Конда́к 1.

Избра́нный уго́дниче Христо́в и преди́вный чудотво́рче, преподо́бне о́тче Пи́мене, по́двиги твои́ми А́нгелы возвесели́вый и челове́ки мно́гия из глубины́ грехо́вныя возведы́й, прославля́юще просла́вльшаго тя́ Го́спода, хвале́бное сие́ пе́ние прино́сим ти́, недосто́йнии. Ты́ же, предстоя́ в со́нме пра́ведных Престо́лу Вседержи́теля, при́зри ми́лостивым твои́м о́ком на на́с, любо́вию зову́щих ти́:

Ра́дуйся, преподо́бне о́тче Пи́мене, моли́твенниче о душа́х на́ших.

И́кос 1.

Ангелоподо́бное житие́ возлюби́в, преподо́бне, ма́терь, и до́м, и вся́ стяжа́ния твоя́ оста́вил еси́ и вку́пе с двема́ бра́тома твои́ма, ми́ра бе́гая, во еди́ну от оби́телей вели́кия пусты́ни Еги́петския всели́лся еси́; те́мже зря́ще твоего́ ду́ха горе́ние и бра́тий твои́х ю́ных ко Христу́ прилежа́ние, с ра́достию тебе́ вопие́м:

Ра́дуйся, из де́тска у́м и ду́шу твою́ Го́сподеви преда́вый; ра́дуйся, от ю́ности пло́ть твою́ чи́сту соблюды́й.

Ра́дуйся, Го́спода все́м се́рдцем твои́м возлюби́вый; ра́дуйся, любо́вию к Тому́ и ю́ных бра́тий твои́х воспламени́вый.

Ра́дуйся, любве́ ра́ди ко Го́споду до́м оте́ческий оста́вивый; ра́дуйся, от собла́знов ми́ра и бра́тию твою́ изба́вивый.

Ра́дуйся, ве́рою и любо́вию измла́да укра́шенный; ра́дуйся, мно́гими слеза́ми и воздыха́ньми очище́нный.

Ра́дуйся, в сла́бом телеси́ ве́лию си́лу душе́вную яви́вый; ра́дуйся, во Христе́ Иису́се все́ ра́дование твое́ положи́вый.

Ра́дуйся, разсужде́ния да́ром почте́нный; ра́дуйся смире́нием на высоту́ вознесе́нный.

Ра́дуйся, преподо́бне о́тче Пи́мене, моли́твенниче о душа́х на́ших.

Конда́к 2.

Ви́дя ма́терь твою́ есте́ственною к ча́дом любо́вию подвиза́ему и к ме́сту обита́лища твоего́ прише́дшу, не восхоте́л еси́ прия́ти ю́, проразуме́л бо еси́, я́ко с мы́слию о ма́тери в ду́шу вни́дут и жела́ния скороги́бнущия жи́зни мирски́я. Те́мже во убо́зей ке́ллии с бра́тиею твое́ю затвори́лся еси́, наставля́я Еди́наго Го́спода люби́ти и Того́ ра́ди вся́ земна́я соу́зы и сла́дости презира́ти, вопию́ще Ему́: Аллилу́иа.

И́кос 2.

Ра́зум име́я Бо́гом просвеще́нный, ско́рбь ма́тери твоея́ исцели́л еси́, о́тче на́ш, егда́ бо пла́чущи у две́ри ке́ллии твое́й рече́ ти́: Хощу́ ви́дети ва́с, возлю́бленная ча́да моя́; воспроси́л еси́: Зде́ ли хо́щеши ви́дети на́с или́ во о́ном бу́дущем ве́це? Те́мже сла́достными словесы́ твои́ми науче́на бы́вши, несомне́нную ве́ру и наде́жду ве́чныя жи́зни в се́рдце свое́м прия́т и с ра́достию в до́м сво́й оты́де, восхваля́ющи тя́ си́це:

Ра́дуйся, земну́ю любо́вь победи́вый, да небе́сную преумно́жиши; ра́дуйся, отверги́й вре́менная, да ве́чная приобря́щеши.

Ра́дуйся, ю́ным бра́тиям твои́м о́браз соверше́ннаго отрече́ния яви́вый; ра́дуйся, и ма́терь твою́ наде́ждою ве́чных бла́г возвесели́вый.

Ра́дуйся, ра́ди би́сера Христо́ва вся́ кра́сная ми́ра сего́ презре́вый; ра́дуйся, возлюби́ти па́че Христа́ никого́же восхоте́вый.

Ра́дуйся, я́ко Христа́ возлюби́в, и ма́терь твою́ свято́ю любо́вию возлюби́л еси́; ра́дуйся, я́ко плотско́е жела́ние из се́рдца исто́ргнув, ду́шу твою́ за бра́тию положи́л еси́.

