Конда́к 1.

Избра́ннице Христо́ва, свята́я му́ченице Фоти́ние, прише́дшая ко кла́дезю Иа́ковлю почерпну́ти во́ду и обре́тшая Месси́ю, Иму́щаго во́ду жи́ву, похва́льная воспису́ем ти́, с любо́вию чту́щии святу́ю па́мять твою́, пою́ще:

Ра́дуйся, му́ченице Фоти́ние, ко кла́дезю ве́ры на́с приводя́щая.

И́кос 1.

А́нгелов Творе́ц избра́ тя́, достоблаже́нная Фоти́ние, име́ла бо еси́ се́рдце, испо́лнено пра́вды Бо́жия и гото́вое восприя́ти глаго́лы жи́зни ве́чныя. Та́ко и Спаси́телю твоему́ отвеща́ла еси́: «Го́споди, да́ждь ми́ во́ду сию́, да ни жа́жду во ве́ки!» Мы́ же, дивя́щеся ве́лией ре́вности твое́й по Бо́зе, со умиле́нием зове́м ти́:

Ра́дуйся, се́рдце отве́рстое и́стине име́вшая; ра́дуйся, ве́ру отце́в свя́то храни́вшая.

Ра́дуйся, бесе́ды со Христо́м удосто́енная; ра́дуйся, ве́рою во Христа́ просия́вшая.

Ра́дуйся, я́ко сло́во Его́ восприя́ла еси́; ра́дуйся, я́ко глаго́лом Бо́жиим ду́шу свою́ преобрази́ла еси́.

Ра́дуйся, сло́ва Христо́ва пропове́днице; ра́дуйся, ко овца́м ста́да Христо́ва сопричте́нная.

Ра́дуйся, му́ченице Фоти́ние, ко кла́дезю ве́ры на́с приводя́щая.

Конда́к 2.

Ви́дя Сердцеве́дец Госпо́дь грехо́вность жития́ твоего́, оба́че и простоту́ души́ твоея́, изво́ли откры́ти тебе́, я́ко глаго́ляй с тобо́ю Месси́я е́сть, Его́же ча́ют язы́цы. Ты́ же, оста́вивши водоно́с и ше́дши во гра́д сво́й Сиха́рь, возвести́ о се́м лю́дем, да вку́пе с тобо́ю зову́т: Аллилу́иа.

И́кос 2.

Ра́зум богопросвеще́н прия́вши, Фоти́ние блаже́нная, уразуме́ла еси́ суету́ ми́ра сего́ и избра́ла еси́ еди́но души́ твое́й на потре́бу – е́же благоугожда́ти Бо́гу. Те́мже, благоразу́мие твое́ похваля́юще, взыва́ем си́це:

Ра́дуйся, позна́ния и́стинныя ве́ры вожделе́вшая; ра́дуйся, я́ко исто́чником воды́, теку́щей в жи́знь ве́чную, соде́лалася еси́.

Ра́дуйся, я́ко от после́дних к пе́рвым причи́слена еси́; ра́дуйся, житие́ грехо́вное на житие́ пра́ведное премени́вшая.

Ра́дуйся, все́м се́рдцем Христа́ возлюби́вшая; ра́дуйся, на па́жити Христо́вой упасе́нная.

Ра́дуйся, глаго́лам жи́зни ве́чныя науче́нная; ра́дуйся, ве́рою свое́ю мно́гия преобрази́вшая.

Ра́дуйся, му́ченице Фоти́ние, ко кла́дезю ве́ры на́с приводя́щая.

Конда́к 3.

Си́лою благода́ти Христо́вы оде́явшеся и восприя́вши све́т и́стинныя ве́ры, соде́лалася еси́ исто́чником све́та посреде́ наро́да своего́, науча́я его́ воспева́ти Бо́гу: Аллилу́иа.

И́кос 3.

