Конда́к 1.

Избра́нная служи́тельнице Бо́га воплоще́ннаго и чи́стая храни́тельнице де́вства нерастле́ннаго, роди́телей свои́х Христа́ ра́ди отре́кшася и кро́ве испове́дницы порфи́рою обле́кшася, в ли́к пра́зднственный ны́не тя́ вси́ чту́щии соше́дшеся любо́вию пое́м, о Зла́то, Це́ркве позлаще́ние: но я́ко непоро́чная неве́ста Сло́ва Бо́жия и ве́лие ко Го́споду иму́щи дерзнове́ние, о на́с, всеокая́нных, моли́ся неотсту́пно, да ми́ра многостра́стнаго океа́н преплы́вше, сподо́бимся в де́нь су́дный благода́ти свы́ше, тебе́ с благодаре́нием уми́льно вопию́ще:

Ра́дуйся, великому́ченице Зла́то, злата́я целому́дрия пала́то.

И́кос 1.

А́нгелов и все́х святы́х небе́сных удивле́ние, любо́вию Христа́ возлю́бльшая презе́льною и де́вства чи́сте обручи́вшися Тому́ хране́нием, Зла́та достохва́льная пребы́сть неоскверне́нною; и ве́но златотка́нное — оде́жду обагре́нную Небе́сному Обру́чнику с весе́лием вручи́. Моли́твенницу те́плую от Бо́га получи́вше, деви́це богому́дренней уми́льно вопие́м:

Ра́дуйся, исто́чниче небе́сных утеше́ний; ра́дуйся, прекра́сное де́вства прославле́ние.

Ра́дуйся, Царя́ Христа́ обру́чнице нескве́рная; ра́дуйся, засту́пнице все́м лю́бящым тя́ ве́рная.

Ра́дуйся, кади́льнице Святе́йшему лучи́стая; ра́дуйся, деви́це благонра́вная и чи́стая.

Ра́дуйся, звездо́, во мра́це ра́бства просия́вшая; ра́дуйся, луно́ злата́я, тьму́ греха́ разгна́вшая.

Ра́дуйся, великому́ченице Зла́то, злата́я целому́дрия пала́то.

Конда́к 2.

Ви́дящи свята́я сатани́нство неве́рных, до́блественно му́ки претерпе́ти положи́ в се́рдце и моли́твою укре́пльшися, рече́: «Ве́рую во Христа́, Тому́ Еди́ному служу́, То́й бо е́сть Жени́х, Его́же а́з не отреку́ся да́же а́ще тмы́ страда́ний ны́не претерплю́». Сицево́е де́вы богому́дрыя раче́ние хва́ляще, пое́м Христу́ уми́льно: Аллилу́иа.

И́кос 2.

Ра́зума небе́снаго деви́цы не вмеща́юще и хотя́ще скве́рнии грехо́м растли́ти Зла́ту, отда́ша ю́ жена́м свои́м, да, льстя́ще и веща́юще, помутя́т се́рдце де́вы сластолю́бием и зла́том. Оба́че не смути́ся, ни подви́жеся свята́я, но па́че благода́тию мужа́ющися в любви́ пребы́сть на Ве́ры ка́мени, пога́ниц посрамля́ющи; те́мже и мы́ злату́ю Зла́ту си́це воспева́ем:

Ра́дуйся, Христо́ва избра́ннице венча́нная; ра́дуйся, Болга́рии печа́льнице всехва́льная.

Ра́дуйся, Боже́ственныя Ве́ры славосло́вие; ра́дуйся, смири́вшая ага́рян пустосло́вие.

Ра́дуйся, смути́вшая пога́нцев, боголю́бице; ра́дуйся, любе́зная други́не Богоро́дицы.

Ра́дуйся, пресла́достное му́чеников пе́ние; ра́дуйся, от е́реси наде́жное хране́ние.

Ра́дуйся, великому́ченице Зла́то, злата́я целому́дрия пала́то.

Конда́к 3.

Си́лою прельще́ния сломи́ти не возмо́гше Зла́ту благонра́вную, злове́рнии призва́ша с сестра́ми ея́, отца́ и ма́тери — слеза́ми да де́ву отвратя́т от Ве́ры чи́стыя, хвала́ми, да никогда́ возмо́жет Бо́гу пе́ти: Аллилу́иа.

