Конда́к 1.

Избра́нней от Го́спода во о́браз спасе́ния все́м гре́шным и отча́янным, из глубины́ греха́ восте́кшей на высоту́ безстра́стия, похва́льная пе́ния прино́сим ти́, ма́ти преподо́бная, ты́ же, я́ко иму́щи дерзнове́ние к Ще́дрому Бо́гу, моли́твами твои́ми наста́ви на стезю́ покая́ния любо́вию тебе́ зову́щих:

Ра́дуйся, чу́до милосе́рдия Бо́жия, Мари́е равноа́нгельная.

И́кос 1.

А́нгела во пло́ти узре́в тя́ в пусты́ни Иорда́нстей вели́кий Зоси́ма, на возду́се стоя́щую и о ми́ре моля́щуюся, со удивле́нием и у́жасом одержи́мь ве́сь тре́петом бы́в, со слеза́ми вопия́ше тебе́ такова́я:

Ра́дуйся, благода́ти и све́та испо́лненная; ра́дуйся, прозре́ния да́ром украше́нная.

Ра́дуйся, в моли́тве твое́й на возду́се стоя́щая; ра́дуйся, пусты́нное сокро́вище, от ми́ра утае́нное.

Ра́дуйся, безпло́тных собесе́днице; ра́дуйся, Ду́ха Свята́го селе́ние.

Ра́дуйся, чу́до милосе́рдия Бо́жия, Мари́е равноа́нгельная.

Конда́к 2.

Ви́дящи ста́рца благогове́йнаго, у́жаса испо́лнена, ти́хим гла́сом рекла́ еси́ тому́, преподо́бная: не бо́йся, а́вво Зоси́мо, не́смь ду́х, но земля́, пра́х и пе́пел, и вся́чески пло́ть, ничто́же духо́вное когда́ помы́слившая и ни еди́ныя доброде́тели иму́щая. Жена́ е́смь гре́шница, недосто́йная взира́ти на Не́бо, и со стра́хом гре́шными усты́ зову́ Бо́гу: Аллилу́иа.

И́кос 2.

Разуме́ти ища́ ди́вную та́йну, в тебе́ сокрове́нную, ста́рец паде́ пред нога́ма твои́ма, глаго́ля: заклина́ю тя́ и́менем Го́спода на́шего Иису́са Христа́, Его́же ра́ди наготу́ но́сиши сию́, не скры́й от мене́ жития́ твоего́, да вели́чия Бо́жия я́ве сотвори́ши. С ни́мже и мы́ дерза́ем ублажа́ти тя́ си́це:

Ра́дуйся, смире́ния све́тлая высото́; ра́дуйся, дарова́ний духо́вных бога́тство неисчерпа́емое.

Ра́дуйся, любве́ ра́ди Бо́жия те́ло свое́ умерщвля́вшая; ра́дуйся, в пусты́ни непрохо́дней еди́на с еди́ным Бо́гом пребыва́вшая.

Ра́дуйся, ра́йскою красото́ю сия́ющая; ра́дуйся, безстра́стия све́том озаре́нная.

Ра́дуйся, чу́до милосе́рдия Бо́жия, Мари́е равноа́нгельная.

Конда́к 3.

Си́лою Вы́шняго укрепля́ема, испове́м ти́, челове́че Бо́жий, грехи́ и беззако́ния моя́, отвеща́ла еси́ Зоси́ме, стыжду́ся, о́тче, прости́ мя, но поне́же те́ло мое́ на́го ви́дел еси́, обнажу́ ти и дела́ моя́, оба́че молю́ тя пе́рвее: не бежи́ от мене́, не терпя́ слы́шати безме́стная, я́же а́з соде́ях; но, милосе́рдствуя о мне́, моли́ся за мя́ блу́дную и Бо́гу, не возгнуша́вшемуся мно́ю, зови́: Аллилу́иа.

И́кос 3.

Име́я милосе́рдие неизрече́нное, с мытари́ и гре́шники вечеря́вый, То́й и мне́, во глубину́ поги́бели па́дшей, простре́ ру́ку Свою́ Боже́ственную, егда́ бо возжела́х а́з вни́ти в хра́м Госпо́день, не́кая си́ла возбрани́ ми вхо́д, се́рдца же моего́ косну́выйся све́т ра́зума, показа́ ми ти́ну де́л мои́х; и нача́х пла́катися о гресе́х, в пе́рси бию́щи и го́рько рыда́ющи, си́це рекла́ еси́, Мари́е. Мы́ же, покая́нию твоему́ дивя́щеся, пе́ние прино́сим ти́ таково́е:

Ра́дуйся, я́ко но́щи преше́дшей возсия́ ти заря́ спасе́ния; ра́дуйся, я́ко гла́с Христо́в призва́ овча́ заблу́ждшее от де́брей греха́.

