Конда́к 1.

Избра́нный Архиере́ем Вели́ким, па́стырю ове́ц Христо́вых, свети́льниче гра́да Севасти́йскаго, Вла́сие, просвети́ заре́ю Триеди́наго Божества́ омраче́нных грехми́, соблюди́ ду́ши на́ша от мы́сленнаго во́лка, при́сно я́ сохраня́я, и теле́сныя неду́ги исцеля́я, да твои́ми моли́твами изба́виши на́с от бе́д, благода́рственно зову́щих ти́:

Ра́дуйся, сла́вный священному́чениче Вла́сие, возлю́бленный святи́телю Христо́в.

И́кос 1.

А́нгельския си́лы, ви́девше тя́, о́тче, удиви́шася, я́коже посреде́ те́рния идолослуже́ния кри́н благоче́стия прозябе́ и плоды́ мно́ги принесе́: те́мже и мы́, ви́девше тя́ ны́не сожи́теля А́нгелов, вопие́м сицева́я:

Ра́дуйся душетле́нных грехо́в победи́телю; ра́дуйся, непоколеби́мый сто́лпе благоче́стия.

Ра́дуйся, благоуха́нный кри́не, отгна́вый от себе́ злосмра́дие и́дольскаго служе́ния; ра́дуйся, я́ко изво́лил еси́ всели́тися со зверьми́, во е́же не служи́ти и́долом.

Ра́дуйся, в темни́це су́щих посети́телю; ра́дуйся, я́ко су́щу заключе́ну тебе́ в темни́це, Госпо́дь в нощи́ яви́ся.

Ра́дуйся, на горе́ Аргео́с го́рняя му́дрствовавый; ра́дуйся, из глубины́ пеще́ры моли́твы Бо́гу возсыла́вый.

Ра́дуйся, я́ко от ю́ности возлюби́л еси́ и́го Христо́во; ра́дуйся, А́нгелов весе́лие и сла́во.

Ра́дуйся, спасе́ния и́стинный наста́вниче; ра́дуйся, к тебе́ притека́ющим ско́рый помо́щниче.

Ра́дуйся, сла́вный священному́чениче Вла́сие, возлю́бленный святи́телю Христо́в.

Конда́к 2.

Ви́девше честно́е житие́ твое́, благода́рнии лю́дие гра́да Севасти́йскаго потща́шася поста́вити тя́ себе́ епи́скопа; позна́вше же тя́ бы́ти и́стиннаго па́стыря ста́да Христо́ва, воспе́ша Бо́гу: Аллилу́иа.

И́кос 2.

Ра́зум неуразуме́нный разуме́ти ища́, святы́й Вла́сие, прии́де но́щию в темни́цу к свято́му Евстра́тию и, па́д ни́ц, поклони́ся ему́, глаго́ля: «Блаже́н еси́, ча́до Евстра́тие, я́ко Всеси́льный Бо́г толи́ко укрепи́ тя, помяни́ и мене́, молю́ ти ся». Евстра́тий же отвеща́я, рече́: «Не твори́ сие́, о́тче духо́вный, са́н бо тво́й от мене́ досто́ин е́сть поклоне́ния». С ни́мже у́бо, взира́юще на твое́ смире́ние, уми́льно вопие́м:

Ра́дуйся, и́стинный Христо́в подража́телю; ра́дуйся, смире́ния учи́телю.

Ра́дуйся, свети́льниче всесве́тлый и вселюби́мый; ра́дуйся, хра́ме всечестны́й и Бо́гу освяще́нный.

Ра́дуйся, я́ко презре́вый зла́то, собесе́дник равноа́нгельнаго Евстра́тия бы́л еси́; ра́дуйся, я́ко с ни́м в темни́це ви́дети све́т неизрече́нный сподо́бился еси́.

Ра́дуйся, Про́мыслом в пусты́ню руководи́мый; ра́дуйся, го́рлице пустыннолюби́вая.

Ра́дуйся, Бо́жиих дарова́ний исполне́ние; ра́дуйся, пречу́дное в челове́цех удивле́ние.

Ра́дуйся, ди́виих звере́й а́гнцы кро́тки соде́лавый; ра́дуйся, те́плый в моли́твах предста́телю.