И́кос 3.

Иму́щи де́ва чи́стую к роди́телем любо́вь смути́ся обольще́нием и вма́ле не подви́жеся, оба́че не возмо́же ухищре́ние враго́в, и Зла́та небому́дренно роди́телей отве́ржеся: «Глаго́лющих ми́ и́стиннаго Бо́га отрещи́ся, отны́не ва́с не ве́м. Христо́с Оте́ц е́сть мо́й, и Ма́терь ми́ отны́не е́сть Влады́чица Пречи́стая, все́х му́чеников во́и мне́ су́ть бра́тия и сестры́!» Мы́ у́бо небому́дрию диви́мся Зла́ты чи́стыя и гла́сы непреста́нными е́й си́це вопие́м:

Ра́дуйся, солове́й святы́я Це́ркве богогла́сный; ра́дуйся, сосу́де де́вства, све́тлый и прекра́сный.

Ра́дуйся, преве́чную ве́сну дости́гший цве́те; ра́дуйся, на́с озари́вый златоза́рный све́те.

Ра́дуйся, блаже́нство воспева́ющих тя́ ве́чное; ра́дуйся, все́м чту́щым тя́ ра́дость безконе́чная.

Ра́дуйся, сокро́вище благи́х и исцеле́ния; ра́дуйся, свеще́ пречу́дна ве́рным озаре́ния.

Ра́дуйся, великому́ченице Зла́то, злата́я целому́дрия пала́то.

Конда́к 4.

Бу́рею к роди́телем не возмо́г пристра́стия Зла́ту на нече́стие пога́нское прельсти́ти, диа́вол возъяри́ся и неве́рных распаля́ше зве́рское, во е́же ю́ неща́дно би́ти. Пло́ть деви́цы чи́стыя ага́ряне нача́ша ре́зати и пред очи́ма ея́ ве́шати ю́, но па́че пре́жде к Бо́гу возгоре́ся Зла́та пла́менем любве́, Христу́ в терпе́нии пою́щи: Аллилу́иа.

И́кос 4.

Отцу́ ея́ духо́вному иере́ю Тимофе́ю прилу́чшуся страда́ний ме́ста бли́зу, Зла́та к нему́ посла́, прося́щи: да моли́твою свое́ю помо́жет е́й тече́ние страда́льчества сконча́ти. И, Злато́ю посра́млены, злоде́и озвере́вше, пове́сиша на дре́ве непоро́чную деви́цу и ре́заху ю́, до́ндеже от пло́ти разреши́ся. Она́ же ны́не ду́хом слы́шит пою́щия ю́ си́це:

Ра́дуйся, злата́я Македо́нии деви́це; ра́дуйся, крило́ма на́с храня́щая орли́це.

Ра́дуйся, супру́жества честна́го огражде́ние; ра́дуйся, мона́шества злато́е украше́ние.

Ра́дуйся, все́м ве́рным благове́рная княги́не; ра́дуйся, все́м де́вствующым ве́рная други́не.

Ра́дуйся, святы́я Ве́ры ли́ро златогла́сная; ра́дуйся, денни́це целому́дрием прекра́сная.

Ра́дуйся, великому́ченице Зла́то, злата́я целому́дрия пала́то.

Конда́к 5.

Боготе́чную звезду́ сию́, на́м ве́рно озари́вшую те́сный пу́ть спасе́ния в растле́ннем ве́це се́м, Зла́ту, ча́шу го́рькую до дна́ вы́пившую хва́ляще немо́лчно, Бо́гу вопие́м: Аллилу́иа.

И́кос 5.

Ви́дев дще́ре лю́тыя духо́вныя страда́ния, Тимофе́й свято́му Никоди́му вся́ пове́да; Никоди́м же сла́вный благоче́стным в назида́ние всезлаты́я Зла́ты написа́ побе́ду. Мо́щи всечестны́я де́вы взе́мше, благове́рнии со благогове́нием и пе́ньми погребо́ша, с чи́стым фимиа́мом к небесе́м кажде́нием пе́ние всечу́дней сицево́е вознесо́ша:

Ра́дуйся, садо́в небе́сных ла́стовице бе́лая; ра́дуйся, попра́вшая врага́ деви́це сме́лая.

