Акафистник

Помочь сайту
·
·
·
·

Акафист святому праведному Филарету Милостивому

Сей акафист св. Филарету Милостивому, написан Высокопреосвященнейшим Митрополитом Харьковским и Богодуховским Никодимом.

Память: 14 (1) декабря

Не утвержден для общецерковного использования.

Конда́к 1.

Возбра́нный чудотво́рче и преди́вный уго́дниче Христо́в Филаре́те! Похва́льная прино́сим ти́, Авраа́млева страннолю́бия усе́рдный подража́телю, ты́ бо о лю́дех милосе́рдствуя, рука́ма неиму́щих, Бо́гу взаи́м дая́ти возлюби́л еси́, те́мже ти́, любо́вию Бо́жиею обогати́вшемуся и дерзнове́ние к Нему́ стяжа́вшему, припа́дающе, мо́лимся: не оста́ви и на́с, к тебе́ в ну́ждах прибега́ющих и со умиле́нием зову́щих:

Ра́дуйся, Филаре́те Ми́лостивый, житие́м свои́м Це́рковь Христо́ву украша́ющий.

И́кос 1.

А́нгелом ра́дование и челове́ком весе́лие бы́сть житие́ твое́, Филаре́те Ми́лостивый. Ты́ бо пра́отцу Авраа́му в ве́ре, И́ову же в терпе́нии после́дуя, я́ко оте́ц чадолюби́вый: а́лчущих пита́я, стра́нных же с ра́достию прие́мля, любе́зно те́х упокоева́л, и та́ко до́м тво́й прибе́жище ра́дования соде́лал еси́. Си́це, ви́дяще тя́ во́лю Бо́жию в дела́х Милосе́рдия творя́ща, прино́сим ти́ таковы́я похвалы́:

Ра́дуйся, страны́ Пафлаго́нския свети́льниче светоза́рный; ра́дуйся, человеколю́бия о́бразе пресла́вный.

Ра́дуйся, ты́ бо в житии́ твое́м все́м се́рдцем Бо́га возлюби́вый; ра́дуйся, горе́нием любви́ к Нему́ бога́тство доброде́телей му́дре расточи́вый.

Ра́дуйся, ты́ бо, милосе́рдием распаля́емь, благода́ть Ду́ха Свята́го оби́льно стяжа́вый; ра́дуйся, в любви́ Бо́жией богате́я, никогда́же обнища́вый.

Ра́дуйся, Филаре́те Ми́лостивый, житие́м свои́м Це́рковь Христо́ву украша́ющий.

Конда́к 2.

Ви́дяще тя́ бли́жнии и да́льнии, сострада́нием распаля́ема, и служе́ние лю́дем а́ки Самому́ Го́споду усе́рдно творя́ща, в ну́ждах и печа́лех к тебе́ притека́ху, и́х же ты́ еле́ем милосе́рдия во и́мя Христо́во утеша́л еси́. Мы́ же, милосе́рдие твое́, ра́зум челове́ческий превосходя́щее зря́ще, вопие́м о тебе́ Всеще́дрому Бо́гу: Аллилу́иа.

И́кос 2.

Ра́зум Прему́драго вои́стинну стяжа́л еси́, всеблаже́нне Филаре́те, я́ко блага́я и зла́я, живо́т и сме́рть, нищета́ и бога́тство от Го́спода су́ть, сего́ ра́ди словеса́ Госпо́дня: «Поне́же сотвори́сте еди́ному из бра́тий мои́х ме́ньших, Мне́ сотвори́сте» – па́че ме́да и со́та се́рдцу твоему́ бы́ша. Си́це тебе́ о таковы́х милосе́рдующа, прино́сим похва́льная сия́:

Ра́дуйся, Боже́ственнаго ра́зума преди́вное вмести́лище; ра́дуйся, благоутро́бия Бо́жия всеусе́рднейший пропове́дниче.

Ра́дуйся, еле́й милосе́рдия никогда́же в дому́ твое́м истощи́ся; ра́дуйся, я́ко же в Саре́пте Сидо́нской, му́ка доброде́тели твоея́ николи́же ума́лися.

