Конда́к 1.

Избра́нный Бо́гом в прави́теля лю́дем се́рбским, благове́рне царю́ Владисла́ве, похва́льная пе́ние прино́сим ти́, уго́дниче Христо́в и мо́лимся всеблагогове́йно, твои́ми моли́твами в Правосла́вии на́с ве́рно утверди́, от бе́д и скорбе́й свободи́ и в бу́дущем ве́чных му́к изба́ви, ве́рно зову́щих ти́:

Ра́дуйся, Боговенча́нный царю́ Владисла́ве, Правосла́вия благи́й ревни́телю.

И́кос 1.

Арха́нгелов и а́нгелов мно́жество, предстоя́ Царю́ Ца́рствующих и Го́споду госпо́дствующих, со умиле́нием взира́ют на Его́ о стране́ Се́рбской промышле́нии. Поста́ви бо тя́ наро́ду ея́ во главу́, царя́, блаже́нне Владисла́ве, ве́ру оте́ческую сохраня́ти и хра́мы Бо́жии воздвиза́ти. Те́м же велича́я твое́ Богоизбра́ние, с любо́вию покланя́емся тебе́ зову́ще:

Ра́дуйся, от малоле́тства Христа́ возлюби́вый; ра́дуйся, за́поведи Его́ от оте́ц ве́рно в се́рдце свое́ прия́вый.

Ра́дуйся, теплото́ю ве́ры Христо́вой ве́сь испо́лнивыйся; ра́дуйся, чистото́ю тоя́жде ве́ры из мла́да напое́нный.

Ра́дуйся, красото́ю церко́вною вдохновле́нный; ра́дуйся, Ду́хом Святы́м в Правосла́вии утвержде́нный.

Ра́дуйся, отце́в ве́ру сохрани́вый и про́чия лю́ди в не́й держа́тися научи́вый; ра́дуйся, хра́мов и монастыре́й благи́й строи́телю и о ни́х до́брый и изря́дный попечи́телю.

Ра́дуйся, Боговенча́нный царю́ Владисла́ве, Правосла́вия благи́й ревни́телю.

Конда́к 2.

Ви́дя, Влады́ка Христо́с ду́шу твою́ к прия́тию Се́мени Сло́ва Бо́жия, чистото́ю и ми́лостынею предугото́ванную, све́том позна́ния Своего́ просвети́ тя́, блаже́нне Владисла́ве, твои́ми доброде́тельми благоутро́бно спаса́емых ча́сти сотвори́ тя́ о́бщника в Небе́сном Ца́рствии, иде́же со а́нгелы пое́ши Всесвяте́й Тро́ице пе́снь хвале́бную: Аллилу́иа.

И́кос 2.

Ра́зум Богопросвеще́нный име́я, святы́й царю́ Владисла́ве, и́мже до́бре проразуме́л еси́ душепа́губность злове́рий разли́чных, хотя́щих на зе́млю твою́ наити́. Ве́дая же сия́, тве́рдое Правосла́вия в стране́ свое́й утверди́, враго́в злочести́вых ко́зни разсы́па. Те́м же по до́лгу сла́вим тя́ взыва́юще:

Ра́дуйся, блаже́нный сосу́де Христо́ва благоуха́ния; ра́дуйся, благо́е се́мя Сло́ва Бо́жия, прозя́бшее.

Ра́дуйся, пло́де благи́й на дре́ве царе́й Се́рбских; ра́дуйся, цве́те благово́нный на ве́тви отце́в свои́х.

Ра́дуйся, ве́рою благо́ю ра́зум себе́ благода́тный стяжа́вый; ра́дуйся, си́лою Правосла́вия враги́ Христо́вы попра́вый.

Ра́дуйся, Дави́ду царю́ в Богопочита́нии подража́вый; ра́дуйся, Бо́гом за то́, та́кожде диади́мою ца́рскою венча́нный.

Ра́дуйся, Боговенча́нный царю́ Владисла́ве, Правосла́вия благи́й ревни́телю.

Конда́к 3.

Си́лою любви́ Боже́ственныя преиспо́лнен, свя́те Владисла́ве, вся́чески стреми́лся еси́ Бо́гови угоди́ти. Взира́я на доброде́тельную жи́знь пре́дков свои́х, мно́жицею стара́лся во устрое́нии хра́мов Бо́жиих, в ни́х же со все́м наро́дом Се́рбским с благодаре́нием Христу́ воспева́ше: Аллилу́иа.

