Конда́к 1.
Избра́ннаго подви́жника и сосу́да арома́тов благоуха́нных, Каппадоки́йское прозябе́ние и Афо́нския Панагу́ды все́льника, неусы́пнаго о на́с предста́теля, воспои́м согла́сно. А́нгельскому бо житию́ подража́я, Тро́ице Святе́й благоугоди́л еси́, те́мже зове́м ти́:
Ра́дуйся, преподо́бне Паи́сие, ди́вный наро́да Бо́жия уте́шителю.
И́кос 1.
А́нгелом подража́тель показа́лся еси́ во уде́ле Богоро́дицы избра́ннем, и на́м хода́тай тепле́йший пред Бо́гом, Паи́сие о́тче, те́мже та́ко тя́ ублажа́ем:
Ра́дуйся, свята́го Арсе́ния похвале́ние; ра́дуйся, Афо́на великоиме́нное благоле́пие.
Ра́дуйся, вы́шняго жи́тельства о́бразе; ра́дуйся, Аси́и Ма́лыя о́трасле.
Ра́дуйся, в фарасио́тех приснопева́емый; ра́дуйся, и́нокующих пра́вило.
Ра́дуйся, ве́ры Правосла́вныя ве́лий храни́телю; ра́дуйся, церко́вных ове́ц просвети́телю.
Ра́дуйся, Каппадоки́и боже́ственная розго́; ра́дуйся, Елла́ды доброво́нное ми́ро.
Ра́дуйся, земны́й а́нгеле, ве́стниче на земли́; ра́дуйся, челове́че Небе́сный, пребыва́яй на Небеси́.
Ра́дуйся, преподо́бне Паи́сие, ди́вный наро́да Бо́жия уте́шителю.
Конда́к 2.
Ви́дяще, я́ко от руки́ свяще́ннаго Арсе́ния в Фара́сах Каппадоки́йских, оте́чествии святы́х, Креще́ние прия́л еси́, и я́ко моли́тва сего́ свята́го многопло́дную тя́ ле́торасль Аси́и Ма́лыя и Елла́ды яви́, тя́ прославля́ем по достоя́нию, Бо́гови пою́ще: Аллилу́иа.
И́кос 2.
Разуме́я страда́ния из оте́чествия изгна́нных, стра́нствуя и печа́луяся о до́ма роди́тельскаго разоре́нии, в ве́ре укрепи́лся еси́ и богоразу́мия прия́л еси́ све́т от благода́ти Бо́жия, Паи́сие свя́те. Сего́ ра́ди и мы́, взира́юще ны́не на чудеса́ твоя́, восклица́ем ти́ такова́я:
Ра́дуйся, Иису́совых благослове́ний стяжа́телю; ра́дуйся, уде́ла Богома́терняго свети́ло.
Ра́дуйся, кла́дезю многому́дрых благодея́ний; ра́дуйся, киво́те Вы́шняго дарова́ний.
Ра́дуйся, Бо́жия Ду́ха благооти́шное сия́ние; ра́дуйся, доброде́телей несказа́нное благоуха́ние.
Ра́дуйся, луче́ Со́лнца Пра́вды, отгоня́ющая напа́сти; ра́дуйся, исто́чниче святы́й, врачу́яй вся́кия стра́сти.
Ра́дуйся, Цари́цы Небе́сныя уго́дниче преусе́рдный; ра́дуйся, Святы́я Горы́ во́ине добропобе́дный.
Ра́дуйся, поста́ и моли́твы де́лателю неусы́пный; ра́дуйся, стра́ждущих и печа́льных засту́пниче непосты́дный.
Ра́дуйся, преподо́бне Паи́сие, ди́вный наро́да Бо́жия уте́шителю.
Конда́к 3.
Си́лу Вы́шняго, му́ченики укрепля́ющую, разуме́я и жития́м и́х внима́я, ты́ душе́ю блаже́нною к непреста́нному славосло́вию Всетворца́ восходи́л еси́. Мы́ же сие́ воспомина́юще, вопие́м Ему́: Аллилу́иа.
И́кос 3.
Услы́шав словеса́ Небе́снаго Жениха́, я́ко То́й е́сть Воскресе́ние и Живо́т и я́ко во ве́ки не у́мрет ве́руяй в Него́, неизрече́ннаго све́та испо́лнился еси́ и неве́рия пре́лесть низве́ргл еси́. Те́мже, твое́ю му́дростию науча́еми, благода́рственно воспева́ем ти́ такова́я:
Ра́дуйся, тене́та безбо́жия прелете́вый; ра́дуйся, я́ве Христа́ узре́вый.
