Конда́к 1.

Избра́нный чудотво́рче и преди́вный испове́дниче Христо́в, моли́твенниче о душа́х на́ших, святи́телю Стефа́не, ты́ же я́ко име́яй дерзнове́ние ко Го́споду, от вся́ких на́с бе́д и напа́стей свободи́ зову́щих:

Ра́дуйся, Стефа́не, испове́дниче Христо́в и чудотво́рче.

И́кос 1.

А́нгелов собесе́дниче и челове́ков наста́вниче ны́не, я́ко Бо́жий служи́телю, предстоя́ с вы́шними си́лами, святи́телю Стефа́не, мо́лиши о все́х на́с Христа́ Бо́га на́шего, сего́ ра́ди благода́рно во умиле́нии зове́м ти́:

Ра́дуйся, чистото́ю и святы́нею а́нгелом уподо́бивыйся; ра́дуйся, посто́м и бде́нием безстра́стия дости́гнувый.

Ра́дуйся, ве́рных непрело́жное утвержде́ние; ра́дуйся, неве́рных богому́дренное обличе́ние.

Ра́дуйся, апо́стольских преда́ний ве́рный храни́телю; ра́дуйся, непоколеби́мый правосла́вия сто́лпе.

Ра́дуйся, тве́рдое огражде́ние Христо́вой Це́ркви; ра́дуйся, де́лателю до́брый вертогра́да Госпо́дня.

Ра́дуйся, Стефа́не, испове́дниче Христо́в и чудотво́рче.

Конда́к 2.

Бу́рю мирска́го жития́ и тяжелоно́сных страсте́й во́лны проше́д, обре́л еси́ ти́хое приста́нище и в пусты́ню всели́вся, неле́ностно Христу́ порабо́тал еси́, во мно́зе долготерпе́нии, умерщвля́я по́хоти плотски́я Бо́га ра́ди и поя́ Ему́: Аллилу́иа.

И́кос 2.

Ра́зум свы́ше просвеще́нным и Ду́хом Святы́м озаре́нным неве́рных люде́й Су́рожских ве́рою Христо́вою просвети́л еси́, сего́ ра́ди вопие́м ти́:

Ра́дуйся, трудо́в апо́стольских ревни́телю; ра́дуйся, богосло́вия и́стиннаго прему́дрый учи́телю.

Ра́дуйся, друго́м твои́м спасе́ния жела́вый; ра́дуйся, во дво́р Христо́вы Це́ркве си́х призва́вый.

Ра́дуйся, я́ко небе́сными стезя́ми невозвра́тно ше́ствовал еси́; ра́дуйся, я́ко на высоту́ доброде́телей возше́л еси́.

Ра́дуйся, страны́ Су́рожския просвети́телю; ра́дуйся, христиа́н страны́ сия́ небе́сный покрови́телю.

Ра́дуйся, Стефа́не, испове́дниче Христо́в и чудотво́рче.

Конда́к 3.

Ви́дя в творе́ниих Бо́жиих, а́ки в зерца́ле, прему́дрость и сла́ву Творца́, к Нему́ ду́хом вы́ну возноси́лся еси́, богому́дре. Све́том Богоразу́мия твоего́ и на́с озари́, да вопие́м ку́пно с тобо́ю Бо́гу: Аллилу́иа.

И́кос 3.

Име́я в се́рдце свое́м о́гнь любве́ Боже́ственныя, спасе́ния ра́ди ду́ш челове́ческих па́стырски подвиза́лся еси́, богому́дре, проти́ву ко́знем диа́вольским и победи́тельным Креста́ ору́жием, я́ко паучи́ну лука́ваго се́ти разсека́л еси́. Те́мже приими́ от на́с пе́снь сию́:

Ра́дуйся, ра́бе Бо́жий, благи́й и ве́рный; ра́дуйся, учи́телю смире́ния и целому́дрия.

Ра́дуйся, о́бразе кро́тости и послуша́ния; ра́дуйся, наста́вниче де́л до́брых.

Ра́дуйся, огневи́дный сто́лпе, наставля́яй на пу́ть спасе́ния; ра́дуйся, свети́льниче светоза́рный, ве́рныя просвеща́яй.

Ра́дуйся, неисчерпа́емый сосу́де благода́ти Христо́вы; ра́дуйся, чи́стое прия́телище Ду́ха Свята́го.

Ра́дуйся, Стефа́не, испове́дниче Христо́в и чудотво́рче.

Конда́к 4.

