Конда́к 1.

Богоно́сный архиере́ю Це́ркве Се́рбския, святы́й чудотво́рче о́тче Васи́лие, от гре́шных и недосто́йных ду́ш на́ших похва́льную пе́снь тебе́ принося́ще, и ка́яся во гресе́х на́ших, мо́лим тя́: пребу́ди и да́лее, я́ко бы́х пре́жде, храни́телю милосе́рдый земли́ на́шея, и спаси́ на́с от вся́кия беды́ и напа́сти да велича́ем тя́ во ве́ки:

Ра́дуйся, святы́й Васи́лие, похвало́ ро́да на́шего.

И́кос 1.

А́нгел во пло́ти между́ людьми́ яви́ся, Васи́лие чудотво́рче. Чуде́сною си́лою Ду́ха Свята́го связа́л еси́ вся́ искуше́ния. Сего́ ра́ди пое́м ти́ такова́я:

Ра́дуйся, о́тче отце́в преподо́бных, мно́гия ве́ре пра́выя научи́вый; ра́дуйся, неуста́нный служи́телю Ева́нгелия, поуче́нием и де́лы своя́ от зла́ на́с спаса́вый.

Ра́дуйся, Правосла́вия храни́телю и учи́телю; ра́дуйся, в ско́рбех ве́ка сего́ уте́шителю.

Ра́дуйся, вся́кой боле́зни цели́телю; ра́дуйся, па́стырю о́вцы заблу́ждшия и усе́рдный и́х к Бо́гу возврати́телю.

Ра́дуйся, ду́ш а́лчущих пита́телю; ра́дуйся, умо́в помраче́нных просвети́телю.

Ра́дуйся, святы́й Васи́лие, похвало́ ро́да на́шего.

Конда́к 2.

Ви́дех Госпо́дь вели́кое благоче́стие твое́ от ю́ности твоея́ и любо́вь чи́сту к Це́ркви. Сего́ ра́ди украси́ тя ле́потою духо́вною и да́р чудотворе́ния ти́ дарова́, да мо́жеши исцеля́ти и спаса́ти ду́ши челове́ческия от вся́кия неду́ги душе́вныя же и теле́сныя. Я́ко свечу́ негаси́мую посвяти́ тя Христо́с на служе́ние архиере́йское в дни́ тя́жкие ро́да Се́рбскаго, да сохрани́ши и ны́не вся́каго стра́ждущаго и ка́ющагося и с тобо́ю вопию́щаго Бо́гу: Аллилу́иа.

И́кос 2.

Ра́зум челове́ческий позна́ша, о́тче богому́дре, я́ко во тьму́ сомне́ний и неве́дения погруже́н, одаре́н же пребога́то Ду́хом Святы́м, вся́каго по́двигом свои́м ве́ре Правосла́вной научи́ши. Сего́ ра́ди восхваля́ем тя́, о́тче преблаже́нне:

Ра́дуйся, богому́дре, я́ко неразу́мныя умудри́л еси́; ра́дуйся, наста́вниче, я́ко су́щих во тьме́ неве́рия просвети́л еси́.

Ра́дуйся, трубо́ богогла́сная, ра́дость ве́лию явля́ющая; ра́дуйся, ликова́ние исцеле́нным да́рующий.

Радуйся, лука́вых духо́в укроти́вый; ра́дуйся, на Не́бе и на земли́ просла́вленный.

Ра́дуйся, святы́й Васи́лие, похвало́ ро́да на́шего.

Конда́к 3.

Си́ла Вы́шняго просла́ви тя́ в ке́ллии оби́тели Остро́жской я́ко ма́слину многопло́дную, и́же точи́ся ми́лостию чудотворе́ния наро́ду Се́рбскому и все́м взыва́ющим к тебе́, моля́щимся и сла́вящим и́мя Госпо́дне: Аллилу́иа.

И́кос 3.

Си́лу святу́ю испове́дника Христо́ва и́маши, терпе́нием и любо́вию вся́ де́монския муче́ния и зло́бу победи́ши. Сего́ ра́ди венце́м от слезы́ и моли́твы на́шея велича́ем тя́, о́тче милосе́рдый:

Ра́дуйся, уго́дниче Бо́жий, сла́вою Небе́сною увенча́нный; ра́дуйся, служи́телю ве́рный Пресвяты́я Тро́ицы, за ве́рность свою́ награ́ду Небе́сную прия́вший.