Иму́щи се́рдце свое́ словеса́м Христо́вым отве́рсто, оста́ви водоно́с сво́й и и́де во гра́д свята́я Фоти́ния и рече́: «Прииди́те и ви́дите Челове́ка, И́же рече́ ми́ вся́, ели́ка сотвори́х: еда́ То́й е́сть Христо́с?» Лю́дие же приидо́ша ко Христу́ и моля́ху Его́, дабы́ пребы́л у ни́х; и мно́го па́че ве́роваша за сло́во Его́. Мы́ же, му́ченице Фоти́ние, прославля́я в тебе́ Го́спода, вопие́м си́це:

Ра́дуйся, и́стину правосла́вныя ве́ры позна́вшая; ра́дуйся, учени́цею Христо́вою соде́лавшаяся.

Ра́дуйся, стра́х Бо́жий в се́рдце свое́м стяжа́вшая; ра́дуйся, Про́мыслом Бо́жиим избра́нная.

Ра́дуйся, о́браз Бо́жий в себе́ возроди́вшая; ра́дуйся, я́ко и на́с зове́ши ко обновле́нию.

Ра́дуйся, для спасе́ния самаря́н Христо́м предрече́нная; ра́дуйся, и на́с и́стинам Христо́вы ве́ры науча́ющая.

Ра́дуйся, му́ченице Фоти́ние, ко кла́дезю ве́ры на́с приводя́щая.

Конда́к 4.

Бу́ри грехо́вныя избавля́я, избра́ тя́ Госпо́дь, блаже́нная Фоти́ние, послужи́ти де́лу обраще́ния на пу́ть спасе́ния самаря́н, бы́вших досе́ле язы́чниками, да просвеще́нии све́том и́стины, воспою́т Бо́гу: Аллилу́иа.

И́кос 4.

Слы́ша се́рдцем свои́м благове́стие о поклоне́нии Бо́гу в ду́се и и́стине, оста́вила еси́ грехо́вное житие́, свята́я Фоти́ние, и соде́лалася еси́ пропове́дницею Сло́ва Бо́жия вку́пе со ча́ды и се́страми твои́ми. Мы́ же дивя́щеся такове́й си́ле ве́ры твоея́, возглаша́ем ти́ гла́сы немо́лчными си́це:

Ра́дуйся, Фоти́ниею, си́речь «светоза́рною», нарече́нная; ра́дуйся, све́том и́стинныя ве́ры ве́сь ми́р облиста́вшая.

Ра́дуйся, пра́вде серде́чней на́с науча́ющая; ра́дуйся, грехи́ своя́ зре́ти на́м помога́ющая.

Ра́дуйся, к све́ту и́стинному на́с приводя́щая; ра́дуйся, покланя́тися Бо́гу в ду́се и и́стине вразумля́ющая.

Ра́дуйся, благово́нное ве́ры кади́ло; ра́дуйся, правосла́вныя ве́ры свети́ло.

Ра́дуйся, му́ченице Фоти́ние, ко кла́дезю ве́ры на́с приводя́щая.

Конда́к 5.

Боготе́чною звездо́ю яви́лася еси́, свята́я Фоти́ние, и от земли́ Самари́йския да́же до Карфаге́на просвети́ла еси́ ве́рою Христо́вою вся́ живу́щия та́мо, науча́ющи и́х пе́ти Творцу́: Аллилу́иа.

И́кос 5.

Ви́девше мно́гия по́двиги и труды́ твоя́, и́хже три́десять ле́т соверша́ла еси́ во сла́ву Госпо́дню, мно́гия чрез тебе́ от язы́ческаго мудрова́ния ко Христу́ приидо́ша. Мы́ же, дивя́щеся таково́му му́жеству немощна́го же́нскаго естества́, во умиле́нии се́рдца зове́м ти́:

Ра́дуйся, жи́зни грехо́вныя му́жественно отре́кшаяся; ра́дуйся, на пу́ть спасе́ния мно́гия наста́вившая.

Ра́дуйся, все́м житие́м свои́м Христу́ послужи́вшая; ра́дуйся, суету́ ми́ра сего́ ни во что́же вмени́вшая.

Ра́дуйся, Бо́га позна́вшая и Бо́гом зна́емая; ра́дуйся, познава́ти во́лю Его́ науча́ющая.

Ра́дуйся, все́ упова́ние на Го́спода возлага́ти наставля́ющая; ра́дуйся, вся́кое зло́ до́бром победи́вшая.

