Конда́к 1.

Избра́нный Го́сподем си́л и Царе́м Сла́вы, по́двиги свои́ми преди́вный о́браз и́ноческаго жития́ яви́вый и равноа́нгельски на земли́ пожи́вый, преподо́бне о́тче на́ш Фео́доре, приими́ от на́с с любо́вию приноси́мое тебе́ хвале́бное пе́ние. Ты́ же, я́ко име́яй дерзнове́ние ко Го́споду, моли́твами твои́ми от вся́ких на́с бе́д свободи́, да зове́м ти́:

Ра́дуйся, преподо́бне о́тче Фео́доре, пресла́вный уго́дниче Бо́жий и моли́твенниче о душа́х на́ших.

И́кос 1.

А́нгел во пло́ти яви́лся еси́ на земли́, преподо́бне Фео́доре, от ю́ности все́м се́рдцем и душе́ю Го́спода своего́ возлюби́в, равноа́нгельному поревнова́л еси́ житию́ учи́теля твоего́ преподо́бнаго Пахо́миа и, послужи́в Го́сподеви в преподо́бии и пра́вде, непоро́чно житие́ соверши́л еси́ на земли́, ди́вный о́браз соверше́нства духо́внаго на́м оста́вив, да воспева́ем ти́ си́це:

Ра́дуйся, сы́не роди́телей бога́тых и зна́тных, Бога́тство тле́нное ни во что́же вмени́вый; ра́дуйся, мно́гими доброде́тельми укра́шенный, Бога́тство нетле́нное во оби́телех небе́сных стяжа́вый.

Ра́дуйся, за у́м и Благоче́стие ма́терию Бо́лее все́х дете́й люби́мый; ра́дуйся, по́стниче преди́вный, изде́тска пи́щи тле́нныя в ми́ре се́м тле́ннем вкуша́ти не жела́вый.

Ра́дуйся, житие́ и́ноческое от ю́ности своея́ возлюби́вый; ра́дуйся, суету́ мирску́ю и сла́ву вре́менную презре́вый.

Ра́дуйся, преподо́бне о́тче Фео́доре, пресла́вный уго́дниче Бо́жий и моли́твенниче о душа́х на́ших.

Конда́к 2.

Ви́дя, я́ко в ми́ре се́м вся́ческая суета́ и тле́ние, земну́ю красоту́, бога́тство и сла́ву ни во что́же вмени́в, по́двигом поста́ и моли́твы из мла́да предава́лся еси́, и, любве́ ра́ди Христо́вы, роди́телей твои́х и до́м оте́ческий оста́вив и вся́каго пристра́стия су́етнаго свободи́вся, прите́кл еси́ в пусты́нную оби́тель, невозбра́нно воспева́ти спаса́ющему на́с Бо́гу а́нгельскую пе́снь: Аллилу́иа.

И́кос 2.

Ра́зумом Богопросвеще́нным позна́ благопло́дие души́ твоея́ Вели́кий Пахо́мий, егда́ ты́ прише́д во оби́тель Тавеннисску́ю и со слеза́ми припа́дая к стопа́м его́, моли́л еси́ о е́же прия́ти тя́ в число́ бра́тии. Помина́я у́бо ре́вность твою́ к по́двигом духо́вным, ублажа́ем тя́, я́ко избра́нника Бо́жия, и умиле́нно глаго́лем:

Ра́дуйся, и́ноческаго жития́ все́м се́рдцем возжела́вый; ра́дуйся, да́р сле́з от Го́спода стяжа́вый.

Ра́дуйся, во вся́ дни́ посту́, моли́тве и пла́чу предава́выйся; ра́дуйся, о позна́нии Бо́га и во́ли святы́я Его́ ревнова́вый.

Ра́дуйся, сего́ ра́ди ученико́м вели́каго а́ввы Пахо́миа бы́ти возжеле́вый; ра́дуйся, я́ко Госпо́дь жела́ние се́рдца твоего́ благочести́ваго испо́лни.

Ра́дуйся, преподо́бне о́тче Фео́доре, пресла́вный уго́дниче Бо́жий и моли́твенниче о душа́х на́ших.

Конда́к 3.

Си́лою Вы́шняго осене́нный и укрепля́емый, неуста́нно в по́двизех и́ноческих пребыва́л еси́, о́тче Фео́доре, и, сподо́бився дарова́ний духо́вных, де́нь и но́щь воспева́л еси́ Спаси́телю Бо́гу: Аллилу́иа

И́кос 3.

