Акафист трием Оптинским братиям, на Пасху убиенным, иеромонаху Василию, иноку Ферапонту и иноку Трофиму
Оптинские братия, на Пасху убиенные, иеромонах Василий, инок Ферапонт и инок Трофим к настоящему времени не прославлены в лике святых. Автор акафиста иеромонах Никон (Скарга).
Не утвержден для общецерковного использования.
Избра́нным сыно́м ста́рцев О́птинских, Святы́я Тро́ицы тричи́сленным служи́телем, а́гнцем закла́нным на Па́сху Госпо́дню и дерзнове́ние добропобе́дное улучи́вшим, похва́льная принесе́м пе́ния; вы́ же воздви́гните на́с от гробо́в нераде́ния, с любо́вию ва́м зову́щих:
А́нгельскому житию́ подража́ти жела́юще, по́двигом му́ченическим в оби́тели О́птинстей просия́ли есте́, жи́знь свою́ за Христа́ отда́вше, ны́не же в невече́рнем дни́ Ца́рствия Бо́жия с му́чениками ликовству́юще, услы́шите на́с, по́мощи прося́щих и в моли́тве к ва́м вопию́щих:
Тро́ица Всеблага́я и Благопромысли́тельная от разли́чных конце́в земли́ ру́сския собра́ ва́с, отцы́ преподо́бнии, в оби́тель О́птинскую, е́же просла́вити вы́ в ли́це му́чеников тричи́сленных, на Па́сху убие́нных, да еди́неми усты́ пое́те пе́снь трегу́бо песносло́вимую: Аллилу́иа.
Христа́ Воскре́сшаго сре́тити все́м се́рдцем возжделе́вше, ина́го жития́, кроме́ и́ноческаго не пожела́ли есте́, пе́рвии насе́льницы возрожда́ющияся пу́стыни яви́стеся, труда́ми мно́гими себе́ смиря́юще и стра́сти умершвля́юще, по́двигом свои́м сте́ну неразори́мую оби́тели О́птинстей сози́ждили есте́, сего́ ра́ди благода́рственно воспева́ем ва́м си́це:
Во оби́тель дре́внюю прише́дше, у моги́л О́птинских ста́рцев моли́лися есте́, да укрепле́ни бу́дете у́зким путе́м ше́ствовати; просвеще́ни же бы́вше Ду́хом Святы́м, ми́р се́й оста́вили есте́, и го́рняго Оте́чества дости́гнути жела́юще, воспе́ли благода́рственную пе́снь Бо́гу: Аллилу́иа.
Име́юще в сердца́х свои́х благо́е жела́ние рабо́тати Го́сподеви, ре́вностно вооружи́стеся проти́ву ми́ра, диа́вола и страсте́й, по́двигом и́ноческим себе́ преда́сте, от си́лы возраста́юще в си́лу; сему́ ва́шему до́брому житию́ внима́юще, благода́рственно ва́м вопие́м:
Вся́ су́етная и ло́жная в ми́ре вре́меннем позна́сте, на ра́ло ру́ки ва́ша возложи́сте, я́ко и́стиннии возде́лователи ни́вы Христо́вы; трудо́м и́ноческим себе́ преда́ли есте́, моли́тву и по́двиги не я́ве, но та́йно творя́ще, не челове́ческия сла́вы взыску́юще, но сла́вы Бо́жия пе́снь хвале́бную пою́ще Бо́гу: Аллилу́иа.
Житие́м ста́рческим оби́тель свята́я просла́вленная, безбо́жники же разоре́нная, и́ноческим житие́м па́ки процвете́ и от разоре́ния и пе́пла воздви́жеся, венце́м же новому́ченическим ны́не венча́ется и красо́тами страстоте́рпческими украша́ется, сего́ ра́ди восхваля́ем ва́с си́це:
Житие́ свое́ по заве́ту ста́рцев О́птинских между́ стра́хом и наде́ждою проводи́вшии, о Ца́рствии Небе́снем и му́ках а́дских вы́ну помышля́вшии, непреле́стный пу́ть и́ноческаго де́лания обрели́ есте́. Те́мже, я́ко сы́нове све́та, вопие́те Со́лнцу Пра́вды Христу́, разори́вшему грехо́вную тьму́: Аллилу́иа.
Блаже́нную жи́знь избра́сте, преподо́бнии отцы́, е́же жи́ти бра́тии вку́пе в дому́ Бо́жием, в оби́тель О́птинскую всели́лися есте́, оба́че го́рних оби́телей дости́гнути жела́юще, по ле́ствице доброде́телей восхожде́ние в сердца́х свои́х положи́сте. Те́мже я́ко ева́нгельских блаже́нств дости́гших, ублажа́ем ва́с си́це:
Труда́ми мно́гими по́честей в ми́ре дости́гл еси́, о́тче Васи́лие, и тщету́ уразуме́в сла́вы челове́ческия, во́ли Бо́жия исполни́телем соде́лался еси́, и тала́нты тебе́ Бо́гом да́нныя преумно́жил еси́, про́поведию и духо́вными стиха́ми, я́коже ста́рец Варсоно́фий, к покая́нию наро́д ру́сский призыва́л еси́, науча́я воспева́ти Бо́гу: Аллилу́иа.
