Конда́к 1.

Избра́нному Бо́гом от су́етнаго ми́ра, тебе́, о преподо́бне о́тче [и́мя ре́к], кре́ст сво́й благогове́йно подъе́мшему и Христу́ после́довавшему ве́рою, я́ко дерзнове́нному предста́телю на́шему пред Го́сподем, ны́не усе́рдное моле́ние принося́ще, с любо́вию взыва́ем:

Ра́дуйся, преподо́бне о́тче [и́мя ре́к], те́плый о на́с моли́твенниче.

И́кос 1.

А́нгельскаго и́ноческаго жития́ все́м се́рдцем взыска́в, вся́ сла́достная ми́ра сего́ невозвра́тно оста́вил еси́, преподо́бне, и путе́м те́сным и приско́рбным ко Го́споду твоему́ до конца́ дне́й твои́х ше́ствовал еси́. Сего́ ра́ди тебе́, во объя́тия О́тча с любо́вию прите́кшему, пое́м си́це:

Ра́дуйся, на зо́в Госпо́день ра́достно притеки́й; ра́дуйся, кре́ст сво́й самоотве́рженно на ра́мо восприе́мый.

Ра́дуйся, ничесо́же па́че любве́ Иису́совы взыска́вый; ра́дуйся, пра́вды Бо́жия ненасы́тно взалка́вый.

Ра́дуйся, возложи́в ру́ку на ра́ло Христо́во, вспя́ть уже́ не обраща́выйся; ра́дуйся, все́м жела́нием Христу́ после́довавый.

Ра́дуйся, Христа́ ра́ди всеконе́чно себе́ отве́ргий; ра́дуйся, Ца́рствие Бо́жие досто́йно унасле́дивый.

Ра́дуйся, преподо́бне о́тче [и́мя ре́к], те́плый о на́с моли́твенниче.

Конда́к 2.

Ви́дя се́ти диа́вольския, я́ко паучи́ну в ми́ре распросте́ртыя, и во глубине́ се́рдца восчу́вствовав, я́ко от ни́х челове́цы смире́нием то́кмо спаса́ются, всего́ себе́ в те́плей моли́тве пред Го́сподем пове́ргл еси́, умиле́нно взыва́я: Аллилу́иа.

И́кос 2.

Разуме́в се́рдцем, я́ко де́лы свои́ми не оправди́тся пред Бо́гом вся́к живы́й, и при́сно содержа́ пред очи́ма свои́ма согреше́ния своя́, то́ки сле́зныя, еди́ному Го́споду зри́мыя, источа́ти не престая́ше, свя́тче Бо́жий. Сего́ ра́ди ублажа́ем тя́, глаго́люще:

Ра́дуйся, я́ко чу́дный да́р умиле́ния и сле́з от Го́спода прия́л еси́; ра́дуйся, я́ко сле́з твои́х тече́ньми всего́ себе́ омы́л еси́.

Ра́дуйся, я́ко в пучи́не сле́зней вся́кое возноше́ние погре́бл еси́; ра́дуйся, я́ко блаже́нство пла́ча о гресе́х позна́л еси́.

Ра́дуйся, я́ко радостотво́рный пла́ч вся́ким хране́нием храни́л еси́; ра́дуйся, я́ко ве́чное блаже́нное утеше́ние обре́л еси́.

Ра́дуйся, я́ко ско́рбь о гресе́х неусыпа́ющую стяжа́л еси́; ра́дуйся, я́ко утеше́ние Госпо́дне ны́не на Небеси́ прия́л еси́.

Ра́дуйся, преподо́бне о́тче [и́мя ре́к], те́плый о на́с моли́твенниче.

Конда́к 3.

Си́лу искупи́тельных страда́ний Христо́вых восприя́л еси́, о́тче, я́ко неруши́мую наде́жду спасе́ния, себе́ сама́го ху́ждшим все́х челове́ков и никоея́же ми́лости досто́йным помышля́я, и того́ ра́ди благода́рственно Спаси́телю Бо́гу взыва́ше: Аллилу́иа.

И́кос 3.