Ра́дуйся, му́ченице Фоти́ние, ко кла́дезю ве́ры на́с приводя́щая.

Конда́к 6.

Пропове́дницею сло́вом и де́лом и́стины Христо́вы яви́лася еси́, свята́я Фоти́ние, и ча́да своя́, ко Христу́ приве́дши, благовествова́нию научи́ла еси́. Они́ же, иму́ще ве́лие дерзнове́ние к пропове́данию Сло́ва Бо́жия, мно́гия ко Христу́ приведо́ша, воспева́я ку́пно с ни́ми: Аллилу́иа.

И́кос 6.

Возсия́ па́че со́лнца светле́йше сло́во твоея́ про́поведи, блаже́нная Фоти́ние, егда́ пред злочести́вым импера́тором Неро́ном, я́ко учени́ца апо́стола Па́вла, со клевре́ты свои́ми предста́в, о Христе́ небоя́зненно благовествова́ла еси́. Мы́ же, дивя́ся такове́й си́ле ду́ха твое́й, воспева́ем ти́ та́ко:

Ра́дуйся, испове́днице Христо́ва, муче́ний не убоя́вшаяся; ра́дуйся, до́брую и́скру души́ своея́ в пла́мя ре́вности по Бо́зе возгре́вшая.

Ра́дуйся, я́ко жестосе́рдаго Неро́на ве́рою во Христа́ просвеща́ла еси́; ра́дуйся, я́ко ду́шу злоде́я сего́ привести́ ко спасе́нию тща́лася еси́.

Ра́дуйся, и́стинною любо́вию ко благоче́стию горе́вшая; ра́дуйся, де́лателей на ни́ве Христо́вой приумно́жившая.

Ра́дуйся, ду́шу, прия́вшую благода́ть Христо́ву, име́вшая; ра́дуйся, сло́во, благода́тныя си́лы испо́лненное, лю́дем не́сшая.

Ра́дуйся, му́ченице Фоти́ние, ко кла́дезю ве́ры на́с приводя́щая.

Конда́к 7.

Хотя́ насле́дницею Ца́рствия Своего́ соде́лати тя́, избра́ннице Христо́ва, за гото́вность се́рдца твоего́ пострада́ти за Него́ до конца́, Всеми́лостивый Госпо́дь яви́ся ти́, да укрепи́шися во предстоя́щих страда́ниих и вопие́ши Ему́: Аллилу́иа.

И́кос 7.

Но́вую благода́ть и си́лу в тебе́ уви́дев, удиви́ся Неро́н му́жеству твоему́, Фоти́ние всехва́льная, и предаде́ тя́ на крепча́йшия муче́ния; па́ки же удиви́ся, ви́дя неуязви́мость твою́ и безси́лие истяза́вших тя́. Мы́ же, разуме́я Бо́жие попече́ние о тебе́, вопие́м:

Ра́дуйся, кре́ст Христо́в на ра́мо свое́, я́ко и́го благо́е, взе́мшая; ра́дуйся, руко́ю Христо́вою от истяза́телей защище́нная.

Ра́дуйся, я́ко си́лою Бо́жиею мучи́телей свои́х безси́льными соде́лала еси́; ра́дуйся, я́ко ве́ру христиа́нскую среди́ язы́чников просла́вила еси́.

Ра́дуйся, си́лою Бо́жиею свы́ше вооруже́нная; ра́дуйся, си́лам тьмы́ противоста́ти благода́тию Бо́жиею возмо́гшая.

Ра́дуйся, христиа́н неувяда́емый цве́те; ра́дуйся, му́чеников красото́ и забра́ло.

Ра́дуйся, му́ченице Фоти́ние, ко кла́дезю ве́ры на́с приводя́щая.

Конда́к 8.

Стра́нно бы́сть неве́рующим во Христа́ ве́дети, я́ко не оставля́ет Госпо́дь избра́нных рабо́в Свои́х: яви́ся бо Христо́с ча́дом твои́м, Фоти́ние, и возвести́ Ви́ктору: «Отны́не и́мя тебе́ бу́дет Фоти́н – светоза́рный, и́бо мно́гия, просвеще́ннии тобо́ю, обратя́тся ко Мне́»; Севастиа́на же Госпо́дь обо́дри та́ко: «Блаже́н, и́же соверши́т по́двиг сво́й до конца́». Они́ же укрепле́нни на страда́ния за Христа́, еди́ным ду́хом воспе́ша Бо́гу: Аллилу́иа.

