Акафист святой великомученице Екатерине

Одобрен 6/19 марта 1802 года.

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 07 декабря (24 ноября ст. ст.)

Утвержден для общецерковного использования.

Конда́к 1.

Избра́нную и венча́нную де́ву му́ченицу, неве́сту Христо́ву Екатери́ну, похва́льными пе́сньми воспои́м, я́ко пресла́вную мучи́теля победи́тельницу и прему́друю филосо́фов наста́вницу: ты́ же, великому́ченице Екатери́но, иму́щи дерзнове́ние ко Го́споду, приклони́ся ми́лостивне к благопотре́бным проше́нием зову́щих ти́:

Ра́дуйся, Екатери́но, неве́сто Христо́ва прему́драя.

И́кос 1.

А́нгелом ра́вную чистоту́ иму́щи, свята́я де́во Екатери́но, с А́нгелы Боже́ственнаго озаре́ния сподо́билася еси́, с ни́ми же воспева́ющи Трисвяту́ю пе́снь, услы́ши на́с, пою́щих тебе́ на земли́ сия́:

Ра́дуйся, честно́е святы́ни жили́ще; ра́дуйся, чуде́сное зна́мение сбы́вшагося на тебе́ Бо́жия Про́мысла.

Ра́дуйся, благоволе́ния О́тча сосу́де; ра́дуйся, страда́ний Христо́вых исполне́ние.

Ра́дуйся, чи́стое Ду́ха Свята́го обита́лище; ра́дуйся, све́том благочести́выя ве́ры просвети́вшаяся.

Ра́дуйся, свято́ю купе́лию отрожде́нная; ра́дуйся, измы́вшая ри́зы своя́ в Кро́ви А́гнчей на земли́.

Ра́дуйся, лику́ющая со свяще́нными де́вами на Небеси́.

Ра́дуйся, Екатери́но, неве́сто Христо́ва прему́драя.

Конда́к 2.

Ви́дящи Екатери́на себе́ виде́ния сподо́бльшуюся, тече́ к свято́му ста́рцу, ико́ну е́й Богома́тере пре́жде того́ вручи́вшему, и пове́да ему́, ка́ко отвраща́ше лице́ Свое́ е́й яви́выйся с Пречи́стою Свое́ю Ма́терию Христо́с, ка́ко безу́мну, и ни́щу, и худоро́дну ю́ наре́к, до́ндеже не оста́вит и́дольскаго нече́стия. Преподо́бный же, слы́шав сия́, наста́ви ю́ в та́инствах ве́ры и крести́ ю́. Она́ же во обновле́нии ду́ха благода́рно поя́ше Бо́гу: Аллилу́иа.

И́кос 2.

Ра́зум благи́й, благоро́дство и́стинное, бога́тство неги́блющее стяжа́вши в духо́вном отрожде́нии, свята́я Екатери́но, досто́йна яви́ся Небе́снаго Жениха́ Христа́, И́же, па́ки яви́вся е́й, возлюби́ ю́ и дарова́нным пе́рстнем в неве́сту Себе́ обручи́. Она́ же, позна́вши тако́е к не́й благоволе́ние Бо́жие, та́ко уязви́ся любо́вию Его́, я́ко не му́дрствоваше бо́лее о земны́х веща́х, но о Возлю́бленнем свое́м непреста́нно мы́сляше. Таково́й благода́ти сподо́бльшаяся, слы́ши от на́с:

Ра́дуйся, злово́ние мирско́е возненави́девшая; ра́дуйся, в воню́ ми́ра Христо́ва теку́щая.

Ра́дуйся, до́брая люби́тельнице Жениха́ Безсме́ртнаго; ра́дуйся, сокро́вище благоволе́ния Вы́шняго.

Ра́дуйся, денни́це пресве́тлая; ра́дуйся, луно́ соверше́нная.

Ра́дуйся, ма́слино, в дому́ Бо́жии насажде́нная; ра́дуйся, ке́дре, в Лива́не высокора́сленный.

Ра́дуйся, Екатери́но, неве́сто Христо́ва прему́драя.

Конда́к 3.

Си́ла Вы́шняго даде́ тогда́ святе́й Екатери́не дерзнове́ние, е́же нече́ствующаго царя́ Максими́на о принесе́нии и́долом же́ртв обличи́ти небоя́зненно, и то́й пребы́сть безгла́сен на мно́г ча́с, не моги́й проти́витися ея́ глаго́лом. Она́ же, благодаря́щи Бо́га, воспева́ше: Аллилу́иа.

И́кос 3.

Иму́щи свята́я Екатери́на свы́ше да́нную е́й прему́дрость, егда́ нечести́вый ца́рь, поста́вив пред собо́ю, вопроша́ше ю́ о ро́де ея́ и са́не, она́ испове́да себе́ бы́ти дще́рь ца́рскую, филосо́фския и ри́торския нау́ки до́бре изучи́вшую, па́че же Христо́ву неве́сту себе́ наименова́, в я́вное отверже́ние и́дольскаго служе́ния. Сего́ ра́ди воспева́ем е́й си́це:

Ра́дуйся у́бо, Екатери́но пресла́вная; ра́дуйся, ца́рское свяще́ние.

Ра́дуйся, пчело́, ды́ма и́дольскаго отлете́вшая, ра́дуйся, голуби́це, зла́ты крила́ иму́щая.

Ра́дуйся, кади́ло Христо́ва благоуха́ния.

Ра́дуйся, Екатери́но, неве́сто Христо́ва прему́драя.

Конда́к 4.

Бу́рею я́рости вознеи́стовився ца́рь на святу́ю де́ву, рече́ к не́й: «Не глаго́ли зле́ о бозе́х на́ших». Свята́я же Екатери́на отвеща́: «А́ще восхо́щеши отрясти́ мра́к пре́лести от душе́вных ти́ оче́й, уразуме́еши бого́в твои́х ху́дость и позна́еши и́стиннаго Бо́га, Его́же и́мя, то́кмо глаго́лемое, или́ кре́ст, изобразу́емый на возду́се, прогоня́ет бо́ги твоя́ и погубля́ет. И а́ще повели́ши, явлю́ тебе́ и́стину, пою́щи Бо́гу: Аллилу́иа».

И́кос 4.

Слы́шав нечести́вый ца́рь свобо́дный и му́дрый отве́т тво́й о ве́ре Христо́вой, убоя́вся, да не бу́дет побежде́н от тебе́, собра́ от преде́лов держа́вы своея́ мудрецо́в, число́м пятьдеся́т, на пре́ние. Ты́ же, Арха́нгелом Михаи́лом утвержде́нная и о побе́де уве́ренная, возра́довалася еси́ вступи́ти в пре́ние с ни́ми. Приими́ у́бо, де́во, от на́с похвалу́ сию́:

Ра́дуйся, изъяви́тельнице ума́ Христо́ва; ра́дуйся, херуви́мское стяжа́вшая Богопозна́ние.

Ра́дуйся, серафи́мскою воспале́нная к Бо́гу любо́вию; ра́дуйся, му́дрых мудре́йшая.

Ра́дуйся, духо́вный ме́ч на неве́рие изостри́вшая; ра́дуйся, нече́стия прогони́тельнице.

Ра́дуйся, ве́рных наста́внице.

Ра́дуйся, Екатери́но, неве́сто Христо́ва прему́драя.

Конда́к 5.

Богосве́тлей звезде́ была́ еси́ подо́бна, Екатери́но, препре́вши пятьдеся́т вити́й и наста́вивши и́х на пу́ть христиа́нский, веду́щий к пра́ведному Со́лнцу, от Де́вы возсия́вшему Христу́ Бо́гу, свои́ми му́дрыми глаго́лы, и́же и осужде́ни бы́вше за Христа́ на сожже́ние и напу́тствовани моли́твою твое́ю, с ра́достию идо́ша в о́гнь, пою́ще: Аллилу́иа.

И́кос 5.

Ви́дев царю́ющий повеле́ния своя́ в тебе́ пренебреже́нны и увеща́ния презре́нны, обрати́ся к лука́вству, е́же ласка́нием прельсти́ти тя́, обеща́я полца́рства тебе́ да́ти. Ты́ же ве́ру сокро́вищам земны́м предпоче́тши и Жениха́ Христа́ возлюби́вши па́че земна́го ца́рства и оде́жду му́ченичества па́че багряни́цы, отве́ргла еси́ его́ суесло́вие. Сего́ ра́ди воспису́ем ти́ сия́ похва́льная:

Ра́дуйся, де́во, ле́сть обличи́вшая; ра́дуйся, запина́теля зми́я попра́вшая.

Ра́дуйся, дще́рь царе́ва; ра́дуйся, де́во, ря́сны златы́ми оде́янная.

Ра́дуйся, вся́кое вещество́ превозше́дшая; ра́дуйся, на го́ру боговиде́ния восте́кшая.

Ра́дуйся, све́том богопозна́ния просвеще́нная; ра́дуйся, труба́ ду́ха, воспе́вшая гла́с и́стиннаго богосло́вия.

Ра́дуйся, до́брое ве́ры испове́дание; ра́дуйся, све́та ева́нгельскаго сия́ние.

Ра́дуйся, зако́нов ве́чных храни́тельнице; ра́дуйся, на́ша помо́щнице.

Ра́дуйся, Екатери́но, неве́сто Христо́ва прему́драя.

Конда́к 6.

Пропове́дником богоно́сным, апо́столом поревнова́вши, дерзнове́нно пред лице́м мучи́теля пропове́дала еси́ Христа́, и́стиннаго Бо́га, Ему́же в ра́нах и в темни́це пе́ла еси́: Аллилу́иа.

