Конда́к 1.

Избра́нная Бо́гом уго́днице Христо́ва, страстоте́рпице свята́я Людми́ло, восхваля́ем тя́ досто́йно, я́ко озари́ла еси́ святы́м креще́нием всю́ Боге́мию, и сто́лп ве́ры страны́ Мора́вския яви́лася еси́, поне́сши све́т испове́дания Христо́ва во вся́ зе́мли славя́нстии, сме́ртию же обре́тши нетле́нную жи́знь, с во́и А́нгельскими ны́не благодерзнове́нно сла́виши Го́спода Творца́, те́мже зове́м ти́:

Ра́дуйся, свята́я княги́не Людми́ло, страстоте́рпице Христо́ва.

И́кос 1.

А́нгели приско́рбни бы́ша о нече́стии славя́н, погиба́ху бо в неве́рствии, Бо́г же и Творе́ц вся́ческих, хотя́й все́м спасти́ся, призва́ тя́ от ю́ности, блаже́нная Людми́ло, зря́ благоро́дие души́ твоея́, ты́ же испо́лнила еси́ все́ смотре́ние Его́ и яви́лася еси́ испове́дница Христо́ва, сего́ ра́ди восхваля́ем тя́:

Ра́дуйся, Че́шския земли́ прозябе́ние; ра́дуйся, Правосла́вия в славя́нских зе́млях нача́льнице.

Ра́дуйся, пе́рвым христиа́ном подо́бнице; ра́дуйся, лю́дем после́дняго вре́мене пра́вило и о́браз.

Ра́дуйся, ни́во плодови́тая, се́мя ве́ры Христо́вы возрасти́вшая; ра́дуйся, жа́тво зре́лая, Христу́ угото́ванная.

Ра́дуйся, славя́нскаго благоче́стия светоза́рный рассве́те; ра́дуйся, язы́ческаго нече́стия че́шских племе́н ско́рый зака́те.

Ра́дуйся, благове́стия посреде́ славя́н прама́ти; ра́дуйся, со́нма славя́нских же́н первому́ченице.

Ра́дуйся, земли́ Че́шския забра́ло и утвержде́ние; ра́дуйся, шле́ме и щи́те Правосла́вия.

Ра́дуйся, свята́я княги́не Людми́ло, страстоте́рпице Христо́ва.

Конда́к 2.

Ви́дяй Христо́с Бо́г пути́ твоя́, блаже́нная Людми́ло, устро́и, я́ко поя́т тя́ Бориво́й кня́зь, красе́н те́ла ю́ностию и души́ благоразу́мием. Си́м сою́зом достосла́вным просвети́ Христо́с ве́рою че́шския племена́, и умно́жися ро́д тво́й, Людми́ло, теле́сне и духо́вне, те́мже Бо́га сла́вим: Аллилу́иа.

И́кос 2.

Ра́зум богопросвеще́нный дарова́ ти́ Бо́г, свята́я му́ченице Людми́ло, да оста́виши тьму́ идолопокло́нства. Во сла́внем Велегра́де кня́зь Святопо́лк посади́ тя́ и му́жа твоего́ Бориво́я не с собо́ю, но со слуги́, за неве́рствие ва́ше, те́мже оскорбе́сте вы́ сердцы́ и уразуме́сте словеса́ благоглаго́ливаго Мефо́дия Мора́вскаго, я́ко него́же пога́ны бы́ти, но крести́тися во Христа́ подоба́ет и в Него́ облещи́ся. Тя́, после́довавшую за супру́гом твои́м к жи́зни но́ве, сла́вим си́це:

Ра́дуйся, богому́дрия таи́ннице; ра́дуйся, злоче́стия губи́тельнице.

Ра́дуйся, све́т Христо́вы ве́ры избра́вшая; ра́дуйся, тьму́ язы́ческаго нече́стия отгна́вшая.

Ра́дуйся, со рабо́тники единонадеся́таго часа́ мзду́ прия́вшая; ра́дуйся, тщету́ и тле́ние презре́вшая.

