Конда́к 1.

Возбра́нным на́шего спасе́ния побо́рником и те́плым к Бо́гу моли́твенником похва́льное ва́м, преподо́бнии, прино́сим пе́ние. Вы́ же, я́ко иму́щии дерзнове́ние ко Го́споду, от вся́ких на́с бе́д свободи́те, зову́щих:

Ра́дуйтеся, Се́ргие и Ге́рмане, отцы́ преблаже́ннии.

И́кос 1.

А́нгельски на земли́ пожи́вше, со а́нгелы ны́не на Небеси́ водворя́етеся, отцы́ преподо́бнии, све́том трисо́лнечным осиява́еми и боже́ственныя добро́ты лицезре́ния наслажда́ющеся. Те́мже и на́с, ча́д ва́ших, па́мять ва́шу любо́вию пра́зднующих и с ве́рою под о́тчий кро́в ва́ш прибега́ющих, у Престо́ла Царя́ Сла́вы — Христа́ не забу́дите, вопию́щих ва́м такова́я:

Ра́дуйтеся, в ра́дость Го́спода своего́ вше́дшии; ра́дуйтеся, венцы́ нетле́нныя от Него́ прие́мшии.

Ра́дуйтеся, Небе́снаго Сио́на прекра́снаго гра́ждане; ра́дуйтеся, ве́чнаго Ца́рствия Христо́ва насле́дницы.

Ра́дуйтеся, в жи́зни земне́й еди́наго Христа́ все́м се́рдцем возлюби́вшии и Того́ еди́наго взыска́вшии; ра́дуйтеся, любве́ ра́ди Его́ вся́ преоби́девшии и ми́ра кра́сная презре́вшии.

Ра́дуйтеся, непреста́нным боже́ственным раче́нием превы́ше ви́димых воспари́вшии; ра́дуйтеся, дея́нием виде́ние стяжа́вшии.

Ра́дуйтеся, у́ми, зря́щии Бо́га; ра́дуйтеся, неусы́пныя моли́твы исто́чницы.

Ра́дуйтеся, Валаа́му изря́дная похвало́; ра́дуйтеся, ми́ру свети́льницы.

Ра́дуйтеся, Се́ргие и Ге́рмане, отцы́ преблаже́ннии.

Конда́к 2.

Ви́дяще преподо́бнии земны́я добро́ты непостоя́нное и сла́вы жития́ сего́ суету́, оте́чество свое́, и сро́дники, и дру́ги оста́виша, и от полу́денныя страны́ к чужде́му и хла́дному се́веру устреми́шася, Христо́ви бо тща́хуся невозбра́нно послужи́ти, пою́ще Ему́: Аллилу́иа.

И́кос 2.

Ра́зума духо́внаго и земли́ безстра́стия обетова́нныя взыску́юще, Авраа́млю произволе́нию подража́сте, преподо́бнии, зе́млю оте́чества своего́ оста́вльше и в пусты́ни се́й бы́вше прише́льцы. Те́мже да́же и додне́сь свята́я оби́тель Валаа́мская, на па́жити ва́шей вселя́щися, неуста́нно вопие́т ва́м се́рдцем и усты́:

Ра́дуйтеся, се́мя свято́е, земли́ сея́ стоя́ние; ра́дуйтеся, люде́й, о́крест живу́щих, Христо́ви присвое́ние.

Ра́дуйтеся, безпло́дную пусты́ню сию́ сле́з свои́х тече́ньми вспои́вшии; ра́дуйтеся, хла́дную страну́ сию́ моли́тв теплото́ю согре́явшии.

Ра́дуйтеся, сла́вии доброгла́снии, ра́йскую ве́сну от полу́дне на́м прине́сшии; ра́дуйтеся, гре́ческаго ке́дра о́трасли избра́нныя, и́ночества са́д в горе́ се́й прора́стшия.

Ра́дуйтеся, я́ко Христа́ стяжа́сте в се́рдцы свое́м; ра́дуйтеся, я́ко Тро́ицы яви́стеся чи́стое жили́ще.

Ра́дуйтеся, привре́менными ве́чная купи́вшии; ра́дуйтеся, тле́нными нетле́нная насле́довавшии.