Ра́дуйся, оби́тели Стомио́нския устрои́телю; ра́дуйся, Ко́ницких еретико́в победи́телю.
Ра́дуйся, ми́лостыни пото́че неисчерпа́емый; ра́дуйся, го́рним сия́нием укрепля́емый.
Ра́дуйся, горы́ Моисе́овы ороше́нный са́де; ра́дуйся, пусты́ни Сина́йския благосе́нное дре́во.
Ра́дуйся, оби́тели великому́ченицы Екатери́ны предста́телю; ра́дуйся, в му́дрости де́ве се́й подража́телю.
Ра́дуйся, святы́м Галактио́ну и Еписти́мии совсе́льниче; ра́дуйся, А́нгельским лико́м на земли́ собесе́дниче.
Ра́дуйся, преподо́бне Паи́сие, ди́вный наро́да Бо́жия уте́шителю.
Конда́к 4.
Раче́ние пла́менное к Богома́тери, чисте́йший о́тче, поне́же име́я, Сию́ Спобо́рницу непрело́жную и Храни́тельницу стяжа́. Те́м и мы́, дарова́ний твои́х жела́юще приобщи́тися, о тебе́ пое́м: Аллилу́иа.
И́кос 4.
Слы́шаша и́мя твое́ земни́и концы́, Паи́сие свя́тче, ты́ бо, я́ко со́лнце блиста́яй во времена́ после́дняя и Правосла́вие утвержда́яй и́менем Го́спода Иису́са Христа́, яви́лся еси́. Мы́ же, единомы́сленне па́мятующе богогла́сная уче́ния твоя́, прино́сим ти́ рече́ния такова́я:
Ра́дуйся, изря́днейший Пресвяты́я люби́мче; ра́дуйся, богатотво́рный Христо́в дароно́сче.
Ра́дуйся, сомоли́твенниче Херуви́мом; ра́дуйся, единонра́вниче Серафи́мом.
Ра́дуйся, забра́ло кре́пкое боголю́бцев; ра́дуйся, у́тваре преиспещре́нная Це́ркве.
Ра́дуйся, чернори́зцев огра́до и оте́чествия хране́ние; ра́дуйся, Ко́ницы о́трасле, Стомио́на же заступле́ние.
Ра́дуйся, ло́зие Богома́тере, благовре́менный пло́д принося́щее; ра́дуйся, вертогра́де и́стиннаго покая́ния благоуха́яй.
Ра́дуйся, Бо́жиими словесы́ прорече́ние; ра́дуйся, я́звам гре́шничим умаще́ние.
Ра́дуйся, преподо́бне Паи́сие, ди́вный наро́да Бо́жия уте́шителю.
Конда́к 5.
Богоприя́тну любо́вь я́ко стяжа́вый, в же́ртву себе́ сама́го бра́тием ты́ возложи́, наро́ды же, о́крест живу́щия, благослове́нием Пречи́стыя от оби́тели Стомио́нския оделя́ше. Такова́го себе́ отверже́ния ра́ди ны́не со А́нгелы Христа́ прославля́еши, мы́ же, па́мять твою́ пра́здновати призыва́емии, вопие́м: Аллилу́иа.
И́кос 5.
Ви́дяще тя́ ду́шу за бли́жняго полага́юща, блаже́нне Паи́сие, к тебе́ прибега́ем: ми́лостив бу́ди на́м и, предстоя́ Влады́це Христу́, Того́ умоли́, да отжене́т грехо́вную тьму́, умы́ помрача́ющую, от сла́вящих тя́ моле́бными пе́сньми сицевы́ми:
Ра́дуйся, Богоро́дицы бо́дренный песносло́вче; ра́дуйся, Панагу́ды до́блественный ратобо́рче.
Ра́дуйся, путево́дная заблу́ждшим звездо́; ра́дуйся, Афо́нская зову́щая к Бо́гу трубо́.
Ра́дуйся, утеше́ние пла́чущих; ра́дуйся, помо́щниче стра́ждущих.
Ра́дуйся, печа́льных боже́ственное укрепле́ние; ра́дуйся, о и́ноцех неоску́дное попече́ние.
Ра́дуйся, к Ми́лостивей за ны́ предста́телю; ра́дуйся, неду́жных безме́зднейший врачева́телю.