Ра́дуйся, сла́достный ме́д благода́ти Христо́вы вкуси́вшая; ра́дуйся, го́речь испове́дания му́жественне поне́сшая.

Ра́дуйся, я́ко до́льняя отри́нула еси́; ра́дуйся, я́ко го́рняя взыска́ла еси́.

Ра́дуйся, го́рлицею к Небеси́ возлете́вшая; ра́дуйся, зми́я вселука́ваго благоче́стием низложи́вшая.

Ра́дуйся, свята́я княги́не Людми́ло, страстоте́рпице Христо́ва.

Конда́к 3.

Си́лою Христо́ва уче́ния де́йствуяй, архиепи́скоп Мефо́дий Мора́вский, ве́лий учи́тель славя́н, сре́те тя́, Людми́ло достосла́вная, и мно́го бесе́довав с тобо́ю, све́том позна́ния Христо́ва просвети́ тя́ и ча́сти спаса́емых причте́ тя́. Ты́ же, да́р се́й возгрева́я доброде́тельми свои́ми, восхожда́ше в Небе́сное Ца́рствие, иде́же святи́и со А́нгелы пою́т Пресвяте́й Тро́ице пе́снь: Аллилу́иа.

И́кос 3.

Иму́ще би́сер до́брый, благода́ть ве́ры Христо́вой, возврати́шася свята́я Людми́ло с Бориво́ем в зе́мли Че́шския и основа́ша та́мо кре́пость Гра́дишин на бре́зе реки́ Влта́вы, я́же ны́не Пра́жский гра́д, и воздвиго́ша це́рковь и призва́ша пресви́теры ве́рныя. Мы́ же, почита́юще моли́твы твоя́, свята́я Людми́ло, и труды́ утвержде́ния ве́ры Правосла́вныя, велича́ем тя́:

Ра́дуйся, та́инством Креще́ния обновле́нная; ра́дуйся, святы́м Миропома́занием освяще́нная.

Ра́дуйся, равноапо́стольнаго Мефо́дия после́довательнице; ра́дуйся, Правосла́вия побо́рнице.

Ра́дуйся, све́т Христо́вы ве́ры прия́вшая; ра́дуйся, тьму́ язы́чества презре́вшая.

Ра́дуйся, цветоуха́нный вертогра́де доброде́телей; ра́дуйся, истребле́ние те́рния страсте́й.

Ра́дуйся, пресви́теров благочести́вых прия́телище; ра́дуйся, богослуже́ния на славя́нстем язы́це утвержде́ние.

Ра́дуйся, церкве́й Бо́жиих ре́вностная строи́тельнице; ра́дуйся, ве́ры правосла́вныя неусы́пная пропове́днице.

Ра́дуйся, свята́я княги́не Людми́ло, страстоте́рпице Христо́ва.

Конда́к 4.

Бу́рю ско́рби в се́рдцы свое́м име́ла еси́, свята́я Людми́ло добронра́вная, егда́ сконча́ся Бориво́й. Оста́вшуся ти́ вдови́цею, все́ житие́ твое́ Пресвяте́й Тро́ице посвяти́ла еси́: сле́зныя моли́твы за лю́ди твоя́ возноша́ше, ни́щим же име́ние раздая́ше, си́рым и вдови́цам помога́ше, и та́ко служи́ла еси́ Еди́ному сла́вимому Бо́гу, Ему́же пое́м: Аллилу́иа.

И́кос 4.

Слы́ша и ви́де Драгоми́ра, неве́стка твоя́, о Людми́ло благонра́вная, я́ко Бо́гом ты́ почтена́ и челове́ки люби́ма, те́мже, за́вистию одержи́ма, по де́йству диа́волю вражду́ к тебе́ возыме́. Сия́ окая́нная хотя́ше ве́ру Христо́ву низложи́ти и владе́ти страно́ю еди́на. Ты́ же, страстоте́рпице Христо́ва, па́че утверди́лася еси́ во благоче́стии, сего́ ра́ди хва́лим тя́:

Ра́дуйся, благо́е и́го Христо́во взе́мшая; ра́дуйся, ле́гкое бре́мя Его́ поне́сшая.