Ра́дуйся, боголюби́вых ду́ш ще́дрое увеселе́ние; ра́дуйся, в ско́рбех уныва́ющих благода́тное укрепле́ние.

Ра́дуйся, Филаре́те Ми́лостивый, житие́м свои́м Це́рковь Христо́ву украша́ющий.

Конда́к 3.

Си́лою Ду́ха Свята́го, Его́ же стяжа́ душа́ твоя́, не поколеба́ся ду́х тво́й, блаже́нне Филаре́те, егда́ Человеколю́бец Бо́г, я́коже иногда́ на уго́дника своего́ И́ова, попусти́ на тя́ по́лчища Исма́ильтян, огне́м и мече́м опустоши́вших се́ла же, и ни́вы, и вертогра́ды твоя́, и поби́ша домоча́дцы твоя́, дабы́ испыта́ти незло́бие души́ твоея́. Ты́ же, вся́ сия́ со смире́нием прия́л еси́, уста́ми пра́веднаго И́ова благословля́яй Бо́га: на́г изыдо́х из чре́ва ма́тере моея́, на́г и оты́ду, Госпо́дь даде́ – Госпо́дь отъя́т, – велегла́сно поя́ Ему́: Аллилу́иа.

И́кос 3.

В Бо́зе, упова́ние име́яй, в нищете́ и напа́стех су́ще, не поскорбе́л, ниже́ согреши́л еси́ уста́ми твои́ми пред лице́м Всевы́шняго, всеблаже́нне, но я́коже о мно́гом бога́тстве, о нищете́ свое́й веселя́ся, по сло́ву бо Госпо́дню: в по́те лица́ яды́й хле́б тво́й, его́ же, я́ко избы́точествующий, с нищелю́бцы разделя́л еси́. Ублажа́я таково́е упова́ние твое́ со умиле́нием вопие́м ти́:

Ра́дуйся, се́рдца твоего́ земны́м сокро́вищем не приложи́вый; ра́дуйся, таковы́м бо бли́жним твои́м со благогове́нием послужи́вый.

Ра́дуйся, ми́лостыней а́ки ми́ро многоце́нное в це́ркви Христо́вой благоуха́ющий; ра́дуйся, вдо́в и сиро́т, и неиму́щих хле́бом жи́зни пита́ющий.

Ра́дуйся, благоче́стия сто́лпе непоколеби́мый, небе́с досязу́ющий; ра́дуйся, доброде́тельми твои́ми а́нгельски любо́вь Бо́жию воспева́ющий.

Ра́дуйся, Филаре́те Ми́лостивый, житие́м свои́м Це́рковь Христо́ву украша́ющий.

Конда́к 4.

Бу́рею испыта́ний и укоре́нием от бли́жних свои́х не поколеба́лся еси́, боголюби́ве Филаре́те, егда́ же узре́л еси́ земледе́льца убо́га в беде́ су́ща, супру́г воло́в еди́ных в дому́ твое́м бы́вших, сему́ отда́л еси́, ева́нгельски убежда́я жену́ и ча́д свои́х воззре́ти на пти́ц небе́сных, я́ко не се́ют, не жну́т, не собира́ют в жи́тницы, и Оте́ц Небе́сный пита́ет и́х. Та́ко си́х утеша́юще, Бо́гу воспева́л еси́: Аллилу́иа.

И́кос 4.

Ви́дяще тя́ боголюби́вый дру́г тво́й в нищету́ впа́дше, умилосе́рдися, и дово́льно пшени́цы посла́ ти́, да до́м сво́й препита́еши, достоблаже́нне Филаре́те. Ты́ же сия́, а́ки от ру́к Бо́жиих прия́л еси́, и домоча́дцы, и сосе́ди своя́, и неиму́щую бра́тию одели́л еси́. Лю́дие же Бо́жии, зря́ще тя́ милосе́рдием избы́точествующе, ублажа́ше тя́ похвалы́ таковы́ми:

Ра́дуйся, це́ркве дома́шния благода́тное утвержде́ние; ра́дуйся, земледе́льцев в де́лании ще́дрое благослове́ние.

Ра́дуйся, а́лчущим и жа́ждущим благи́й хлебода́телю; ра́дуйся, в беда́х и печа́лех су́щим ско́рый предста́телю.