Име́яй ре́вность Боже́ственную о спасе́нии мно́гих, учи́тель тво́й, богому́дрый Пахо́мий, прови́де тя́ бы́ти вели́каго подви́жника и благоиску́снаго споспе́шника хотя́щим спасти́ся. Сего́ ра́ди, посыла́ше к тебе́ мно́гих и́ноков, да наста́виши и́х и уте́шиши. Ты́ же, смиренному́дрия и послуша́ния испо́лнен, не преслу́шав во́ли свята́го наста́вника твоего́, поуча́л и утеша́л еси́ все́х приходя́щих к тебе́. Ны́не же, предстоя́ Престо́лу Бо́жию, Благоспоспе́шествуй моли́твами твои́ми все́м взыва́ющим к тебе́:

Ра́дуйся, Вели́ким Пахо́мием наставля́емый на пу́ть и́ноческаго соверше́нства; ра́дуйся, досто́йно пу́ть се́й соверши́вший и дости́гнувый ра́йскаго Блаже́нства.

Ра́дуйся, велича́йшую ре́вность об угожде́нии Бо́гу прояви́вый; ра́дуйся, ра́ди Го́спода ми́р и вся́ я́же в не́м оста́вивый.

Ра́дуйся, де́вства и целому́дрия усе́рдный храни́телю; ра́дуйся, и́ноческаго жития́ и́стинный люби́телю.

Ра́дуйся, преподо́бне о́тче Фео́доре, пресла́вный уго́дниче Бо́жий и моли́твенниче о душа́х на́ших.

Конда́к 4.

Бу́рю искуше́ний и устремле́ний диа́вольских укроща́я посто́м, бде́нием, смире́нием и моли́твою до конца́ врага́ души́ челове́ческия победи́л еси́, преподо́бне. И, восходя́ по стезя́м доброде́телей к соверше́нству духо́вному, воспева́л еси́ Бо́гу: Аллилу́иа.

И́кос 4.

Слы́шаще и ви́дяще Богоуго́дное и доброде́тельное житие́ твое́, богому́дрый Пахо́мий поста́ви тя́ строи́телем оби́тели Тавеннисийски́я: ты́ же, согрева́я сердца́ и́ноков Боже́ственною любо́вию, за сове́тами к наста́внику своему́ всегда́ прибега́л еси́, от его́же у́ст святы́х мно́го слове́с душеполе́зных слы́ша, и слага́я и́х в се́рдце твое́м, бы́л еси́ до́брый учени́к вели́каго учи́теля, вои́стину досто́йный благохвале́ний таковы́х:

Ра́дуйся, вели́каго Пахо́миа до́блий учениче́; ра́дуйся, неусы́пный к Бо́гу моли́твенниче.

Ра́дуйся, му́дрость духо́вную еще́ в ю́ности твое́й яви́вый; ра́дуйся, стра́х Бо́жий стяжа́вый.

Ра́дуйся, пред Всеви́дящим Бо́гом непреста́нно себе́ представля́вый; ра́дуйся, па́че всего́ согреши́ти пред Го́сподем убоя́выйся.

Ра́дуйся, преподо́бне о́тче Фео́доре, пресла́вный уго́дниче Бо́жий и моли́твенниче о душа́х на́ших.

Конда́к 5.

Боготе́чней звезде́ уподо́бился еси́, всеблаже́нне Фео́доре, сия́я де́лы благи́ми и Богоуго́дными все́м хотя́щим о Го́споде подвиза́тися и спасе́ния ве́чнаго и́щущим: от мра́ка ко грехо́внаго хотя́щим прейти́ к Со́лнцу Пра́вды, я́сно пу́ть показу́еши и науча́еши воспева́ти Бо́гу хвале́бную пе́снь: Аллилу́иа

И́кос 5.

Ви́дим тя́, преподо́бне о́тче Фео́доре, к богоно́сному отцу́ Пахо́мию любо́вь ве́лию о Христе́ стяжа́вшаго, я́ко и пред кончи́ною его́ послужи́л еси́ ему́, моли́тву ку́пно творя́ще. Сего́ ра́ди, ублажа́юще труды́ твоя́, ра́ди спасе́ния бли́жних подъя́тыя, си́це тебе́ зове́м:

Ра́дуйся, послуша́ние ко все́м богоблаже́нному Пахо́мию яви́вый; ра́дуйся, мно́жество плодо́в духо́вных стяжа́вый.

