Конда́к 1.

Избра́нный чудотво́рче и преди́вный уго́дниче Христо́в, и́ночествующих му́дрый наста́вниче и покрови́телю, преблаже́нне о́тче Феодо́сие, я́ко име́яй ве́лие дерзнове́ние ко Го́споду, от вся́ких на́с бе́д свободи́, да с ра́достию зове́м ти́:

Ра́дуйся, преподо́бне о́тче Феодо́сие, общежи́тельнаго мона́шескаго жития́ устрои́телю.

И́кос 1.

А́нгельский о́браз жития́ от ю́ности возлюби́вый, я́ко безпло́тен во пло́ти пожи́л еси́, преподо́бне Феодо́сие, вся́ вре́менная и земна́я во уме́ты вменя́я. Сего́ ра́ди, я́ко а́нгела земна́го и челове́ка небе́снаго и́стинно тя́ почита́юще, со умиле́нием вопие́м ти́:

Ра́дуйся, Каппадоки́и свято́е прозябе́ние; ра́дуйся, благочести́вых роди́телей благослове́нный пло́де.

Ра́дуйся, в ве́ре и благоче́стии воспита́нный; ра́дуйся, благода́тию Бо́жиею приосене́нный.

Ра́дуйся, Ева́нгелия Христо́ва усе́рдный после́дователю; ра́дуйся, за́поведей Госпо́дних ве́рный испо́лнителю.

Ра́дуйся, преподо́бне о́тче Феодо́сие, общежи́тельнаго мона́шескаго жития́ устрои́телю.

Конда́к 2.

Ви́дев на тебе́ сугу́бую благода́ть, о́тче Феодо́сие, прозорли́вый уго́дник Бо́жий преподо́бный Симео́н благослови́в тя́, предрече́, я́ко мно́го подвиза́тися бу́деши в привре́меннем се́м житии́, Го́спода ра́ди. Мы́ же, ве́дяще, я́ко ты́ вои́стину ре́вностный служи́тель Бо́гу и бра́тии яви́лся еси́, в моли́твах, поще́ниих и бде́ниих о́браз бы́в твои́м ученико́м, воспева́ем Бо́гу: Аллилу́иа.

И́кос 2.

Ра́зум несумне́нный име́л еси́ в себе́, о́тче Феодо́сие, егда́ сла́ву ми́ра сего́ презре́в, и́ноческим подвиго́м всеце́ло преда́лся еси́, стра́сти грехо́вныя в себе́ умерщвля́я и непреста́нными к Бо́гу моли́твами ду́шу свою́ насыща́я. Те́мже, усе́рдие твое́ похваля́юще, взыва́ем си́це:

Ра́дуйся, от ю́ности по́стническое житие́ возлюби́вый; ра́дуйся, и́го Христо́во с любо́вию понесы́й.

Ра́дуйся, пло́ти мудрова́ние умертви́вый; ра́дуйся, нищету́ во́льную себе́ усво́ивый.

Ра́дуйся, моли́твы, поста́ и воздержа́ния храни́телю; ра́дуйся, чистоты́ душе́вныя и теле́сныя усе́рдный ревни́телю.

Ра́дуйся, преподо́бне о́тче Феодо́сие, общежи́тельнаго мона́шескаго жития́ устрои́телю.

Конда́к 3.

Си́лою свы́ше обле́клся еси́, мно́гия доброде́тели в себе́ стяжава́я, богому́дре Феодо́сие, и благода́тию, я́ко ри́зою, оде́явся, собра́л еси́ и́ночествующих мно́жество, во е́же славосло́вити Творца́ вся́ческих пе́снию: Аллилу́иа.

И́кос 3.

Име́я ве́лию ре́вность о по́двизе и́ноческаго жития́ и сла́вы челове́ческия избега́я, потща́лся еси́, преподо́бне, в пусты́ню отъити́, и в пеще́ру, в не́йже волсви́ с дара́ми в Вифлее́м к ро́ждшемуся Богомладе́нцу Христу́ ше́ствовавшии укрыва́хуся, всели́лся еси́. Мы́ же, дивя́щеся пустыннолю́бному житию́ твоему́, усе́рдно вопие́м:

Ра́дуйся, всего́ себе́ во́ли Бо́жией преда́вый; ра́дуйся, житию́ безпло́тных поревнова́вый.