Ра́дуйтеся, бога́тства неиждива́емаго блази́и рачи́тели; ра́дуйтеся, би́сера до́браго вели́ции купцы́.

Ра́дуйтеся, Се́ргие и Ге́рмане, отцы́ преблаже́ннии.

Конда́к 3.

Си́ле от Вы́шняго предложе́нию ва́шему прило́жшейся, не всу́е тружда́стеся, преподо́бнии: То́й бо бе́ ва́м стена́ кре́пка от лица́ вра́жия, ка́мень терпе́ния и му́жества сподви́жник. Ду́хом же Его́ услажда́еми и от си́лы в си́лу восходя́ще, сподо́бистеся и ча́сти избра́нных Его́, с ни́миже зове́те: Аллилу́иа.

И́кос 3.

Иму́ще у́м богоприя́тен и ангелови́дное свое́ обеща́ние непоколеби́мо на краесеко́мом ка́мени ве́ры во Христа́, не разслабе́ша в по́двизех свои́х, преподо́бнии, ни возврати́шася вспя́ть к па́мяти пре́жняго жития́ мирска́го, но подъя́тый на ся́ кре́ст да́же до сме́рти понесо́ша и вся́, Христа́ ра́ди, сла́дце претерпе́ша. Сего́ ра́ди и Бо́г я́ облагодати́ и а́нгельски зре́ти Его́ чи́стым се́рдцем сподо́би, да и мы́, житию́ и́х подража́юще, усе́рдно зове́м к ни́м:

Ра́дуйтеся, гла́са Ева́нгельскаго и́стиннии послу́шницы; ра́дуйтеся, зако́на Христо́ва усе́рднии творцы́.

Ра́дуйтеся, Го́споду своему́ до сме́рти послужи́вшии; ра́дуйтеся, я́звы Его́ вы́ну на те́ле свое́м носи́вшии.

Ра́дуйтеся, я́ко Ца́рствия ра́ди Небе́снаго ни в чесо́м же сами́х себе́ пощади́ли есте́; ра́дуйтеся, я́ко а́нгельским о́бразом обле́кшеся, до конца́ бра́нь свою́ соверши́ли есте́.

Ра́дуйтеся, Христо́ви ору́жницы ве́рнии; ра́дуйтеся, врага́ неуста́ннии запина́тели.

Ра́дуйтеся, пусты́ни сла́дкое прозябе́ние; ра́дуйтеся, воздержа́ния неувяда́емый цве́те.

Ра́дуйтеся, благода́ти сосу́ди избра́ннии; ра́дуйтеся, ве́ры подви́жницы.

Ра́дуйтеся, Се́ргие и Ге́рмане, отцы́ преблаже́ннии.

Конда́к 4.

Бу́рю проти́вных ве́тров а́ще и воздви́же на преподо́бныя диа́вол, оба́че потопи́ти и́х не возмо́же, ниже́ гра́да душе́внаго и́х разори́ти. Ти́и бо щито́м ве́ры огра́ждшеся и ме́чь моли́твы враща́юще, вся́ стре́лы лука́ваго нетру́дно угаша́ху, Христу́ пою́ще: Аллилу́иа.

И́кос 4.

Слы́шана бы́сть, преподо́бнии, духо́вных подвиго́в ва́ших молва́ и моли́твы непреста́нное горе́ние и жития́ во́льное озлобле́ние: не мо́жет бо гра́д укры́тися, вверху́ горы́ стоя́й. Сего́ ра́ди, я́ко еле́ни на исто́чники водны́я, вси́ а́лчущии покая́ния и жа́ждущии пра́вды, о Го́споде ревну́юще, к ва́м притеко́ша, и се́ оби́тель свята́я созда́ся и пусты́ня Валаа́мская а́ки гра́д благоцвету́щь показа́ся. Те́мже о мно́жестве спаса́емых веселя́щеся, воспева́ем ва́м си́це:

Ра́дуйтеся, оби́тели ва́шея первонача́льницы; ра́дуйтеся, вели́каго и́ноков со́нма отцы́.

Ра́дуйтеся, покая́ния от жи́зни своея́ пропове́дницы; ра́дуйтеся, люботру́днаго жития́ законополо́жницы.

