Акафист святому мученику Николаю Вуненскому

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Не утвержден для общецерковного использования.

Конда́к 1.

Избра́ннаго му́ченика Христо́ва, от восто́ка, я́ко звезду́, возсия́вшаго и в Вуне́нах свяще́нно подвиза́вшагося, венча́ем пе́сненными похвалы́; во Христа́ бо облеки́йся, си́лою преподо́бных и му́чеников украси́лся еси́, ему́же глаго́лем:

Ра́дуйся, Нико́лае блаже́нне, му́чениче Христо́в непобеди́мый и целе́бниче пречу́дный.

И́кос 1.

А́нгельское житие́ во пло́ти челове́честей пожи́л еси́, Нико́лае, Христо́в страстоте́рпче, и я́ко челове́к ра́зума Небе́снаго показа́лся еси́. Сего́ ра́ди по́двигом твои́м дивя́щеся, зове́м си́це:

Ра́дуйся, я́ко тобо́ю Бо́г просла́вися; ра́дуйся, я́ко тобо́ю растли́тель потреби́ся.

Ра́дуйся, любви́ Христо́вой стяжа́ние; ра́дуйся, ле́сти и заблужде́ний посрамле́ние.

Ра́дуйся, высото́ по́стничества, благочести́выя вознося́щая; ра́дуйся, глубино́ страда́ния, враги́ поража́ющая.

Ра́дуйся, я́ко све́тло от Восто́ка сия́еши; ра́дуйся, я́ко страны́ Фесса́лии озаря́еши.

Ра́дуйся, преподо́бных оте́ц единонра́вный; ра́дуйся, му́ченик святы́х единоре́вностный.

Ра́дуйся, тобо́ю бо умягча́ются сердца́; ра́дуйся, тобо́ю бо упраздня́ется зло́ба.

Ра́дуйся, Нико́лае блаже́нне, му́чениче Христо́в непобеди́мый и целе́бниче пречу́дный.

Конда́к 2.

Стра́х Госпо́день основа́нием в души́ твое́й от ю́ности твоея́ положи́л еси́, треблаже́нне, и́мже созида́яся прему́дро, от нача́ла гряду́щее предначерта́л еси́, непоро́чно ше́ствуя за́поведями Бо́га Сло́ва, поя́ Ему́: Аллилу́иа.

И́кос 2.

Ра́зума твоего́ бога́тством ца́рь восхища́яся, на степе́нь воево́ды тя́ возво́дит, свя́те Нико́лае; те́мже мно́гими доброде́тели у́м предводи́телем проти́ву страсте́й поста́вил еси́, де́лы яви́в и́стинное зва́ние. Сего́ ра́ди слы́шиши ны́не:

Ра́дуйся, нра́вов благочести́вых скрижа́ле; ра́дуйся, доброде́телей честны́х вмести́лище.

Ра́дуйся, глаго́лов Христо́вых исполне́ние; ра́дуйся, ра́н Его́ запечатле́ние.

Ра́дуйся, цве́те благово́нный благоле́пия душе́внаго; ра́дуйся, кри́не красне́йший благода́ти духо́вныя.

Ра́дуйся, я́ко яви́лся еси́ непобеди́м во страда́ниях; ра́дуйся, я́ко ликовству́еши ны́не во сла́ве му́чеников.

Ра́дуйся, му́дрым све́тлое уподобле́ние; ра́дуйся, все́м ве́рным наслажде́ние.

Ра́дуйся, си́ло царе́й благочести́вых; ра́дуйся, копие́ на враго́в неукроти́мых.

Ра́дуйся, Нико́лае блаже́нне, му́чениче Христо́в непобеди́мый и целе́бниче пречу́дный.

Конда́к 3.

Си́лу во бране́х ди́вную показу́я, му́чениче сла́вне, в по́двизех свяще́нных я́ко во́ин Христо́в несокруши́м показа́лся еси́, победи́вый полки́ неви́димаго врага́, поя́: Аллилу́иа.

И́кос 3.