Ра́дуйся, подвиза́ющихся направля́яй; ра́дуйся, изря́дне Врата́рницу Богоро́дицу восхваля́яй.
Ра́дуйся, преподо́бне Паи́сие, ди́вный наро́да Бо́жия уте́шителю.
Конда́к 6.
Пропове́дник богоно́сен еси́ и сто́лп ве́ры, да́ры Ду́ха Свята́го на́м испроша́яй, те́м и мы́ тебе́ ра́ди, ста́рче преди́вный, немо́лчно зове́м Бо́гу: Аллилу́иа.
И́кос 6.
Возсия́в я́ко лампа́да неугаси́мая све́том Трисо́лнечнаго Божества́, покая́ния наста́вник яви́ся, Паи́сие свя́те. Мы́ же, твои́ми предста́тельствы свы́шнее утеше́ние и благода́ти позна́ние прие́млющии, сла́вим тя́, вопию́ще:
Ра́дуйся, воспису́яй хвале́бная Богома́тере, я́ко слави́й избра́нный; ра́дуйся, приноша́яй сле́зы Христу́, я́ко ми́ро благоуха́нное.
Ра́дуйся, помысло́в испове́данию прилежа́вый; ра́дуйся, Та́йней Ве́чери чи́стою душе́ю приобща́выйся.
Ра́дуйся, воздержа́ния и себе́ отверже́ния о́бразе; ра́дуйся, кре́пкое о ве́си Фове́рской предста́тельство.
Ра́дуйся, Со́лнца Христа́ малове́рным провозвести́вый; ра́дуйся, ми́лостию Человеколю́бца все́х удовли́вый.
Ра́дуйся, кри́не Небе́сный, о ми́ре моли́твою благоуха́яй; ра́дуйся, вино́ сла́дкое, ду́ши ра́достию исполня́яй.
Ра́дуйся, Открове́ния громогла́сное возвеще́ние; ра́дуйся, Уте́шителевы благода́ти на на́с излия́ние.
Ра́дуйся, преподо́бне Паи́сие, ди́вный наро́да Бо́жия уте́шителю.
Конда́к 7.
Хотя́щу тебе́ Спа́су после́довати, му́ченическаго жития́ показа́лся еси́ ревни́тель, сохрани́в нескве́рны ду́шу и те́ло любо́вию боже́ственною ко Христу́. Сего́ ра́ди тя́ ублажа́ем, согла́сно пою́ще Бо́гови: Аллилу́иа.
И́кос 7.
Но́вое одоле́ние на неви́димыя и ви́димыя враги́ моли́твою и любо́вию обреты́й, всеблаже́нне о́тче, и всеору́жие смире́ния взе́м, истреби́л еси́ бесо́вския ко́вы и тща́ния, Бо́гови же благода́рственная возопи́. Те́м и мы́ прино́сим ти́ сицева́я:
Ра́дуйся, све́та многобога́тное храни́лище; ра́дуйся, благоутро́бия Христо́ва вмести́лище.
Ра́дуйся, Псалти́ри Дави́довы пе́ние; ра́дуйся, свята́го Арсе́ния умоле́ние.
Ра́дуйся, гре́шники исправля́яй и ободря́яй; ра́дуйся, ми́лование у Богоро́дицы испроша́яй.
Ра́дуйся, главо́ подви́жников венцено́сная; ра́дуйся, се́не стра́ждущим росоно́сная.
Ра́дуйся, же́зле тве́рдый претыка́ющимся; ра́дуйся, еле́е ми́лости изъязвле́нным.
Ра́дуйся, ка́ющимся сто́лпе и укрепле́ние; ра́дуйся, утружде́нным ти́хостное упокое́ние.
Ра́дуйся, преподо́бне Паи́сие, ди́вный наро́да Бо́жия уте́шителю.
Конда́к 8.
Стра́нен бы́в в ми́ре, Паи́сие, Го́спода возлюби́в и стра́сти твоя́ укроти́в Бо́жиею благода́тию, ны́не же я́ко зарни́ца облистава́еши о тебе́ вопию́щих немо́лчное: Аллилу́иа.
И́кос 8.
Вся́к к тебе́ притека́яй, о́тче Паи́сие, ско́ро утеше́ние обрета́ше и прося́й благода́ти дарова́ние приима́ше. Сего́ ра́ди и мы́ сия́ восклица́ем ти́:
Ра́дуйся, лучено́сная омраче́нным звездо́; ра́дуйся, ка́ющихся наста́вниче и главо́.