Ра́дуйся, Це́ркве многострада́льный обнови́телю, и в себе́ само́м хра́м Творцу́ сооруди́вый; ра́дуйся, пустынножи́телю прекра́сный, я́ко по́двигами твои́ми пусты́ня Остро́жская я́ко лили́я неувяда́ема и благоуха́нна процвето́ша.

Ра́дуйся, си́лы нечи́стыя победи́телю, смиренному́дрием наси́лие Ага́рянское посрами́ша; ра́дуйся, и́мя ца́рское в свое́м и́мени нося́ше, и ми́лость и сла́ву у Царя́ Небе́снаго в труде́ и бде́нии стяжа́ша.

Ра́дуйся, слеза́ми страда́ния своего́ слепоту́ на́шу грехо́вную омыва́еши; ра́дуйся, та́йн Небе́сных богови́дче, по́мощь и утеше́ние на́м подава́юще.

Ра́дуйся, святы́й Васи́лие, похвало́ ро́да на́шего.

Конда́к 4.

Бу́рю посяга́тельств безбо́жных усмири́л еси́, егда́ хотя́ше врази́ Бо́жии Захо́лмие от ве́ры Правосла́вныя отвести́, и научи́ши наро́д сво́й да не бои́тся сме́рти, но греха́, да посто́м и доброде́тельми поживе́ и моли́твою с тобо́ю да возвели́чит Пресвяту́ю Тро́ицу, Триипоста́снаго Бо́га еди́наго: Аллилу́иа.

И́кос 4.

Услы́шаша вся́ да́льняя о благоче́стии твое́м от мла́дости твоея́, я́ко духовни́к сы́й земли́ свята́го Са́ввы. Сего́ ра́ди слуги́ де́монския стра́шным ору́жием зло́бы своея́ тя́ гна́ша. Ты́ же ся́ от бра́ни мече́м Боже́ственнаго сло́ва и Христу́ Бо́гу до са́мыя кончи́ны своея́ непоро́чно послужи́л, сего́ ра́ди вопие́м ти́:

Ра́дуйся, за благоче́стие свое́ му́ки от враго́в Христо́вых прия́вый; ра́дуйся, в искуше́ниих ве́ру вели́ку сохрани́вый.

Ра́дуйся, наро́д се́й от ра́бства Ага́рянскаго кресто́м защити́вый; ра́дуйся, зе́млю на́шу ду́хом свои́м освяти́вый.

Ра́дуйся, вели́кий беззащи́тных защи́тителю; ра́дуйся, вся́кия слезы́ нелицеме́рныя уте́шителю.

Ра́дуйся, вся́кия ра́ны душе́вныя и теле́сныя цели́телю; ра́дуйся, па́стырю до́брый, Захо́лмия, Черного́ры, Примо́рия и все́х кра́ев Се́рбских просвети́телю.

Ра́дуйся, святы́й Васи́лие, похвало́ ро́да на́шего.

Конда́к 5.

Я́ко звезда́ пресве́тлая, от Бо́га свы́ше дарова́нная, в вышине́ духо́вной засия́ша и просвети́ша вся́, седя́ща во тьме́ греха́ и се́ни сме́ртныя. Сего́ ра́ди сла́вят тя́ вси́, и́же Творцу́ пою́ще: Аллилу́иа.

И́кос 5.

Ви́дех вся́ непра́вды и наси́лия, и́же пле́мя твое́ родно́е от враго́в Христо́вых прия́х, пострада́л еси́ с наро́дом свои́м я́ко изгна́нный пра́вды ра́ди. Сего́ ра́ди прише́д в ке́ллию Остро́жску и моли́тве и бде́нию всего́ ся́ предаде́. Ра́ди добра́ все́х ско́рби вели́кия претерпе́л еси́ и Бо́га чудеса́ми просла́ви, сего́ ра́ди вопие́м ти́:

Ра́дуйся, до са́мыя сме́рти твоея́ свя́то Бо́гу послужи́вый; ра́дуйся, у Бо́га в све́тлости ве́чной заблиста́вый.