Име́я жа́жду к житию́ благочести́вому, а́ки еле́нь ко исто́чнику водно́му, на го́ру Вуне́нскую возше́л еси́ с любо́вию, на не́йже во́ды животво́рныя струи́ прия́вый, Нико́лае, боже́ственне ороси́л еси́ вопию́щих ти́ такова́я:

Ра́дуйся, вся́ я́же в ми́ре кра́сная презре́вый; ра́дуйся, стопа́м Спаси́телевым после́довавый.

Ра́дуйся, во́инство земно́е оста́вивый; ра́дуйся, му́жеством непобеди́мым обогати́выйся.

Ра́дуйся, служи́телю изря́днейший Христа́, тя́ призва́вшаго; ра́дуйся, благогове́йный Его́ подража́телю.

Ра́дуйся, я́ко на ра́мена Кре́ст Христо́в подъя́л еси́; ра́дуйся, я́ко бре́мя земно́е отве́ргл еси́.

Ра́дуйся, преподо́бных пресла́вное удобре́ние; ра́дуйся, ве́рных многосве́тлый свети́льниче.

Ра́дуйся, цве́те безсме́ртныя благода́ти; ра́дуйся, бога́тство присносве́тлаго сия́ния.

Ра́дуйся, Нико́лае блаже́нне, му́чениче Христо́в непобеди́мый и целе́бниче пречу́дный.

Конда́к 4.

Бу́рю страсте́й разруши́вый, благода́тию в по́двизех безстра́стия обогати́лся еси́, за́поведи Христо́вы приле́жно исполня́я и Ему́ Еди́ному неле́ностно рабо́тая. Зря́щия же усе́рдие твое́, Нико́лае, вопия́ху Бо́гу, тя́ укрепля́ющему: Аллилу́иа.

И́кос 4.

Слы́шим о тебе́, страстоте́рпче, посреде́ сподви́жников твои́х, и́хже яви́ Госпо́дь я́ко зве́зды светоза́рныя, на не́бе церко́внем сия́ющия, с ни́миже и ны́не моли́ о на́с, почита́ющих па́мять твою́ и зову́щих си́це:

Ра́дуйся, преподо́бных сия́ние; ра́дуйся, страстоте́рпцев сла́во.

Ра́дуйся, воздержа́ния Боже́ственное обоня́ние; ра́дуйся, и́стины непоколеби́мый сто́лпе.

Ра́дуйся, ю́н сы́й те́лом, му́др же душе́ю; ра́дуйся, обреты́й измла́да доброде́тели.

Ра́дуйся, я́ко озаря́еши го́ру Вуне́нскую; ра́дуйся, я́ко разгоня́еши мглу́ де́монскую.

Ра́дуйся, до́брый о́бразе по́стников; ра́дуйся, подвиза́ющимся све́тлое зерца́ло.

Ра́дуйся, Элла́ды светоза́рное свети́ло; ра́дуйся, Фесса́лии свяще́нный свети́льниче.

Ра́дуйся, Нико́лае блаже́нне, му́чениче Христо́в непобеди́мый и целе́бниче пречу́дный.

Конда́к 5.

Виде́нием и де́ланием ду́шу твою́, му́чениче, украси́вый и струя́ми крове́й твои́х, я́ко порфи́рою, сию́ облеки́й, я́ко неве́сту непоро́чну ко Христу́ приве́л еси́, взыва́я с ве́рою: Аллилу́иа.

И́кос 5.

Кре́пок и неуязви́м, я́ко во́ин Христо́в, на нечести́выя яви́лся еси́, страстоте́рпче, всеору́жие бо све́та восприи́м, ва́рварскую лю́тость му́жески победи́л еси́. Сего́ ра́ди с любо́вию зове́м ти́:

Ра́дуйся, благоче́стия побе́до; ра́дуйся, нече́стия низложе́ние.

Ра́дуйся, му́жества све́тлое начерта́ние; ра́дуйся, безу́мия враго́в сокруше́ние.

