Конда́к 1.

Избра́нная дво́ице пече́рских просфо́рников, восхваля́ем ва́с любо́вию, преподо́бнии Спиридо́не и Никоди́ме. Вы́, от младе́нства Христа́ Бо́га все́м се́рдцем возлюби́вшии, и да́же до сконча́ния жития́ Тому́ порабо́тавшии, в непреста́ннем псалмопе́нии и свята́го хле́ба пригото́влении просия́вшии, ны́не же в весе́лии у Престо́ла Святы́я Тро́ицы предстоя́щии, моли́теся о все́х усе́рдно ва́с призыва́ющих и благода́рными усты́ уми́льно воспева́ющих:

Ра́дуйтеся, Спиридо́не и Никоди́ме, смире́ннии просфо́рницы пече́рстии.

И́кос 1.

А́нгельской чистоте́ поревнова́вшии, презре́сте суету́ ми́ра сего́ со все́ю скоропреходя́щею его́ красото́ю, а́нгельскому о́бразу приобщи́лися есте́, и добро́та ва́шего благонра́вия яви́ся лю́дем, я́ко гра́д, не моги́й укры́тися, верху́ горы́ стоя́й. Мы́ же, чудя́щеся таково́му о ва́с смотре́нию Бо́жиему, вопие́м ва́м сицева́я:

Ра́дуйтеся, взе́мшии кре́ст сво́й и за Христо́м после́довавшии; ра́дуйтеся, во всеору́жие Бо́жие проти́ву ко́зней диа́вольских обле́кшиися.

Ра́дуйтеся, попече́ние о пло́ти в по́хоти не твори́вшии; ра́дуйтеся, не я́ствы, но благода́тию сердца́ укрепля́вшии.

Ра́дуйтеся, утружде́ннии и обремене́ннии в жи́зни привре́менней; ра́дуйтеся, вся́ содева́вшии без ро́пота и сомне́ния.

Ра́дуйтеся, ну́ждею восхи́тившии Ца́рствие Небе́сное; ра́дуйтеся, со́браннии в жи́тницу Госпо́дню, я́ко пшени́ца чи́стая.

Ра́дуйтеся, Спиридо́не и Никоди́ме, смире́ннии просфо́рницы пече́рстии.

Конда́к 2.

Узре́вше вои́стину, я́ко дру́жба с ми́ром вражда́ про́тив Бо́га е́сть, возгоре́стеся ду́хом о по́двизех и́ноческих и приидо́сте в монасты́рь Пече́рский. Уве́девше же благогове́инство и́ноков, та́мо пребыва́ющих, возжеле́сте име́ти ра́вную ча́сть с ни́ми, а́ще и в ми́ре пожи́сте до седи́н и в во́зраст ста́рости приидо́сте. Егда́ же прия́ты бы́сте, я́ко нае́мницы часа́ единонадеся́таго, воспе́сте Го́сподеви с бра́тиею: Аллилу́иа.

И́кос 2.

Разу́мнии и прему́дрии в богосло́вии и́ноцы узре́ша вы́ лю́ди про́сты и некни́жны, и позна́ша, я́ко вои́стину Госпо́дь бу́яя ми́ра сего́ избра́, да прему́дрыя посрами́т. И́бо простецы́, в ни́хже льсти́ не́сть, восприе́млют че́сть сицеву́ю:

Ра́дуйтеся, смиренному́дрием, я́ко ри́зою, обле́кшиися; ра́дуйтеся, пу́ть у́зкий в житии́ ва́шем избра́вшии.

Ра́дуйтеся, Бо́га возлюби́вшии и Тому́ усе́рдно порабо́тавшии; ра́дуйтеся, Ева́нгелие свя́то соблю́дшии.

Ра́дуйтеся, тя́жкия труды́ во смире́нии серде́ц не́сшии; ра́дуйтеся, хле́бы прино́сныя благогове́йно испека́вшии.

Ра́дуйтеся, тяготу́ и ва́р на зака́те ле́т свои́х поне́сшии; ра́дуйтеся, све́т благоче́стия ми́ру возсия́вшии.