Име́я в се́рдце твое́м боже́ственный смиренному́дрия да́р, нивочто́же вменя́л еси́ по́двиги и труды́ твоя́. Возраста́ющим бо подвиго́м твои́м, сугу́бо возраста́ше и смире́ние твое́, ему́же дивя́щеся, взыва́ем си́це:

Ра́дуйся, Христа́, смири́вшаго Себе́ да́же до сме́рти кре́стныя, учениче́ и́стинный; ра́дуйся, безгне́вия и любве́ ко враго́м дости́гнувый.

Ра́дуйся, кро́тости и смире́нию се́рдца Го́сподем науче́нный; ра́дуйся, в то́м по глаго́лу Его́ поко́й души́ твоея́ обреты́й.

Ра́дуйся, самоукоре́нием и во́ли своея́ отсече́нием ду́ха горды́ни низложи́вый; ра́дуйся, блаже́нною нището́ю духо́вною ева́нгельски обогати́выйся.

Ра́дуйся, смире́ния ра́ди Го́сподем Сла́вы вознесе́нный; ра́дуйся, я́ко твое́ е́сть Ца́рство Небе́сное, ни́щим ду́хом угото́ванное.

Ра́дуйся, преподо́бне о́тче [и́мя ре́к], те́плый о на́с моли́твенниче.

Конда́к 4.

Бу́рю страсте́й, пло́тию и диа́волом воздвиза́емую, утоля́я, у́м влады́кою над страстьми́ па́губными по́стнически поста́вил еси́, о́тче; му́жески бо естество́ пону́див, потща́лся еси́ благода́тию Бо́жиею ху́ждшее покори́ти лу́чшему и пло́ть порабо́тити ду́хови, Подвигополо́жнику Иису́су пе́ти не престая́: Аллилу́иа.

И́кос 4.

Слы́шав глаго́л Госпо́день, я́ко Ца́рствие Небе́сное с ну́ждею восприе́млется, и то́кмо ну́ждницы восхища́ют е́, посто́м, бде́нием и моли́твою непреста́нно подвиза́лся еси́, и пло́ть свою́ со страстьми́ и похотьми́ распя́л еси́. Те́мже зове́м ти́:

Ра́дуйся, благо́е и́го Иису́сово люботру́дно понесы́й; ра́дуйся, за́поведи и уста́вы и́ноческия неруши́мо соблюды́й.

Ра́дуйся, неотсту́пно се́рдцем трезвя́ся, ду́ха не угаси́вый; ра́дуйся, кре́пкое хране́ние усто́м твои́м положи́вый.

Ра́дуйся, с теле́сными по́двиги у́мное де́лание сочета́вый; ра́дуйся, свети́льник души́ твоея́ неприкоснове́нен скве́рны соблюды́й.

Ра́дуйся, те́ло твое́ вся́ким утесне́нием утесни́вый; ра́дуйся, в терпе́нии твое́м ду́шу твою́ стяжа́вый.

Ра́дуйся, преподо́бне о́тче [и́мя ре́к], те́плый о на́с моли́твенниче.

Конда́к 5.

Светоно́сное и́мя Иису́сово непреста́нно во уме́ и в се́рдце твое́м нося́, приснотеку́щий исто́чник благода́ти обре́л еси́, о́тче. Те́мже от си́лы в си́лу восходя́, и о́гнь ко огню́ прилага́я, очище́нным смы́слом воспева́л еси́: Аллилу́иа.

И́кос 5.

Ви́дя, я́ко всеча́сно настои́т челове́ку вели́кая бра́нь проти́ву миродержи́телей тьмы́ ве́ка сего́, духо́в зло́бы поднебе́сных, николи́же преста́л еси́ би́ти супоста́тов и́менем Иису́совым, я́ко ору́жием, его́же ничто́же си́льнейше е́сть на небеси́, ниже́ на земли́. Сего́ ра́ди досто́йно сла́вим тя́ си́це:

Ра́дуйся, ве́сь у́м тво́й в моли́тву Иису́сову погрузи́вый; ра́дуйся, и́менем Иису́совым, я́ко огне́м, вся́ ко́зни вра́жия попали́вый.

Ра́дуйся, непреста́нную моли́тву серде́чную подви́жнически стяжа́вый; ра́дуйся, все́ се́рдце твое́ сокруше́нное и смире́нное Го́сподеви преда́вый.

Ра́дуйся, в моли́тве чу́дное просвеще́ние ума́ обреты́й; ра́дуйся, у́м и се́рдце своя́ горе́ всеце́ло вознесы́й.