Ра́дуйся, но́ваго престо́ла митропо́лии Захо́лмской зижди́телю; ра́дуйся, вели́кий и непостижи́мый благоде́телю.

Ра́дуйся, вся́ моля́щиися тебе́ спаса́вый; ра́дуйся, и забы́вшия тя́ помога́вый.

Ра́дуйся, высоты́ Серафи́мов дости́гший.

Ра́дуйся, святы́й Васи́лие, похвало́ ро́да на́шего.

Конда́к 6.

Сла́вный пропове́дниче, о́тче святы́й, возжела́л еси́ для ми́ра ми́р и ми́р для души́ своея́, и дабы́ бра́тския вражды́ избе́гнути, чрез страда́ния вели́кия Го́ры Афо́нстей достиго́ша. В кра́й же сво́й возврати́хомся, му́драго сове́та патриа́рха Се́рбскаго Паи́сия книголю́бца послу́ша, и я́ко архипа́стырь нестраши́мо взыдо́ша, да наро́д сво́й спасе́ши от напа́сти ага́рянской и да та́ко Христу́ Спа́су на́шему послу́жиши: Аллилу́иа.

И́кос 6.

Просия́ в Остро́ге свя́тость жития́ твоего́, сего́ ра́ди лю́ди, чудеса́ мно́га позна́ша и боле́зней и поро́ков свободи́шася, Бо́га просла́ви и тебе́ благода́рную пе́снь вопию́ще:

Ра́дуйся, влады́ко, в беда́х си́льный, на́с, немощны́х, Небе́сной си́лой спаса́еши; ра́дуйся, в ка́мени хла́дном теплоту́ Боже́ственную обрето́ша.

Ра́дуйся, мно́гия пред честны́ми моща́ми твои́ми примири́вый; ра́дуйся, тру́д апо́стольский показа́вый.

Ра́дуйся, сла́вы А́нгельския удосто́енный; ра́дуйся, си́лою, Бо́гом дарова́нною, я́ко дре́вле Илия́ чудеса́ творя́щий.

Ра́дуйся, те́плою ми́лостию свое́ю и по упокое́нии свое́м на́с не оставля́ющий.

Ра́дуйся, святы́й Васи́лие, похвало́ ро́да на́шего.

Конда́к 7.

Егда́ прише́д вре́мя оста́вити бра́тию и из сего́ ми́ра бре́ннаго отити́ в Ца́рство Небе́сное, учи́л еси́ па́стыри и мона́си: да храня́т ве́ру святу́ю в наро́де твое́м. Ду́шу же твою́ чи́сту Херуви́мы ко Христу́ нося́ше и ди́вно вопия́ше Бо́гу: Аллилу́иа.

И́кос 7.

Но́ваго свята́го дарова́ на́м Госпо́дь и по преставле́нии твое́м те́ло твое́ просла́ви, си́лою ду́ш спасе́ния и вся́кия не́мощи исцеле́ния украси́в. Сего́ ра́ди вся́ вселе́нная дне́сь вопие́т ти́:

Ра́дуйся, многоце́нных даро́в ковче́же; ра́дуйся, исто́чниче, слеза́ми покая́ния и проще́ния гре́шныя омыва́яй.

Ра́дуйся, в себе́ же́ртвенник любви́ Ева́нгельской воздвиго́ша; ра́дуйся, зло́бу моли́твою угаси́вый.

Ра́дуйся, на ка́мени ве́ры правосла́вныя ло́зу благоче́стия утверди́вый; ра́дуйся, безсме́ртие на Не́бе унасле́дивый.

Ра́дуйся, ми́лостию Бо́жией тле́ние победи́вый; ра́дуйся, мо́щи своя́ в ри́зницу исцеле́ний претвори́вый.

Ра́дуйся, друго́м духо́в безтеле́сных на Небеси́ учини́выйся.

Ра́дуйся, святы́й Васи́лие, похвало́ ро́да на́шего.

Конда́к 8.