Ра́дуйся, незло́бия преизря́дный рачи́телю; ра́дуйся, добротолю́бия смиренному́дрый учи́телю.

Ра́дуйся, Филаре́те Ми́лостивый, житие́м свои́м Це́рковь Христо́ву украша́ющий.

Конда́к 5.

Медото́чней струе́ уподо́бился еси́, богоблаже́нне Филаре́те, егда́ хле́ба насу́щна не бе́ в хра́мине твое́й, оба́че, ни́щу прише́дшу в до́м тво́й, да сего́ не пре́зриши, ниже́ тща́ отпу́стиши, от пче́л ме́д отъя́л еси́, и та́ко ду́шу раба́ Христо́ва увесели́л еси́. Мы́ же, милосе́рдия сего́ в житии́ на́шем не стяжа́вше, но я́же даде́ на́м Госпо́дь, безу́мно расточа́юще, ка́ко принесе́м похва́льная ми́лующему на́с Бо́гу, а́ще не о тебе́ возопие́м Ему́: Аллилу́иа.

И́кос 5.

Слы́шаще и ви́дяще я́ко ми́лость и и́стина срето́стеся, пра́вда же и ми́р в дела́х твои́х облобыза́стася, кто́ не ублажи́т по́двиги твоя́, вои́стинну Ми́лостивый Филаре́те, или́ кто́ не удиви́тся нищелю́бию твоему́ – ты́ бо, в кра́йней нищете́ су́ще: на Бо́га упова́ние име́я, псало́мски испове́дал еси́: А́ще пойду́ посреде́ ско́рби, Госпо́дь живи́т мя́, и спасе́т мя́ десни́ца Его́. К стяжа́нию богому́дрия сего́ подви́гни и на́с, взыва́ющих ти́ такова́я:

Ра́дуйся, пла́мене ве́ры боже́ственнаго горе́ния; ра́дуйся, фимиа́ме благово́ннаго пред Бо́гом куре́ния.

Ра́дуйся, кла́дязе милосе́рдия неисчерпа́емаго; ра́дуйся, страннопри́имче черто́га незатворя́емаго.

Ра́дуйся, пра́ведному И́ову усе́рдный подража́телю; ра́дуйся, дру́же Христо́в, и о на́с пред Ни́м ве́рный предста́телю.

Ра́дуйся, Филаре́те Ми́лостивый, житие́м свои́м Це́рковь Христо́ву украша́ющий.

Конда́к 6.

Пропове́дник милосе́рдия и человеколю́бия Христо́ва яви́лся еси́ благонра́вным житие́м твои́м, свя́те Филаре́те, и та́ко ина́го Авраа́ма показа́ тя́ ми́рови Бо́г. Сего́ ра́ди призре́ Госпо́дь на смире́ние твое́ и от нищеты́ кра́йния к ро́ду ца́рственному вознесе́ насле́дие твое́, да у́зриши сы́ны и дще́ри ро́да твоего́, я́ко новосажде́ния ма́сличная, о́крест трапе́зы твоея́ вся́ дни́ живота́ твоего́, да и мы́ о тебе́ позна́ем ка́ко пече́тся Госпо́дь о упова́ющих на Него́, и с любо́вию возопие́м Ему́: Аллилу́иа.

И́кос 6.

Возсия́л еси́, я́ко свети́ло лучеза́рное горе́нием любве́ твоея́ ко Го́споду, и на ка́мене ве́ры утверди́ся се́рдце твое́, прему́дрый де́лателю виногра́да Христо́ва и, я́ко кри́н многоцве́тный, по́двигом ве́ры процве́л еси́ со ча́ды твои́ми, и́х же долготерпе́нием твои́м упова́ти на Бо́га науча́л еси́. Они́ же, уразуме́ша гре́х ропта́ния своего́ и, сокруша́яся се́рдцем, благословля́ху Бо́га, сотво́ршаго ми́лость. С ни́ми же и мы́ к тебе́ припа́даем и уми́льно взыва́ем:

Ра́дуйся, бра́к честны́й и житие́ нескве́рное уго́дная пред Бо́гом сотвори́вый; ра́дуйся, це́рковь дома́шнюю на ка́мене ве́ры богому́дренно утверди́вый.

