Конда́к 1.

Избра́нней прароди́тельнице Христа́ Бо́га на́шего, Ду́ха Свята́го благода́ти испо́лненней, пе́сни хвале́бныя принесе́м, ве́рнии, я́ко моли́твами свои́ми избавля́ет на́с от бе́д и скорбе́й, благода́ть излива́ющи все́м вопию́щим е́й такова́я:

Ра́дуйся, А́нно Богому́драя.

И́кос 1.

А́нгел с Небесе́ предста́, провеща́я тебе́, А́нно, о зача́тии Дще́ри Преблагослове́нныя, от Нея́же роди́тися и́мать Спа́с ми́ру – Христо́с. Мы́ же, дивя́ся неизрече́нному о тебе́ Бо́жию Про́мыслу, вопие́м ти́ такова́я:

Ра́дуйся, пред Бо́гом неуста́нная на́ша моли́твеннице; ра́дуйся, препросла́вленная прама́терь Госпо́дня.

Ра́дуйся, Зако́на, Бо́гом да́ннаго, почита́ние; ра́дуйся, сла́вы гряду́щия возглаше́ние.

Ра́дуйся, Бо́га Всемогу́щаго умилостивле́ние; ра́дуйся, глубино́ вся́кия доброде́тели.

Ра́дуйся, роди́вши Дще́рь, в ста́рости процве́тшая; ра́дуйся, Про́мыслу Бо́жию всю́ себе́ преда́вшая.

Ра́дуйся, заре́ сия́ния гряду́щаго; ра́дуйся, сосу́де благода́ти Бо́жия.

Ра́дуйся, безпло́дие умертви́вшая; ра́дуйся, чадоро́дие яви́вшая.

Ра́дуйся, А́нно Богому́драя.

Конда́к 2.

Ви́дев себе́ А́нна в безпло́дии пребыва́ющую, воззва́ ко Го́споду вся́ческих, да сподо́бит ю́ ма́терь ча́ду бы́ти. И се́ яви́ся е́й А́нгел Госпо́день, глаго́ля: «Услы́шана е́сть моли́тва твоя́ и воздыха́ния твоя́ проидо́ша о́блаки, сле́зы же твоя́ пред Бо́га внидо́ша; се́ зачне́ши и роди́ши Дще́рь Преблагослове́нную, о Не́йже возблагословя́тся вся́ коле́на земна́я, и То́ю да́стся спасе́ние всему́ ми́ру, нарече́тся же и́мя Е́й: Мари́я». И зача́в, родила́ еси́ Ту́, от Нея́же Рожде́нному воспева́ем: Аллилу́иа.

И́кос 2.

Ра́зумом свы́ше осене́нная, прама́ти Госпо́дня, изволе́нием Вы́шняго в ста́рости зачала́ еси́, возра́довавшеся неизрече́нно; роди́в же ми́ру исто́чник ра́дости, мра́к уны́ния отжени́ от на́с, все́ми воспева́емая си́це:

Ра́дуйся, воздыха́ния на́ша не отверга́ющая; ра́дуйся, весе́лия сердца́ на́ша исполня́ющая.

Ра́дуйся, поноше́ние безча́дства попра́вшая; ра́дуйся, ко́рень де́вства ми́ру яви́вшая.

Ра́дуйся, в ле́тех прекло́нных Дще́рь Пресвяту́ю роди́вшая; ра́дуйся, виде́нием Богоотрокови́цы услажде́нная.

Ра́дуйся, веле́ний Бо́жиих испо́лненная; ра́дуйся, кро́тостию и смире́нием украше́нная.

Ра́дуйся, благода́ть у Бо́га обре́тшая; ра́дуйся, ле́сть бесо́вскую отгна́вшая.

Ра́дуйся, бе́дствующим ско́рая помо́щнице; ра́дуйся, защи́тнице на́ша и́стинная.

Ра́дуйся, А́нно Богому́драя.

Конда́к 3.