Ра́дуйтеся, Спиридо́не и Никоди́ме, смире́ннии просфо́рницы пече́рстии.

Конда́к 3.

Си́лы уче́ния кни́жнаго и корми́ла гра́моты в мо́ри жите́йскаго пла́вания не восприя́сте, оба́че, егда́ внидо́сте в при́стань наде́жды в монастыри́ ки́евском, анки́рою богодухнове́нных псалмо́в кре́пко утверди́стеся, и всю́ псалти́рь Дави́дову изу́сть стихосло́висте. Ра́дующеся тишине́ му́дрости и́стинныя, при́сно воспева́сте со проро́ком: Аллилу́иа.

И́кос 3.

Иму́ще в сердца́х ва́ших стра́х Бо́жий, безпреста́нно поуча́стеся во псалме́х и пе́ниих и пе́снех духо́вных. Творе́ц же вся́ческих испо́лни ва́с Ду́ха прему́дрости и ра́зума, Ду́ха сове́та и кре́пости, Ду́ха ве́дения и благоче́стия. Сего́ ра́ди ублажа́ем ва́с си́це:

Ра́дуйтеся, блаже́ннии, сове́ту нечести́вых неприча́стнии; ра́дуйтеся, на пу́ть гре́шных не ста́вшии.

Ра́дуйтеся, на седа́лищи губи́телей не се́вшии; ра́дуйтеся, в за́поведех Госпо́дних во́лею укрепи́вшиися.

Ра́дуйтеся, де́нь и но́щь в зако́не Его́ поуча́вшиися; ра́дуйтеся, я́ко древеса́ при вода́х в ве́ре укорени́вшиися.

Ра́дуйтеся, во вре́мя свое́ пло́д благоприя́тный прине́сшии; ра́дуйтеся, во вся́ком де́ле бла́зе преуспе́вшии.

Ра́дуйтеся, Спиридо́не и Никоди́ме, смире́ннии просфо́рницы пече́рстии.

Конда́к 4.

Бу́рею помышле́ний добронаде́жных о ва́с вдохновля́ем, игу́мен бра́тии, преподо́бный Пи́мен По́стник, прови́дев в тебе́, Спиридо́не, му́жа смире́нна и трудолюби́ва, в тебе́ же, Никоди́ме, му́жа непоро́чна и богоприя́тна, определи́ ва́м послуша́ние просфо́рное, са́м же возблагодари́ Христа́ Хле́ба И́стиннаго, дарова́вшаго оби́тели боголю́бцев сицевы́х, воспева́я Ему́: Аллилу́иа.

И́кос 4.

Слы́шавше такову́ю о себе́ во́лю игу́мена, прия́сте ю́, я́ко благослове́ние от Самаго́ Го́спода, и испо́лнисте со вся́ким благогове́нием и усе́рдием. К теле́сным же трудо́м и духо́вныя прилага́сте: по́ст жела́нный и моли́тву непреста́нную. Мы́ же, дивя́щеся таковы́м подвиго́м ва́шим о Го́споде, почита́ем вы́ словесы́ сицевы́ми:

Ра́дуйтеся, я́ко ве́ра Христо́ва всели́ся в сердца́ ва́ша; ра́дуйтеся, я́ко внидо́сте в ра́дость Го́спода своего́.

Ра́дуйтеся, я́ко ны́не свя́ти есте́ свя́тостию Христо́вою; ра́дуйтеся, я́ко любы́ ва́ша ко Го́споду изгна́ вся́ческий стра́х.

Ра́дуйтеся, бли́жним во благо́е к назида́нию угоди́вшии; ра́дуйтеся, в братолю́бии ва́шем, я́ко во све́те, пребы́вшии.

Ра́дуйтеся, не о плотско́м, но о духо́вном помышля́вшии; ра́дуйтеся, до́брою со́вестию изря́дно преукраше́ннии.

Ра́дуйтеся, Спиридо́не и Никоди́ме, смире́ннии просфо́рницы пече́рстии.

Конда́к 5.

