Конда́к 1.

Избра́нней дще́ри кня́жескаго ро́да, святе́й преподо́бней ма́тери на́шей Ангели́не, пра́ведным житие́м свои́м Бо́гу угоди́вшей и ны́не во свя́тости Его́ непреста́нно пребыва́ющей, похва́льное пе́ние прино́сим. Ты́ же, я́ко иму́щая ве́лие дерзнове́ние ко Го́споду, моли́ усе́рдно Его́ за на́с, пою́щих ти́:

Ра́дуйся, преподо́бная ма́ти на́ша Ангели́но, святы́м а́нгелом равноче́стная.

И́кос 1.

А́нгелом небе́сным житие́м свои́м уподо́билася еси́, свята́я Ангели́но, и ны́не на небеси́ со а́нгелы пе́снь славосло́вия Пресвяте́й Тро́ице возно́сиши. Сего́ ра́ди и мы́, покланя́яся Творцу́ своему́, прино́сим тебе́ славосло́вия сия́:

Ра́дуйся, от благочести́ваго ко́рене произра́стшая. ра́дуйся, на дре́ве ро́да своего́ плодонося́щею ве́твию возра́стшая.

Ра́дуйся, во благоче́стии и пра́ведности воспита́нная. ра́дуйся, бы́ти дще́рию знамени́таго Алба́нского геро́я кня́зя Гео́ргия Скандербе́га удосто́ившаяся.

Ра́дуйся, свя́тость ро́да своего́ сла́внаго многокра́тно приумно́жившая. ра́дуйся, че́сти и сла́вы роди́телей свои́х пред людьми́ не ума́лившая.

Ра́дуйся, преподо́бная ма́ти на́ша Ангели́но, святы́м а́нгелом равноче́стная.

Конда́к 2.

Ви́дя святы́й Стефа́н тебя́ чистото́ю небе́сною сия́ющую, возлюби́ все́ю душе́ю и, в же́ны себе́ избра́в, бра́ком зако́нным сочета́ся. Ты́ же, на престо́л Се́рбския страны́ возлю́бленным супру́гом с по́честьми возведе́нная, согла́сно с ни́м воспе́ла Бо́гу: Аллилу́иа.

И́кос 2.

Ра́зумом ко благоче́стию устремля́лася еси́, преподо́бная Ангели́но, уразуме́вши бо суету́ ми́ра сего́, избра́ла еси́ еди́но души́ твое́й на потре́бу е́же благоугожда́ти Бо́гу, те́мже претерпе́ла еси́ изгна́ние ку́пно с супру́гом свои́м и терпе́нием в перенесе́нии тяго́т изгна́ния ду́шу свою́ стяжа́ла еси́. Таково́му смире́нию твоему́ удивля́яся, вопие́м ти́:

Ра́дуйся, мно́гия ско́рби от враго́в страны́ твоея́ претерпе́вшая. ра́дуйся, в ско́рбях си́х я́ко зла́то в горни́ле очи́стившаяся.

Ра́дуйся, от тяго́т изгна́ния в уны́ние не впа́дшая. ра́дуйся, во изгна́нии кре́пость ду́ха сохраня́вшая.

Ра́дуйся, семе́йства своего́ о Христе́ охрани́тельнице. ра́дуйся, супру́гу своему́ ве́рная помо́щница.

Ра́дуйся, преподо́бная ма́ти на́ша Ангели́но, святы́м а́нгелом равноче́стная.

Конда́к 3.

Си́ла Вы́шняго осени́ тогда́ к смире́нию деспоти́су прему́друю, в му́жи Бо́га боя́тися науча́ющи и чадоро́дием спаса́тися помога́ющи, все́м же се́ющим в смире́нии жа́ти спасе́ние обеща́ющи, внегда́ пе́ти Созда́телю: Аллилу́иа.

И́кос 3.

Иму́щи свята́я Ангели́на свы́ше да́нную себе́ му́дрость, я́ко драгу́ю жемчу́жину в души́ свое́й Христа́ сохраня́ла еси́, во все́м Ему́ благоугожда́я. Мы́ же, ве́рою твое́ю укрепля́емии и матери́нским попече́нием твои́м окормля́емии, со умиле́нием зове́м ти́:

Ра́дуйся, ма́терию забо́тливою наро́ду своему́ бы́вшая. ра́дуйся, с по́ддаными свои́ми все́ невзго́ды дели́вшая.

Ра́дуйся, в ве́ре во Христа́ наро́д сво́й просвеща́вшая. ра́дуйся, приме́ром благоче́стия для все́х ста́вшая.