Ра́дуйся, на́м диа́вола безси́лие яви́вшая; ра́дуйся, все́м си́лу целому́дрия откры́вшая.

Ра́дуйся, духо́вное млеко́ на́м источа́ющая; ра́дуйся, язы́ков но́вых нра́вы облича́ющая.

Ра́дуйся, все́м лю́бящым тя́ ра́досте спасе́ния; ра́дуйся, от скве́рны ми́ра ве́рным сохране́ние.

Ра́дуйся, великому́ченице Зла́то, злата́я целому́дрия пала́то.

Конда́к 6.

Про́поведь Ева́нгелия в ве́це ересе́й при́сно ухищря́ется люде́й поработи́тель упраздни́ти лже́ю в умноже́нии страсте́й, я́ко да никто́же воспое́т Спаси́телю: Аллилу́иа.

И́кос 6.

Возсия́вши в мра́це до́лгих ле́т порабоще́ния, Зла́та златолу́чное на́м со́лнце показа́ся, и́мже тьма́ разгна́ся ага́рянскаго прельще́ния, те́пле озаря́юще стра́ждущий на́ш ро́д. Дне́сь султа́н духо́вный вно́вь оба́че воцари́ся, лю́ди обольща́я Правосла́вия преда́тельми; про́поведь Ева́нгелия па́ки мра́к объя́т, те́мже со слеза́ми от но́щи взыва́ем Зла́те:

Ра́дуйся, прельще́нных к све́ту И́стины воззва́ние; ра́дуйся, все́х ка́ющихся тве́рдое возста́ние.

Ра́дуйся, ико́но всезлата́я Правосла́вия; ра́дуйся, бесо́в нечи́стых сла́вное прогна́ние.

Ра́дуйся, родо́в славя́нских гро́зде чи́ст и сла́док; ра́дуйся, пото́че златостру́нен и пресла́док.

Ра́дуйся, деви́це, голуби́цы чи́стшая; ра́дуйся, реко́, струя́ми Це́рковь позлати́вшая.

Ра́дуйся, великому́ченице Зла́то, злата́я целому́дрия пала́то.

Конда́к 7.

Хотя́щия от ны́нешняго ве́ка заблужде́ний и мно́гих ересе́й ко све́ту И́стины преити́, деви́це чистонра́вная, изба́ви от тиме́ния, да вку́пе водвори́мся в хра́м пресве́тлый чистоты́, пою́ще Свободи́вшаго наве́ки на́с от тли́: Аллилу́иа.

И́кос 7.

Но́вую тя́ все́х Царя́ неве́сту ублажа́ем, чту́ще тя́ усе́рдную моли́твенницу Зла́то, я́ко в ни́ве ра́бства кла́с прозя́бший златосте́блен, напое́нней кро́вию неве́домых страда́льцев, с ни́миже о на́с моли́ся, сла́вная деви́це, пою́щих тебе́ си́це:

Ра́дуйся, вои́стинну рабо́ Госпо́дня ве́рная; ра́дуйся, Христа́ неве́сто чи́стая, нескве́рная.

Ра́дуйся, прекра́сный кри́не ни́вы целому́дрия; ра́дуйся, пресла́дкий со́те лу́га богому́дрия.

Ра́дуйся, любве́ зерца́ло небоороше́нное; ра́дуйся, Свята́го Ду́ха е́зеро блаже́нное.

Ра́дуйся, злато́е доброде́телей сия́ние; ра́дуйся, прекра́сное Зижди́теля вая́ние.

Ра́дуйся, великому́ченице Зла́то, злата́я целому́дрия пала́то.

Конда́к 8.

Стра́нное и ди́вное яви́ла е́сть терпе́ние Зла́та страстоте́рпица, Болга́рии покро́в — та́ бо на́м яви́ся дни́й после́дних утеше́ние, ме́сто сокрове́ния от зло́бы все́х враго́в. Те́мже велегла́сное о не́й возно́сим пе́ние к Бо́гу: Аллилу́иа.

И́кос 8.

