Конда́к 1.

Избра́нная от Го́спода на тве́рди Це́ркве возсия́ти, преподо́бная ма́ти Параске́во, ангелоподо́бным твои́м житие́м возсия́ла еси́ всему́ ми́ру я́ко со́лнце пресве́тлое, и су́щым в боле́знех душе́вных и теле́сных цели́тельница яви́лася еси́. Сего́ ра́ди ве́рою ти́ зове́м:

Ра́дуйся, преподо́бная ма́ти Параске́во, скорбя́щих утеше́ние.

И́кос 1.

А́нгельскую ре́вность показа́вши, досточу́дная, житие́ свое́ доброде́тельми украси́ла еси́ на земли́, А́нгельскаго же ликостоя́ния сподо́билася еси́ на Небеси́: с ни́м у́бо моли́ приле́жно Человеколю́бца изба́вити от бе́д и напа́стей вся́ вопию́щыя ти́ си́це:

Ра́дуйся, во́лею свое́ю благо́е и́го за́поведей Христо́вых подъя́вшая: ра́дуйся, житие́м твои́м суету́ ми́ра обличи́вшая.

Ра́дуйся, пло́ть свою́ страстьми́ попра́вшая: ра́дуйся, се́рдце свое́ чи́сто от вся́кия стра́сти душевре́дныя сохрани́вшая.

Ра́дуйся, соверше́нием за́поведей любо́вь Бо́жию к себе́ стяжа́вшая: ра́дуйся, ноше́нию Креста́ на́с в после́довании Христу́ научи́вшая.

Ра́дуйся, преподо́бная ма́ти Параске́во, скорбя́щих утеше́ние.

Конда́к 2.

Ви́дящи жите́йских веще́й измене́ние, мирски́й мяте́ж оста́вила еси́, и в пусты́ню всели́лася еси́, иде́же мно́гим поще́нием и моли́твами, я́ко благово́нною пи́щею, ду́шу свою́ пита́ла еси́ благогове́йно пою́щи Бо́гу: Аллилу́иа.

И́кос 2.

Ра́зум и ве́ру пра́ву и соверше́нную любо́вь стяжа́вши, богому́драя ма́ти, воздержа́нием и смире́нием себе́ украси́ла еси́: те́мже и была́ еси́ хра́м Бо́жий и чуде́с исто́чник неоску́дный. Сего́ ра́ди благогове́йно ти́ пое́м:

Ра́дуйся, ева́нгльскаго самоотверже́ния о́бразе соверше́нный: ра́дуйся, я́ко нището́ю вре́менных бога́тство ве́чное и сла́ву стяжа́ла еси́.

Ра́дуйся, я́ко обе́том нестяжа́ния высоту́ ду́ха своего́ показа́ла еси́: ра́дуйся, смире́ния све́тлая высото́.

Ра́дуйся, я́ко по́двиги твои́ми душетле́нныя си́лы попра́ла еси́: ра́дуйся, я́ко высото́ю подвиго́в твои́х вся́ удиви́ла еси́.

Ра́дуйся, преподо́бная ма́ти Параске́во, скорбя́щих утеше́ние.

Конда́к 3.

Си́лою Ду́ха Свята́го укрепля́ема, му́жески претерпе́ла еси́ по́стныя по́двиги, преподо́бная, слеза́ми же твои́ми велича́ваго врага́ попра́ла еси́, воспева́ющи с благодаре́нием Бо́гу: Аллилу́иа.

И́кос 3.

Изображе́ние бу́дущаго суда́ Христо́ва всегда́ во уме́ иму́щи, и те́плыя сле́зы пролия́ющи, преблаже́нная, украси́ла еси́ свети́льник души́ твоея́, гото́ва су́щи усре́сти Судию́ пра́веднейшаго. Того́ у́бо моли́ десна́го предстоя́ния да сподо́бит и на́с ве́рою пою́щыя ти́ си́це:

Ра́дуйся, оби́телище Пресвята́го Ду́ха: ра́дуйся, я́ко все́ житие́ свое́ освяща́ла еси́ непреста́нным призыва́нием и́мене Бо́жия.

