Конда́к 1.
Избра́нные уго́дницы Бо́жии, миродержи́теля тьмы́ ве́ка сего́ победи́тельницы, я́ко засту́пницам на́шым, похва́льная воспису́ем ва́м, ма́тери на́шя преподо́бныя. Вы́ же, я́ко иму́ще дерзнове́ние ве́лие ко Го́споду, от вся́ких на́с бе́д моли́твами ва́шими изба́вите, зову́щих:
Ра́дуйтеся, преподо́бныя же́ны Дивее́вския, наста́вницы на́шя преди́вныя.
И́кос 1.
А́нгельский о́браз восприя́вше, во пло́ти я́ко безпло́тныя пожи́ли есте́, преподо́бныя ма́тери, свети́льницы всесве́тлии я́вльшеся ми́рови. Те́мже похваля́юще труды́ и по́двиги ва́шя, почита́ем ва́с пе́нии си́ми:
Ра́дуйтеся, неве́сты Христо́вы прекра́сныя; ра́дуйтеся, избра́нницы Бо́жия Ма́тере.
Ра́дуйтеся, послу́шницы Серафи́мовы; ра́дуйтеся, моли́твенницы преди́вныя.
Ра́дуйтеся, пре́лесть ми́ра сего́ отве́ргшыя; ра́дуйтеся, Кре́ст Христо́в на ра́му взе́мшыя.
Ра́дуйтеся, я́вльшия о́браз соверше́ннаго терпе́ния; ра́дуйтеся, сосу́ди дрази́и кро́тости и смире́ния.
Ра́дуйтеся, нескве́рно и чи́сто пожи́вшыя; ра́дуйтеся, бесо́в моли́твами попали́вшыя.
Ра́дуйтеся, Росси́йския земли́ украше́ние; ра́дуйтеся, ве́рных изве́стное утвержде́ние.
Ра́дуйтеся, преподо́бныя же́ны Дивее́вския, наста́вницы на́шя преди́вныя.
Конда́к 2.
Ви́дящи вдови́ца Ага́фиа, я́ко суета́ су́етствий, вся́ческая суета́ в ми́ре се́м привре́меннем, восхоте́ служи́ти Еди́ному Бо́гу, и о́браз и́ноческий восприя́т, Алекса́ндра наре́кшися. Мы́ же ве́дуще сию́ я́ко ди́вную избра́нницу Бо́жию и подви́жницу, вопие́м Влады́це все́х: Аллилу́иа.
И́кос 2.
Ра́зум неуразуме́нный явле́ния Богома́тере разуме́ти и́щущи свята́я Алекса́ндра, к духоно́сным ста́рцем притече́. Ти́и же Го́споду помоли́вшеся ре́ша е́й: блаже́нна еси́ ма́ти, я́ко избра́ тя́ Пречи́стая Богоро́дица основа́ти оби́тель ди́вную, четве́ртый жре́бий Ея́ на земли́; у́бо гряди́ в пу́ть ничто́же сумня́щеся, и благослове́ние Госпо́дне да пребу́дет с тобо́ю вове́ки. Те́мже и мы́ вопие́м е́й сицева́я:
Ра́дуйся, вели́кая и свята́я ма́ти блаже́нная; ра́дуйся, просвеща́яся моли́твенным бде́нием.
Ра́дуйся, посты́ и труды́ пло́ть изнури́вшая; ра́дуйся, нищету́ и ско́рби и́ноческия возлю́бльшая.
Ра́дуйся, я́ко призре́ Госпо́дь на твое́ смире́ние; ра́дуйся, первонача́льнице оби́тели Дивее́вския.
Ра́дуйся, ни́щих и убо́гих пита́вшая; ра́дуйся, це́рквам име́ние расточа́вшая.
Ра́дуйся, та́йных благодея́ний сокро́вищнице; ра́дуйся, благода́тных сле́з исто́чниче.
Ра́дуйся, хра́мов Бо́жиих строи́тельнице; ра́дуйся, боле́зней и страсте́й цели́тельнице.
Ра́дуйся, преподо́бная ма́ти Алекса́ндро, наста́внице на́ша преди́вная.
Конда́к 3.
Си́лою свы́ше облекла́ся еси́, ди́вная Ма́рфо: отрокови́ца бо трина́десяти ле́т су́щи, любо́вию ко Христу́ та́ко воспламени́лася еси́, я́ко все́х сесте́р диве́евских жестото́ю жития́ превзошла́ еси́. Мы́ же дивя́щеся исправле́нием твои́м, Бо́гу укре́пльшему тя́ вопие́м: Аллилу́иа.