Ве́дый, я́ко па́стырство е́сть сугу́бое со Христо́м сораспя́тие, взе́м кре́ст после́довал еси́ Христу́, и мно́гим и́щущим утеше́ния па́стырем до́брым яви́лся еси́, врачу́я ду́ши благода́тию Бо́жией; мы́ же тебе́ и дво́ице и́ноков, я́ко а́гнцем твоего́ му́ченическаго ста́да, воспева́ем си́це:
Вся́ кра́сная ми́ра сего́ ни во что́ же вмени́в, кро́тостию и молчали́востию украси́лся еси́, о́тче Ферапо́нте, сего́ ра́ди в покая́ние, я́ко в ри́зу спасе́ния обле́клся и в О́птину пу́стынь к по́двигом духо́вным устреми́лся еси́, и от Го́спода вене́ц му́ченический прия́ти сподо́бился еси́, благода́рно поя́ Бо́гу: Аллилу́иа.
Житию́ святы́х потща́лся еси́ подража́ти, о́тче Ферапо́нте, по́стничеством и бде́нием, я́ко щито́м, огради́лся еси́, моли́твою же Иису́совою, я́ко духо́вным мече́м, непреста́нно во уме́ враща́емым, главу́ зми́я сокруши́л еси́ и победоно́сным во́ином Христо́вым яви́лся еси́, сего́ ра́ди ско́рым помо́щником тебе́ в моли́тве призыва́ющим явля́ешися. Приими́ же с бра́тиями-му́чениками твои́ми благода́рственныя сия́ хвалы́:
Ко Творцу́ вся́ческих любо́вию воспламени́вся, во все́х челове́цех, о́тче Трофи́ме, о́браз Бо́жий вы́ну зре́ти сподо́бился еси́, сего́ ра́ди в по́те лица́ твоего́ труди́лся еси́ на бла́го бли́жняго, милосе́рдием и сострада́нием виногра́дник се́рдца твоего́ украша́я и в ра́дости Го́сподеви взыва́я: Аллилу́иа.
Ревну́я поревнова́л еси́, о́тче Трофи́ме, о е́же стяжа́ти се́рдце ми́лости испо́лненное, сего́ ра́ди не студе́н, а горя́щ бы́в на дела́ Бо́жия и теплохла́дность душе́вную отри́нул еси́. За таково́е твое́ духо́вное раче́ние прославля́ем тя́ с спострада́вшими бра́тиями и благода́рственно воспева́ем ва́м си́це:
Звонари́ иску́снии, Ферапо́нте и Трофи́ме, ра́дость Воскресе́ния Христо́ва ми́ру благовеству́юще, я́ко созре́вшии сно́пы пожа́ти бы́сте, и от трудо́в земны́х вку́пе с отце́м Васи́лием в жи́тницу Небе́сную угобзи́лися есте́, и я́ко сла́дкий хле́б Тро́ице Святе́й принесо́стеся, пе́снь воспева́юще: Аллилу́иа.
Де́лом позна́сте, я́ко любы́ же́ртвенна е́сть, те́мже Христу́ сораспя́лися есте́, мече́м закала́емии, и кро́вию свое́ю не то́кмо ду́ши своя́ убели́ли, но и на́ша сердца́ окамене́нныя умягчи́ли есте́, сего́ ра́ди с любо́вию воспева́ем ва́м си́це:
Посеще́ния преподо́бнаго Амвро́сия сподо́бивыйся, о́тче Васи́лие, да укрепле́н бу́деши пред искуше́нием вели́ким, вы́ю свою́ Го́сподеви преклони́л еси́, глаго́ля: — мне́ на Па́сху умре́ти вожделе́нно е́сть — и на закла́ние вку́пе с Ферапо́нтом и Трофи́мом после́довал еси́, воспева́я пе́снь Бо́гу: Аллилу́иа.
Лоза́ И́стинная израсти́ ва́с, я́ко гро́здие сладча́йшии в вертогра́де О́птинстем, отцы́ всечестни́и Васи́лие, Ферапо́нте и Трофи́ме; Кро́вию Боже́ственною напое́ннии, в ре́бра богоненави́стно прободе́ннии, в страда́нии ва́шем изгнета́ете, я́ко от точи́ла, струи́ Боже́ственнаго ра́дования, утеша́юще все́х вопию́щих к ва́м такова́я:
Дре́вний зми́й, не́навистию к ро́ду челове́ческому разжига́емый, потща́ся ва́с умертви́ти, благове́стников Воскресе́ния Христо́ва, отцы́ богоно́снии, а́ще и сосу́ды пло́ти ва́шея растерза́, оба́че жа́ло зло́бы своея́ то́кмо притупи́, ду́ш же ва́ших не возмо́же улови́ти, пе́снь побе́дную Воскре́сшему Христу́ пою́щих: Аллилу́иа.
