Конда́к 1.

Избра́нный уго́дниче Бо́жий и чудотво́рче, пресве́тлый земли́ Кеномани́йския свети́льниче, святи́телю о́тче Иулиа́не, велича́я просла́вльшаго тя́ Го́спода, похва́льное пе́ние прино́сим ти́. Ты́ же, предстоя́ пред Престо́лом Всевы́шняго, моли́ся изба́витися на́м от вся́кия беды́, ско́рби и печа́ли, со умиле́нием зову́щим ти́:

Ра́дуйся, святи́телю Иулиа́не, те́плый о на́с моли́твенниче и пресла́вный чудотво́рче.

И́кос 1.

А́нгела земна́го и челове́ка небе́снаго ве́мы тя́, свя́те Иулиа́не, о́браз и́стиннаго благоче́стия собо́ю на́м яви́вшаго. Мы́ же, Про́мыслу Бо́жию, на тебе́ явле́нному, чудя́щеся, прославля́ем ве́лие благоутро́бие Бо́жие и с любо́вию зове́м ти́:

Ра́дуйся, Ду́хом Святы́м просвеще́нный; ра́дуйся, Святы́м Креще́нием духо́вно обновле́нный.

Ра́дуйся, Це́ркви Правосла́вныя украше́ние; ра́дуйся, Га́ллии свято́е сокро́вище.

Ра́дуйся, Ева́нгелия Христо́ва усе́рдный после́дователю; ра́дуйся, за́поведей Госпо́дних ве́рный блюсти́телю.

Ра́дуйся, А́нгелов преди́вное чу́до; ра́дуйся, челове́ков пресла́вное удивле́ние.

Ра́дуйся, святи́телю Иулиа́не, те́плый о на́с моли́твенниче и пресла́вный чудотво́рче.

Конда́к 2.

Ви́дя Сердцеве́дец Госпо́дь благо́е души́ твоея́ произволе́ние, е́же рабо́тати Ему́ усе́рдно во вся́ дни́ живота́ твоего́, чрез первоверхо́внаго Апо́стола Петра́ во епи́скопа тя́ поста́ви и на про́поведь сло́ва Бо́жия в Га́ллию стопы́ твоя́ напра́ви, да научи́ши люде́й земли́ тоя́ пе́ти Бо́гу: Аллилу́иа.

И́кос 2.

Ра́зум Богопросвеще́н име́я, святи́телю Иулиа́не, неуста́нно пропове́дал еси́ уче́ние Христо́во лю́дем гра́да Кеномани́йскаго; они́ же, зря́ще чудеса́, тобо́ю всеси́льным и́менем Христо́вым соверша́емая, и́стиннаго Бо́га в сердца́ своя́ приима́ху и Святы́м Креще́нием просвеща́хуся, вопию́ще ти́:

Ра́дуйся, Бо́жия ра́зума испо́лненный; ра́дуйся, Христа́ в се́рдце свое́м вы́ну име́вый.

Ра́дуйся, враго́в ви́димых и неви́димых прогони́телю; ра́дуйся, неду́гов душе́вных и теле́сных цели́телю.

Ра́дуйся, о́чи слепы́м отверза́яй; ра́дуйся, на пу́ть и́стины наставля́яй.

Ра́дуйся, ни́щих и сиро́т пита́телю; ра́дуйся, млады́х му́дрый воспита́телю.

Ра́дуйся, святи́телю Иулиа́не, те́плый о на́с моли́твенниче и пресла́вный чудотво́рче.

Конда́к 3.

Си́лою Вы́шняго укрепле́нный и благода́тию Бо́жиею испо́лненный, па́ству твою́, Го́сподем тебе́ вве́ренную, уче́нием Христо́вым, я́ко пи́щею небе́сною, пита́л еси́, прокаже́нныя и неду́жныя исцеля́я, слепы́м теле́сныя и духо́вныя очеса́ отверза́я, ме́ртвыя воскреша́я, бе́сы изгоня́я, и та́ко все́м ми́лостивый и лю́бящий оте́ц бы́л еси́, вопию́щим о тебе́ Бо́гу: Аллилу́иа.

И́кос 3.