Ра́дуйся, я́ко и́стинною кро́тостию ми́лость Бо́жию прия́ла еси́; ра́дуйся, я́ко прему́дростию и терпе́нием скорбе́й возвели́чилася еси́.

Ра́дуйся, благоча́дие присносла́вное; ра́дуйся, ве́рносте Христо́вым за́поведем.

Ра́дуйся, я́ко потща́нием убо́гих де́нь озаря́вшая; ра́дуйся, я́ко сле́зными моли́твами но́щь ороша́вшая.

Ра́дуйся, благосе́рдие к ни́щим иму́щая; ра́дуйся, си́рых и вдови́ц пита́тельнице.

Ра́дуйся, я́ко смире́нием зло́бу врага́ низложи́ла еси́; ра́дуйся, я́ко любо́вию за́висть гони́телей победи́ла еси́.

Ра́дуйся, свята́я княги́не Людми́ло, страстоте́рпице Христо́ва.

Конда́к 5.

Боготе́чная звезда́ яви́лася еси́, свята́я му́ченице Людми́ло, вну́ку твоему́ Вячесла́ву, я́ко научи́ его́ и́стинней Христо́вой ве́ре и благоче́стию. Злонра́вная же Драгоми́ра помышля́ше в се́рдце свое́м: бы́сть сы́н мо́й не я́ко кня́зь, но я́ко мни́х. И та́ко ожесте́ се́рдце ея́, и овладе́ша бе́си душе́ю ея́. Бо́г же увенча́ главу́ твою́, Людми́ло, му́жеством, долготерпе́нием и кро́тостию, мы́ же с тобо́ю Бо́гови вопие́м: Аллилу́иа.

И́кос 5.

Ви́дящи зло́бу окая́нныя Драгоми́ры, ты́, свята́я му́ченице Людми́ло, ве́лие смире́ние иму́щи, удали́лася еси́ в кре́пость Течи́н и бя́ше та́мо моля́ся, Христа́ же тща́щися взыска́ти вседу́шно, те́мже взыва́ем ти́:

Ра́дуйся, проще́нием гони́телей ду́шу на высоту́ ве́ры возне́сшая; ра́дуйся, кро́тостию лю́ди ве́рныя к себе́ привле́кшая.

Ра́дуйся, воспита́ния пра́вило благочести́вое; ра́дуйся, просвеще́ния о́бразе досто́йный.

Ра́дуйся, златослове́сное уче́ние источа́ющая; ра́дуйся, к Боже́ственным за́поведем приводя́щая.

Ра́дуйся, моли́твы и бде́ния усе́рдная учи́тельнице; ра́дуйся, в доброде́телех изря́дная наста́внице.

Ра́дуйся, криле́ и защи́то все́х оби́димых; ра́дуйся, се́не и покро́ве все́м притека́ющим к тебе́.

Ра́дуйся, я́ко благодея́нии свои́ми Пресвяту́ю Тро́ицу просла́вила еси́; ра́дуйся, я́ко ве́лиими щедро́тами диа́вола посрами́ла еси́.

Ра́дуйся, свята́я княги́не Людми́ло, страстоте́рпице Христо́ва.

Конда́к 6.

Пропове́дница Христо́ва яви́лася еси́, свята́я страстоте́рпице Людми́ло, егда́ Драгоми́ра окая́нная посла́ слуги́ своя́ погуби́ти тя́, ре́кши и́м: напа́дше на ню́ но́щию, погуби́те ю́. И испо́лниша повеле́ние ея́. Ты́ же, я́ко а́гница неви́нная, с кро́тостию ожида́ла еси́ часа́ своего́, Бо́гови вопия́: Аллилу́иа.

И́кос 6.