И́кос 3.

Име́я неоску́дное стремле́ние к житию́ Богоуго́дному, царю́ Владисла́ве, прему́дрому Соломо́ну поревнова́л в созда́нии хра́мов благоукраше́нных, яви́лся еси́ вои́стину пресла́вный зижди́тель До́ма Госпо́дня. О се́м восхваля́ем твое́ благожела́ние и хва́ляще тя́ велича́ем:

Ра́дуйся, Влады́ки Творца́ преди́вный уго́дниче; ра́дуйся, спосо́бный учени́к Боже́ственнаго Зижди́теля.

Ра́дуйся, До́ма Бо́жия на земле́ устрои́телю; ра́дуйся, о се́м изря́дный попечи́телю.

Ра́дуйся, царе́й благонра́вных подража́телю; ра́дуйся, и́х стара́ний сла́вный ревни́телю.

Ра́дуйся, духове́нства и мона́шествующих всеще́дрый покрови́телю; ра́дуйся, доброде́тели пречу́дный насади́телю.

Ра́дуйся, Боговенча́нный царю́ Владисла́ве, Правосла́вия благи́й ревни́телю.

Конда́к 4.

Бу́рею жите́йских страсте́й смуща́еми, недоуме́ем, ка́ко досто́йно воспе́ти твое́ ди́вное житие́, блаже́нне Владисла́ве. Ты́ же кро́тостию свое́ю и незло́бием, любо́вию и чистото́ю, живо́т ми́рен лю́дем свои́м у Бо́га испроси́л, поя́ Ему́ непреста́нно: Аллилу́иа.

И́кос 4.

Слы́шавше от отце́в святы́х напу́тственное сло́во по восхожде́нии твое́м на престо́л Се́рбский, о чистоте́, посте́, моли́тве и все́х доброде́телях, христиа́нскому царю́ подоба́ющих, слага́л еси́ сия́ в се́рдце твое́м, де́лы вся́ та́ исполня́ти обеща́юще. Мы́ же ве́дуще твое́ Богохва́льное житие́ воспева́ем ти́ си́це:

Ра́дуйся, ни́ву се́рдца твоего́ до́брым се́менем засе́евый; ра́дуйся, слеза́ми умиле́ния ю́ ороси́вый.

Ра́дуйся, я́ко се́мя Сло́ва Бо́жия в се́рдце твое́м, я́ко на земле́ до́брей, укорени́ся; ра́дуйся, воздержа́нием и моли́твою Бо́гу потруди́ся.

Ра́дуйся, ми́лостынею Творца́ уми́лостививый; ра́дуйся, ни́щия и убо́гия потре́бами снабди́вый.

Ра́дуйся, прозябе́ние страны́ Се́рбской, ца́рственною сла́вою на земли́ и на небеси́ почте́нный; ра́дуйся, чистото́ю духо́вной ди́вно укра́шенный.

Ра́дуйся, Боговенча́нный царю́ Владисла́ве, Правосла́вия благи́й ревни́телю.

Конда́к 5.

Боготе́чною звездо́ю яви́лся еси́, царю́ Владисла́ве, егда́ ца́рственною оде́ждою облачи́лся и вене́ц царя́ Се́рбскаго на главу́ свою́ от Бо́га восприя́л, поя́ Ему́ со тре́петом: Аллилу́иа.

И́кос 5.

Ви́девше святы́й благове́рный царю́ Владисла́ве все́ лю́ди земли́ Се́рбския пред собо́ю, подо́бно отцу́ чадолюби́вому, все́х к себе́ привлеко́х любо́вию, и умиле́нием подвиза́я воспева́ти и велича́ти тебе́ та́ко:

Ра́дуйся, у́м тво́й горе́ име́вый; ра́дуйся, се́рдце твое́ жили́ще Свята́го Ду́ха соде́лавый.

Ра́дуйся, Христу́ Бо́гу человеколю́бцу всего́ себя́ преда́вый; ра́дуйся, Ему́, в смире́нии подража́вый.

Ра́дуйся, к ли́ку святы́х Се́рбских причи́сленный; ра́дуйся, от Бо́га и небе́сным венце́м почте́нный.

Ра́дуйся, я́ко сирота́м и вдови́цам, ты́ еси́ бы́л оте́ц и пита́тель; ра́дуйся, и ни́щим, ты́ еси́ бы́л ми́лостивый пода́тель и оби́димым благи́й защи́тниче.