Ра́дуйся, пло́ть свою́ посто́м и воздержа́нием непреста́нно умершля́вый; ра́дуйся, по́двиги своя́ скрыва́вый, да неве́домы бу́дут ми́ру.

Ра́дуйся, я́ко пе́рвым во оби́тели са́на пресви́терскаго удосто́енный; ра́дуйся, да́ры Свята́го Ду́ха в се́рдце свое́ досто́йно восприя́вый.

Ра́дуйся, преподо́бне о́тче Фео́доре, пресла́вный уго́дниче Бо́жий и моли́твенниче о душа́х на́ших.

Конда́к 6.

Пропове́дник смире́ния и́стиннаго, терпе́ния и кро́тости яви́лся еси́, о́тче, егда́ во оби́тели Тавеннисийсте́й подвиза́лся еси́, еди́ному Бо́гу рабо́тая невозбра́нно, житие́м и сло́вом приме́р и́ноческаго жития́ явля́я, и науча́я все́х воспева́ти пе́снь Бо́гу: Аллилу́иа.

И́кос 6.

Возсия́л еси́, я́ко заря́ пресве́тлая, всеблаже́нне о́тче Фео́доре, и на спасе́ния стезю́ наста́вил еси́ мно́гия челове́ки: яви́ бо тя́ Христо́с наста́вника и учи́теля и́ноком, озаря́я и́х луча́ми доброде́телей и чуде́с твои́х. Те́мже вопие́м ти́:

Ра́дуйся, Ева́нгельскаго по Бо́зе жития́ возжела́вый; ра́дуйся, пла́чем о свое́м недосто́инстве смире́ние ве́лие стяжа́вый.

Ра́дуйся, за́поведь ева́нгельскую: и́же лю́бит отца́ или́ ма́терь па́че Мене́, не́сть Мене́ досто́ин, непреста́нно храни́вый; ра́дуйся, сего́ ра́ди от свида́ния с ма́терию свое́ю уклони́выйся.

Ра́дуйся, бра́та своего́ Пафну́тия на пу́ть и́ноческаго жития́ наста́вивый; ра́дуйся, мно́гих от ве́чныя поги́бели изба́вил еси́.

Ра́дуйся, преподо́бне о́тче Фео́доре, пресла́вный уго́дниче Бо́жий и моли́твенниче о душа́х на́ших.

Конда́к 7.

Хотя́ Человеколю́бец Госпо́дь просла́вити тя́, уго́дника Своего́, за свя́тость и чистоту́ жития́ и мно́гия по́двиги духо́вныя, дарова́ ти́ Благода́ть свою́ и да́р чудотворе́ний оби́льный. Ты́ же, врачу́я неду́ги теле́сныя вку́пе же и душе́вныя, воспева́л еси́ во смире́нии Го́сподеви Благода́рственную пе́снь: Аллилу́иа.

И́кос 7.

Но́ваго тя́ и прему́драго наста́вника дарова́ Госпо́дь и́ноком оби́телей Фиваи́дских: ты́ бо, пребыва́я в моли́твах, поще́нии и труде́х непреста́нных, назида́л еси́ все́х му́дростию и любо́вию, наставля́я на пу́ть спасе́ния. Мы́ же пе́сенно тебе́ вопие́м:

Ра́дуйся, му́дрым сло́вом свои́м бра́тию наставля́вый; ра́дуйся, моли́твою твое́ю мно́гих утеша́вый.

Ра́дуйся, пло́ть твою́ всеце́ло ду́хови покори́вый; ра́дуйся, бли́жних свои́х и бра́тию все́м се́рдцем возлюби́вый.

Ра́дуйся, пра́вило ве́ры и благоче́стия; ра́дуйся, о́бразе кро́тости и смире́ния.

Ра́дуйся, преподо́бне о́тче Фео́доре, пресла́вный уго́дниче Бо́жий и моли́твенниче о душа́х на́ших.

Конда́к 8.

Стра́нно и чу́дно бы́сть житие́ твое́, преподо́бне о́тче, мно́гия бо труды́ и по́двиги до́бльственно соверши́л еси́, ше́ствуя по пути́ спасе́ния до масти́тыя ста́рости, облече́н во всеору́жие Бо́жие, во пло́ти, а́ки безпло́тен бы́в, умерщвля́я стра́сти и сокруша́я наве́ты миродержи́теля тьмы́ ве́ка сего́. Те́мже с Небе́сными си́лами ку́пно воспева́еши Бо́гу: Аллилу́иа.