Ра́дуйся, пусты́ни благода́тное украше́ние; ра́дуйся, мона́шествующих сла́во и утеше́ние.

Ра́дуйся, и́ноческаго жития́ рачи́телю; ра́дуйся, чистоты́ душе́вныя и теле́сныя усе́рдный храни́телю.

Ра́дуйся, преподо́бне о́тче Феодо́сие, общежи́тельнаго мона́шескаго жития́ устрои́телю.

Конда́к 4.

Бу́рю по́мыслов и страсте́й му́жественно претерпе́в, преподо́бне о́тче, обре́л еси́ ти́хое приста́нище – Христа́, Его́же ра́ди во мно́зе долготерпе́нии неле́ностно в житии́ твое́м потруди́лся еси́, ны́не же на небесе́х во сла́ве со А́нгелы воспева́еши Ему́: Аллилу́иа.

И́кос 4.

Слы́шавше о подви́жничестем житии́ твое́м, пресла́вне Феодо́сие, прихожда́ху к пеще́ре твое́й и́щущии спасе́ния, и́хже ты́ любому́дренно наставля́л еси́, да о су́етности земна́го жития́ сего́ и о сме́ртном часе́ непреста́нно помышля́ют. Мы́ же, ви́дяще таково́е попече́ние твое́ о спасе́нии бра́тии твоея́, дерза́ем воспева́ти си́це:

Ра́дуйся, пустыннолю́бцев усе́рдный сподви́жниче; ра́дуйся, братолю́бия приле́жный строи́телю и те́плый о все́х моли́твенниче.

Ра́дуйся, на высоту́ доброде́телей возше́дый; ра́дуйся, на земли́ а́нгельски пожи́вый.

Ра́дуйся, рабо́тающих Го́сподеви наста́вниче прему́дрый; ра́дуйся, помо́щниче немощны́м предо́брый.

Ра́дуйся, преподо́бне о́тче Феодо́сие, общежи́тельнаго мона́шескаго жития́ устрои́телю.

Конда́к 5.

Боготе́чней звезде́ уподо́бился еси́, преподо́бне о́тче Феодо́сие, све́том богоуго́днаго жития́ твоего́ все́х освеща́я и приходя́щих к тебе́ люби́ти Го́спода и Спаси́теля на́шего и Ему́ еди́ному неле́ностно служи́ти науча́я, вопию́ще со умиле́нием: Аллилу́иа.

И́кос 5.

Ви́дим тя́, преподо́бне о́тче Феодо́сие, дости́гшаго в му́жа соверше́нна о Христе́ и преиспо́лненнаго дарова́ний Боже́ственных, во Ева́нгелии Христо́вом ве́рным обетова́нных. Те́мже, воспева́юще по́двиги и труды́ твоя́, взыва́ем ти́ си́це:

Ра́дуйся, Це́ркви Христо́вы украше́ние; ра́дуйся, благода́ти Бо́жия вмести́лище.

Ра́дуйся, по́стниче неизнемога́ющий; ра́дуйся, трудолю́бче благослове́нный.

Ра́дуйся, о́бразе смире́ния и послуша́ния; ра́дуйся, учи́телю чистоты́ и целому́дрия.

Ра́дуйся, преподо́бне о́тче Феодо́сие, общежи́тельнаго мона́шескаго жития́ устрои́телю.

Конда́к 6.

Пропове́дник и́стиннаго покая́ния и послуша́ния бы́л еси́, преподо́бне Феодо́сие, сего́ ра́ди мно́зи прихожда́ху к тебе́, спасе́ния и́щуще; егда́ же число́ ученико́в твои́х умно́жишася, ты́ оби́тель и́ноческую на ме́сте, чу́дным о́бразом тебе́ от Го́спода ука́занном, основа́л еси́, в не́йже воспева́шеся богокра́сная пе́снь: Аллилу́иа.

И́кос 6.

Возсия́ во все́м ми́ре сла́ва оби́тели твоея́, преподо́бне о́тче, иде́же обрето́ша душе́вное успокое́ние не то́кмо живу́щии в не́й, но и вси́ и́щущии спасе́ния: ю́ныя и ста́рцы, бога́тии и ни́щии, немощны́я и убо́гия. Мы́ же, помина́я попече́ния твоя́ о спасе́нии все́х к тебе́ притека́ющих, ублажа́ем тя́, глаго́люще:

Ра́дуйся, и́ноков му́дрый руководи́телю; ра́дуйся, в по́двизе су́щих предста́телю.