И́кос 8.

Вся́ пламене́я любо́вию ко Христу́, па́че все́х бла́г земны́х Его́ возлюби́ла еси́; предста́в же ку́пно со ча́ды свои́ми непра́ведному судии́, да́же до сме́рти му́ченическия ве́рною пребыла́ еси́ Спаси́телю твоему́. Мы́ же, умиля́яся ве́лией любви́ твое́й к Бо́гу, возглаша́ем ти́ та́ко:

Ра́дуйся, благода́ти Христо́вы преиспо́лненная; ра́дуйся, люби́ти Его́ па́че живота́ своего́ на́с науча́ющая.

Ра́дуйся, си́лу вра́жию до́бре победи́вшая; ра́дуйся, ви́дя муче́ния ча́д твои́х, в ве́ре не поколеба́вшаяся.

Ра́дуйся, и ины́х испове́дников на по́двиги укрепля́вшая; ра́дуйся, за вся́ благодари́ти Бо́га вразумля́вшая.

Ра́дуйся, я́ко еси́ на тве́рди не́ба церко́внаго лучеза́рное свети́ло; ра́дуйся, я́ко еси́ христиа́ном в напа́стех тве́рдое прибе́жище.

Ра́дуйся, му́ченице Фоти́ние, ко кла́дезю ве́ры на́с приводя́щая.

Конда́к 9.

Все́ естество́ А́нгельское и ли́цы святы́х удиви́шася непоколеби́мей ве́ре твое́й во Христа́, зря́ще на му́ченическую кончи́ну твою́, страстоте́рпице Христо́ва Фоти́ние, и ра́достно тя́ срето́ша, егда́ во врата́ Ца́рствия Небе́снаго вошла́ еси́, воспева́я: Аллилу́иа.

И́кос 9.

Вити́й глаго́лы не возмо́гут по достоя́нию восхвали́ти по́двиги и труды́ твоя́, достоблаже́нная Фоти́ние, ка́ко благода́тию Бо́жиею победи́вши ко́зни врага́ ро́да челове́ческаго и посрами́вши пре́лесть и́дольскую, мно́гия ко Христу́ привела́ еси́. Мы́ же благогове́йно возно́сим ти́ похвалы́ сия́:

Ра́дуйся, вся́ кра́сная ми́ра сего́ презре́вшая; ра́дуйся, спасти́ ду́шу свою́ па́че всего́ вожделе́вшая.

Ра́дуйся, и на́м, гре́шным, наде́жду на спасе́ние да́рующая; ра́дуйся, проше́ниям на́шим ми́лостиво вне́млющая.

Ра́дуйся, правосла́вных христиа́н пред Бо́гом всемо́щная засту́пнице; ра́дуйся, на́ша пред Бо́гом несумне́нная хода́таице.

Ра́дуйся, ру́ку по́мощи пребыва́ющим во тьме́ заблужде́ний подаю́щая; ра́дуйся, кре́пкое упова́ние име́ти на Бо́га все́х науча́ющая.

Ра́дуйся, му́ченице Фоти́ние, ко кла́дезю ве́ры на́с приводя́щая.

Конда́к 10.

Спасти́ хотя́ ду́шу свою́, о те́ле твое́м нераде́ла еси́, страда́лице Христо́ва Фоти́ние, и всю́ себе́ в же́ртву благово́нную Бо́гу принесла́ еси́, да возмо́жеши в селе́ниих пра́ведных воспева́ти Творцу́: Аллилу́иа.

И́кос 10.

Стена́ еси́ и прибе́жище спаси́тельное все́м моли́твенно к тебе́ притека́ющим и пред ико́ною твое́ю те́пле моля́щимся: тебе́ бо дарова́ на́м Всеми́лостивый Госпо́дь в по́мощь и врачева́ние от боле́зней душе́вных и теле́сных. Сего́ ра́ди прино́сим ти́ сицева́я:

Ра́дуйся, ве́ры Христо́вы неистоща́емое сокро́вище; ра́дуйся, жи́зни ве́чныя досто́йная насле́днице.