Пу́стынь О́птинскую ны́не святоле́пно украша́ете, телесы́ же нетле́нными воскресе́ние ме́ртвых возвеща́ете, новому́ченицы О́птинстии Васи́лие, Ферапо́нте и Трофи́ме, главу́ зми́я, уязви́вшаго ва́с, весе́лыми нога́ми сотро́сте и в Го́рнее пра́здновати ве́чную Па́сху востекли́ есте́; посети́те ны́, гре́шныя, ва́шею моли́твою, и от зло́бы диа́вола изба́вите воспева́ющия ва́м сицева́я:
Благода́ть Бо́жию оби́льно на ва́с излия́нную све́дуще, я́ко и по сме́рти не престае́те источа́ти чудеса́ от гробо́в ва́ших, те́мже мо́лим ва́с я́ко пропове́дников Воскресе́ния Христо́ва: оживи́те на́с умершвле́нных душе́ю, да возста́вше от сна́ грехо́внаго в ра́дости духо́вней взыва́ем Христу́ Воскреси́телю ме́ртвых: Аллилу́иа.
Пою́ще и сла́вяще ва́ше богоуго́дное житие́ и му́ченическую сме́рть Христа́ ра́ди, ве́даем, я́ко а́ще и мно́жество сложи́ли бы́хом песнопе́ний, не дово́льно бу́дет восхваля́ти вся́ сла́вная и вели́кая, я́же Госпо́дь в ва́с просла́вивыйся сотвори́, но я́ко благода́рная ча́да во умиле́нии серде́ц вопие́м к ва́м такова́я:
О, треблаже́ннии новому́ченицы О́птинстии Васи́лие, Ферапо́нте и Трофи́ме, я́ко а́гнцы на Па́сху закла́ннии и в ра́дость ве́чную ко Христу́ вше́дшии, испроси́те на́м у Го́спода страсте́й умершвле́ние и доброде́телей оживле́ние, Христо́ви сраспя́тися и с Ни́м совоскре́снути и сподо́битися вку́пе с ва́ми воспева́ти пе́снь Триеди́ному Бо́гу: Аллилу́иа.
Этот конда́к читается трижды, затем и́кос 1-й и конда́к 1-й.
А́нгельскому житию́ подража́ти жела́юще, по́двигом му́ченическим в оби́тели О́птинстей просия́ли есте́, жи́знь свою́ за Христа́ отда́вше, ны́не же в невече́рнем дни́ Ца́рствия Бо́жия с му́чениками ликовству́юще, услы́шите на́с, по́мощи прося́щих и в моли́тве к ва́м вопию́щих:
Избра́нным сыно́м ста́рцев О́птинских, Святы́я Тро́ицы тричи́сленным служи́телем, а́гнцем закла́нным на Па́сху Госпо́дню и дерзнове́ние добропобе́дное улучи́вшим, похва́льная принесе́м пе́ния; вы́ же воздви́гните на́с от гробо́в нераде́ния, с любо́вию ва́м зову́щих:
О, пресла́внии новому́ченицы О́птинстии Васи́лие, Ферапо́нте и Трофи́ме, О́птины пу́стыни трисия́нное украше́ние! Вы́ от но́чи безве́рия во све́т Христо́вы ве́ры при́звани бы́сте. В О́птину пу́стынь, я́ко к заре́ восходя́щей притекли́ есте́, и та́мо, я́ко еле́ни жа́ждущии, от изоби́льных исто́чников уче́ний ста́рческих напои́лися есте́, слеза́ми покая́ния зе́млю се́рдца омы́вше, подви́жническия плоды́ Пода́телю Воды́ Живы́я принесли́ есте́. Вы́, я́ко рабо́тники единонадеся́таго часа́, в вертогра́д ста́рчества прише́дше, ми́р отве́ргли и страсте́й умерщвле́нием себе́ живопогребли́ есте́ и в кра́ткое вре́мя сла́дкий пло́д му́ченичества возде́лали.
О, тричи́сленнии преподобному́ченицы О́птинстии Васи́лие, Ферапо́нте и Трофи́ме, Христа́ Воскре́сшаго добропобе́днии побо́рницы! Вы́, я́ко а́гнцы, закла́ни бы́сте в де́нь Па́схи Госпо́дней и сами́х себе́ в же́ртву живу́ю Святе́й Тро́ице принесо́сте, в оби́тели О́птинстей у гробо́в ста́рческих упасо́стеся и уче́нием и́х, я́ко сла́дким бы́лием, вско́рмлени бы́сте. Услы́шите на́с ны́не у ва́ших гробо́в предстоя́щих и ва́шим по́двигом озаря́емых. Испроси́те у Воскре́сшаго Христа́ страсте́й на́ших умерщвле́ние и ре́вности по Бо́зе оживле́ние.