Ра́дуйся, Боговенча́нный царю́ Владисла́ве, Правосла́вия благи́й ревни́телю.

Конда́к 6.

Пропове́дником, духоно́сным апо́столом, подража́вше, Владисла́ве Богому́дре, обходи́л еси́ гра́ды и ве́си держа́вы твоея́, приводя́щи ели́ко мо́щно бе́, лю́ди к ве́ре Правосла́вней, и науча́ющи и́х воспева́ти Еди́ному в Тро́ице сла́вимому Бо́гу: Аллилу́иа.

И́кос 6.

Возсия́л еси́ па́че со́лнца доброде́тельми твои́ми во стране́ Се́рбской и бы́л еси́ отра́дою для возлю́бленных ча́д це́ркви Правосла́вной, милосе́рдный и досточу́дный уго́дниче Христо́в, блаже́нне Владисла́ве. Се́рдце же свое́ на проше́ние и ну́жды приходя́щих к тебе́ ми́лостивно откры́л еси́, приими́ и на́с до́брый царю́ с любо́вию, к тебе́ прибега́ющих и вопию́щих си́це:

Ра́дуйся, мирополо́жниче Боже́ственныя любви́; ра́дуйся, адама́нте кре́пкий.

Ра́дуйся, честна́го ко́рени свято́е прозябе́ние; ра́дуйся, Симео́на мироточи́ваго преди́вный пра́внуче.

Ра́дуйся, сыно́в его́ Стефа́на и Са́ввы святого́рца, архиепи́скопа Се́рбскаго, пресла́вный сро́дниче; ра́дуйся, отца́ твоего́ Дави́да, кра́ля Се́рбскаго, вели́кая похвало́.

Ра́дуйся, свя́тости отце́в твои́х пречу́дное вмести́лище; ра́дуйся, и́х о тебе́ превесе́лое ра́дование.

Ра́дуйся, Боговенча́нный царю́ Владисла́ве, Правосла́вия благи́й ревни́телю.

Конда́к 7.

Ко́ль мно́гими би́серы и ка́мением драгоце́нным укра́шен е́сть вене́ц пра́вды, па́че со́лнца сия́ющаго о́браз свята́го жития́ твоего́. Святы́й пра́ведный царю́ Владисла́ве, и́бо по́двиг до́браго огражде́ния ве́ры Правосла́вной дарова́ ти́ Госпо́дь, сего́ ра́ди и мы́ прибега́ем под кро́в тво́й, ища́ спасе́ние, и благода́рно о тебе́ пое́м Бо́гу: Аллилу́иа.

И́кос 7.

Но́ваго, тя́, царя́ ви́дим, доброде́тельми пре́дков украше́ннаго, и в себе́ вся́ сия́ от сосцу́ ма́терняя впита́вшаго. Наипа́че же к ста́рости Богоуго́дным житие́м ро́д сво́й возвели́чившаго, и на́с научи́вшаго, ка́ко до́лжно е́сть отце́в почита́ти. Те́м же я́ко наста́вника тя́ велича́ем:

Ра́дуйся, за́поведи Госпо́дни возлюби́вый; ра́дуйся, от ни́х же ни ка́ко же отступи́вый.

Ра́дуйся, собо́ю приме́р почита́ния отце́в показа́вый; ра́дуйся, е́же от ни́х блага́я стяжа́вый.

Ра́дуйся, пра́деда свята́го страну́ сохрани́вый; ра́дуйся, нището́ю духо́вною Ца́рство Небе́сное купи́вый.

Ра́дуйся, Го́споду и челове́ком угоди́вший; ра́дуйся, о́браз и́стинной му́дрости на́м яви́вший.

Ра́дуйся, Боговенча́нный царю́ Владисла́ве, Правосла́вия благи́й ревни́телю.

Конда́к 8.

Стра́нствия земна́го тече́ние скончава́юще, те́пле Го́спода моли́л еси́, благове́рне Владисла́ве, да не оста́вит О́н зе́млю Се́рбскую по преставле́нии твое́м во тьме́ неве́рия, но да возложи́т на се́рдце лю́дем Се́рбским не оставля́ти ве́ру Правосла́вную, да воспою́т Бо́гу: Аллилу́иа!

И́кос 8.