И́кос 8.

Все́м се́рдцем твои́м и все́ю душе́ю твое́ю Го́спода па́че всего́ возлюби́л еси́ и Его́ ра́ди мно́го подвиза́лся еси́, и́ноческую Бра́тию послуша́нию, кро́тости, терпе́нию и непреста́нней моли́тве науча́я, наста́внику же твоему́ в устрое́нии и управле́нии неле́ностно помога́я, все́ упова́ние свое́ на Спа́са Христа́ возлага́л еси́, ча́да твоя́ удивля́я си́лою ве́ры твоея́, и подвиза́я взыва́ти тебе́:

Ра́дуйся, воздержа́нию бра́тию науча́вый; ра́дуйся, и са́м непреста́нно в воздержа́нии и посте́ пребыва́вый.

Ра́дуйся, о́браз самоотверже́ния и Благоче́стия все́м показа́вый; ра́дуйся, я́ко да́р сло́ва от Го́спода прия́вый.

Ра́дуйся, го́рдость вся́ческую низложи́вый; ра́дуйся, любо́вию свое́ю за́висть и не́нависть попра́вый.

Ра́дуйся, преподо́бне о́тче Фео́доре, пресла́вный уго́дниче Бо́жий и моли́твенниче о душа́х на́ших.

Конда́к 9.

Ве́сь от ю́ности Го́сподеви преда́лся еси́, преподо́бне Фео́доре, и к Нему́ доброде́тельми мно́гими прибли́зился еси́, тле́нная бо, я́же на земли́, оста́вив, нетле́нное бога́тство обре́л еси́; кончи́ною же преподо́бною разреши́вся от соу́за плотска́го, ны́не во оби́телех небе́сных пребыва́еши со А́нгелы святы́ми и все́ми пра́ведниками, ку́пно с ни́ми ликовству́я и поя́ Бо́гу: Аллилу́иа.

И́кос 9.

Вети́и земноро́днии не возмо́гут по достоя́нию восхвали́ти досточу́дное житие́ твое́, преподо́бне о́тче, по́двиги же и доброде́тели, и́миже житие́ твое́, я́ко цвета́ми благоукраша́ется и духо́вно благоуха́ет. От ра́нния бо ю́ности твоея́ и до ста́рости масти́тыя неосла́бно Бо́гу благоугожда́л еси́ и во́лю Его́ святу́ю при́сно твори́л еси́, чесо́ ра́ди кончи́ну пра́ведную, я́ко вене́ц по́двигом твои́м, от Го́спода восприя́л еси́ и в Го́рния ски́нии всели́лся еси́. Мы́ же таковы́м дивя́щеся, прино́сим ти́ хвале́ния сицева́я:

Ра́дуйся, высоты́ духо́вныя дости́гнувый; ра́дуйся, от сло́ва Бо́жия сла́дость ве́лию в душе́ свое́й име́вый.

Ра́дуйся, словесе́м си́м спаси́тельным и ины́я и́ноки поуча́вый; ра́дуйся, по́двиги вели́каго ста́рца Пахо́миа в се́рдце свое́м слага́вый.

Ра́дуйся, чистоту́ се́рдца и му́дрость духо́вную стяжа́вый; ра́дуйся, ду́ши бли́жних и бра́тий твои́х врачева́вый.

Ра́дуйся, преподо́бне о́тче Фео́доре, пресла́вный уго́дниче Бо́жий и моли́твенниче о душа́х на́ших.

Конда́к 10.

Спасти́ хотя́ ду́ши учени́к твои́х, оте́чески назида́л еси́ и́х, богому́дре, о́ваго му́дрым сло́вом, о́ваго приме́ром жития́ твоего́, ины́х же с кро́тостию облича́я, с любо́вию увещава́л еси́ преуспева́ти в Благоче́стии и чистоте́ и науча́л еси́ и́х в моли́твах бо́дрствовати и немо́лчно пе́ти Бо́гу: Аллилу́иа.

И́кос 10.

Стена́ еси́ и тве́рдое заступле́ние все́м с моли́твою притека́ющим к тебе́, богому́дре Фео́доре, и́бо чистоты́ ра́ди твоея́ серде́чныя си́ла духо́вная от Бо́га тебе́ дарова́ся: боля́щих исцеля́ти и бе́дствующим помога́ти. Не пре́зри у́бо и на́ша моле́ния, с любо́вию к тебе́ возноси́мыя, и предста́тельством твои́м испроси́ у Христа́ Бо́га все́м по коего́ждо потре́бе дарова́ти, да вопие́м тебе́ умиле́нными гла́сы:

Ра́дуйся, но́щи в бде́нии и моли́тве проводи́вый; ра́дуйся, житие́м и сло́вом о́браз все́м и́ноком бы́вый.