Ра́дуйся, в любви́ к Бо́гу приме́р все́м яви́вшая; ра́дуйся, апо́столом в про́поведи Ева́нгелия себе́ уподо́бившая.

Ра́дуйся, упова́нию на Бо́га на́с науча́ющая; ра́дуйся, пу́ть к по́двигу христиа́нскому на́м указу́ющая.

Ра́дуйся, я́ко в доброде́лании на́с укрепля́еши; ра́дуйся, я́ко в позна́нии и́стины на́с умудря́еши.

Ра́дуйся, му́ченице Фоти́ние, ко кла́дезю ве́ры на́с приводя́щая.

Конда́к 11.

Пе́ние умиле́нное на вся́кий ча́с Бо́гу приноси́ла еси́, свята́я Фоти́ние, наипа́че же в после́дния дни́ жития́ своего́, егда́ по повеле́нию зверонра́внаго Неро́на, безчелове́чно истяза́вшаго тя́, в кла́дезь глубо́кий вве́ржена была́ еси́, в не́мже, я́ко в черто́зе бра́чнем, воспева́ла еси́ Бо́гу: Аллилу́иа.

И́кос 11.

Светоза́рною свеще́ю на све́щнице церко́вней сия́еши, Фоти́ние всесла́вная, све́том благода́тным прогоня́я тьму́ грехо́вную от все́х жа́ждущих спасе́ния. Мы́ же со упова́нием и наде́ждою на милосе́рдие Бо́жие к на́м, гре́шным, восхваля́ем му́ченическую кончи́ну твою́ и ра́достно взыва́ем ти́:

Ра́дуйся, до конца́ кре́ст Христо́в досто́йно проне́сшая; ра́дуйся, злочести́ваго Неро́на неи́стовство посрами́вшая.

Ра́дуйся, я́ко во оби́тели Небе́сныя всели́лася еси́; ра́дуйся, я́ко Ца́рство Небе́сное унасле́довала еси́.

Ра́дуйся, в ри́зу Христо́ву оде́янная; ра́дуйся, ра́йскою сла́вою увенча́нная.

Ра́дуйся, я́ко в горни́ле скорбе́й ду́шу свою́ очи́стила еси́; ра́дуйся, я́ко блаже́нство несконча́емое насле́довала еси́.

Ра́дуйся, му́ченице Фоти́ние, ко кла́дезю ве́ры на́с приводя́щая.

Конда́к 12.

Благода́ть от Бо́га дана́ ти́ е́сть, му́ченице Фоти́ние, обраща́ти неве́рующих к ве́ре Христо́вой, укрепля́ти малове́рных и исцеля́ти боля́щих от разли́чных боле́зней. Сего́ ра́ди бу́ди те́плою моли́твенницею пред Бо́гом и о на́с, почита́ющих святу́ю па́мять твою́ и воспева́ющих о тебе́ Бо́гу: Аллилу́иа.

И́кос 12.

Пою́ще сла́вное служе́ние твое́ Христу́, кре́пкую ве́ру, му́жество и терпе́ние во страда́ниях за Него́, ублажа́ем святу́ю кончи́ну твою́, Фоти́ние светоза́рная, и, я́ко живе́й ти́ су́щей с на́ми, из глубины́ души́ взыва́ем си́це:

Ра́дуйся, пред Престо́лом Всевы́шняго на́ша хода́таице; ра́дуйся, чту́щим па́мять твою́ покрови́тельнице.

Ра́дуйся, призыва́ющих тя́ на по́мощь ско́ро слы́шащая; ра́дуйся, све́том трисо́лнечным сердца́ на́ша просвеща́ющая.

Ра́дуйся, грехи́ на́ша ви́дети на́м помога́ющая; ра́дуйся, на пути́ спасе́ния на́с утвержда́ющая.

Ра́дуйся, я́ко со апо́столы и все́ми святы́ми на Небеси́ торжеству́еши; ра́дуйся, я́ко ве́чныя жи́зни дости́гнути на́м вспомоществу́еши.