Ра́дуйся, я́ко о и́мени Иису́сове ра́дость твоя́ испо́лнися; ра́дуйся, всю́ ми́лость во и́мя Госпо́дне обреты́й.

Ра́дуйся, преподо́бне о́тче [и́мя ре́к], те́плый о на́с моли́твенниче.

Конда́к 6.

Предстоя́ в моли́тве я́ко пред Кресто́м Сама́го Го́спода, за грехи́ челове́ческия стра́ждущаго, рыда́нием возрыда́л еси́, преподо́бне о́тче, о гресе́х свои́х, и неизглаго́ланною смире́нною любо́вию к Искупи́телю твоему́ возгоре́лся еси́. Те́мже у́бо до конца́ дне́й твои́х благода́рным се́рдцем, благода́рными удесы́, благода́рною мы́слию твое́ю не преста́л еси́ пе́ти Ему́: Аллилу́иа.

И́кос 6.

Возсия́вшу в се́рдце твое́м све́ту любве́ Боже́ственныя, сла́ву земну́ю и похвалы́ возненави́дел и омерзи́л еси́, безче́стие же от челове́ков и вся́кия ско́рби отве́рстым се́рдцем прие́мля, поноше́нию Христо́ву усе́рдно приобщи́лся еси́, на́м же о́браз злострада́ния и терпе́ния показа́л еси́, зову́щим ти́:

Ра́дуйся, я́звы Го́спода Иису́са Христа́ на те́ле твое́м носи́вый; ра́дуйся, поруга́ния и хулы́, я́ко врачевство́ чисти́тельное, ненасы́тно пи́вый.

Ра́дуйся, возлюби́вый враги́ своя́; ра́дуйся, благослови́вый клену́щия тя́.

Ра́дуйся, твори́вшим тебе́ напа́сти добро́ твори́вый; ра́дуйся, за оби́дящих тя́, я́ко благоде́телей, моли́выйся.

Ра́дуйся, вои́стину дру́гом от Го́спода нарече́нный; ра́дуйся, обетова́нное сыноположе́ние от Отца́ Небе́снаго досто́йно прие́мый.

Ра́дуйся, преподо́бне о́тче [и́мя ре́к], те́плый о на́с моли́твенниче.

Конда́к 7.

Хотя́й все́м челове́ком спасти́ся и в позна́ние и́стины приити́, Человеколю́бец Госпо́дь, ви́дя твое́ благо́е произволе́ние и тру́д непреста́нный в исполне́нии за́поведей Его́, отве́рзе тебе́ у́м разуме́ти пути́ Своя́ и оправда́нием Свои́м научи́ тя́. Ты́ же се́рдцем просвеще́нным вы́ну воспева́л еси́: Аллилу́иа.

И́кос 7.

Ди́вны дела́ Твоя́, Го́споди, я́ко па́че кни́жник вразумля́еши рабо́в Твои́х, все́м се́рдцем взыску́ющих Тя́, и открыва́еши о́чи и́х, да уразуме́ют чудеса́ от зако́на Твоего́. Блажи́м у́бо преподо́бнаго Твоего́ [и́мя ре́к], при́сно поуча́вшагося в за́поведех Твои́х, я́же возлюби́ зело́, и пое́м ему́:

Ра́дуйся, словеса́ Бо́жии, я́ко бога́тство мно́го в се́рдце твое́м сокры́вый; ра́дуйся, я́ко вои́стину сло́во Бо́жие оживи́ и укрепи́ тя́.

Ра́дуйся, я́ко оправда́нием Госпо́дним научи́лся еси́; ра́дуйся, я́ко пу́ть за́поведей Госпо́дних ра́дуяся и со тре́петом те́кл еси́.

Ра́дуйся, я́ко вся́к пу́ть непра́вды возненави́дел еси́; ра́дуйся, я́ко от пути́ Госпо́дни николи́же отступи́л еси́.

Ра́дуйся, в до́брем по́двизе угото́вивыйся; ра́дуйся, ми́р мно́г несмуще́н во Христе́ обреты́й.

Ра́дуйся, преподо́бне о́тче [и́мя ре́к], те́плый о на́с моли́твенниче.

Конда́к 8.