Ра́дуйся, я́ко преуспе́ла еси́ в неле́ностных я́же к Бо́гу моли́твенных предстоя́ний: ра́дуйся, я́ко си́лою моли́твы препобеди́ла еси́ диа́вольская искуше́ния.

Ра́дуйся, я́ко после́дним воспомина́нием от греха́ себе́ сохрани́ла еси́: ра́дуйся, я́ко Бо́гу соверше́нно угоди́ла еси́.

Ра́дуйся, преподо́бная ма́ти Параске́во, скорбя́щих утеше́ние.

Конда́к 4.

Бу́рю настоя́щаго жития́ отве́ргла еси́, преподо́бная: нищету́ самово́льную Христа́ ра́ди стяжа́вши, доброде́тельми вельми́ обогати́лася еси́, и мно́гия к ре́вности, о́бразом жития́ своего́ воздви́гла еси́, уча́щи и́х пе́ти Христу́ Бо́гу: Аллилу́иа.

И́кос 4.

Услы́шав Госпо́дь моли́твы и воздыха́ния твоя́ наедине́ твори́мыя в та́йне, блаже́нная ма́ти, на Небеси́ же пред А́нгелы просла́ви боле́зни и труды́ твоя́ я́ве: ны́не же, Боже́ственнаго рая́ проходя́щи нетле́нныя па́жити, помина́й и на́с пою́щыя ти́ си́це:

Ра́дуйся, достохва́льная, А́нгелом соприча́стнице: ра́дуйся, святи́телей велеле́пная красото́.

Ра́дуйся, преподо́бных соверше́нная и высо́кая похвало́: ра́дуйся, пра́ведных удобре́ние и по́стников пра́вило изве́стнейшее.

Ра́дуйся, де́вственник и мона́хинь сла́во и богосве́тлый ве́нче: ра́дуйся, христиа́ном стено́ и тве́рдое заступле́ние.

Ра́дуйся, преподо́бная ма́ти Параске́во, скорбя́щих утеше́ние.

Конда́к 5.

Безмо́лвно соверши́ла еси́ жи́знь свою́, блаже́нная ма́ти Параске́во, нестяжа́нием украша́ющися и воздержа́нием просвеща́ющися, бы́лием же то́чию пита́ющися, и пою́щи со умиле́нием Влады́це: Аллилу́иа.

И́кос 5.

Ви́дя Пресвяты́й Ду́х чи́стое житие́ твое́, к сему́ же и безме́рное смире́ние твое́, сла́вну тя́ в чудесе́х показа́, преблаже́нная. Те́мже от сего́ жития́ отше́д ко о́ному блаже́нству, с преподо́бными ли́ки хода́тайствуеши о все́х пою́щих ти́ со умиле́нием:

Ра́дуйся, пусты́нный ши́пче благово́нный: ра́дуйся, добре́йшее пусты́нное воспита́ние.

Ра́дуйся, я́ко серпо́м моли́тв твои́х те́рние страсте́й изсекла́ еси́: ра́дуйся, я́ко пролия́нием сле́з твои́х грехо́вный о́гнь погаси́ла еси́.

Ра́дуйся, я́ко вся́кое вра́жие наше́ствие отгна́ла еси́: ра́дуйся, я́ко о́бразом доброде́тельнаго жития́ твоего́ лени́выя к покая́нию воздвиза́еши.

Ра́дуйся, преподо́бная ма́ти Параске́во, скорбя́щих утеше́ние.

Конда́к 6.

Пропове́днику пра́вды, илии́ досточу́дному, и Иоа́нну Предте́чи, свети́льнику покая́ния, подо́бящися, преподо́бная ма́ти, все́ отложи́вши жите́йское попече́ние, молча́ти в гора́х, бде́нию же и па́мяти сме́ртней всегда́ поуча́ющися, пе́ла еси́ Бо́гу: Аллилу́иа.

И́кос 6.