И́кос 6.

Возсия́вый в се́рдце твое́м све́т и́стиннаго богоразу́мия отгна́л е́сть мра́к скорбе́й, и́же не оста́ви тя́ алка́ти, голуби́цею пи́щу ти́ посыла́я, ниже́ стужа́ти о боле́зни, посети́л бо Са́м тя́ в темни́це, ободря́я и мно́ги венцы́ обещава́я. Ты́ же, терпеливоду́шная, си́м па́че укрепи́лася еси́ и цари́цу А́вгусту и воево́ду Порфи́риа, с во́ины прите́кших к тебе́, обрати́ла еси́ к све́ту ве́ры Христо́вой и научи́ла пе́ти тебе́ сия́:

Ра́дуйся, мирополо́жнице Боже́ственныя любве́; ра́дуйся, адама́нте кре́пкий.

Ра́дуйся, вина́ чуде́с неизрече́нных; ра́дуйся, врага́ терпе́нием уби́вшая.

Ра́дуйся, я́звы Го́спода на те́ле свое́м носи́вшая; ра́дуйся, цари́це А́вгусте с прише́дшими к му́ченическому по́двигу путенаста́внице.

Ра́дуйся, я́ко во тьме́ све́т была́ еси́; ра́дуйся, я́ко Са́м Госпо́дь, Све́т ми́ра, тебе́, в темни́це бы́вшей, Себе́ яви́л е́сть.

Ра́дуйся, у́з грехо́вных ско́рая реши́тельнице; ра́дуйся, боле́знующих ско́рая целе́бнице.

Ра́дуйся, помо́щнице на́шего спасе́ния.

Ра́дуйся, Екатери́но, неве́сто Христо́ва прему́драя.

Конда́к 7.

Хотя́щу безбо́жному царю́ привести́ тя́ к ме́рзкому идолослуже́нию, па́ки се́ти подстила́ет тебе́, прему́драя, е́же улови́ти тя́ ле́стно похвало́ю красоты́ твоея́; ты́ же красоту́ ве́щь привре́менну и скоропрехо́дну именова́ла еси́, Христа́ же испове́дала еси́ Бо́га жи́ва и и́стинна и пе́ла Ему́: Аллилу́иа.

И́кос 7.

Но́вую показа́ ца́рь я́рость и безчелове́чие, повеле́в епа́рху коле́сами растерза́ти де́вственное, чи́стое и свято́е те́ло твое́, но чуде́сно руко́ю А́нгела а́бие разреше́на была́ еси́ безвре́дна и коле́са на ча́сти сокруше́ны, и́миже мно́ги от неве́рных убие́ны, я́ко удиви́ся са́м ца́рь и предстоя́щий наро́д, и́же и взыва́ше: «Вели́к Бо́г христиа́нский». Мы́ же, чудя́щеся сему́, взыва́ем тебе́:

Ра́дуйся, му́ченице, А́нгелом честна́я и гове́йная; ра́дуйся, сла́во полко́в страда́льческих.

Ра́дуйся, све́тлая на враги́ побе́да; ра́дуйся, стра́х неве́рных.

Ра́дуйся, сосу́де мно́жайшия си́лы Бо́жия; ра́дуйся, ра́дование ве́рных.

Ра́дуйся, Екатери́но, неве́сто Христо́ва прему́драя.

Конда́к 8.

Стра́нное сла́вы измене́ние и за Христа́ страда́ние цари́цы и воево́ды с во́ины ви́девше, устрани́мся любве́ ми́ра и пло́ти и впери́м себе́ к разуме́нию Бо́га, Се́й бо е́сть красота́, и сла́ва, и вене́ц на́м, пою́щим: Аллилу́иа.

И́кос 8.

Ве́сь сла́дость, ве́сь жела́ние тебе́, свята́я Екатери́но, бы́сть Иису́с: сла́дце бо Его́ ра́ди го́рькия му́ки терпе́ла еси́ и ски́петр, предлага́емый тебе́, попра́ла еси́, предзря́ бу́дущее воздая́ние. От на́с же приими́ похва́льная сия́:

Ра́дуйся, чи́стая, чи́сте Чи́стаго возлюби́вшая; ра́дуйся, го́рлице, Кра́снаго Жениха́ в пусты́не до́льнаго ми́ра вожделе́вшая.

Ра́дуйся, воню́ ри́з Его́ благоуха́вшая; ра́дуйся, я́ко се́рна на гора́х арома́тских иска́вшая Рожде́ннаго пре́жде холмо́в ве́чных.

Ра́дуйся, по́двиг страда́льческий ра́ди любве́ Христо́вы соверши́вшая; ра́дуйся, ли́к му́ченический Бо́гу приве́дшая.

Ра́дуйся, я́ко вити́и тобо́ю получи́ша Ца́рство Небе́сное; ра́дуйся, я́ко то́еже тобо́ю получи́ти ча́ем.

Ра́дуйся, покро́ве и забра́ло на́ше.

Ра́дуйся, Екатери́но, неве́сто Христо́ва прему́драя.

Конда́к 9.

Все́ естество́ а́нгельское возра́довася ра́достию, зря́ тя́, Екатери́но, победи́вши мироде́ржца, ше́ствующую к преми́рным я́ко победоно́сную воево́ду, в после́довании полка́ страда́льческаго, и воспе́ побе́дная, взыва́я: Аллилу́иа.

И́кос 9.

Вети́и многовеща́ннии заусти́шася: не возмо́гше бо противовеща́ти богодухнове́нным словесе́м твои́м, молча́нием почита́ют дарова́ния твоя́; мы́ же, немощни́и, ка́ко мо́жем отве́рсти уста́ на хвалы́ твоя́? Одна́ко дерза́ем и мо́лим, сподо́би, блага́я, безбе́дно принести́ тебе́ пе́снь сию́:

Ра́дуйся, орга́не Ду́ха Свята́го; ра́дуйся, заре́ неизрече́ннаго осия́ния.

Ра́дуйся, догма́тов Боже́ственных пучи́но; ра́дуйся, хи́тросте, препре́вшая филосо́фов.

Ра́дуйся, ча́ше прему́дрости; ра́дуйся, плете́ния вити́й растерза́вшая.

Ра́дуйся, плени́цы грехо́вныя разреша́ющая.

Ра́дуйся, Екатери́но, неве́сто Христо́ва прему́драя.

Конда́к 10.

Спасти́ хотя́щи ду́шу твою́, о те́ле твое́м неради́ла еси́, Екатери́но, и на ме́чное усече́ние, мучи́телю да́вшу на то́ изрече́ние, ты́ ра́достно потекла́ еси́, пою́щи Свято́му Безсме́ртному: Аллилу́иа.

И́кос 10.

Стена́ тве́рда и непреодоли́ма яви́лася еси́ жена́м, тебе́ на ме́сто усече́ния провожда́ющим и с рыда́нием тя́ жестокосе́рду к себе́ и безразсу́дну бы́ти имену́ющим: я́ко не пощади́ла еси́ сла́дкаго живота́ в цве́те ю́ности, я́ко презре́ла еси́ земно́е предлага́емое ца́рство и блаже́нство. Ты́ же воспрети́ла еси́ неполе́зный пла́ч и́х и суесло́вие, теку́щи скоре́йши соедини́тися чрез сме́рть со свои́м Возлю́бленным, того́ ра́ди слы́шиши:

Ра́дуйся, ра́достно за Главу́ Це́ркве Христа́ под ме́ч главу́ свою́ приклони́вшая; ра́дуйся, до конца́ претерпе́вшая.

Ра́дуйся, тече́ние до́бре сконча́вшая; ра́дуйся, я́ко ни ско́рбию, ни ра́нами, ни мече́м с пути́ Христо́ва испове́дания не соврати́лася еси́.

Ра́дуйся, я́ко пла́мень любве́ в исто́чнице кро́ве неугаси́мь соблю́дшая; ра́дуйся, му́чеников красото́.

Ра́дуйся, кре́пкое христиа́н прибе́жище.

Ра́дуйся, Екатери́но, неве́сто Христо́ва прему́драя.

Конда́к 11.

Пе́ние похва́льное дерзну́хом принести́ тебе́, но оскудева́ет сло́во на́ше и недоумева́ет у́м, ка́ко глаго́лати; оба́че сло́во твое́ прему́дрое, мно́гих исхити́вшее от неве́жества и идолонече́стия, возставля́ет на́с. Да́ждь на́м сло́во твое́, во е́же пе́ти уди́вльшему на тебе́ вели́чия Своя́ Бо́гу: Аллилу́иа.

И́кос 11.

Светоприе́мную тя́ свещу́, ме́чным усече́нием погаше́нную, но на све́щнице Небе́снем пред Престо́лом Святы́я Тро́ицы поста́вленную, ви́девше Святи́и А́нгели, поклони́шася Живу́щему во ве́ки и, получи́вше от Влады́ки повеле́ние, де́вственное те́ло твое́ на горе́ Сина́йстей погребо́ша, да не ви́димо бу́дет, я́коже сама́ хоте́ла еси́, враго́м Госпо́дним. Мы́ же пе́снь сию́ возсыла́ем ти́:

Ра́дуйся, солнцеобра́зная де́во, на Небеса́ ду́хом возше́дшая; ра́дуйся, Сио́на Го́рняго дости́гшая.

Ра́дуйся, ве́нче добро́ты в руце́ Госпо́дни; ра́дуйся, ча́ше, от оби́лия до́му Бо́жия че́рплющая ра́дость.

Ра́дуйся, к ски́нии нерукотворе́нней, ве́чней прибли́жившаяся; ра́дуйся, на горе́ зако́нней почива́ющая те́лом.