Ра́дуйся, я́ко сле́зными то́ки омы́ла еси́ вся́ твоя́ скве́рны; ра́дуйся, я́ко слеза́ми твои́ми очи́стила еси́ одея́ние души́ твоея́.

Ра́дуйся, я́ко Оте́ц щедро́т объя́тия Своея́ любве́ тебе́ отве́рзе; ра́дуйся, я́ко ве́дый твоя́ та́йная рукописа́ния грехо́в твои́х раздра́.

Ра́дуйся, чу́до милосе́рдия Бо́жия, Мари́е равноа́нгельная.

Конда́к 4.

Бу́рею ско́рбных помысло́в одержи́ма, узре́ла еси́ ико́ну Пречи́стыя Богома́тере и, стеня́щи, воззвала́ еси́ к Не́й: повели́, о Влады́чице, да и мне́ недосто́йней отве́рзутся Боже́ственнии вхо́ды, и бу́ди ми́ Пору́чница, да узре́вши Кре́ст Сы́на Твоего́, ми́ра и я́же в ми́ре всего́ отве́ргуся и изы́ду, а́може повели́ши мне́, зову́щи Бо́гу: Аллилу́иа.

И́кос 4.

Слы́шавши гла́с, издале́ча глаго́лющ: а́ще Иорда́н пре́йдеши, до́бр поко́й обря́щеши, на коле́на па́дши пред Присноде́вою, рекла́ еси́: о Влады́чице! Не гнуша́ется де́вственная чистота́ Твоя́ моея́ недосто́йныя моли́твы, бу́ди ми́ спасе́ния Учи́тельница, руково́дствующая на пу́ть покая́ния! Те́мже у́бо А́нгели Бо́жии, напису́юще испове́дание твое́, возглаша́ху тебе́ в то́й ча́с сицева́я:

Ра́дуйся, от тьмы́ греха́ к чи́стому све́ту покая́ния преше́дшая; ра́дуйся, неи́стовство страсте́й и нечистоту́ плотску́ю отри́нувшая.

Ра́дуйся, тя́жкое бре́мя сту́дныя рабо́ты диа́воли отве́ргшая; ра́дуйся, благо́е и ле́гкое и́го Христо́во подъе́мшая.

Ра́дуйся, от сме́рти грехо́вныя к ве́чному животу́ возста́вшая; ра́дуйся, от вра́т поги́бели ко врато́м рая́ возше́дшая.

Ра́дуйся, чу́до милосе́рдия Бо́жия, Мари́е равноа́нгельная.

Конда́к 5.

Богосве́тлыми луча́ми благода́ти просвеща́ет тя́ Пресвята́я Де́ва, Та́ бо Спору́чница гре́шных к Бо́гу су́щи, отверза́ет тебе́ две́ри милосе́рдия Бо́жия и врата́ хра́ма свята́го, во́ньже вше́дши, со мно́гими слеза́ми поклони́лася еси́ Живоно́сному Дре́ву, и́мже ми́р спасе́н бы́сть, и распе́ншемуся Го́споду, Кро́вь Свою́ за твое́ избавле́ние излия́вшему, благода́рственно воспе́ла еси́: Аллилу́иа.

И́кос 5.

Ви́девши та́йны Бо́жия и ка́ко То́й гото́в е́сть приима́ти ка́ющихся, всехва́льная Мари́е, воззвала́ еси́ все́м се́рдцем: Влады́чице Богоро́дице! Не оста́ви мене́! И устреми́лася еси́ в пусты́ню об о́н по́л Иорда́на, мы́ же, почита́юще бе́гство твое́, срета́ем тя́ пе́нии си́ми:

Ра́дуйся, я́ко всепроща́ющею любо́вию Спа́са ура́нися се́рдце твое́; ра́дуйся, я́ко сокро́вище благода́ти, тобо́ю прия́тое, потща́лася еси́ сокры́ти в пусты́ни.

Ра́дуйся, я́ко ми́ра грехо́вныя сла́дости скороте́чно отбе́гла еси́; ра́дуйся, я́ко невозвра́тное ше́ствие твое́ к Небе́сным на вся́к де́нь ускоря́ла еси́.