Вся́ Це́рковь Правосла́вная дне́сь све́тло торжеству́ет, в превы́спренних все́х А́нгелов славле́ние звучи́т и вку́пе земноро́днии с небе́сными лику́ют — вся́ Зла́ты па́мять све́тлую земна́я тва́рь твори́т. Вси́ в мра́це утомле́ннии, гряди́те, почерпи́те проще́ние грехо́в от во́д исто́чника пречи́стаго, и вси́ обремене́ннии печа́льми прииди́те, да со́лнцу Правосла́вия лучи́стому пое́м:

Ра́дуйся, Еде́ма голуби́це белосне́жная; ра́дуйся, любве́ Христо́вы высото́ безбре́жная.

Ра́дуйся, село́, плода́ми ще́дрое и ту́чное; ра́дуйся, раздра́вый мра́ка кре́сте златолу́чный.

Ра́дуйся, избра́ннице Царя́ веко́в прекра́сная; ра́дуйся, Святы́я Ве́ры гу́сле доброгла́сная.

Ра́дуйся, безбла́знства изя́щный амети́сте; ра́дуйся, криста́лле богоря́дия пречи́стый.

Ра́дуйся, великому́ченице Зла́то, злата́я целому́дрия пала́то.

Конда́к 9.

Вся́кое дыха́ние и А́нгелов сосло́вие зря́ще тя́, дивля́хуся, поне́же ю́на су́щи позна́ла еси́ та́йны несказа́нно Богосло́вия, возмо́гши пред лице́м враго́в воспе́ти Присносу́щному: Аллилу́иа.

И́кос 9.

Вети́йскаго иску́сства не владе́ющи, свята́я ага́рян безслове́сие прему́дро обличи́, и де́вства сохране́ние на Бо́га возлага́ющи, блаже́нство несказа́нное наве́ки улучи́, его́же и мы́, гре́шнии, моли́твами ея́ сподо́битися ча́ем и Зла́ту воспева́ем:

Ра́дуйся, покро́ве пропове́дником Ева́нгелия; ра́дуйся, оби́телем святы́м пречу́дный А́нгеле.

Ра́дуйся, смире́нным богосло́вом поспеше́ние; ра́дуйся, вети́й лицеприя́тных обличе́ние.

Ра́дуйся, време́н после́дних я́сное свети́ло; ра́дуйся, ду́ш ве́рных корабле́й корми́ло.

Ра́дуйся, Святы́я Це́ркве луче́ небопа́рный; ра́дуйся, смири́вшая вся́ ко́зни всекова́рных.

Ра́дуйся, великому́ченице Зла́то, злата́я целому́дрия пала́то.

Конда́к 10.

Спасти́ся все́м хотя́щым е́сть предста́тельница ди́вная моли́твенница кре́пкая о все́х смире́нных Зла́та, в страда́ниих все́м су́щым утеше́ние преми́рное, и на Суде́ — пою́щих ю́ покро́в и благода́ть, ея́же ра́ди Бо́га велегла́сно велича́ем: Аллилу́иа.

И́кос 10.

Стена́ еси́ храня́щимся от ми́ра адоте́чнаго и лю́бящым тя́ те́пле от паде́ний сохране́ние — моли́твами твои́ми избавля́й от му́ки ве́чныя вся́ ли́ки правосла́вных тя́, му́ченице, чту́щыя, венцы́ тебе́ слове́сныя просла́вленней плету́щия:

Ра́дуйся, в океа́не бе́д на́м о́стров непристу́пный; ра́дуйся, засту́пнице, в моли́твах неотсту́пная.

Ра́дуйся, на́м в ми́ре любоде́йном тве́рдь пречи́стая; ра́дуйся, проще́ния грехо́в купе́ль лучи́стая.

Ра́дуйся, душа́м боля́щым бы́лие целе́бное; ра́дуйся, серде́чным я́звам тишино́ враче́бная.

Ра́дуйся, мона́хом чи́стым а́ммо благосе́рдая; ра́дуйся, живу́щым в ми́ре по́моще усе́рдная.

Ра́дуйся, великому́ченице Зла́то, злата́я целому́дрия пала́то.

Конда́к 11.

Пе́нием восхвали́ти Тя́, все́х Влады́ко, тща́щимся словеса́ пода́ждь — к ми́лостем Твои́м сла́достно спростре́тися, и Тебе́ моля́щимся да́руй благода́ть, да благода́рно воззове́м: Аллилу́иа.