Ра́дуйся, супру́жеской ве́рности тве́рдое охране́ние; ра́дуйся, в по́двиге се́м изнемога́ющих благода́тное укрепле́ние.

Ра́дуйся, ю́ным супру́гом о́браз христиа́нскаго жития́ до́бре показу́ющий; ра́дуйся, моли́твою пред Бо́гом в ну́ждах и́х споспешеству́ющий.

Ра́дуйся, Филаре́те Ми́лостивый, житие́м свои́м Це́рковь Христо́ву украша́ющий.

Конда́к 7.

Хотя́ще возда́ти благодаре́ние Бо́гу, за я́же дарова́ ти́ неизрече́нная блага́я, ре́кл еси́ жене́ со ча́ды твои́ми: сотвори́м у́бо пи́р и умо́лим Царя́ на́шего со вельмо́жами приити́ к на́м. Бы́вшу сему́ и́ми угото́вану, поте́кл еси́, всеблаже́нне, на сто́гны гра́да и распу́тия, и ели́ка обре́л еси́ ни́щих, и слепы́х и хромы́х, и разсла́бленных, в дому́ твое́м ца́рскую трапе́зу угото́вал еси́, и и́мже с домоча́дцы свои́ми, я́ко Царю́ царе́й, послужи́л еси́. С ни́ми же, я́ко со дру́ги Христо́вы, науча́еши и на́с взыва́ти в Тро́ице пева́емому Бо́гу: Аллилу́иа.

И́кос 7.

Но́ваго свети́льника, в де́лех милосе́рдая просия́вшаго, обре́те тя́ Це́рковь Христо́ва, ми́лостиве Филаре́те, поне́же не прилепи́ся се́рдце твое́ сокро́вищем земны́м, ниже́ ца́рским ми́лостыням и щедро́там, и́х же нивочто́же вменя́л еси́, и вся́ я́же тебе́ приноша́ху, убо́гим и стра́ждущим оби́льно расточа́л еси́. Внемли́ же и на́м, о всеблаже́нне, да твои́ми моли́твами душе́внаго и теле́снаго вре́да изба́вльшеся, щедролю́бием твои́м уязви́мся, принося́ще тебе́ сия́ похвалы́:

Ра́дуйся, отце́м и пра́отцем на́шим в ве́ре подража́телю; ра́дуйся, сокро́вищ Небе́сных прему́дрый стяжа́телю.

Ра́дуйся, благонра́вием твои́м целому́дрию и стра́ху Бо́жию на́с науча́еши; ра́дуйся, боле́знующих жестокосе́рдием щедролю́бием исцеля́еши.

Ра́дуйся, па́че ца́рских по́честей нищету́ Христо́ву возлюби́вый; ра́дуйся, Ца́рствия Христо́ва па́че земны́х кра́сных иска́ти на́с научи́вый.

Ра́дуйся, Филаре́те Ми́лостивый, житие́м свои́м Це́рковь Христо́ву украша́ющий.

Конда́к 8.

Стра́нно и пресла́вно бы́сть житие́ твое́, преблаже́не Филаре́те, во е́же диви́тися мно́зем, ка́ко у́бо ца́рскими почестьми́ почте́нну ти́ су́щу, нищету́ духо́вную па́че бога́тства ми́ра сего́ возлюби́в, в посте́ и моли́тве бога́тство некра́домое душе́ твое́й стяжа́л еси́. Кто́ у́бо возмо́жет изрещи́ боле́зни и боре́ния твоя́, я́же Христа́ ра́ди претерпе́л еси́, а́ще боже́ственной любо́вию не возгори́тся, во е́же чи́стым се́рдцем непреста́нно взыва́ти ко Го́споду: Ты́ еси́ упова́ние мое́, ча́сть моя́ еси́ на земли́ живы́х, Аллилу́иа.

И́кос 8.