Ра́дуйся, доброде́телей по́стнических фи́никс цвету́щий; ра́дуйся, по́двигов му́ченических ке́дре несокруши́мый.

Ра́дуйся, я́ко яви́лся еси́ украше́ние подви́жников; ра́дуйся, я́ко показа́лся еси́ омраче́ние ва́рваров.

Ра́дуйся, Христо́ву си́лу уясни́вый; ра́дуйся, вра́жию кре́пость посрами́вый.

Ра́дуйся, я́ко тобо́ю подви́жники укрепля́ются; ра́дуйся, я́ко тобо́ю ве́рнии по́мощи Бо́жия сподобля́ются.

Ра́дуйся, Нико́лае блаже́нне, му́чениче Христо́в непобеди́мый и целе́бниче пречу́дный.

Конда́к 6.

Пропове́дует А́нгел светоно́сен, с Небесе́ соше́дый, тебе́, А́нгелу во пло́ти, и и́же с тобо́ю о венце́х нетле́нных, угото́ванных лю́бящим Го́спода, на по́двиг му́ченический укрепля́я ва́с, вопию́щих Бо́гу единомы́сленно: Аллилу́иа.

И́кос 6.

Копие́м свяще́нное твое́ и многострада́льное те́ло уязвля́я, врази́ лю́тыя прича́стна Христо́вых страсте́й соде́лаша тя́, свя́те, и́миже обреты́й безстра́стие, страсте́й изба́ви взыва́ющих:

Ра́дуйся, преподо́бных спобо́рниче; ра́дуйся, му́чеников сподви́жниче.

Ра́дуйся, благочести́вых приста́нище; ра́дуйся, нечести́вых пораже́ние.

Ра́дуйся, и́долы попра́вый; ра́дуйся, мучи́тели твоя́ посрами́вый.

Ра́дуйся, я́ко те́ло твое́ за Христа́ кро́вию обагри́ся; ра́дуйся, я́ко душа́ твоя́ ко Го́споду устреми́ся.

Ра́дуйся, у́зы и бичева́ния претерпе́вый; ра́дуйся, наслажде́ния несконча́емаго приобщи́выйся.

Ра́дуйся, призыва́ющим тя́ ско́рый помо́щниче; ра́дуйся, душе́вных и теле́сных неду́гов врачева́телю.

Ра́дуйся, Нико́лае блаже́нне, му́чениче Христо́в непобеди́мый и целе́бниче пречу́дный.

Конда́к 7.

Хотя́ще бичева́нием честно́е те́ло твое́, богоно́се, нечести́вии умерщвле́нию преда́ти, посека́ху тя́ зело́; ты́ же оде́жды тле́нныя совле́клся еси́, Нико́лае, и в нетле́ния ри́зу обле́клся еси́, Бо́гу вопия́: Аллилу́иа.

И́кос 7.

Но́вый пресла́вный му́чениче, то́ками крове́й твои́х ороша́еши Це́рковь Христо́ву, я́же пра́вды плоды́ зре́лыя плодонося́щи, благода́ть чуде́с твои́х почита́ет, зову́щи ти́ си́це:

Ра́дуйся, Це́ркви торжеству́ющия украше́ние; ра́дуйся, Це́ркви во́инствующия укрепле́ние.

Ра́дуйся, Восто́ка о́трасле благоцве́тная; ра́дуйся, Вуне́н насе́льниче равноа́нгельный.

Ра́дуйся, я́ко от ю́ности после́довал еси́ Христу́; ра́дуйся, я́ко уязви́л еси́ врага́ супоста́та.

Ра́дуйся, и́ночествующих световоди́телю; ра́дуйся, благочести́вых руководи́телю.

Ра́дуйся, жития́ лу́чшаго прича́стниче; ра́дуйся, врага́ зле́йшаго посрамле́ние.

Ра́дуйся, тобо́ю бо де́мони умаля́ются; ра́дуйся, тобо́ю бо лю́дие све́том Христо́вым озаря́ются.

Ра́дуйся, Нико́лае блаже́нне, му́чениче Христо́в непобеди́мый и целе́бниче пречу́дный.