И́кос 11

Свещу́ златосия́нну в мра́це ра́бскаго страда́ния, зри́м Зла́ту, наставля́ющую к све́ту все́х спасе́ния: та́ о́браз на́м яви́ся доброде́телей Писа́ния любы́ от ни́хже Бо́жия вене́ц е́сть все́х веле́ний. Венча́ния сего́ и мы́ сподо́битися ча́юще, гряди́те, поклони́мся Зла́те, си́це воспева́юще:

Ра́дуйся, любве́ неизглаго́ланныя мо́ре; ра́дуйся, церкве́й все́х умире́ние раздо́ра.

Ра́дуйся, пеще́ро от напа́стей сокрове́нная; ра́дуйся, алка́тельнице пра́вды насыще́нная.

Ра́дуйся, боже́ственнаго алава́стр благоуха́ния; ра́дуйся, злата́я ве́тве Богопочита́ния.

Ра́дуйся, Болга́рии святы́я дщи́ нескве́рная; ра́дуйся, тя́ чту́щым воево́до благове́рная.

Ра́дуйся, великому́ченице Зла́то, злата́я целому́дрия пала́то.

Конда́к 12.

Благода́ти чу́дное яви́ на́м во страда́нии Зла́та венцесла́вимая, да и мы́ име́ем тве́рдое на Бо́га е́же в ско́рбех упова́ние, зве́рства не боя́щеся иму́щаго яви́тися сы́на беззако́ния, все́х в ми́ре обольсти́ти. Моли́твами ея́ же на́с изба́ви от злоде́я Бо́же милосе́рде, да пое́м Ти́ при́сно: Аллилу́иа.

И́кос 12.

Пою́ще тя́ деви́це и му́ченице сла́вная, о все́х в неду́зех су́щих и во обстоя́ниих сугу́бое прино́сим ти́ и сле́зное моле́ние:

Ра́дуйся, тружда́ющимся по́моще оби́льная; ра́дуйся, печа́льных утеше́ние пресла́дкое.

Ра́дуйся, оби́димых защи́тнице всеси́льная; ра́дуйся, уя́звленных цели́тельнице кро́ткая.

Ра́дуйся, все́м пла́чущим засту́пнице блага́я; ра́дуйся, отча́янным сове́тнице злата́я.

Ра́дуйся, от мра́ка ми́ра в све́тлость на́м вселе́ние; ра́дуйся, в черто́г небе́сный ве́рных водворе́ние.

Ра́дуйся, о на́с всегре́шных Бо́га умоле́ние; ра́дуйся, страстьми́ растле́нных ди́вно удобре́ние.

Ра́дуйся, деви́це всезлата́я и прекра́сная; ра́дуйся, Це́ркве Правосла́вныя пти́це богогла́сная.

Ра́дуйся, великому́ченице Зла́то, злата́я целому́дрия пала́то.

Конда́к 13.

О, Зла́то досточу́дная, Болга́рии хвале́ние! Прии́мши благосе́рдно ны́не лю́бящих тя́ пе́ние, от вся́ких на́с напа́стей и грехо́м порабоще́ния моли́твами твои́ми благосе́рдыми спаси́, во е́же на́м сподо́битися и на небеси́ с тобо́ю непреста́нно Христа́ Бо́га велича́ти: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгелов и все́х святы́х небе́сных удивле́ние, любо́вию Христа́ возлю́бльшая презе́льною и де́вства чи́сте обручи́вшися Тому́ хране́нием, Зла́та достохва́льная пребы́сть неоскверне́нною; и ве́но златотка́нное — оде́жду обагре́нную Небе́сному Обру́чнику с весе́лием вручи́. Моли́твенницу те́плую от Бо́га получи́вше, деви́це богому́дренней уми́льно вопие́м:

Ра́дуйся, исто́чниче небе́сных утеше́ний; ра́дуйся, прекра́сное де́вства прославле́ние.

Ра́дуйся, Царя́ Христа́ обру́чнице нескве́рная; ра́дуйся, засту́пнице все́м лю́бящым тя́ ве́рная.

Ра́дуйся, кади́льнице Святе́йшему лучи́стая; ра́дуйся, деви́це благонра́вная и чи́стая.

Ра́дуйся, звездо́, во мра́це ра́бства просия́вшая; ра́дуйся, луно́ злата́я, тьму́ греха́ разгна́вшая.