Ра́дуйся, я́ко та́мо ви́дена бы́ша ше́ствия Бо́га Сина́ина, Бо́га Иа́ковля; ра́дуйся, ме́ста боговиде́ния Моисе́ева одержа́ние.

Ра́дуйся, ре́вности Илиины́ указа́ние; ра́дуйся, купины́ несгара́емой явле́ние.

Ра́дуйся, де́во, Де́ве Цари́це, в ри́зы позлаще́нны оде́янной, преиспещре́нной всле́дствующая; ра́дуйся, я́ко тобо́ю Сы́й воспева́ется посреде́ де́в тимпа́нниц.

Ра́дуйся, я́ко на тебе́ велеле́пота Его́; ра́дуйся, Престо́ла Ве́чнаго предстоя́тельнице.

Ра́дуйся, от хра́ма вселе́нныя моли́твенники к тебе́ назира́ющая; ра́дуйся, кади́ло моли́тв Вы́шнему о на́с благоприя́тное.

Ра́дуйся, Екатери́но, неве́сто Христо́ва прему́драя.

Конда́к 12.

Благода́ть дана́ тебе́ от Бо́га руково́дствовати к позна́нию и́стины Его́, в та́йне сокрове́нней, и дая́ти все́м я́же к по́льзе проше́ния. Те́мже мы́, помраче́ннии, умиле́нно про́сим тя́, му́драя де́во: просвети́ у́мныя на́ши о́чи и положи́ на́м к Небеси́ стезю́ прохо́дну, да пое́м с тобо́ю ны́не и во вся́ ве́ки Еди́ному Прему́дрому: Аллилу́иа.

И́кос 12.

Пою́ще кре́пкия твоя́ му́ченическия по́двиги, хва́лим тя́, я́ко одушевле́нный сосу́д спасе́ния челове́ков: твои́м бо ра́зумом Бо́г прему́дрость прему́дрых ве́ка сего́ погуби́; тобо́ю вити́й призва́ в язы́к свя́т, в лю́ди обновле́ния, я́ко те́м страда́ти за Христа́. Просвети́ и на́с, блага́я де́во, помраче́нных, да зове́м ти́:

Ра́дуйся, зерца́ло Бо́жия му́дрости; ра́дуйся, си́лою Вы́шняго оде́янная.

Ра́дуйся, подви́жнице, еле́ем ра́дования умаще́нная; ра́дуйся, воево́до, по́лк Бо́жий к ве́чному вели́честву предпосла́вшая.

Ра́дуйся, во све́тлости святы́я вше́дшая; ра́дуйся, во све́те непристу́пнем Живу́щему в ли́це пла́менных слу́г предста́вшая.

Ра́дуйся, гро́м трисвята́го пе́ния гла́сом свои́м умножа́ющая; ра́дуйся, неизрече́нную сла́дость добро́ты вкуша́ющая.

Ра́дуйся, я́ко хвала́ и ра́дование над главо́ю твое́ю; ра́дуйся, я́ко ве́чная сла́ва тебе́ объе́млет.

Ра́дуйся, от Триипоста́снаго Божества́ венце́м Небе́снаго Ца́рствия увенча́нная; ра́дуйся, благода́ти и безконе́чной сла́вы на́м хода́таице.

Ра́дуйся, Екатери́но, неве́сто Христо́ва прему́драя.

Конда́к 13.

О свята́я великому́ченице Екатери́но! Приими́ сие́ похва́льное пе́ние и изба́ви на́с от вра́г ви́димых и неви́димых и от ве́чнаго муче́ния твои́м благоприя́тным хода́тайством сохрани́, да с тобо́ю при́сно пое́м Бо́гу: Аллилу́иа.

Этот конда́к читается трижды, затем 1-й и́кос и 1-й конда́к.

И́кос 1.

А́нгелом ра́вную чистоту́ иму́щи, свята́я де́во Екатери́но, с А́нгелы Боже́ственнаго озаре́ния сподо́билася еси́, с ни́ми же воспева́ющи Трисвяту́ю пе́снь, услы́ши на́с, пою́щих тебе́ на земли́ сия́:

Ра́дуйся, честно́е святы́ни жили́ще; ра́дуйся, чуде́сное зна́мение сбы́вшагося на тебе́ Бо́жия Про́мысла.

Ра́дуйся, благоволе́ния О́тча сосу́де; ра́дуйся, страда́ний Христо́вых исполне́ние.

Ра́дуйся, чи́стое Ду́ха Свята́го обита́лище; ра́дуйся, све́том благочести́выя ве́ры просвети́вшаяся.

Ра́дуйся, свято́ю купе́лию отрожде́нная; ра́дуйся, измы́вшая ри́зы своя́ в Кро́ви А́гнчей на земли́.

Ра́дуйся, лику́ющая со свяще́нными де́вами на Небеси́.

Ра́дуйся, Екатери́но, неве́сто Христо́ва прему́драя.

Конда́к 1.

Избра́нную и венча́нную де́ву му́ченицу, неве́сту Христо́ву Екатери́ну, похва́льными пе́сньми воспои́м, я́ко пресла́вную мучи́теля победи́тельницу и прему́друю филосо́фов наста́вницу: ты́ же, великому́ченице Екатери́но, иму́щи дерзнове́ние ко Го́споду, приклони́ся ми́лостивне к благопотре́бным проше́нием зову́щих ти́:

Ра́дуйся, Екатери́но, неве́сто Христо́ва прему́драя.

Моли́тва.

О свята́я Екатери́но, де́во и му́ченице, и́стинная Христо́ва неве́сто! Мо́лим тя́ чрез особли́вую благода́ть, е́юже предвари́ тя Жени́х тво́й, Сладча́йший Иису́с: я́коже посрами́вши пре́лести мучи́теля, му́дростию твое́ю пятьдеся́т вити́й победи́ла еси́ и, напои́вши и́х Небе́сным уче́нием, к све́ту и́стинныя ве́ры наста́вила еси́, та́ко испроси́ и на́м о́ную Бо́жию му́дрость, да и мы́, расто́ргнув вся́ ко́зни а́дскаго мучи́теля и презре́в ми́ра и пло́ти собла́зны, досто́йны яви́мся Боже́ственныя сла́вы и к разшире́нию святы́я на́шея правосла́вныя ве́ры сосу́ды досто́йны соде́лаемся, и с тобо́ю в Небе́сной ски́нии Го́спода и Влады́ку на́шего Иису́са Христа́ хва́лим и прославля́ем во вся́ ве́ки. Ами́нь.

А҆ка́ѳїстъ ст҃ѣ́й великомч҃нцѣ є҆катері́нѣ.

Конда́къ а҃.

И҆збра́ннꙋю и҆ вѣнча́ннꙋю дѣ́вꙋ мч҃нцꙋ, невѣ́стꙋ хрⷭ҇то́вꙋ є҆катері́нꙋ, похва́льными пѣ́сньми воспои́мъ, ꙗ҆́кѡ пресла́внꙋю мꙋчи́телѧ побѣди́тельницꙋ и҆ премꙋ́дрꙋю фїлосо́фѡвъ наста́вницꙋ: ты́ же, великомч҃нце є҆катері́но, и҆мꙋ́щи дерзнове́нїе ко гдⷭ҇ꙋ, приклони́сѧ млⷭ҇тивнѣ къ бл҃гопотрє́бнымъ проше́нїємъ зовꙋ́щихъ тѝ:

Ра́дꙋйсѧ, є҆катері́но, невѣ́сто хрⷭ҇то́ва премꙋ́драѧ.

І҆́косъ а҃.

А҆́гг҃лѡмъ ра́внꙋю чистотꙋ̀ и҆мꙋ́щи, ст҃а́ѧ дѣ́во є҆катері́но, съ а҆́гг҃лы бжⷭ҇твеннагѡ ѡ҆заре́нїѧ сподо́биласѧ є҆сѝ, съ ни́ми же воспѣва́ющи трист҃ꙋ́ю пѣ́снь, ᲂу҆слы́ши на́съ, пою́щихъ тебѣ̀ на землѝ сїѧ̑:

Ра́дꙋйсѧ, чⷭ҇тно́е ст҃ы́ни жили́ще: ра́дꙋйсѧ, чꙋде́сное зна́менїе сбы́вшагѡсѧ на тебѣ̀ бж҃їѧ про́мысла.

Ра́дꙋйсѧ, бл҃говоле́нїѧ ѻ҆́ч҃а сосꙋ́де: ра́дꙋйсѧ, страда́нїй хрⷭ҇то́выхъ и҆сполне́нїе.

Ра́дꙋйсѧ, чⷭ҇тое дх҃а ст҃а́гѡ ѡ҆бита́лище: ра́дꙋйсѧ, свѣ́томъ бл҃гочести́выѧ вѣ́ры просвѣти́вшаѧсѧ.

Ра́дꙋйсѧ, ст҃о́ю кꙋпѣ́лїю ѿрожде́ннаѧ: ра́дꙋйсѧ, и҆змы́вшаѧ ри̑зы своѧ̑ въ кро́ви а҆́гнчей на землѝ.

Ра́дꙋйсѧ, ликꙋ́ющаѧ со свѧще́нными дѣ́вами на нб҃сѝ.

Ра́дꙋйсѧ, є҆катері́но, невѣ́сто хрⷭ҇то́ва премꙋ́драѧ.

Конда́къ в҃.