Бо́гу возноси́мый пло́д послуша́ния ва́шего, святы́й хле́б, во вре́мя свята́го приноше́ния в Пречи́стое Те́ло Христо́во прелага́шеся. На сие́ чу́до а́нгели недоуме́нно взира́ют, ка́ко Бо́г непостижи́мый предае́т нетле́нную Пло́ть Свою́ в сне́дь лю́дем тле́нным. Свяще́нницы же, принося́ще Безкро́вную Же́ртву, Бо́гови вопию́т: Аллилу́иа.

И́кос 5.

Ви́дяще бра́тия, коли́кия благода́ти сподобля́ются не то́кмо приобща́ющиися Небе́сней Трапе́зе, но и хле́бы прино́сныя уготовля́ющии с кро́тостию и славосло́вием боже́ственным, па́че прилага́ху труды́ к моли́твам и благодаре́ние к послуша́нию. Мы́ же, уча́щеся таково́му благоразу́мию, воспева́ем ва́м си́це:

Ра́дуйтеся, отри́нувшии ра́бство греху́ ра́ди ца́рства благода́ти; ра́дуйтеся, нищету́ духо́вную бога́тно стяжа́вшии.

Ра́дуйтеся, пла́чем о гресе́х утеше́ние прия́вшии; ра́дуйтеся, кро́тостию зе́млю обетова́нную в насле́дие улучи́вшии.

Ра́дуйтеся, а́лчбою и жа́ждею пра́вды насыще́ние благода́тное прие́мшии; ра́дуйтеся, ми́лости ра́ди ва́шея от Го́спода поми́лованнии.

Ра́дуйтеся, в чистоте́ серде́чней Го́спода созерца́вшии; ра́дуйтеся и весели́теся, я́ко мзда́ ва́ша мно́га на Небесе́х.

Ра́дуйтеся, Спиридо́не и Никоди́ме, смире́ннии просфо́рницы пече́рстии.

Конда́к 6.

Про́поведь ва́ша не во препре́тельных словесе́х челове́ческия му́дрости яви́ся лю́дем, преподо́бнии, но вои́стину в явле́нии ду́ха и си́лы, я́коже и рече́ Па́вел апо́стол. Таково́му наставле́нию ва́шему внима́юще, Го́сподеви прино́сим пе́снь: Аллилу́иа.

И́кос 6.

Возсия́сте све́том пра́вды, му́ченицы безкро́внии, егда́ ве́ру ва́шу дела́ми ва́шими оправда́сте. Ели́ко рука́ми труди́стеся, дрова́ руби́сте, во́ду носи́сте или́ те́сто меси́сте, толи́ко па́че уста́ и умы́ ва́ша в непреста́ннем славосло́вии пребыва́ху. Прославля́юще таково́е ва́ше пресла́вное о Христе́ де́лание, хва́лим ва́с си́це:

Ра́дуйтеся, трудолюби́вии жа́тели на ни́ве Госпо́дней; ра́дуйтеся, поощря́ющии на́с к любви́ и доброде́ланию.

Ра́дуйтеся, в моли́тве постоя́нство име́вшии; ра́дуйтеся, вся́ содева́вшии во сла́ву Бо́жию.

Ра́дуйтеся, вся́ твори́вшии я́ко ча́да све́та; ра́дуйтеся, преуспе́вшии в угожде́нии Бо́гу.

Ра́дуйтеся, я́ко ра́дость ва́ша ны́не соверше́нна; ра́дуйтеся, сотаи́нницы и соприча́стницы Христу́.

Ра́дуйтеся, Спиридо́не и Никоди́ме, смире́ннии просфо́рницы пече́рстии.

Конда́к 7.

Хотя́ яви́ти ва́с бра́тии чудотво́рцев изря́дных, попусти́ Госпо́дь в де́нь обы́чных трудо́в ва́ших внеза́пу огню́ пе́щному возгоре́тися, я́ко и просфо́рне ва́шей пла́менем объя́той бы́ти. Вы́ же не устраши́стеся, оба́че, моли́твою вооружи́вшеся и доброде́телию препоя́савшеся, о́гненую си́лу угаси́сте и с благода́рностию воспе́сте Бо́гу: Аллилу́иа.