Иму́ще тя́ вели́каго моли́твенника и ско́раго в напа́стех засту́пника, на по́мощь тя́ призыва́ем, святи́телю о́тче Иулиа́не, и, помина́я по́двиги и труды́ твоя́, во сла́ву Бо́га Вы́шняго подъя́тыя, сия́ в похвалу́ тебе́ уми́льно вопие́м:

Ра́дуйся, еди́наго и́стиннаго Бо́га пропове́дниче; ра́дуйся, исцеле́ний благода́тный исто́чниче.

Ра́дуйся, ка́меню ве́ры, на основа́нии за́поведей Госпо́дних утвержде́нный; ра́дуйся, доброде́тельми и светлостьми́ душе́вными укра́шенный.

Ра́дуйся, ве́рою твое́ю и чудесы́ ко Христу́ неве́рныя обраща́яй; ра́дуйся, си́лою моли́твы твоея́ стра́ждущим исцеле́ния да́руяй.

Ра́дуйся, и́дольския пре́лести низложи́телю; ра́дуйся, неи́стовства бесо́вскаго изобличи́телю.

Ра́дуйся, святи́телю Иулиа́не, те́плый о на́с моли́твенниче и пресла́вный чудотво́рче.

Конда́к 4.

Бу́рею напа́стей одолева́еми, ка́ко возмо́жем досто́йно восхвали́ти чудеса́ твоя́, блаже́нне Иулиа́не: ты́ бо моли́твою свое́ю бе́днаго о́трока от зми́я, обви́вшаго кре́пко его́, изба́вил еси́, и из беснова́тых и́менем Христо́вым ду́ха нечи́стаго изгна́л еси́, и мно́гия уме́ршия воскреси́л еси́. Те́мже любо́вию те́плою к тебе́ воздвиза́еми, благодари́м Го́спода, дарова́вшаго на́м такова́го засту́пника и хода́тая о проще́нии грехо́в на́ших, вопию́щих Ему́: Аллилу́иа.

И́кос 4.

Слы́шаще ди́вная наставле́ния твоя́, я́же не то́чию в словесе́х, но и в по́двизех твои́х явля́л еси́, достоблаже́нне святи́телю, притека́ху к тебе́ жа́ждущии спасе́ния, и та́ко Це́рковь Кеномани́йская укрепля́шеся. Мы́ же, ви́дя таково́е твое́ усе́рдное попече́ние о спасе́нии ду́ш челове́ческих, восхваля́ем тя́:

Ра́дуйся, моли́твенниче ско́рый и те́плый; ра́дуйся, предста́телю благи́й и ве́рный.

Ра́дуйся, Апо́столов сла́во и украше́ние; ра́дуйся, святи́телей Христо́вых красото́ и удобре́ние.

Ра́дуйся, к со́нму святы́х сопричте́нный; ра́дуйся, венце́м нетле́нным Го́сподем увенча́нный.

Ра́дуйся, за ста́до Христо́во ду́шу свою́ положи́вый; ра́дуйся, любви́ Христо́вы о́браз в себе́ яви́вый.

Ра́дуйся, святи́телю Иулиа́не, те́плый о на́с моли́твенниче и пресла́вный чудотво́рче.

Конда́к 5.

Боготе́чною звездо́ю бы́л еси́ в житии́ твое́м, Иулиа́не всехва́льне, указу́я все́м пу́ть в Ца́рствие Небе́сное, его́же и са́м стяжа́л еси́, де́нь и но́щь Го́сподеви пла́менною любо́вию рабо́тающе и вы́ну Ему́ вопию́ще: Аллилу́иа.

И́кос 5.

Ви́дяще, я́ко лю́дие, к тебе́ приходя́щии, жа́ждею теле́сною томи́мы быва́ют: ме́сто бо, иде́же житие́ твое́ проводи́л еси́, безво́дно бя́ше, но́вое чу́до сотвори́л еси́, святи́телю ми́лостивый, и, водрузи́в же́зл сво́й в зе́млю, дерзнове́нно Бо́гу помоли́лся еси́: и повеле́ Госпо́дь на ме́сте то́м исто́чнику воды́ откры́тися, в не́мже и крести́л еси́ все́х уве́ровавших во Всемогу́щаго Бо́га, возопи́вших тебе́ такова́я:

Ра́дуйся, со дерзнове́нием Бо́гу моли́выйся; ра́дуйся, слы́шания моли́твы твоея́ удосто́ивыйся.