Ра́дуйся, сла́вный священному́чениче Вла́сие, возлю́бленный святи́телю Христо́в.

Конда́к 3.

Си́ла Вы́шняго осени́ тя, о́тче, бесе́дующа в темни́це с му́чеником Евстра́тием, и показа́ тя свети́льника Це́ркви Христо́вой, возжже́ннаго Ду́хом Святы́м. Его́же благода́тию наставля́еми, пое́м Бо́гу: Аллилу́иа.

И́кос 3.

Име́я исполне́ние благода́ти Ду́ха Бо́жия, и по́стнически житие́ свое́ проводя́, зве́ри ди́вия кро́тости научи́л еси́. Ны́не же, ви́девше тя́ победи́вша зве́ри мы́сленныя, с ве́рою вопие́м такова́я:

Ра́дуйся, бесо́в гро́зное устраше́ние; ра́дуйся, скорбя́щих ско́рое утеше́ние.

Ра́дуйся, я́ко зве́рие ди́вии прихожда́ху и от тебе́ благословля́хуся; ра́дуйся, я́ко возложе́нием руку́ твое́ю и зве́рие от боле́зней исцеля́хуся.

Ра́дуйся, безмо́лвия и богомы́слия люби́телю; ра́дуйся, уныва́ющих всежела́нный посети́телю.

Ра́дуйся, боля́щих врачева́ние и неду́гующих здра́вие; ра́дуйся, доброде́телей вели́ких вмести́лище.

Ра́дуйся, воздержа́ния учи́телю; ра́дуйся, богомы́слия люби́телю.

Ра́дуйся, непоро́чный Тро́ицы служи́телю; ра́дуйся, преизря́дный Христо́в уго́дниче.

Ра́дуйся, сла́вный священному́чениче Вла́сие, возлю́бленный святи́телю Христо́в.

Конда́к 4.

Бу́рю воздвиза́емых на христиа́н гоне́ний зря́, священному́чениче Вла́сие, вме́сто престо́ла святи́тельскаго возше́д на го́ру Аргео́с, всели́ся в пеще́ре. Не вдая́ся на муче́ние во́льное, ожида́ше Бо́жия произволе́ния на сие́, непреста́нно поя́ Бо́гу: Аллилу́иа.

И́кос 4.

Услы́шав от звероло́вцев о твое́м, о́тче, пребыва́нии в пеще́ре, иге́мон Агрикола́й а́бие повеле́ во́ином привести́ тя на суди́ще: ты́ же, возра́довавыйся, рече́ по́сланным: «До́бре, ча́дца моя́, да и́дем ку́пно, помяну́л бо е́сть мя́ Госпо́дь». Ны́не, восхваля́юще твое́ послуша́ние, вопие́м сицева́я:

Ра́дуйся, я́ко послуша́ние чу́дное показа́л еси́; ра́дуйся, я́ко уче́нием и чудотворе́нием стра́жей твои́х к Бо́гу обрати́л еси́.

Ра́дуйся, пра́вило ве́ры непоколеби́мыя; ра́дуйся, о́бразе кро́тости духо́вныя.

Ра́дуйся, Дании́лу подо́бяся, с Бо́гом в темни́це бесе́довавый; ра́дуйся, веду́щих тя́ на муче́ние благослови́вый.

Ра́дуйся, я́ко любо́вию твое́ю не то́чию челове́цы, но и зве́рие утеша́хуся; ра́дуйся, и́бо моли́твами твои́ми не то́чию челове́цы, но и ско́ти исцеля́хуся.

Ра́дуйся, от печа́ли изба́вителю; ра́дуйся, жела́емых благи́х насади́телю.

Ра́дуйся, я́ко враго́в ча́дцы нарече́; ра́дуйся, я́ко призыва́ющих по́мощь твою́ те́пле заступа́еши.

Ра́дуйся, сла́вный священному́чениче Вла́сие, возлю́бленный святи́телю Христо́в.

Конда́к 5.