И́кос 7.

Но́вых прозре́ ва́с избра́нников Свои́х Госпо́дь, услы́шав моли́тву ва́шу, вразуми́ бо ма́нтиею загради́ти же́рло пещи́ огнеды́шащия и вложи́ в се́рдце, связа́в концы́ власяни́цы, к студенцу́ тещи́ вбо́рзе и во́ду принести́, да угаси́те е́ю запале́ние о́гненное. Таково́е вразумле́ние от Бо́га прославля́юще, ва́м вопие́м, преподо́бнии:

Ра́дуйтеся, искуше́нию противоста́вшии тве́рдостию ве́ры ва́шея; ра́дуйтеся, смире́ние мытаре́во в душа́х ва́ших содержа́щии.

Ра́дуйтеся, Ду́ха Бо́жия в себе́ не угаша́вшии; ра́дуйтеся, всыновле́ние Бо́гу наде́ждою стяжа́вшии.

Ра́дуйтеся, сотвори́вшии досто́йныя плоды́ покая́ния; ра́дуйтеся, попече́ние дру́г о дру́зе име́вшии непреста́нное.

Ра́дуйтеся, любо́вию обре́тшии изволе́ний то́ждество; ра́дуйтеся, прославля́вшия Триеди́нство Божества́.

Ра́дуйтеся, Спиридо́не и Никоди́ме, смире́ннии просфо́рницы пече́рстии.

Конда́к 8.

Стра́нное чу́до во мра́це ды́мном уви́деша помо́щницы ва́ши от числа́ бра́тии, вку́пе со́браннии, я́ко ма́нтия, е́юже прегради́сте же́рло пе́щное, ника́коже сгара́ше, но пла́мени вы́ход загради́, власяни́ца же во́ду николи́же попусти́, те́мже покро́в ке́ллии угаси́сте ле́гце. Ви́дяще таково́е чуде́сное явле́ние и ми́лостивное о ва́с смотре́ние Бо́жие, со изумле́нием воспе́ша Го́сподеви: Аллилу́иа.

И́кос 8.

Ве́сь наро́д изра́ильский, ви́дя не́когда сто́лп о́блачный, стоя́щий у вхо́да в ски́нию, покланя́шеся Бо́гу, глаго́лавшему с Моисе́ем, та́ко и бра́тия монасты́рская прославля́ше Го́спода, яви́вшаго в столпе́ ды́мнем уго́дников Свои́х пла́менных. Угаше́ния страсте́й от ни́х ча́юще, возглаго́лем си́це:

Ра́дуйтеся, в ми́ре с бра́тией и дру́г с дру́гом пожи́вшии; ра́дуйтеся, дружелю́бия и милосе́рдия преиспо́лненнии.

Ра́дуйтеся, тяготу́ послуша́ния прие́мшии ра́ди Го́спода; ра́дуйтеся, за́поведи Бо́жии соблю́дшии безпоро́чно.

Ра́дуйтеся, о даре́х духо́вных возревнова́вшии; ра́дуйтеся, благода́ть Свята́го Ду́ха стяжа́вшии.

Ра́дуйтеся, ду́хом пламене́ющии непреста́нно; ра́дуйтеся, яви́вшии на́м о́браз подража́ния.

Ра́дуйтеся, Спиридо́не и Никоди́ме, смире́ннии просфо́рницы пече́рстии.

Конда́к 9.

Вся́кий де́нь и вся́кую но́щь диа́вол воздвиза́ше ко́зни проти́ву ва́с, отцы́ богоно́снии, вы́ же, преиспо́лненнии помышле́ния тве́рдаго, я́ко Госпо́дь ва́м прибе́жище и кре́пкая защи́та, му́жественно разори́сте умышле́ния вра́жеская непреста́нным пе́нием: Аллилу́иа.

И́кос 9.