Возсия́ла еси́ све́том долготерпе́ния, свята́я Людми́ло, моля́щися и проща́ющи, егда́ злочести́вии уби́йцы наидо́ша на кре́пость. Ты́ же хотя́ вразуми́ти и́х, поча́ла еси́ укоря́ти я́, реку́щи: Ку́ю оби́ду сотвори́х ва́м? Ко́е зло́ ва́м соде́ях? Та́ко ли почто́сте благодея́ния и ми́лости моя́? Но не вня́ша словесе́м твои́м злоде́и и придави́ша тя́, страстоте́рпице, ве́рвию. И та́ко сконча́лася еси́ и восприя́ла еси́ неувяда́емый вене́ц от Христа́ Бо́га на́шего, те́мже пое́м ти́ си́це:

Ра́дуйся, пре́жде безсме́ртия сме́ртию за Христа́ украси́вшаяся; ра́дуйся, страда́нием Христу́ уневе́стившаяся.

Ра́дуйся, цве́те благоуха́нный Христо́ва испове́дания; ра́дуйся, кла́се спе́лый, небе́сное жи́то умно́живый.

Ра́дуйся, ве́лие бога́тство скорбьми́ приобре́тшая; ра́дуйся, сме́ртию увенча́нная.

Ра́дуйся, по́прище му́ченичества избра́вшая; ра́дуйся, стезе́ю испове́дания в Небе́сная селе́ния все́льшаяся.

Ра́дуйся, я́ко неприча́стна тле́нию яви́лася еси́; ра́дуйся, я́ко сонасле́дница му́чеников бы́ти удосто́илася еси́.

Ра́дуйся, я́ко со А́нгелы ны́не пое́ши Трисвяту́ю пе́снь; ра́дуйся, я́ко в Небе́сных черто́зех покланя́ешися Седя́щему на Престо́ле.

Ра́дуйся, свята́я княги́не Людми́ло, страстоте́рпице Христо́ва.

Конда́к 7.

Хотя́ще скры́ти бога́тство нескрыва́емое, мучи́тели скры́ша те́ло твое́ под стено́ю кре́пости, свята́я Людми́ло, оба́че све́т твоего́ страда́ния возсия́ светлосия́нно но́вым благоле́пием, и та́ко посра́млени бы́ша врази́ твои́, ты́ же от Бо́га че́сть и сла́ву прия́ла еси́, Ему́же с тобо́ю пое́м: Аллилу́иа.

И́кос 7.

Но́вую тя́ показа́ Бо́г звезду́, просвети́вшую лю́ди славя́нския, блаже́нная му́ченице Людми́ло, ты́ же стра́сти претерпе́вши, ублажа́ешися во ве́ки, и лику́еши с со́нмы му́ченик. Ты́ у́бо небе́сная го́рлица яви́лася еси́, сто́лп и утвержде́ние земли́ Боге́мския. Сего́ ра́ди благоде́рзостно хва́лим тя́:

Ра́дуйся, све́тлая звездо́, зау́тро восходя́щая; ра́дуйся, ди́вное свети́ло, ве́рою Христо́вою наро́д сво́й просвети́вшее.

Ра́дуйся, ка́меню драги́й, иску́сно обточе́нный и сия́ющий нетле́нием; ра́дуйся, ба́рмо, же́мчугом кро́тости украше́нная и зе́мли славя́нския окаймля́ющая.

Ра́дуйся, самоцве́те многоце́нный, ли́к му́чеников украша́яй; ра́дуйся, исто́чниче ще́дрый, пото́ки моли́тв за лю́ди своя́ излива́яй.

Ра́дуйся, ве́нче златоза́рный, и́мже хва́лится вся́ славя́нская земля́; ра́дуйся, свети́льниче сребропозлаще́нный, и́мже лю́дие че́шстии и́стиною просвети́шася.

Ра́дуйся, сме́ртию от нечести́вых че́сть и сла́ву стяжа́вшая; ра́дуйся, жи́знию пра́ведною в ра́й вше́дшая.

Ра́дуйся, адама́нте испове́дания и сто́лпе Правосла́вия; ра́дуйся, голуби́це миросве́тлая и упова́ние ве́рных.

Ра́дуйся, свята́я княги́не Людми́ло, страстоте́рпице Христо́ва.

Конда́к 8.