Стра́нника и прише́льца на земли́ себе́ помышля́я, ничесо́же от тле́нных веще́й ми́ра сего́ стяжа́ти себе́ возжела́л еси́, да не прильпне́т земли́ се́рдце твое́, но да Еди́ному Бо́гу прилепи́шися, чи́сте вознося́ Ему́ пе́снь: Аллилу́иа.

И́кос 8.

Вся́кое мирско́е пристра́стие, от любве́ Госпо́дни отлуча́ющее, вседу́шно отве́ргл еси́, еди́ное на потре́бу взыску́я. У́бо при ногу́ Иису́сову присиде́л еси́ любо́вию неотсту́пною, ко бла́гом жите́йским се́рдца не прилага́я, и все́ упова́ние твое́ на Го́спода возложи́в. Те́мже сла́вим тя́, о́тче:

Ра́дуйся, я́ко пристра́стий веще́ственных се́рдцем чу́жд яви́лся еси́; ра́дуйся, я́ко беспристра́стием чи́стую моли́тву стяжа́л еси́.

Ра́дуйся, непоколеби́мо ве́ровавый, я́ко вся́ потре́бная приложа́тся тебе́; ра́дуйся, досточу́дным послуша́нием принесы́й в чи́стую же́ртву Христо́ви и са́мую во́лю твою́.

Ра́дуйся, я́ко и́ноческий обе́т нестяжа́ния свя́то соблю́л еси́; ра́дуйся, я́ко нестяжа́нием зло́бу и за́висть челове́ческую отсека́л еси́.

Ра́дуйся, я́ко тве́рдою ве́рою попече́ния жите́йская отложи́л еси́; ра́дуйся, я́ко, земны́х забо́т свободи́вся, сла́дость чи́стыя моли́твы позна́л еси́.

Ра́дуйся, преподо́бне о́тче [и́мя ре́к], те́плый о на́с моли́твенниче.

Конда́к 9.

Вся́ жела́ния твоя́, моли́твы твоя́ и вся́ си́лы твоя́ подви́гл еси́, о́тче, да стя́жеши чистоту́ душе́вную и теле́сную, без нея́же, по сло́ву Христо́ву, никто́же у́зрит Бо́га, да чи́стым се́рдцем сподо́бишися лице́м к лицу́ в раи́ Госпо́днем досто́йно воспе́ти чу́дную пра́ведных пе́снь, зовы́й: Аллилу́иа.

И́кос 9.

Вою́ющия на ду́шу плотски́я вожделе́ния посто́м и моли́твою укроща́я, да́р чистоты́ и целому́дрия прия́л еси́, о́тче, от Го́спода Бо́га, Еди́наго иму́щаго вла́сть побежда́ти естества́ уста́вы. Приими́ сего́ ра́ди и от на́с хвале́ния такова́я:

Ра́дуйся, я́ко по́мощь Бо́жию во бра́ни с пло́тию смире́нием твои́м привле́кл еси́; ра́дуйся, я́ко бде́нием всено́щным, а́лчбою и жа́ждою по́хоть плотску́ю связа́л еси́.

Ра́дуйся, я́ко поко́й теле́сный подви́жнически отве́ргл еси́; ра́дуйся, я́ко глаго́л Христо́в о святе́й чистоте́ благода́тию Его́ вмести́л еси́.

Ра́дуйся, я́ко труды́ и лише́ния возлюби́л еси́; ра́дуйся, я́ко естества́ уста́вы си́лою Христо́вою победи́л еси́.

Ра́дуйся, я́ко те́ло и ду́шу твои́ чи́сти Го́сподеви прине́сл еси́; ра́дуйся, я́ко чи́стым се́рдцем вои́стину Бо́га узре́л еси́.

Ра́дуйся, преподо́бне о́тче [и́мя ре́к], те́плый о на́с моли́твенниче.

Конда́к 10.

Спаси́телю на́шему, за́поведь вели́кую о любви́ да́вшему ученико́м Свои́м, не сло́вом или́ язы́ком после́дуя, но де́лом и и́стиною, бли́жняго твоего́ со все́ю теплото́ю серде́чною возлюби́л еси́. Те́мже и вели́кий моли́твенник о не́мощех людски́х показа́лся еси́, со дерзнове́нием неосужде́нно вознося́ моли́твы твоя́ ко Отцу́ на́шему Небе́сному и поя́ Ему́: Аллилу́иа.

И́кос 10.