Ра́дуйся, у наро́да своего́ и́мя «ма́тери Ангели́ны» заслужи́вшая. ра́дуйся, ла́сково «ма́йкою» си́ е́сть «ма́тушкою» от него́ называ́емая.

Ра́дуйся, преподо́бная ма́ти на́ша Ангели́но, святы́м а́нгелом равноче́стная.

Конда́к 4.

Бу́рю злы́х напа́стей утиша́я, ве́сь ско́рбный пу́ть жития́ своего́ прошла́ еси́, преподо́бная ма́ти на́ша Ангели́но, неся́ сво́й кре́ст смире́нно и терпеливоду́шно, бы́сть бо тебе́ Помо́щником Са́м Госпо́дь, Ему́ же ты́ взыва́ла: Аллилу́иа.

И́кос 4.

Ви́дяще свято́е житие́ твое́, блаже́нная Ангели́но, благослови́ Госпо́дь тебя́ на ве́лий по́двиг матери́нства, ты́ бо с супру́гом свои́м среди́ испыта́ний и лише́ний воспита́ла еси́ во благоче́стии и по́двиге сынове́й свои́х: свята́го архиепи́скопа Макси́ма и свята́го Иоа́нна – после́дняго власти́теля Се́рбии. Благослови́ и на́с, духо́вных ча́д твои́х, во благоче́стии всегда́шнем пребыва́ти, пою́щих тебе́ та́ко:

Ра́дуйся, му́дрость свою́ любо́вию во Христе́ свиде́тельствовавшая. ра́дуйся, указу́ющая, я́ко матери́нство во Ду́се Свя́те свя́то е́сть.

Ра́дуйся, явля́ющая, я́ко избы́ток се́рдца твоего́ в чисте́йших ча́дех твои́х. ра́дуйся, ны́не с ча́дами свои́ми во святы́х лику́ющая.

Ра́дуйся, и на́с матери́нским попече́нием на земли́ не оставля́ющая. ра́дуйся, в се́рдце свое́м оби́тель Святе́й Тро́ице устро́ившая.

Ра́дуйся, преподо́бная ма́ти на́ша Ангели́но, святы́м а́нгелом равноче́стная.

Конда́к 5.

Боготе́чную звезду́ зри́м тя́, преподо́бная на́ша ма́ти Ангели́но, в Ца́рство Бо́жие на́м пу́ть указу́ющую; све́том бо свои́м неземны́м озаря́еши души́ на́ша, скорбя́ми и печа́льми истомле́нныя, оба́че Го́споду зову́щия: Аллилу́иа.

И́кос 5.

Ви́дя себя́ в чистоте́, свята́я Ангели́но, по отше́ствии ко Го́споду му́жа своего́, в а́нгельский о́браз облекла́ся еси́ и по́двигом мона́шеским ду́шу свою́ благоукраси́ла еси́. Среди́ чино́в а́нгельских ны́не пребыва́я, моли́ся за ны́, да и мы́ в чистоте́ душе́вней и теле́сней пребыва́ти возмо́жем, пою́щия тебе́ сицева́я:

Ра́дуйся, а́нгелом еще́ на земли́ уподо́бившаяся. ра́дуйся, ца́рственный пу́ть для себя́ избра́вшая.

Ра́дуйся, путе́м си́м неукосни́тельно ше́дшая. ра́дуйся, в моли́тве сла́достней ду́шу свою́ утеша́вшая.

Ра́дуйся, с Го́сподом непреста́нно в моли́тве пребыва́вшая. ра́дуйся, по́двиг мона́шеский наравне́ с матери́нским по́двигом проне́сшая.

Ра́дуйся, преподо́бная ма́ти на́ша Ангели́но, святы́м а́нгелом равноче́стная.

Конда́к 6.

Посто́м и моли́твою пло́ть твою́ ду́хови порабо́тила еси́, свята́я Ангели́но, и во сла́ву Бо́жию пожила́ еси́, сего́ ра́ди ны́не на небеси́ Пресвяте́й Тро́ице пое́ши: Аллилу́иа.

И́кос 6.

Возсия́ла еси́ всему́ ми́ру благоче́стием твои́м, свята́я на́ша ма́ти Ангели́но, ра́дость бо ве́лия бы́сть все́м земны́м и небе́сным, егда́ Ла́вру Крушедо́льскую постро́ила еси́, в не́й же ны́не нетле́нными моща́ми пребыва́еши. Мы́ же, и по отше́ствии твое́м, я́ко с на́ми неотсту́пно пребыва́ющей, пое́м ти́:

Ра́дуйся, об оби́телях се́рбских и ру́сских забо́тившаяся. ра́дуйся, подвиза́ющимся в оби́телях си́х благотвори́вшая.