Богосия́нную звезду́ узре́вши тя́, жена́ не́кая, прине́сши сы́на своего́ умира́юща, положи́ при ногу́ твое́ю, пла́чущи и вопию́щи: «Спаси́теля на́шего ра́ди Иису́са Христа́, поми́луй сы́на моего́, единоро́ден бо ми́ е́сть». Ты́ же, о́тче, испроси́л еси́ исцеле́ние о́троку у Го́спода Бо́га, глаго́ля: «А́ще ли в челове́цех, или́ в скоте́х боле́зни случи́тися бу́дет и помяне́т кто́ и́мя мое́, тому́ Ты́, Го́споди, ско́рый на по́мощь, помози́ и пода́й исцеле́ние, да во сла́ву и че́сть и́мене свята́го Твоего́ пою́т лю́дие: Аллилу́иа».

И́кос 5.

Ви́дя, о́тче, вдови́цу зело́ пла́чущу о вепреце́, его́же во́лк исхити́, рече́ е́й: «Не скорби́, же́но, ниже́ пла́чи, отда́стся бо тебе́ вепре́ц жи́в и неврежде́н». Такова́го ра́ди милосе́рдия твоего́ вопие́м ти́:

Ра́дуйся, волко́в неви́димых прогони́телю; ра́дуйся, врачу́ безме́здный.

Ра́дуйся, Севасти́и пречу́дная красото́; ра́дуйся, Никопо́ля пресве́тлое украше́ние.

Ра́дуйся, я́ко к Бо́гу всегда́ вопие́ши за ны́; ра́дуйся, я́ко и скоты́ ми́луеши.

Ра́дуйся, сосу́де благода́ти Ду́ха Бо́жия; ра́дуйся, возноша́яй сла́вно и́стину.

Ра́дуйся, испове́дниче Бо́жий избра́нный; ра́дуйся, му́чениче Христо́в просла́вленный.

Ра́дуйся, земны́й а́нгеле; ра́дуйся, Небе́сный челове́че.

Ра́дуйся, сла́вный священному́чениче Вла́сие, возлю́бленный святи́телю Христо́в.

Конда́к 6.

Пропове́дником богоно́сным апо́столом Христо́вым поревнова́в, в темни́цу посажде́н бы́сть от Агрикола́я, в не́йже, я́ко в черто́зе, о Христе́ Иису́се ликова́ше, поя́ Бо́гу: Аллилу́иа.

И́кос 6.

Возсия́вшу дню́, се́д иге́мон на суди́щи, поста́ви тя́, архиере́я Бо́жия, пред собо́ю, нача́т ле́стными словесы́ веща́ти, глаго́ля: «Ра́дуйся, Вла́сие, бого́в на́ших и на́м возлю́бленный дру́же». Отвеща́в же, о́тче, рече́: «Ра́дуйся и ты́ иге́моне, оба́че не нарица́й бога́ми бесо́в, и́же огню́ ве́чному с почита́тели и́х пре́дани бу́дут»,– от и́хже наве́тов изба́ви на́с моли́твами твои́ми, вопию́щих си́це:

Ра́дуйся, дру́же Христа́, Бо́га И́стиннаго; ра́дуйся, тве́рдый адама́нте.

Ра́дуйся, гне́ва мучи́телева презри́телю; ра́дуйся, преле́стника ду́ш челове́ческих посрами́телю.

Ра́дуйся, неща́дно за Христа́ па́лицами бие́нный; ра́дуйся, ра́нами твои́ми неви́димаго врага́ уби́вый.

Ра́дуйся, я́звы Го́спода на свое́м телеси́ носи́вый; ра́дуйся, кре́ст сво́й на ра́мена взе́мый.

Ра́дуйся, чрез земну́ю темни́цу в Небе́сный черто́г возше́дый; ра́дуйся, ло́жных бого́в отри́нувый.

Ра́дуйся, я́ко в страда́нии Христо́с укрепля́ше тя́; ра́дуйся, я́ко по страда́нии Христо́с просла́ви тя́.

Ра́дуйся, сла́вный священному́чениче Вла́сие, возлю́бленный святи́телю Христо́в.

Конда́к 7.

Хотя́щу безу́мному мучи́телю жела́ние свое́ улучи́ти, е́же от Жива́го Бо́га отврати́ти тя́, да прилепи́шися к безу́мным и́долом, повеле́ па́ки воврещи́ тя в темни́цу, в ню́же с ра́достию вше́л еси́, о́тче, хваля́ и испове́дая И́стиннаго Бо́га, поя́ Ему́: Аллилу́иа.