Ра́дуйся, гла́дных ще́дрый пита́телю; ра́дуйся, немощны́х безме́здный цели́телю.

Ра́дуйся, усе́рдный пред Бо́гом хода́таю; ра́дуйся, те́плый о на́с моли́твенниче.

Ра́дуйся, преподо́бне о́тче Феодо́сие, общежи́тельнаго мона́шескаго жития́ устрои́телю.

Конда́к 7.

Хотя́й, да вси́ испове́дуют ве́ру и́стинную, во Святы́й Гра́д Иерусали́м стопы́ твоя́ напра́вил еси́, преподо́бне, иде́же ерети́ческая мудрова́ния посрами́в, ве́рных научи́л еси́ Триипоста́сному Бо́гу воспева́ти: Аллилу́иа.

И́кос 7.

Ди́вный вои́стину защи́тник Правосла́вныя ве́ры яви́лся еси́, богому́дре Феодо́сие, лжеуче́ния ерети́ческая вся́чески облича́я и испове́дати и́стинную ве́ру все́х призыва́я. Сего́ ра́ди от импера́тора Анаста́сия заточе́ние темни́чное и у́зы претерпе́л еси́, ве́рнии же, ви́дяще такову́ю ре́вность твою́, воспе́ша ти́ такова́я:

Ра́дуйся, Пресвяты́я Тро́ицы и́стинный служи́телю; ра́дуйся, во́ли Бо́жией усе́рдный испо́лнителю.

Ра́дуйся, Правосла́вныя ве́ры испове́дниче; ра́дуйся, и́стины Христо́вы пропове́дниче.

Ра́дуйся, ерети́ческая уче́ния разоря́яй; ра́дуйся, христиа́н правосла́вных в ве́ре утвержда́яй.

Ра́дуйся, преподо́бне о́тче Феодо́сие, общежи́тельнаго мона́шескаго жития́ устрои́телю.

Конда́к 8.

Стра́нное и пресла́вное зна́мение благоволе́ния Бо́жия ви́дится на тебе́, о́тче Феодо́сие, да́нною бо тебе́ благода́тию с ве́рою прося́щих от вся́ких напа́стей охраня́еши, от скорбе́й свобожда́еши и вся́ко проше́ние во бла́го исполня́еши, науча́я ди́вному в чудесе́х Свои́х Бо́гу пе́ти: Аллилу́иа.

И́кос 8.

Всему́ ми́рови моли́твенник изря́ден и чудотво́рец яви́лся еси́, богоблаже́нне Феодо́сие, и ве́сь в Бо́зе бы́в, вся́ за́поведи Христо́вы ве́рно храни́ти ученики́ твоя́ наставля́л еси́. Те́мже, я́ко возше́дый на высоту́ соверше́нства духо́внаго, наставля́й и на́с на пу́ть спасе́ния, вопию́щих ти́ сицева́я:

Ра́дуйся, жития́ вели́ких подви́жников прие́мниче; ра́дуйся, ве́чныя блаже́нныя жи́зни насле́дниче.

Ра́дуйся, ли́ка и́ноческаго предстоя́телю богому́дрый; ра́дуйся, пи́щи небе́сныя приобщи́выйся.

Ра́дуйся, бра́тии твоея́ оте́ц чадолюби́вый; ра́дуйся, кри́не пусты́нный, свя́тостию благоуха́яй.

Ра́дуйся, преподо́бне о́тче Феодо́сие, общежи́тельнаго мона́шескаго жития́ устрои́телю.

Конда́к 9.

Вся́кое естество́ а́нгельское удиви́л еси́ высото́ю по́двигов твои́х, преподо́бне о́тче, невеще́ственное житие́ на земли́ явля́я, сего́ ра́ди Небе́сным Си́лам сопричте́н, Престо́лу Царя́ Сла́вы ны́не предстои́ши, со А́нгельскими ли́ки воспева́я Ему́: Аллилу́иа.

И́кос 9.