Вети́и многовеща́ннии не возмо́гут изрещи́ ре́вность служе́ния ва́шего, по Бо́зе соверша́емаго, сего́ ра́ди в Ца́рствии Свое́м глаго́лет ва́м Госпо́дь: ны́не упокоева́ется гла́с ва́ш от рыда́ния и о́чи ва́ши от сле́з, наслади́теся плода́ми трудо́в ва́ших. Мы́ же воздае́м ва́м пе́ние сицево́е:

Ра́дуйтеся, не иска́вшии сла́вы челове́ческия, но то́кмо Бо́жия; ра́дуйтеся, о́браз здра́ваго уче́ния при́сно содержа́вшии.

Ра́дуйтеся, пра́вды ра́ди от ми́ра отре́кшиися; ра́дуйтеся, ми́р име́вшии со все́ми людьми́.

Ра́дуйтеся, в любви́ непреста́нней дру́г ко дру́гу пребыва́вшии; ра́дуйтеся, кро́тостию по́двиги ва́ши огражда́вшии.

Ра́дуйтеся, я́ко в сердца́ ва́ша всели́ся Ду́х Бо́жий; ра́дуйтеся, Христо́вы блази́и сорабо́тницы.

Ра́дуйтеся, Спиридо́не и Никоди́ме, смире́ннии просфо́рницы пече́рстии.

Конда́к 10.

Спасти́ хотя́ще ду́ши своя́ и испо́лнивше вся́ повеле́нная ва́м, не превозноша́стеся умо́м, но помышля́сте себе́ рабы́ неключи́мы бы́ти. В се́м до́бром испове́дании преста́вилися есте́ ко Го́споду, святи́и, и ны́не не в та́инственном о́бразе хле́ба приноше́ния, но лице́м к Лицу́ зря́ще И́стинный Хле́б жи́зни, Христа́ Жизнода́вца, хвале́бно воспева́ете Ему́: Аллилу́иа.

И́кос 10.

Сте́ны Иерихо́нския падо́ша от тру́бнаго гла́са по смотре́нию Бо́жию, та́ко и сте́ны искуше́ний диа́вольских, прегражда́ющия пу́ть в Небе́сное Ца́рствие, разруша́хуся от гла́са моли́твенных воздыха́ний ва́ших, преподо́бнии. Сего́ ра́ди просла́ви ва́с Бо́г в ли́це все́х святы́х отце́в пече́рских и по сме́рти ва́шея яви́ ми́ру нетле́нныя ва́ша мо́щи, и́миже ны́не почива́ете в пеще́рех Анто́ниевых, и все́м притека́ющим к ва́м с ве́рою источа́ете то́ки благода́тныя по́мощи ва́шея. Ны́не же приими́те хвале́бныя похвалы́ сия́:

Ра́дуйтеся, Бо́га Отца́ еди́неми усты́ сла́вившии; ра́дуйтеся, злосло́вие от диа́вола претерпе́вшии.

Ра́дуйтеся, прие́мшии ду́ха усыновле́ния; ра́дуйтеся, увеща́вшии дру́г дру́га в ду́се кро́тости.

Ра́дуйтеся, совле́кшиися челове́ка ве́тхаго; ра́дуйтеся, в но́ваго ра́достно обле́кшиися.

Ра́дуйтеся, спасе́ние улучи́вшии, призыва́юще и́мя Го́спода; ра́дуйтеся, раби́ и́стиннии Бо́га Вы́шняго.

Ра́дуйтеся, Спиридо́не и Никоди́ме, смире́ннии просфо́рницы пече́рстии.

Конда́к 11.

Пропове́дница ве́ры твоея́ явля́ется на́м честна́я десни́ца твоя́, Спиридо́не богоприя́тне, е́юже ча́д церко́вных поуча́еши изобража́ти на себе́ Кре́ст святы́й во вся́кое вре́мя. Си́це бо, осени́в себе́ кре́стным зна́мением, отше́л еси́ ко Христу́, Ему́же, предстоя́, моли́ся, да да́рует на́м и́стинное усе́рдие славосло́вити Его́: Аллилу́иа.

И́кос 11.