Ра́дуйся, ра́бе, Го́спода твоего́ возвесели́вый; ра́дуйся, Того́ возлюби́ти и на́с науча́яй.

Ра́дуйся, пусты́ни благоуха́нный кри́не; ра́дуйся, Ца́рствия Небе́снаго сы́не.

Ра́дуйся, преподо́бне о́тче Пи́мене, моли́твенниче о душа́х на́ших.

Конда́к 3.

Си́лою Бо́жиею храни́м и укрепля́ем, от си́лы в си́лу восходи́л еси́, преподо́бне, и благода́тных даро́в от Го́спода сподо́бился еси́, я́коже и еди́ным то́чию сло́вом бе́сы устраша́ти и прикоснове́нием руки́ твоея́ неду́жныя от одра́ боле́зни воздвиза́ти, я́же ви́дяще вси́ лю́дие просла́виша Бо́га, ди́внаго во святы́х, вопию́ще Ему́: Аллилу́иа.

И́кос 3.

Име́я невозвра́тное к Небеси́ устремле́ние, преподо́бне, безмо́лвие па́че всего́ возлюби́л еси́, те́мже и кня́зя не́коего, гряду́ща к тебе́ не восхоте́л еси́ прия́ти, боя́ся в се́ть горды́ни впа́сти. Толи́цей глубине́ разсужде́ния твоего́ удивля́ющеся и высоту́ смире́ния твоего́ прославля́юще, усе́рдно велича́ем тя́:

Ра́дуйся, и́ноки преподо́бныя смире́нию научи́вый; ра́дуйся, и на́м, немощны́м, се́й пу́ть законоположи́вый.

Ра́дуйся, я́ко и́стинное смиренному́дрие в душе́ стяжа́л еси́; ра́дуйся, сию́ бо доброде́тель, я́ко зе́ницу о́ка сохрани́ти возжела́л еси́.

Ра́дуйся, искуше́ние горды́ни от но́г твои́х отрази́вый; ра́дуйся, Еди́наго Бо́га боя́йся и Тому́ Еди́ному послужи́вый.

Ра́дуйся, смире́нием твои́м диа́вола победи́вый; ра́дуйся, смире́нием ду́х тво́й на высоте́ утверди́вый.

Ра́дуйся, сию́ доброде́тель никогда́же оста́вивый; ра́дуйся, во все́м житии́ твое́м Бо́га просла́вивый.

Ра́дуйся, учи́телю на́ш богому́дрый; ра́дуйся, всего́ ми́ра украше́ние.

Ра́дуйся, преподо́бне о́тче Пи́мене, моли́твенниче о душа́х на́ших.

Конда́к 4.

Бу́ри жите́йских искуше́ний избега́я, убоя́лся еси́, преподо́бне, че́сти от и́ноков и мирски́х люде́й тебе́ воздава́емыя, и сего́ ра́ди оби́тель твою́ та́йно оста́вил еси́. В пусты́ни же, от оби́тели во оби́тель преходя́ и лицезре́нием вели́ких уго́дников Бо́жиих наслажда́яся, я́ко пчела́ ме́д, доброде́телей от ни́х собира́л еси́, ра́дуяся и поя́ Бо́гу: Аллилу́иа.

И́кос 4.

Слы́шаша бли́жнии и да́льнии богоуго́дное житие́ твое́, преподо́бне, и к пото́ку сла́достному богодухнове́нных слове́с твои́х во мно́жестве притека́юще, с весе́лием зва́ху тебе́:

Ра́дуйся, о́тче на́ш пресла́вный; ра́дуйся, па́стырю на́ш предо́брый.

Ра́дуйся, наста́вниче на́ш, Бо́гом науче́нный; ра́дуйся доброде́тели вся́кия пра́вило.

Ра́дуйся, я́ко попра́л еси́ вся́ ко́зни диа́вола; ра́дуйся, я́ко презре́л еси́ того́ искуше́ния.

Ра́дуйся, стяжа́л бо еси́ ве́лие ко Го́споду дерзнове́ние; ра́дуйся, моли́твою бо твое́ю сотвори́л еси́ вели́кия си́лы и исцеле́ния.

Ра́дуйся, благочести́вым житие́м твои́м мно́гия приведы́й ко спасе́нию; ра́дуйся, богоуго́дными словесы́ твои́ми указа́вый к Небеси́ ве́рнейший пу́ть восхожде́ния.

Ра́дуйся, гро́ме, диа́вола устраша́яй; ра́дуйся, я́ко свире́ль Ду́ха Свята́го, слу́х ве́рных услажда́яй.