Ра́дуйся, я́ко ре́вностный исхо́д тво́й де́моны опали́; ра́дуйся, я́ко вселе́ние твое́ в ско́рбную пусты́ню Небеса́ возвесели́.

Ра́дуйся, чу́до милосе́рдия Бо́жия, Мари́е равноа́нгельная.

Конда́к 6.

Пропове́дуеши все́м па́дшим и отча́янным, всечестна́я, Бо́жие человеколю́бие, и явля́еши си́лу покая́ния, е́же гре́шную ду́шу омыва́ет, очища́ет, све́тлит, и возво́дит горе́, и весе́лие твори́т А́нгелом Бо́жиим, с ни́миже и мы́ бре́нными усты́ зове́м: Аллилу́иа.

И́кос 6.

Возсия́ ми́рови от пусты́ни Иорда́нския све́т вели́ких по́двигов твои́х, Мари́е присносла́вная, мно́гая бо ле́та, а́ки адама́нт тве́рд и сто́лп непоколеби́мь пребыла́ еси́, я́ко со зверьми́ лю́тыми, с похотьми́ твои́ми борю́щися и ору́жием креста́ отража́ющи разжже́нныя стре́лы лука́ваго. Сего́ ра́ди дивя́щеся преесте́ственному терпе́нию твоему́, любо́вию зове́м ти́:

Ра́дуйся, я́ко злострада́ния тру́д в пусты́ни четы́редесять и о́смь ле́т понесла́ еси́;

ра́дуйся, я́ко опале́ние со́лнечное и мра́з нощны́й в наготе́ долготерпе́ла еси́.

Ра́дуйся, гла́дом и жа́ждею изможда́емая; ра́дуйся, покро́вом Богоро́дицы от сме́рти охраня́емая.

Ра́дуйся, я́ко в борьбе́ со грехо́м, в тебе́ живу́щим, до кро́ве подвиза́лася еси́; ра́дуйся, я́ко вся́кое пожела́ние пло́ти коне́чне умертви́ла еси́.

Ра́дуйся, чу́до милосе́рдия Бо́жия, Мари́е равноа́нгельная.

Конда́к 7.

Хотя́ препя́тие сотвори́ти твоему́ све́тлому к Небеси́ ше́ствию, всеблаже́нная, иско́нный вра́г ро́да челове́ческаго не престая́ше влага́ти ти́ по́мыслы нечи́стыя, о́гнь грехо́вный в удесе́х твои́х разжиза́я и приводя́ тебе́ на па́мять о́бразы пре́жняго жития́ твоего́. Ты́ же, многострада́льная, поверга́лася еси́ на зе́млю, слеза́ми ороша́ющи ю́ и призыва́ющи в по́мощь Присноде́ву, и не возстава́ла еси́ от земли́, до́ндеже сла́дкий све́т осиява́ше тя́, воздвиза́я благода́рственно пе́ти Бо́гу: Аллилу́иа.

И́кос 7.

Но́вый челове́к, по Бо́зе созда́нный, яви́лася еси́, преподо́бная, умертви́вши бо всеконе́чне ве́тхаго челове́ка, во Христа́ облекла́ся еси́, всечу́дная, за седмьна́десять ле́т безчи́сленныя беды́ пострада́вши. О се́м у́бо Зоси́ме рекла́ еси́: отто́ле же и до дне́сь си́ла Бо́жия гре́шную мою́ ду́шу и те́ло смире́нное соблюде́. Приими́ у́бо и от на́с недосто́йных похвалы́ сицевы́я:

Ра́дуйся, я́ко умертви́ла еси́ страсте́й взыгра́ния; ра́дуйся, я́ко победи́ла еси́ и са́мое естество́.

Ра́дуйся, я́ко очи́стила еси́ ду́шу и пло́ть твою́ от вся́каго греха́; ра́дуйся, я́ко в хра́мине всели́ся Госпо́дь.

Ра́дуйся, я́ко облекла́ся еси́ в оде́жду весе́лия духо́внаго; ра́дуйся, я́ко вошла́ еси́ в ве́чный поко́й Сы́на Бо́жия.

Ра́дуйся, чу́до милосе́рдия Бо́жия, Мари́е равноа́нгельная.

Конда́к 8.