Ра́дуйся, му́ченице Фоти́ние, ко кла́дезю ве́ры на́с приводя́щая.

Конда́к 13.

О всехва́льная му́ченице Фоти́ние, све́т ве́ры Христо́вой лю́дем несу́щая и от Христа́ Небе́сною сла́вою увенча́нная! Приими́ от на́с, гре́шных, ма́лое моле́ние сие́, тебе́ приноси́мое, и моли́ Бо́га, да утверди́т и на́с в правосла́вней ве́ре и в соблюде́нии за́поведей Его́, да и мы́ со все́ми пра́ведными и святы́ми в де́нь Су́дный обря́щем милосе́рдие Го́спода на́шего Иису́са Христа́ и в ра́дости воспое́м Ему́: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгелов Творе́ц избра́ тя́, достоблаже́нная Фоти́ние, име́ла бо еси́ се́рдце, испо́лнено пра́вды Бо́жия и гото́вое восприя́ти глаго́лы жи́зни ве́чныя. Та́ко и Спаси́телю твоему́ отвеща́ла еси́: «Го́споди, да́ждь ми́ во́ду сию́, да ни жа́жду во ве́ки!» Мы́ же, дивя́щеся ве́лией ре́вности твое́й по Бо́зе, со умиле́нием зове́м ти́:

Ра́дуйся, се́рдце отве́рстое и́стине име́вшая; ра́дуйся, ве́ру отце́в свя́то храни́вшая.

Ра́дуйся, бесе́ды со Христо́м удосто́енная; ра́дуйся, ве́рою во Христа́ просия́вшая.

Ра́дуйся, я́ко сло́во Его́ восприя́ла еси́; ра́дуйся, я́ко глаго́лом Бо́жиим ду́шу свою́ преобрази́ла еси́.

Ра́дуйся, сло́ва Христо́ва пропове́днице; ра́дуйся, ко овца́м ста́да Христо́ва сопричте́нная.

Ра́дуйся, му́ченице Фоти́ние, ко кла́дезю ве́ры на́с приводя́щая.

Конда́к 1.

Избра́ннице Христо́ва, свята́я му́ченице Фоти́ние, прише́дшая ко кла́дезю Иа́ковлю почерпну́ти во́ду и обре́тшая Месси́ю, Иму́щаго во́ду жи́ву, похва́льная воспису́ем ти́, с любо́вию чту́щии святу́ю па́мять твою́, пою́ще:

Ра́дуйся, му́ченице Фоти́ние, ко кла́дезю ве́ры на́с приводя́щая.

Моли́тва.

О свята́я сла́вная и достохва́льная му́ченице Фоти́ние, усе́рдная на́ша пред Бо́гом предста́тельнице! К тебе́ усе́рдно прибега́ем и во умиле́нии серде́ц про́сим: бу́ди о на́с хода́таицею пред Го́сподем, да прости́т на́м вся́ согреше́ния на́ша во́льная и нево́льная, да наста́вит на́с на стезю́ исполне́ния за́поведей Свои́х, да очи́стит сердца́ на́ша от зло́бы, корыстолю́бия, за́висти, ле́сти и вся́кия ины́я скве́рны и да укрепи́т на́с в ве́ре, терпе́нии, моли́твенном де́лании, целому́дрии, доброжела́тельстве и любви́. Испроси́ на́м от Го́спода Спа́са на́шего ми́ра держа́ве на́шей, утвержде́ния наро́да на́шего в Правосла́вии и единомы́слии, да ти́хое и безмо́лвное житие́ поживе́м во вся́ком благоче́стии и чистоте́ и да сподо́бимся моли́твами твои́ми причте́нными бы́ти к овца́м избра́ннаго Его́ ста́да, я́коже и вси́ вразумле́нныя твое́ю богодухнове́нною про́поведию. Да да́рует на́м Госпо́дь христиа́нскую кончи́ну живота́ на́шего ми́рну, непосты́дну, Святы́х Та́ин прича́стну, Ему́же сла́ва, че́сть и поклоне́ние подоба́ет во ве́ки. Ами́нь.