Стра́нное виде́ние ви́деша на ме́сте погребе́ния моще́й твои́х: се́ бо но́щию кре́пость озаря́шеся свеща́ми и воня́ми благоуха́ния наполня́шеся, мно́зии же прише́дшии поклони́тися страда́нию твоему́ исцеля́хуся. Сего́ ра́ди ве́лиим у́жасом ужасо́шася вси́, и ди́вным чудесе́м чуди́шася, и, ви́дяще сие́, уразуме́ша, я́ко земля́ благослови́ся твои́м страда́нием, и реко́ша Бо́гови: Аллилу́иа.

И́кос 8.

Вся́ претерпе́ла еси́, и чрез страда́ние твое́ воспари́ла еси́ я́ко голуби́ца к вы́шним оби́телем, гро́б же прия́т те́ло твое́ честно́е я́ко сокро́вище многоце́нное. Взя́в же его́, святы́й Вячесла́в, вну́к тво́й, принесе́ в це́рковь свята́го Гео́ргия и поста́ви, и отве́рзе ра́ку, и испо́лнися це́рковь благоуха́ния, и вси́, ви́дяще честны́я и многоцеле́бныя мо́щи твоя́, просла́виша Бо́га и реко́ша тебе́ та́ко:

Ра́дуйся, свеще́, све́том испове́дания возсия́вшая; ра́дуйся, сия́ние лучеза́рное, любо́вь излуча́ющее.

Ра́дуйся, ковче́же нетле́ния, и́мже лю́дие че́шстии просвети́шася; ра́дуйся, вмести́лище чудесе́м, и́миже ро́д славя́нский удиви́ся.

Ра́дуйся, ла́рче златоза́рный, испо́лненный Боже́ственных та́ин; ра́дуйся, сосу́де избра́нный, и́мже благода́ть излива́ется.

Ра́дуйся, до́ме преукраше́нный, в не́мже Прему́дрость Бо́жия всели́ся; ра́дуйся, киво́те драгоце́нный, его́же Пресвята́я Тро́ица осени́.

Ра́дуйся, зла́тнице безце́нная, благотворя́щая лю́дем свои́м; ра́дуйся, арома́тнице благово́нная, утиша́ющая ско́рби на́ша.

Ра́дуйся, коллу́рие многоцеле́бный, врачу́ющий ны́; ра́дуйся, амвроси́е сла́достная, пита́ющая ны́.

Ра́дуйся, свята́я княги́не Людми́ло, страстоте́рпице Христо́ва.

Конда́к 9.

Вси́ христолюби́вии лю́дие удиви́шася, ка́ко ле́по яви́ Бо́г на́м святи́и мо́щи твоя́, Людми́ло присносла́вная, и что́ рече́м и возглаго́лем ти́, страстоте́рпице? Свя́та це́рковь, иде́же лежи́т бога́тство некра́домо, из него́же истека́ют неоскуде́юще исто́чницы цельбоно́снии, и чудесы́ содева́ются от святы́х моще́й твои́х, я́ко мо́лишися за ны́ Го́споду все́х, Ему́же пое́м: Аллилу́иа.

И́кос 9.

Вети́и многовеща́ннии ка́ко восхва́лят тя́, свята́я страстоте́рпице Людми́ло? Я́ко не даде́ Бо́г поги́бнути язы́ком Свои́м в пре́лести и́дольстей и изведе́ тобо́ю от тьмы́ на све́т, да благословя́т Отца́ Небе́снаго, и заблу́ждшия о́вцы славя́нстии со́брани бы́ша во еди́но свято́е ста́до, е́же хва́лит тя́:

Ра́дуйся, анки́ро, е́юже обрето́хом ве́чное Приста́нище; ра́дуйся, удобовхо́дная две́ре Правосла́вия.

Ра́дуйся, О́льзе равноапо́стольней предте́кшая; ра́дуйся, врата́ богому́дрия отве́рзшая, и́миже ве́ра Христо́ва в Мора́вию вни́де.

Ра́дуйся, я́ко благослове́нна еси́ в славя́нских кня́гинех; ра́дуйся, И́стину позна́вшая и ны́ просвети́вшая.