Ве́сь бе́ в вы́шних, пра́ведне Филаре́те, егда́ Ду́хом Святы́м возвести́ся ти́ жития́ твоего́ сконча́ние и, я́коже дре́вле Патриа́рх Иа́ков, призва́л еси́ ча́ды твоя́ и ча́ды ча́д твои́х, и́м же, проро́чески, вся́, я́же и́мать во́лею Бо́жиею соверши́тися, предвозвести́л еси́. И, та́ко и́х благословля́я, я́ко со́лнце лице́м твои́м просия́л, и псало́мски к Бо́гу воззва́л еси́: Ми́лость и су́д воспою́ Тебе́, Го́споди, когда́ прии́деши ко мне́; и, си́це моля́щуся, ду́х тво́й в ру́це Бо́жии преда́л еси́. Они́, сокруша́ющеся, рыда́ньми вопия́ху:

Ра́дуйся, о́тче ми́лостивый и кро́ткий, любве́ Христо́вой на́с науча́ющий; ра́дуйся, гряду́щая я́ко настоя́щая на́м сказу́ющий.

Ра́дуйся, трие́ вну́ки твоя́ на по́двиг и́ноческий проро́чески благослови́вый; ра́дуйся, послуша́нию, целому́дрию и нищете́ Христо́вой и́х научи́вый.

Ра́дуйся, сострада́нием и нищелю́бием премно́го Бо́гу угоди́вый; ра́дуйся, ми́лостынею Ца́рствие Бо́жие унасле́дивый.

Ра́дуйся, Филаре́те Ми́лостивый, житие́м свои́м Це́рковь Христо́ву украша́ющий.

Конда́к 9.

Вся́ко коле́но земны́х: ца́рие и вельмо́жи, стра́нницы и убо́зии, от градо́в и ве́сей, я́ко мра́вия ко гро́бу твоему́ стека́шася, блаже́нне Филаре́те, дру́г дру́га тесня́ще и со слеза́ми взыва́ху: О, Го́споди Бо́же на́ш! Почто́ лиши́л еси́ на́с отца́ и пита́теля на́шего? Кто́ ны́не а́лчущих напита́ет, наги́х оде́ет, стра́нных в до́м сво́й введе́т? Кто́ же уме́ршую и на сто́гнах пове́ржену бра́тию на́шу гро́бу преда́ст? Мы́ же содрога́емся се́рдцем и душе́ю, я́ко ничто́же бла́го таковы́м сотвори́хом, да вопие́м с ни́ми хвале́бную пе́снь Бо́гу: Аллилу́иа.

И́кос 9.

Вети́и многовеща́ннии недоумева́ют: ки́ими словесы́ восхвали́ти по достоя́нию в супру́жеском по́двиге непоро́чное Бо́гу служе́ние твое́, боголюби́ве Филаре́те, ниже́ испове́сть вся́ пресла́вная чудеса́ твоя́, и́ми и по сме́рти в ско́рбех к тебе́ притека́вших утеша́л еси́. Си́це бо челове́к от ду́ха зла́го многоле́тне стра́ждущий, егда́ ко гро́бу твоему́ пове́ржеся, от ко́зней сего́ мучи́тельных свободи́ся, хвалу́ ве́лию Бо́гу воздаде́. Наро́д же, чудесе́ сего́ свиде́тель бы́в, благословля́я Бо́га, со стра́хом и умиле́нием принесе́ тебе́ такова́я:

Ра́дуйся, я́коже Архистрати́г Бо́жий сатану́ до́лу низри́нувый; ра́дуйся, милосе́рдием твои́м ло́на Авраа́мова дости́гнувый.

Ра́дуйся, Небе́снаго Домовлады́ки ра́бе благи́й и ве́рный; ра́дуйся, моли́твенниче о на́с у Престо́ла Бо́жия непосты́дный.

Ра́дуйся, за любо́вь твою́ святу́ю любве́ Царя́ Небе́снаго сподо́бивыйся; ра́дуйся, ева́нгельски на земли́ потруди́выйся, сожи́тельства а́нгелом удосто́ивыйся.

Ра́дуйся, Филаре́те Ми́лостивый, житие́м свои́м Це́рковь Христо́ву украша́ющий.

Конда́к 10.