Бо́гу славосло́вие принося́, свята́я А́нно, с Иоаки́мом, супру́гом твои́м, триле́тнюю непоро́чную Ю́ницу во святи́лище Бо́жие привела́ еси́, я́коже обеща́лася Го́сподеви, воспева́я пе́снь: Аллилу́иа.

И́кос 3.

Стопы́ твоя́ по за́поведем Бо́жиим направля́я, яви́лася еси́ о́бразом доброде́телей, всеблаже́нная А́нно. Мы́ же, ви́дяще пра́ведное житие́ твое́, воспева́ем си́це:

Ра́дуйся, ве́рных спаси́тельное прибе́жище; ра́дуйся, христиа́н непосты́дное упова́ние.

Ра́дуйся, нача́ток на́шего спасе́ния; ра́дуйся, кла́дезю вся́кия доброде́тели.

Ра́дуйся, оби́льная лозо́ плодо́в пра́ведности; ра́дуйся, достопочте́нная ски́ние даро́в Небе́сных.

Ра́дуйся, обетова́ние Бо́жие обре́тшая; ра́дуйся, Дще́рь Преблагослове́нную ро́ждшая.

Ра́дуйся, о́бразе ве́ры зако́нныя; ра́дуйся, розго́ виногра́да живо́тнаго.

Ра́дуйся, реко́ даро́в оби́льных; ра́дуйся, кимва́ле доброгла́сный сла́вы Бо́жия.

Ра́дуйся, А́нно Богому́драя.

Конда́к 4.

Житие́ свое́ в богопочте́нии проводя́щи, всели́лася еси́, я́ко ма́терь Преблагослове́нныя Богоро́дицы, в селе́ния го́рняя, и вку́пе с Пречи́стою Дще́рию твое́ю предстои́ши Небе́сному Престо́лу, взыва́я к Рожде́нному от Нея́: Аллилу́иа.

И́кос 4.

От ми́ра до́льняго ко сла́ве Небе́сней возше́дшая и та́мо ди́вно со Дще́рию твое́ю Го́сподеви предста́вшая, А́нно всеблаже́нная, ми́ром и любо́вию оби́льно исполня́еши на́с, на земли́ тебе́ пою́щих такова́я:

Ра́дуйся, Бо́жиим све́том озаре́нная; ра́дуйся, вмести́лище ра́дости непреста́нныя.

Ра́дуйся, ве́лия благоче́стия та́йны досто́йная служи́тельнице; ра́дуйся, Бо́жия к челове́ком снисхожде́ния всеизря́дная посре́днице.

Ра́дуйся, све́та животворя́щаго испо́лненная; ра́дуйся, дерзнове́ние ве́лие ко Го́споду иму́щая.

Ра́дуйся, Ма́терь Бо́жию роди́вшая; ра́дуйся, мно́гих на пу́ть спасе́ния наставля́ющая.

Ра́дуйся, неду́ги многоразли́чныя исцеля́ющая; ра́дуйся, си́лу вра́жию упраздня́ющая.

Ра́дуйся, та́ин Бо́жиих прия́телище; ра́дуйся, Це́ркве, на Небеси́ торжеству́ющия, украше́ние.

Ра́дуйся, А́нно Богому́драя.

Конда́к 5.

Искупи́теля на́шего сия́нием Боже́ственным озаре́нная, свята́я пра́ведная А́нно, мра́к неве́дения отжени́ от на́с, воспева́ющих Бо́гу: Аллилу́иа.

И́кос 5.

Ви́девше тя́, пра́ведная А́нно, весе́лия испо́лненную, я́ко рождество́м Дще́ри твоея́ безча́дие твое́ разреши́ся; сего́ ра́ди мо́лим тя́: испо́лни ра́дости духо́вныя все́х тебе́ воспева́ющих:

Ра́дуйся, исто́чник благода́ти ро́ждшая; ра́дуйся, жи́зни ве́чныя дости́гшая.