Ра́дуйся, смиренному́дрия преиспо́лненная; ра́дуйся, благосе́рдию ны́ науча́ющая.

Ра́дуйся, стра́ждущим лю́дем госпоже́ и корми́лице; ра́дуйся, стра́нных и убо́гих ще́драя уте́шительнице.

Ра́дуйся, зарю́ просвеще́ния на́м яви́вшая; ра́дуйся, страда́нием свои́м пра́вило благоче́стия указа́вшая.

Ра́дуйся, свята́я княги́не Людми́ло, страстоте́рпице Христо́ва.

Конда́к 10.

Спасе́ния хотя́й всему́ ро́ду челове́чу, избра́ тя́ Бо́г и положи́ тя́ ко́рень благоче́стия, ве́рнии же, тобо́ю благовозра́стшии и прозя́бшии ли́ствия мно́зи до́брых де́л, и цве́ти благода́ти прекра́снии испусти́вшии, плоды́ спасе́ния Бо́гу принося́ще, пою́т Ему́: Аллилу́иа.

И́кос 10.

Стена́ яви́лася еси́ но́вым лю́дем христиа́нским, свята́я Людми́ло, я́ко украси́ тя́ Влады́ка Христо́с венцы́ побе́дными и десни́цею Свое́ю венча́, те́мже и мо́щи твоя́ во гра́де Пра́жстем а́ки во святе́й сокро́вищнице храни́мии и са́мый гра́д благода́тию огражда́ющии, собира́ют мно́жество христиа́н, пою́щих ти́ сицева́я:

Ра́дуйся, гра́да Пра́жскаго че́сть и похвало́; ра́дуйся, Мора́вских земе́ль печа́льнице.

Ра́дуйся, лю́дем че́шским уте́шительнице; ра́дуйся, за ро́д славя́нский моли́твеннице.

Ра́дуйся, розго́ плодови́тая, исходя́щая от Лозы́ и́стинныя; ра́дуйся, ве́тве благозра́чная, испуща́ющая ростки́ многоцвету́щии.

Ра́дуйся, ладие́ ле́гкая, е́юже лю́дие че́шстии притеко́ша ко спасе́нию; ра́дуйся, корми́ло тве́рдое, управля́ющее ны́ к Бо́жией При́стани.

Ра́дуйся, виногра́де зре́лый, избра́нный для до́браго вина́; ра́дуйся, зерно́ спе́лое, угото́ванное для Небе́сныя жи́тницы.

Ра́дуйся, злата́рнице вероуче́ния Христо́ва; ра́дуйся, основа́ние тве́рдое, на не́мже Це́рковь Че́шская утвержда́ется.

Ра́дуйся, свята́я княги́не Людми́ло, страстоте́рпице Христо́ва.

Конда́к 11.

Пе́ние похва́льное воспое́м ти́, свята́я му́ченице Людми́ло, я́ко вступи́ в ополче́ние и во́инство му́ченик, и по сме́рти тле́ние и сме́рть побежда́еши, исцеля́еши бо слепи́и, боля́щим цельбы́ подае́ши, окова́нным разреше́ние, хромы́м хожде́ние, печа́льным уте́ху, напа́стным избавле́ние, я́ко засту́пница и покро́в всему́ ро́ду славя́нскому, те́мже тобо́ю Бо́га хва́лим: Аллилу́иа.

И́кос 11.

Светоприе́мную свещу́ обре́тше тя́, блаже́нная Людми́ло, зри́м и ны́не, я́ко возжиза́еши о́гнь Христо́вы ве́ры, согрева́яй сердца́ лю́бящих тя́ и попаля́яй нече́стие злочести́вых, приводя́й же к ве́ре но́выя лю́ди. Мы́ же, благоподража́я тве́рдости ду́ха твоего́, христолюби́вая подви́жнице, та́коже хотя́ще тещи́ путе́м испове́дания Христо́ва, сла́вим тя́:

Ра́дуйся, свеще́ ве́ры неугаси́мая; ра́дуйся, еле́е милосе́рдия неисчерпа́емый.