Стра́нное и пресла́вное измене́ние твое́, преподо́бная, ви́дяще, де́монов те́мныя полцы́ го́рько рыда́ху, вся́ же Си́лы Небе́сныя ра́достию игра́юще, пе́снь Христу́ воспева́ху, прославля́юще Бо́жие милосе́рдие, грехми́ людски́ми неодоли́мое, ве́лиим гла́сом зову́ще: Аллилу́иа.

И́кос 8.

Вся́ была́ еси́ в Бо́зе, Мари́е всебога́тая, егда́ Зоси́ма, обходя́ пусты́ню, ви́дети тя́ сподо́бися. Заклина́ю тя́, о́тче, Спаси́телем Бо́гом, да никому́же рече́ши, я́же слы́шал еси́ от мене́, до́ндеже Бо́г от земли́ во́змет мя́, запове́дала еси́ тому́. Ны́не с ми́ром отыди́, в посте́ же гряду́щаго ле́та причасти́ мя Святы́х Христо́вых Та́ин на бре́зе Иорда́нстем. Сия́ ре́кши, а́ки го́рлица пустыннолюби́вая и неудержи́мая, от о́чию ста́рца скры́лася еси́, то́й же поклони́ся до земли́ и, облобыза́в ме́сто, иде́же стоя́сте но́зе твои́, воззва́ такова́я:

Ра́дуйся, я́ко студа́ грехо́внаго обнажи́лася еси́; ра́дуйся, я́ко па́че сне́га убели́лася еси́.

Ра́дуйся, я́ко омраче́ние стра́стное препобеди́ла еси́; ра́дуйся, я́ко па́че луче́й со́лнечных просвети́лася еси́.

Ра́дуйся, пе́рвее блудни́ца, ны́не же неве́ста Христо́ва; ра́дуйся, я́ко вси́ греси́ твои́ проще́ни су́ть у Бо́га.

Ра́дуйся, чу́до милосе́рдия Бо́жия, Мари́е равноа́нгельная.

Конда́к 9.

Вся́к по́мысл и у́м ужаса́ют боле́зни твоя́, всехва́льная, ка́ко тру́д пусты́ни любве́ ра́ди Бо́жия претерпе́ла еси́, взыва́ше превели́кий во отце́х Зоси́ма, рыда́я. О ма́ти духо́вная! Ты́ Бо́гу прибли́зилася еси́, хоте́л бы́х, а́ще бы мо́щно ми́ бы́ло, во сле́д тебе́ ходи́ти, и зре́ти честно́е лице́ твое́, и ку́пно с тобо́ю немо́лчно пе́ти: Аллилу́иа.

И́кос 9.

Вети́йство земноро́дных не довле́ет к досто́йному похвале́нию твои́х по́двигов, всечестна́я. Кто́ же дово́лен изрещи́ сле́зныя то́ки, я́же пролия́ла еси́ в моли́твах к Бо́гу, кто́ боле́зни твоя́ изочте́т, кто́ испове́сть всено́щная бде́ния, боре́ния и тесноту́ жития́ твоего́? Пусты́ню всю́ чудесы́ просвети́вши, я́ко со́лнце, просия́ла еси́, всечу́дная, те́м у́бо мо́лим тя́: озари́ луча́ми све́та твоего́ сердца́ на́ша и испроси́ оставле́ние грехо́в все́м вопию́щим тебе́ такова́я:

Ра́дуйся, помраче́нный о́браз Бо́жий в све́тлости вели́цей в себе́ возобрази́вшая; ра́дуйся, смра́да греха́ избе́гши, Небе́сными арома́ты благоуха́ющая.

Ра́дуйся, звезда́ми чуде́с украше́нная; ра́дуйся, луча́ми доброде́телей сия́ющая.

Ра́дуйся, вели́чия Бо́жия все́м конце́м земли́ благовеству́ющая; ра́дуйся, Не́бо и зе́млю к пе́нию сла́вы Го́спода твоего́ призыва́ющая.

Ра́дуйся, чу́до милосе́рдия Бо́жия, Мари́е равноа́нгельная.

Конда́к 10.

Спаси́теля Бо́га Животворя́щия Те́ло и Кро́вь взе́м, в де́нь та́инственныя Христо́вы Ве́чери а́вва Зоси́ма по завеща́нию твоему́, преподо́бная ма́ти, в ве́чер зело́ по́зден изы́де на бре́г Иорда́на, неукло́нно в пусты́ню лу́нным све́том осиява́емую, зря́ и моля́ся к Бо́гу, глаго́лаше: покажи́ ми, Го́споди, сокро́вище Твое́, е́же в пусты́ни сокры́л еси́! Покажи́ ми а́нгела во пло́ти, да не отыду́ то́щ, нося́ моя́ грехи́ на обличе́ние, но да ра́дуяся, зову́ Тебе́: Аллилу́иа.