Конда́к 8.

Стра́нно бы́сть неве́рующим зре́ти, ка́ко ты́, святы́й страда́льче, ко дре́ву привя́зан бы́в, неща́дныя муче́ния терпели́во переноси́л еси́; те́мже возврати́лся еси́ ко дре́ву жи́зни ве́чныя, Го́сподеви поя́: Аллилу́иа.

И́кос 8.

Вся́ муче́ния му́жественно претерпе́в, страстоте́рпче, усече́нием главы́ твоея́ со Христо́м наве́ки соедини́лся еси́. Сего́ ра́ди моли́ся о на́с, благоче́стно ти́ вопию́щих:

Ра́дуйся, и́стины насади́телю; ра́дуйся, ле́сти упраздни́телю.

Ра́дуйся, во́ине Христо́в преизря́дный; ра́дуйся, благода́ти Ду́ха Свята́го сосу́де избра́нный.

Ра́дуйся, богоно́сным подви́жником сла́во; ра́дуйся, победоно́сным му́чеником похвало́.

Ра́дуйся, я́ко Фесса́лию сла́вою чуде́с твои́х озаря́еши; ра́дуйся, я́ко призыва́ющих тя́ проше́ния исполня́еши.

Ра́дуйся, по́стничества о́бразе; ра́дуйся, терпе́ния учи́телю.

Ра́дуйся, враго́в безу́мие низложи́вый; ра́дуйся, ве́рных чудесы́ озари́вый.

Ра́дуйся, Нико́лае блаже́нне, му́чениче Христо́в непобеди́мый и целе́бниче пречу́дный.

Конда́к 9.

Вся́ Фесса́лия, Элла́да и ины́я страны́ пропове́дуют благода́ть чуде́с, ю́же ты́ от Бо́га улучи́л еси́: все́м бо ве́рою к тебе́ притека́ющим подае́ши проси́мое и исцеля́еши пою́щия: Аллилу́иа.

И́кос 9

Глаго́лом твои́м ми́лостивым Фессали́йский прави́тель дове́рися, поспеши́ в Вуне́ну благогове́йне, обре́тше же святы́я мо́щи твоя́, му́чениче пресла́вне, исцели́ся от неду́га и в весе́лии возгласи́ тебе́:

Ра́дуйся, кре́посте немощны́х; ра́дуйся, утеше́ние скорбя́щих.

Ра́дуйся, чуде́с благода́ть прие́мый; ра́дуйся, де́монов держа́ву сокруши́вый.

Ра́дуйся, я́ко тя́жко боля́щаго уврачева́л еси́; ра́дуйся, я́ко сему́ здра́вие чуде́сне дарова́л еси́.

Ра́дуйся, я́ко те́ло твое́ смотре́нием Бо́жиим нетле́нно соблюде́ся; ра́дуйся, я́ко честна́я глава́ твоя́ на исцеле́ние ве́рным даде́ся.

Ра́дуйся, уныва́ющих при́сное ободре́ние; ра́дуйся, боля́щих ско́рое врачева́ние.

Ра́дуйся, я́ко тобо́ю от страсте́й душе́вных свобожда́емся; ра́дуйся, я́ко тобо́ю от ра́н теле́сных исцеля́емся.

Ра́дуйся, Нико́лае блаже́нне, му́чениче Христо́в непобеди́мый и целе́бниче пречу́дный.

Конда́к 10.

Те́ло твое́ свято́е, му́чениче пресла́вне, нетле́нно пребыва́вшее в дубра́ве Вуне́нстей, Боже́ственным де́йством ди́вно обре́теся; ны́не же изволе́нием Бо́жиим, я́ко многоце́нное сокро́вище, благода́ть подае́т взыва́ющим: Аллилу́иа.

И́кос 10.