Вети́йствующий язы́к не мо́жет досто́йно восхвали́ти тя́, о́тче Феодо́сие, мно́гия бо пресла́вныя по́двиги в житии́ твое́м соверши́л еси́. Мы́ же к тебе́ любо́вию подвиза́емии, во смире́нии се́рдца дерза́ем воспе́ти тебе́ такова́я:

Ра́дуйся, я́ко Го́сподеви все́ю душе́ю и все́ю кре́постию твое́ю послужи́л еси́; ра́дуйся, я́ко сего́ ра́ди многообра́зных даро́в от Него́ сподо́бился еси́.

Ра́дуйся, Правосла́вныя ве́ры свети́ло и утвержде́ние; ра́дуйся, оби́тели твоея́ покро́ве и защище́ние.

Ра́дуйся, в беда́х и обстоя́ниих помо́щниче ско́рый; ра́дуйся, предста́телю о на́с пред Го́сподем непосты́дный.

Ра́дуйся, преподо́бне о́тче Феодо́сие, общежи́тельнаго мона́шескаго жития́ устрои́телю.

Конда́к 10.

Спасти́ хотя́ мно́жество люде́й твои́м попече́нием, Преблаги́й Госпо́дь избра́ тя́ досто́йна наста́вника, преблаже́нне о́тче Феодо́сие: тобо́ю бо мно́зи на пу́ть спасе́ния наста́влени бы́ша и моли́твами твои́ми Ца́рствие Небе́сное насле́доваша, иде́же благода́рно воспева́ют Бо́гу: Аллилу́иа.

И́кос 10.

Стена́ тве́рда и огра́да несокруши́ма оби́тели твоея́ су́ть неусы́пныя твоя́ к Бо́гу моли́твы, о́тче Феодо́сие. Те́мже живу́щии в не́й, тобо́ю от бе́д избавля́еми, благода́рно возно́сят к тебе́ гла́сы своя́, взыва́юще си́це:

Ра́дуйся, после́дователю Христо́в благопослушли́в; ра́дуйся, Влады́ки своего́ ра́бе благи́й и ве́рный.

Ра́дуйся, трудолю́бнейший вертогра́да Христо́ва де́лателю; ра́дуйся, тщали́вейший за́поведей Христо́вых испо́лнителю.

Ра́дуйся, и по отше́ствии оби́тель твою́ соблюда́яй; ра́дуйся, моля́щимся в не́й благопотре́бная подава́яй.

Ра́дуйся, преподо́бне о́тче Феодо́сие, общежи́тельнаго мона́шескаго жития́ устрои́телю.

Конда́к 11.

Пе́ние хвале́бное приими́ от на́с, преподо́бне о́тче, внемли́ моле́ниям на́шим, защити́ на́с от вся́каго зла́, сохрани́ оби́тель твою́, да бу́дет ве́рным во утеше́ние и прибе́жище, иде́же непреста́нно возно́сится пе́снь: Аллилу́иа.

И́кос 11.

Светоза́рный свети́льник, от И́стиннаго Све́та озаря́емый, су́щим на земли́ явля́ешися, преподо́бне о́тче Феодо́сие, сердца́ ве́рных просвеща́я и к ра́зуму Боже́ственному вся́ наставля́я, со умиле́нием взыва́юших си́це:

Ра́дуйся, наста́вниче ко спасе́нию прему́дрый; ра́дуйся, в по́двизех неутоми́мый.

Ра́дуйся, А́нгелов и все́х святы́х собесе́дниче; ра́дуйся, о все́м ми́ре усе́рдный моли́твенниче.

Ра́дуйся, тезоимени́тыя тебе́ оби́тели стра́же неусы́пный; ра́дуйся, в напа́стех и ско́рбех помо́щниче ско́рый.

Ра́дуйся, преподо́бне о́тче Феодо́сие, общежи́тельнаго мона́шескаго жития́ устрои́телю.

Конда́к 12.

Благода́ть Боже́ственную испроси́ на́м, святы́й уго́дниче Бо́жий, да при́сно покрыва́ет на́с от враго́в ви́димых и неви́димых, да научи́т ны́ подража́ти тебе́ в преподо́бии и пра́вде, да напра́вит сердца́ на́ша к смире́нию, покая́нию и неосла́бному исполне́нию за́поведей Христо́вых, да ку́пно с тобо́ю сподо́бимся узре́ти сла́ву Вели́каго Бо́га и ве́чно пе́ти Ему́: Аллилу́иа.