И́кос 10.

Сте́ну непрохо́дну мы́сляше ста́рец бы́ти Иорда́н реку́ между́ ни́м и тобо́ю, преподо́бная; оба́че ты́, ста́вши на бре́зе да́льнем, зна́мением кре́стным Иорда́н осени́ла еси́ и с моли́твою пошла́ еси́ по воде́, а́ки по су́ху. Зоси́ма же, ви́дев тя́, гряду́щу по вода́м Иорда́нским, ужасе́ся и ра́достне вопия́ше тебе́:

Ра́дуйся, Го́рняго рая́ Бо́жия обита́тельнице; ра́дуйся, я́ко тва́рь повину́ется веле́нию твоему́.

Ра́дуйся, я́ко Иорда́н тебе́ слу́жит; ра́дуйся, я́ко луна́ и зве́зды дивя́тся святы́ни твое́й.

Ра́дуйся, си́лы Бо́жия ди́вное проявле́ние; ра́дуйся, Бо́га Жива́го хра́ме одушевле́нный.

Ра́дуйся, чу́до милосе́рдия Бо́жия, Мари́е равноа́нгельная.

Конда́к 11.

Пе́ние подоба́ет тебе́ приноси́ти Всемогу́щему Бо́гу, а́вво, рекла́ еси́ тому́, по воде́ ше́ствующи. Что́ твори́ши, свяще́нник сы́й, ка́ко хо́щеши кла́нятися мне́ убо́зей, са́м нося́й стра́шныя Та́йны Христа́ Бо́га! И́мже ве́рою и любо́вию покланя́ющися, пра́х и земля́ су́щи, со стра́хом зову́: Аллилу́иа.

И́кос 11.

Све́том Небе́сным блиста́ющися, причасти́лася еси́ Боже́ственных Та́ин и ра́дости преми́рныя испо́лнившися и на не́бо ру́це возде́вши, рекла́ еси́: ны́не отпуща́еши рабу́ твою́, Влады́ко! Обра́щшися же к ста́рцу, веща́ла еси́: о а́вво Зоси́мо! В гряду́щее ле́то у́зриши мя́ па́ки в пусты́ни, я́коже хо́щет Госпо́дь. Моли́ Его́ о мне́, о́тче мо́й, моли́, помина́я всегда́ мое́ окая́нство. И па́ки Иорда́н зна́менавши, прешла́ еси́ верху́ воды́, ста́рец же, не сме́я надо́лзе держа́ти тя́, стеня́ и рыда́я, взыва́ше во сле́д тебе́ такова́я:

Ра́дуйся, ме́ртвость Го́спода Иису́са в те́ле нося́щая; ра́дуйся, Воскресе́ния Его́ сла́вою сия́ющая.

Ра́дуйся, благода́тию, я́ко ри́зою све́та, облече́нная; ра́дуйся, светоза́рная оби́тель Всесвяты́я Тро́ицы.

Ра́дуйся, я́ко си́лы а́довы ужаса́ются и трепе́щут сла́вы твоея́; ра́дуйся, я́ко А́нгели Бо́жии дивя́тся чистоте́ твое́й.

Ра́дуйся, чу́до милосе́рдия Бо́жия, Мари́е равноа́нгельная.

Конда́к 12.

Благода́тию Боже́ственною окриля́ема, во еди́н ча́с долготу́ пусты́ни прешла́ еси́ и в но́щь спаси́тельныя Христо́вы Стра́сти, по причаще́нии Боже́ственныя Та́йныя Ве́чери, сно́м святы́м усну́ла еси́, о ми́ре моля́щися, и ду́х тво́й Го́споду предала́ еси́, Ему́же со А́нгелы в неисповеди́мей ра́дости зове́ши ны́не: Аллилу́иа.

И́кос 12.