И́кос 7.

Я́рость безчелове́чную показа́ зверообра́зный мучи́тель, егда́, втори́цею се́д на суди́щи, повеле́ тя́, архиере́я Бо́жия, на дре́ве на́га пове́шена строга́ти кре́пко ору́дии желе́зными. Пачеесте́ственное терпе́ние твое́ благогове́йно воспомина́юще, похвала́ми блажи́м тя́ си́це:

Ра́дуйся, пове́шенный на дре́ве Христа́ ра́ди, на Кресте́ распя́таго; ра́дуйся, стро́ганный по ре́бром Иису́са ра́ди, копие́м в ре́бра прободе́ннаго.

Ра́дуйся, я́ко свяще́нствовати пома́зался еси́; ра́дуйся, я́ко кро́вию свое́ю освяти́лся еси́.

Ра́дуйся, я́ко о́гнь любве́ к Бо́гу в се́рдцы твое́м возже́гл еси́; ра́дуйся, я́ко со Христо́м, Христа́ ра́ди, на земли́ пострада́л еси́.

Ра́дуйся, по́двигов и соверше́нства благи́й о́бразе; ра́дуйся, священному́чеников ли́ка вели́кая сла́во.

Ра́дуйся, я́ко свяще́нную оде́жду твою́ кровьми́ страда́ний украси́л еси́; ра́дуйся, я́ко вся́ку доброде́тель в себе́ изобрази́л еси́.

Ра́дуйся, крепча́йший ка́меннаго столпа́ страстоте́рпче; ра́дуйся, вселюби́мый Подвигополо́жника Христа́ уго́дниче.

Ра́дуйся, сла́вный священному́чениче Вла́сие, возлю́бленный святи́телю Христо́в.

Конда́к 8.

Стра́нное и стра́шное твое́ страда́ние, о́тче, благочести́выя и богобоя́зненныя жены́ ви́дяща, после́доваху тебе́, ведо́мому па́ки в темни́цу, собира́юща ка́плющую от телесе́ твоего́ кро́вь, е́юже пома́зовахуся и с ве́рою воспева́ху Бо́гу: Аллилу́иа.

И́кос 8.

Ве́сь в вы́шних бы́сть, о́тче, и горе́ очи́ма души́ взира́ше: сла́дце бо Христа́ ра́ди терпе́л еси́ му́ки: те́мже и са́м показа́ся сосу́д, излива́яй сла́дость чуде́сных исцеле́ний на вопию́щих ти́ си́це:

Ра́дуйся, страда́льческий пу́ть к Небеси́ показа́вый; ра́дуйся, терпе́нием свои́м и же́н ревнова́нию о ве́ре научи́вый.

Ра́дуйся, я́ко кро́ве твоея́ ка́пли посрами́ша и́дольскую го́рдость; ра́дуйся, возлюби́вый Иису́сову сла́дость.

Ра́дуйся, о́тче, о ча́дех до́брых веселя́йся; ра́дуйся, в темни́це о присносу́щнем све́те му́дрствовавый.

Ра́дуйся, пчело́, от смра́днаго и́дольских же́ртв ды́ма отлете́вшая; ра́дуйся, я́ко и са́м твои́ми я́звами подо́бен со́ту бы́сть.

Ра́дуйся, я́ко кро́ве твоея́ ка́пли сладча́йшия ме́да бы́ша Христу́; ра́дуйся, я́ко муче́ние нестерпи́мое в блаже́нство тя́ приведе́.

Ра́дуйся, я́ко все́м ве́рным па́мять твоя́ сладка́; ра́дуйся, я́ко все́й Це́ркви и́мя твое́ че́стно.

Ра́дуйся, сла́вный священному́чениче Вла́сие, возлю́бленный святи́телю Христо́в.

Конда́к 9.

Все́ естество́ А́нгельское ве́лиею возра́довася ра́достию, узре́вше му́жественную кре́пость седми́ же́н, я́же тобо́ю, о́тче, на пу́ть и́стинный наста́влены бы́ша, прего́рдаго кня́зя тьмы́ посрами́вше, ра́достно преклони́ша вы́и своя́ под мечи́ мучи́тельския, хва́ляще Бо́га и пою́ще Ему́: Аллилу́иа.