И́кос 3.
Иму́щи по́мысл в Бо́зе неколеби́мо утвержде́н, ма́ти Ма́рфо, а́нгелы и челове́ки кро́тостию и смире́нием удиви́ла еси́, послуша́ния соверше́ннаго пу́ть показа́вши: сконча́вшися вма́ле, испо́лнила еси́ ле́та до́лга, уго́дна бо бе́ Го́сподеви душа́ твоя́. Те́мже зове́м ти́ си́це:
Ра́дуйся, пи́щу моли́тву непреста́нную име́вшая; ра́дуйся, молча́нием уста́ запечатле́вшая.
Ра́дуйся, возлю́бльшая по́ст и бде́ние; ра́дуйся, отло́жшая земна́я попече́ния.
Ра́дуйся, возлю́бленное ча́до Серафи́мово; ра́дуйся, ста́рца вели́каго сотаи́нница.
Ра́дуйся, труды́ ко трудо́м прилага́вшая; ра́дуйся, еди́наго на потре́бу взыска́вшая.
Ра́дуйся, чистото́ю душе́вною и теле́сною блиста́ющая; ра́дуйся, доброде́тельным житие́м ми́р осиява́ющая.
Ра́дуйся, сесте́р диве́евских небе́сная нача́льница; ра́дуйся, Христо́ва голуби́це избра́нная.
Ра́дуйся, преподо́бная ма́ти Ма́рфо, наста́вница на́ша преди́вная.
Конда́к 4.
Бу́ря помышле́ний сумни́тельных возста́ на тя́, ма́ти Еле́но, егда́ у свята́го Серафи́ма благослове́ния на и́ноческий пу́ть проси́вши, услы́шала еси́, я́ко подоба́ше ти́ бра́ком сочета́тися. И та́ко три́ ле́та искуша́ема, в моли́тве сле́зной, воздержа́нии и молча́нии пожи́вши, в жела́нии а́нгельский о́браз прия́ти па́че и па́че укрепля́шеся. Мы́ же дивя́щеся таково́му о тебе́ Бо́жию промышле́нию, вопие́м со умиле́нием: Аллилу́иа.
И́кос 4
Слы́шавши сло́во преподо́бнаго: гряди́ в Диве́ево, ра́досте моя́, с женихо́м Христо́м обручи́тися, неизрече́нною ра́дости испо́лнилася еси́, ма́ти Еле́но; и в оби́тель святу́ю вступи́вши, по́двиг к по́двигу прилага́ше. Мы́ же ве́дяще свято́е и чи́стое житие́ твое́, вопие́м ти́ похва́льная:
Ра́дуйся, от зми́я лука́ваго изба́вльшаяся; ра́дуйся, пу́ть и́ноческий избра́вшая.
Ра́дуйся, моли́тве серде́чней и воздержа́нию прилежа́вшая; ра́дуйся, словесы́ святы́х оте́ц ду́шу пита́вшая.
Ра́дуйся, во смире́нии и безмо́лвии пожи́вшая; ра́дуйся, милосе́рдием и кро́тостию украси́вшаяся.
Ра́дуйся, ни́щым и неиму́щым благоде́явшая та́йно; ра́дуйся, ло́жем име́вшая хла́дный ка́мень.
Ра́дуйся, я́вльшая послуша́ние ди́вное; ра́дуйся, сподо́бльшаяся зре́ния небе́сных оби́телей.
Ра́дуйся, Го́спода я́ко неизрече́нный о́гнь узре́вшая; ра́дуйся, к жениху́ Христу́ а́ки мо́лния возлете́вшая.
Ра́дуйся, преподо́бная ма́ти Еле́но, наста́вница на́ша преди́вная.
Конда́к 5.
Боготе́чная звезда́ яви́лася еси́, блаже́нная Пелаги́е, избра́нница Бо́жия ве́лия, терпе́ния сто́лп непоколеби́мый и моли́твенница ди́вная, наста́вница му́драя все́м притека́ющым к тебе́. Те́мже ублажа́ем тя́ и Бо́гу просла́вльшему тя́ вопие́м: Аллилу́иа.
И́кос 5.