Стена́ необори́мая и заступле́ние Боже́ственное тобо́ю на́м даде́ся, страстоте́рпче Нико́лае. Сего́ ра́ди укрепи́ на́с моли́твами твои́ми, от вся́каго обстоя́ния избавля́я, вопию́щих ти́:

Ра́дуйся, ра́досте А́нгелов; ра́дуйся, сла́во страстоте́рпцев.

Ра́дуйся, Це́ркве храни́телю крепча́йший; ра́дуйся, Фесса́лии сия́ние светоза́рное.

Ра́дуйся, я́ко мо́щи твоя́ на́м откры́л еси́; ра́дуйся, я́ко исцеле́ний исто́чник на́м яви́л еси́.

Ра́дуйся, ве́рою к тебе́ притека́ющих помо́щниче; ра́дуйся, боля́щих уте́шителю и цели́телю.

Ра́дуйся, я́ко неду́жным состра́ждеши; ра́дуйся, я́ко сле́зы пла́чущим изсуша́еши.

Ра́дуйся, я́ко тобо́ю благослове́ние да́руется; ра́дуйся, я́ко тобо́ю зло́ба умерщвля́ется.

Ра́дуйся, Нико́лае блаже́нне, му́чениче Христо́в непобеди́мый и целе́бниче пречу́дный.

Конда́к 11.

Воспе́ твою́ благода́ть исцеле́нный твои́м заступле́нием Евфимиа́н, и вси́ ве́рнии, твоя́ ми́лости улучи́вшии, восхваля́ют просла́вльшаго тя́ Го́спода, зову́ще Ему́: Аллилу́иа.

И́кос 11.

Светоза́рная па́мять твоя́, я́ко весна́ ра́достная ми́рови показа́ся, и я́коже цвета́ми даро́в твои́х облагоуха́ла е́сть ве́рных собра́ние, и ны́не фимиа́м нетле́ния источа́ет все́м глаго́лющим ти́ такова́я:

Ра́дуйся, же́ртва Христо́ва благово́нная; ра́дуйся, ве́рных те́плое предста́тельство.

Ра́дуйся, нетле́ния ни́во многоцве́тная; ра́дуйся, христиа́н приста́нище необурева́емое.

Ра́дуйся, благово́ние ве́ры и кади́ло животво́рное; ра́дуйся, мирова́рнице духо́вная благода́ти Богонача́льныя.

Ра́дуйся, я́ко подае́ши все́м исцеле́ния; ра́дуйся, я́ко яви́лся еси́ все́м скорбя́щим увеселе́ние.

Ра́дуйся, о ве́рных усе́рдный хода́таю; ра́дуйся, пред Бо́гом на́ш засту́пниче.

Ра́дуйся, я́ко ра́дости непреста́нныя причаща́ешися; ра́дуйся, я́ко жи́зни ве́чныя наслажда́ешися.

Ра́дуйся, Нико́лае блаже́нне, му́чениче Христо́в непобеди́мый и целе́бниче пречу́дный.

Конда́к 12.

Благода́ти бога́тство Небе́сное стяжа́вый – честну́ю главу́ твою́ – ра́дуется о́стров А́ндрос и весели́тся оби́тель Никола́я, святи́теля Ми́р Лики́йских, я́ко сокро́вище многоце́нное сию́ храня́щая и Спаси́телю все́х Бо́гу вопию́щая: Аллилу́иа.

И́кос 12.

Пою́щи в вы́шних со А́нгельскими чи́нми Трисвяту́ю пе́снь, умоли́, Нико́лае, вся́кия ну́жды изба́вити и ско́рби ве́рою к тебе́ притека́ющия и единомы́сленно ти́ пою́щия:

Ра́дуйся, А́нгелов сожи́телю; ра́дуйся, би́сере Госпо́день.

Ра́дуйся, богоно́сных оте́ц равноче́стный; ра́дуйся, святы́х подви́жников равновенча́нный.

Ра́дуйся, преподо́бный в му́ченицех и Го́рних прича́стниче; ра́дуйся, благода́ти богоно́сный пода́телю.

Ра́дуйся, неизрече́нных созерца́телю; ра́дуйся, в ско́рбех изба́вителю.

