Конда́к 1.

Избра́нный чудотво́рче и преди́вный уго́дниче Христо́в, преподо́бне о́тче Анто́ние, любо́вию восхваля́юще богоуго́дное житие́ твое́, благодаре́ния пе́снь о тебе́ Бо́гу прино́сим. Ты́ же, я́ко име́яй ве́лие дерзнове́ние ко Го́споду, от вся́ких на́с бе́д свободи́, да с ра́достию зове́м ти́:

Ра́дуйся, преподо́бне о́тче Анто́ние, пусты́ннаго жития́ нача́льниче.

И́кос 1.

А́нгельское житие́ от ю́ности возлюби́вши, в за́поведех Бо́жиих ходи́ти вожделе́л еси́, преподо́бне о́тче, и се́рдцем пламене́я ко Го́споду си́л, у́м на Боже́ственная возве́л еси́, вре́менная и земна́я во уме́ты вменя́я. Те́мже, промышле́нию Бо́жию о тебе́ дивя́щеся, с ве́рою зове́м ти́:

Ра́дуйся, благочести́вых роди́телей сы́не досто́йный; ра́дуйся, во благоче́стии и́ми воспита́нный.

Ра́дуйся, от ю́ности за Христо́м после́довавый; ра́дуйся, суету́ земну́ю ни во что́же вмени́вый.

Ра́дуйся, вертогра́да Христо́ва де́лателю усе́рдный; ра́дуйся, пустынножи́телей наста́вниче вели́кий.

Ра́дуйся, спасе́ния все́м жела́вый; ра́дуйся, пу́ть и́стиннаго мона́шества показа́вый.

Ра́дуйся, свети́льниче, огне́м Боже́ственным возжже́нный; ра́дуйся, ка́меню ве́ры во Христа́ несокруше́нный.

Ра́дуйся, благода́тию Ду́ха Свята́го осия́нный; ра́дуйся, да́ром чудотворе́ний облагода́тствованный.

Ра́дуйся, преподо́бне о́тче Анто́ние, пусты́ннаго жития́ нача́льниче.

Конда́к 2.

Ви́дя вра́г ро́да челове́ческаго тебе́, богоно́сне о́тче, на высоту́ духо́вную возне́сшагося, восхоте́ погуби́ти тя́, но устыди́ся усе́рдия и смире́ния твоего́, ты́ бо непреста́нно в посте́ и моли́тве подвиза́лся еси́, главу́ неви́димаго зми́я сокруша́я, Бо́гу же со умиле́нием поя́: Аллилу́иа.

И́кос 2.

Разуме́вше се́рдцем и умо́м, я́ко вся́ блага́я ми́ра сего́ скороте́чни и скоропреходя́щия су́ть, в пеще́ре те́мней затвори́л еси́ себе́, стра́сти умерщвля́я и еди́ному Го́сподеви рабо́тая. Сего́ ра́ди, похваля́я равноа́нгельное житие́ твое́, вопие́м ти́:

Ра́дуйся, упова́ние свое́ на Бо́га возложи́вый; ра́дуйся, врага́ безу́мие посрами́вый.

Ра́дуйся, неустраши́мый разруши́телю ко́зней диа́вольских; ра́дуйся, чистото́ю и святы́нею А́нгелом уподо́бивыйся.

Ра́дуйся, пусты́ню по́двиги твои́ми освяти́вый; ра́дуйся, мно́гия в Ца́рствие Небе́сное упра́вивый.

Ра́дуйся, презре́нную го́рдость низлага́яй; ра́дуйся, смиренному́дрию науча́яй.

Ра́дуйся, све́те, все́х богому́дрием просвеща́яй; ра́дуйся, лучеза́рная звездо́, сия́нием по́двигов твои́х все́х озаря́яй.

Ра́дуйся, во сла́ву Бо́жию пожи́вый; ра́дуйся, па́стырю до́брый и долготерпели́вый.

Ра́дуйся, преподо́бне о́тче Анто́ние, пусты́ннаго жития́ нача́льниче.

Конда́к 3.

Си́ла Вы́шняго укрепля́ше тя́, Анто́ние преблаже́нне, ты́ бо в посте́, моли́тве, неуста́нных труде́х и бде́ниих пребыва́я и вся́кия вра́жия искуше́ния побежда́я, воспева́л еси́ благода́тию покрыва́вшему тя́ Бо́гу: Аллилу́иа.