Свети́льник нога́м и све́т стезя́м ва́шим во вре́мя земна́го стра́нствования всегда́ бе́ Сло́во Бо́жие, те́мже внидо́сте в черто́г Небе́сный. Моли́теся за ны́, да не оскуде́ет еле́й ве́дения и ми́лости во свети́льницех на́ших, но да сря́щем Жениха́ всевожделе́ннаго. Упова́юще на по́мощь ва́шу, мо́лимся:

Ра́дуйтеся, подража́тели дре́вних отце́в; ра́дуйтеся, сохрани́вшии еди́нство в сою́зе ми́ра.

Ра́дуйтеся, в ду́се и мы́слех соедине́ннии; ра́дуйтеся, просла́вившии Го́спода в телесе́х и душа́х ва́ших.

Ра́дуйтеся, воздева́вшии ру́ки чи́стыя без гне́ва и сомне́ния; ра́дуйтеся, непреста́нно принося́щии Бо́гу же́ртвы хвалы́.

Ра́дуйтеся, очи́стившии сердца́ ва́ша от лука́выя со́вести; ра́дуйтеся, возлежа́щии на бра́чнем пи́ре Жениха́.

Ра́дуйтеся, Спиридо́не и Никоди́ме, смире́ннии просфо́рницы пече́рстии.

Конда́к 12.

Благода́ть Бо́жия яви́ на́м вели́кое приобре́тение, преподо́бных Спиридо́на и Никоди́ма, просфо́рников сла́вных. Воскли́кнем же, благодаря́ще всегда́ за вся́ Бо́га и Отца́, побе́дную пе́снь: Аллилу́иа.

И́кос 12

Пою́ще ва́ше, преподо́бнии, от все́х прославле́ние, ко Пресвяте́й Тро́ице возвыша́ем немощны́й гла́с хвале́ния и на дерзнове́ние ва́ше упова́ем, да испо́лнит Бо́г вся́ блага́я проше́ния воспева́ющих ва́м сицева́я:

Ра́дуйтеся, согра́ждане святы́м и и́скрении Бо́гу; ра́дуйтеся, насле́довавшии обетова́ние терпе́нием и ве́рою.

Ра́дуйтеся, иска́вшии не свои́х си́, но по́льзы бли́жняго; ра́дуйтеся, си́льнии, носи́вшии не́мощи безси́льных.

Ра́дуйтеся, Ца́рствие Небе́сное обре́тшии; ра́дуйтеся, вене́ц нетле́нный получи́вшии.

Ра́дуйтеся, зло́ победи́вшии добро́м безстра́шно; ра́дуйтеся, я́ко Госпо́дь преиспо́лни ва́с любо́вию.

Ра́дуйтеся, Спиридо́не и Никоди́ме, смире́ннии просфо́рницы пече́рстии.

Конда́к 13.

О, преди́внии и сла́внии уго́дницы Бо́жии, преподо́бнии и богоно́снии отцы́ на́ши Спиридо́не и Никоди́ме! Приими́те от на́с сие́ ма́лое моле́ние, в похвалу́ ва́м приноси́мое. Благоприя́тным ва́шим хода́тайством испроси́те на́м у Го́спода Си́л небла́знену житию́ на́шему бы́ти, от ра́спрей и раздо́ров сохраня́тися, в единомы́слии и единове́рии соблюда́тися, в исполне́нии Христо́вых за́поведей да́же до сконча́ния жи́зни пребыва́ти, да ку́пно с ва́ми воспое́м Триеди́ному Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгельской чистоте́ поревнова́вшии, презре́сте суету́ ми́ра сего́ со все́ю скоропреходя́щею его́ красото́ю, а́нгельскому о́бразу приобщи́лися есте́, и добро́та ва́шего благонра́вия яви́ся лю́дем, я́ко гра́д, не моги́й укры́тися, верху́ горы́ стоя́й. Мы́ же, чудя́щеся таково́му о ва́с смотре́нию Бо́жиему, вопие́м ва́м сицева́я:

Ра́дуйтеся, взе́мшии кре́ст сво́й и за Христо́м после́довавшии; ра́дуйтеся, во всеору́жие Бо́жие проти́ву ко́зней диа́вольских обле́кшиися.

