра́тно ше́ствующе, житие́м ва́шим, писа́ньми и наставле́ньми на́м о́браз и пра́вило благоче́стия яви́ли есте́, те́мже прославля́юще ва́с, пои́м та́ко:

Ра́дуйтеся, ко спасе́нию все́х наставля́ющии; ра́дуйтеся, доброде́тели на́с науча́ющии.

Ра́дуйтеся, из глуби́н страсте́й изыма́ющии; ра́дуйтеся, из ровенца́ поги́бели на́с исхища́ющии.

Ра́дуйтеся, любо́вию Христо́вою ми́р просвети́вшии; ра́дуйтеся, о́браз спасе́ния на́м о Христе́ яви́вши.

Ра́дуйтеся, по́двиги свои́ми де́моны посрами́вшии; ра́дуйтеся, си́х немощны́я де́рзости попра́вшии.

Ра́дуйтеся, преподо́бнии отцы́ на́ша, оби́тели Гли́нския похвало́ и ра́дование.

Конда́к 9.

Святы́я Тро́ицы свяще́ннии служи́тели, и́ноков похвале́ние и свети́льницы в ми́ре су́щим, пресви́теров украше́ние и по́стников велича́ние, пречу́днии ста́рцы пусты́ни Гли́нския, уче́ньми и по́двиги ва́шими наста́вленнии, моли́тву возсыла́ем Бо́гу: Аллилу́иа.

И́кос 9.

Тве́рдыя и боговеща́нныя Госпо́дни пропове́дателие, от оби́тели Гли́нския, я́ко светоза́рное свети́ло пресла́вно возсия́вшии и всю́ зе́млю на́шу све́том ве́ры и благоче́стия освяти́вшии, ва́м, пречу́днии отцы́ на́ша, пе́ние и похвалу́ дерза́ем воспе́ти:

Ра́дуйтеся, и́ноческими собо́рами воспева́емии; ра́дуйтеся, а́нгельскими ли́ки прославля́емии.

Ра́дуйтеся, небе́сных бла́г раздая́телие; ра́дуйтеся, вертогра́да Христо́ва неле́ностные де́лателие.

Ра́дуйтеся, кре́пкое па́дающих возведе́ние; ра́дуйтеся, пра́во стоя́щим утвержде́ние.

Ра́дуйтеся, ду́ши на́ша благода́тию Бо́жией просвеща́ющии; ра́дуйтеся, сердца́ на́ша питие́м благоче́стия напоя́ющии.

Ра́дуйтеся, преподо́бнии отцы́ на́ша, оби́тели Гли́нския похвало́ и ра́дование.

Конда́к 10.

От у́ст недосто́йных пе́ние немощно́е приими́те, отцы́ богоно́снии, и любо́вию свое́ю, я́же о Христе́ Го́споде, уврачу́йте вся́кую боле́знь на́шу, да ку́пно с ва́ми и со все́ми святы́ми пе́снь прино́сим Бо́гу: Аллилу́иа.

И́кос 10.

Фиа́л любве́ боже́ственныя изле́йте на грехо́м умерщвле́нныя ду́шы на́ша, отцы́ всеблаже́ннии, да при́сно велича́ем по́двиги ва́ша пресла́вныя и по́мощь ва́шу моли́твенную:

Ра́дуйтеся, И́стину ве́чную на́м благовеству́ющии; ра́дуйтеся, от а́дския му́ки на́с изыма́ющии.

Ра́дуйтеся, неве́рия гро́знии обличи́телие; ра́дуйтеся, Та́йн Бо́жиих ве́рнии служи́телие.

Ра́дуйтеся, всемо́щное ересе́й посрамле́ние; ра́дуйтеся, всесве́тлое пре́лести попра́ние.

Ра́дуйтеся, я́ко ва́ми пу́ть ко Христу́ обрета́ем; ра́дуйтеся, я́ко похвалу́ ва́м от серде́ц при́сно прино́сим.