Ца́рство Бо́жие вну́трь себе́ обре́л еси́, о́тче, возлюби́в бли́жняго своего́ па́че не́жели себе́ сама́го. Чрез ту́ю бо святу́ю любо́вь сни́де в се́рдце твое́ о́гнь любве́ Бо́жия, е́юже ненасы́тно насыща́яся, всего́ себе́ в же́ртву любве́ прине́сл еси́. Те́мже слы́шиши от на́с благогове́йныя пе́ния сия́:

Ра́дуйся, все́м се́рдцем, все́ю душе́ю и все́ю мы́слию твое́ю Го́спода Бо́га твоего́ возлюби́вый; ра́дуйся, все́м челове́ком, бли́жним и да́льним, о́браз кро́тости и любве́ ко Го́споду яви́вый.

Ра́дуйся, я́ко, су́д гряду́щий себе́ помышля́яй, никого́же осужда́ше; ра́дуйся, все́м вся́ бы́вый, да вся́ко не́кия спасе́ши.

Ра́дуйся, никого́же тща́ и неуте́шна от себе́ отпуска́вый; ра́дуйся, все́х притека́ющих к тебе́ нете́сно в се́рдцы твое́м вмеща́вый.

Ра́дуйся, о го́рестех людски́х сле́зно воздыха́вый; ра́дуйся, ду́шу твою́ за бли́жняго полага́вый.

Ра́дуйся, преподо́бне о́тче [и́мя ре́к], те́плый о на́с моли́твенниче.

Конда́к 11.

Пе́ние моли́твенное прино́сим ти́, преподо́бне о́тче [и́мя ре́к], твое́ю бо стезе́ю вои́стину пра́во ходи́ти позна́хом. Блаже́н еси́, Христу́ рабо́тав, и вра́жию посрами́л еси́ си́лу, и́стинное же пра́вило доброде́тели показа́лся еси́ все́м, Го́сподеви зову́щим: Аллилу́иа.

И́кос 11

Све́тлыя по́двиги твоя́ воспева́юще, преподо́бне о́тче [и́мя ре́к], ублажа́ем тя́ я́ко сла́внаго наста́вника мона́хов и чу́днаго собесе́дника А́нгелов, ны́не на Небеси́ Престо́лу Бо́жию предстоя́щаго и моля́щагося о на́с, с любо́вию зову́щих ти́:

Ра́дуйся, и́ноческаго равноа́нгельнаго жития́ свети́льниче; ра́дуйся, пла́мени серде́чнаго неусы́пный и усе́рдный храни́телю.

Ра́дуйся, непоколеби́мый сто́лпе послуша́ния и целому́дрия; ра́дуйся, тве́рдый во искуше́нии и непрекло́нный в терпе́нии.

Ра́дуйся, му́ченически да́вый кро́вь, я́ко да прии́меши Ду́х; ра́дуйся, нището́ю плотско́ю обогати́выйся на Небесе́х.

Ра́дуйся, мно́гими скорбьми́ в ра́дость Го́спода твоего́ вше́дый; ра́дуйся, до́брый ра́бе Бо́жий, благи́й и ве́рный.

Ра́дуйся, преподо́бне о́тче [и́мя ре́к], те́плый о на́с моли́твенниче.

Конда́к 12.

Благода́тныя да́ры испроси́ на́м у Го́спода, блаже́нне, тебе́ ве́рно хва́лящим, вонми́ воздыха́нием на́шим, сле́з на́ших не пре́зри! Умоли́ Го́спода утоли́ти лю́тыя стра́сти на́ша, да́ти на́м пла́ч сокруше́нный о гресе́х на́ших, да душе́ю чи́стою и неоскверне́нными усты́ ку́пно с тобо́ю сподо́бимся в раи́ Госпо́дни воспева́ти: Аллилу́иа.

И́кос 12.

Пою́ще ны́не тя́, преподо́бне о́тче [и́мя ре́к], хвале́бными гла́сы, ве́мы, я́ко не пе́ния усте́н взыску́еши, но смире́ния серде́чнаго и жития́ исправле́ния. Те́мже в покая́нии по́мощи твоея́ прося́ще, любо́вию подвиза́еми, глаго́лем:

Ра́дуйся, до́бре жи́тельствующих огражда́яй; ра́дуйся, немощны́х укрепля́яй.