Ра́дуйся, я́ко тобо́ю от страсте́й избавля́емся; ра́дуйся, я́ко тобо́ю све́та исполня́емся.

Ра́дуйся, пред Бо́гом на́ш ве́рный предста́телю; ра́дуйся, все́х благочести́вых ра́досте.

Ра́дуйся, Нико́лае блаже́нне, му́чениче Христо́в непобеди́мый и целе́бниче пречу́дный.

Конда́к 13.

О Нико́лае му́чениче, во́ине Госпо́день и преподо́бных сла́во, от вся́каго ско́рбнаго обстоя́ния и искуше́ний многообра́зных изба́ви на́с, любо́вию чту́щих тя́ и Тро́ице Живонача́льней вопию́щих: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгельское житие́ во пло́ти челове́честей пожи́л еси́, Нико́лае, Христо́в страстоте́рпче, и я́ко челове́к ра́зума Небе́снаго показа́лся еси́. Сего́ ра́ди по́двигом твои́м дивя́щеся, зове́м си́це:

Ра́дуйся, я́ко тобо́ю Бо́г просла́вися; ра́дуйся, я́ко тобо́ю растли́тель потреби́ся.

Ра́дуйся, любви́ Христо́вой стяжа́ние; ра́дуйся, ле́сти и заблужде́ний посрамле́ние.

Ра́дуйся, высото́ по́стничества, благочести́выя вознося́щая; ра́дуйся, глубино́ страда́ния, враги́ поража́ющая.

Ра́дуйся, я́ко све́тло от Восто́ка сия́еши; ра́дуйся, я́ко страны́ Фесса́лии озаря́еши.

Ра́дуйся, преподо́бных оте́ц единонра́вный; ра́дуйся, му́ченик святы́х единоре́вностный.

Ра́дуйся, тобо́ю бо умягча́ются сердца́; ра́дуйся, тобо́ю бо упраздня́ется зло́ба.

Ра́дуйся, Нико́лае блаже́нне, му́чениче Христо́в непобеди́мый и целе́бниче пречу́дный.

Конда́к 1.

Избра́ннаго му́ченика Христо́ва, от восто́ка, я́ко звезду́, возсия́вшаго и в Вуне́нах свяще́нно подвиза́вшагося, венча́ем пе́сненными похвалы́; во Христа́ бо облеки́йся, си́лою преподо́бных и му́чеников украси́лся еси́, ему́же глаго́лем:

Ра́дуйся, Нико́лае блаже́нне, му́чениче Христо́в непобеди́мый и целе́бниче пречу́дный.

Моли́тва.

О всесла́вне му́чениче Христо́в, свя́те Нико́лае, глаго́лам Христа́ Бо́га все́ю душе́ю и все́м се́рдцем после́довавый и страда́льчески равноа́нгельным житие́м Ему́ благоугоди́вый. Всесвято́е и́мя Спаси́теля па́че вся́каго и́мени испове́давый, Его́ ра́ди кро́вь свою́ излия́вый и от Него́ досто́йно чуде́с дарова́нием и си́лою исцеле́ний прославля́емый. Тебе́ мо́лимся: при́зри с высоты́ Небе́сныя на на́с и испо́лни проше́ния на́ша. Не пре́зри, свя́те, моле́ния на́шего, но изба́ви на́с от вся́кия душе́вныя и теле́сныя боле́зни, а наипа́че от ра́ковыя я́звы, поража́ющия лю́ди, я́ко мно́гое дерзнове́ние ко Христу́ стяжа́л еси́. Благослови́ твои́м моле́нием и благода́тию до́мы на́ша и дела́ ру́к на́ших, умоли́ на́м улучи́ти от Го́спода укрепле́ние и здра́вие, земли́ плодоно́сие и вся́кое изоби́лие, отжени́ от на́с вся́кое искуше́ние и вся́кое де́йство началозло́бника врага́, хотя́щаго поги́бели на́шея, и моли́ся ко Го́споду Иису́су Христу́ пода́ти на́м прегреше́ний оставле́ние, да́руемое все́м в безконе́чней Его́ ми́лости, я́ко То́й Бла́г е́сть и Человеколю́бец. Ами́нь.

