Конда́к 1.

Избра́нный уго́дниче Бо́жий и чудотво́рче, пресве́тлый Фара́нския пу́стыни свети́льниче, велича́я просла́вльшаго тя́ Го́спода, благода́рственное пе́ние прино́сим ти́, чту́ще святу́ю па́мять твою́. Ты́ же, я́ко име́яй ве́лие дерзнове́ние ко Святе́й Тро́ице, от вся́ких на́с бе́д свободи́, зову́щих:

Ра́дуйся, преподо́бне о́тче Харито́не, мона́шествующих похвало́ и утвержде́ние.

И́кос 1.

А́нгел во пло́ти яви́лся еси́, преподо́бне Харито́не, да яви́ши собо́ю о́браз и́стиннаго благоче́стия и до́брых де́л. Мы́ же, чудя́щеся неизсле́димым путе́м Госпо́дним, на тебе́ явле́нным, и прославля́я ве́лие благоутро́бие Бо́жие, во умиле́нии серде́чнем воспева́ем ти́:

Ра́дуйся, Го́сподеви порабо́тати пла́менне вожделе́вый; ра́дуйся, Его́ еди́наго па́че всего́ возлюби́вый.

Ра́дуйся, благо́е и́го Христо́во на ра́мена своя́ взе́мый; ра́дуйся, се́мя сло́ва Бо́жия в се́рдце свое́м все́явый.

Ра́дуйся, ве́ры Правосла́вныя и благоче́стия ревни́телю; ра́дуйся, моли́твы, поста́ и воздержа́ния храни́телю.

Ра́дуйся, преподо́бне о́тче Харито́не, мона́шествующих похвало́ и утвержде́ние.

Конда́к 2.

Ви́дя Го́спода пред собо́ю вы́ну и на ми́лость Его́ упова́я, во благоче́стии преуспе́л еси́, о́тче Харито́не, доброде́тельми христиа́нскими ду́шу свою́ обогаща́я и и́стинным испове́дником и́мени Христо́ва себе́ явля́я, непреста́нно вопия́: Аллилу́иа.

И́кос 2

Ра́зумом и́стиннаго богопозна́ния свы́ше руководи́мый, о́тче преподо́бне, положи́л еси́ в се́рдце твое́м за Христо́м неукло́нно сле́довати и во все́м исполня́ти во́лю Его́. Те́мже, усе́рдие твое́ похваля́юще, взыва́ем си́це:

Ра́дуйся, пло́ти мудрова́ние умертви́вый; ра́дуйся, терпе́нием твои́м зло́бу ми́ра сего́ победи́вый.

Ра́дуйся, во́ине Христо́в добропобе́дный; ра́дуйся, Небе́снаго Влады́ки ра́бе благи́й и ве́рный.

Ра́дуйся, я́ко в ра́дость Го́спода твоего́ вше́л еси́; ра́дуйся, я́ко со святы́ми му́чениками и преподо́бными водвори́лся еси́.

Ра́дуйся, преподо́бне о́тче Харито́не, мона́шествующих похвало́ и утвержде́ние.

Конда́к 3.

Си́ла Боже́ственныя любве́, е́юже от ю́ности испо́лнено бы́сть се́рдце твое́, богому́дре Харито́не, та́ко укрепи́ тя́ во благоче́стии, я́ко ве́ру и́стинную пред все́ми испове́дуя и муче́ния жесто́кая претерпева́я, николи́же вспя́ть обрати́лся еси́, ра́достно воспева́я Бо́гу: Аллилу́иа.

И́кос 3.

Име́я в се́рдце свое́м тве́рдую ве́ру во Христа́ Бо́га, не убоя́лся еси́, свя́те Харито́не, гне́ва нечести́ваго Аврелиа́на, оба́че, презре́в сла́ву ми́ра сего́, испове́дал еси́ себе́ христиа́нина бы́ти; сего́ ра́ди от него́ бие́ния претерпе́в, я́ко злоде́й, в темни́цу всажде́н бы́л еси́. Таково́му твоему́ дерзнове́нию и му́жеству дивя́щеся, глаго́лем ти́ си́це:

Ра́дуйся, испове́дниче Христо́в неустраши́мый; ра́дуйся, сто́лпе правове́рия несокруши́мый.