Ра́дуйся, же́н благогове́йных ве́нче; ра́дуйся, благода́ти Бо́жия сокро́вище.

Ра́дуйся, сто́лпе и́стиннаго целому́дрия; ра́дуйся, Ду́ха Боже́ственнаго жили́ще.

Ра́дуйся, исто́чниче чуде́с Бо́жиих; ра́дуйся, ду́ш святы́х украше́ние.

Ра́дуйся, воздыха́ния на́ша не отверга́ющая; ра́дуйся, мно́жество страсте́й исцеля́ющая.

Ра́дуйся, си́лу враго́в на́ших ни во что́же обраща́ющая; ра́дуйся, ве́рных си́лою Бо́жиею укрепля́ющая.

Ра́дуйся, А́нно Богому́драя.

Конда́к 6.

Поноше́ние безча́дства отри́нувше, зачала́ еси́ в ста́рости твое́й, А́нно преблаже́нная; сего́ ра́ди прия́ла еси́ благода́ть от Бо́га жена́м безпло́дным, с ве́рою к тебе́ притека́ющим, ча́да дарова́ти, вопию́щим Бо́гу: Аллилу́иа.

И́кос 6.

Возсия́ла еси́, я́ко светоза́рная звезда́, богоуго́дным житие́м твои́м, пра́ведная А́нно, отгоня́ющи тьму́ греха́ и неве́рия. Те́мже восхваля́юще тя́, усе́рдно вопие́м:

Ра́дуйся, я́ко ма́терь еси́ Ма́тери Спа́са на́шего; ра́дуйся, Небе́снаго Престо́ла предстоя́тельнице.

Ра́дуйся, дерзнове́ние ве́лие ко Го́споду иму́щая; ра́дуйся, при́сно о на́с пред Ни́м моля́щаяся.

Ра́дуйся, со Дще́рию твое́ю, все́х Цари́цею, ве́чно ца́рствующая; ра́дуйся, в Сио́не го́рнем све́тло торжеству́ющая.

Ра́дуйся, зе́млю де́вства произве́дшая; ра́дуйся, плоды́ сла́вы ве́чныя собра́вшая.

Ра́дуйся, страсте́м грехо́вным пу́ть прегражда́ющая; ра́дуйся, мра́к ду́ш на́ших разгоня́ющая.

Ра́дуйся, бе́дствующим помо́щнице; ра́дуйся, Сло́ва Бо́жия прама́терь.

Ра́дуйся, А́нно Богому́драя.

Конда́к 7.

Все́х на́с, к заступле́нию твоему́ притека́ющих, изба́ви от вся́ких бе́д и скорбе́й, А́нно присноблаже́нная, и напра́ви стопы́ на́ша к жи́зни ве́чней, да во Ца́рствии Небе́снем при́сно вопие́м: Аллилу́иа.

И́кос 7.

Вся́ за́поведи Бо́жия в житии́ твое́м соблюда́ла еси́, свята́я пра́ведная А́нно; те́мже помози́ и на́м се́рдцем чи́стым сла́вити Го́спода, зову́ще тебе́ такова́я:

Ра́дуйся, звездо́, сия́ющая на Не́бе церко́внем; ра́дуйся, свети́льниче пресве́тлый, пу́ть спасе́ния на́м указу́ющий.

Ра́дуйся, сла́вы Бо́жия соприча́стнице; ра́дуйся, Ца́рствия Небе́снаго сонасле́днице.

Ра́дуйся, христиа́ном кре́пкое прибе́жище; ра́дуйся, ве́рным тве́рдое заступле́ние.

Ра́дуйся, же́н безпло́дных ча́дами веселя́щая; ра́дуйся, скорбя́щих утеша́ющая.

Ра́дуйся, прама́терь Бо́жия сла́вная; ра́дуйся, хода́таице о на́с усе́рдная.

Ра́дуйся, ду́ш ве́рных блаже́нная ра́досте; ра́дуйся, между́ жена́ми благословля́емая.