Ве́сь объя́т бы́л благода́тию Боже́ственною, достохва́льне Владисла́ве, мы́сленными очесы́ зре́л еси́ ско́рби наро́да своего́, но упова́я на ми́лость Бо́жию, моли́лся за лю́ди Се́рбския со слеза́ми. Сего́ ра́ди воспева́ем тя́ си́це:

Ра́дуйся, страну́ свою́ кре́пко возлюби́вый; ра́дуйся, о не́й Го́спода не ма́ло умоли́вый.

Ра́дуйся, моли́твами твои́ми в ско́рбех и напа́стех на́с заступа́ющий; ра́дуйся, во обстоя́ниих злы́х оте́чество свое́ сохраня́ющий и на́с от враго́в избавля́ющий.

Ра́дуйся, возлюби́вших суету́ ми́ра доброде́тельным житие́м превозше́дый; ра́дуйся, и́стинную му́дрость возлюби́вший.

Ра́дуйся, ве́чное сокро́вище Богому́дрия в Правосла́вии обре́тший; ра́дуйся, пре́данностию во́ле Бо́жией а́нгелы с челове́ки удиви́вый.

Ра́дуйся, Боговенча́нный царю́ Владисла́ве, Правосла́вия благи́й ревни́телю.

Конда́к 9.

Вся́ких доброде́телей испо́лнен бы́вше, Владисла́ве всече́стне, с моли́твою во усте́х, преда́л еси́ ду́х тво́й в ру́це Бо́жии. И́же всели́ тя́ в Небе́сной оби́тели и сопричте́ ли́ку уго́дников Свои́х. Те́м же испроси́ и на́м у Го́спода ми́рную христиа́нскую кончи́ну, да предади́м ду́ши на́ша в ру́це Христа́ Бо́га на́шего, пою́ще Тому́ хвале́бную пе́снь: Аллилу́иа.

И́кос 9.

Вети́я многовеща́нныя не мо́гут досто́йно восхвали́ти тя́, Владисла́ве Богому́дре, ка́ко ты́ позна́л еси́ тщету́ испове́дания лати́нскаго и про́чих уче́ний ерети́ческих, Правосла́внаго же ве́рования взыска́л еси́. И я́коже, преподо́бный Симео́н, пе́рвый кра́ль Се́рбский защища́л наро́д сво́й от влия́ния иноплеме́ннаго, да тобо́ю на пу́ть пра́вый наставля́еми, взыва́ем ти́ ра́достно:

Ра́дуйся, до́брыми твои́ми де́лы и пра́вым ума́ и се́рдца изволе́нием приугото́вивший себе́ в жили́ще Боже́ственныя благода́ти; ра́дуйся, я́ко Ду́х Святы́й учи́тель тебе́ бы́сть к позна́нию Христа́ Сы́на Бо́жия.

Ра́дуйся, соверше́нную поко́рность во́ле Бо́жией показа́вший; ра́дуйся, я́ко умудри́ тя Госпо́дь, че́сть ца́рскую, бога́тство и сла́ву сочета́ти со смире́нием христиа́нским.

Ра́дуйся, я́ко си́м о́бразом я́ве на́м показа́вый, я́ко бла́га земна́я не су́ть препя́тие души́ Боголюби́вей к достиже́нию бла́г небе́сных; ра́дуйся, преди́вный побо́рниче ве́ры Христо́вы.

Ра́дуйся, пото́че сла́дости, напоя́ющий на́с водо́ю благоче́стия; ра́дуйся, потреби́телю злы́х обы́чаев и суеве́рий.

Ра́дуйся, Боговенча́нный царю́ Владисла́ве, Правосла́вия благи́й ревни́телю.

Конда́к 10.

Спасти́ся все́м преи́скренне жела́я, мо́лишися за ны́ горе́ у Престо́ла Госпо́дня, избра́нник Христо́в, блаже́нне Владисла́ве. Я́ко же твои́ми моли́твами посо́бствуеши на́м в стра́нствовании многотру́днем земна́го жития́, е́же в покая́нии и благоче́стии сконча́ти. Я́ко облече́ тя́ Госпо́дь Боже́ственною си́лою, да обрати́ши вся́ неве́рныя и научи́ши все́х со умиле́нием серде́ц воспева́ти Творцу́ в Тро́ице: Аллилу́иа.

И́кос 10.