Ви́дѧщи є҆катері́на себѐ видѣ́нїѧ сподо́бльшꙋюсѧ, течѐ къ ст҃о́мꙋ ста́рцꙋ, і҆кѡ́нꙋ є҆́й бг҃ома́тере пре́жде тогѡ̀ врꙋчи́вшемꙋ, и҆ повѣ́да є҆мꙋ̀, ка́кѡ ѿвраща́ше лицѐ своѐ, є҆́й ꙗ҆ви́выйсѧ съ пречⷭ҇тою свое́ю мт҃рїю хрⷭ҇то́съ, ка́кѡ безꙋ́мнꙋ и҆ ни́щꙋ и҆ хꙋдоро́днꙋ ю҆̀ наре́къ, до́ндеже не ѡ҆ста́витъ і҆́дѡльскагѡ нече́стїѧ. прпⷣбный же, слы́шавъ сїѧ̑, наста́ви ю҆̀ въ та́инствахъ вѣ́ры и҆ крестѝ ю҆̀. ѻ҆на́ же во ѡ҆бновле́нїи дꙋ́ха бл҃года́рнѡ поѧ́ше бг҃ꙋ: А҆ллилꙋ́їа.

І҆́косъ в҃.

Ра́зꙋмъ благі́й, бл҃горо́дство и҆́стинное, бога́тство неги́блющее стѧжа́вши въ дꙋхо́вномъ ѿрожде́нїи, ст҃а́ѧ є҆катері́но, досто́йна ꙗ҆ви́сѧ нбⷭ҇нагѡ жениха̀ хрⷭ҇та̀, и҆́же, па́ки ꙗ҆ви́всѧ є҆́й, возлюбѝ ю҆̀ и҆ дарова́ннымъ пе́рстнемъ въ невѣ́стꙋ себѣ̀ ѡ҆брꙋчѝ. ѻ҆на́ же, позна́вши тако́е къ не́й бл҃говоле́нїе бж҃їе, та́кѡ ᲂу҆ѧзви́сѧ любо́вїю є҆гѡ̀, ꙗ҆́кѡ не мꙋ́дрствоваше бо́лѣе ѡ҆ земны́хъ веща́хъ, но ѡ҆ возлю́бленнѣмъ свое́мъ непреста́ннѡ мы́слѧше. таково́й блгⷣти сподо́бльшаѧсѧ слы́ши ѿ на́съ:

Ра́дꙋйсѧ, ѕлово́нїе мїрско́е возненави́дѣвшаѧ: ра́дꙋйсѧ, въ воню̀ мѵ́ра хрⷭ҇то́ва текꙋ́щаѧ.

Ра́дꙋйсѧ, до́браѧ люби́тельнице жениха̀ безсме́ртнагѡ: ра́дꙋйсѧ, сокро́вище бл҃говоле́нїѧ вы́шнѧго.

Ра́дꙋйсѧ, денни́це пресвѣ́тлаѧ: ра́дꙋйсѧ, лꙋно̀ соверше́ннаѧ.

Ра́дꙋйсѧ, ма́слино, въ домꙋ̀ бж҃їи насажде́ннаѧ: ра́дꙋйсѧ, ке́дре въ лїва́нѣ высокора́сленный.

Ра́дꙋйсѧ, є҆катері́но, невѣ́сто хрⷭ҇то́ва премꙋ́драѧ.

Конда́къ г҃.

Си́ла вы́шнѧгѡ дадѐ тогда̀ ст҃ѣ́й є҆катері́нѣ дерзнове́нїе, є҆́же нече́ствꙋющаго царѧ̀ маѯїмі́на ѡ҆ принесе́нїи і҆́дѡлѡмъ же́ртвъ ѡ҆бличи́ти небоѧ́зненнѡ, и҆ то́й пребы́сть безгла́сенъ на мно́гъ ча́съ, не могі́й проти́витисѧ є҆ѧ̀ глаго́лѡмъ. ѻ҆на́ же, бл҃годарѧ́щи бг҃а, воспѣва́ше: А҆ллилꙋ́їа.

І҆́косъ г҃.

И҆мꙋ́щи ст҃а́ѧ є҆катері́на свы́ше да́ннꙋю є҆́й премꙋ́дрость, є҆гда̀ нечести́вый ца́рь, поста́вивъ пред̾ собо́ю, вопроша́ше ю҆̀ ѡ҆ ро́дѣ є҆ѧ̀ и҆ са́нѣ, ѻ҆на̀ и҆сповѣ́да себѐ бы́ти дще́рь ца́рскꙋю, филосо́фскїѧ и҆ ри́тѡрскїѧ наꙋ́ки до́брѣ и҆зꙋчи́вшꙋю, па́че же хрⷭ҇то́вꙋ невѣ́стꙋ себѐ наименова̀, въ ꙗ҆́вное ѿверже́нїе і҆́дѡльскагѡ слꙋже́нїѧ. сегѡ̀ ра́ди воспѣва́емъ є҆́й си́це:

Ра́дꙋйсѧ, ᲂу҆́бѡ, є҆катері́но пресла́внаѧ: ра́дꙋйсѧ, ца́рское сщ҃е́нїе.

Ра́дꙋйсѧ, пчело̀, ды́ма і҆́дѡльскагѡ ѿлетѣ́вшаѧ: ра́дꙋйсѧ, голꙋби́це, зла̑ты крила̑ и҆мꙋ́щаѧ.

Ра́дꙋйсѧ, кади́ло хрⷭ҇то́ва бл҃гоꙋха́нїѧ.

Ра́дꙋйсѧ, є҆катері́но, невѣ́сто хрⷭ҇то́ва премꙋ́драѧ.

Конда́къ д҃.

Бꙋ́рею ꙗ҆́рости вознеи́стовивсѧ ца́рь на ст҃ꙋ́ю дѣ́вꙋ, речѐ къ не́й: не глаго́ли ѕлѣ̀ ѡ҆ бозѣ́хъ на́шихъ. ст҃а́ѧ же є҆катері́на ѿвѣща̀: а҆́ще восхо́щеши ѡ҆трѧстѝ мра́къ пре́лести ѿ дꙋше́вныхъ тѝ ѻ҆че́й, ᲂу҆разꙋмѣ́еши богѡ́въ твои́хъ хꙋ́дость и҆ позна́еши и҆́стиннагѡ бг҃а, є҆го́же и҆́мѧ то́кмѡ глаго́лемое, и҆лѝ кре́стъ, и҆з̾ѡбразꙋ́емый на воздꙋ́сѣ, прогонѧ́етъ бо́ги твоѧ̑ и҆ погꙋблѧ́етъ. и҆ а҆́ще повели́ши, ꙗ҆влю̀ тебѣ̀ и҆́стинꙋ, пою́щи бг҃ꙋ: А҆ллилꙋ́їа.

І҆́косъ д҃.

Слы́шавъ нечести́вый ца́рь свобо́дный и҆ мꙋ́дрый ѿвѣ́тъ тво́й ѡ҆ вѣ́рѣ хрⷭ҇то́вой, ᲂу҆боѧ́всѧ, да не бꙋ́детъ побѣжде́нъ ѿ тебѣ̀, собра̀ ѿ предѣ́лѡвъ держа́вы своеѧ̀ мꙋдрецѡ́въ, число́мъ пѧтдесѧ́тъ, на прѣ́нїе. ты́ же, а҆рха́гг҃ломъ мїхаи́ломъ ᲂу҆твержде́ннаѧ и҆ ѡ҆ побѣ́дѣ ᲂу҆вѣ́реннаѧ, возра́доваласѧ є҆сѝ встꙋпи́ти въ прѣ́нїе съ ни́ми. прїимѝ ᲂу҆̀бо, дѣ́во, ѿ на́съ похвалꙋ̀ сїю̀:

Ра́дꙋйсѧ, и҆з̾ѧви́тельнице ᲂу҆ма̀ хрⷭ҇то́ва: ра́дꙋйсѧ, херꙋві́мское стѧжа́вшаѧ бг҃опозна́нїе.

Ра́дꙋйсѧ, серафі́мскою воспале́ннаѧ къ бг҃ꙋ любо́вїю: ра́дꙋйсѧ, мꙋ́дрыхъ мꙋдрѣ́йшаѧ.

Ра́дꙋйсѧ, дꙋхо́вный ме́чь на невѣ́рїе и҆з̾ѡстри́вшаѧ: ра́дꙋйсѧ нече́стїѧ прогони́тельнице.

Ра́дꙋйсѧ вѣ́рныхъ наста́внице.

Ра́дꙋйсѧ, є҆катері́но, невѣ́сто хрⷭ҇то́ва премꙋ́драѧ.

Конда́къ є҃.

Бг҃освѣ́тлѣй ѕвѣздѣ̀ была̀ є҆сѝ подо́бна, є҆катері́но, препрѣ́вши пѧтдесѧ́тъ виті́й и҆ наста́вивши и҆́хъ на пꙋ́ть хрⷭ҇тїа́нскїй, ведꙋ́щїй къ пра́ведномꙋ сл҃нцꙋ, ѿ дв҃ы возсїѧ́вшемꙋ хрⷭ҇тꙋ̀ бг҃ꙋ, свои́ми мꙋ́дрыми глаго́лы, и҆̀же и҆ ѡ҆сꙋжде́ни бы́вше за хрⷭ҇та̀ на сожже́нїе и҆ напꙋ́тствовани мл҃твою твое́ю, съ ра́достїю и҆до́ша въ ѻ҆́гнь, пою́ще: А҆ллилꙋ́їа.

І҆́косъ є҃.