Лю́ди вели́кой та́йне дивя́щеся, я́ко тле́нное в нетле́нное претвори́ся и исто́чником исцеле́ния ста́ша. Ра́зум на́ш то́ не разуме́ и ве́рою еди́ною позна́ти могу́ще, я́ко си́ла Бо́жия во свято́м те́ле при́сно жи́ве. Сего́ ра́ди припа́даем к твои́м моща́м святы́м, воспева́я Бо́гу: Аллилу́иа.

И́кос 8.

Освяще́н и одаре́н свы́ше еси́, Васи́лие чудотво́рче, засту́пничеством твои́м все́м ми́лостивно помога́еши, и моли́тв с ве́рою взыва́ющих к тебе́ не забыва́еши. Те́мже пра́зднество твое́ свято́е пра́зднующе, вопие́м ти́:

Ра́дуйся, Правосла́вия сто́лпе непоколеби́мый; ра́дуйся, добро́те вся́ческия лю́ди своя́ научи́вый.

Ра́дуйся, смире́ния и незло́бия торжество́; ра́дуйся, подви́жничества украше́ние.

Ра́дуйся, от путе́й поги́бели спаси́телю; ра́дуйся, неусы́пный за ве́рных моли́твенниче.

Ра́дуйся, за вся́ лю́ди те́плый засту́пниче; ра́дуйся, ра́дости вели́кия дари́телю.

Ра́дуйся, святы́й Васи́лие, похвало́ ро́да на́шего.

Конда́к 9.

Вси́ чи́ны А́нгельстии возра́довалися по́двигом твои́м и на Не́бо отше́ствию. С си́лами безтеле́сными в неизрече́нной сла́ве пребыва́еши, и с на́ми те́лом освяще́нным. В кра́тком житии́ земно́м забо́тился еси́ о вся́кой душе́ и беда́х ея́, и по преставле́нии свое́м чрез благода́тныя мо́щи твоя́ ми́лость на на́с, гре́шных, излива́еши. Сего́ ра́ди Бо́га благодаря́ще за сие́ восклица́ем: Аллилу́иа.

И́кос 9.

Чудеса́ми твои́ми я́ко све́том негаси́мым просвети́ся земля́ на́ша и вси́, и́же притека́ют к честны́м моща́м твои́м, об исцеле́нии души́ и те́ла мо́лят тя́. Сего́ ра́ди вопие́м ти́:

Ра́дуйся, вели́кий чудотво́рче, лю́ди гре́шныя спаса́ющий; ра́дуйся, цели́телю, ра́ны вси́ исцеля́ющий.

Ра́дуйся, рассла́бленным си́лу возвраща́яй; ра́дуйся, хромы́м хожде́ние да́руяй.

Ра́дуйся, немы́х веща́ние возвраще́нное; ра́дуйся, глухи́х слы́шание отворе́нное.

Ра́дуйся, беснова́тых исцели́вый; ра́дуйся, скудоу́мныя умудри́вый.

Ра́дуйся, боля́щих исцеле́ние; ра́дуйся, стра́ждущих ра́дование.

Ра́дуйся, ве́рным в ве́ре утвержде́ние; ра́дуйся, малоду́шных великоду́шие.

Ра́дуйся, все́х на́с хвала́ и ра́дование.

Ра́дуйся, святы́й Васи́лие, похвало́ ро́да на́шего.

Конда́к 10.

Все́м лю́дем возжела́ спасти́ся Госпо́дь и сего́ ра́ди тя́ показа́ просла́влена и чудеса́ творя́ща, да Его́ уче́ние и́м благовести́ и покая́нием к Бо́гу приведе́, сла́вящи Его́: Аллилу́иа.

И́кос 10.

Стено́ и защи́то сы́й все́м, к тебе́ прибега́ющим, о преблаже́нне. Ве́рою возне́сся еси́ и любо́вию, и́же язы́ки А́нгельстии превосхо́диши. Тобо́ю хва́лится и ра́дуется Це́рковь Се́рбская и с не́ю вся́ вселе́нная:

Ра́дуйся, преда́ние апо́столов сохрани́вый; ра́дуйся, проро́ческое дарова́ние приумно́живый.