Ви́деша бли́жнии и да́льнии, ма́ти Пелаги́е, по́двиг тру́днейший па́че ины́х, его́же облобыза́ла еси́, бу́ею Христа́ ра́ди соде́лавшися и терпе́ние па́че естества́ показа́вши; и о́ви у́бо руга́хуся, о́ви же уве́девше я́ко ра́зум и́стинный от Бо́га ти́ дарова́ся, притека́ху к тебе́ с ве́рою, с ни́миже и мы́ взыва́ем ти́:
Ра́дуйся, ве́лий благода́ти Бо́жия свети́льниче; ра́дуйся, уте́шительнице на́ша и моли́твеннице.
Ра́дуйся, возлю́бльшая все́м се́рдцем Жениха́ Небе́снаго; ра́дуйся, от земна́го супру́га лю́тая муче́ния претерпе́вшая.
Ра́дуйся, стено́ и покро́ве к тебе́ прибега́ющих; ра́дуйся, боле́зни и стра́сти на́шя исцеля́ющая.
Ра́дуйся, пла́мень о́гненный моли́твою угаси́вшая; ра́дуйся, архиере́а непра́веднаго зауши́вшая.
Ра́дуйся, сла́вы и похвалы́ людски́я не терпе́вшая; ра́дуйся, поруга́ния я́ко сла́дкое питие́ пи́вшая.
Ра́дуйся, о пра́вде Бо́жии ревни́тельнице; ра́дуйся, и́стинная Христо́ва служи́тельнице.
Ра́дуйся, ма́ти Пелаги́е, наста́внице на́ша преди́вная.
Конда́к 6.
Пропове́дница веща́ний богоно́сных яви́лася еси́, ма́ти Параске́во, егда́ по кончи́не сестры́ твоея́ святы́я Ма́рфы, узре́ла еси́ ю́ в хра́ме на возду́се вку́пе с Богома́терию стоя́щу, и а́бие проро́чествовати начала́ еси́. Те́мже Бо́гу та́ко прославля́ющему лю́бящих Его́ вопие́т: Аллилу́иа.
И́кос 6.
Возсия́ла еси́ я́ко луча́ пресве́тлая Со́лнца Пра́вды во оби́тели диве́евстей, ма́ти Параске́во, и от Богома́тере и уго́дника Бо́жия Серафи́ма за́поведь прия́ла еси́: егда́ возгори́тся сму́та во оби́тели, пра́вду испове́дати, непра́ведныя и злы́я обличи́ти. Сего́ ра́ди ублажа́ем тя́ си́це:
Ра́дуйся, подви́жнице и моли́твеннице неуста́нная; ра́дуйся, проро́чица Бо́гом избра́нная.
Ра́дуйся, моли́твою бесо́м запреща́вшая; ра́дуйся, сла́ву гряду́щую оби́тели провеща́вшая.
Ра́дуйся, я́ко послуша́ние твое́ похвали́ сама́ Пречи́стая; ра́дуйся, се́стры терпе́нию и му́жеству учи́вшая.
Ра́дуйся, возмуще́ние исто́чника Серафи́мова узре́вшая; ра́дуйся, на по́двиг юро́дства а́бие изше́дшая.
Ра́дуйся, возмути́телей ми́ра во оби́тели обличи́вшая; ра́дуйся, к духово́м зло́бы в бра́нь всту́пльшая.
Ра́дуйся, Ду́хом Боже́ственным просве́щшаяся; ра́дуйся, в небе́сныя кро́вы со сла́вою возне́сшаяся.
Ра́дуйся, преподо́бная ма́ти Параске́во, наста́внице на́ша преди́вная.
Конда́к 7.
Хотя́ гряду́щая сестра́м дивее́вским откры́ти, рече́ преподо́бный Серафи́м, я́ко двоюна́десятою нача́льницею монасты́рь и́мать устро́итися, предрека́я игу́менство твое́, ма́ти Мари́е; мы́ же ве́дяще тя́ ма́терь и́стинную и наста́вницу богода́нную все́м благоче́стно жи́ти хотя́щым, вопие́м Бо́гу тя́ умудри́вшу: Аллилу́иа.
И́кос 7.
Ди́вное терпе́ние и кро́тость показа́ла еси́, ма́ти Мари́е, ско́рбь и тесноту́ мона́шескаго жития́ сла́дце терпя́щи, в моли́тве бдя́щи неколеби́мою ве́рою, вся́ заве́ты Ма́тере Бо́жия и преподо́бнаго Серафи́ма сохрани́ти тща́щися. Те́мже похваля́ем тя́ пе́нии си́ми:
Ра́дуйся, от ю́ных ле́т Го́спода возлю́бльшая; ра́дуйся, ми́р су́етный оста́вльшая.