Ра́дуйся, великому́ченице Зла́то, злата́я целому́дрия пала́то.

Конда́к 1.

Избра́нная служи́тельнице Бо́га воплоще́ннаго и чи́стая храни́тельнице де́вства нерастле́ннаго, роди́телей свои́х Христа́ ра́ди отре́кшася и кро́ве испове́дницы порфи́рою обле́кшася, в ли́к пра́зднственный ны́не тя́ вси́ чту́щии соше́дшеся любо́вию пое́м, о Зла́то, Це́ркве позлаще́ние: но я́ко непоро́чная неве́ста Сло́ва Бо́жия и ве́лие ко Го́споду иму́щи дерзнове́ние, о на́с, всеокая́нных, моли́ся неотсту́пно, да ми́ра многостра́стнаго океа́н преплы́вше, сподо́бимся в де́нь су́дный благода́ти свы́ше, тебе́ с благодаре́нием уми́льно вопию́ще:

Ра́дуйся, великому́ченице Зла́то, злата́я целому́дрия пала́то.

Моли́тва.

О, пресла́вное прозябе́ние ро́да Бо́лгарскаго, солнцезра́чная деви́це, багряни́цею крове́й свои́х украше́нная, предо́брая ма́ти на́ша, великому́ченице Зла́то! Услы́ши ча́д твои́х с любо́вию к тебе́ ны́не прибега́ющих и ма́лое сие́ моле́ние на́ше приими́, и Го́споду Бо́гу на́шему благоприя́тно сотвори́. Согреши́хом бо и беззако́нновахом, и недосто́йны есмы́ зре́ти высоту́ небе́сную от мно́жества непра́вд на́ших — свя́зани есмы́ у́зами грехо́вными и николи́же во́ли Созда́теля на́шего сотвори́хом, ниже́ сохрани́хом повеле́ний Его́; те́мже преклоня́ем коле́на сокруше́нна и смире́нна се́рдца на́шего ко Творцу́ и Спа́су своему́ и твоего́ ма́терняго заступле́ния к Нему́ про́сим. Воздви́гни ру́це твои́, кра́сная девому́ченице, любве́ Христо́вы сосу́де всезлаты́й, и вку́пе с Пречи́стою Богоро́дицею и все́ми святы́ми ро́да на́шего Зижди́теля все́х умоли́, да ниспо́слет ми́лость Свою́ на многострада́льную страну́ на́шу, шата́ние люде́й да умири́т, го́рькия собла́зны церко́вныя да утоли́т, отступи́вшия от Ве́ры Правосла́вныя све́том И́стины Своея́ да просвети́т, ста́рыя да умудри́т, ю́ныя да наста́вит, от растле́ния нра́вов и от сете́й ерети́ческих до́бре и́х сохраня́я, младе́нцы млеко́м благоче́стия да воспита́ет, все́х же на́с ба́нею покая́ния да обнови́т. Умоли́, о златонра́вная ма́ти, кра́сный цве́те де́вства и му́чеников удобре́ние, Го́спода и Спа́са на́шего, да пода́ст на́м ду́х смире́ния и кро́тости, ду́х целому́дрия и послуша́ния, ду́х любве́ нелицеме́рныя, и да упра́вит у́м на́ш, и се́рдце на́ше в пра́вой ве́ре да укрепи́т, я́ко да И́стиною наставля́еми и любо́вию осиява́еми, ти́хое и ми́рное зде́ поживе́м житие́ во вся́ком благоче́стии и чистоте́. Моли́ся, о великому́ченице сла́вная, сладча́йшая ма́ти на́ша Зла́то, Тро́ице Преблагослове́нней, да изба́вит ны́ от вся́каго обстоя́ния, и от вся́каго наве́та вра́жия безбоя́зненны на́с да сохрани́т, да ни ра́нами, ниже́ преще́нием устраша́еми, до конца́ ве́рни Христу́ Жениху́ на́шему пребу́дем, и та́ко со благо́ю наде́ждею и и́стинным увере́нием к та́мошнему ми́ру по́йдем, богоприя́тное твое́ заступле́ние призыва́юще и Пребоже́ственную Тро́ицу: Отца́ и Сы́на и Свята́го Ду́ха, вы́ну хва́ляще и благословя́ще, ны́не и при́сно, и во ве́ки веко́в, ами́нь.