Ра́дуйся, я́ко му́ченик, за ве́ру пострада́; ра́дуйся, я́ко И́ов Многострада́льный, бе́ды претерпе́.

Ра́дуйся, ре́вностию о Бо́зе, я́ко пла́менем невеще́ственным пыла́яй и святы́м отце́м в богому́дрии уподо́бивыйся; ра́дуйся, де́ло богоно́снаго влады́ки Са́ввы продолжи́, зе́млю Се́рбскую просвеща́юще.

Ра́дуйся, зерца́ло сла́вы Небе́сныя; ра́дуйся, чи́стым се́рдцем Бо́га узре́вый.

Ра́дуйся, наите́плый Со́лнца Пра́вды луче́; ра́дуйся, я́ко мо́лния се́ти де́монския попали́ша.

Ра́дуйся, я́ко о́гнь мы́сли нечи́стыя сожего́ша; ра́дуйся, заре́, мра́к ско́рби ве́лия прогна́вшая.

Ра́дуйся, святы́й Васи́лие, похвало́ ро́да на́шего.

Конда́к 11.

Пе́снь не могу́ща просла́вити вели́кия чудеса́ твоя́, и́миже ты́ вся́кому но́вому поколе́нию челове́ческому о Бо́зе пропове́дующи. Пред тобо́ю сло́во умо́лкни и суета́ земна́я пропаде́. В дея́ниих твои́х ра́й отве́рзешися, в Собо́ре святы́х пою́ще Бо́гу: Аллилу́иа.

И́кос 11.

Свеща́ све́та негаси́мая бы́л еси́ на земли́ и ны́не те́лом просла́влен, к Све́ту И́стинному на́с приво́диши. Во сне́ яви́л еси́ мона́ху ра́дость ве́лию, и́же обра́дова на́с Госпо́дь. Бра́тия оби́тели Остро́жския приидо́ша и целова́ша мо́щи твоя́, взыва́юще:

Ра́дуйся, святы́й о́тче Васи́лие, я́ко живо́т безсме́ртный унасле́дова и засвиде́тельствова на́м сие́ моще́й твои́х честны́х нетле́нием; ра́дуйся, сла́вою твое́ю на́с спаса́ющий.

Ра́дуйся, ве́ру пра́вую на́м показу́ющий; ра́дуйся, ду́ш пра́ведных весе́лие.

Ра́дуйся, в беда́х су́щих к животу́ возвраще́ние; ра́дуйся, к высоте́ блаже́нства Бо́гом вознесе́нный.

Ра́дуйся, щито́м воздержа́ния вся́ ло́жныя ча́ры ми́ра сего́ посрами́; ра́дуйся, о́тче богоно́сне, Христа́ Бо́га в се́рдце непоро́чно носи́вый.

Ра́дуйся, святы́й Васи́лие, похвало́ ро́да на́шего.

Конда́к 12.

Бо́гом дарова́нную благода́ть на земли́ в благодея́ниих лю́дям приумно́жил еси́. Сего́ ра́ди к тебе́ в беда́х и ско́рбех с те́плою моли́твою в се́рдце лю́ди земли́ твоея́ притека́ют и стра́н су́щих дале́че. И вси́ ожида́ют даро́в от Бо́га в чудеса́х твои́х, вопию́ще: Аллилу́иа.

И́кос 12.

Воспева́ем сла́вное упокое́ние твое́ – хра́ма Бо́га Вы́шняго и селе́ния Ду́ха Бо́жия чудотворя́щаго и со умиле́нием покая́нно вопие́м ти́, велича́юще:

Ра́дуйся, о́тче богому́дре и милосе́рде; ра́дуйся, сосу́де воды́ животворя́щия.

Ра́дуйся, Це́ркви Се́рбския диади́мо многоце́нная; ра́дуйся, смире́ния и кро́тости ди́вный свети́льниче.

Ра́дуйся, сме́ртен бы́ша, для жи́зни ве́чныя ду́шу сохрани́вый; Ра́дуйся, ду́шу чи́сту и свя́ту Созда́телю вся́ческих преда́вый.

Ра́дуйся, от Го́спода сла́вы вя́щшей удосто́енный.

Ра́дуйся, святы́й Васи́лие, похвало́ ро́да на́шего.