Спаси́тельнаго приста́нища и сла́дости ра́йския пресла́вно дости́гл еси́ смиренному́дрием твои́м, достохва́льне Филаре́те, и реку́ о́гненную, нече́стие попаля́ющую, невреди́мо преше́л еси́, иде́же со избра́нными Бо́жиими даде́ся ти́ вене́ц сла́вы неувяда́емыя, в не́й бо тя́ му́ж пра́ведный узре́, и от А́нгела Госпо́дня услы́ша: се́ Филаре́т Амни́йский е́сть, и́же премно́гою свое́ю к ни́щим любо́вию, ми́лостию и чи́стым свои́м житие́м, вторы́м Авраа́м бы́сть. Та́ко, ви́дяще тя́ в Бо́зе ликовству́юща, смире́нно и мы́ вопие́м: Аллилу́иа.

И́кос 10.

Стена́ и наде́жное прибе́жище еси́, ми́лостиве Филаре́те, все́м к заступле́нию твоему́ притека́ющих, о ни́х же я́ко о ча́дех свои́х пред Бо́гом в моли́тве хода́тайствуеши. Те́м же и на́м, к тебе́ с любо́вию припа́дающих, и твоего́ заступле́ния пред Бо́гом прося́щих, бу́ди стена́ и огражде́ние непреодоли́мое, и от все́х ко́зней вра́жиих избавле́ние непреобори́мое, да твои́ми моли́твами приста́нища ра́йскаго дости́гнем и, в Бо́зе веселя́щеся, вопие́м ти́ ра́достно:

Ра́дуйся, от богомы́слия к богове́дению сла́вно возвы́сивыйся; ра́дуйся, о Бо́зе му́дрствуя, ле́потою безсме́ртия украси́выйся.

Ра́дуйся, о ни́щих печа́ляся, у вра́т до́му твоего́ у́треневавый; ра́дуйся, та́ко у́тренююще, любо́вь Бо́жию стяжа́вый.

Ра́дуйся, христиа́нскаго благоче́стия ди́вный глаша́таю; ра́дуйся, ми́лостивый о на́с пред Бо́гом хода́таю.

Ра́дуйся, Филаре́те Ми́лостивый, житие́м свои́м Це́рковь Христо́ву украша́ющий.

Конда́к 11.

Пе́ние всехва́льное прино́сим ти́, досточу́дне Филаре́те, и псало́мски вопие́м: Блаже́н му́ж, боя́йся Го́спода, в за́поведех Его́ восхо́щет зело́. Расточи́, даде́ убо́гим: пра́вда его́ пребыва́ет во ве́к. Та́ко, о всеблаже́нне, житие́м твои́м показа́л еси́, я́ко мона́си и мирсти́и, свяще́нницы и вельмо́жи, бога́тии и убо́зии зва́ни су́ть вни́ти в ра́дость Го́спода своего́, а́ще уразуме́ют я́ко у Го́спода ми́лость, и мно́гое у Него́ избавле́ние, и в де́лех благи́х восхва́лят Трисвято́е и́мя Его́: Аллилу́иа.

И́кос 11.

Светоно́сным служи́телем милосе́рдия и человеколю́бия предста́л еси́ престо́лу Всевы́шняго Влады́ки и Го́спода Си́л, всеблаже́нне Филаре́те, отону́дуже Боже́ственными луча́ми Трисо́лнечнаго Све́та осиява́еши на́с, во тьме́ грехо́вней блужда́ющих, на све́тлую стезю́ покая́ния и доброде́лания наставля́еши: не скрыва́ти себе́ сокро́вищ на земли́, иде́же че́рвь и тля́ тли́т, и иде́же та́тие подко́пывают и кра́дут. Мы́ же, сла́дкое сие́ Христо́во веща́ние в послуша́ние прие́млюще, с ра́достию зове́м ти́:

Ра́дуйся, колесни́цею доброде́телей от земны́х к небе́сным восхо́д сотвори́вый; ра́дуйся, вся́ ко́зни вра́жия милосе́рдием к лю́дем посрами́вый.

Ра́дуйся, святы́я Це́ркве похвало́ и украше́ние; ра́дуйся, среди́ собла́знов ми́ра сего́, непоро́чное Бо́гу в супру́жестве служе́ние.