Ра́дуйся, А́нно Богому́драя.

Конда́к 8.

Обрела́ еси́ пло́д чу́дный в ста́рости Твое́й, пра́ведная А́нно, Богоотрокови́цу Мари́ю породивши; сего́ ра́ди вси́ ро́ди христиа́нстии Бо́гу, в тебе́ просла́вльшемуся, воспева́ют гла́сом ве́лиим: Аллилу́иа.

И́кос 8.

Стра́нствие земно́е соверши́вши, свята́я пра́ведная А́нно, сно́м сме́ртным на рука́х Преблагослове́нныя Дще́ри твоея́ почи́ла еси́ и в Небе́сныя оби́тели преста́вилася еси́. Те́мже свято́е успе́ние твое́ сла́вяще и к цельбоно́сным моще́м твои́м вы́ну притека́юще, вопие́м:

Ра́дуйся, безпло́дия разреше́ние; ра́дуйся, ча́д долгожда́нных рожде́ние.

Ра́дуйся, матери́нства благослове́ние; ра́дуйся, сокро́вище даро́в Бо́жиих неиждива́емое.

Ра́дуйся, у́зы греха́ растерза́ющая; ра́дуйся, ско́рбныя сердца́ дарова́нием ча́д ободря́ющая.

Ра́дуйся, дерзнове́ние ве́лие ко Го́споду стяжа́вшая; ра́дуйся, ми́лость Христо́ву привлека́ющая.

Ра́дуйся, неве́рных уста́ загражда́ющая; ра́дуйся, враги́ низлага́ющая.

Ра́дуйся, реко́ Бо́жия милосе́рдия; ра́дуйся, исцеле́ний исто́чниче неоскудева́емый.

Ра́дуйся, А́нно Богому́драя.

Конда́к 9.

Вси́ А́нгели Бо́жии и ли́цы святы́х на Небеси́ велича́ют тя́, преблаже́нная А́нно, вку́пе со святы́м супру́гом твои́м пра́ведным Иоаки́мом, ро́ди же челове́честии на земли́ моли́твенно на по́мощь ва́с призыва́ют, вопию́ще о предста́тельстве ва́шем Бо́гу: Аллилу́иа.

И́кос 9.

Вити́и многовеща́нныя умолко́ша, зря́ Преблагослове́нную Дще́рь твою́, свята́я пра́ведная А́нно, Ро́ждшую во пло́ти Всеблага́го Бо́га, спасе́ние ве́чное да́рующаго. Мы́ же вопие́м ти́ си́це:

Ра́дуйся, ра́дости исто́чниче; ра́дуйся, целому́дрия свети́льниче.

Ра́дуйся, вся́кую ле́сть обличи́вшая; ра́дуйся, мра́к но́щи и ка́мение преткнове́ния отмета́ющая.

Ра́дуйся, неду́ги многоболе́зненныя исцеля́ющая; ра́дуйся, пото́ки ми́лости излива́ющая.

Ра́дуйся, согреша́ющих вразумля́ющая; ра́дуйся, малове́рныя умудря́ющая.

Ра́дуйся, гре́шники к покая́нию призыва́ющая; ра́дуйся, от ро́ва поги́бели исхища́ющая.

Ра́дуйся, ра́дости на́шея основа́ние; ра́дуйся, сле́з на́ших избавле́ние.

Ра́дуйся, А́нно Богому́драя.

Конда́к 10.

Изба́ви на́с от вся́кия ну́жды, боле́зни и ско́рби, свята́я пра́ведная А́нно, и моли́твы на́ша Спа́су все́х Бо́гу принеси́, к заступле́нию твоему́ усе́рдно притека́ющих и в благогове́нии пою́щих: Аллилу́иа.

И́кос 10.