Ра́дуйся, я́ко с супру́гом и сына́ми свои́ми в ли́ке святы́х пребыва́еши. ра́дуйся, я́ко на небоскло́не небе́сном ны́не сия́еши.

Ра́дуйся, и на земли́ и на небеси́ венца́ми украше́нная. ра́дуйся, сла́ве земне́й сла́ву небе́сную предпоче́тшая.

Ра́дуйся, преподо́бная ма́ти на́ша Ангели́но, святы́м а́нгелом равноче́стная.

Конда́к 7.

Хотя́ наро́д се́рбский от туре́цкаго влады́чества изба́витися, со слеза́ми к тебе́, преподо́бная Ангели́но, и ко при́сным твои́м пред моща́ми ва́шима взыва́л е́сть. Ты́ же, не оста́вила еси́ наро́да твоего́ без защи́ты, о тебе́ пою́щаго Бо́гу: Аллилу́иа.

И́кос 7.

Но́ваго чу́да бы́сть свиде́телие лю́ди правосла́внии, егда́ неве́рнии от моще́й твои́х исцеле́ния получа́ху, удивля́яся вели́чию ве́ры христиа́нской. Мы́ же, ве́дая си́лу Бо́жию, на тебе́ пребыва́ющую, восхваля́ем тя́, преподо́бная на́ша ма́ти Ангели́но:

Ра́дуйся, ве́рою свое́ю во Христа́ на́с укрепля́ющая. ра́дуйся, в любви́ Христо́вой пребыва́ти непреста́нно на́с науча́ющая.

Ра́дуйся, я́ко ты́ еси́ утвержде́ние на́ше во благоче́стии. ра́дуйся, тебе́ бо мы́ моли́твы свои́ возно́сим, я́ко на́шей усе́рдной моли́твеннице.

Ра́дуйся, я́ко зде́ на земли́ тебе́ ублажа́ем и почита́ем. ра́дуйся, и на небеси́ с тобо́ю восхваля́ти Го́спода ча́ем.

Ра́дуйся, преподо́бная ма́ти на́ша Ангели́но, святы́м а́нгелом равноче́стная.

Конда́к 8.

Стра́нными чудесы́ прославля́яся, преподо́бная ма́ти Ангели́но, утверди́ла еси́ в лю́дех тве́рдую ве́ру и упова́ние, я́ко мно́го возмо́жно пра́ведному по моли́тве его́. Мы́ же, ве́руя, я́ко а́ще по Бо́зе упова́ние на тя́ возложи́м, та́кожде прии́мем проси́мое моле́нием твои́м, пое́м о тебе́ Созда́телю: Аллилу́иа.

И́кос 8.

Всю́ себя́ преда́в во́ли Бо́жией, неутоми́мое попече́ние о спасе́нии души́ своея́ и ча́д твои́х име́ла еси́, ти́и же, воспита́ннии матери́нскими стара́ньми твои́ми во благоче́стии и послуша́нии, досто́йными продолжа́тельми ро́да твоего́ сла́внаго бы́ша. Ве́дая святы́я труды́ и по́двиги ча́д твои́х во бла́го святы́я Це́ркви и страны́ своея́, восхваля́ем твою́ матери́нскую любо́вь и му́дрость:

Ра́дуйся, Архиере́ю Небе́сному на служе́ние свята́го архиепи́скопа Макси́ма возрасти́вшая. ра́дуйся, на труды́ святи́тельския того́ благослови́вшая.

Ра́дуйся, и други́м сы́ном твои́м – святы́м Иоа́нном в матери́нском зва́нии возвели́ченная. ра́дуйся, я́ко благоче́стием ча́д твои́х главу́ свою́ увенча́вшая.

Ра́дуйся, я́ко си́л твои́х на воспита́ние ча́д свои́х не жале́вшая. ра́дуйся, сыно́внею любо́вию за любо́вь свою́ матери́нскую ще́дро вознагражде́нная.

Ра́дуйся, преподо́бная ма́ти на́ша Ангели́но, святы́м а́нгелом равноче́стная.

Конда́к 9.

Вся́кия ско́рби, боле́зни, искуше́ния от нечести́вых во изгна́нии с супру́гом и ча́дами свои́ми претерпе́ла еси́, преподо́бная ма́ти Ангели́но. И вси́ си́и, быва́емыя тебе́, с Бо́жиею по́мощию, преодоле́ла еси́. Сего́ ра́ди, науча́яся подвиго́м твои́м, вопие́м о тебе́ Бо́гу: Аллилу́иа.