И́кос 3.

Име́я по́мысл чи́ст и ду́шу непоро́чну, блаже́нне о́тче, уразуме́л еси́ ми́ра сего́ суету́ и непостоя́нство, и ве́чных бла́г вожделе́в, бла́г вре́менных отре́клся еси́. Те́мже, ублажа́юще тя́, вопие́м:

Ра́дуйся, смире́ния блага́го ревни́телю; ра́дуйся, му́дрости духо́вныя иска́телю.

Ра́дуйся, на высоту́ безстра́стия возше́дый; ра́дуйся, всего́ себе́ Бо́гу преда́вый.

Ра́дуйся, Го́споду твоему́ незло́бием уподо́бивыйся; ра́дуйся, нището́ю твое́ю бога́т бы́вый.

Ра́дуйся, пусты́ни благода́тное украше́ние; ра́дуйся, ми́рови свети́льниче пресве́тлый.

Ра́дуйся, бесо́в стра́шный прогони́телю; ра́дуйся, пре́лести и́х потреби́телю.

Ра́дуйся, па́че мудрецо́в ми́ра сего́ мудре́йший; ра́дуйся, подви́жниче всеусе́рднейший.

Ра́дуйся, преподо́бне о́тче Анто́ние, пусты́ннаго жития́ нача́льниче.

Конда́к 4.

Бу́рю злы́х напа́стей утиша́я, в пусты́ню всели́лся еси́, Анто́ние преблаже́нне, в не́йже многоско́рбный пу́ть и́ноческаго жития́ проше́л еси́, вся́ ко́зни вра́жеския попира́я и прельще́ния его́ отсека́я, укрепля́ющему тя́ Христу́ поя́: Аллилу́иа.

И́кос 4.

Слы́шавше о богоуго́дном житии́ твое́м, преподо́бне, прихожда́ху к тебе́ от все́х конце́в и́щущии пра́вды Бо́жия, и́хже ты́ с любо́вию прие́мля, ко спасе́нию руково́дствовал еси́. Мы́ же, умиле́нною душе́ю восхваля́я тя́, вопие́м си́це:

Ра́дуйся, пустынножи́телей пра́вило и основа́ние; ра́дуйся, до́брый ста́да Христо́ва наста́вниче.

Ра́дуйся, Це́ркви Христо́вы украше́ние; ра́дуйся, мона́шествующих сла́во.

Ра́дуйся, всего́ себе́ в же́ртву Го́сподеви принесы́й; ра́дуйся, стра́сти грехо́вныя в себе́ умертви́вый.

Ра́дуйся, А́нгелов весе́лие; ра́дуйся, де́монов всегуби́тельное попра́ние.

Ра́дуйся, пусты́нный жи́телю; ра́дуйся, безмо́лвия рачи́телю.

Ра́дуйся, на пу́ть пра́вый наставля́яй; ра́дуйся, Ца́рствие Небе́сное возвеща́яй.

Ра́дуйся, преподо́бне о́тче Анто́ние, пусты́ннаго жития́ нача́льниче.

Конда́к 5.

Боготе́чная звезда́ чи́ну и́ноческому яви́лся еси́, преподо́бне о́тче Анто́ние, о́браз бы́в сло́вом, житие́м, любо́вию, ве́рою, чистото́ю, воспева́я Го́споду: Аллилу́иа.

И́кос 5.

Ви́дя вра́г ро́да челове́ческаго чи́стое и свято́е житие́ твое́, о́тче Анто́ние, мно́гажды ополча́шеся на тя́: ты́ же смире́нием свои́м его́ побежда́я, от пути́ спаси́тельнаго не уклони́лся еси́. Мы́ же, ве́дуще сие́, пое́м ти́:

Ра́дуйся, ве́чныя жи́зни прича́стниче; ра́дуйся, спасе́ния вели́кий наста́вниче.

Ра́дуйся, житие́м твои́м еди́ному Бо́гу послужи́вый; ра́дуйся, и́го Христо́во восприя́вый.

Ра́дуйся, кова́рство лука́вых де́монов облича́яй; ра́дуйся, на пу́ть спасе́ния наставля́яй.

Ра́дуйся, чистоты́ храни́телю; ра́дуйся, Тро́ическаго све́та зри́телю.

Ра́дуйся, па́дших воста́ние; ра́дуйся, бесо́вския си́лы прогна́ние.