Возсия́ Небе́сный све́т стоя́щей ти́ со умиле́нием на всено́щней моли́тве, и се́ А́нгел Госпо́день предста́ пред тобо́ю возвеща́я ти́ Бо́жие благоволе́ние да возврати́шися во оте́чество твое́, та́мо бо подоба́ет тебе́ те́ло земли́ отда́ти, ду́хом же преити́ в Небе́сная селе́ния. Сего́ ра́ди пое́м тебе́ такова́я:

Ра́дуйся, я́ко, еще́ су́щей ти́ в жи́зни се́й, сподо́билася еси́ а́нгельскаго лицезре́ния: ра́дуйся, я́ко благогове́йно испо́лнила еси́ Бо́жие повеле́ние.

Ра́дуйся, я́ко в це́ркви влахе́рнстей Бо́жией Ма́тери те́пле моли́лася еси́: ра́дуйся, я́ко те́плому Ея́ заступле́нию себе́ вручи́ла еси́.

Ра́дуйся, я́ко при исхо́де твое́м о все́м ми́ре приле́жно моли́лася еси́: ра́дуйся, я́ко по исхо́де твое́м обрела́ еси́ жи́знь присносу́щную.

Ра́дуйся, преподо́бная ма́ти Параске́во, скорбя́щих утеше́ние.

Конда́к 7.

Хотя́щи ти́ от ны́нешняго ве́ка преста́витися, зашла́ еси́ я́ко звезда́ от ми́ра сего́, прехва́льная, и возсия́ла еси́ в преми́рней жи́зни, оста́вльши на́м я́ко зари́ доброде́тели и исправле́ния жития́ твоего́ озаря́ющыя сердца́ все́х с ве́рою пою́щих Бо́гу: Аллилу́иа.

И́кос 7.

Но́выя благода́ти зако́н испо́лнивши, на не́бо теку́щею доброде́телей возше́д колесни́цею, досточу́дная, ны́не с Небе́сными ра́дуешися чинонача́лии. С ни́ми у́бо моли́ся Спа́су Христу́ о все́х пою́щих ти́ си́це:

Ра́дуйся, я́ко к невече́рнему све́ту прешла́ еси́: ра́дуйся, я́ко сподо́билася еси́ жили́ща красо́т Христо́вых.

Ра́дуйся, я́ко прия́ла еси́ от Го́спода многосугу́бую мзду́ трудо́в твои́х: ра́дуйся, я́ко свы́ше прия́ла еси́ вене́ц неувяда́емый.

Ра́дуйся, я́ко чи́сто зри́ши Триипоста́сное Божество́: ра́дуйся, я́ко со А́нгелы на Небеси́ обита́еши.

Ра́дуйся, преподо́бная ма́ти Параске́во, скорбя́щих утеше́ние.

Конда́к 8.

Стра́нное и ди́вное виде́ние узре́ христолюби́вый Гео́ргий: мня́ся бо зре́ти не́кую цари́цу, на пресве́тлем престо́ле седя́щую, и мно́жество све́тлых во́инов о́крест тоя́ стоя́щих, услы́ша глаго́лы ему́: Гео́ргие, вско́ре изъе́мше мо́щи моя́ в наро́читем положи́те ме́сте, пою́ще Бо́гу: Аллилу́иа.

И́кос 8.

Ве́сь Христиа́нский собо́р, услы́шав глаго́лы Гео́ргиа, потече́ к моще́м преподо́бныя Параске́ви, и ты́я со мно́гим усе́рдием изъе́м, я́коже о не́коем сокро́вищи многоце́ннем ра́дуяся, че́стно положи́ в це́ркви, воспева́я с любо́вию си́це:

Ра́дуйся, ра́достное правосла́вных слы́шание: ра́дуйся, све́тлая ве́ры звездо́, ве́рныя просвеща́ющая.

Ра́дуйся, благово́нная сми́рно, це́рковь Христо́ву облагоуха́ющая: ра́дуйся, сокро́вище Бо́жиих дарова́ний неиждива́емое.

Ра́дуйся, исто́чниче богото́чный, источа́яй ве́рным цели́тельныя во́ды: ра́дуйся, я́ко все́м ве́рным, благода́тию Христо́вою, я́звы исцеля́еши.

Ра́дуйся, преподо́бная ма́ти Параске́во, скорбя́щих утеше́ние.

Конда́к 9.