Ра́дуйся, о спасе́нии твое́м Небе́снии Ли́ки ра́дуются; ра́дуйся, о и́мени твое́м вси́ земноро́днии, веселя́щеся хва́лятся.

Ра́дуйся, Филаре́те Ми́лостивый, житие́м свои́м Це́рковь Христо́ву украша́ющий.

Конда́к 12.

Благода́ть Бо́жию оби́льно прия́л еси́, пра́ведне Филаре́те, е́юже укрепи́ся се́рдце твое́ в любви́ ко Христу́ Бо́гу, си́це бо, долготерпе́нием и ве́рою просия́в, от земна́го твоего́ жития́ в Небе́сная селе́ния со А́нгельскими ли́ки водвори́лся, милосе́рдия Бо́жия пропове́дник преизря́ден яви́лся еси́. Ему́ же, со дерзнове́нием предстоя́, мо́лимся те́пле: благода́тию Свята́го Ду́ха окропи́ти сердца́ на́ша, да твоего́ жития́ подража́тели бу́дем, ко исполне́нию за́поведей Христо́вых усе́рдно потщи́мся, вопию́ще Ему́: Аллилу́иа.

И́кос 12.

Пою́ще неизрече́нныя доброде́тели твоя́, и́хже ра́ди подража́тель Христо́ва благосе́рдия бы́л еси́, и я́ко кри́н неувяда́емый посреде́ земноро́дных красото́ю ума́ твоего́ процве́л, ми́лостиве Филаре́те, черто́га Небе́снаго зре́ти и воспева́ти сла́ву Бо́жию удосто́ился еси́. Сицева́го блаже́нства испроси́ и на́м, чту́щим ве́рою и любо́вию пресве́тлую па́мять твою́, да твои́м хода́тайством услы́шим Боже́ственный гла́с Гряду́щаго суди́ти живы́м и ме́ртвым: Прииди́те благослове́ннии Отца́ Моего́, насле́дуйте угото́ванное ва́м Ца́рствие от сложе́ния ми́ра, да благода́рне зове́м ти́:

Ра́дуйся, высото́ю ума́ твоего́ скороги́бнущее ми́ра сего́ позна́вый; ра́дуйся, чистото́ю се́рдца твоего́ любо́вь Христо́ву стяжа́вый.

Ра́дуйся, доброде́тельми твои́ми на пи́р А́гнца Бо́жия на́с призыва́ющий; ра́дуйся, моли́твами твои́ми две́ри Ца́рствия Христо́ва на́м отверза́ющий.

Ра́дуйся, трубо́ а́нгельская, воздая́ние Бо́жие глася́щая; ра́дуйся, любы́ неизрече́нная, чрез реку́ о́гненную в черто́г Небе́сный ве́рных вводя́щая.

Ра́дуйся, Филаре́те Ми́лостивый, житие́м свои́м Це́рковь Христо́ву украша́ющий.

Конда́к 13.

О, преблаги́й уго́дниче Бо́жий, Филаре́те Ми́лостивый! Приими́ от на́с убо́гое ве́ры и долготерпе́ния твоего́ восхвале́ние и, я́ко име́яй дерзнове́ние ко Го́споду и о лю́дех сострада́ние, испроси́ у Человеколюби́ваго Бо́га Це́ркве Христо́вой благостоя́ние непоколеби́мое, на́м же, ве́ры благочести́выя утвержде́ние, наде́жды нело́жное упова́ние и братолю́бие нелицеме́рное, да не ума́лится пра́вда Бо́жия в де́лех на́ших, ниже́ постыди́мся пред отцы́ и пра́отцы на́шими, егда́ пое́м Бо́гу, Трисвяту́ю пе́снь: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгелом ра́дование и челове́ком весе́лие бы́сть житие́ твое́, Филаре́те Ми́лостивый. Ты́ бо пра́отцу Авраа́му в ве́ре, И́ову же в терпе́нии после́дуя, я́ко оте́ц чадолюби́вый: а́лчущих пита́я, стра́нных же с ра́достию прие́мля, любе́зно те́х упокоева́л, и та́ко до́м тво́й прибе́жище ра́дования соде́лал еси́. Си́це, ви́дяще тя́ во́лю Бо́жию в дела́х Милосе́рдия творя́ща, прино́сим ти́ таковы́я похвалы́:

Ра́дуйся, страны́ Пафлаго́нския свети́льниче светоза́рный; ра́дуйся, человеколю́бия о́бразе пресла́вный.