Ра́дуйтеся, я́ко на па́жити спаси́тельныя мно́ги о́вцы изведо́сте; ра́дуйтеся, я́ко Христа́ о мно́жестве ка́ющихся возра́довасте.

Ра́дуйтеся, ду́х пра́вый спасе́ния в лю́дех обнови́вшии; ра́дуйтеся, ре́вность о Бо́зе в сердца́х уны́лых возже́гшии.

Ра́дуйтеся, ду́ш христиа́нских возста́ние; ра́дуйтеся, спя́щих зле́ пробужде́ние.

Ра́дуйтеся, к Небе́сному Ца́рствию ко́рмчии; ра́дуйтеся, пе́стуни во Христа́.

Ра́дуйтеся, Се́ргие и Ге́рмане, отцы́ преблаже́ннии.

Конда́к 5.

Боготе́чныя я́ко звезды́, на се́вере не́ба возшли́ есте́, преподо́бнии, и све́том ве́ры и по́двиг ва́ших страну́ Каре́льскую просвети́ли есте́, уча́ще приходя́щия к ва́м лю́ди суеве́рия и бесо́вския обы́чаи отложи́ти и еди́наго то́чию Бо́га боя́тися и Ему́ еди́ному служи́ти, пою́ще Ему́: Аллилу́иа.

И́кос 5.

Ви́девше о́крест себе́ ча́да своя́, нося́щая ве́тви благодея́ния, возвесели́шася преподо́бнии и, я́ко вене́ц жития́, блаже́нную кончи́ну улучи́вше, ра́дующеся к небеси́ преидо́ша, оба́че сою́за любве́ не расторго́ша, ниже́ ча́да своя́ оста́виша си́ра: не оскуде́ша бо и по сме́рти за ня́ Христу́ вы́ну моля́щеся и во искуше́ниих и беда́х я́ назира́юще и спаса́юще. Сего́ ра́ди слы́шаху от ни́х такова́я:

Ра́дуйтеся, в ну́ждах на́ших помо́щницы; ра́дуйтеся, в ско́рбех уте́шители.

Ра́дуйтеся, я́зв грехо́вных цели́тели; ра́дуйтеся, бесо́вских наважде́ний отгна́тели.

Ра́дуйтеся, вы́ бо коле́на, уны́нием разсла́бленная, ско́ро укрепля́ете; ра́дуйтеся, вы́ бо угаса́ющия свети́льники на́ша еле́ем моли́тв ва́ших исполня́ете.

Ра́дуйтеся, страстьми́ порабоще́нных ско́рии свободи́тели; ра́дуйтеся, подви́жников ко спасе́нию неле́стнии вожди́.

Ра́дуйтеся, целому́дрия на́шего блюсти́тели; ра́дуйтеся, нестяжа́ния изве́стное пра́вило.

Ра́дуйтеся, кре́пкое на́ше огражде́ние; ра́дуйтеся, непосты́дное на́ше упова́ние.

Ра́дуйтеся, Се́ргие и Ге́рмане, отцы́ преблаже́ннии.

Конда́к 6.

Пропове́дницы сла́вы Бо́жия и по сме́рти яви́стеся, преподо́бнии, от ра́ки честны́х моще́й ва́ших неоску́дныя струи́ исцеле́ний источа́юще и все́м тре́бующим разли́чная дарова́ния подаю́ще, я́же ви́девше ча́да ва́ша благода́рно воспе́ша просла́вльшему ва́с Бо́гу: Аллилу́иа.

И́кос 6.

Возсия́вше па́ки и па́ки сла́ва ва́ша, преподо́бнии, и оби́тель ва́ша возраста́ше и мно́жашеся, а́ще и мно́гащи нечести́вии воева́ху ю́, хра́мы ея́ разоря́юще и и́ноки избива́юще и изгоня́юще: от жи́ва бо су́ща, а́ще и посе́чена, ко́рене па́ки и па́ки ле́торасль восхожда́ше и мно́ги доброде́телей подви́жники под се́нь свою́ собира́ше, да злостра́ждуще за Христа́, в терпе́нии стяжава́ют ду́ши своя́, ва́м же, я́ко первонача́льником свои́м, воспева́ют си́це:

Ра́дуйтеся, свети́ла ве́ры, при́сно возсиява́ющая; ра́дуйтеся, исто́чницы моли́твы, николи́же оскуде́вшии.