Ра́дуйся, о́гнь, попаля́яй злоче́стие; ра́дуйся, исто́чниче ми́лости к моля́щимся тебе́.

Ра́дуйся, ка́меню ве́ры, на́с укрепля́яй; ра́дуйся, до́жде умиле́ния, пла́мя страсте́й на́ших угаша́яй.

Ра́дуйся, кла́дезю чи́стый, и́мже жа́жду на́шу утоля́еши; ра́дуйся, струе́ сладкогла́сная, ра́достию наде́жды ны́ ободря́ющая.

Ра́дуйся, е́зеро глубоково́дное, испо́лненное чудесы́; ра́дуйся, реко́ быстротеку́щая, зе́мли на́ша уче́нием Христо́вым омыва́ющая.

Ра́дуйся, мре́же златотка́нная, в ню́же лю́дие славя́нстии улови́шася; ра́дуйся, у́дице благоду́шная, со дна́ страсте́й ны́ изыма́ющая.

Ра́дуйся, свята́я княги́не Людми́ло, страстоте́рпице Христо́ва.

Конда́к 12.

Благода́ть снизшла́ е́сть на многострада́льную главу́ твою́, свята́я му́ченице Людми́ло, и ка́ко тя́ нарече́м: А́нгела ли? с ни́миже пребыва́еши, а́ще и пло́тски на земли́ пожила́ еси́. Челове́ка ли? оба́че ты́ не я́ко пе́рстнии источа́еши чудесы́. Княги́ню ли возгласи́м тя́? оба́че смире́нием ума́лилася еси́. И та́ко рече́м ти́: о небе́сный челове́че и земны́й А́нгеле, смире́нием во Ца́рствие прия́тая Христо́м Царе́м, Ему́же вси́ пою́т: Аллилу́иа.

И́кос 12.

Пою́ще твое́ страда́ние, хва́лим долготерпе́ние твое́, сла́вными бо твои́ми чудесы́ напо́лнися вся́ вселе́нная, свята́я страстоте́рпице Людми́ло, сме́ртию бо прия́т нетле́ние ле́по и прече́стно те́ло твое́, ди́вны и пречу́дны чудеса́ твоя́, све́тлы и красны́ мо́щи твоя́, испо́лнь благово́ния. О свята́я Людми́ло присносла́вная, не забу́ди Оте́чествия твоего́ и вси́ славя́нския зе́мли, иде́же вы́ну благодаря́ще пою́т ти́:

Ра́дуйся, я́ко А́нгели почуди́шася чудесе́м твои́м; ра́дуйся, я́ко челове́цы просла́виша страда́ния твоя́.

Ра́дуйся, диади́мо златокова́ная, избра́нныя своя́ богому́дрием венча́ющая; ра́дуйся, ко́шнице, доброде́тельми преиспо́лненная, ще́дро ны́ благода́тию пита́ющая.

Ра́дуйся, же́зле незы́блемый, и́мже ве́ра Христо́ва утверди́ся; ра́дуйся, кре́посте непристу́пная, в не́йже ве́ра правосла́вная сохрани́ся.

Ра́дуйся, свире́ле духо́вная, богодухнове́нным звуча́нием ны́ услажда́ющая; ра́дуйся, цевни́це благозву́чная, хвалу́ Бо́гу по все́й вселе́нней воспева́ющая.

Ра́дуйся, неуста́нная за ны́ моли́твеннице; ра́дуйся, те́плая к Бо́гу за все́х упова́ющих на тя́ хода́таице.

Ра́дуйся, я́ко доброде́тели твоя́ сия́ют па́че зве́зд небе́сных; ра́дуйся, я́ко плоды́ твоего́ богому́дрия не иссяка́ют сла́достию духо́вною.

Ра́дуйся, свята́я княги́не Людми́ло, страстоте́рпице Христо́ва.

Конда́к 13.