Стено́ю моли́тв твои́х заступи́ на́с, прама́ти Бо́жия А́нно, сохраня́ющи и огражда́ющи на́с от все́х прило́гов вра́жиих, мы́ бо вопие́м тебе́:

Ра́дуйся, благоче́стия сто́лпе; ра́дуйся, беззако́ния паде́ние.

Ра́дуйся, тружда́ющихся по́мощь; ра́дуйся, просла́вленная прама́терь Бо́жия.

Ра́дуйся, сме́ртныя неду́ги исцеля́ющая; ра́дуйся, сердца́ сокруше́нныя утеша́ющая.

Ра́дуйся, все́м стра́ждущим избавле́ние да́рующая; ра́дуйся, прося́щим по́мощь подаю́щая.

Ра́дуйся, еле́й ми́лости Бо́жия оби́льно на́м источа́ющая; ра́дуйся, све́том благода́ти, я́ко мо́лния, блиста́ющая.

Ра́дуйся, сла́ву Бо́жию зря́щая; ра́дуйся, со А́нгелы веселя́щаяся.

Ра́дуйся, А́нно Богому́драя.

Конда́к 11.

Пе́ние на́ше хвале́бное ми́лостивно приими́, свята́я пра́ведная А́нно, и щедро́т твои́х моли́твенных не лиши́ на́с, к тебе́ бо в ско́рбех серде́ц на́ших притека́ем, по́мощи у тебе́ прося́ще и вопию́ще все́х бла́г Пода́телю Бо́гу: Аллилу́иа.

И́кос 11.

Светоза́рным све́том ми́лостей сия́ет на́м о́браз тво́й честны́й, свята́я пра́ведная А́нно, подаю́щи исцеле́ния и благода́тную по́мощь все́м к нему́ притека́ющим и вопию́щим тебе́ си́це:

Ра́дуйся, утеше́ние стра́ждущих; ра́дуйся, укрепле́ние изнемога́ющих.

Ра́дуйся, безпло́дныя утро́бы исправле́ние; ра́дуйся, сокруше́ннаго се́рдца исцеле́ние.

Ра́дуйся, у́зы безпло́дия сокруша́ющая; ра́дуйся, стра́х страда́ния прекраща́ющая.

Ра́дуйся, ча́да безпло́дным да́рующая; ра́дуйся, исцеле́ние боля́щим подаю́щая.

Ра́дуйся, ма́терей благочести́вых похвало́; ра́дуйся, же́н безпло́дных помо́щнице.

Ра́дуйся, благоче́стных люде́й ликова́ние; ра́дуйся, ду́ш и теле́с на́ших врачева́ние.

Ра́дуйся, А́нно Богому́драя.

Конда́к 12.

Благода́ть Бо́жию на́м пода́ти, согреше́ний проще́ние и житию́ на́шему вся́ благопотре́бная у Го́спода испроси́, свята́я пра́ведная А́нно, и не преста́й моли́тися о на́с пред лице́м Христа́ Вседержи́теля, да, получи́вше от Него́ тобо́ю ми́лость, вопие́м Ему́: Аллилу́иа.

И́кос 12.

Пою́ще многомо́щное предста́тельство твое́, свята́я пра́ведная А́нно, прославля́ем возвели́чившаго тя́ Го́спода, дарова́вшаго на́м толи́кую те́плую моли́твенницу за ро́д на́ш, и в похвалу́ си́це тебе́ вопие́м:

Ра́дуйся, христиа́ном кре́пкое прибе́жище; ра́дуйся, мона́шествующих ти́хое ра́дование.

Ра́дуйся, оби́телей и́ноческих покро́ве и укрепле́ние; ра́дуйся, все́м ве́рным поможе́ние.

Ра́дуйся, скорбя́щих утеше́ние; ра́дуйся, все́х чту́щих тя́ огнезра́чное заступле́ние.

Ра́дуйся, от вся́кия ну́жды на́с избавля́ющая; ра́дуйся, исцеле́ния все́м подаю́щая.

Ра́дуйся, стра́сти на́ша потребля́ющая; ра́дуйся, ми́лость Бо́жию на́м явля́ющая.