Ра́дуйся, исто́чник воды́ приходя́щим к тебе́ дарова́вый; ра́дуйся, чу́дом си́м в ве́ре и́х укрепи́вый.

Ра́дуйся, вода́ми креще́ния мно́гия просвети́вый; ра́дуйся, от поги́бели ве́чныя си́х изба́вивый.

Ра́дуйся, я́ко ве́рныя па́че в ве́ре укрепи́л еси́; ра́дуйся, я́ко неве́рныя к ве́ре в Бо́га и́стиннаго обрати́л еси́.

Ра́дуйся, святи́телю Иулиа́не, те́плый о на́с моли́твенниче и пресла́вный чудотво́рче.

Конда́к 6.

Пропове́дник сло́вом и де́лом и́стины Христо́вы яви́лся еси́, свя́те Иулиа́не, егда́ пригласи́ тя́ кня́зь Дефе́нсор, че́сть тебе́ воздаю́ще; но́вое бо чу́до сотвори́л еси́: слепцу́, у вра́т до́ма кня́зева седя́щему, кре́стным зна́мением о́чи его́ осени́в, и́менем Христо́вым зре́ние ему́ дарова́л еси́. Вси́ же, ви́дящии чу́до сие́, возра́довашася зело́ и воспе́ша Бо́гу: Аллилу́иа.

И́кос 6.

Возсия́л еси́, я́ко свети́ло светоза́рное, просвеща́ющее све́том и́стинным во тьме́ неве́рия су́щих, да позна́ют и́стиннаго Бо́га, Его́же си́лою и благода́тию ди́вная исцеле́ния и чудотворе́ния соверша́л еси́, святи́телю Иулиа́не. Приими́ же от на́с похвалы́ сицевы́я:

Ра́дуйся, моли́твы ко Го́споду кади́ло благово́нное; ра́дуйся, Це́ркви Правосла́вныя украше́ние многоце́нное.

Ра́дуйся, себе́ сама́го в хра́м Ду́ха Свята́го угото́вавый; ра́дуйся, мно́гия на пу́ть спасе́ния наста́вивый.

Ра́дуйся, да́р исцеле́ния от Го́спода прия́вый; ра́дуйся, неду́жныя и́менем Христо́вым исцеля́вый.

Ра́дуйся, житие́м благочести́вым приме́р ве́рным бы́вый; ра́дуйся, ду́шу твою́ в целому́дрии сохрани́вый.

Ра́дуйся, святи́телю Иулиа́не, те́плый о на́с моли́твенниче и пресла́вный чудотво́рче.

Конда́к 7.

Хотя́ще спасе́ние получи́ти кня́зь Дефе́нсор смире́нно прося́ше тебе́, о́тче Иулиа́не, научи́ти его́ ка́ко подоба́ет житие́ свое́ проводи́ти, да жи́знь ве́чную унасле́дует. Ты́ же, кня́зя и дома́шних его́ апо́стольскою про́поведию о Бо́зе и́стиннем просвети́в, ко креще́нию приугото́вил еси́, да вы́ну восхваля́ют Бо́га пе́снию: Аллилу́иа.

И́кос 7.

Но́ваго ви́дим тя́ избра́нника Бо́жия, Иулиа́не пресла́вне, устро́ившаго благоле́пный хра́м в до́ме кня́зевом, в не́мже лю́дие, в ве́ре тобо́ю наставля́еми, креще́нием святы́м просвеща́л еси́ и чудесы́ мно́гими утвержда́л еси́. Те́мже и на́с в ве́ре Правосла́вней укрепи́, восхваля́ющих тя́:

Ра́дуйся, богому́дрый пропове́дниче Ева́нгелия Христо́ва; ра́дуйся, Це́ркве Правосла́вныя пресве́тлый свети́льниче.

Ра́дуйся, побо́рниче ве́ры непобеди́мый; ра́дуйся, святи́телю Христо́в пресла́вный.

Ра́дуйся, кре́пкая наде́ждо к тебе́ прибега́ющих; ра́дуйся, уте́шителю все́х на милосе́рдие твое́ упова́ющих.

Ра́дуйся, благода́тию Бо́жиею приосене́нный; ра́дуйся, све́том Пресвяты́я Тро́ицы озаре́нный.

Ра́дуйся, святи́телю Иулиа́не, те́плый о на́с моли́твенниче и пресла́вный чудотво́рче.

Конда́к 8.