И́кос 9.

Вети́и многовеща́ннии не возмо́гут восхвали́ти тя́ по достоя́нию, о́тче богому́дре Вла́сие, от утро́бы бо ма́терния по́мысл к Царю́ Вседержи́телю устреми́вый, безбоя́зненно пре́дал еси́ те́ло твое́ Христа́ ра́ди на муче́ние. Сицеву́ю любо́вь твою́ ко Христу́ Иису́су помина́юще, со умиле́нием глаго́лем ти́:

Ра́дуйся, и́стинная лозо́ Христо́ва; ра́дуйся, небреги́й о телеси́ ра́ди души́ спасе́ния.

Ра́дуйся, се́явый слеза́ми, да с ра́достию рукоя́ти своя́ по́жнеши; ра́дуйся, моли́твою, у́зами и ну́ждною нището́ю пло́ть изнури́вый.

Ра́дуйся, пути́ же́стоки за словеса́ Бо́жия соверши́вый; ра́дуйся, по́двиги твои́ми стра́сти теле́сныя умертви́вый.

Ра́дуйся, идолослужи́телей обличи́телю безстра́шный; ра́дуйся, свети́льниче, де́монский мра́к отрева́яй.

Ра́дуйся, ве́рный ра́бе Христо́в; ра́дуйся, моли́твы благоуха́нное кади́ло.

Ра́дуйся, до́блественнейший страстоте́рпче; ра́дуйся, я́ко похвали́ по́двиги твоя́ Са́м Подвигополо́жник.

Ра́дуйся, сла́вный священному́чениче Вла́сие, возлю́бленный святи́телю Христо́в.

Конда́к 10.

Спасти́ хотя́щи ду́шу свою́, вдови́ца, услы́шавши твое́ му́жественное за Христа́ страда́ние, посети́ тя, о́тче, в темни́це су́ща, прине́сши ча́сть закла́ннаго вепреца́. Ты́ же, возда́в хвалу́ Бо́гови и вкуси́в пи́щи, благослови́л еси́ жену́, запове́дав во вся́ ле́та соверша́ти па́мять твою́, да ничто́же от потре́бных оскуде́ет в дому́ ея́. Блаже́нная же вдови́ца, прие́мши за́поведь от тебе́, оты́де в до́м сво́й, пою́щи Бо́гу: Аллилу́иа.

И́кос 10.

Стены́ ка́менныя тверде́йши ве́ра твоя́ яви́ся, егда́, мучи́телю нечести́вому потопи́ти тя́ восхоте́вшу, ты́, о́тче Вла́сие, осени́в кре́стным зна́мением е́зеро, про́йде на среду́ его́ и се́де на воде́, я́ко на земли́. Сего́ ра́ди мы́ прино́сим ти́ пе́ния сицева́я:

Ра́дуйся, ве́ры Петро́вы подража́телю; ра́дуйся, стези́ творя́й по вода́м, Ду́хом укрепля́емь.

Ра́дуйся, я́ко горды́ню зми́я духо́вным мече́м посече́; ра́дуйся, я́ко бого́в безду́шных посрами́.

Ра́дуйся, подви́жниче, ору́жием благоволе́ния Бо́жия венча́нный на земли́; ра́дуйся, му́чениче, на бра́нь препоя́санный от Бо́га.

Ра́дуйся, архиере́ем добро́то и сла́во; ра́дуйся, му́чеником красото́ и ра́дование.

Ра́дуйся, христиа́ном кре́пкое прибе́жище; ра́дуйся, ве́рным тве́рдое заступле́ние.

Ра́дуйся, ве́ру непоколеби́му до сме́рти сохрани́вый; ра́дуйся, все́х моле́ния Вы́шнему дерзнове́нно принося́й.

Ра́дуйся, сла́вный священному́чениче Вла́сие, возлю́бленный святи́телю Христо́в.

Конда́к 11.