Ра́дуйся, па́дающим ру́ку по́мощи простира́яй; ра́дуйся, ка́ющимся сле́зы уте́шительныя от Го́спода низпосыла́яй.

Ра́дуйся, нетле́нием моще́й твои́х возсия́вый; (Если мо́щи преподобного нахо́дятся в безве́стии: Ра́дуйся, Па́схи нетле́ния и́стее в раи́ причаща́яйся;) ра́дуйся, грехо́вное тле́ние моли́твами твои́ми в на́с устраня́яй.

Ра́дуйся, все́м призыва́ющим тя́ помо́щниче; ра́дуйся, спасе́ния на́шего пред Бо́гом хода́таю.

Ра́дуйся, преподо́бне о́тче [и́мя ре́к], те́плый о на́с моли́твенниче.

Конда́к 13.

О пресла́вный уго́дниче Христо́в, преподо́бне о́тче [и́мя ре́к]! Ны́нешнее на́ше моле́ние услы́ши и испроси́ на́м у Го́спода ду́х сокруше́ния, смире́ние и сле́зы покая́ния, да изба́вит на́с Госпо́дь от вся́каго зла́, и христиа́нския кончи́ны да сподо́бит о тебе́ вопию́щих Ему́: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгельскаго и́ноческаго жития́ все́м се́рдцем взыска́в, вся́ сла́достная ми́ра сего́ невозвра́тно оста́вил еси́, преподо́бне, и путе́м те́сным и приско́рбным ко Го́споду твоему́ до конца́ дне́й твои́х ше́ствовал еси́. Сего́ ра́ди тебе́, во объя́тия О́тча с любо́вию прите́кшему, пое́м си́це:

Ра́дуйся, на зо́в Госпо́день ра́достно притеки́й; ра́дуйся, кре́ст сво́й самоотве́рженно на ра́мо восприе́мый.

Ра́дуйся, ничесо́же па́че любве́ Иису́совы взыска́вый; ра́дуйся, пра́вды Бо́жия ненасы́тно взалка́вый.

Ра́дуйся, возложи́в ру́ку на ра́ло Христо́во, вспя́ть уже́ не обраща́выйся; ра́дуйся, все́м жела́нием Христу́ после́довавый.

Ра́дуйся, Христа́ ра́ди всеконе́чно себе́ отве́ргий; ра́дуйся, Ца́рствие Бо́жие досто́йно унасле́дивый.

Ра́дуйся, преподо́бне о́тче [и́мя ре́к], те́плый о на́с моли́твенниче.

Конда́к 1.

Избра́нному Бо́гом от су́етнаго ми́ра, тебе́, о преподо́бне о́тче [и́мя ре́к], кре́ст сво́й благогове́йно подъе́мшему и Христу́ после́довавшему ве́рою, я́ко дерзнове́нному предста́телю на́шему пред Го́сподем, ны́не усе́рдное моле́ние принося́ще, с любо́вию взыва́ем:

Ра́дуйся, преподо́бне о́тче [и́мя ре́к], те́плый о на́с моли́твенниче.

Моли́тва.

О свяще́нная главо́, преподо́бне о́тче, преблаже́нне [и́мя ре́к]! Не забу́ди убо́гих твои́х до конца́, но помина́й на́с всегда́ во святы́х твои́х и благоприя́тных моли́твах к Бо́гу. Моли́ за ны́, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́; не премолчи́ за ны́ ко Го́споду, и не пре́зри на́с, ве́рою и любо́вию чту́щих тя́. Помина́й на́с недосто́йных у Престо́ла Вседержи́телева, и не преста́й моля́ся о на́с ко Христу́ Бо́гу, и́бо дана́ тебе́ бы́сть благода́ть за ны́ моли́тися. Не мни́м бо тя́ су́ща ме́ртва: а́ще бо те́лом и преста́вился еси́ от на́с, но и по сме́рти жи́в сы́й пребыва́еши. Не отступа́й от на́с ду́хом, сохраня́я на́с от стре́л вра́жиих и вся́кия пре́лести бесо́вския и ко́зней диа́вольских, па́стырю на́ш до́брый. Ве́дуще у́бо тя́ вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о на́с всеси́льному Бо́гу, о по́льзе ду́ш на́ших, и испроси́ на́м вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́же подоба́ет вся́кая сла́ва, че́сть и поклоне́ние, со безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно и во ве́ки веко́в. Ами́нь.