Стра́нное чу́до ви́деша от тебе́ лю́дие гра́да Кеномани́йскаго, егда́ идолопокло́нника Анаста́сия сы́на уме́ршаго воскреси́л еси́: се́й бо Анаста́сий кля́твенно уве́ри тя́, а́ще сы́на своего́ жи́ва восприи́мет, уве́рует во Христа́ Бо́га и́стиннаго и, бого́в и́дольских отре́кшись, воспое́т Тому́: Аллилу́иа.

И́кос 8.

Ве́сь ра́дости боже́ственныя испо́лнен бы́сть Анаста́сий, ви́дя уме́ршаго сы́на своего́ жи́ва, и еди́ными усты́ с при́сными свои́ми просла́виша и́стиннаго Бо́га, и, уве́ровав во Христа́, крести́ся с дома́шними свои́ми. Мы́ же, Бо́га в се́рдце свое́м сла́вяще, со умиле́нием глаго́лем ти́:

Ра́дуйся, воскреше́нием уме́ршаго о́трока Го́спода просла́вивый; ра́дуйся, пред неве́рными и́дольское нече́стие обличи́вый.

Ра́дуйся, все́ упова́ние свое́ на Го́спода полага́вый; ра́дуйся, насле́дие Ца́рствия Христо́ва стяжа́вый.

Ра́дуйся, в дому́ Отца́ Небе́снаго оби́тель себе́ сотвори́вый; ра́дуйся, в ра́дость Го́спода своего́ вше́дый.

Ра́дуйся, Подвигополо́жника Христа́ смире́нный после́дователю; ра́дуйся, Апо́столов Христо́вых ре́вностный подража́телю.

Ра́дуйся, святи́телю Иулиа́не, те́плый о на́с моли́твенниче и пресла́вный чудотво́рче.

Конда́к 9.

Вся́кое естество́ удиви́ся, богоблаже́нне Иулиа́не, вели́кому свы́ше тебе́ дарова́нию, ты́ бо на земли́, я́ко а́нгел, пожи́л еси́ и во пло́ти, а́ки безпло́тен, яви́лся еси́, те́мже и да́р чудотворе́ния от Го́спода прия́л еси́. Ны́не же, к ли́ку святы́х сопричте́нный, а́нгельски воспева́еши пе́снь: Аллилу́иа.

И́кос 9.

Вети́я многовеща́нныя недоуме́ют досто́йно восхвали́ти тя́, святи́телю Иулиа́не, благода́тию бо Бо́жиею источа́еши мно́гая и пресла́вная чудеса́, и́хже и исчести́ не́сть возмо́жно. Пребыва́яй ны́не во сла́ве Христо́вой, при́зри на на́с, тебе́ моля́щихся и с любо́вию зову́щих:

Ра́дуйся, я́ко Святе́й Тро́ице ра́достно предстои́ши; ра́дуйся, я́ко о спасе́нии на́шем Бо́га умоля́еши.

Ра́дуйся, жития́ непоро́чнаго рачи́телю; ра́дуйся, послуша́ния и терпе́ния учи́телю.

Ра́дуйся, пра́ведности и благи́х де́л испо́лненный; ра́дуйся, дерзнове́ние моли́твенное ко Го́споду стяжа́вый.

Ра́дуйся, кро́тости и смире́ния о́бразе; ра́дуйся, оби́димых и стра́ждущих утеше́ние.

Ра́дуйся, святи́телю Иулиа́не, те́плый о на́с моли́твенниче и пресла́вный чудотво́рче.

Конда́к 10.

Спасти́ся хотя́ще ве́рнии от разли́чных напа́стей, бе́д и скорбе́й, тебе́, преблаже́нне Иулиа́не, я́ко ве́рнаго наста́вника и побо́рника почита́ют. И на́м, гре́шным, спасе́ния и́щущим, святы́ми твои́ми моли́твами помози́, вопию́щим о тебе́ Бо́гу: Аллилу́иа.

И́кос 10.

Стена́ еси́ заступле́ния, чудотво́рче святы́й Иулиа́не, все́м с ве́рою к тебе́ притека́ющим, тебе́ бо даде́ся от Бо́га благода́ть неду́гующия врачева́ти, бе́дствующим помога́ти, ско́рбныя утеша́ти, наипа́че же младе́нцы от вся́каго зла́ сохраня́ти и боле́зни исцеля́ти. Сего́ ра́ди, Го́спода прославля́я, зове́м ти́ си́це:

Ра́дуйся, пред Царе́м Небе́сным за на́с хода́таю; ра́дуйся, за вся́ христиа́ны ми́лостивый предста́телю.