Ра́дуйтеся, попече́ние о пло́ти в по́хоти не твори́вшии; ра́дуйтеся, не я́ствы, но благода́тию сердца́ укрепля́вшии.

Ра́дуйтеся, утружде́ннии и обремене́ннии в жи́зни привре́менней; ра́дуйтеся, вся́ содева́вшии без ро́пота и сомне́ния.

Ра́дуйтеся, ну́ждею восхи́тившии Ца́рствие Небе́сное; ра́дуйтеся, со́браннии в жи́тницу Госпо́дню, я́ко пшени́ца чи́стая.

Ра́дуйтеся, Спиридо́не и Никоди́ме, смире́ннии просфо́рницы пече́рстии.

Конда́к 1.

Избра́нная дво́ице пече́рских просфо́рников, восхваля́ем ва́с любо́вию, преподо́бнии Спиридо́не и Никоди́ме. Вы́, от младе́нства Христа́ Бо́га все́м се́рдцем возлюби́вшии, и да́же до сконча́ния жития́ Тому́ порабо́тавшии, в непреста́ннем псалмопе́нии и свята́го хле́ба пригото́влении просия́вшии, ны́не же в весе́лии у Престо́ла Святы́я Тро́ицы предстоя́щии, моли́теся о все́х усе́рдно ва́с призыва́ющих и благода́рными усты́ уми́льно воспева́ющих:

Ра́дуйтеся, Спиридо́не и Никоди́ме, смире́ннии просфо́рницы пече́рстии.

Моли́тва.

О преподо́бнии и богоно́снии отцы́ на́ши Спиридо́не и Никоди́ме! В непреста́ннем псалмопе́нии и труде́х просфо́рных во оби́тели пече́рстей подвиза́вшиися, Бо́гу угоди́ли есте́. Ве́мы ва́с я́ко ско́рых помо́щников и засту́пников пред Престо́лом Святы́я Тро́ицы, ве́лие дерзнове́ние стяжа́вших моли́тися о все́х, ва́шу па́мять благогове́йно чту́щих. Се́ мы́, недосто́йнии и многогре́шнии, взыва́ем к ва́м и про́сим усе́рдно: помози́те на́м, отцы́ святи́и, бу́рное мо́ре жития́ сего́ безмяте́жно прейти́ и приста́нища спаси́тельнаго небла́зненно дости́гнути. Умоли́те Великодарови́таго Бо́га страну́ на́шу в ми́ре соблюсти́, лю́ди же ея́ в ве́ре правосла́вней укрепи́ти, неве́рие же и язы́чество богоху́льное отню́д искорени́ти. Испроси́те у Го́спода Си́л земли́ на́шей плодоно́сие, лю́дем Свои́м от гла́да, губи́тельства, тру́са, пото́па, огня́, меча́, наше́ствия иноплеме́нных, междоусо́бныя бра́ни и вся́ких враго́в ви́димых и неви́димых избавле́ние, и да не поги́бнем со беззако́нии на́шими. Моли́теся же за призыва́ющих ва́с усе́рдно в боле́знех, напа́стех, печа́лех, труде́х, путеше́ствиих, у́зах, ско́рбех и во вся́ком нестрое́нии жите́йстем. Научи́те на́с, преподо́бнии, сохраня́ти дру́г со дру́гом ми́р и любо́вь нелицеме́рную. В после́дний же ча́с жития́ на́шего да не оста́вите на́с без по́мощи ва́шея и предста́тельства пред Го́сподем Христо́м. Моли́твами ва́шими и засту́пничеством да пода́ст на́м Судия́ вся́ческих стра́шный пу́ть мыта́рств возду́шных прейти́ и непреткнове́нно вни́ти во всевожделе́нное Оте́чество Небе́сное, иде́же вку́пе с ва́ми досто́йно воспе́ти и просла́вити в Тро́ице Еди́наго Бо́га, Отца́, и Сы́на и Свята́го Ду́ха во ве́ки веко́в. Ами́нь.