Святы́й Ге́рман, на моли́тве стоя́, предызвеще́н бы́сть от А́нгела об избра́нии тя́ Бо́гом во святи́теля гра́да Су́рожа, ты́ же о́тче Стефа́не со смире́нием ту́юже ве́сть приня́л еси́, поя́ Бо́гу: Аллилу́иа.

И́кос 4.

Ви́девше в тебе́ Су́рожстии лю́дие святи́теля, я́ко А́нгела, зна́мение благода́ти небе́сныя нося́ща, возра́довашася ра́достию неизглаго́ланною: ты́ же до́бре внима́л себе́ и всему́ ста́ду, в не́м же тя́ Ду́х Святы́й поста́ви епи́скопа, усе́рдно па́сл еси́ Це́рковь Го́спода и Бо́га, я́ко сло́во возда́ти хотя́: сего́ ра́ди ублажа́ем тя́, о́тче Стефа́не, зову́ще:

Ра́дуйся, челове́че Бо́жий, преподо́бием а́ки по́ясом златы́м препоя́санный; ра́дуйся, дру́же Христо́в, святи́тельством, а́ки би́сером драги́м преукраше́нный.

Ра́дуйся, во́ине Христо́в, непобеди́мый; ра́дуйся, стра́же до́му Бо́жия неусы́пный.

Ра́дуйся, мзду́ трудо́в свои́х от Христа́ восприя́вый; ра́дуйся, я́ко воше́л еси́ в ра́дость Го́спода своего́.

Ра́дуйся, страны́ Таври́ческой све́тлое украше́ние; ра́дуйся, преди́вное осия́ние небе́сныя сла́вы.

Ра́дуйся, Стефа́не, испове́дниче Христо́в и чудотво́рче.

Конда́к 5.

Спасти́ся все́м хотя́ преблаги́й Госпо́дь яви́ тя́, святи́телю о́тче Стефа́не, о́браз жития́ пра́веднаго: кто́ бо не умили́тся, ви́дя твое́ безме́рное ко все́м благосе́рдие те́мже ве́лию к на́м ми́лость Бо́жию сла́вяща вопие́м: Аллилу́иа.

И́кос 5.

Стена́ была́ еси́ по́мощи и заступле́ния все́м безпомо́щным и напа́ствуемым, святи́телю Стефа́не, и милосе́рдия неистощи́мое сокро́вище. Сего́ ра́ди ди́внаго во святы́х свои́х Бо́га сла́вяще ублажа́ем тя́ си́це:

Ра́дуйся, архиере́ю, от Самого́ Го́спода прорече́нный; ра́дуйся, му́жу жела́ний, пасти́ ста́до Христо́во свы́ше избра́нный.

Ра́дуйся, пастыренача́льника Иису́са Христа́ благоволе́ние; ра́дуйся, многосве́тлый Це́ркве свети́льниче.

Ра́дуйся, апо́столов соприча́стниче; ра́дуйся, святи́телей вели́ких сопресто́льниче.

Ра́дуйся, чистоты́ серде́чныя сокро́вище; ра́дуйся, смире́ния Христо́ва зерца́ло.

Ра́дуйся, Стефа́не, испове́дниче Христо́в и чудотво́рче.

Конда́к 6.

Хотя́ Человеколю́бец Госпо́дь яви́ти в тебе́, святи́телю, неизрече́нное к лю́дем милосе́рдие, показа́ Тя́ я́ко вои́стину свети́ло Богосве́тлое, де́лы бо и словесы́ твои́ми все́х приводи́л еси́ ко благоче́стию. Те́мже сия́нием по́двигов твои́х просвеще́нии, тебе́ усе́рдно велича́ем и просла́вльшему Тя́ Христу́ вопие́м: Аллилу́иа.

И́кос 6.

Ви́дя себе́ поста́влена на степе́нь архиере́йства, святи́телю о́тче Стефа́не, не да́л еси́ очи́ма твои́ма сна́, ниже́ ве́ждома твои́ма дрема́ния, поставля́я па́стве твое́й па́стыри смы́слены и вся́ лю́ди управля́я ко спасе́нию. Мы́ же ве́дуще тя́ бы́ти пастыренача́льника богому́дренна и строи́теля до́му Бо́жия до́бра, взыва́ем к тебе́ си́це:

Ра́дуйся, кре́пкое корми́ло Христо́вы Це́ркви; ра́дуйся, ни́вы Госпо́дни усе́рдный жа́телю.

Ра́дуйся, ве́рных кре́пкое утвержде́ние; ра́дуйся, неве́рных богому́дренное обличе́ние.