О свята́я му́ченице и уго́днице Христо́ва Людми́ло! Сие́ ма́лое песносло́вие от на́с прие́млющи, моли́ ми́лостиваго Го́спода Бо́га на́шего, да вложи́т в на́с жа́жду Ца́рствия Небе́снаго. Бу́ди хода́таица пред Бо́гом о все́х к тебе́ припа́дающих, су́етство жития́ оста́вити жела́ющих, с тобо́ю в ра́й вни́ти взыску́ющих и Триеди́ному Бо́гу воспева́ти дерза́ющих: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгели приско́рбни бы́ша о нече́стии славя́н, погиба́ху бо в неве́рствии, Бо́г же и Творе́ц вся́ческих, хотя́й все́м спасти́ся, призва́ тя́ от ю́ности, блаже́нная Людми́ло, зря́ благоро́дие души́ твоея́, ты́ же испо́лнила еси́ все́ смотре́ние Его́ и яви́лася еси́ испове́дница Христо́ва, сего́ ра́ди восхваля́ем тя́:

Ра́дуйся, Че́шския земли́ прозябе́ние; ра́дуйся, Правосла́вия в славя́нских зе́млях нача́льнице.

Ра́дуйся, пе́рвым христиа́ном подо́бнице; ра́дуйся, лю́дем после́дняго вре́мене пра́вило и о́браз.

Ра́дуйся, ни́во плодови́тая, се́мя ве́ры Христо́вы возрасти́вшая; ра́дуйся, жа́тво зре́лая, Христу́ угото́ванная.

Ра́дуйся, славя́нскаго благоче́стия светоза́рный рассве́те; ра́дуйся, язы́ческаго нече́стия че́шских племе́н ско́рый зака́те.

Ра́дуйся, благове́стия посреде́ славя́н прама́ти; ра́дуйся, со́нма славя́нских же́н первому́ченице.

Ра́дуйся, земли́ Че́шския забра́ло и утвержде́ние; ра́дуйся, шле́ме и щи́те Правосла́вия.

Ра́дуйся, свята́я княги́не Людми́ло, страстоте́рпице Христо́ва.

Конда́к 1.

Избра́нная Бо́гом уго́днице Христо́ва, страстоте́рпице свята́я Людми́ло, восхваля́ем тя́ досто́йно, я́ко озари́ла еси́ святы́м креще́нием всю́ Боге́мию, и сто́лп ве́ры страны́ Мора́вския яви́лася еси́, поне́сши све́т испове́дания Христо́ва во вся́ зе́мли славя́нстии, сме́ртию же обре́тши нетле́нную жи́знь, с во́и А́нгельскими ны́не благодерзнове́нно сла́виши Го́спода Творца́, те́мже зове́м ти́:

Ра́дуйся, свята́я княги́не Людми́ло, страстоте́рпице Христо́ва.

Моли́тва.

О свята́я Людми́ло, ве́рою тве́рдою, наде́ждою глубо́кою, любо́вию всепокрыва́ющею, ми́рным и кро́тким нра́вом твои́м ты́ в житии́ свое́м Бо́гу прилепи́лася еси́, с Ни́мже и по сме́рти пребыва́еши, те́мже и о на́с хода́тайствуеши, лю́ди своя́ заступа́еши, ве́рныя возвеселя́еши. Ты́ я́ко блага́я ма́ти вся́ ны́ любо́вию свое́ю обыми́, ни́щия и ско́рбныя при́зри, ве́ре христиа́нстей научи́! Тебе́ мо́лимся и па́мять твою́ све́тло почита́ем, о свята́я Людми́ло! Проли́й от моще́й твои́х в души́ на́ша ми́ро духо́вное, и́мже ты́ преиспо́лнена еси́. Возжзи́ в сердца́х на́ших зарю́ дне́ Боже́ственнаго, да возсия́ет на на́с све́т Со́лнца Пра́вды, и да ходя́ще непреткнове́нно стезя́ми ве́рными чрез все́ житие́ на́ше, дости́гнем Ца́рствия Небе́снаго, иде́же просла́вим Спаси́теля на́шего Го́спода Иису́са Христа́ со Безнача́льным Его́ Отце́м и с Пресвяты́м Ду́хом Уте́шителем во ве́ки веко́в. Ами́нь.