Ра́дуйся, ра́дости на́с исполня́ющая; ра́дуйся, не́мощи на́ша врачу́ющая.

Ра́дуйся, А́нно Богому́драя.

Конда́к 13.

О свята́я пра́ведная А́нно, приими́ от на́с, недосто́йных, хвале́бное пе́ние сие́, от неду́гов душе́вных и теле́сных на́с исцели́, от все́х вра́г ви́димых и неви́димых заступи́ и ве́чнаго муче́ния изба́витися на́м Го́спода умоли́, да с тобо́ю воспева́ем во Ца́рствии Его́: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгел с Небесе́ предста́, провеща́я тебе́, А́нно, о зача́тии Дще́ри Преблагослове́нныя, от Нея́же роди́тися и́мать Спа́с ми́ру – Христо́с. Мы́ же, дивя́ся неизрече́нному о тебе́ Бо́жию Про́мыслу, вопие́м ти́ такова́я:

Ра́дуйся, пред Бо́гом неуста́нная на́ша моли́твеннице; ра́дуйся, препросла́вленная прама́терь Госпо́дня.

Ра́дуйся, Зако́на, Бо́гом да́ннаго, почита́ние; ра́дуйся, сла́вы гряду́щия возглаше́ние.

Ра́дуйся, Бо́га Всемогу́щаго умилостивле́ние; ра́дуйся, глубино́ вся́кия доброде́тели.

Ра́дуйся, роди́вши Дще́рь, в ста́рости процве́тшая; ра́дуйся, Про́мыслу Бо́жию всю́ себе́ преда́вшая.

Ра́дуйся, заре́ сия́ния гряду́щаго; ра́дуйся, сосу́де благода́ти Бо́жия.

Ра́дуйся, безпло́дие умертви́вшая; ра́дуйся, чадоро́дие яви́вшая.

Ра́дуйся, А́нно Богому́драя.

Конда́к 1.

Избра́нней прароди́тельнице Христа́ Бо́га на́шего, Ду́ха Свята́го благода́ти испо́лненней, пе́сни хвале́бныя принесе́м, ве́рнии, я́ко моли́твами свои́ми избавля́ет на́с от бе́д и скорбе́й, благода́ть излива́ющи все́м вопию́щим е́й такова́я:

Ра́дуйся, А́нно Богому́драя.

Моли́тва.

О свята́я пра́ведная А́нно, ро́ждшая пре́жде ве́к предопределе́нную роди́тися Ма́терь Бо́жию, прама́ти Всеми́лостиваго и Всеще́драго Спаси́теля на́шего, гото́вое заступле́ние и предста́тельство с ве́рою к тебе́ притека́ющих! Ты́ душе́ю на Небеси́ у Престо́ла Бо́жия предстои́ши, на земли́ же, да́нною тебе́ благода́тию, разли́чная соверша́еши исцеле́ния. При́зри у́бо ми́лостиво, пра́ведная А́нно, на предстоя́щия лю́ди, моля́щияся пред свято́ю ико́ною твое́ю и прося́щия твоея́ по́мощи; простри́ ко Го́споду святы́я моли́твы твоя́ о на́с, недосто́йных, и испроси́ на́м оставле́ние согреше́ний на́ших; пода́ждь неду́жным исцеле́ние, скорбя́щим утеше́ние, бе́дствующим ско́рую по́мощь; да́ждь пло́д чре́ва призыва́ющим тя́, разреша́я и́х безпло́дие; при́зри на моли́твы безча́дных же́н и благоча́дны и́х сотвори́. Приими́ моле́ние на́с, гре́шных, свята́я А́нно, и преложи́ печа́ли на́ша в ра́дость, я́ко да твои́ми моли́твами получи́вше благода́ть и ми́лость, просла́вим все́х благи́х Исто́чника и Даропода́теля Бо́га, в Тро́ице Святе́й сла́вимаго, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.