Ра́дуйся, ве́рный та́йн святы́х строи́телю; ра́дуйся, я́ко па́стырем твои́м благовре́менное и безвре́менное пропове́дати запове́дал еси́.

Ра́дуйся, безстра́стия сосу́де чи́стый; ра́дуйся, измла́да Христа́ возлюби́вый.

Ра́дуйся, Стефа́не, испове́дниче Христо́в и чудотво́рче.

Конда́к 7.

Боготе́чная звезда́ яви́лся еси́ в стране́ на́шей, наставля́я все́х на пу́ть спасе́ния: призыва́ющих бо тя́ вско́ре предваря́еши и от вся́ких бе́д и напа́стей избавля́еши, ве́рныя же науча́еши спаса́ющему тобо́ю Бо́гу взыва́ти: Аллилу́иа.

И́кос 7.

Боже́ственным Ду́хом просвеще́н, пропове́дал еси́ со дерзнове́нием правосла́вия преда́ние, всеблаже́нне Стефа́не, и мучи́теля своего́ беззако́нна посрами́л еси́, в заточе́ние непра́ведно посыла́ем. Мы́ же ве́дуще такова́я, вопие́м тебе́ си́це:

Ра́дуйся, за Христа́ пострада́вый и му́чимый; ра́дуйся, тве́рдо Его́ испове́давый.

Ра́дуйся, все́х научи́вый непосра́мленно покланя́тися честны́м ико́нам; ра́дуйся, предста́телю пред Престо́лом Бо́жиим, за на́с гре́шных.

Ра́дуйся, весе́лие земли́ Су́рожския; ра́дуйся, царя́ нечести́ваго обличи́телю.

Ра́дуйся, правосла́вия ревни́телю; ра́дуйся, нечести́вых ересе́й обличи́телю.

Ра́дуйся, Стефа́не, испове́дниче Христо́в и чудотво́рче.

Конда́к 8.

О́тче отце́в, богоно́сный Стефа́не, Су́рожу утвержде́ние, рабы́ твоя́ соблюди́ от вся́каго прегреше́ния, ви́димых же вра́г и неви́димых, воспева́ющих Бо́гу: Аллилу́иа.

И́кос 8.

Твоего́ чи́стаго и непоро́чнаго жития́, вели́кий чудотво́рче, челове́ческий язы́к восхвали́ти и воспе́ти, преподо́бие твое́ Стефа́не, не возмо́жет; во все́х бо по́двизех до́бльственне подвиза́лся еси́, нечести́ваго царя́ обличи́л еси́, че́сти же ико́ны научи́л еси́ и отце́в догма́ты, всему́дре, испове́дал еси́, сего́ ра́ди ублажа́ем тя́ си́це:

Ра́дуйся, А́нгелов сожи́телю; ра́дуйся, апо́столов удобре́ние.

Ра́дуйся, и́ноков украше́ние; ра́дуйся, святи́телей сла́во.

Ра́дуйся, му́чеников похвало́; ра́дуйся, свяще́нная главо́, от пеле́н очи́стивый ду́хом.

Ра́дуйся, я́ко звезда́ све́тлая возсия́вый; ра́дуйся, от среды́ тьмы́ мно́гия изведы́й.

Ра́дуйся, Стефа́не, испове́дниче Христо́в и чудотво́рче.

Конда́к 9.

Ты́ Су́рожу бы́в просвети́тель и живу́щих в не́м засту́пник, обурева́емых же в напа́стех су́щих, ти́хое приста́нище, вра́ч страсте́й душе́вных же вку́пе и теле́сных, отню́дуже вся́ ча́да твоя́ при́сно взыва́ют Бо́гу: Аллилу́иа.

И́кос 9.

Вети́и многовеща́нныя не возмо́гут по достоя́нию изрещи́ твои́х благодея́ний мно́жества, святи́телю о́тче Стефа́не, щедрода́тельная бо десни́ца твоя́ всю́ду досяза́ше. Мы́ же благосе́рдию твоему́ дивя́щеся, со умиле́нием взыва́ем ти́:

Ра́дуйся, лучу́ любве́ Бо́жия пресве́тлая; ра́дуйся, сокро́вище милосе́рдия Спа́сова неистощи́мое.

Ра́дуйся, бли́жния своя́ па́че себе́ возлюби́вый; ра́дуйся, в ме́ньших бра́тиях твои́х самого́ Христа́ ви́девый.

Ра́дуйся, си́рых пита́телю и призре́ние; ра́дуйся, скорбя́щих утеше́ние.