Ра́дуйся, сто́лпе ве́ры утвержде́нный; ра́дуйся, учи́телю соверше́нный.

Ра́дуйся, преподо́бне о́тче Анто́ние, пусты́ннаго жития́ нача́льниче.

Конда́к 6.

Про́поведи Ева́нгельския послу́шав: «А́ще хо́щеши соверше́н бы́ти, иди́, прода́ждь име́ние твое́, и да́ждь ни́щим, и име́ти и́маши сокро́вище на небеси́; и гряди́ в сле́д Мене́», отреши́л еси́ себе́, о́тче Анто́ние, от бога́тств земны́х и, всели́вся в пусты́ню, житие́ по́стническое пожи́л еси́, по́двиги твои́ми сокро́вище себе́ на небеси́ стяжава́я. Вразуми́ и на́с, о́тче благосе́рдый, к скороги́бнущим веще́м земны́м се́рдцем не прилепля́тися, а па́че о го́рних помышля́ти, вопия́ Го́споду си́л: Аллилу́иа.

И́кос 6.

Возсия́л еси́, я́ко богосве́тлое свети́ло, в пусты́ни Еги́петстей, о́тче Анто́ние, озаря́я все́х луча́ми доброде́телей и чуде́с твои́х. Мы́ же, помина́я по́двиги твоя́, ублажа́ем тя́, глаго́люще:

Ра́дуйся, и́мже венча́ются преподо́бнии; ра́дуйся, и́мже спаса́ются челове́цы.

Ра́дуйся, благода́тное боля́щих посеще́ние; ра́дуйся, лю́те стра́ждущих помо́щниче.

Ра́дуйся, вражды́ разруши́телю; ра́дуйся, враго́в истреби́телю.

Ра́дуйся, ве́рным ми́р и утвержде́ние; ра́дуйся, ско́рое от бе́д избавле́ние.

Ра́дуйся, зло́бы и кова́рства губи́телю; ра́дуйся, отча́янных посети́телю.

Ра́дуйся, правосла́вным побо́рниче; ра́дуйся, христиа́ном помо́щниче.

Ра́дуйся, преподо́бне о́тче Анто́ние, пусты́ннаго жития́ нача́льниче.

Конда́к 7.

Хотя́й досто́йне по́двигом до́брым подвиза́тися, вся́ вре́менная во уме́ты вмени́л еси́, и ни́щ и убо́г пребыва́я, в пусты́ню всели́лся еси́, да с еди́ным Бо́гом бесе́дуеши, непреста́нно поя́ Ему́: Аллилу́иа.

И́кос 7.

Но́ваго вои́стину наста́вника мона́хов яви́ тя́ Госпо́дь, о́тче Анто́ние: мно́зи бо позна́вше богоуго́дное и пра́ведное житие́ твое́, и высо́кую му́дрость духо́вную уразуме́вше, послу́шаху слове́с твои́х, я́ко слове́с вели́каго уго́дника Бо́жия, ему́же досто́ит пе́ти такова́я:

Ра́дуйся, ве́ре Авраа́ма подража́вый; ра́дуйся, кро́тостию Дави́ду уподо́бивыйся.

Ра́дуйся, ре́вность Илиину́ стяжа́вый; ра́дуйся, стезя́ми Крести́теля после́довавый.

Ра́дуйся, во́ду в пусты́ни моли́твою источи́вый; ра́дуйся, разсла́бленныя от одра́ боле́зни воздви́гнувый.

Ра́дуйся, слепы́м прозре́ние дарова́вый; ра́дуйся, мно́гия боля́щия исцели́вый.

Ра́дуйся, наста́вниче мона́хов преди́вный и богому́дрый; ра́дуйся, Христа́ Бо́га служи́телю усе́рдный.

Ра́дуйся, прети́хое ско́рбных утеше́ние; ра́дуйся, прелюби́мое и́ноков похвале́ние.

Ра́дуйся, преподо́бне о́тче Анто́ние, пусты́ннаго жития́ нача́льниче.

Конда́к 8.

Стра́нное и пачеесте́ственное житие́ преподо́бнаго Па́вла ви́дев, блаже́нне Анто́ние, диви́лся еси́ высоте́ по́двигов и доброде́телей его́. Ду́шу же его́, А́нгелы окружа́ему, на небеса́ восходя́щую узре́вши, Бо́гу, ди́вному во святы́х Свои́х, возгласи́л еси́: Аллилу́иа.