Ра́дуйся, за и́мя Христо́во неща́дно бие́нный; ра́дуйся, за Го́спода твоего́ в темни́це заключе́нный.

Ра́дуйся, Его́ ра́ди му́ки жесточа́йшия претерпе́вый; ра́дуйся, вене́ц побе́дный от Него́ прия́вый.

Ра́дуйся, преподо́бне о́тче Харито́не, мона́шествующих похвало́ и утвержде́ние.

Конда́к 4.

Бу́ря страда́ний лю́тых не поколеба́ тя́, о́тче Харито́не, егда́ иге́мон но́выя преще́ния на тя́ воздви́же; ты́ же, на ка́мени ве́ры Христо́вы тве́рдо стоя́, со дерзнове́нием глаго́лал еси́: «А́з во И́стиннаго Бо́га ве́рую и Ему́ то́кмо служу́ и покланя́юся, я́ко То́й е́сть Созда́тель всего́, Спа́с ми́ра, пребыва́ющий во ве́ки, Ему́же А́нгели на Небеси́ вопию́т: Аллилу́иа».

И́кос 4.

Слы́шаще тве́рдое испове́дание твое́, страстоте́рпче Христо́в, и ви́дяще ра́н твои́х исцеле́ние, яря́шеся мучи́тель и предаде́ тя́ на жесточа́йшия му́ки, повелева́я те́ло твое́ свеща́ми опаля́ти; ты́ же тве́рд я́ко адама́нт пребыва́я, Го́спода, во страда́ниях тя́ укрепля́ющаго, славосло́вил еси́. Сие́ твое́ пачеесте́ственное терпе́ние благогове́йно воспомина́юще, взыва́ем си́це:

Ра́дуйся, Го́сподем чуде́сно от ра́н исцеле́нный; ра́дуйся, к ли́ку святы́х испове́дников сопричте́нный.

Ра́дуйся, Христо́вых страсте́й и́стинный прича́стниче; ра́дуйся, Пресвяты́я Тро́ицы пла́менный испове́дниче.

Ра́дуйся, благода́тию Тоя́ я́ко броне́ю защище́нный; ра́дуйся, огне́м страда́ний я́ко зла́то очище́нный.

Ра́дуйся, преподо́бне о́тче Харито́не, мона́шествующих похвало́ и утвержде́ние.

Конда́к 5.

Боготе́чною стезе́ю к ти́хому приста́нищу спасе́ния устреми́вся, преподо́бне, егда́ из темни́чнаго заключе́ния изведе́н бы́л еси́ и стопы́ твоя́ во Святы́й Гра́д Иерусали́м напра́вил еси́, воспева́я Пострада́вшему за ро́д челове́ческий: Аллилу́иа.

И́кос 5.

Ви́деша тя́ разбо́йницы лю́тии, о́тче Харито́не, во Святы́й Гра́д пу́ть соверша́юща, умы́слиша сме́рти преда́ти тя́: сего́ ра́ди, связа́вше тя́, в пеще́ре затвори́ша, но по ма́ле вре́мени са́ми от я́да змии́на погибо́ша. Ты́ же, Го́споду за чу́дное спасе́ние твое́ хвалу́ возда́в, пеще́ру разбо́йничу в хра́м Бо́жий претвори́л еси́ и с бра́тиею, прише́дшею всле́д тебе́, Созда́теля вся́ческих в не́м славосло́вил еси́. Сего́ ра́ди воспева́ем ти́:

Ра́дуйся, себе́ и ве́сь живо́т тво́й Го́сподеви преда́вый; ра́дуйся, все́ упова́ние свое́ на Бо́га полага́вый.

Ра́дуйся, поко́рным себе́ во́ле Бо́жией сотвори́вый; ра́дуйся, го́рнее любому́дрие возлюби́вый.