Ра́дуйтеся, хле́бе сла́дкий и́щущим покая́ния; ра́дуйтеся, питие́ безсме́ртное подви́жником поще́ния.

Ра́дуйтеся, вы́ бо бы́сте благода́тное все́м смире́нным прибе́жище; ра́дуйтеся, вы́ бо показа́стеся недви́жное послу́шным утвержде́ние.

Ра́дуйтеся, изгна́нным пра́вды ра́ди гото́вии спу́тницы; ра́дуйтеся, оби́димых за Христа́ соприча́стницы.

Ра́дуйтеся, ни́щих ду́хом сожи́тели; ра́дуйтеся, кро́тких се́рдцем собесе́дницы.

Ра́дуйтеся, злострада́ния живи́и о́брази; ра́дуйтеся, терпе́ния незави́стнии да́тели.

Ра́дуйтеся, Се́ргие и Ге́рмане, отцы́ преблаже́ннии.

Конда́к 7.

Хотя́ще нечести́вии све́и в коне́ц ве́ру правосла́вную истреби́ти, оби́тель Валаа́мскую до основа́ния истощи́ша, оба́че свети́льника ва́шего угаси́ти не возмого́ша: и́нуде бо преста́вленный, па́че возсия́ на све́щнице высо́це, да и та́мо весели́т ча́да церко́вная и пе́ти Бо́гу подвиза́ет: Аллилу́иа.

И́кос 7.

Но́вый Изра́иль яви́шася духо́вная ча́да ва́ша, я́же, многоцеле́бную ра́ку моще́й ва́ших на ра́мена восприи́мше, от губи́тельства избего́ша: ревнова́ху бо святы́ни не бы́ти пору́ганней от пога́ных. Те́мже и в Но́вград притеко́ша, иде́же все́льшеся и моще́м ва́с, отце́в свои́х, приседя́ще, не преста́ша за́поведи ва́ша храни́ти и воспева́ти ва́м си́це:

Ра́дуйтеся, сокро́вище на́ше некра́домое; ра́дуйтеся, свети́льницы на́ши неугаси́мии.

Ра́дуйтеся, вожди́, николи́же на́с оставля́ющии; ра́дуйтеся, наста́вницы, вы́ну с на́ми су́щии.

Ра́дуйтеся, столпи́ све́та, пу́ть к небеси́ на́м указу́ющии; ра́дуйтеся, о́блацы благода́ти, от ле́сти на́с покрыва́ющии.

Ра́дуйтеся, Амали́ка всегуби́теля побе́днии бори́тели; ра́дуйтеся, фарао́на мы́сленнаго пра́вии обличи́тели.

Ра́дуйтеся, сла́ное мо́ре суеты́ до́бре преше́дшии; ра́дуйтеся, в пусты́ню страсте́й му́жественно все́льшиися.

Ра́дуйтеся, небе́сныя ма́нны прича́стницы; ра́дуйтеся, на́с, гре́шных, пред Бо́гом спору́чницы.

Ра́дуйтеся, Се́ргие и Ге́рмане, отцы́ преблаже́ннии.

Конда́к 8.

Странноприе́мый ра́ку моще́й ва́ших боже́ственне возвесели́ся Вели́кий Но́вград, собо́ру святы́х свои́х две́ звезде́ приложи́вый, ди́вным све́том чуде́с сия́ющия и благода́ть исцеле́ний неоску́дно все́м подаю́щия. Сего́ ра́ди возопи́: Аллилу́иа.

И́кос 8.

Всеце́лою мы́слию у Го́спода водворя́ющеся и зре́нием нетле́нныя сла́вы Его́ наслажда́еми, не небрегли́ есте́, преподо́бнии, о разоре́нии святы́я оби́тели ва́шея, ниже́ потерпе́сте, да уга́снет свети́льник, возжже́нный на Валаа́ме, но Нееми́иною печа́лию поболе́сте и моли́твою помоли́стеся, да пору́ган бу́дет диа́вол, зле́ совеща́вый на страну́ сию́. Те́мже моли́твою ва́шею воста́ от пе́пла оби́тель свята́я сия́ и, лику́ющи, честны́я мо́щи ва́ша от Нова́града гряду́щия срета́ет, ва́м же вопие́т сицева́я:

Ра́дуйтеся, ра́дости небе́сныя ве́стницы; ра́дуйтеся, ми́лости Бо́жия посли́.