Ра́дуйся, страда́льцев укрепле́ние; ра́дуйся, оби́димых засту́пниче.

Ра́дуйся, Стефа́не, испове́дниче Христо́в и чудотво́рче.

Конда́к 10.

Бу́рю злы́х напа́стей утиша́я, проше́л еси́ ве́сь пу́ть те́сный и ско́рбный и́ноческаго жития́, неся́ яре́м пусты́ннаго по́двига, всено́щнаго бде́ния, моли́твы, те́ла умерщвле́ния и святи́тельскаго служе́ния. И та́ко благода́тию Бо́жиею от си́лы в си́лу восходя́ и от де́яния к Богове́дению, во оби́тели го́рния пресели́лся еси́. Иде́же со а́нгелы вы́ну воспева́еши Бо́гу: Аллилу́иа.

И́кос 10.

Кто́ не блажи́т тебе́, преблаже́нне Стефа́не, слы́ша сла́вное житие́ твое́, ты́ бо еси́ жи́в е́сть душе́ю, мы́ же си́це тебе́ воспева́ем:

Ра́дуйся, вели́кий Бо́гу уго́дниче; ра́дуйся, я́ко во вре́менней жи́зни се́й любве́ ра́ди ко Го́споду вы́ну во спасе́нии души́ твоея́ подвиза́лся еси́.

Ра́дуйся, я́ко его́ по́мощию, оста́вль тле́нная, нетле́нная стяжа́л еси́; ра́дуйся, я́ко благода́тию Бо́жиею сподо́бился еси́ стоя́ти у Престо́ла Влады́чня.

Ра́дуйся, я́ко та́ко сподо́бился еси́ прича́стником бы́ти ве́чной сла́вы; ра́дуйся, та́ко получи́вый благода́ть хода́тайствовати о на́с.

Ра́дуйся, ско́рый помо́щниче призыва́ющих тя́; ра́дуйся, правосла́вному ца́рству на́шему защи́тителю.

Ра́дуйся, Стефа́не, испове́дниче Христо́в и чудотво́рче.

Конда́к 11.

Благода́ть чуде́с многообра́зных, всели́вся в небеси́, приня́л еси́ от Го́спода, преблаже́нне Стефа́не, сего́ ра́ди подае́ши исцеле́ния все́м, притека́ющим к тебе́ с ве́рою. Мы́ же си́ле чуде́с твои́х чудя́щеся, вопие́м Бо́гу: Аллилу́иа.

И́кос 11.

Зна́мений чудесы́ тебе́ Госпо́дь просла́ви, преблаже́нне Стефа́не, прого́ниши бо ду́хи и врачу́еши стра́сти, ду́ши же просвеща́еши ве́рных, си́це тебе́ вопию́щих:

Ра́дуйся, по труде́х стра́нствия земна́го в небе́сных селе́ниих сла́дце почи́вый; ра́дуйся, я́ко сме́рть прия́вый, тле́ния же не позна́вый.

Ра́дуйся, со Христо́м, Его́ же возлюби́л еси́; ра́дуйся, со Христо́м, на ве́ки совокупи́выйся.

Ра́дуйся, Ца́рствия Небе́снаго и сла́вы ве́чныя насле́дниче; ра́дуйся, си́льным ми́ра сего́ небоя́зненный суда́ Бо́жия провозве́стниче.

Ра́дуйся, я́ко за и́стину претерпе́л еси́ ско́рби; ра́дуйся, я́ко стяжа́л еси́ изгна́нных пра́вды ра́ди.

Ра́дуйся, Стефа́не, испове́дниче Христо́в и чудотво́рче.

Конда́к 12.

Благода́ть свы́ше Ти́ да́нную позна́вше, благогове́йно лобыза́ем светоле́пное всечестна́го лица́ твоего́ изображе́ние и благода́рственно вопие́м Христу́ Бо́гу на́шему: Аллилу́иа.

И́кос 12.

Ве́сь еси́ в вы́шних, но и ни́жних не оставля́еши, святи́телю о́тче Стефа́не, при́сно со Христо́м ца́рствуеши и о на́с гре́шных моли́твы к нему́ возсыла́еши. Те́мже во умиле́нии зове́м ти́:

Ра́дуйся, прибе́жище на́ше в ско́рбех; ра́дуйся, ско́рый помо́щниче в беда́х су́щих.

Ра́дуйся, на неви́димыя враги́ на́ш побо́рниче; ра́дуйся, посети́телю в не́мощех лежа́щих.