Ра́дуйся, я́ко вся́ любе́зная и кра́сная ми́ра сего́ презре́л еси́; ра́дуйся, я́ко небе́сных и нетле́нных жела́нием вожделе́л еси́.

Ра́дуйся, преподо́бне о́тче Харито́не, мона́шествующих похвало́ и утвержде́ние.

Конда́к 6.

Пропове́дником нищелю́бия яви́лся еси́, о́тче преподо́бне, егда́ все́ бога́тство, его́же разбо́йницы непра́ведно стяжа́ша, на по́льзу о́бщую обрати́л еси́, ни́щия и а́лчущия пита́я и оби́тель и́ноческую в пу́стыни Фара́нстей созида́я. Те́мже помина́юще по́двиги и труды́ твоя́, во сла́ву Бо́га Вы́шняго подъя́тыя, воспева́ем Ему́: Аллилу́иа.

И́кос 6.

Возсия́л еси́ я́ко со́лнце пресве́тлое в пу́стыни Фара́нстей, о́тче Харито́не, и сия́нием по́двигов твои́х привле́кл еси́ во оби́тель твою́ мно́ги ревни́тели богоугожде́ния и́стиннаго, и́же стека́хуся к тебе́ отвсю́ду, да руково́дствуеши и́х ко спасе́нию. Те́мже у́бо и мы́, тобо́ю наставля́еми, ублажа́ем тя́ и зове́м:

Ра́дуйся, а́вво богому́дрый, и́ноков мно́жество собра́вый; ра́дуйся, послуша́ние бра́тии твое́й законоположи́вый.

Ра́дуйся, селе́ние Ду́ха Свята́го в себе́ показа́вый; ра́дуйся, по́ст и воздержа́ние я́ко сладча́йшую сне́дь возлюби́вый.

Ра́дуйся, милосе́рдие и братолю́бие чу́дное яви́вый; ра́дуйся, приме́ром богоуго́днаго жития́ твоего́ все́х поуча́вый.

Ра́дуйся, преподо́бне о́тче Харито́не, мона́шествующих похвало́ и утвержде́ние.

Конда́к 7.

Хоте́ние име́л еси́, преподо́бне, в безмо́лвии пребыва́ти: сего́ ра́ди удали́лся еси́ в ме́сто безлю́дное, иде́же в по́двизех пустынножи́тельства до́бре подвиза́лся еси́. Оба́че, содержа́ во уме́ сло́во Госпо́дне: «Гряду́щаго ко Мне́ не изжену́ во́н», никого́же отри́нул еси́ от приходя́щих к тебе́, но все́х оте́чески наставля́л еси́, за вся́ благодаря́ Христа́ и воспева́я Ему́: Аллилу́иа.

И́кос 7.

Но́ваго тя́ наста́вника и́ночествующих разуме́ем, о́тче Харито́не: мно́зи бо прихожда́ху к тебе́, благослове́ния ра́ди и доброде́тельнаго жития́; ты́ же все́х с любо́вию приима́л еси́, поуча́я от Боже́ственнаго Писа́ния, е́же твори́ти за́поведи Госпо́дни, храни́ти чистоту́ теле́сную и име́ти любо́вь нелицеме́рную дру́г ко дру́гу. Те́мже благода́рственно вопие́м ти́:

Ра́дуйся, в зако́не Госпо́дни непоро́чно ходи́вый; ра́дуйся, в трезве́нии у́мнем все́ житие́ твое́ проводи́вый.

Ра́дуйся, стра́хом Госпо́дним вся́ пути́ своя́ огражда́вый; ра́дуйся, ученики́ твоя́ неле́ностно во благоче́стии назида́вый.

Ра́дуйся, Христо́вы слове́сныя о́вцы ко спасе́нию подвиза́яй; ра́дуйся, неради́выя от сна́ грехо́внаго возбужда́яй.

Ра́дуйся, преподо́бне о́тче Харито́не, мона́шествующих похвало́ и утвержде́ние.