Ра́дуйся, афо́нския бра́тии тяготы́ взе́мляй; ра́дуйся, Всенепоро́чныя са́да благослове́ние прие́мляй.
Ра́дуйся, о благосты́ни Христо́ве сладковеща́ние; ра́дуйся, моли́твы у́мныя мироуха́ние.
Ра́дуйся, вселе́нней Спаси́теля провозвеща́яй; ра́дуйся, пе́снь Арха́нгелову ко Пресвяте́й воспева́яй.
Ра́дуйся, наде́жды, ми́лости и любве́ пла́меню; ра́дуйся, сострада́тельное омове́ние во вра́жией бра́ни.
Ра́дуйся, еле́ом да́ра проро́ческаго пома́занный; ра́дуйся, благоутро́бием Отцу́ Небе́сному уподо́бивыйся.
Ра́дуйся, преподо́бне Паи́сие, ди́вный наро́да Бо́жия уте́шителю.
Конда́к 9.
Вся́кому вне́млющему пропове́дал еси́ сло́во, апо́столом уподобля́яся, раче́нием же Боже́ственным и любо́вию к бли́жним просия́л еси́ на земли́ я́ко со́лнце, прославля́я Святу́ю Тро́ицу: Аллилу́иа.
И́кос 9.
Вити́йство су́етное ми́ра сего́ презре́л еси́, о́тче, сле́з пото́ки от души́ мироточа́, се́рдцем о челове́цех, стра́ждущих душе́ю и те́лом, боле́знуя. Сего́ ра́ди и мы́ ны́не от ду́ш на́ших песнопе́ния ти́ возсыла́ем, в смире́нии вопию́ще приле́жно:
Ра́дуйся, Ева́нгелия служи́телю неутоми́мый; ра́дуйся, Трисо́лнечнаго Божества́ светоприе́мниче неугаси́мый.
Ра́дуйся, по́стничества риста́лище соверши́вый; ра́дуйся, смире́нием кра́йним ины́х предвари́вый.
Ра́дуйся, во Афо́нской Горе́ ве́ры сия́ние; ра́дуйся, Всесвяты́я сла́дкое воспева́ние.
Ра́дуйся, учи́телю сла́вный дея́ния же и зре́ния; ра́дуйся, постиги́й велему́дре боже́ственная виде́ния.
Ра́дуйся, Пречи́стыя вертогра́да неосла́бный земледе́льче; ра́дуйся, святы́м Лукиллиа́ну, Пантелеи́мону и Евфи́мии собесе́дниче.
Ра́дуйся, гла́с Богоотрокови́цы слу́хом услы́шавый; ра́дуйся, Ту́, а́ки на Иерусали́мской ико́не, я́ве узре́вый.
Ра́дуйся, преподо́бне Паи́сие, ди́вный наро́да Бо́жия уте́шителю.
Конда́к 10.
Спасе́ния сооте́чественником все́м се́рдцем жела́я, Паи́сие свя́те, вели́чествие и те́плый засту́пник Каппадоки́и со Елла́дою яви́лся еси́, доброде́телей бо ле́ствицу богоуго́дно соверши́, ко Тро́ице Святе́й непреста́нно поя́: Аллилу́иа.
И́кос 10.
Стена́ еси́ ве́рным, о́тче Паи́сие, а́нгельское бо житие́ возлюби́в, по́двиги свои́ми неотсту́пнаго предстоя́ния Святе́й Тро́ице дости́же. Сего́ ра́ди пе́ния благода́рственная возсыла́юще из глубины́ серде́ц и ду́ш на́ших, смире́нно ти́ возглаша́ем:
Ра́дуйся, свещено́сче Афо́нский, богоявле́нно ми́ру сия́яй; ра́дуйся, краснопе́снивый гла́се, Бо́жие Сло́во провозвеща́яй.
Ра́дуйся, многоча́дне, челове́ческая боле́ния исцеля́яй; ра́дуйся, добропло́дне, заблу́ждших стези́ исправля́яй.
Ра́дуйся, я́ко змие́в главы́ моли́твою сокруша́еши; ра́дуйся, я́ко и зра́ком твои́м ны́ утеша́еши.
Ра́дуйся, Неневе́стней Неве́сте ра́дование приноша́яй; ра́дуйся, к Ца́рствию Небе́сному пу́ть углажда́яй.