Ра́дуйся, да́р чудотворе́ний оби́льный от Го́спода получи́вый; ра́дуйся, словесы́ твои́ми непослу́шных кро́тко облича́вый.

Ра́дуйся, на пу́ть покая́ния и исправле́ния и́х наставля́вый; ра́дуйся, о ста́де твое́м непреста́нно попече́ние име́вый.

Ра́дуйся, преподо́бне о́тче Фео́доре, пресла́вный уго́дниче Бо́жий и моли́твенниче о душа́х на́ших.

Конда́к 11.

Пе́ние на́ше моле́бное ми́лостиво приими́, уго́дниче Бо́жий, преподо́бне о́тче Фео́доре, щедро́ты твоя́ целе́бныя и лучи́ мно́гих чуде́с ниспосли́ на́м, озаря́я ду́ши и сердца́ и́щущих с ве́рою твоего́ заступле́ния, его́же сподо́би и на́с, сия́ пе́сненныя хвалы́ тебе́ вознося́щих, и Бо́гу благода́рно зову́щих: Аллилу́иа.

И́кос 11.

Светоза́рное свети́ло Це́ркви свое́й яви́ тя́ Со́лнце Пра́вды Христо́с Госпо́дь, преподо́бне о́тче Фео́доре, невеще́ственным све́том благода́ти Боже́ственныя сия́юща и мглу́ неве́дения на́шего озаря́юща. Те́мже мо́лим тя́: просвети́ и на́ша ду́ши, омраче́нныя грехо́вными страстьми́, све́том Христо́вым и моли́твами твои́ми помози́ на́м тьмы́ грехо́вныя избежа́ти и лучи́ благода́ти Бо́жия в сердца́ на́ша прия́ти и неосужде́нно воспева́ти тебе́:

Ра́дуйся, я́ко от ю́ности твоея́ еди́наго Христа́ возлюби́л еси́; ра́дуйся, и́стинным ученико́м и помо́щником свята́го Пахо́миа яви́выйся.

Ра́дуйся, боле́зни и ско́рби безро́потно претерпе́вый; ра́дуйся, в по́двигах и́ноческих неле́ностно подвиза́выйся.

Ра́дуйся, му́дрым руководи́телем на пути́ ко спасе́нию и́ноком бы́вый; ра́дуйся, пу́ть к Ца́рствию Небе́сному мно́гим откры́вый.

Ра́дуйся, преподо́бне о́тче Фео́доре, пресла́вный уго́дниче Бо́жий и моли́твенниче о душа́х на́ших.

Конда́к 12.

Благода́тию да́нною ти́ от Бо́га, все́м чту́щих святу́ю па́мять твою́ и моли́твенно тя́ призыва́ющих от бе́д избавля́еши, неду́ги исцеля́еши, ко спасе́нию руково́дствуеши и науча́еши со умиле́нием и благодаре́нием взыва́ти Бо́гу: Аллилу́иа

И́кос 12.

Пою́ще твое́ к Бо́гу отше́ствие, преподо́бне Фео́доре, почита́ем святу́ю па́мять твою́, велича́ем по́двиги и труды́ твоя́, хва́лим твое́ долготерпе́ние и смиренному́дрие, сла́вим незло́бие твое́, ублажа́ем пра́ведную кончи́ну твою́, и моля́щеся усе́рдно, о е́же сподо́битися и на́м неосужде́нно предста́ти Стра́шному Суди́щу Христо́ву, взыва́ем ти́:

Ра́дуйся, по́стников похвало́ и мона́шествующих благоле́пие; ра́дуйся, сокро́вищнице даро́в многоразли́чных.

Ра́дуйся, Небе́снаго Сио́на жи́телю; ра́дуйся, А́нгелов сослужи́телю.

Ра́дуйся, нерукотворе́нных черто́гов ра́йских обита́телю; ра́дуйся, о душа́х на́ших благоприя́тный предста́телю.

Ра́дуйся, преподо́бне о́тче Фео́доре, пресла́вный уго́дниче Бо́жий и моли́твенниче о душа́х на́ших.

Конда́к 13.