Ра́дуйся, ты́ бо в житии́ твое́м все́м се́рдцем Бо́га возлюби́вый; ра́дуйся, горе́нием любви́ к Нему́ бога́тство доброде́телей му́дре расточи́вый.

Ра́дуйся, ты́ бо, милосе́рдием распаля́емь, благода́ть Ду́ха Свята́го оби́льно стяжа́вый; ра́дуйся, в любви́ Бо́жией богате́я, никогда́же обнища́вый.

Ра́дуйся, Филаре́те Ми́лостивый, житие́м свои́м Це́рковь Христо́ву украша́ющий.

Конда́к 1.

Возбра́нный чудотво́рче и преди́вный уго́дниче Христо́в Филаре́те! Похва́льная прино́сим ти́, Авраа́млева страннолю́бия усе́рдный подража́телю, ты́ бо о лю́дех милосе́рдствуя, рука́ма неиму́щих, Бо́гу взаи́м дая́ти возлюби́л еси́, те́мже ти́, любо́вию Бо́жиею обогати́вшемуся и дерзнове́ние к Нему́ стяжа́вшему, припа́дающе, мо́лимся: не оста́ви и на́с, к тебе́ в ну́ждах прибега́ющих и со умиле́нием зову́щих:

Ра́дуйся, Филаре́те Ми́лостивый, житие́м свои́м Це́рковь Христо́ву украша́ющий.

Моли́тва.

О, преди́вне избра́нниче Бо́жий, Филаре́те Ми́лостивый! Амни́и преще́дрый хлебода́телю, Правосла́вия свети́льниче, Го́спода Бо́га ра́бе благи́й и ве́рный! Ты́ бо все́м се́рдцем ева́нгельски Христу́ после́довавый и да́нный тебе́ тала́нт прему́дре умно́живый: си́рых и убо́гих оде́явый и напита́вый; стра́нных и ни́щих в до́м сво́й введы́й, в ско́рбех и печа́лех су́щих уте́шивый, уме́рших и на сто́гнах пове́рженных гро́бу преда́вый; все́м вся́чески послужи́вый, и та́ко ве́ру свою́ в дела́х показа́л еси́. Е́й, святы́й уго́дниче Бо́жий, не пре́зри на́с, печа́льми жите́йскими изныва́емых и страстьми́ грехо́вными обурева́емых. Во вся́ дни́ уны́ние и малоду́шие коле́блют на́шу ве́ру, жестокосе́рдие и озлобле́ние снеда́ют сердца́ на́ша и охлажда́ют любо́вь на́шу; честолю́бие же и нетерпе́ние растлева́ют ду́ши на́ша, и та́ко, а́ки ни́щии, в дела́х благи́х обнища́хом. Ты́ же, О́тче пра́ведный, милосе́рдствуя о на́с, умоли́ Христа́ Бо́га, да обогати́т сердца́ на́ша Ду́хом Свои́м Святы́м, исцели́т душе́вныя и теле́сныя неду́ги на́ша, и, а́ки ни́ву жа́ждущую, напои́т на́с щедро́тами человеколю́бия Своего́; да ве́ре, долготерпе́нию и милосе́рдию твоему́ подража́юще, во благоче́стии и чистоте́ поживе́м вся́ дни́ живота́ на́шего. Еще́ мо́лим тя́, преблаже́нне, егда́ приспе́ет жития́ на́шего отше́ствие, к покая́нию нелицеме́рному на́с подви́гни, да Христу́ Спаси́телю на́шему чрез святы́я Его́ Та́инства приобщи́мся и насле́дники Ца́рствия Небе́снаго бу́дем, иде́же в ра́дости святы́х и А́нгелов сподо́бимся и мы́ покланя́тися и воспева́ти Трисвято́е И́мя: Отца́, и Сы́на, и Свята́го Ду́ха, во ве́ки веко́в. Ами́нь!

Yandex Metrika