Ви́дѣвъ царю́ющїй повелѣ̑нїѧ своѧ̑ въ тебѣ̀ пренебреже́нны и҆ ᲂу҆вѣща̑нїѧ презре́нны, ѡ҆брати́сѧ къ лꙋка́вствꙋ, є҆́же ласка́нїемъ прельсти́ти тѧ̀, ѡ҆бѣща́ѧ полца́рства тебѣ̀ да́ти. ты́ же вѣ́рꙋ сокро́вищамъ земны́мъ предпоче́тши и҆ жениха̀ хрⷭ҇та̀ возлюби́вши па́че земна́гѡ ца́рства и҆ ѡ҆де́ждꙋ мꙋ́ченичества па́че багрѧни́цы, ѿве́ргла є҆сѝ є҆гѡ̀ сꙋесло́вїе. сегѡ̀ ра́ди восписꙋ́емъ тѝ сїѧ̑ похва́льнаѧ:

Ра́дꙋйсѧ, дѣ́во, ле́сть ѡ҆бличи́вшаѧ: ра́дꙋйсѧ, запина́телѧ ѕмі́ѧ попра́вшаѧ.

Ра́дꙋйсѧ, дще́рь царе́ва: ра́дꙋйсѧ, дѣ́во, рѧ̑сны златы́ми ѡ҆дѣ́ѧннаѧ.

Ра́дꙋйсѧ, всѧ́кое вещество̀ превозше́дшаѧ: ра́дꙋйсѧ, на го́рꙋ бг҃овидѣ́нїѧ восте́кшаѧ.

Ра́дꙋйсѧ, свѣ́томъ бг҃опозна́нїѧ просвѣще́ннаѧ: ра́дꙋйсѧ, трꙋба̀ дх҃а, воспѣ́вшаѧ гла́съ и҆́стиннагѡ бг҃осло́вїѧ.

Ра́дꙋйсѧ, до́брое вѣ́ры и҆сповѣ́данїе: ра́дꙋйсѧ, свѣ́та є҆ѵⷢ҇льскагѡ сїѧ́нїе.

Ра́дꙋйсѧ, зако́нѡвъ вѣ́чныхъ храни́тельнице: ра́дꙋйсѧ, на́ша помо́щнице.

Ра́дꙋйсѧ, є҆катері́но, невѣ́сто хрⷭ҇то́ва премꙋ́драѧ.

Конда́къ ѕ҃.

Проповѣ́дникѡмъ бг҃оно́снымъ, а҆по́столѡмъ поревнова́вши, дерзнове́ннѡ пред̾ лице́мъ мꙋчи́телѧ проповѣ́дала є҆сѝ хрⷭ҇та̀, и҆́стиннагѡ бг҃а, є҆мꙋ́же въ ра́нахъ и҆ въ темни́цѣ пѣ́ла є҆сѝ: А҆ллилꙋ́їа.

І҆́косъ ѕ҃.

Возсїѧ́вый въ се́рдцѣ твое́мъ свѣ́тъ и҆́стиннагѡ бг҃оразꙋ́мїѧ ѿгна́лъ є҆́сть мра́къ скорбе́й, и҆́же не ѡ҆ста́ви тѧ̀ а҆лка́ти, голꙋби́цею пи́щꙋ тѝ посыла́ѧ, нижѐ стꙋжа́ти ѡ҆ болѣ́зни, посѣти́лъ бо са́мъ тѧ̀ въ темни́цѣ, ѡ҆бодрѧ́ѧ и҆ мнѡ́ги вѣнцы̑ ѡ҆бѣщава́ѧ. ты́ же, терпѣливодꙋ́шнаѧ, си́мъ па́че ᲂу҆крѣпи́ласѧ є҆сѝ и҆ цари́цꙋ а҆́ѵгꙋстꙋ и҆ воево́дꙋ порфѵ́рїа, съ во́ины прите́кшихъ къ тебѣ̀, ѡ҆брати́ла є҆сѝ къ свѣ́тꙋ вѣ́ры хрⷭ҇то́вой и҆ наꙋчи́ла пѣ́ти тебѣ̀ сїѧ̑:

Ра́дꙋйсѧ, мѷрополо́жнице бжⷭ҇твенныѧ любвѐ: ра́дꙋйсѧ, а҆дама́нте крѣ́пкїй.

Ра́дꙋйсѧ, вина̀ чꙋде́съ неизрече́нныхъ: ра́дꙋйсѧ, врага̀ терпе́нїемъ ᲂу҆би́вшаѧ.

Ра́дꙋйсѧ, ꙗ҆́звы гдⷭ҇а на тѣ́лѣ свое́мъ носи́вшаѧ: ра́дꙋйсѧ, цари́цѣ а҆́ѵгꙋстѣ съ прише́дшими къ мꙋ́ченическомꙋ по́двигꙋ пꙋтенаста́внице.

Ра́дꙋйсѧ, ꙗ҆́кѡ во тмѣ̀ свѣ́тъ была̀ є҆сѝ: ра́дꙋйсѧ, ꙗ҆́кѡ са́мъ гдⷭ҇ь, свѣ́тъ мі́ра, тебѣ̀, въ темни́цѣ бы́вшей, себѐ ꙗ҆ви́лъ є҆́сть.

Ра́дꙋйсѧ, ᲂу҆́зъ грѣхо́вныхъ ско́раѧ рѣши́тельнице: ра́дꙋйсѧ, болѣ́знꙋющихъ ско́раѧ цѣле́бнице.

Ра́дꙋйсѧ, помо́щнице на́шегѡ сп҃се́нїѧ.

Ра́дꙋйсѧ, є҆катері́но, невѣ́сто хрⷭ҇то́ва премꙋ́драѧ.

Конда́къ з҃.

Хотѧ́щꙋ безбо́жномꙋ царю̀ привестѝ тѧ̀ къ ме́рзкомꙋ і҆дѡлослꙋже́нїю, па́ки сѣ́ти подстила́етъ тебѣ̀, премꙋ́драѧ, є҆́же ᲂу҆лови́ти тѧ̀ ле́стнѡ похвало́ю красоты̀ твоеѧ̀. ты́ же красотꙋ̀ ве́щь привре́меннꙋ и҆ скоропрехо́днꙋ и҆менова́ла є҆сѝ, хрⷭ҇та́ же и҆сповѣ́дала є҆сѝ бг҃а жи́ва и҆ и҆́стинна и҆ пѣ́ла є҆мꙋ̀: А҆ллилꙋ́їа.

І҆́косъ з҃.

Но́вꙋю показа̀ ца́рь ꙗ҆́рость и҆ безчеловѣ́чїе, повелѣ́въ є҆па́рхꙋ коле́сами растерза́ти дѣ́вственное, чи́стое и҆ ст҃о́е тѣ́ло твоѐ, но чꙋде́снѡ рꙋко́ю а҆́гг҃ла а҆́бїе разрѣше́на была̀ є҆сѝ безвре́дна и҆ коле́са на ча́сти сокрꙋше́ны, и҆́миже мнѡ́ги ѿ невѣ́рныхъ ᲂу҆бїе́ны, ꙗ҆́кѡ ᲂу҆диви́сѧ са́мъ ца́рь и҆ предстоѧ́щїй наро́дъ, и҆̀же и҆ взыва́ше: вели́къ бг҃ъ хрⷭ҇тїа́нскїй! мы́ же, чꙋдѧ́щесѧ семꙋ̀, взыва́емъ тебѣ̀:

Ра́дꙋйсѧ, мч҃нце, а҆́гг҃лѡмъ честна́ѧ и҆ говѣ́йнаѧ: ра́дꙋйсѧ, сла́во полкѡ́въ страда́льческихъ.

Ра́дꙋйсѧ, свѣ́тлаѧ на врагѝ побѣ́да: ра́дꙋйсѧ, стра́хъ невѣ́рныхъ.

Ра́дꙋйсѧ, сосꙋ́де мно́жайшїѧ си́лы бж҃їѧ: ра́дꙋйсѧ, ра́дованїе вѣ́рныхъ.

Ра́дꙋйсѧ, є҆катері́но, невѣ́сто хрⷭ҇то́ва премꙋ́драѧ.

Конда́къ и҃.

Стра́нное сла́вы и҆змѣне́нїе и҆ за хрⷭ҇та̀ страда́нїе цари́цы и҆ воево́ды съ во́ины ви́дѣвше, ᲂу҆страни́мсѧ любвѐ мі́ра и҆ пло́ти и҆ впери́мъ себѐ къ разꙋмѣ́нїю бг҃а, се́й бо є҆́сть красота̀, и҆ сла́ва, и҆ вѣне́цъ на́мъ, пою́щымъ: А҆ллилꙋ́їа.

І҆́косъ и҃.

Ве́сь сла́дость, ве́сь жела́нїе тебѣ̀, ст҃а́ѧ є҆катері́но, бы́сть і҆и҃съ: сла́дцѣ бо є҆гѡ̀ ра́ди го́рькїѧ мꙋ́ки терпѣ́ла є҆сѝ и҆ ски́петръ, предлага́емый тебѣ̀, попра́ла є҆сѝ, предзрѧ̀ бꙋ́дꙋщее воздаѧ́нїе. ѿ на́съ же прїимѝ похва́льнаѧ сїѧ̑:

Ра́дꙋйсѧ, чⷭ҇таѧ, чи́стѣ чⷭ҇таго возлюби́вшаѧ: ра́дꙋйсѧ, го́рлице, кра́снаго жениха̀ въ пꙋсты́нѣ до́льнагѡ мі́ра вожделѣ́вшаѧ.

Ра́дꙋйсѧ, воню̀ ри́зъ є҆гѡ̀ бл҃гоꙋха́вшаѧ: ра́дꙋйсѧ, ꙗ҆́кѡ се́рна на гора́хъ а҆рѡма́тскихъ и҆ска́вшаѧ рожде́ннаго пре́жде холмѡ́въ вѣ́чныхъ.