И́кос 8.

Ра́достию ве́лиею возра́довался еси́, о́тче Анто́ние, ви́дяще восхожде́ние на не́бо души́ преподо́бнаго Аммо́ния, его́же прозорли́выма очи́ма зре́л еси́. Сего́ ра́ди со мно́гим удивле́нием взыва́ем ти́ си́це:

Ра́дуйся, очеса́ своя́ вы́ну на не́бо возводи́вый; ра́дуйся, сла́ву небе́сную па́че всего́ возлюби́вый.

Ра́дуйся, непреста́нными моли́твами се́рдце свое́ освяти́вый; ра́дуйся, мы́сль твою́ в Бо́зе утверди́вый.

Ра́дуйся, гряду́щая я́ко настоя́щая прови́девый; ра́дуйся, смире́нием твои́м высо́кая дарова́ния стяжа́вый.

Ра́дуйся, стужа́емыя от злы́х духо́в свободи́телю; ра́дуйся, душе́внаго и теле́снаго здра́вия пода́телю.

Ра́дуйся, в ну́ждах и беда́х пресла́вный засту́пниче; ра́дуйся, в напа́стех и ско́рбех ско́рый защи́тниче.

Ра́дуйся, я́ко на́с, на земли́ су́щих, не оставля́еши; ра́дуйся, я́ко о на́с, гре́шных, мольбы́ Бо́гу прино́сиши.

Ра́дуйся, преподо́бне о́тче Анто́ние, пусты́ннаго жития́ нача́льниче.

Конда́к 9.

Вся́кое естество́ а́нгельское удиви́ся высоте́ по́двигов твои́х, преподо́бне, я́ко в немощне́й челове́честей пло́ти сы́й, по всему́ уподо́бился еси́ А́нгелом и, си́лою Вы́шняго укрепля́емь, во вся́ких доброде́телех дово́льне изоби́ловал еси́. Сего́ ра́ди а́нгельским чино́м причте́н, пое́ши Всеси́льному Бо́гу: Аллилу́иа.

И́кос 9.

Вети́йство челове́ческое не довле́ет к досто́йному прославле́нию жития́ твоего́, о́тче Анто́ние: кто́ бо испове́сть вся́ поще́ния и бде́ния, боле́зни и труды́ твоя́? Кто́ изочте́т сле́зы и воздыха́ния твоя́ я́же к Бо́гу? Оба́че мы́, любо́вию к тебе́ подвиза́еми, дерза́ем воспева́ти си́це:

Ра́дуйся, вели́кий пустынножи́телю; ра́дуйся, соверше́нства учи́телю.

Ра́дуйся, и́стиннаго Бо́га служи́телю; ра́дуйся, бесо́в из пусты́ни прогони́телю.

Ра́дуйся, гро́ме, диа́вола поража́яй; ра́дуйся, кова́рство его́ изоблича́яй.

Ра́дуйся, благода́ти Бо́жия вмести́лище; ра́дуйся, Ду́ха Свята́го обита́лище.

Ра́дуйся, по́стников украше́ние; ра́дуйся преподо́бных похвало́.

Ра́дуйся, мона́хов основа́ние; ра́дуйся, отце́в сла́во.

Ра́дуйся, преподо́бне о́тче Анто́ние, пусты́ннаго жития́ нача́льниче.

Конда́к 10.

Спасти́ся хотя́щим ве́рный наста́вник бы́л еси́, преподо́бне, и ны́не на́м, гре́шным, спасе́ния жела́ющим, помози́ святы́ми твои́ми моли́твами, да тобо́ю вспомоществу́еми, дости́гнем Ца́рствия Небе́снаго, иде́же А́нгели немо́лчно пою́т: Аллилу́иа.

И́кос 10.

Стена́ кре́пкая и необори́мая бы́л еси́ свои́м ученико́м, сохраня́я и́х от стреля́ний бесо́вских, и ны́не на́м бу́ди стена́ и покро́в от все́х ко́зней диа́вольских вопию́щих ти́ такова́я:

Ра́дуйся, а́нгеле земны́й; ра́дуйся, челове́че небе́сный.

Ра́дуйся, святы́ни чи́стое и честно́е жили́ще; ра́дуйся, вели́ких доброде́телей вмести́лище.

Ра́дуйся, благоче́стия ревни́телю; ра́дуйся, ересе́й обличи́телю.