О, пресла́вный и преди́вный о́тче Фео́доре, приими́ благоутро́бно сие́ ма́лое моле́ние на́ше, и твои́м си́льным и благоприя́тным хода́тайством испроси́ на́м у Христа́ Бо́га утвержде́ние в ве́ре и братолю́бии, сохрани́ на́с от неду́гов душе́вных и теле́сных, от все́х вра́г ви́димых и неви́димых, от вся́кия напа́сти и ско́рби, от внеза́пныя сме́рти и от гряду́щих муче́ний ве́чных изба́ви на́с, да сподо́бимся с тобо́ю и со все́ми святы́ми во ве́ки воспева́ти Бо́гу Спаси́телю на́шему Благода́рственную пе́снь: Аллилу́иа

Этот конда́к читается трижды, затем и́кос 1-й и конда́к 1-й.

И́кос 1.

А́нгел во пло́ти яви́лся еси́ на земли́, преподо́бне Фео́доре, от ю́ности все́м се́рдцем и душе́ю Го́спода своего́ возлюби́в, равноа́нгельному поревнова́л еси́ житию́ учи́теля твоего́ преподо́бнаго Пахо́миа и, послужи́в Го́сподеви в преподо́бии и пра́вде, непоро́чно житие́ соверши́л еси́ на земли́, ди́вный о́браз соверше́нства духо́внаго на́м оста́вив, да воспева́ем ти́ си́це:

Ра́дуйся, сы́не роди́телей бога́тых и зна́тных, Бога́тство тле́нное ни во что́же вмени́вый; ра́дуйся, мно́гими доброде́тельми укра́шенный, Бога́тство нетле́нное во оби́телех небе́сных стяжа́вый.

Ра́дуйся, за у́м и Благоче́стие ма́терию Бо́лее все́х дете́й люби́мый; ра́дуйся, по́стниче преди́вный, изде́тска пи́щи тле́нныя в ми́ре се́м тле́ннем вкуша́ти не жела́вый.

Ра́дуйся, житие́ и́ноческое от ю́ности своея́ возлюби́вый; ра́дуйся, суету́ мирску́ю и сла́ву вре́менную презре́вый.

Ра́дуйся, преподо́бне о́тче Фео́доре, пресла́вный уго́дниче Бо́жий и моли́твенниче о душа́х на́ших.

Конда́к 1.

Избра́нный Го́сподем си́л и Царе́м Сла́вы, по́двиги свои́ми преди́вный о́браз и́ноческаго жития́ яви́вый и равноа́нгельски на земли́ пожи́вый, преподо́бне о́тче на́ш Фео́доре, приими́ от на́с с любо́вию приноси́мое тебе́ хвале́бное пе́ние. Ты́ же, я́ко име́яй дерзнове́ние ко Го́споду, моли́твами твои́ми от вся́ких на́с бе́д свободи́, да зове́м ти́:

Ра́дуйся, преподо́бне о́тче Фео́доре, пресла́вный уго́дниче Бо́жий и моли́твенниче о душа́х на́ших.

Моли́тва.

О свяще́нная главо́, преподо́бне о́тче, преблаже́нне а́вво Фео́доре, не забу́ди убо́гих твои́х до конца́, но помина́й на́с всегда́ во святы́х и благоприя́тных моли́твах к Бо́гу: помяни́ ста́до твое́, е́же са́м упа́сл еси́, и не забу́ди посеща́ти ча́д твои́х моли́ за ны́, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны́ ко Го́споду, и не пре́зри на́с, ве́рою и любо́вию чту́щих тя́: помина́й на́с недосто́йных у Престо́ла Вседержи́телева, и не преста́й моля́ся о на́с ко Христу́ Бо́гу, и́бо дана́ тебе́ бы́сть благода́ть за ны́ моли́тися. Не мни́м бо тя́ су́ща ме́ртва: а́ще бо те́лом и преста́вился еси́ от на́с, но и по сме́рти жи́в сы́й пребыва́еши, не отступа́й от на́с ду́хом, сохраня́я на́с от стре́л вра́жиих и вся́кия пре́лести бесо́вския и ко́зней диа́вольских, па́стырю на́ш до́брый. А́ще бо и моще́й твои́х ра́ка пред очи́ма на́шима ви́дима е́сть всегда́, но свята́я твоя́ душа́ со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя́ вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о на́с Всеси́льному Бо́гу, о по́льзе ду́ш на́ших, и испроси́ на́м вре́мя на покая́ние, да невозбра́нно пре́йдем от земли́ на не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, че́сть и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.