Ра́дꙋйсѧ, по́двигъ страда́льческїй ра́ди любвѐ хрⷭ҇то́вы соверши́вшаѧ: ра́дꙋйсѧ, ли́къ мꙋ́ченическїй бг҃ꙋ приве́дшаѧ.

Ра́дꙋйсѧ, ꙗ҆́кѡ виті́и тобо́ю полꙋчи́ша црⷭ҇тво нбⷭ҇ное: ра́дꙋйсѧ, ꙗ҆́кѡ то́еже тобо́ю полꙋчи́ти ча́емъ.

Ра́дꙋйсѧ, покро́ве и҆ забра́ло на́ше.

Ра́дꙋйсѧ, є҆катері́но, невѣ́сто хрⷭ҇то́ва премꙋ́драѧ.

Конда́къ ѳ҃.

Всѐ є҆стество̀ а҆́гг҃льское возра́довасѧ ра́достїю, зрѧ̀ тѧ̀, є҆катері́но, побѣди́вши мїроде́ржца, ше́ствꙋющꙋю къ премі́рнымъ ꙗ҆́кѡ побѣдоно́снꙋю воево́дꙋ, въ послѣ́дованїи полка̀ страда́льческагѡ, и҆ воспѣ̀ побѣ̑днаѧ, взыва́ѧ: А҆ллилꙋ́їа.

І҆́косъ ѳ҃.

Вѣті́и многовѣща́ннїи заꙋсти́шасѧ: не возмо́гше бо противовѣща́ти бг҃одꙋхнове́ннымъ словесє́мъ твои́мъ, молча́нїемъ почита́ютъ дарѡва́нїѧ твоѧ̑: мы́ же, немощні́и, ка́кѡ мо́жемъ ѿве́рсти ᲂу҆ста̀ на хвалы̑ твоѧ̀; ѻ҆дна́кѡ дерза́емъ и҆ мо́лимъ, сподо́би, блага́ѧ, безбѣ́днѡ принестѝ тебѣ̀ пѣ́снь сїю̀:

Ра́дꙋйсѧ, ѻ҆рга́не дх҃а ст҃а́гѡ: ра́дꙋйсѧ, зарѐ неизрече́ннагѡ ѡ҆сїѧ́нїѧ.

Ра́дꙋйсѧ, догма́тѡвъ бжⷭ҇твенныхъ пꙋчи́но: ра́дꙋйсѧ, хи́тросте, препрѣ́вшаѧ фїлосо́фѡвъ.

Ра́дꙋйсѧ, ча́ше премꙋ́дрости: ра́дꙋйсѧ, плетє́нїѧ виті́й растерза́вшаѧ.

Ра́дꙋйсѧ, плени̑цы грѣхѡ́вныѧ разрѣша́ющаѧ.

Ра́дꙋйсѧ, є҆катері́но, невѣ́сто хрⷭ҇то́ва премꙋ́драѧ.

Конда́къ і҃.

Спастѝ хотѧ́щи дꙋ́шꙋ твою̀, ѡ҆ тѣ́лѣ твое́мъ неради́ла є҆сѝ, є҆катері́но, и҆ на ме́чное ᲂу҆сѣче́нїе, мꙋчи́телю да́вшꙋ на то̀ и҆зрече́нїе, ты̀ ра́достнѡ потекла̀ є҆сѝ, пою́щи ст҃о́мꙋ безсме́ртномꙋ: А҆ллилꙋ́їа.

І҆́косъ і҃.

Стѣна̀ тве́рда и҆ непреѡдоли́ма ꙗ҆ви́ласѧ є҆сѝ жена́мъ, тебѐ на мѣ́сто ᲂу҆сѣче́нїѧ провожда́юшымъ и҆ съ рыда́нїемъ тѧ̀ жестокосе́рдꙋ къ себѣ̀ и҆ безразсꙋ́днꙋ бы́ти и҆менꙋ́ющымъ: ꙗ҆́кѡ не пощади́ла є҆сѝ сла́дкагѡ живота̀ въ цвѣ́тѣ ю҆́ности, ꙗ҆́кѡ презрѣ́ла є҆сѝ земно́е предлага́емое ца́рство и҆ блаже́нство. ты́ же воспрети́ла є҆сѝ неполе́зный пла́чъ и҆́хъ и҆ сꙋесло́вїе, текꙋ́щи скорѣ́йши соедини́тисѧ чрез̾ сме́рть со свои́мъ возлю́бленнымъ, тогѡ̀ ра́ди слы́шиши:

Ра́дꙋйсѧ, ра́достнѡ за главꙋ̀ цр҃кве хрⷭ҇та̀ под̾ ме́чь главꙋ̀ свою̀ приклони́вшаѧ: ра́дꙋйсѧ, до конца̀ претерпѣ́вшаѧ.

Ра́дꙋйсѧ, тече́нїе до́брѣ сконча́вшаѧ: ра́дꙋйсѧ, ꙗ҆́кѡ ни ско́рбїю, ни ра́нами, ни мече́мъ съ пꙋтѝ хрⷭ҇то́ва и҆сповѣ́данїѧ не соврати́ласѧ є҆сѝ.

Ра́дꙋйсѧ, ꙗ҆́кѡ пла́мень любвѐ въ и҆сто́чницѣ кро́ве неꙋгаси́мь соблю́дшаѧ: ра́дꙋйсѧ, мч҃никѡвъ красото̀.

Ра́дꙋйсѧ, крѣ́пкое хрⷭ҇тїа́нъ прибѣ́жище.

Ра́дꙋйсѧ, є҆катері́но, невѣ́сто хрⷭ҇то́ва премꙋ́драѧ.

Конда́къ а҃і.

Пѣ́нїе похва́льное дерзнꙋ́хомъ принестѝ тебѣ̀, но ѡ҆скꙋдѣва́етъ сло́во на́ше и҆ недоꙋмѣва́етъ ᲂу҆́мъ, ка́кѡ глаго́лати: ѻ҆ба́че сло́во твоѐ премꙋ́дрое, мно́гихъ и҆схити́вшее ѿ невѣ́жества и҆ і҆дѡлонече́стїѧ, возставлѧ́етъ на́съ. да́ждь на́мъ сло́во твоѐ, во є҆́же пѣ́ти ᲂу҆ди́вльшемꙋ на тебѣ̀ вели́чїѧ своѧ̀ бг҃ꙋ: А҆ллилꙋ́їа.

І҆́косъ а҃і.

Свѣтопрїе́мнꙋю тѧ̀ свѣщꙋ̀, ме́чнымъ ᲂу҆сѣче́нїемъ погаше́ннꙋю, но на свѣ́щницѣ нбⷭ҇нѣмъ пред̾ прⷭ҇то́ломъ ст҃ы́ѧ трⷪ҇цы поста́вленнꙋю, ви́дѣвше ст҃і́и а҆́гг҃ли, поклони́шасѧ живꙋ́щемꙋ во вѣ́ки и҆, полꙋчи́вше ѿ влⷣки повелѣ́нїе, дѣ́вственное тѣ́ло твоѐ на горѣ̀ сїна́йстѣй погребо́ша, да не ви́димо бꙋ́детъ, ꙗ҆́кѡже сама̀ хотѣ́ла є҆сѝ, врагѡ́мъ гдⷭ҇нимъ. мы́ же пѣ́снь сїю̀ возсыла́емъ тѝ:

Ра́дꙋйсѧ, солнцеѡбра́знаѧ дѣ́во, на нб҃са̀ дꙋ́хомъ возше́дшаѧ: ра́дꙋйсѧ, сїѡ́на го́рнѧгѡ дости́гшаѧ.

Ра́дꙋйсѧ, вѣ́нче добро́ты въ рꙋцѣ̀ гдⷭ҇ни: ра́дꙋйсѧ, ча́ше, ѿ ѡ҆би́лїѧ до́мꙋ бж҃їѧ че́рплющаѧ ра́дость.

Ра́дꙋйсѧ, къ ски́нїи нерꙋкотворе́ннѣй, вѣ́чнѣй прибли́жившаѧсѧ: ра́дꙋйсѧ, на горѣ̀ зако́ннѣй почива́ющаѧ тѣ́ломъ.

Ра́дꙋйсѧ, ꙗ҆́кѡ та́мѡ ви́дѣна бы́ша ше́ствїѧ бг҃а сїна́ина, бг҃а і҆а́кѡвлѧ: ра́дꙋйсѧ, мѣ́ста бг҃овидѣ́нїѧ мѡѷсе́ова ѡ҆держа́нїе.

Ра́дꙋйсѧ, ре́вности и҆лїины̀ ᲂу҆каза́нїе: ра́дꙋйсѧ, кꙋпины̀ несгара́емой ꙗ҆вле́нїе.

Ра́дꙋйсѧ, дѣ́во, дв҃ѣ цр҃и́цѣ, въ ри́зы позлаще́нны ѡ҆дѣ́ѧнной, преиспещре́нной вслѣ́дствꙋющаѧ: ра́дꙋйсѧ, ꙗ҆́кѡ тобо́ю сы́й воспѣва́етсѧ посредѣ̀ дѣ́въ тѷмпа́нницъ.

Ра́дꙋйсѧ, ꙗ҆́кѡ на тебѣ̀ велелѣ́пота є҆гѡ̀: ра́дꙋйсѧ, прⷭ҇то́ла вѣ́чнагѡ предстоѧ́тельнице.