Ра́дуйся, о все́х чту́щих па́мять твою́ моли́твенниче; ра́дуйся, и́щущим спасе́ния благи́й споспе́шниче.

Ра́дуйся, благода́ти Бо́жия сосу́де драгоце́нный; ра́дуйся, све́том Святы́я Тро́ицы озаре́нный.

Ра́дуйся, неду́гов на́ших цели́телю милосе́рдный; ра́дуйся, в борьбе́ со страстьми́ помо́щниче неодоли́мый.

Ра́дуйся, святи́телю Иулиа́не, те́плый о на́с моли́твенниче и пресла́вный чудотво́рче.

Конда́к 11.

Пе́ние всеумиле́нное прино́сим тебе́, святи́телю о́тче Иулиа́не, на на́с с небесе́ с благосе́рдием взира́ющему, и все́м, усе́рдно тебе́ призыва́ющим, по́мощь ско́рую ниспосыла́ющему. Мы́ же, твое́ блаже́нное житие́ на земли́ и ди́вное прославле́ние на небеси́ помина́юще, с любо́вию пое́м благоде́ющему тобо́ю Бо́гу на́шему: Аллилу́иа.

И́кос 11.

Све́тлостию но́ваго чудесе́ твоего́, богоблаже́нне Иулиа́не, всю́ страну́ Кеномани́йскую просвети́л еси́, ве́рных во и́стине укрепля́я: боже́ственною бо си́лою вооруже́нный, в и́дольское ка́пище вше́л еси́ и призва́л еси́ и́мя Христо́во, повелева́я и́долу па́сти, бе́су же из него́ изы́ти – и бы́сть та́ко. Лю́дие же, тобо́ю от лю́таго зми́я бесо́вскаго спасе́ннии, взыва́ху тебе́:

Ра́дуйся, в броню́ боже́ственную облече́нный; ра́дуйся, Го́сподом свы́ше укрепле́нный.

Ра́дуйся, и́дола нога́ма свои́ма попра́вый; ра́дуйся, бе́са из него́ вла́стию Христо́вою изгна́вый.

Ра́дуйся, от зми́я о́гненнаго на́с спаса́яй; ра́дуйся, кре́стным зна́мением главу́ зми́еву сокруша́яй.

Ра́дуйся, на́с от и́дольскаго суеве́рия отвраща́яй; ра́дуйся, ве́рою Христо́вою все́х просвеща́яй.

Ра́дуйся, святи́телю Иулиа́не, те́плый о на́с моли́твенниче и пресла́вный чудотво́рче.

Конда́к 12.

Благода́ти Боже́ственныя испо́лнена душа́ твоя́, преблаже́нне Иулиа́не, я́ко со́лнце сия́ющая, вознесе́на бы́сть пресве́тлыми А́нгелы во оби́тели небе́сныя. Мы́ же, ве́дяще, я́ко ты́ по блаже́нней кончи́не твое́й чудоде́йствовати не преста́л еси́, неви́димо колесни́цею с почи́вшим те́лом твои́м управля́я, со умиле́нием вопие́м Бо́гу, просла́вльшему тя́ во святы́х Свои́х: Аллилу́иа.

И́кос 12.

Пою́ще просла́вльшаго тя́ Го́спода и ублажа́юще тя́, святи́телю Христо́в Иулиа́не, приле́жно мо́лимтися: сподо́би и на́с хода́тайством твои́м неосужде́нно предста́ти Стра́шному Суди́щу Христо́ву, да с ра́достию и любо́вию благохва́льно зове́м ти́ си́це:

Ра́дуйся, благода́тию Бо́жиею просла́вленный; ра́дуйся, в ли́це святы́х возвели́ченный.

Ра́дуйся, досто́йный А́нгелов собесе́дниче; ра́дуйся, всемо́щный на́ш засту́пниче.

Ра́дуйся, на́ш пред Бо́гом предста́телю; ра́дуйся, ча́д ма́лых покрови́телю и пита́телю.