Ра́дуйся, я́ко Христу́ до́блественно после́довал еси́; ра́дуйся, я́ко сладча́йшему Иису́су до конца́ послужи́л еси́.

Ра́дуйся, я́ко наслажда́ешися лицезре́ния Бо́жия; ра́дуйся, я́ко сподо́бился еси́ зре́ти невече́рний де́нь Ца́рствия Христо́ва.

Ра́дуйся, Стефа́не, испове́дниче Христо́в и чудотво́рче.

Конда́к 13.

О, вели́кий и пресла́вный чудотво́рче, святи́телю о́тче Стефа́не, приими́ сие́ похва́льное пе́ние от на́с недосто́йных во умиле́нии Тебе́ приноси́мое и твои́м те́плым предста́тельством у Престо́ла Царя́ сла́вы испроси́ на́м в ве́ре и до́брых дела́х утвержде́ние, в жи́зни се́й от все́х бе́д и напа́стей избавле́ние, в сме́ртном же успе́нии на́шем благу́ю наде́жду спасе́ния, да сподо́бимся в ра́дости ве́чней воспева́ти ди́вному во Святы́х свои́х Бо́гу: Аллилу́иа,

Этот конда́к читается трижды, затем и́кос 1-й и конда́к 1-й.

И́кос 1.

А́нгелов собесе́дниче и челове́ков наста́вниче ны́не, я́ко Бо́жий служи́телю, предстоя́ с вы́шними си́лами, святи́телю Стефа́не, мо́лиши о все́х на́с Христа́ Бо́га на́шего, сего́ ра́ди благода́рно во умиле́нии зове́м ти́:

Ра́дуйся, чистото́ю и святы́нею а́нгелом уподо́бивыйся; ра́дуйся, посто́м и бде́нием безстра́стия дости́гнувый.

Ра́дуйся, ве́рных непрело́жное утвержде́ние; ра́дуйся, неве́рных богому́дренное обличе́ние.

Ра́дуйся, апо́стольских преда́ний ве́рный храни́телю; ра́дуйся, непоколеби́мый правосла́вия сто́лпе.

Ра́дуйся, тве́рдое огражде́ние Христо́вой Це́ркви; ра́дуйся, де́лателю до́брый вертогра́да Госпо́дня.

Ра́дуйся, Стефа́не, испове́дниче Христо́в и чудотво́рче.

Конда́к 1.

Избра́нный чудотво́рче и преди́вный испове́дниче Христо́в, моли́твенниче о душа́х на́ших, святи́телю Стефа́не, ты́ же я́ко име́яй дерзнове́ние ко Го́споду, от вся́ких на́с бе́д и напа́стей свободи́ зову́щих:

Ра́дуйся, Стефа́не, испове́дниче Христо́в и чудотво́рче.

Моли́тва.

О, свяще́нная главо́, кре́пкий на́ш моли́твенниче и засту́пниче, святи́телю о́тче на́ш Стефа́не, услы́ши на́с с ве́рою и любо́вию призыва́ющих тя́. Помина́й на́с у Престо́ла Вседержи́телева и не преста́й моли́тися о на́с. Испроси́ предста́тельством твои́м у Всеми́лостивейшаго Спа́са на́шего ми́р Це́ркви, его́ па́стырем, Бо́жию ре́вность и си́лу, правосла́вной стране́ на́шей ми́р и спасе́ние. Умоли́ Небе́снаго Отца́ на́шего все́м пода́ти коему́ждо благопотре́бен да́р: ве́ру и́стинную, наде́жду тве́рдую, любо́вь неоску́дную, градо́в на́ших утвержде́ние, ми́ра умире́ние, от гла́да и губи́тельства избавле́ние, от наше́ствия иноплеме́нник сохране́ние, ю́ным благо́е в ве́ре возраста́ние, ста́рым и немощны́м утеше́ние и укрепле́ние, боля́щим исцеле́ние, си́рым и вдови́цам ми́лость и заступле́ние, бе́дствующим по́мощь. Не посрами́ на́с во упова́нии на́шем, споспе́шствуй, я́ко оте́ц чадолюби́вый, и на́м понести́ благо́е и́го Христо́во во благоду́шии и терпе́нии и все́х на́с упра́ви в ми́ре и покая́нии непосты́дно живо́т сво́й оконча́ти и Ца́рствия Бо́жия насле́дницы бы́ти, иде́же ты́ ны́не водворя́ешися со А́нгелы и все́ми Святы́ми, вы́ну хваля́ Бо́га, в Тро́ице сла́вимаго, Отца́ и Сы́на и Свята́го Ду́ха. Ами́нь.