Поя́ надгро́бное пе́ние, богому́дрый Зоси́ма но́зе твои́ честне́и слеза́ми омыва́ше, и мно́го моли́вся, покры́ те́ло твое́ земле́ю, на́го су́щее и ничто́же иму́щее, то́чию ве́тхую ма́нтию, ю́же испе́рва тебе́ даде́, ра́достию и стра́хом мно́гим одержи́мь, вели́чию Бо́жию дивя́ся, стоя́ше, зовы́й к тебе́ такова́я:

Ра́дуйся, я́ко, ча́до све́та су́щи, прешла́ еси́ к Све́ту Невече́рнему; ра́дуйся, я́ко ду́х тво́й с весе́лием прия́ша со́нмы святы́х.

Ра́дуйся, я́ко те́ло твое́ упоко́ися во гро́бе, и́же ле́в от пусты́ни тебе́ ископа́; ра́дуйся, я́ко тобо́ю показа́ на́м Госпо́дь, коли́ко отстои́м от ме́ры соверше́нства.

Ра́дуйся, по́стников высото́ и преподо́бных сла́во; ра́дуйся, о все́м ми́ре к Бо́гу хода́таице.

Ра́дуйся, чу́до милосе́рдия Бо́жия, Мари́е равноа́нгельная.

Конда́к 13.

О преподо́бная ма́ти, богоблаже́нная Мари́е! Приими́ от на́с ны́не приноси́мое тебе́ моле́ние и, Све́ту непристу́пному предстоя́щи, моли́ся Всеще́дрому Бо́гу, да по вели́цей ми́лости Свое́й, низпо́слет светоза́рную благода́ть покая́ния все́м на́м, заблу́ждшим ча́дом Небе́снаго Отца́, да от греха́ к Оте́ческому до́му восте́кше, в ра́йских селе́ниих сподо́бимся вку́пе с тобо́ю во ве́ки благода́рственно пе́ти Ему́: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгела во пло́ти узре́в тя́ в пусты́ни Иорда́нстей вели́кий Зоси́ма, на возду́се стоя́щую и о ми́ре моля́щуюся, со удивле́нием и у́жасом одержи́мь ве́сь тре́петом бы́в, со слеза́ми вопия́ше тебе́ такова́я:

Ра́дуйся, благода́ти и све́та испо́лненная; ра́дуйся, прозре́ния да́ром украше́нная.

Ра́дуйся, в моли́тве твое́й на возду́се стоя́щая; ра́дуйся, пусты́нное сокро́вище, от ми́ра утае́нное.

Ра́дуйся, безпло́тных собесе́днице; ра́дуйся, Ду́ха Свята́го селе́ние.

Ра́дуйся, чу́до милосе́рдия Бо́жия, Мари́е равноа́нгельная.

Конда́к 1.

Избра́нней от Го́спода во о́браз спасе́ния все́м гре́шным и отча́янным, из глубины́ греха́ восте́кшей на высоту́ безстра́стия, похва́льная пе́ния прино́сим ти́, ма́ти преподо́бная, ты́ же, я́ко иму́щи дерзнове́ние к Ще́дрому Бо́гу, моли́твами твои́ми наста́ви на стезю́ покая́ния любо́вию тебе́ зову́щих:

Ра́дуйся, чу́до милосе́рдия Бо́жия, Мари́е равноа́нгельная.

Моли́тва.

О вели́кая Христо́ва уго́днице, преподо́бная ма́ти Мари́е! На Небеси́ Престо́лу Бо́жию предстоя́щи, на земли́ же ду́хом любве́ с на́ми пребыва́ющи, иму́щи дерзнове́ние ко Го́споду, моли́ спасти́ рабы́ Его́, к тебе́ с любо́вию притека́ющия. Испроси́ на́м у Многоми́лостиваго Влады́ки и Го́спода на́шего ве́ры непоро́чное соблюде́ние, градо́в и ве́сей на́ших утвержде́ние, от гла́да и па́губы избавле́ние, скорбя́щим утеше́ние, неду́гующим исцеле́ние, па́дшим возста́ние, заблу́ждшим вразумле́ние, в де́лех благи́х преспе́яние и благослове́ние, сирота́м и вдови́цам заступле́ние и отше́дшим от сего́ жития́ ве́чное упокое́ние. Бу́ди кре́пкая хода́таица, ди́вная ма́ти Мари́е, во е́же все́м на́м в де́нь Стра́шнаго Суда́ десны́я страны́ о́бщники бы́ти и блаже́нный гла́с Судии́ ми́ра услы́шати: прииди́те, благослове́ннии Отца́ Моего́, насле́дуйте угото́ванное ва́м Ца́рствие от сложе́ния ми́ра. Ами́нь.