Ра́дуйся, труды́ и поще́нием безстра́стие стяжа́вшая; ра́дуйся, ве́ру и любо́вь и́стинную к Бо́гу я́вльшая.
Ра́дуйся, клевету́ и наве́ты му́жественне претерпе́вшая; ра́дуйся, при́сно у́мныма очи́ма горе́ зре́вшая.
Ра́дуйся, разоре́нныя оби́тели устрои́тельнице пресла́вная; ра́дуйся, о сестра́х я́ко ма́терь о ча́дех пе́кшаяся неуста́нно.
Ра́дуйся, наказа́тельнице ми́лостивая и кро́ткая; ра́дуйся, сия́ющая душе́вною добро́тою.
Ра́дуйся, ве́ру тве́рдую к свято́му Серафи́му име́вшая; ра́дуйся, явле́ние честны́х его́ моще́й ра́достно узре́вшая.
Ра́дуйся, преподо́бная ма́ти Мари́е, наста́внице на́ша преди́вная.
Конда́к 8.
Стра́нное чу́до яви́ся все́м житие́ твое́, блаже́нная Параске́во: земны́м госпо́дием пе́рвее ве́рно служа́щи, непра́ведно ско́рбь от те́х прия́ла еси́; восприя́вши же в души́ о́гнь Боже́ственный, Еди́ному Бо́гу служи́ти возжеле́ла еси́, и к по́двигу жесто́кому устреми́лася еси́, безкро́вна по сто́гнам скита́ющися, вся́ку возду́шну тяготу́ и поноше́ния людска́я терпя́щи, просвети́лася еси́ душе́ю и те́лом, Го́сподеви взыва́ющи при́сно: Аллилу́иа.
И́кос 8.
Вся́ вои́стину чи́ста и христоно́сна яви́лася еси́, ма́ти Параске́во, три́десять ле́т в пеще́ре пожи́вши и ле́с саро́вский моли́твою твое́ю облагоуха́вши, в Диве́еве водвори́лася еси́, ма́терь все́м сестра́м бы́вши. Сего́ ра́ди зове́м ти́:
Ра́дуйся, Ца́рство Небе́сное вну́трь стяжа́вшая; ра́дуйся, смире́ние ве́лие и любо́вь к бли́жним показа́вшая.
Ра́дуйся, на пу́ть за́поведей Христо́вых все́х приводя́щая; ра́дуйся, зре́вшая гряду́щая я́ко настоя́щая.
Ра́дуйся, пло́ть до конца́ умертви́вшая; ра́дуйся, бу́ей Христа́ ра́ди бы́вшая.
Ра́дуйся, о́гненный сто́лп моли́твы чи́стыя; ра́дуйся, терпе́нием до конца́ спасе́ние улучи́вшая.
Ра́дуйся, сму́ту и бе́дствия в земли́ Росси́йстей предре́кшая; ра́дуйся, благослови́вшая Ца́рственных Страстоте́рпцев на по́двиг кре́стный.
Ра́дуйся, Свята́го Ду́ха селе́ние; ра́дуйся, источа́ющая все́м исцеле́ния.
Ра́дуйся, преподо́бная ма́ти Параске́во, наста́внице на́ша преди́вная.
Конда́к 9.
Все́ естество́ а́нгельское удиви́ся по́двигом ва́шым, преподо́бныя ма́тери на́шя, воздержа́ние бо и нестяжа́ние, се́рдце смире́нное и кро́ткое, бде́ние с ми́лостынею, ра́зум и ве́ру, и соверше́нну любо́вь стажа́вше, ны́не в небе́сных черто́зех Бо́гу пое́те: Аллилу́иа.
И́кос 9.
Вети́я многовеща́нныя недоуме́ют по достоя́нию восхвали́ти ва́с, же́ны свяще́нныя, в же́нстем бо телеси́ му́жеский ра́зум иму́ще, ми́ру сраспя́лися есте́ вои́стину, те́мже вопие́м ва́м похва́льная:
Ра́дуйтеся, ску́дость жития́ и лише́ния терпе́вшия любве́ ра́ди Христо́вы; ра́дуйтеся, лику́ющыя ны́не в небе́сных кро́вех.
Ра́дуйся, Ксе́ние, стра́сти жестокожи́тием уби́вшая; ра́дуйся, сестры́ не щади́ти пло́ть учи́вшая.