Конда́к 8.

Стра́нника и прише́льца в ми́ре се́м помышля́я себе́ бы́ти, преподо́бне, о часе́ сме́ртнем непреста́нно па́мятовал еси́; те́мже оби́тели Иерихо́нскую и Сукки́йскую хотя́щим спасти́ся устро́ив, в пеще́ру, безмо́лвия ра́ди, всели́лся еси́, иде́же дни́ и но́щи в моли́тве и по́двизех пребыва́я, воспева́л еси́ Сладча́йшему Иису́су: Аллилу́иа.

И́кос 8.

Ве́сь в Бо́зе бы́в, о́тче Харито́не, о Бо́зе и благоугожде́нии Ему́ со ученики́ твои́ми бесе́довал еси́, со слеза́ми умоля́я и́х вся́ за́поведи Христо́вы ве́рно храни́ти. Те́мже, я́ко возше́дый на высоту́ соверше́нства духо́внаго, наставля́й и на́с по пути́ спасе́ния, да и мы́ тебе́ пое́м:

Ра́дуйся, узо́к пу́ть в Ца́рствие Небе́сное избра́вый; ра́дуйся, пусты́нничества по́двиг во́лею подъя́вый.

Ра́дуйся, Христа́ Бо́га в се́рдце твое́м вмести́вый; ра́дуйся, и́мя Его́ спаси́тельное во уме́ свое́м носи́вый.

Ра́дуйся, моли́твенную сла́дость се́рдцем твои́м позна́вый; ра́дуйся, сле́з благода́тных пото́к умили́тельный источа́вый.

Ра́дуйся, преподо́бне о́тче Харито́не, мона́шествующих похвало́ и утвержде́ние.

Конда́к 9.

Вся́кое естество́ А́нгельское удиви́ся вели́кому свы́ше тебе́ дарова́нию, богоблаже́нне Харито́не, ты́ бо на земли́ невеще́ственное житие́ показа́л еси́, и во пло́ти, а́ки безпло́тен, яви́лся еси́ и да́р чудотворе́ния от Го́спода прия́л еси́. Ны́не же, Того́ бла́гостию к Небе́сным причте́н еси́ Си́лам, в Небесе́х пое́ши Всеси́льному Бо́гу: Аллилу́иа.

И́кос 9.

Вити́и многовеща́ннии не довле́ют изглаго́лати вся́ по́двиги и страда́ния твоя́, о́тче Харито́не, и́бо добро́та жития́ твоего́ вои́стину превосхо́дит похвалу́ челове́ческую. Оба́че мы́, любо́вию к тебе́ побежда́еми, дерза́ем смиренному́дренно благохвали́ти тя́ пе́нием таковы́м:

Ра́дуйся, я́ко Святе́й Тро́ице ны́не ра́достно предстои́ши; ра́дуйся, я́ко о спасе́нии на́шем Бо́га умоля́еши.

Ра́дуйся, христиа́нскому ро́ду при́сное утеше́ние; ра́дуйся, лю́бящим и чту́щим тя́ хода́таю спасе́ния.

Ра́дуйся, приводя́й гре́шных ко исправле́нию; ра́дуйся, те́плый о все́м ми́ре предста́телю.

Ра́дуйся, преподо́бне о́тче Харито́не, мона́шествующих похвало́ и утвержде́ние.

Конда́к 10.

Спасе́ния по́двиг до́бре соверши́вши, жития́ же вре́меннаго отреша́яся и отходя́ к животу́ ве́чному и блаже́нному, Харито́не преподо́бне, утеша́л еси́ ученики́ твоя́, глаго́ля: «Пецы́теся о спасе́нии свое́м, я́ко да избе́гнув сете́й вра́жиих, сподо́битеся по кончи́не свое́й Го́спода усре́сти и ми́лость от Него́ получи́ти, воспева́я со избра́нными: Аллилу́иа».

И́кос 10.