Ра́дуйся, и по кончи́не свое́й чудотворя́щий; ра́дуйся, ду́ши на́ша благода́тию врачу́ющий.

Ра́дуйся, святи́телю Иулиа́не, те́плый о на́с моли́твенниче и пресла́вный чудотво́рче.

Конда́к 13.

О преди́вный Иулиа́не, засту́пниче на́ш премилосе́рдый! Приими́ ма́лое сие́ моле́ние на́ше, с любо́вию тебе́ приноси́мое, и моли́ся за ны́ ко Го́споду, да сохрани́т на́с и защити́т Свое́ю благода́тию от вся́ких бе́д, скорбе́й и напа́стей, и в ча́с кончи́ны на́шея не оста́вит на́с, и сподо́бит Ца́рствие Небе́сное насле́довати, да во ве́ки воспева́ем Ему́: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгела земна́го и челове́ка небе́снаго ве́мы тя́, свя́те Иулиа́не, о́браз и́стиннаго благоче́стия собо́ю на́м яви́вшаго. Мы́ же, Про́мыслу Бо́жию, на тебе́ явле́нному, чудя́щеся, прославля́ем ве́лие благоутро́бие Бо́жие и с любо́вию зове́м ти́:

Ра́дуйся, Ду́хом Святы́м просвеще́нный; ра́дуйся, Святы́м Креще́нием духо́вно обновле́нный.

Ра́дуйся, Це́ркви Правосла́вныя украше́ние; ра́дуйся, Га́ллии свято́е сокро́вище.

Ра́дуйся, Ева́нгелия Христо́ва усе́рдный после́дователю; ра́дуйся, за́поведей Госпо́дних ве́рный блюсти́телю.

Ра́дуйся, А́нгелов преди́вное чу́до; ра́дуйся, челове́ков пресла́вное удивле́ние.

Ра́дуйся, святи́телю Иулиа́не, те́плый о на́с моли́твенниче и пресла́вный чудотво́рче.

Конда́к 1.

Избра́нный уго́дниче Бо́жий и чудотво́рче, пресве́тлый земли́ Кеномани́йския свети́льниче, святи́телю о́тче Иулиа́не, велича́я просла́вльшаго тя́ Го́спода, похва́льное пе́ние прино́сим ти́. Ты́ же, предстоя́ пред Престо́лом Всевы́шняго, моли́ся изба́витися на́м от вся́кия беды́, ско́рби и печа́ли, со умиле́нием зову́щим ти́:

Ра́дуйся, святи́телю Иулиа́не, те́плый о на́с моли́твенниче и пресла́вный чудотво́рче.

Моли́тва.

О пречестна́я и свяще́нная главо́ и благода́ти Свята́го Ду́ха испо́лненная, Спа́сово со Отце́м обита́лище, вели́кий архиере́е, те́плый на́ш засту́пниче, святи́телю Иулиа́не! Предстоя́ у Престо́ла все́х Царя́ и наслажда́яся све́та единосу́щныя Тро́ицы и херуви́мски со А́нгелы возглаша́я пе́снь Трисвяту́ю, вели́кое же и неизсле́дованное дерзнове́ние име́я ко Всеми́лостивому Влады́це, моли́ спасти́ся па́ствы Христо́вы лю́дем, благостоя́ние святы́х Церкве́й утверди́, архиере́и благоле́пием святи́тельства украси́, мона́шествующия к подвиго́м до́браго тече́ния укрепи́, вся́ гра́ды и страны́ до́бре сохрани́, и ве́ру святу́ю непоро́чну соблюсти́ умоли́, ми́р ве́сь предста́тельством твои́м умири́, от гла́да и па́губы изба́ви ны́, и от нападе́ния иноплеме́нных сохрани́, ста́рыя уте́ши, ю́ныя наста́ви, безу́мныя умудри́, вдови́цы поми́луй, сироты́ заступи́, младе́нцы возрасти́, пле́нныя возврати́, немощству́ющия и моля́щияся тебе́ от все́х напа́стей и бе́д хода́тайством твои́м свободи́. Моли́ о на́с Всеще́драго и Человеколюби́ваго Христа́ Бо́га на́шего, да в де́нь Стра́шнаго прише́ствия Своего́ от шу́ияго стоя́ния изба́вит на́с, и ра́дости ве́чныя прича́стники сотвори́т со все́ми святы́ми во ве́ки веко́в. Ами́нь.