Стена́ яви́лся еси́ стране́ твое́й несокруши́мая, богому́дрый и необори́мый защи́тниче все́м призыва́ющим тя́, зане́ та́ко благоволи́ о тебе́ небеси́ и земли́ Творе́ц Госпо́дь, прославля́я уго́дника своего́. Я́ко же при гробни́це твое́й соверша́шася зна́мения чудесы́, и изы́де молва́ по все́й стране́, и пону́ди кра́ля У́роша торже́ственно обрести́ нетле́нное те́ло твое́ для поклоне́ния христиа́ном. Мы́ же из глубины́ се́рдца с упова́нием глаго́лем ти́ моли́твенниче на́ш, пе́ния такова́я:

Ра́дуйся, моли́твенник на́ш пред Бо́гом те́плый; ра́дуйся, я́ко изы́де по все́й стране́ веща́ние о чудесе́х твои́х.

Ра́дуйся, я́ко успе́ние твое́ торжеству́ет Правосла́вная це́рковь; ра́дуйся, просла́вленный Бо́гом на небеси́ и на земли́.

Ра́дуйся, явле́нием моще́й твои́х, це́рковь Се́рбскую возвесели́вый; ра́дуйся, я́ко чту́ще па́мять твою́ и мы́ ны́не восхваля́ем Го́спода.

Ра́дуйся, градо́м Се́рбским похвало́ и утвержде́ние; ра́дуйся, я́ко тобо́ю ди́вен Бо́г во святы́х свои́х явля́ется.

Ра́дуйся, Боговенча́нный царю́ Владисла́ве, Правосла́вия благи́й ревни́телю.

Конда́к 11.

Пе́ние всеумиле́нное прине́сл еси́ Пресвяте́й Тро́ице, свя́те Владисла́ве, умо́м и де́лом до конца́ своея́ жи́зни Триипоста́снаго Бо́га возлюби́вши. Приими́ же от прославля́ющих тя́ умиле́нное пе́ние и не пре́зри гла́са на́шего, к тебе́ бо в напа́стех и ско́рбех прибега́ем и на твое́ предста́тельство упова́юще, зове́м Бо́гу: Аллилу́иа!

И́кос 11.

Трисия́нным све́том осиява́ем, со все́ми святы́ми предстои́ши ны́не на небеси́ Престо́лу Царя́ ца́рствующих, Владисла́ве всеблаже́нне, и отту́ду, я́ко светоза́рное свети́ло, просвеща́еши всю́ страну́ Се́рбскую, разгоня́ющи мра́к заблужде́ний и показу́ющи пу́ть к и́стинному просвеще́нию к небе́сному блаже́нству. Сего́ ра́ди, прославля́юще тя́, глаго́лем:

Ра́дуйся, путеводи́телю, пра́вую стезю́ к ве́чному спасе́нию на́м показу́ющий; ра́дуйся, мо́щный споспе́шник и укрепи́тель пропове́дников Правосла́вныя ве́ры.

Ра́дуйся, покрови́тель наста́вников, благотрудя́щихся на по́льзу о́бщую; ра́дуйся, крамолы́ и раздо́ров искорени́телю.

Ра́дуйся, все́х оби́димых и не пра́ведно гони́мых засту́пниче; ра́дуйся, скорбя́щих ско́рый уте́шитель.

Ра́дуйся, боля́щих цели́тель; ра́дуйся, лю́дем по́мощь моли́твами твои́ми от Бо́га подаю́щий.

Ра́дуйся, Боговенча́нный царю́ Владисла́ве, Правосла́вия благи́й ревни́телю.

Конда́к 12.

Благода́ть Пресвята́го Ду́ха испроси́ на́м, засту́пниче честны́й, от Всеще́драго Спа́са Христа́, вразумля́ющую и укрепля́ющую на́с во спасе́нии. Да не безпло́дно бу́дет в на́с се́мя святы́я Христо́вы ве́ры, но да прозя́бнет и пло́д сотвори́т, и́м же бы возмощи́ на́м пита́ти ду́ши на́ша в бу́дущем ве́це, иде́же вси́ святи́и пою́т Бо́гу: Аллилу́иа.

И́кос 12.

Пою́ще твоя́ мно́гая и пресла́вная благодея́ния, свя́те Владисла́ве, явле́нная не то́кмо лю́дем земли́ Се́рбския, но и про́чим, по всю́ду си́це тебе́ зову́щим:

Ра́дуйся, в сожи́тельство а́нгельских чино́в и святы́х любе́зно прия́тый; ра́дуйся, собо́ру царе́й святы́х сопричте́нный.

Ра́дуйся, с ли́ки избра́нных Бо́жиих в черто́г небе́сный всели́выйся; ра́дуйся, злата́я кади́льнице, фимиа́м моли́твы о на́с Бо́гу принося́щий.