Конда́к 13.

Уго́дниче Бо́жий, Васи́лие чудотво́рче, приими́ ми́лостивно сие́ моле́ние на́ше я́ко моли́тву покая́нну и умоли́ на́м проще́ние и спасе́ние у всеми́лостиваго Спа́са Христа́ Бо́га на́шего: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгел во пло́ти между́ людьми́ яви́ся, Васи́лие чудотво́рче. Чуде́сною си́лою Ду́ха Свята́го связа́л еси́ вся́ искуше́ния. Сего́ ра́ди пое́м ти́ такова́я:

Ра́дуйся, о́тче отце́в преподо́бных, мно́гия ве́ре пра́выя научи́вый; ра́дуйся, неуста́нный служи́телю Ева́нгелия, поуче́нием и де́лы своя́ от зла́ на́с спаса́вый.

Ра́дуйся, Правосла́вия храни́телю и учи́телю; ра́дуйся, в ско́рбех ве́ка сего́ уте́шителю.

Ра́дуйся, вся́кой боле́зни цели́телю; ра́дуйся, па́стырю о́вцы заблу́ждшия и усе́рдный и́х к Бо́гу возврати́телю.

Ра́дуйся, ду́ш а́лчущих пита́телю; ра́дуйся, умо́в помраче́нных просвети́телю.

Ра́дуйся, святы́й Васи́лие, похвало́ ро́да на́шего.

Конда́к 1.

Богоно́сный архиере́ю Це́ркве Се́рбския, святы́й чудотво́рче о́тче Васи́лие, от гре́шных и недосто́йных ду́ш на́ших похва́льную пе́снь тебе́ принося́ще, и ка́яся во гресе́х на́ших, мо́лим тя́: пребу́ди и да́лее, я́ко бы́х пре́жде, храни́телю милосе́рдый земли́ на́шея, и спаси́ на́с от вся́кия беды́ и напа́сти да велича́ем тя́ во ве́ки:

Ра́дуйся, святы́й Васи́лие, похвало́ ро́да на́шего.

Моли́тва.

Святы́й Васи́лие, вели́кий уго́дниче Бо́жий, все́м помога́ющий, помоги́ и мене́ гре́шному. Вели́кий защи́тниче ве́ры Правосла́вныя, защити́ и на́с, твою́ ве́ру святу́ю испове́дующих, и с наде́ждой к тебе́ приступа́ющих. Вели́кий архиере́ю Бо́жий, умоли́ Бо́га Вседержи́теля о все́х лю́дех твои́х, а по́сле все́х и о мне́ – после́днем и недосто́йнем. Твердо́шский ви́тязю духо́вный и подви́жниче Остро́жский, спаса́й на́с от все́х бе́д ви́димых и неви́димых. Возже́г ты́ зе́млю Се́рбскую, я́ко ве́чную свечу́ пред Престо́лом Бо́га Жива́го, сего́ ра́ди и на́м гре́шным ны́не пути́ на́ша освети́ и тьму́ ско́рби прогони́. Моли́твами и слеза́ми пеще́ру Остро́жскую согре́ша, согре́й ны́не Ду́хом Бо́жиим и сердца́ на́ша, да спасе́мся и просла́вим Бо́га Всевы́шняго и тебя́, святи́телю Бо́жий. Со все́х кра́ев све́та притека́ют к киво́ту твоему́ больны́я и немощны́я, и ты́ и́м помо́г еси́: де́монов отгна́ша, пу́ты диа́вольския растерза́ша, здра́вие душе́вное и теле́сное лю́дем дарова́ша. Та́ко и ны́не креще́нным и некреще́нным помози́; и́же во ве́ки все́м помога́еши, помози́ и мене́ гре́шному. Примири́тель бы́л еси́ бра́тиям вражду́ющим, и ны́не вся́ вражду́ющия и с бра́тиями разделе́нныя примири́, скорбя́щия возвесели́, самово́льныя укроти́, боля́щия исцели́. Святы́й Васи́лие, чудотво́рче и о́тче на́ш духо́вный, услы́ши ча́д твои́х во Христе́ Иису́се, Го́споде на́шем. Ами́нь.