Ра́дꙋйсѧ, ѿ хра́ма вселе́нныѧ мл҃твенники къ тебѣ̀ назира́ющаѧ: ра́дꙋйсѧ, кади́ло мл҃твъ вы́шнемꙋ ѡ҆ на́съ бл҃гопрїѧ́тное.

Ра́дꙋйсѧ, є҆катері́но, невѣ́сто хрⷭ҇то́ва премꙋ́драѧ.

Конда́къ в҃і.

Блгⷣть дана̀ тебѣ̀ ѿ бг҃а рꙋково́дствовати къ позна́нїю и҆́стины є҆гѡ̀, въ та́йнѣ сокрове́ннѣй, и҆ даѧ́ти всѣ̑мъ, ꙗ҆́же къ по́льзѣ прошє́нїѧ. тѣ́мже мы̀, помраче́ннїи, ᲂу҆миле́ннѡ про́симъ тѧ̀, мꙋ́драѧ дѣ́во: просвѣтѝ ᲂу҆́мныѧ на́ши ѻ҆́чи и҆ положѝ на́мъ къ нб҃сѝ стезю̀ прохо́днꙋ, да пое́мъ съ тобо́ю ны́нѣ и҆ во всѧ̑ вѣ́ки є҆ди́номꙋ премꙋ́дромꙋ: А҆ллилꙋ́їа.

І҆́косъ в҃і.

Пою́ще крѣ́пкїѧ твоѧ̑ мч҃ничєскїѧ по́двиги, хва́лимъ тѧ̀, ꙗ҆́кѡ ѡ҆дꙋшевле́нный сосꙋ́дъ сп҃се́нїѧ человѣ́кѡвъ: твои́мъ бо ра́зꙋмомъ бг҃ъ премꙋ́дрость премꙋ́дрыхъ вѣ́ка сегѡ̀ погꙋбѝ: тобо́ю виті́й призва̀ въ ꙗ҆зы́къ свѧ́тъ, въ лю́ди ѡ҆бновле́нїѧ, ꙗ҆́кѡ тѣ́мъ страда́ти за хрⷭ҇та̀. просвѣтѝ и҆ на́съ, блага́ѧ дѣ́во, помраче́нныхъ, да зове́мъ тѝ:

Ра́дꙋйсѧ, зерца́ло бж҃їѧ мꙋ́дрости: ра́дꙋйсѧ, си́лою вы́шнѧгѡ ѡ҆дѣ́ѧннаѧ.

Ра́дꙋйсѧ, подви́жнице, є҆ле́емъ ра́дованїѧ ᲂу҆маще́ннаѧ: ра́дꙋйсѧ, воево́до, по́лкъ бж҃їй къ вѣ́чномꙋ вели́чествꙋ предпосла́вшаѧ.

Ра́дꙋйсѧ, во свѣ́тлѡсти ст҃ы́ѧ вше́дшаѧ: ра́дꙋйсѧ, во свѣ́тѣ непристꙋ́пнѣмъ живꙋ́щемꙋ въ ли́цѣ пла́менныхъ слꙋ́гъ предста́вшаѧ.

Ра́дꙋйсѧ, гро́мъ трист҃а́гѡ пѣ́нїѧ гла́сомъ свои́мъ ᲂу҆множа́ющаѧ: ра́дꙋйсѧ, неизрече́ннꙋю сла́дость добрѡ́ты вкꙋша́ющаѧ.

Ра́дꙋйсѧ, ꙗ҆́кѡ хвала̀ и҆ ра́дованїе над̾ главо́ю твое́ю: ра́дꙋйсѧ, ꙗ҆́кѡ вѣ́чнаѧ сла́ва тебѣ̀ ѡ҆б̾е́млетъ.

Ра́дꙋйсѧ, ѿ трїѷпоста́снагѡ бжⷭ҇тва̀ вѣнце́мъ нбⷭ҇нагѡ црⷭ҇твїѧ ᲂу҆вѣнча́ннаѧ: ра́дꙋйсѧ, блгⷣти и҆ безконе́чной сла́вы на́мъ хода́таице.

Ра́дꙋйсѧ, є҆катері́но, невѣ́сто хрⷭ҇то́ва премꙋ́драѧ.

Конда́къ г҃і.

Ѽ ст҃а́ѧ великомч҃нце є҆катері́но! прїимѝ сїѐ похва́льное пѣ́нїе и҆ и҆зба́ви на́съ ѿ вра̑гъ ви́димыхъ и҆ неви́димыхъ и҆ ѿ вѣ́чнагѡ мꙋче́нїѧ твои́мъ бл҃гопрїѧ́тнымъ хода́тайствомъ сохранѝ, да съ тобо́ю при́снѡ пое́мъ бг҃ꙋ: А҆ллилꙋ́їа.

Се́й конда́къ глаго́лн три́жды, та́же і҆́косъ а҃-й, и҆ конда́къ а҃-й.

І҆́косъ а҃.

А҆́гг҃лѡмъ ра́внꙋю чистотꙋ̀ и҆мꙋ́щи, ст҃а́ѧ дѣ́во є҆катері́но, съ а҆́гг҃лы бжⷭ҇твеннагѡ ѡ҆заре́нїѧ сподо́биласѧ є҆сѝ, съ ни́ми же воспѣва́ющи трист҃ꙋ́ю пѣ́снь, ᲂу҆слы́ши на́съ, пою́щихъ тебѣ̀ на землѝ сїѧ̑:

Ра́дꙋйсѧ, чⷭ҇тно́е ст҃ы́ни жили́ще: ра́дꙋйсѧ, чꙋде́сное зна́менїе сбы́вшагѡсѧ на тебѣ̀ бж҃їѧ про́мысла.

Ра́дꙋйсѧ, бл҃говоле́нїѧ ѻ҆́ч҃а сосꙋ́де: ра́дꙋйсѧ, страда́нїй хрⷭ҇то́выхъ и҆сполне́нїе.

Ра́дꙋйсѧ, чⷭ҇тое дх҃а ст҃а́гѡ ѡ҆бита́лище: ра́дꙋйсѧ, свѣ́томъ бл҃гочести́выѧ вѣ́ры просвѣти́вшаѧсѧ.

Ра́дꙋйсѧ, ст҃о́ю кꙋпѣ́лїю ѿрожде́ннаѧ: ра́дꙋйсѧ, и҆змы́вшаѧ ри̑зы своѧ̑ въ кро́ви а҆́гнчей на землѝ.

Ра́дꙋйсѧ, ликꙋ́ющаѧ со свѧще́нными дѣ́вами на нб҃сѝ.

Ра́дꙋйсѧ, є҆катері́но, невѣ́сто хрⷭ҇то́ва премꙋ́драѧ.

Конда́къ а҃.

И҆збра́ннꙋю и҆ вѣнча́ннꙋю дѣ́вꙋ мч҃нцꙋ, невѣ́стꙋ хрⷭ҇то́вꙋ є҆катері́нꙋ, похва́льными пѣ́сньми воспои́мъ, ꙗ҆́кѡ пресла́внꙋю мꙋчи́телѧ побѣди́тельницꙋ и҆ премꙋ́дрꙋю фїлосо́фѡвъ наста́вницꙋ: ты́ же, великомч҃нце є҆катері́но, и҆мꙋ́щи дерзнове́нїе ко гдⷭ҇ꙋ, приклони́сѧ млⷭ҇тивнѣ къ бл҃гопотрє́бнымъ проше́нїємъ зовꙋ́щихъ тѝ:

Ра́дꙋйсѧ, є҆катері́но, невѣ́сто хрⷭ҇то́ва премꙋ́драѧ.

Моли́тва.

Ѽ ст҃а́ѧ є҆катері́но, дѣ́во и҆ мч҃нице, и҆́стиннаѧ хрⷭ҇то́ва невѣ́сто! мо́лимъ тѧ̀ чрез̾ ѡ҆собли́вꙋю блгⷣть, є҆́юже предвари́ тѧ жени́хъ тво́й, сладча́йшїй і҆и҃съ: ꙗ҆́кѡже посрами́вши пре́лєсти мꙋчи́телѧ, мꙋ́дростїю твое́ю пѧтдесѧ́тъ виті́й побѣди́ла є҆сѝ и҆, напои́вши и҆́хъ нбⷭ҇нымъ ᲂу҆че́нїемъ, къ свѣ́тꙋ и҆́стинныѧ вѣ́ры наста́вила є҆сѝ, та́кѡ и҆спросѝ и҆ на́мъ ѻ҆́нꙋю бж҃їю мꙋ́дрость, да и҆ мы̀, расто́ргнꙋвъ всѧ̑ ко́зни а҆́дскагѡ мꙋчи́телѧ и҆ презрѣ́въ мі́ра и҆ пло́ти собла́зны, досто́йны ꙗ҆ви́мсѧ бжⷭ҇твенныѧ сла́вы и҆ къ разшире́нїю ст҃ы́ѧ на́шеѧ правосла́вныѧ вѣ́ры сосꙋ́ды досто́йны содѣ́лаемсѧ, и҆ съ тобо́ю въ нбⷭ҇ной ски́нїи гдⷭ҇а и҆ влⷣкꙋ на́шего і҆и҃са хрⷭ҇та̀ хва́лимъ и҆ прославлѧ́емъ во всѧ̑ вѣ́ки. А҆ми́нь.