Ра́дуйся, лицезре́нием небе́сных, ве́чное блаже́нство вкуша́ющий; ра́дуйся, с благове́рными цари́ и кня́зи сла́вимый.

Ра́дуйся, наро́дом Се́рбским и все́ми Правосла́вными велича́емый; ра́дуйся, чуде́с Христо́вых сокро́вище.

Ра́дуйся, Боговенча́нный царю́ Владисла́ве, Правосла́вия благи́й ревни́телю.

Конда́к 13.

О, святы́й благове́рный царю́ Владисла́ве, приими́ ми́лостивно от на́с хвале́бное пе́ние сие́ о все́х, я́же тобо́ю воздаде́ на́м Госпо́дь. И моли́ Всеблага́го Бо́га умно́жити ми́лость Свою́ на ны́ и на ро́ды родо́в на́ших. Утверди́ти ны́ в Правосла́вии и благоче́стии. Сохрани́ти же от все́х скорбе́й и напа́стей, бе́д и зо́л, да сподо́бимся с тобо́ю во ве́ки воспева́ти Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

Арха́нгелов и а́нгелов мно́жество, предстоя́ Царю́ Ца́рствующих и Го́споду госпо́дствующих, со умиле́нием взира́ют на Его́ о стране́ Се́рбской промышле́нии. Поста́ви бо тя́ наро́ду ея́ во главу́, царя́, блаже́нне Владисла́ве, ве́ру оте́ческую сохраня́ти и хра́мы Бо́жии воздвиза́ти. Те́м же велича́я твое́ Богоизбра́ние, с любо́вию покланя́емся тебе́ зову́ще:

Ра́дуйся, от малоле́тства Христа́ возлюби́вый; ра́дуйся, за́поведи Его́ от оте́ц ве́рно в се́рдце свое́ прия́вый.

Ра́дуйся, теплото́ю ве́ры Христо́вой ве́сь испо́лнивыйся; ра́дуйся, чистото́ю тоя́жде ве́ры из мла́да напое́нный.

Ра́дуйся, красото́ю церко́вною вдохновле́нный; ра́дуйся, Ду́хом Святы́м в Правосла́вии утвержде́нный.

Ра́дуйся, отце́в ве́ру сохрани́вый и про́чия лю́ди в не́й держа́тися научи́вый; ра́дуйся, хра́мов и монастыре́й благи́й строи́телю и о ни́х до́брый и изря́дный попечи́телю.

Ра́дуйся, Боговенча́нный царю́ Владисла́ве, Правосла́вия благи́й ревни́телю.

Конда́к 1.

Избра́нный Бо́гом в прави́теля лю́дем се́рбским, благове́рне царю́ Владисла́ве, похва́льная пе́ние прино́сим ти́, уго́дниче Христо́в и мо́лимся всеблагогове́йно, твои́ми моли́твами в Правосла́вии на́с ве́рно утверди́, от бе́д и скорбе́й свободи́ и в бу́дущем ве́чных му́к изба́ви, ве́рно зову́щих ти́:

Ра́дуйся, Боговенча́нный царю́ Владисла́ве, Правосла́вия благи́й ревни́телю.

Моли́тва.

О, святы́й и сла́вный уго́дниче Христо́в, царю́ Владисла́ве! Ско́рый помо́щниче и те́плый засту́пниче с ве́рою притека́ющих к тебе́. Предстоя́ со дерзнове́нием Небе́сному Царю́, испроси́ у Него́ проще́ние согреше́ний на́ших. И о е́же изба́витися на́м от всегуби́тельныя я́звы, тру́са, пото́па, огня́, меча́, и ве́чныя ка́зни. Моли́ Бла́гость Его́, е́же уще́дрити вся́кую страну́ христиа́нскую. Исхода́тайствуй у Го́спода на враги́ побе́ду и одоле́ние, всему́ же ми́ру тишину́, к Правосла́вию обраще́ние, тве́рдость в ве́ре и преспе́яние во благоче́стии. На́м же, чту́щим па́мять твою́, испроси́ благода́тное укрепле́ние в моли́тве и де́лех благи́х, да благоуго́дное Влады́ке на́шему Христу́ Бо́гу зде́ творя́ще, сподо́бимся моли́твами твои́ми, блаже́нне, насле́довати Ца́рство Небе́сное, для ве́чнаго прославле́ния Его́ со Отце́м и Святы́м Ду́хом во ве́ки веко́в. Ами́нь.