Ра́дуйся, Евпракси́е, с Богома́терию бесе́ды удосто́ившаяся; ра́дуйся, я́ко Та́ укрепи́ тя́ к мона́шескому по́двигу.
Ра́дуйся, Капитоли́но, к Небе́сному Жениху́ прите́кшая; ра́дуйся, земна́го обру́чника презре́вшая.
Ра́дуйся, Ната́лие блаже́нная, подви́жнице пресла́вная; ра́дуйся, моли́твеннице за ны́ неуста́нная.
Ра́дуйтеся, ма́тери на́шя богоно́сныя; ра́дуйтеся, исцеле́ний о́блаки ро́снии.
Ра́дуйтеся, преподо́бныя же́ны Дивее́вския, наста́вницы на́шя преди́вныя.
Конда́к 10.
Спасе́ния стезю́ хотя́ показа́ти все́м Госпо́дь, яви́ на́м ва́с, же́ны небому́дренныя, я́ко о́браз и́стинно богоуго́днаго жития́. Те́мже благода́рственне вопие́м Ему́: Аллилу́иа.
И́кос 10.
Стена́ несокруши́мая и заступле́ние необори́мое яви́лися есте́ все́м прибега́ющым к ва́м, преподо́бныя, моли́теся жи́знь ве́чную улучи́ти пою́щым ва́м такова́я:
Ра́дуйтеся, моли́твою поже́гшия страсте́й те́рние; ра́дуйтеся, Христу́ жениху́ ва́шему сраспе́ншияся усе́рдно.
Ра́дуйтеся, при́сно к Бо́гу взира́вшия; ра́дуйтеся, пра́вды Его́ вы́ну алка́вшия.
Ра́дуйтеся, поноше́ния и гоне́ния претерпе́вшыя; ра́дуйтеся, вы́шнюю сла́ву узре́вшия.
Ра́дуйтеся, го́рдаго зми́я нога́ма попра́вшыя; ра́дуйтеся, на ка́мени ве́ры недви́жимо ста́вшия.
Ра́дуйтеся, во́льную нищету́ избра́вшыя; ра́дуйтеся, чуде́с де́йство прия́вшия.
Ра́дуйтеся, безкро́вныя Христо́вы му́ченицы; ра́дуйтеся, чу́дныя на́шя засту́пницы
Ра́дуйтеся, преподо́бныя же́ны Дивее́вския, наста́вницы на́шя преди́вныя.
Конда́к 11.
Пе́ние всеумиле́нное Го́сподеви в житии́ принося́ще, святы́я же́ны, ны́не со а́нгелы пе́снь трисвяту́ю возсыла́ете Ему́ на небеси́. Но и на́с воспева́ющих ва́шя по́двиги не забу́дите, моля́щеся дарова́ти проще́ние согреше́ний все́м правосла́вно Бо́гу пою́щым: Аллилу́иа.
И́кос 11.
Светопода́тельныя свети́льники су́щым во мра́це страсте́й грехо́вных и мирски́я суеты́ яви́стеся, сла́вныя же́ны, све́том за́поведей Христо́вых просвети́те пою́щих ва́м сицева́я:
Ра́дуйтеся, столпи́ мона́шествующих же́н и пра́вило; ра́дуйтеся, уча́щия ны́ моли́тве непреста́нней.
Ра́дуйтеся, мирску́ю красоту́ оста́вльшия; ра́дуйтеся, нетле́нную добро́ту возлю́бльшия.
Ра́дуйтеся, Еди́ному Бо́гу послужи́вшия; ра́дуйтеся, во оправда́ниих Его́ ходи́вшия.
Ра́дуйтеся, воздержа́нием житие́ свое́ украси́вшия; ра́дуйтеся, у́ды я́же на земли́ умертви́вшия.
Ра́дуйтеся, страда́ньми искуше́ний наостри́вшияся; ра́дуйтеся, прило́ги вра́жия побе́ждшия.
Ра́дуйтеся, улучи́вшия ве́чное весе́лие; ра́дуйтеся, к Бо́гу иму́щыя дерзнове́ние ве́лие.
Ра́дуйтеся, преподо́бныя же́ны Дивее́вския, наста́вницы на́шя преди́вныя.
Конда́к 12.
Благода́ть исцеле́ний прие́мше от Бо́га, преподо́бныя ма́тери, изба́вите на́с от неду́гов душе́вных и теле́сных, да непреткнове́нно Влады́це воспои́м: Аллилу́иа.
И́кос 12.