Стено́ю моли́тв твои́х, уго́дниче Христо́в, огради́ на́с от вся́каго душевре́днаго искуше́ния диа́вольскаго, я́ко тебе́ дарова́ на́м Преблаги́й Бо́г в по́мощь и защи́ту душа́м и телесе́м на́шим. Тебе́ у́бо про́сим: помози́ на́м во вся́кой ско́рби и обстоя́нии, си́це тебе́ вопию́щим:

Ра́дуйся, я́ко свя́то и пра́ведно на земли́ пожи́л еси́; ра́дуйся, я́ко вои́стину а́нгел земны́й и челове́к небе́сный бы́л еси́.

Ра́дуйся, я́ко отверзо́шася тебе́ врата́ ра́йския; ра́дуйся, я́ко ду́шу твою́ Госпо́дь прия́т в Небе́сныя оби́тели.

Ра́дуйся, дерзнове́ние моли́твенное ко Го́споду стяжа́вый; ра́дуйся, по кончи́не твое́й ча́д твои́х не оста́вивый.

Ра́дуйся, преподо́бне о́тче Харито́не, мона́шествующих похвало́ и утвержде́ние.

Конда́к 11.

Пе́ние всеумиле́нное приноша́ху тебе́ духо́вная ча́да твоя́ по чу́днем твое́м, о́тче, к Бо́гу отше́ствии, с пла́чем ве́лиим провожда́юще тя́ на ме́сто упокое́ния в пе́рвую оби́тель твою́: сле́зы мно́гия о разлуче́нии твое́м пролива́ху, со воздыха́нием вопию́ще псало́мскую пе́снь: Аллилу́иа.

И́кос 11.

Светоза́рная звезда́ яви́лся еси́, богоно́се Харито́не, не́бо церко́вное украша́ющая и мра́к де́монский дале́че отгоня́ющая; те́мже и на́ша сердца́, омраче́нная грехми́, просвети́ и к све́ту покая́ния возведи́, да зове́м ти́:

Ра́дуйся, свеще́, Боже́ственным огне́м пламене́ющая; ра́дуйся, денни́це, ве́рных ду́ши и сердца́ просвеща́ющая.

Ра́дуйся, благоче́стию прибега́ющих к тебе́ науча́яй; ра́дуйся, у́з грехо́вных моля́щихся тебе́ свобожда́яй.

Ра́дуйся, смиренному́дрия иску́сный наста́вниче; ра́дуйся, и́ноком в бра́ни духо́вней помо́щниче.

Ра́дуйся, преподо́бне о́тче Харито́не, мона́шествующих похвало́ и утвержде́ние.

Конда́к 12.

Благода́ть Пресвята́го Ду́ха испроси́ на́м, преподо́бне Харито́не, у Всеще́драго Бо́га, вразумля́ющую и укрепля́ющую ны́ во спасе́ние, да уклоня́ющеся от путе́й нече́стия и заблужде́ний, хо́дим во све́те за́поведей Бо́жиих, воспева́юще а́нгельскую пе́снь: Аллилу́иа.

И́кос 12.

Пою́ще сла́вное житие́ твое́, страда́ния и по́двиги, ублажа́ем тя́, о́тче Харито́не, я́ко уго́дника Бо́жия преподо́бнаго и испове́дника пресла́внаго. Ты́ же, Бо́гу предстоя́, при́сно помина́й на́с, любо́вию соверша́ющих па́мять твою́ и во смире́нии зову́щих ти́ такова́я:

Ра́дуйся, чту́щих тя́ наста́вниче благода́тный; ра́дуйся, притека́ющих к тебе́ покрови́телю благонаде́жный.

Ра́дуйся, я́ко воздвиза́емых от ми́ра, пло́ти и диа́вола искуше́ний хода́тайством твои́м на́с свобожда́еши; ра́дуйся, я́ко нераска́янных гре́шников к соверше́нному покая́нию побужда́еши.

Ра́дуйся, духо́в лука́вых прогони́телю и по́лчищ бесо́вских победи́телю; ра́дуйся, ра́н грехо́вных и неду́гов душе́вных всеблаги́й цели́телю.