Ра́дуйтеся, преподо́бнии отцы́ на́ша, оби́тели Гли́нския похвало́ и ра́дование.

Конда́к 11.

Хвале́ние на́ше и пе́снь псало́мскую, в па́мять ва́шу дне́сь воспева́емыя, приими́те ми́лостиво, отцы́ преподо́бнии, и Го́спода о на́с при́сно моли́те, Ему́ вопию́ще: Аллилу́иа.

И́кос 11.

Очи́стити потщи́теся ду́шы на́ша от ме́рзкаго и душетле́ннаго прило́га вра́жия и страсте́й нахожде́ния дале́че отжени́те от ча́д ва́ших, вопию́щих ны́не:

Ра́дуйтеся, ду́ш на́ших очище́ние; ра́дуйтеся, всего́ ми́ра просвеще́ние.

Ра́дуйтеся, телеса́м на́шым здра́вие подаю́щии; ра́дуйтеся, душа́м на́шым спасе́ние исхода́тайствующии.

Ра́дуйтеся, моли́твою свое́ю на́с укрепля́ющии; ра́дуйтеся, предста́тельством ва́шим от бе́д на́с избавля́ющии.

Ра́дуйтеся, огне́м благода́ти се́рдца ве́рных воспламеня́ющии; ра́дуйтеся, пла́мень зло́бы а́дския тайноде́йственно угаща́ющии.

Ра́дуйтеся, преподо́бнии отцы́ на́ша, оби́тели Гли́нския похвало́ и ра́дование.

Конда́к 12.

Ца́рь Небе́сный прия́т вы́ в поко́й сво́й я́ко рабо́в благи́х и ве́рных и венце́м нетле́нным увенча́ по́двиги и труды́ ва́ша, отцы́ на́ша пресла́внии, те́мже ны́не Небе́сныя сла́вы прича́стники я́вшеся ку́пно со а́нгелы и святы́ми все́ми пе́снь пое́те: Аллилу́иа.

И́кос 12.

Честна́ пред Го́сподем сме́рть ва́ша, отцы́ на́ша преподо́бнии, и па́мять ва́ша с похвала́ми и а́нгельстии ли́ки велича́ние ва́м прино́сят и челове́честии уста́ ны́не благода́рственно воспева́ют:

Ра́дуйтеся, обетова́ний Бо́жиих сонасле́дницы; ра́дуйтеся, любви́ Христо́вы соприча́стницы.

Ра́дуйтеся, вселука́вых духо́в прогони́телие; ра́дуйтеся, ко́зней диа́вольских победи́телие.

Ра́дуйтеся, мглу́ неве́рия отгоня́ющии; ра́дуйтеся, лжи́выя непра́вды потребля́ющии.

Ра́дуйтеся, вся́кия пра́вды испо́лненнии; ра́дуйтеся, доброде́тельми све́тло преукраше́ннии.

Ра́дуйтеся, преподо́бнии отцы́ на́ша, оби́тели Гли́нския похвало́ и ра́дование.

Конда́к 13.

О, преподо́бнии и богоно́снии отцы́ на́ша, в оби́тели Гли́нстей пресла́вно просия́вшии и всю́ зе́млю на́шу благода́тию Бо́жиею освяти́вшии, пе́ние у́ст на́ших ны́не приими́те и от бе́д вся́ких изба́вите ча́да ва́ша, да ку́пно с ва́ми пе́снь Го́сподеви воспе́ти сподо́бимся: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгели земни́и и челове́цы небе́снии, преподо́бнии ста́рцы гли́нстии, небе́сным чиново́м ревну́юще, я́ко безпло́тнии безпоро́чно пожи́ли есте́ и венцы́ пра́вды восприи́мше, похвалы́ при́сно воспева́етеся си́це:

Ра́дуйтеся, от земли́ к небеси́ возше́дшии; ра́дуйтеся, о́браз подража́ния на́м яви́вшии.

Ра́дуйтеся, а́нгельским житие́м просия́вшии; ра́дуйтеся, воздержа́нием стра́сти угаси́вшии.