Пою́ще по́двиги ва́шя, восхваля́ем ва́с, богому́дрыя, заступле́ния ва́шего прося́ще и взыва́ем ва́м со умиле́нием:
Ра́дуйтеся, прекра́снии цве́ти ра́йстии; ра́дуйтеся, на земли́ пожи́вшыя а́нгельски.
Ра́дуйтеся, се́явшия в житии́ слеза́ми по́стными; ра́дуйтеся, жну́щия кла́сы ра́дости присноживо́тия.
Ра́дуйтеся, чудеса́ и исцеле́ния точа́щыя; ра́дуйтеся, о на́шем спасе́нии Бо́га моля́щыя.
Ра́дуйтеся, те́сный пу́ть избра́вшыя; ра́дуйтеся, широту́ ра́йскую стяжа́вшия.
Ра́дуйтеся, страсте́й на́ших бу́рю укроща́ющия; ра́дуйтеся, в терпе́нии скорбе́й укрепля́ющыя.
Ра́дуйтеся, мона́шескаго жития́ пра́вило; ра́дуйтеся, все́х ве́рных при́сное ра́дование.
Ра́дуйтеся, преподо́бныя же́ны Дивее́вския, наста́вницы на́шя преди́вныя.
Конда́к 13.
О пресла́вныя преподо́бныя же́ны Дивее́вския, ско́рбным путе́м вше́дшыя в ра́дость неконча́емую, приими́те ны́не сие́ ма́лое похвале́ние и от вся́ких напа́стей и бе́д изба́вите и на пу́ть и́стиннаго спасе́ния наста́вите все́х помина́ющих по́двиги ва́шя, Бо́гу же вопию́щих: Аллилу́иа.
И́кос 1.
А́нгельский о́браз восприя́вше, во пло́ти я́ко безпло́тныя пожи́ли есте́, преподо́бныя ма́тери, свети́льницы всесве́тлии я́вльшеся ми́рови. Те́мже похваля́юще труды́ и по́двиги ва́шя, почита́ем ва́с пе́нии си́ми:
Ра́дуйтеся, неве́сты Христо́вы прекра́сныя; ра́дуйтеся, избра́нницы Бо́жия Ма́тере.
Ра́дуйтеся, послу́шницы Серафи́мовы; ра́дуйтеся, моли́твенницы преди́вныя.
Ра́дуйтеся, пре́лесть ми́ра сего́ отве́ргшыя; ра́дуйтеся, Кре́ст Христо́в на ра́му взе́мшыя.
Ра́дуйтеся, я́вльшия о́браз соверше́ннаго терпе́ния; ра́дуйтеся, сосу́ди дрази́и кро́тости и смире́ния.
Ра́дуйтеся, нескве́рно и чи́сто пожи́вшыя; ра́дуйтеся, бесо́в моли́твами попали́вшыя.
Ра́дуйтеся, Росси́йския земли́ украше́ние; ра́дуйтеся, ве́рных изве́стное утвержде́ние.
Ра́дуйтеся, преподо́бныя же́ны Дивее́вския, наста́вницы на́шя преди́вныя.
Конда́к 1.
Избра́нные уго́дницы Бо́жии, миродержи́теля тьмы́ ве́ка сего́ победи́тельницы, я́ко засту́пницам на́шым, похва́льная воспису́ем ва́м, ма́тери на́шя преподо́бныя. Вы́ же, я́ко иму́ще дерзнове́ние ве́лие ко Го́споду, от вся́ких на́с бе́д моли́твами ва́шими изба́вите, зову́щих:
Ра́дуйтеся, преподо́бныя же́ны Дивее́вския, наста́вницы на́шя преди́вныя.
Моли́тва.
О же́ны богому́дрыя, во оби́тели Диве́евстей просия́вшыя, Христо́вы неве́сты ди́вныя, мо́лим ва́с, гре́шнии и недосто́йнии, при́зрите на моле́ние на́ше, и помози́те на́м, да воспря́нем от сна́ ле́ностнаго, и житию́ ва́шему благоуго́дно поревну́им. Научи́те на́с моли́тве непреста́нней и покая́нию и́стинному, и в ве́ре пра́вой соблюди́те ны́ я́ко да очи́стившеся от скве́рны прегреше́ний, ра́йския сла́дости вкуси́ти сподо́бимся, воспева́юще со все́ми святы́ми Бо́га в Тро́ице Святе́й сла́вимаго, Отца́ и Сы́на и Свята́го Ду́ха, во ве́ки веко́в. Ами́нь.