Происходил с Востока и с юности выказывал глубокое благочестие. Его взяли в армию, где он отличился такой храбростью, что император Лев VI Мудрый, несмотря на молодость Николая, поручил ему командование отрядом из тысячи воинов. Отряд был послан в Фессалию охранять город Лариссу. Николай заботился о том, чтобы его подчинённые научались страху Божию в такой же степени, что и воинскому искусству.

В начале X века в Фессалию вторглись враги, взяли Димитриаду (ныне Волос), и, истребляя население и грабя города и сёла, приблизились к Лариссе. Понимая, что его отряду не устоять, Николай приказал вывести всё население из города. Сам же он с несколькими воинами ушёл к подвижникам на гору рядом с Тирнавой в 16 километрах северо-западнее Лариссы.

Постом и молитвой Николай стяжал мир, который не может принести ни одно земное царство. Как-то ночью, когда Николай и его друзья молились, им явился ангел и объявил, что они должны готовиться к принятию мученического венца.

Несколько дней спустя завоеватели напали на скит. Николай шёл впереди христианских воинов и ободрял их пламенными словами, так что сначала они взяли верх над врагами, но потом оказались в окружении. Варвары схватили их и подвергли жестоким пыткам, требуя отказа от христианской веры. Святые остались непреклонны, как-будто кто-то другой страдал за них, и скончались, не отрекшись от Христа и Его Царства. Их звали: Ардомий (Армодий), Григорий, Иоанн, Димитрий, Михаил, Акиндиний, Феодор, Панкратий, Павел, Христофор, Пантолеон, Еводий и Емилий (Емилиан). Две женщины, Ирина и Пелагия, также удостоились мученической кончины.

Убежать удалось одному лишь Николаю. Уйдя чуть дальше на юг, он укрылся на лесистой горе Вунени рядом с Кардицей. Некоторе время вёл там безмолвную жизнь в пещере у большого дуба. Побеждая страсти и нападения демонов, он блистал сиянием добродетелей.

Варвары тем временем продолжали истреблять народ и всюду искали прославленного полководца. Наконец они обнаружили его, внезапно напав, схватили и пытками хотели заставить отречься от Христа. Николай отвечал, что сохранит верность Ему до последнего издыхания. Варвары долго глумились над ним, а затем пронзили насквозь его собственным копьём.

Мч. Николай Вуненский. Греческая икона
Мч. Николай Вуненский. Греческая икона

Почитание

После того, как захватчики ушли, Ларисский епископ вместе с выжившим населением вернулся в город. Он перенёс в Лариссу мощи Тирнавских мучеников. Но тело святого Николая до времени оставалось сокрытым внутри дуба и было чудесным образом сохранено от тления и диких зверей.

Много лет спустя, около 985 года, Фессалийский наместник Евфимий, будучи болен проказой и исчерпав все врачебные средства, обратился за помощью к святым. Он помолился великомученику Димитрию, а затем отправился в Лариссу к мощам святителя Ахиллия. Ему было видение, в котором он получил указание искупаться в источнике рядом с телом святого Николая на горе Вунени. В результате кропотливых поисков ему удалось найти наконец это место и обрести тело святого. Здесь вельможа построил церковь, чтобы положить в ней святые мощи. После нового откровения Евфимий нашёл и источник. Искупавшись в нём, он полностью исцелился.

Мученику Николаю Вуненскому посвящены многие церкви Фессалии. Его честная глава ныне почивает в монастыре святого Николая на острове Андросе.

Пре­по­доб­но­му­че­ник Ни­ко­лай Ву­не­ни[1] по­стра­дал от ава­ров в Фес­са­лии око­ло го­ро­да Ла­риссы.


При­ме­ча­ние

[1] Не вклю­чён в совре­мен­ный Ме­ся­це­слов Рус­ской Пра­во­слав­ной Церк­ви.