Ра́дуйтеся, сла́во на́ша, па́ки воста́вшая; ра́дуйтеся, ве́нче на́ш, на́м па́ки возда́нный.

Ра́дуйтеся, я́ко прише́ствием ва́шим ве́ра пра́вая па́ки зде́ утверди́ся; ра́дуйтеся, я́ко свети́льник ве́чныя жи́зни па́ки во оби́тели ва́шей возсия́.

Ра́дуйтеся, зла́го на страну́ сию́ сове́та диа́воля разруше́ние; ра́дуйтеся, наро́да окре́стнаго от ро́ва е́реси избавле́ние.

Ра́дуйтеся, Це́ркве Правосла́вныя но́вое торжество́; ра́дуйтеся, вра́т а́довых вя́щшее посрамле́ние.

Ра́дуйтеся, А́нгелов го́рних высо́кая пе́снь; ра́дуйтеся, земны́х челове́к ликова́ние.

Ра́дуйтеся, Се́ргие и Ге́рмане, отцы́ преблаже́ннии.

Конда́к 9.

Вся́ стро́яй о спасе́нии челове́честем, вда́л еси́, Христе́, стра́жа до́му Твоего́ во стране́ се́й — святу́ю оби́тель на́шу. Не попусти́ у́бо ю́ уны́нием воздрема́ти, ни ку́плями жите́йскими отяготи́тися, ниже́ пу́ть добре́йший креста́ Твоего́ оста́вити, но ку́пно с преподо́бными Твои́ми да вы́ну пое́т Ти́: Аллилу́иа.

И́кос 9.

Вети́ям многовеща́нным ве́ка сего́ юро́дство е́сть е́же ми́р возненави́дети и пло́ть свою́ умертви́ти: недоуме́ют бо духо́вная духо́вными востязова́ти, ниже́ жи́зни сокрове́нныя во Христе́ пости́гнути, я́же утаи́ Бо́г от прему́дрых и разу́мных и откры́ младе́нцем. Те́мже, преподо́бнии, я́ко Ца́рствия небе́снаго насле́дницы и благода́тныя ра́дости о́бщницы, моли́твою ва́шею вы́ну наста́вите на́с, да, тще́тныя пре́лести жития́ сего́ избы́вше, невозвра́тным по́мыслом по́прище на́ше тече́м, пою́ще ва́м такова́я:

Ра́дуйтеся, духо́внаго любому́дрия пода́тели; ра́дуйтеся, безстра́стия сосу́ди.

Ра́дуйтеся, чистоты́ серде́чныя сокро́вища; ра́дуйтеся, смире́ния зерца́ло.

Ра́дуйтеся, вы́ бо му́дрых ми́ра сего́ яви́стеся посрамле́ние; ра́дуйтеся, вы́ бо юро́дивых о Христе́ бы́сте похвала́.

Ра́дуйтеся, я́ко ва́ми врага́ низлага́ем хоте́ния; ра́дуйтеся, я́ко ва́ми суеты́ отрева́ем прило́ги.

Ра́дуйтеся, во бране́х духо́вных на́м посо́бницы; ра́дуйтеся, во искуше́ниих всемо́щнии засту́пницы.

Ра́дуйтеся, обурева́емых приста́нище; ра́дуйтеся, немощны́х исцеле́ние.

Ра́дуйтеся, Се́ргие и Ге́рмане, отцы́ преблаже́ннии.

Конда́к 10.

Спаси́тельный пу́ть поста́ возлюби́вшии и яре́м Христо́в на ся́ во́лею взе́мшии, прииди́те вси́ к сему́ ти́хому от бу́ри грехо́вныя приста́нищу, в покая́нии припаде́м к неосла́бным моли́твенником на́шим и отце́м, я́ко моли́твою и́х при́сно воздвиза́еми, обря́щем сла́ву и воспое́м: Аллилу́иа.

И́кос 10.