Пе́ние похва́льное, а́ще и тьмочи́сленное, не́сть дово́льно по достоя́нию восхвали́ти тя́, всехва́льный священному́чениче Вла́сие! Ча́да твоя́, ви́дяща идолослужи́телей, погря́зших в е́зере, я́ко о́лово в воде́, тебе́ ходя́щу, я́ко по су́ху, благочести́вно возопи́ша Бо́гу: Аллилу́иа.

И́кос 11.

Стена́ тве́рда яви́лся еси́, уго́дниче Бо́жий, пред мучи́телем твои́м Агрикола́ем, ники́я бо му́ки возмого́ша победи́ти тя́: си́ла же Христо́ва укрепля́ше тя́ в страда́ниих твои́х. Сего́ ра́ди похваля́юще терпе́ние твое́, я́ко непобеди́мому страстоте́рпцу зове́м ти́:

Ра́дуйся, кро́вь свою́ за Христа́ пролия́вый; ра́дуйся, за страда́ния неувяда́емый вене́ц прие́мый.

Ра́дуйся, пре́жде му́ченичества свя́то пожи́вый; ра́дуйся, в житии́ и по кончи́не чудесы́ просла́вивыйся.

Ра́дуйся, согреша́ющих вразуми́телю; ра́дуйся, святота́тцев наказа́телю.

Ра́дуйся, стопа́м Христа́ Спаси́теля ре́вностный после́дователю; ра́дуйся, Страсте́м Его́ му́жественный подража́телю.

Ра́дуйся, просла́вленный Бо́гом на Небеси́ и на земли́; ра́дуйся, я́ко в ско́рби су́щим ра́дость подае́ши.

Ра́дуйся, в печа́ли защи́тителю; ра́дуйся, в ну́жде бла́г пода́телю.

Ра́дуйся, сла́вный священному́чениче Вла́сие, возлю́бленный святи́телю Христо́в.

Конда́к 12.

Благода́ть от Бо́га дана́ ти храни́ти и соблюда́ти от вся́кия боле́зни челове́ки и скоты́ и́х; до́мы же почита́ющих честна́я страда́ния твоя́ вся́ких бла́г исполня́ти. Тоя́ благода́ти не лиши́ и на́с, до́брый святи́телю Вла́сие, да и мы́, здра́ви су́ще те́лом и душе́ю, пое́м немо́лчно Бо́гу: Аллилу́иа.

И́кос 12.

Пою́ще твое́ пусты́нническое житие́, почита́ем страда́ния, хва́лим долготерпе́ние, ублажа́ем святу́ю кончи́ну твою́, и в че́сть и па́мять твои́х, о́тче, победоно́сных по́двигов похва́льная воспису́ем ти́ сицева́я:

Ра́дуйся, архиере́ю, поже́рый Бо́гови себе́ сама́го на олтари́ му́ченичестем; ра́дуйся, в моли́тве осене́нный свы́ше о́блаком све́тлым.

Ра́дуйся, Непоро́чным возлю́бленный; ра́дуйся, в моли́твах услы́шанный.

Ра́дуйся, Христа́ ра́ди во главу́ усече́нный; ра́дуйся, от свяще́нных лико́в ра́достно во Хра́м Небе́сный введе́нный.

Ра́дуйся, же́ртво, прине́сшаяся Бо́гу в воню́ благоуха́ния; ра́дуйся, я́ко святу́ю твою́ ду́шу Венцеда́вец Христо́с прия́л е́сть в Пренебе́сный Сво́й Же́ртвенник.

Ра́дуйся, теле́сных неду́гов до́брый врачева́телю; ра́дуйся, душе́вных боле́зней благи́й цели́телю.

Ра́дуйся, я́ко тобо́ю вся́ким дово́льством снабде́ни бы́ти наде́емся; ра́дуйся, я́ко тобо́ю от вся́кия боле́зни сохране́ни бы́ти упова́ем.

Ра́дуйся, сла́вный священному́чениче Вла́сие, возлю́бленный святи́телю Христо́в.

Конда́к 13.