Ра́дуйся, любве́ Христо́вы исполне́ние; ра́дуйся, и́ноков науче́ние.

Ра́дуйся, тве́рдое ве́рных прибе́жище; ра́дуйся, кре́пкое па́дающих возведе́ние.

Ра́дуйся, укрепле́ние немощны́х и разсла́бленных; ра́дуйся, утеше́ние уныва́ющих и безнаде́жных.

Ра́дуйся, преподо́бне о́тче Анто́ние, пусты́ннаго жития́ нача́льниче.

Конда́к 11.

Пе́ние умиле́нное, от любви́ и усе́рдия в похвалу́ тебе́ от на́с возноси́мое, приими́, благоутро́бне о́тче Анто́ние, приклони́ся к на́м ми́лостиво и в покая́нии преуспе́ти сподо́би, да моли́твами твои́ми вы́ну пое́м Бо́гу: Аллилу́иа.

И́кос 11.

Светоприе́мный свети́льник и́стиннаго Све́та су́щим на земли́ яви́лся еси́, преподо́бне Анто́ние, просвеща́еши бо сердца́ ве́рных по́двиги твои́ми и чудесы́, наставля́я на пу́ть доброде́тельнаго и богоуго́днаго жития́. Те́мже слы́шиши от все́х такова́я:

Ра́дуйся, наста́вниче прему́дрый; ра́дуйся, вождю́ благонаде́жный.

Ра́дуйся, всего́ себе́ во́ле Бо́жией преда́вый; ра́дуйся, Го́спода Иису́са па́че всего́ возлюби́вый.

Ра́дуйся, терпе́нием скорбе́й многоразли́чных просия́вый; ра́дуйся, во́льною нището́ю ве́чное бога́тство стяжа́вый.

Ра́дуйся, в терпе́нии и злострада́нии житие́ твое́ проводи́вый; ра́дуйся, пусты́нное озлобле́ние му́жески терпе́вый.

Ра́дуйся, лени́вых к по́двигом возбуди́телю; ра́дуйся, исправле́ния гре́шников поручи́телю.

Ра́дуйся, А́нгелов и все́х святы́х собесе́дниче; ра́дуйся, о все́м ми́ре усе́рдный моли́твенниче.

Ра́дуйся, преподо́бне о́тче Анто́ние, пусты́ннаго жития́ нача́льниче.

Конда́к 12.

Благода́ть да́нную Ти́ от Бо́га ве́дуще, благогове́йно лобыза́ем святоле́пное изображе́ние ли́ка твоего́, уго́дниче Бо́жий, и мо́лимся: не оста́ви на́с твои́м моли́твенным предста́тельством ко Христу́ Бо́гу, Ему́же благода́рно пое́м: Аллилу́иа.

И́кос 12.

Пою́ще твое́ житие́, восхваля́ем ми́рную кончи́ну твою́, преподо́бне о́тче Анто́ние, и мо́лим ти ся: бу́ди на́м во все́м ко бла́гу ско́рый помо́щник, зову́щим ти́ такова́я:

Ра́дуйся, небе́сный жи́телю; ра́дуйся, Тро́ицы Единосу́щныя предстоя́телю.

Ра́дуйся, А́нгелов весе́лие; ра́дуйся, святы́х собесе́дниче.

Ра́дуйся, и́стинный уго́дниче Бо́жий; ра́дуйся, избра́нный слуго́ Госпо́день.

Ра́дуйся, те́плый хода́таю о все́х призыва́ющих и́мя твое́; ра́дуйся, наста́вниче и упова́ние почита́ющих тя́.

Ра́дуйся, благода́тию Бо́жиею насыще́нный; ра́дуйся, от исто́чника Боже́ственнаго напое́нный.

Ра́дуйся, пото́ком сле́з спаси́тельных ороше́нный; ра́дуйся, оде́ждою нетле́ния оде́янный.

Ра́дуйся, преподо́бне о́тче Анто́ние, пусты́ннаго жития́ нача́льниче.

Конда́к 13.