И́кос 12.

Пою́ще твое́ богоуго́дное житие́, восхваля́ем ми́рную кончи́ну твою́, о́тче Феодо́сие, и мо́лим ти́ ся́: не забу́ди на́с, гре́шных и недосто́йных, бу́ди на́м во все́м ко бла́гу ско́рый помо́щник, со умиле́нием зову́щим ти́ такова́я:

Ра́дуйся, те́плый хода́таю о все́х и́мя твое́ призыва́ющих; ра́дуйся, огражде́ние и упова́ние тя́ почита́ющих.

Ра́дуйся, ста́да Христо́ва до́брый наста́вниче; ра́дуйся, оби́димых и обездо́ленных засту́пниче.

Ра́дуйся, правосла́вных христиа́н похвало́; ра́дуйся, мона́шествующих сла́во.

Ра́дуйся, преподо́бне о́тче Феодо́сие, общежи́тельнаго мона́шескаго жития́ устрои́телю.

Конда́к 13.

О преди́вный чудотво́рче и вели́кий уго́дниче Христо́в, преподо́бне о́тче Феодо́сие, предстоя́й ны́не Престо́лу Пресвяты́я Тро́ицы, приими́ от на́с, гре́шных, приноси́мыя ти́ хвале́бныя пе́ния, и моли́твами твои́ми испроси́ на́м у Го́спода оставле́ние грехо́в, избавле́ние от бе́д вре́менных и спасе́ние от му́к ве́чных, да с тобо́ю вы́ну воспева́ем Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгельский о́браз жития́ от ю́ности возлюби́вый, я́ко безпло́тен во пло́ти пожи́л еси́, преподо́бне Феодо́сие, вся́ вре́менная и земна́я во уме́ты вменя́я. Сего́ ра́ди, я́ко а́нгела земна́го и челове́ка небе́снаго и́стинно тя́ почита́юще, со умиле́нием вопие́м ти́:

Ра́дуйся, Каппадоки́и свято́е прозябе́ние; ра́дуйся, благочести́вых роди́телей благослове́нный пло́де.

Ра́дуйся, в ве́ре и благоче́стии воспита́нный; ра́дуйся, благода́тию Бо́жиею приосене́нный.

Ра́дуйся, Ева́нгелия Христо́ва усе́рдный после́дователю; ра́дуйся, за́поведей Госпо́дних ве́рный испо́лнителю.

Ра́дуйся, преподо́бне о́тче Феодо́сие, общежи́тельнаго мона́шескаго жития́ устрои́телю.

Конда́к 1.

Избра́нный чудотво́рче и преди́вный уго́дниче Христо́в, и́ночествующих му́дрый наста́вниче и покрови́телю, преблаже́нне о́тче Феодо́сие, я́ко име́яй ве́лие дерзнове́ние ко Го́споду, от вся́ких на́с бе́д свободи́, да с ра́достию зове́м ти́:

Ра́дуйся, преподо́бне о́тче Феодо́сие, общежи́тельнаго мона́шескаго жития́ устрои́телю.

Моли́тва.

О преподо́бне и богоно́сне о́тче на́ш Феодо́сие! Ты́, порабо́тати Го́сподеви жела́я, неле́ностно в труде́х, во бде́ниих, в моли́твах и посте́х подвиза́лся еси́, и бы́л еси́ наста́вник мона́шествующим, все́м же лю́дем – оте́ц чадолюби́вый. Ны́не у́бо, по отше́ствии твое́м от земны́х, Небе́сному Царю́ предстоя́, моли́ бла́гость Его́, е́же уще́дрити ме́сто селе́ния твоего́, святу́ю оби́тель твою́, иде́же ду́хом любве́ твоея́ неотсту́пно пребыва́еши, и все́м с ве́рою к тебе́ припа́дающим во блага́я проше́ния и́х испо́лнити. Испроси́ у Ми́лостиваго Го́спода на́шего, да низпо́слет на́м оби́лие бла́г земны́х, па́че же я́же на по́льзу ду́ш на́ших да да́рует на́м, и сконча́ти житие́ сие́ привре́менное в покая́нии да сподо́бит, в де́нь же Су́дный десна́го предстоя́ния и наслажде́ния во Ца́рствии Свое́м да удосто́ит на́с во ве́ки веко́в. Ами́нь.