И́кос 9.

Вити́йство челове́ческое не возмо́жет по достоя́нию восхвали́ти по́двиги твоя́ и промышле́ние о тебе́ Бо́жие, преподо́бная ма́ти Ангели́но, я́ко не толи́ко неве́стою влады́ки земна́го сподо́билася еси́ бы́ти, оба́че неве́стою Христо́вою нарекла́ся еси́. Мы́ же, вся́ сия́ ве́дуще, ра́дующеся глаго́лем тебе́:

Ра́дуйся, на заре́ жития́ своего́ в ма́нтию деспоти́сы облаче́нная. ра́дуйся, на зака́те жития́ своего́ сию́ на ма́нтию мона́хини смени́вшая.

Ра́дуйся, венце́м от влады́ки земна́го короно́ванная. ра́дуйся, венце́м от Го́спода на Небеси́ увенча́нная.

Ра́дуйся, оде́жды короле́вския на и́ноческия смени́вшая. ра́дуйся, в наря́де а́нгельском пред Го́сподом предста́вшая.

Ра́дуйся, преподо́бная ма́ти на́ша Ангели́но, святы́м а́нгелом равноче́стная.

Конда́к 10.

Спасти́ хотя́ ду́шу твою́, богому́драя на́ша ма́ти Ангели́но, в кро́тости и смире́нии Христо́ви уподо́битися возжела́ла еси́ и в се́м ди́вно преуспе́ла еси́. Те́м же и на́м, хотя́щим спасе́ние стяжа́ти, не престава́й помога́ти, вопию́щим Бо́гу: Аллилу́иа.

И́кос 10.

Стена́ еси́ и заступле́ние все́м с ве́рою и любо́вию к тебе́ притека́ющим, свята́я Ангели́но, те́м же мо́лим тя́: заступи́ и огради́ на́с от искуше́ний, бе́д и озлобле́ний, с любо́вию взыва́ющих тебе́:

Ра́дуйся, я́ко в тебе́ зри́м матери́нское к на́м благоволе́ние. ра́дуйся, я́ко твои́ми моли́твами ско́рби на́ша утиша́ются.

Ра́дуйся, до́бре подвиза́ющихся непреста́нно укрепля́ющая. ра́дуйся, на благо́е и душеполе́зное на́с наставля́ющая.

Ра́дуйся, от дома́шния вражды́ единокро́вныя ми́ром огражда́ющая. ра́дуйся, люби́ти бли́жних свои́х на́с науча́ющая.

Ра́дуйся, преподо́бная ма́ти на́ша Ангели́но, святы́м а́нгелом равноче́стная.

Конда́к 11.

Пе́ние благода́рственное Го́сподеви на́шему прино́сим, я́ко дарова́л на́м в тебе́, преподо́бная на́ша ма́ти Ангели́но, те́плую моли́твенницу, ско́рую помо́щницу и ди́вную засту́пницу, воспева́юще Ему́: Аллилу́иа.

И́кос 11.

Све́том Боже́ственным осия́нная, преподо́бная Ангели́но, ны́не во блаже́нстве со Го́сподом пребыва́еши и у Престо́ла Его́ дерзнове́нно за все́х правосла́вных мо́лишися. Я́ко ма́ти архиере́я су́щая, бу́ди духо́вной ма́терию и все́м архиере́ом ны́не святи́тельский по́двиг несу́щим, да благословля́ют тебя́ та́ко:

Ра́дуйся, ве́рная раба́ Бо́жия, па́че все́х бла́г Го́спода возлюби́вшая. ра́дуйся, ду́шу свою́ еле́ем до́брых де́л умасти́вшая.

Ра́дуйся, Жениху́ Небе́сному в полу́нощи во сре́тение изше́дшая. ра́дуйся, свети́льник сво́й до после́дняго часа́ своего́ не угаси́вшая.

Ра́дуйся, а́нгелами на небеса́ вознесе́нная. ра́дуйся, в ра́йския две́ри небоя́зненно вше́дшая.

Ра́дуйся, преподо́бная ма́ти на́ша Ангели́но, святы́м а́нгелом равноче́стная.

Конда́к 12.

Благода́ть Бо́жию ще́дро излия́вшуюся на тебе́, свята́я Ангели́но, испроси́ и на́м от Всеще́драго Бо́га и Спа́са на́шего, да не́ю вразумля́емии и укрепля́емии хо́дим во све́те за́поведей Бо́жиих и дости́гнем ве́чнаго блаже́нства, воспева́юще Бо́гу: Аллилу́иа.