О преди́вный многострада́льный святи́телю Христо́в Вла́сие! Ны́нешнее моле́ние прие́м, от вся́ких боле́зней душе́вных и теле́сных здра́вы сотвори́ ны, ве́чнаго муче́ния твои́ми благопря́тными хода́тайствы свободи́, да с тобо́ю на Небесе́х в Ве́чном Ца́рствии сподо́бимся вы́ну воспева́ти Го́споду, ди́вному во святы́х: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгельския си́лы, ви́девше тя́, о́тче, удиви́шася, я́коже посреде́ те́рния идолослуже́ния кри́н благоче́стия прозябе́ и плоды́ мно́ги принесе́: те́мже и мы́, ви́девше тя́ ны́не сожи́теля А́нгелов, вопие́м сицева́я:

Ра́дуйся душетле́нных грехо́в победи́телю; ра́дуйся, непоколеби́мый сто́лпе благоче́стия.

Ра́дуйся, благоуха́нный кри́не, отгна́вый от себе́ злосмра́дие и́дольскаго служе́ния; ра́дуйся, я́ко изво́лил еси́ всели́тися со зверьми́, во е́же не служи́ти и́долом.

Ра́дуйся, в темни́це су́щих посети́телю; ра́дуйся, я́ко су́щу заключе́ну тебе́ в темни́це, Госпо́дь в нощи́ яви́ся.

Ра́дуйся, на горе́ Аргео́с го́рняя му́дрствовавый; ра́дуйся, из глубины́ пеще́ры моли́твы Бо́гу возсыла́вый.

Ра́дуйся, я́ко от ю́ности возлюби́л еси́ и́го Христо́во; ра́дуйся, А́нгелов весе́лие и сла́во.

Ра́дуйся, спасе́ния и́стинный наста́вниче; ра́дуйся, к тебе́ притека́ющим ско́рый помо́щниче.

Ра́дуйся, сла́вный священному́чениче Вла́сие, возлю́бленный святи́телю Христо́в.

Конда́к 1.

Избра́нный Архиере́ем Вели́ким, па́стырю ове́ц Христо́вых, свети́льниче гра́да Севасти́йскаго, Вла́сие, просвети́ заре́ю Триеди́наго Божества́ омраче́нных грехми́, соблюди́ ду́ши на́ша от мы́сленнаго во́лка, при́сно я́ сохраня́я, и теле́сныя неду́ги исцеля́я, да твои́ми моли́твами изба́виши на́с от бе́д, благода́рственно зову́щих ти́:

Ра́дуйся, сла́вный священному́чениче Вла́сие, возлю́бленный святи́телю Христо́в.

Моли́тва.

Преблаже́нне и приснопа́мятне священному́чениче Вла́сие, ди́вный страда́льче и предста́телю на́ш те́плый, по отше́ствии твое́м в жи́знь ве́чную призыва́ющим твое́ свято́е и́мя посо́бствовати и во вся́ких проше́ниих услы́шанным бы́ти обеща́вый! Се́ ны́не к тебе́, уго́днику Бо́жию, я́ко ко и́стинному хода́таю спасе́ния, притека́ем и смире́нно мо́лимся: предста́ни на́м в по́мощь, у́зами грехо́в свя́занным, подви́гнися на всемо́щныя твоя́ к Бо́гу моли́твы и помоли́ся о на́с гре́шных: тя́ бо, недосто́йнии, призыва́ти на заступле́ние дерза́ем, и жела́ем от все́х грехо́в на́ших тобо́ю свобожде́ние получи́ти. О свя́тче Бо́жий Вла́сие! В сокруше́нии и смире́нии се́рдца на́шего пред тобо́ю припа́даем и мо́лимся: осия́й на́с, омраче́нных наве́ты вра́жиими, све́том благода́ти свы́ше, да в не́м ходя́ще, не преткне́м о ка́мень но́г на́ших. Тя́, я́ко сосу́д в че́сть избра́нный и испо́лненный благода́ти Бо́жия, мо́лим: сподо́би на́с гре́шных от исполне́ния твоего́ жела́емое прия́ти, и исцели́ на́ша душе́вныя и теле́сныя я́звы, грехо́м же на́шим проще́ние и душе́вному и теле́сному на́шему здра́вию и спасе́нию поле́зное у Го́спода испроси́, да всегда́ прославля́ем Отца́ и Сы́на и Свята́го Ду́ха, и твое́ ми́лостивное предста́тельство о душа́х и телесе́х на́ших, ны́не и при́сно и во ве́ки веко́в. Ами́нь.