Ве́лие тща́ние име́я благове́рный ца́рь Иоа́нн Асе́нь, прия́в ве́сть где́ лежа́т чудотво́рныя и святы́я мо́щи твоя́, преподо́бная Параске́во, пренесе́ я́ во гра́д сво́й Те́рнов, и с че́стию ве́лиею положи́ в це́ркви свое́й, иде́же источа́ху разли́чныя цельбы́ с ве́рою притека́ющым и пою́щим Бо́гу: Аллилу́иа.

И́кос 9.

Вити́йствует о́трок, и́же де́вять ле́т от рожде́ния не глаго́лаше, прише́д же с ве́рою в хра́м тво́й, а́бие получи́ исцеле́ние. Сего́ ра́ди пое́м ти́ со умиле́нием:

Ра́дуйся, мо́щная засту́пнице на́ша и от бе́д изба́вительнице: ра́дуйся, злостра́ждущих от духо́в зло́бы ско́рая помо́щнице.

Ра́дуйся, я́ко моли́твою твое́ю зре́ние слепы́м возвраща́еши: ра́дуйся, я́ко непло́дствующым благослове́нный пло́д от Бо́га низпосыла́еши.

Ра́дуйся, я́ко разсла́бленныя от одра́ возставля́еши: ра́дуйся, немо́лчная хода́таице с ве́рою к тебе́ притека́ющым.

Ра́дуйся, преподо́бная ма́ти Параске́во, скорбя́щих утеше́ние.

Конда́к 10.

Спасла́ еси́ от лю́тыя боле́зни жену́ обеща́ющую храни́ти Бо́жия повеле́ния: оба́че, солга́вшую и не сохрани́вшую обе́ты своя́, а́бие наказа́ла еси́ боле́знию и сме́ртию, да и и́ны поуча́ются не солга́ти Бо́гу, но во и́стине пребыва́ти и пе́ти Ему́: Аллилу́иа.

И́кос 10.

Стена́ была́ еси́ и спаси́тельное прибе́жище правосла́вным лю́дем су́щым в плене́нии, притека́ющым в ско́рби свое́й к целе́бным и чудотво́рным моще́м твои́м, и вопию́щым ти́ всеуми́льно такова́я:

Ра́дуйся, все́м ве́рным приста́нище благоути́шное: ра́дуйся, оби́димых те́плая предста́тельнице и покрови́тельнице.

Ра́дуйся, я́ко плене́нным в ско́рбех и́х утеше́ние подава́еши: ра́дуйся, я́ко чудесы́ и ага́ряны устраша́еши и вразумля́еши.

Ра́дуйся, я́ко и́мя твое́ и в иноплеме́нных прославля́ется: ра́дуйся, я́ко тобо́ю правосла́вие возвыша́ется.

Ра́дуйся, преподо́бная ма́ти Параске́во, скорбя́щих утеше́ние.

Конда́к 11.

Пе́ния и моли́твы принося́щи благове́рная цари́ца Ми́лица пред ковче́гом твои́х чудотво́рных моще́й, с ве́лиим тща́нием пренесе́ я́ от иноплеме́нных во гра́д сво́й престо́льный на охране́ние всего́ ро́да на́шего пою́щаго Бо́гу: Аллилу́иа.

И́кос 11.

Све́тлая и новопросия́вшая звезда́ яви́лася еси́ на за́паде, све́тлыми луча́ми чудотво́рных моще́й твои́х все́м ве́рным сия́ющи, па́че же оте́честву твоему́, привлека́ющи сие́ пресве́тлому сия́нию твои́х по́двиг, и избавля́ющи от бе́д и напа́стей, пою́щему ти́ си́це:

Ра́дуйся, вся́ких исцеле́ний исто́чниче: ра́дуйся, лю́те стра́ждущих помо́щнице.

Ра́дуйся, я́ко ско́рбный мра́к разгоня́еши: ра́дуйся, я́ко от бе́здны грехо́вныя челове́ки избавля́еши.

Ра́дуйся, я́ко тобо́ю дерзнове́нно бе́здну милосе́рдия Бо́жия призыва́ем: ра́дуйся, я́ко тобо́ю от пото́па гне́ва изба́вльшеся ми́р с Бо́гом обрета́ем.