Ра́дуйся, фимиа́м Ду́ха Бо́жия нарече́нный; ра́дуйся, ско́ро приводя́й к серде́чному умиле́нию.
Ра́дуйся, моли́твы Иису́совы и среди́ ми́ра де́лателю неуста́нный; ра́дуйся, Бо́жия Ма́тере уго́дниче благода́рный.
Ра́дуйся, преподо́бне Паи́сие, ди́вный наро́да Бо́жия уте́шителю.
Конда́к 11.
Пе́ние Зижди́телю и Присноде́ве с по́двиги мно́гими я́же в нощи́ и во дни́ соплета́ше смире́нно, свя́те, Бо́жия Ду́ха сосу́д себе́ показу́я. Мы́ же, Тро́ице Святе́й припа́дающе, тебе́ ра́ди пое́м и вопие́м: Аллилу́иа.
И́кос 11.
Све́т и мироуха́ние благоче́стия, любве́, самоотверже́ния неисче́тнаго и исцеле́ний явля́ет свята́я па́мять твоя́, богонра́вне. Сего́ ра́ди потща́хомся вси́ моле́бными гла́сы тебе́ возопи́ти:
Ра́дуйся, указу́яй все́м ве́рным пу́ть на Небеса́; ра́дуйся, я́ко ра́дости исполня́ют медото́чная твоя́ словеса́.
Ра́дуйся, изоби́льная от Афо́на реко́, чудесы́ искипа́ющая; ра́дуйся, светоно́сная от Елла́ды звездо́, ве́рным пу́ть озаря́ющая.
Ра́дуйся, при́сное за ны́ к Богоотрокови́це хода́тайство; ра́дуйся, а́нгельскому житию́ прилежа́щим предста́тельство.
Ра́дуйся, доброде́телей плодоно́снейшая лозо́; ра́дуйся, о ми́ре к Престо́лу достига́ющая слезо́.
Ра́дуйся, но́вый апо́столе, к ве́ре Христо́ве вся́ призыва́яй; ра́дуйся, Правосла́вия гла́се, мно́зи возсозида́яй.
Ра́дуйся, дре́во всепло́дное, Ма́терию Небе́сною напоя́емое; ра́дуйся, ве́рных зна́мя, в подсо́лнечней распростира́емое.
Ра́дуйся, преподо́бне Паи́сие, ди́вный наро́да Бо́жия уте́шителю.
Конда́к 12.
Благода́ти Бо́жия исто́чник тя́ позна́хом, о́тче, по успе́нии твое́м, в не́мже ли́цы А́нгельстии весе́лия исполня́хуся. Те́мже и мы́, печа́льника о спасе́нии на́шем улучи́ти сподо́бльшиися, ра́дуемся, взыва́юще: Аллилу́иа.
И́кос 12.
Пою́ще бе́здну чуде́с твои́х и терпели́вныя твоя́ по́двиги, свя́те, от серде́ц ти́ сплета́ем а́нгельская песнопе́ния, па́мять твою́ почита́ем благогове́йно и вопие́м такова́я:
Ра́дуйся, наде́жды оте́чествию забве́нному пропове́дниче; ра́дуйся, го́рняго со святы́ми купножи́тельства ве́стниче.
Ра́дуйся, изгна́нным от стра́н свои́х сла́вный уде́л прознаменова́вый; ра́дуйся, к черто́гом Небе́сным восхожде́ние мно́гим указа́вый.
Ра́дуйся, плене́нных о́тчин прореки́й обновле́ние; ра́дуйся, до́льняя то́кмо му́дрствующим вразумле́ние.
Ра́дуйся, разуме́ния зна́мений време́н имы́й благослове́ние; ра́дуйся, ми́ру блиста́ние, ве́ры немо́лчное возглаше́ние.
Ра́дуйся, а́ввы Ти́хона Ру́сскаго до́брый учениче́ и послу́шниче; ра́дуйся, трапе́зы А́гнчи присноживо́тныя прича́стниче.
Ра́дуйся, апо́стольски явле́й обетова́ния; ра́дуйся, Христо́ва све́та златоза́рное сия́ние.
Ра́дуйся, преподо́бне Паи́сие, ди́вный наро́да Бо́жия уте́шителю.
Конда́к 13.
О преподо́бне о́тче Паи́сие, но́вый цве́те благоуха́нный, во времена́ после́дняя израсты́й, умоли́ Христа́ Бо́га спасти́ся душа́м о тебе́ воспева́ющих: Аллилу́иа.
И́кос 1.