Стена́ есте́ оби́тели ва́шей и все́м с ве́рою к ва́м притека́ющим, преподо́бнии: ва́шим бо бо́дренным заступле́нием собла́зны ми́ра отгоня́ются и страсте́й взыгра́ния угаша́ются. Те́мже мо́лим ва́с: не отри́ните на́с в не́мощех на́ших, во искуше́ниих и ско́рбех. Внегда́ оскудева́ти духо́вней кре́пости на́шей, не оста́вите на́с, но бу́дите на́м при́сное защище́ние, покро́в же и отра́да, да воспое́м ва́м, благодаря́ще:

Ра́дуйтеся, пусты́нных ти́хое утеше́ние; ра́дуйтеся, уедине́нных та́йное ра́дование.

Ра́дуйтеся, в моли́тве пребыва́ющих незри́мии сомоли́твенницы; ра́дуйтеся, во благогове́нии су́щих благода́тнии сподви́жницы.

Ра́дуйтеся, наста́вницы на́ши, и́миже к соверше́нству призыва́емся; ра́дуйтеся, отцы́ на́ши, и́миже по́стничества жела́ннаго конца́ доспе́ти упова́ем.

Ра́дуйтеся, кре́посте на́ша, е́юже сте́ну греха́ на́шего пре́йдем; ра́дуйтеся, утвержде́ние на́ше, и́мже тяготу́ зло́бы на́шея отлага́ем.

Ра́дуйтеся, грехми́ обремене́нных любвеоби́льнии восприе́мницы; ра́дуйтеся, ка́ющихся те́пле блази́и хода́таи.

Ра́дуйтеся, ю́ноши к целому́дрию возводя́щии; ра́дуйтеся, ста́рцем терпе́ние подаю́щии.

Ра́дуйтеся, Се́ргие и Ге́рмане, отцы́ преблаже́ннии.

Конда́к 11.

Пе́нию немо́лчному безпло́тных подража́юще и на жесто́кое житие́ отце́в на́ших взира́юще, не облени́мся, о бра́тие: возлю́бим в моли́твах всено́щное бде́ние, не устраши́мся тле́нныя пло́ти утесне́ния, да преподо́бным на́шим соприча́стницы бу́дем и со а́нгелы воспое́м: Аллилу́иа.

И́кос 11.

Светоза́рныя свети́льники, све́том и́стиннаго благоче́стия се́верную страну́ сию́ просвеща́ющия, зри́м вы́, преподо́бнии: в земне́м бо житии́ ва́шем мно́ги от ле́сти бесо́вския ко Христу́ приведо́сте, и по сме́рти то́ки благода́тных дарова́ний излива́юще и оби́тель свою́ во благогове́нии и трудолю́бии содержа́ще, правосла́вную ве́ру зде́ утвержда́ете, и вся́ окре́стныя лю́ди духо́вным хле́бом пита́ете, и от Лю́торова па́губнаго нече́стия и тмы́ неве́дения избавля́ете. Сего́ ра́ди приими́те от на́с сицева́я:

Ра́дуйтеся, и́стины неле́стнии свиде́телие; ра́дуйтеся, мра́чных суеве́рий отгна́тели.

Ра́дуйтеся, си́лы Бо́жия ди́вное явле́ние; ра́дуйтеся, благода́ти Христо́вы чу́дное зна́мение.

Ра́дуйтеся, ва́ми бо Ца́рствие Бо́жие в сердца́ мно́гих прии́де; ра́дуйтеся, ва́ми бо Денни́ца и́стиннаго све́та во омраче́нных грехо́м возсия́.

Ра́дуйтеся, вра́чеве святи́и, сумня́щихся ду́ши благода́тно исцеля́ющии; ра́дуйтеся, па́стырие до́брии, о́вцы своя́ от че́люстей звери́ных изыма́ющии.

Ра́дуйтеся, правосла́вным Христо́во благоуха́ние; ра́дуйтеся, ерети́чествующим сме́ртная воня́.

Ра́дуйтеся, Каре́лии сла́внии апо́столи; ра́дуйтеся, Росси́йския земли́ украше́ние.

Ра́дуйтеся, Се́ргие и Ге́рмане, отцы́ преблаже́ннии.

Конда́к 12.

Благода́тию Твое́ю Боже́ственною раздра́в гре́х на́ших рукописа́ние, благода́ть Твоего́ сыноположе́ния обнови́ в на́с, Сло́ве Бо́жий, и да́ждь на́м про́чее в покая́нии благоугоди́ти Тебе́, да с преподо́бными Твои́ми воспое́м Тебе́: Аллилу́иа.