Ра́дуйся, преподо́бная ма́ти Параске́во, скорбя́щих утеше́ние.

Конда́к 12.

Благода́тию Христо́вою исцеля́еши боле́зни, и прогоня́еши лука́выя ду́хи и стра́сти, сла́вная Параске́во, и просвеща́еши ве́рныя блиста́ньми чуде́с твои́х да вопию́т благода́рно Бо́гу: Аллилу́иа.

И́кос 12.

Пою́ще мо́лим тя́ приле́жно, преподо́бная ма́ти Параске́во, о Христо́ве Це́ркви моли́ся, Правосла́вней ве́ре кре́пость и одоле́ние на е́реси, на́м же спасе́ние и ми́р испроси́, да с любо́вию велича́ем тя́ си́це:

Ра́дуйся, Христо́вы Це́ркве све́тлое украше́ние: ра́дуйся, Правосла́вныя ве́ры защище́ние.

Ра́дуйся, Оте́чества на́шего стено́ и от иноплеме́нных изба́вительнице: ра́дуйся, оби́тели твоея́ покро́ве.

Ра́дуйся, Христиа́нскаго ро́да заступле́ние: ра́дуйся, все́м с ве́рою предста́тельства твоего́ и́щущым ско́рая помо́щнице.

Ра́дуйся, преподо́бная ма́ти Параске́во, скорбя́щих утеше́ние.

Конда́к 13.

О, преподо́бная ма́ти Параске́во, скорбя́щих утеше́ние и де́в украше́ние, приими́ ны́не от худы́х у́ст сие́ песнопе́ние, и от гее́нны изба́витися на́м Го́спода умоли́, да с тобо́ю, в Небе́снем оте́чествии на́шем, безконе́чно пое́м ему́: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгельскую ре́вность показа́вши, досточу́дная, житие́ свое́ доброде́тельми украси́ла еси́ на земли́, А́нгельскаго же ликостоя́ния сподо́билася еси́ на Небеси́: с ни́м у́бо моли́ приле́жно Человеколю́бца изба́вити от бе́д и напа́стей вся́ вопию́щыя ти́ си́це:

Ра́дуйся, во́лею свое́ю благо́е и́го за́поведей Христо́вых подъя́вшая: ра́дуйся, житие́м твои́м суету́ ми́ра обличи́вшая.

Ра́дуйся, пло́ть свою́ страстьми́ попра́вшая: ра́дуйся, се́рдце свое́ чи́сто от вся́кия стра́сти душевре́дныя сохрани́вшая.

Ра́дуйся, соверше́нием за́поведей любо́вь Бо́жию к себе́ стяжа́вшая: ра́дуйся, ноше́нию Креста́ на́с в после́довании Христу́ научи́вшая.

Ра́дуйся, преподо́бная ма́ти Параске́во, скорбя́щих утеше́ние.

Конда́к 1.

Избра́нная от Го́спода на тве́рди Це́ркве возсия́ти, преподо́бная ма́ти Параске́во, ангелоподо́бным твои́м житие́м возсия́ла еси́ всему́ ми́ру я́ко со́лнце пресве́тлое, и су́щым в боле́знех душе́вных и теле́сных цели́тельница яви́лася еси́. Сего́ ра́ди ве́рою ти́ зове́м:

Ра́дуйся, преподо́бная ма́ти Параске́во, скорбя́щих утеше́ние.

Моли́тва.

О, преподо́бная ма́ти Параске́во, те́плая на́ша засту́пнице, и везде́ в ско́рбех ско́рая помо́щнице, помози́ на́м гре́шным и уны́лым в настоя́щем се́м житии́, умоли́ Го́спода Бо́га дарова́ти на́м оставле́ние все́х грехо́в на́ших, я́же соде́яхом во все́м житии́ на́шем де́лом, сло́вом, помышле́нием и все́ми на́шими чу́вствы, во исхо́де же души́ на́шея помози́ на́м недосто́йным изба́витися от возду́шных мыта́рств и ве́чнаго муче́ния, да велича́юще ми́лостивное предста́тельство твое́, всегда́ прославля́ем Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.