Ра́дуйся, преподо́бне о́тче Харито́не, мона́шествующих похвало́ и утвержде́ние.

Конда́к 13.

О преподо́бне и богоно́сне о́тче Харито́не, приими́ сие́ ма́лое, от лю́бящих серде́ц приноси́мое тебе́ хвале́ние и, я́ко име́яй ве́лие дерзнове́ние ко Го́споду, моли́ся за ны́, да благоприя́тным твои́м хода́тайством изба́влени бу́дем от вся́каго искуше́ния проти́внаго и, богоуго́дне зде́ на земли́ пожи́вше, сподо́бимся вы́ну на Небеси́ воспева́ти со безпло́тными пе́снь Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгел во пло́ти яви́лся еси́, преподо́бне Харито́не, да яви́ши собо́ю о́браз и́стиннаго благоче́стия и до́брых де́л. Мы́ же, чудя́щеся неизсле́димым путе́м Госпо́дним, на тебе́ явле́нным, и прославля́я ве́лие благоутро́бие Бо́жие, во умиле́нии серде́чнем воспева́ем ти́:

Ра́дуйся, Го́сподеви порабо́тати пла́менне вожделе́вый; ра́дуйся, Его́ еди́наго па́че всего́ возлюби́вый.

Ра́дуйся, благо́е и́го Христо́во на ра́мена своя́ взе́мый; ра́дуйся, се́мя сло́ва Бо́жия в се́рдце свое́м все́явый.

Ра́дуйся, ве́ры Правосла́вныя и благоче́стия ревни́телю; ра́дуйся, моли́твы, поста́ и воздержа́ния храни́телю.

Ра́дуйся, преподо́бне о́тче Харито́не, мона́шествующих похвало́ и утвержде́ние.

Конда́к 1.

Избра́нный уго́дниче Бо́жий и чудотво́рче, пресве́тлый Фара́нския пу́стыни свети́льниче, велича́я просла́вльшаго тя́ Го́спода, благода́рственное пе́ние прино́сим ти́, чту́ще святу́ю па́мять твою́. Ты́ же, я́ко име́яй ве́лие дерзнове́ние ко Святе́й Тро́ице, от вся́ких на́с бе́д свободи́, зову́щих:

Ра́дуйся, преподо́бне о́тче Харито́не, мона́шествующих похвало́ и утвержде́ние.

Моли́тва.

О свяще́нная главо́, преподо́бне о́тче, преблаже́нне а́вво Харито́не! Не забу́ди убо́гих твои́х до конца́, но помина́й на́с всегда́ во святы́х твои́х и благоприя́тных моли́твах к Бо́гу. Помяни́ ста́до твое́, е́же са́м упа́сл еси́, и не забу́ди посеща́ти ча́д твои́х. Моли́ за ны́, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́, не премолчи́ за ны́ ко Го́споду, и не пре́зри на́с, недосто́йных, ве́рою и любо́вию чту́щих тя́. Помина́й на́с у Престо́ла Вседержи́телева, и не преста́й моля́ся о на́с ко Христу́ Бо́гу, и́бо дана́ тебе́ бы́сть благода́ть за ны́ моли́тися. Не мни́м бо тя́ су́ща ме́ртва, а́ще бо те́лом и преста́вился еси́ от на́с, но и по сме́рти жи́в сы́й пребыва́еши. Не отступа́й от на́с ду́хом, сохраня́я на́с от стре́л вра́жиих, и вся́кия пре́лести бесо́вския, и ко́зней диа́вольских, па́стырю на́ш до́брый. Ве́дуще у́бо тя́ вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о на́с Всеси́льному Бо́гу, о по́льзе ду́ш на́ших и испроси́ на́м вре́мя на покая́ние, да невозбра́нно пре́йдем от земли́ на не́бо, от мыта́рств же го́рьких, бесо́в, возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́, Ему́же подоба́ет вся́кая сла́ва, че́сть и поклоне́ние, со Безнача́льным Его́ Отце́м и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.