И́кос 12.

Пою́ще пресла́вную па́мять ва́шу, ели́ко по си́ле на́шей, восхваля́ем ва́с, преподо́бнии: вы́ бо, же́ртву чи́сту себе́ Христо́ви прине́сше, все́м вся́ бы́сте и все́м прося́щим ту́не вся́ потре́бная подае́те, да вси́, благодаре́нию поучи́вшеся, в покая́ние и исправле́ние прии́дем, ва́с же воспое́м си́це:

Ра́дуйтеся, смире́нных мольба́м внима́тели; ра́дуйтеся, убо́гих воздыха́ния послу́шатели.

Ра́дуйтеся, вдо́в и сиро́т наказа́тели и корми́тели; ра́дуйтеся, оби́димых отра́до и утеше́ние.

Ра́дуйтеся, в ну́ждах и обстоя́ниих су́щих ско́рое и изве́стное избавле́ние; ра́дуйтеся, все́х к ра́це моще́й ва́ших с ве́рою притека́ющих незави́стное исцеле́ние и спасе́ние.

Ра́дуйтеся, предста́тели на́ши, умиле́нныя сле́зы на́ша прие́млющии; ра́дуйтеся, моли́твенницы на́ши, во благи́х проше́ния ве́рных исполня́ющии.

Ра́дуйтеся, мона́шествующих всегда́ гото́вое прибе́жище; ра́дуйтеся, мирски́х челове́к упова́ние.

Ра́дуйтеся, госуда́рства на́шего кре́посте; ра́дуйтеся, Це́ркве Правосла́вныя удобре́ние.

Ра́дуйтеся, Се́ргие и Ге́рмане, отцы́ преблаже́ннии.

Конда́к 13.

О, всепе́тии и пресла́внии чудотво́рцы на́ши и моли́твенницы, Се́ргие и Ге́рмане преподо́бнии! Ны́нешнее смире́нное приноше́ние от недосто́йных ча́д ва́ших прие́мше, от вся́ких напа́стей, скорбе́й и боле́зней, наве́тов вра́жиих и обстоя́ний изба́вите на́с, и в стра́шный ча́с сме́ртный бу́дите на́м кре́пции предста́тели, я́ко да ве́чныя сме́рти изба́вльшеся, воспое́м просла́вльшему ва́с Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгельски на земли́ пожи́вше, со а́нгелы ны́не на Небеси́ водворя́етеся, отцы́ преподо́бнии, све́том трисо́лнечным осиява́еми и боже́ственныя добро́ты лицезре́ния наслажда́ющеся. Те́мже и на́с, ча́д ва́ших, па́мять ва́шу любо́вию пра́зднующих и с ве́рою под о́тчий кро́в ва́ш прибега́ющих, у Престо́ла Царя́ Сла́вы — Христа́ не забу́дите, вопию́щих ва́м такова́я:

Ра́дуйтеся, в ра́дость Го́спода своего́ вше́дшии; ра́дуйтеся, венцы́ нетле́нныя от Него́ прие́мшии.

Ра́дуйтеся, Небе́снаго Сио́на прекра́снаго гра́ждане; ра́дуйтеся, ве́чнаго Ца́рствия Христо́ва насле́дницы.

Ра́дуйтеся, в жи́зни земне́й еди́наго Христа́ все́м се́рдцем возлюби́вшии и Того́ еди́наго взыска́вшии; ра́дуйтеся, любве́ ра́ди Его́ вся́ преоби́девшии и ми́ра кра́сная презре́вшии.

Ра́дуйтеся, непреста́нным боже́ственным раче́нием превы́ше ви́димых воспари́вшии; ра́дуйтеся, дея́нием виде́ние стяжа́вшии.

Ра́дуйтеся, у́ми, зря́щии Бо́га; ра́дуйтеся, неусы́пныя моли́твы исто́чницы.

Ра́дуйтеся, Валаа́му изря́дная похвало́; ра́дуйтеся, ми́ру свети́льницы.

Ра́дуйтеся, Се́ргие и Ге́рмане, отцы́ преблаже́ннии.

Конда́к 1.