О преподо́бне о́тче на́ш Вели́кий Анто́ние, ве́чно живы́й в невече́рнем дни́ Ца́рствия Христо́ва, умоли́ все́х Влады́ку изба́витися на́м от бе́д, скорбе́й и ве́чнаго муче́ния, да во ве́ки пое́м Ему́ во Ца́рствии Его́: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгельское житие́ от ю́ности возлюби́вши, в за́поведех Бо́жиих ходи́ти вожделе́л еси́, преподо́бне о́тче, и се́рдцем пламене́я ко Го́споду си́л, у́м на Боже́ственная возве́л еси́, вре́менная и земна́я во уме́ты вменя́я. Те́мже, промышле́нию Бо́жию о тебе́ дивя́щеся, с ве́рою зове́м ти́:

Ра́дуйся, благочести́вых роди́телей сы́не досто́йный; ра́дуйся, во благоче́стии и́ми воспита́нный.

Ра́дуйся, от ю́ности за Христо́м после́довавый; ра́дуйся, суету́ земну́ю ни во что́же вмени́вый.

Ра́дуйся, вертогра́да Христо́ва де́лателю усе́рдный; ра́дуйся, пустынножи́телей наста́вниче вели́кий.

Ра́дуйся, спасе́ния все́м жела́вый; ра́дуйся, пу́ть и́стиннаго мона́шества показа́вый.

Ра́дуйся, свети́льниче, огне́м Боже́ственным возжже́нный; ра́дуйся, ка́меню ве́ры во Христа́ несокруше́нный.

Ра́дуйся, благода́тию Ду́ха Свята́го осия́нный; ра́дуйся, да́ром чудотворе́ний облагода́тствованный.

Ра́дуйся, преподо́бне о́тче Анто́ние, пусты́ннаго жития́ нача́льниче.

Конда́к 1.

Избра́нный чудотво́рче и преди́вный уго́дниче Христо́в, преподо́бне о́тче Анто́ние, любо́вию восхваля́юще богоуго́дное житие́ твое́, благодаре́ния пе́снь о тебе́ Бо́гу прино́сим. Ты́ же, я́ко име́яй ве́лие дерзнове́ние ко Го́споду, от вся́ких на́с бе́д свободи́, да с ра́достию зове́м ти́:

Ра́дуйся, преподо́бне о́тче Анто́ние, пусты́ннаго жития́ нача́льниче.

Моли́тва.

О преподо́бне и богоно́сне о́тче на́ш Анто́ние! Ве́руем, я́ко ты́, предстоя́ престо́лу Пресвяты́я Тро́ицы, ве́лие и́маши дерзнове́ние в моли́твах ко Всеми́лостивому Го́споду Бо́гу, И́же всегда́ послу́шает тебе́, ве́рнаго раба́ и уго́дника Своего́. Сего́ ра́ди со умиле́нием смире́нно припа́даем к тебе́, свя́тче Бо́жий: не премолчи́ о на́с моли́тися ко Го́споду Бо́гу, в Тро́ице покланя́емому и сла́вимому, да, ми́лостивно призре́в на ны́, не попу́стит на́м поги́бнути во гресе́х на́ших, но да возста́вит па́дших, да пода́ст исправле́ние зло́му и окая́нному на́шему житию́, от гряду́щих грехопаде́ний восхища́я, и да прости́т на́м вся́, ели́ка согреши́хом мы́слию, сло́вом и де́лом, от рожде́ния до сего́ часа́. Ты́, подви́жниче доброде́тели, ве́си не́мощь и ско́рбь време́н настоя́щих, моли́ у́бо вы́ну Христа́ Бо́га, да николи́же на́с оставля́ет Его́ неизрече́нное милосе́рдие, но да храни́т на́с от мирски́х искуше́ний, от диа́вольских сете́й и от плотски́х по́хотей, да прии́мем от Него́ тобо́ю и вся́ потре́бная к жи́зни вре́менней, освобожде́ние от бе́д и напа́стей, и неосла́бное терпе́ние до конца́. Испроси́ на́м в ми́ре и покая́нии сконча́ти живо́т на́ш и невозбра́нно прейти́ от земли́ на не́бо, мыта́рств же, и бесо́в возду́шных, и ве́чныя му́ки изба́витися, и сподо́битися Ца́рства Небе́снаго с тобо́ю и со все́ми святы́ми, угоди́вшими Го́споду Бо́гу и Спаси́телю на́шему Иису́су Христу́, Ему́же подоба́ет вся́кая сла́ва, че́сть поклоне́ние, со Безнача́льным Его́ Отце́м и с Пресвяты́м и Благи́м и Животворя́щим Его́ Ду́хом, ны́не и при́сно и во ве́ки веко́в. Ами́нь.