Ра́дуйтеся, по́двиги ва́шими всю́ зе́млю осия́ющии; ра́дуйтеся, уче́ньми свои́ми вся́ к доброде́ланию наставля́ющии.

Ра́дуйтеся, Се́верския земли́ всесла́вное огражде́ние; ра́дуйтеся, Це́ркве Ру́сския при́сное велича́ние.

Ра́дуйтеся, преподо́бнии отцы́ на́ша, оби́тели Гли́нския похвало́ и ра́дование.

Конда́к 1.

Возбра́ннии небе́снаго Воево́ды во́и пресла́внии, досточу́днии и всехва́льнии отцы́ преподо́бнии, по́двиги и чудесы́ свои́ми зе́млю на́шу освяти́вшии и к небе́сному Оте́честву пу́ть на́м при́сно указу́ющии, пе́сньми дне́сь просла́вити ва́с дерза́ем и, я́ко моли́твенником усе́рдным пе́ние си́це прино́сим:

Ра́дуйтеся, преподо́бнии отцы́ на́ша, оби́тели Гли́нския похвало́ и ра́дование.

Моли́тва.

О пресла́внии и преди́внии моли́твенницы и засту́пницы, отцы́ на́ши Гли́нстии! Приими́те похвалы́ сия́, и коленопреклоне́ния, я́же ны́не ва́м любо́вию прино́сим. Вы́, богоно́снии, пусты́ню Рождества́ Пречи́стыя Де́вы ме́стом жития́ своего́ избра́вше, та́мо водвори́стеся, иде́же по́двиги свои́ми ве́сь ми́р удиви́сте; во пло́ти живя́ше, я́ко безпло́тныя вмени́стеся. Егда́ же наста́ годи́на лю́тых испыта́ний и безбо́жных гоне́ний, я́ко раби́ Бо́жии со смире́нием и благодаре́нием во́лю Госпо́дню прия́ли есте́, по лицу́ всея́ земли́ в разсе́янии подвиза́стеся, Сло́во Бо́жие бли́жним и да́льним с любо́вию пропове́дали еси́, никому́же пу́ть ко спасе́нию затворя́я. Христа́ ра́ди темни́цы и са́мыя сме́рти не убоя́вшеся, те́сными враты́ в Ца́рствие Небе́сное вше́дше, в нетле́нных черто́зех ны́не водвори́стеся. По́двиги же многоразли́чныя и чудесы́ преди́вныя, я́же избра́вый ва́с Бо́г чрез ва́с сотвори́, никто́же от земноро́дных изрещи́ мо́жет. Мы́ же, то́кмо грехи́ бога́тыя, сия́ние сла́вы ва́шея зря́ще, дерза́ем с моли́твою к ва́м взыва́ти. Мо́лим ва́с, се́рдцем сокруше́нным и душе́ю умиле́нною, не оста́вите свое́ю благода́тию оби́тель Гли́нскую, во времена́ гоне́ний безбо́жных лю́то пору́ганную, да ва́шими пред Бо́гом хода́тайствы я́ко фи́никс доброде́тельми па́ки процвете́т, и я́ко ке́др, и́же в Лива́не благоче́стием умно́жится. Помога́йте на́м, ча́дом ва́шим, а́ще и во гресе́х погиба́ющим, оба́че свое́ недосто́инство разуме́ющим, да моли́твами ва́шими вся́ грехи́ на́ши у́зрим, и искорени́ти потщи́мся. Испроси́те у Царя́ Сла́вы, да Неве́сту Свою́, Це́рковь правосла́вную непоколеби́му от ерети́ческих волне́ний да́же до сконча́ния ве́ка сохрани́т, мы́ же, моли́твами ва́шими спасе́ние улучи́вше, вку́пе с ва́ми и все́ми святы́ми хвалу́ Вседержи́телю воспева́ти бу́дем, велича́юще Его́ пресвято́е и́мя и ва́ше вку́пе предста́тельство во ве́ки веко́в. Ами́нь.