Возбра́нным на́шего спасе́ния побо́рником и те́плым к Бо́гу моли́твенником похва́льное ва́м, преподо́бнии, прино́сим пе́ние. Вы́ же, я́ко иму́щии дерзнове́ние ко Го́споду, от вся́ких на́с бе́д свободи́те, зову́щих:

Ра́дуйтеся, Се́ргие и Ге́рмане, отцы́ преблаже́ннии.

Моли́тва.

О, вели́ции отцы́ на́ши Христо́вы уго́дницы, и те́плии предста́тели ко Спа́су о душа́х на́ших, Се́ргие и Ге́рмане! Вы́ бо в неду́зех цели́тели яви́стеся, по мо́рю пла́вающим ко́рмчии, и утопа́ющим благонаде́жное избавле́ние, и от вся́каго смертоно́снаго наше́ствия храни́тели, па́че же от духо́в нечи́стых свобожде́ние и вся́ких наве́тов проти́ву на́с содержи́мых очище́ние и по́мощь. Моли́теся у́бо ко Влады́це Христу́ о на́с, гре́шных, я́ко да ва́шими моли́твами сподо́бимся в де́нь су́дный десна́го предстоя́ния, и наслажде́ния во Ца́рствии Бо́жии во ве́ки веко́в. Ами́нь.

Моли́тва втора́я.

О, преподо́бнии, богоно́снии, всеблаже́ннии отцы́ на́ши, Се́ргие и Ге́рмане, зри́телие Сла́вы Бо́жия в Небе́сном Ца́рствии, не пре́зрите на́с гре́шных в ну́ждах и ско́рбех на́ших, но ускори́те в по́мощь к ва́м прибега́ющим: приими́те воздыха́ние и сле́зы, и вонми́те смире́нному моле́нию на́шему. Предстоя́ще у́бо Небе́сному Царю́, о всеблаже́ннии! Моли́те бла́гость Его́, е́же уще́дрити ме́сто селе́ния ва́шего и вся́кому гра́ду и стране́ ниспосыла́ти оби́лие бла́г земны́х. Ве́рных рабо́в Его́, в ско́рби и печа́ли де́нь и но́щь вопию́щих к Нему́, многоболе́зный во́пль да услы́шит и да изведе́т от поги́бели живо́т на́ш. Моли́те Его́, е́же на́с все́х в ве́ре и доброде́телех утверди́ти, избавля́я при́сно от вожделе́ний грехо́вных, и от нападе́ния ви́димых и неви́димых враго́в: оби́димыя защити́ти, боля́щыя уврачева́ти, от томи́тельства злы́х духо́в свободи́ти, на мо́ри пла́вающих спаса́ти, путеше́ствующым спутеше́ствовати, и вся́кому ве́рному в ну́ждах спосо́бствовати; я́ко Того́ вси́ есмы́ творе́ние и Того́ е́сть Ца́рство, и Си́ла и Сла́ва во ве́ки веко́в. Ами́нь.

Моли́тва тре́тия.

О, преподо́бнии и богоно́снии отцы́ на́ши Се́ргие и Ге́рмане! С ве́рою и любо́вию припа́дающе к святе́й ико́не ва́шей, умиле́нно мо́лим ва́с: не забу́дите на́с, недосто́йных и гре́шных (имена́), но предста́тельством ва́шим огради́те на́с от злы́х ко́зней вра́жиих, утоли́те возста́ние страсте́й, укрепи́те не́мощь на́шу в духо́вных бра́нех и по́двизех, предлежа́щих на́м, отжени́те вся́кое уны́ние и печа́ль грехо́вную от серде́ц на́ших, и небе́сное утеше́ние низпосли́те на́м во труде́х и ско́рбех на́ших. В стра́шный же ча́с сме́ртный предста́ните все́м на́м, я́ко же блази́и хода́таи и те́мных зра́ков де́монских прогони́телие: да в ми́ре и покая́нии сконча́вше земно́е по́прище на́ше, дости́гнем и ве́чных бла́г наслажде́ния, и ку́пно с ва́ми да воспое́м и просла́вим всесвято́е и́мя Отца́, и Сы́на и Свята́го Ду́ха, ны́не и при́сно и во ве́ки веко́в. Ами́нь.