А́нгелом подража́тель показа́лся еси́ во уде́ле Богоро́дицы избра́ннем, и на́м хода́тай тепле́йший пред Бо́гом, Паи́сие о́тче, те́мже та́ко тя́ ублажа́ем:
Ра́дуйся, свята́го Арсе́ния похвале́ние; ра́дуйся, Афо́на великоиме́нное благоле́пие.
Ра́дуйся, вы́шняго жи́тельства о́бразе; ра́дуйся, Аси́и Ма́лыя о́трасле.
Ра́дуйся, в фарасио́тех приснопева́емый; ра́дуйся, и́нокующих пра́вило.
Ра́дуйся, ве́ры Правосла́вныя ве́лий храни́телю; ра́дуйся, церко́вных ове́ц просвети́телю.
Ра́дуйся, Каппадоки́и боже́ственная розго́; ра́дуйся, Елла́ды доброво́нное ми́ро.
Ра́дуйся, земны́й а́нгеле, ве́стниче на земли́; ра́дуйся, челове́че Небе́сный, пребыва́яй на Небеси́.
Ра́дуйся, преподо́бне Паи́сие, ди́вный наро́да Бо́жия уте́шителю.
Конда́к 1.
Избра́ннаго подви́жника и сосу́да арома́тов благоуха́нных, Каппадоки́йское прозябе́ние и Афо́нския Панагу́ды все́льника, неусы́пнаго о на́с предста́теля, воспои́м согла́сно. А́нгельскому бо житию́ подража́я, Тро́ице Святе́й благоугоди́л еси́, те́мже зове́м ти́:
Ра́дуйся, преподо́бне Паи́сие, ди́вный наро́да Бо́жия уте́шителю.
Моли́тва.
О пречу́дное и благоуха́нное Святы́я Го́ры Афо́нския процвете́ние и люде́й правосла́вных утеше́ние, преподо́бне о́тче Паи́сие!
Ты́, прия́в свято́е Креще́ние от руку́ преподо́бнаго Арсе́ния, и́стинным подража́телем того́ любве́ и подвиго́в яви́лся еси́. Во младе́нстве от Фара́с до страны́ Елла́дския путеше́ствовавый, до кончи́ны твоея́ по́двиг духо́внаго стра́нничества сохрани́л еси́, ни к чесому́ су́етному не прилепля́яся. От ю́ности по́ст, моли́тву, духо́вное чте́ние и бде́ние возлюби́вый, кра́йния по́двиги духо́вныя в житии́ и́ночестем яви́л еси́. В чи́не во́инстем досто́йне Оте́чествию своему́ послужи́вый и сме́рти на по́ли бра́ни не убоя́выйся, во́инству Царя́ Небе́снаго вчини́лся еси́, тве́рдо и небоя́зненно путе́м спасе́ния и духо́внаго возраста́ния сле́дуя.
Еще́ о́трок сы́й, моли́твою кре́пкою бе́са неве́рия и сомне́ния посрами́вый и преди́внаго виде́ния Спаси́теля сподо́бивыйся, по́слежде да́р заблу́ждшия души́ врачева́ти стяжа́л еси́.
Мно́гия ско́рби и тя́жкия боле́зни во вся́цем терпе́нии понесы́й, все́м притека́вшим к тебе́ му́дрое назида́ние и ди́вное врачева́ние преподава́л еси́. Сло́во бо твое́ бы́сть жи́во и де́йственно ко вразумле́нию и утеше́нию.
Сего́ ра́ди мо́лим тя́, всеблаже́нне о́тче Паи́сие! Пода́ждь и ны́не твои́ми благоприя́тными к Бо́гу моли́твами душа́м на́шим стра́ждущим утеше́ние и ко и́стинному покая́нию наставле́ние, в моли́тве и труде́х терпе́ние, ми́р и любо́вь нелицеме́рную, и во все́м бо́дренное, ра́достное во Христе́ жи́тельство. Тя́жкия ра́ны стра́ждущих ди́вным пома́занием благода́ти Боже́ственныя исцели́, да ми́лостию Бо́жиею возста́нут и потру́дятся во сла́ву и́мене Пресвяты́я Тро́ицы. Стране́ на́шей ми́р, благоде́нствие и умноже́ние ве́ры испроси́, да вы́ну сла́вят лю́дие правосла́внии Бо́га и Пречи́стую Богоро́дицу, твои́ми и все́х святы́х моли́твами! Ами́нь.