Свя­тая Ека­те­ри­на ро­ди­лась в Алек­сан­дрии во вто­рой по­ло­вине тре­тье­го сто­ле­тия. Про­ис­хо­ди­ла она из знат­но­го ро­да и от­ли­ча­лась свет­лым умом, уче­но­стью и кра­со­той. Мно­гие бо­га­тые и знат­ные же­ни­хи ис­ка­ли ее ру­ки, а мать и род­ные уго­ва­ри­ва­ли ее со­гла­сить­ся на брак. Но Ека­те­ри­на мед­ли­ла с от­ве­том и го­во­ри­ла сво­им близ­ким: «Ес­ли хо­ти­те, чтобы я вы­шла за­муж, то най­ди­те мне юно­шу, по­доб­но­го мне по кра­со­те и уче­но­сти».

Бог так устро­ил, что Ека­те­ри­на по­зна­ко­ми­лась с од­ним стар­цем-пу­стын­ни­ком, че­ло­ве­ком свет­ло­го ума и пра­вед­ной жиз­ни. Об­суж­дая с Ека­те­ри­ной до­сто­ин­ства ее по­клон­ни­ков, ста­рец ска­зал: «Я знаю Же­ни­ха, ко­то­рый во всем пре­вос­хо­дит те­бя. Нет ему по­доб­но­го». По­том он дал ей ико­ну Пре­свя­той Де­вы, обе­щал, что она по­мо­жет ей уви­деть необык­но­вен­но­го Же­ни­ха.

В бли­жай­шую ночь пред­ста­ви­лось Ека­те­рине в лег­ком сне, что Небес­ная Ца­ри­ца, окру­жен­ная Ан­ге­ла­ми, сто­ит пе­ред ней и дер­жит на ру­ках От­ро­ка, си­я­ю­ще­го, как солн­це. На­прас­но ста­ра­лась Ека­те­ри­на взгля­нуть на Его ли­цо: Он от­во­ра­чи­вал­ся от нее. «Не пре­зи­рай Тво­е­го со­зда­ния, – мо­ли­ла Бо­жия Ма­терь сво­е­го Сы­на, – ска­жи ей, что она долж­на сде­лать, чтобы уви­деть Твой свет­лый лик». «Пусть она вер­нет­ся к стар­цу и узна­ет от него», – от­ве­тил От­рок.

Чуд­ный сон глу­бо­ко по­ра­зил де­вуш­ку. Как толь­ко на­ста­ло утро, она по­спе­ши­ла к стар­цу, при­па­ла к но­гам его и про­си­ла у него со­ве­та. Ста­рец по­дроб­но объ­яс­нил ей ис­тин­ную ве­ру, рас­ска­зал о рай­ском бла­жен­стве пра­вед­ни­ков и о ги­бе­ли греш­ни­ков. Муд­рая де­ва по­ня­ла пре­вос­ход­ство хри­сти­ан­ской ве­ры над язы­че­ской, по­ве­ри­ла в Иису­са Хри­ста как Сы­на Бо­жия и при­ня­ла Свя­тое Кре­ще­ние. По­сле Кре­ще­ния бо­же­ствен­ный свет про­ник в нее и на­пол­нил ее ве­ли­кой ра­до­стью.

Ко­гда Ека­те­ри­на с об­нов­лен­ной ду­шой воз­вра­ти­лась до­мой, она дол­го мо­ли­лась, бла­го­да­ря Бо­га за ми­лость, ока­зан­ную ей. За­снув во вре­мя мо­лит­вы, она сно­ва уви­де­ла Ма­терь Бо­жию. Те­перь Бо­же­ствен­ный От­рок ми­ло­сти­во взи­рал на нее. Пре­свя­тая Де­ва взя­ла пра­вую ру­ку де­ви­цы, а От­рок на­дел ей чуд­ный пер­стень, ска­зав: «Не знай же­ни­ха зем­но­го». Ека­те­ри­на по­ня­ла, что с это­го мо­мен­та она об­ру­че­на Хри­сту и просну­лась с еще боль­шей ра­до­стью на серд­це. По­сле это­го она со­вер­шен­но пе­ре­ме­ни­лась ста­ла скром­ной, крот­кой и ми­ло­сти­вой. Она ста­ла ча­сто мо­лить­ся Бо­гу, про­ся ру­ко­вод­ства и по­мо­щи. Од­на цель во­оду­шев­ля­ла ее: жить для Хри­ста.

В ско­ром вре­ме­ни в Алек­сан­дрию при­был Мак­си­ми­ан (286–305 гг.), со­пра­ви­тель им­пе­ра­то­ра Дио­кли­ти­а­на. Он разо­слал вест­ни­ков по го­ро­дам Егип­та со­звать на­род на празд­ник в честь язы­че­ских бо­гов. Ека­те­ри­на скор­бе­ла, что царь, вме­сто то­го, чтобы со­дей­ство­вать про­све­ще­нию на­ро­да, еще боль­ше на­саж­да­ет язы­че­ские суе­ве­рия. Ко­гда на­сту­пил празд­ник, она при­шла в ка­пи­ще, где со­би­ра­лись жре­цы, знать и на­род, и без­бо­яз­нен­но ска­за­ла ца­рю: «Не стыд­но ли те­бе, царь, мо­лить­ся мерз­ким идо­лам! По­знай ис­тин­но­го Бо­га, без­на­чаль­но­го и бес­ко­неч­но­го; Им ца­ри цар­ству­ют и мир сто­ит. Он со­шел на зем­лю и сде­лал­ся че­ло­ве­ком для спа­се­ния на­ше­го».

Мак­си­ми­ан раз­гне­вал­ся на Ека­те­ри­ну за неува­же­ние к его цар­ско­му до­сто­ин­ству и по­ве­лел за­клю­чить ее в тем­ни­цу. За­тем он ве­лел уче­ным лю­дям убе­дить Ека­те­ри­ну в ис­тин­но­сти язы­че­ской ре­ли­гии. В те­че­ние несколь­ких дней они из­ла­га­ли пе­ред де­ви­цей раз­лич­ные до­во­ды в поль­зу язы­че­ской ре­ли­гии, но Ека­те­ри­на сво­ей ло­ги­кой и ра­зум­ны­ми до­во­да­ми раз­би­ва­ла их в прах. Она до­ка­зы­ва­ла им, что мо­жет су­ще­ство­вать толь­ко один пре­муд­рый Со­зда­тель все­го, ко­то­рый сво­и­ми со­вер­шен­ства­ми бес­ко­неч­но воз­вы­ша­ет­ся над язы­че­ски­ми бо­же­ства­ми. В кон­це кон­цов язы­че­ские муд­ре­цы при­зна­ли се­бя по­беж­ден­ны­ми все­со­кру­ша­ю­щей ло­ги­кой Ека­те­ри­ны. По­тер­пев неуда­чу на ин­тел­лек­ту­аль­ной поч­ве, Мак­си­ми­ан, од­на­ко, не от­сту­пил от сво­е­го на­ме­ре­ния пе­ре­убе­дить Ека­те­ри­ну. При­звав ее, он ста­рал­ся пре­льстить ее по­дар­ка­ми, обе­ща­ни­я­ми по­че­стей и сла­вы. Но Ека­те­ри­на оста­ва­лась непод­куп­ной.

Мак­си­ми­а­ну при­шлось на ко­рот­кое вре­мя от­лу­чить­ся из го­ро­да. Его же­на, ца­ри­ца Ав­гу­ста, мно­го слы­шав­шая о муд­ро­сти Ека­те­ри­ны, по­же­ла­ла уви­деть ее. Встре­тив­шись и по­бе­се­до­вав с Ека­те­ри­ной, Ав­гу­ста уве­ро­ва­ла в Хри­ста и при­ня­ла хри­сти­ан­скую ве­ру.

Ко­гда Мак­си­ми­ан воз­вра­тил­ся в Алек­сан­дрию, он сно­ва по­слал за Ека­те­ри­ной. На этот раз он снял мас­ку доб­ро­же­ла­тель­но­сти и стал гро­зить Ека­те­рине пыт­ка­ми и смер­тью. По­том он ве­лел при­не­сти ко­ле­са с ост­ры­ми зуб­ца­ми и ве­лел пре­дать ее этой ужас­ной каз­ни. Но ед­ва толь­ко на­ча­лись му­че­ния, как неви­ди­мая си­ла со­кру­ши­ла ору­дие му­ки, свя­тая Ека­те­ри­на оста­лась невре­ди­ма. Ца­ри­ца Ав­гу­ста, узнав о слу­чив­шем­ся, пред­ста­ла пе­ред сво­им му­жем и ста­ла уко­рять его, как он дер­за­ет вос­ста­вать про­тив Са­мо­го Бо­га. Царь при­шел в ярость от вме­ша­тель­ства сво­ей же­ны и по­ве­лел тут же умерт­вить ее.

На дру­гой день Мак­си­ми­ан в по­след­ний раз при­звал Ека­те­ри­ну и пред­ло­жил ей стать его же­ной, обе­щая ей все бла­га ми­ра. Но свя­тая Ека­те­ри­на и слу­шать об этом не хо­те­ла. Ви­дя бес­по­лез­ность всех сво­их уси­лий, царь ве­лел пре­дать ее смер­ти, и во­ин от­сек ей го­ло­ву в 304 го­ду.

Впо­след­ствии свя­тые остан­ки ве­ли­ко­му­че­ни­цы Ека­те­ри­ны по­па­ли на го­ру Си­най и с тех пор здесь хра­ни­лись в мо­на­сты­ре ее име­ни. Им­пе­ра­тор Петр Ве­ли­кий по­жерт­во­вал для ее мо­щей дра­го­цен­ную ра­ку.


См. так­же: "Жи­тие и стра­да­ние свя­той ве­ли­ко­му­че­ни­цы Ека­те­ри­ны" в из­ло­же­нии свт. Ди­мит­рия Ро­стов­ско­го.