И́кос 12.

Пою́ще Бо́га, ди́внаго во святы́х Свои́х, хва́лим тя́, Христо́ву испове́дницу, за долготерпе́ние и пресла́вная благодея́ния твоя́, ублажа́ем пра́ведную кончи́ну твою́, почита́ем и свяще́нную па́мять твою́ и в похвалу́ сицева́я тебе́ зове́м:

Ра́дуйся, за все́х тезоимени́тых Ангели́н пред Бо́гом сугу́бая и те́плая моли́твенница. ра́дуйся, и на́с, ча́д твои́х, в свои́х моли́твах помина́ющая.

Ра́дуйся, любо́вию матери́нскою ще́дро все́х возлюби́вшая. ра́дуйся, все́х, к тебе́ прибега́ющих, ми́лостию свое́ю покрыва́ющая.

Ра́дуйся, утеше́нием и ра́достию моля́щихся пред честны́ми моща́ми твои́ми возвеселя́ющая. ра́дуйся, ико́нами свои́ми милосе́рдое заступле́ние на́м явля́ющая.

Ра́дуйся, преподо́бная ма́ти на́ша Ангели́но, святы́м а́нгелом равноче́стная.

Конда́к 13.

О, свята́я преподо́бная на́ша ма́ти Ангели́но, святы́м а́нгелом житие́м свои́м поревнова́вшая! Мо́лим тя́ усе́рдно: не оставля́й на́с во дни́ ско́рби и напа́сти и избавле́ние от си́х на́м да́руй, да спаса́емии и укрепля́емии заступле́нием твои́м возвесели́мся душа́ми на́шими и воспое́м Творцу́ и Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгелом небе́сным житие́м свои́м уподо́билася еси́, свята́я Ангели́но, и ны́не на небеси́ со а́нгелы пе́снь славосло́вия Пресвяте́й Тро́ице возно́сиши. Сего́ ра́ди и мы́, покланя́яся Творцу́ своему́, прино́сим тебе́ славосло́вия сия́:

Ра́дуйся, от благочести́ваго ко́рене произра́стшая. ра́дуйся, на дре́ве ро́да своего́ плодонося́щею ве́твию возра́стшая.

Ра́дуйся, во благоче́стии и пра́ведности воспита́нная. ра́дуйся, бы́ти дще́рию знамени́таго Алба́нского геро́я кня́зя Гео́ргия Скандербе́га удосто́ившаяся.

Ра́дуйся, свя́тость ро́да своего́ сла́внаго многокра́тно приумно́жившая. ра́дуйся, че́сти и сла́вы роди́телей свои́х пред людьми́ не ума́лившая.

Ра́дуйся, преподо́бная ма́ти на́ша Ангели́но, святы́м а́нгелом равноче́стная.

Конда́к 1.

Избра́нней дще́ри кня́жескаго ро́да, святе́й преподо́бней ма́тери на́шей Ангели́не, пра́ведным житие́м свои́м Бо́гу угоди́вшей и ны́не во свя́тости Его́ непреста́нно пребыва́ющей, похва́льное пе́ние прино́сим. Ты́ же, я́ко иму́щая ве́лие дерзнове́ние ко Го́споду, моли́ усе́рдно Его́ за на́с, пою́щих ти́:

Ра́дуйся, преподо́бная ма́ти на́ша Ангели́но, святы́м а́нгелом равноче́стная.

Моли́тва.

О, вели́кая уго́дница Христо́ва и пресла́вная ма́ти на́ша Ангели́но! Ты́ на небеси́ душе́ю свое́ю у Престо́ла Бо́жия предстои́ши и славосло́вие Ему́ непреста́нно возно́сиши, обрати́ взо́р сво́й на на́с си́рых и скорбя́щих и помоли́ся за на́с ко Го́споду, да наста́вит на́с на пу́ть и́стины и благоче́стия, ко́им возмо́жем и мы́ по сконча́нии жития́ на́шего в Оте́чество на́ше небе́сное взы́ти и с тобо́ю Бо́гу поклони́тися. Е́й, преподо́бная на́ша ма́ти, зри́ши с небеси́, я́ко вре́мя тя́жкое безбо́жное наста́ и ду́ши на́ша ско́рбию испо́лнишася. Не́сть спаса́ющаго, не́сть помога́ющаго, то́кмо Бо́г Еди́ный, на Него́ же упова́ем и Ему́ же сла́ву возсыла́ем со Отце́м и Сы́ном и Святы́м Ду́хом ны́не и при́сно и во ве́ки веко́в. Ами́нь.