Ра́дуйся, преподо́бне о́тче Пи́мене, моли́твенниче о душа́х на́ших.

Конда́к 5.

Бо́жие ко гре́шником милосе́рдие непреста́нно помышля́я, преподо́бне, и́ноку не́коему вопроси́вшу тя́, что́ сотворю́, гре́х бра́та моего́ ви́дев, обличу́ ли того́, кро́тце отвеща́л еси́: А́ще покры́еши гре́х бра́та твоего́, и Христо́с в Де́нь су́дный покры́ет твоя́ согреше́ния, да воспое́ши Ему́ во ве́ки: Аллилу́иа.

И́кос 5.

Ви́дев благочести́ваго Феодо́сия, во оде́жде проста́го во́ина прише́дша к тебе́, преподо́бне, и я́сти прося́ща, сухи́й хле́б с водо́ю и со́лию тому́ по́дал еси́, и па́че ца́рских бра́шен сладча́йший тому́ показа́ся. Царю́ же о се́м дивя́щуся, я́ко му́дрый учи́тель ре́кл еси́: Слу́ги твои́ без моли́твы и с праздносло́вием уготовля́ют бра́шна твоя́, мы́ же вся́ твори́м с благослове́ния Бо́жия. Ве́дуще у́бо си́лу моли́твы твоея́, дерза́ем вопи́ти Тебе́:

Ра́дуйся, уго́дниче Бо́жий, дерзнове́нною моли́твою твое́ю чудеса́ творя́й; ра́дуйся, чудесы́ твои́ми ве́ру Христо́ву прославля́яй.

Ра́дуйся, благослове́нием твои́м хле́б сухи́й с водо́ю сладча́йше ца́рских я́стий соде́лавый; ра́дуйся, вся́ твори́ти с благослове́ния Бо́жия запове́давый.

Ра́дуйся, го́ресть жития́ моли́твою услажда́ти науча́яй; ра́дуйся, во Еди́ном Бо́зе всю́ сла́дость жития́ полага́ти вразумля́яй.

Ра́дуйся, богатя́щаяся к воздержа́нию призыва́яй; ра́дуйся, а́лчущия и убо́гия на Го́спода возлага́ти печа́ль укрепля́яй.

Ра́дуйся, веселя́щихся вразуми́телю; ра́дуйся, пла́чущих уте́шителю.

Ра́дуйся уныва́ющих и отча́янных возста́ние; ра́дуйся все́м на́м благо́е упова́ние.

Ра́дуйся, преподо́бне о́тче Пи́мене, моли́твенниче о душа́х на́ших.

Конда́к 6.

Пропове́дник смире́ния и неосужде́ния согреша́ющим бы́л еси́, о́тче, и́нока бо не́коего о бра́те свое́м соблазня́ющася и сего́ ра́ди отъити́ из оби́тели хотя́щаго, пе́рвее у́бо вопроси́л еси́, а́ще свои́ма очи́ма ви́де того́ согреша́юща, по́слежде, взе́м от земли́ ма́л суче́ц, ре́кл еси́: Помы́сли, я́ко греси́ бра́та твоего́ суче́ц су́ть, твои́ же я́ко бервно́, и да не и́маши отню́дь блазни́тися, но во смире́нии воспое́ши Бо́гу: Аллилу́иа.

И́кос 6.

Возсия́л еси́ в пусты́ни, о́тче на́ш, я́коже свети́ло многосве́тлое, тьму́ неве́дения и уны́ния от приходя́щих к тебе́ отгоня́я и вся́ увещава́я пло́ть ду́хови покоря́ти и невозвра́тным по́мыслом Христу́ рабо́тати. Сего́ ра́ди приими́ от на́с похвалы́ сия́:

Ра́дуйся, возста́ния пло́ти стра́хом Бо́жиим обузда́вый; ра́дуйся, ду́х тво́й влады́ку над страстьми́ поста́вивый.

Ра́дуйся, бесо́вския искуше́ния и прило́ги дале́че от себе́ отгна́вый; ра́дуйся, ду́шу твою́ непоро́чну Христу́ соблюды́й.

Ра́дуйся, у́м тво́й от скве́рных и ху́льных по́мыслов очи́стивый; ра́дуйся, на высоту́ безстра́стия возше́дый.

Ра́дуйся, любо́вию твое́ю вся́ покрыва́яй; ра́дуйся, не осужда́ти бли́жняго и на́с науча́яй.

Ра́дуйся, милосе́рдием твои́м на покая́ние подвиза́яй; ра́дуйся, никого́же приходя́щаго к тебе́ во́н изгоня́яй.

Ра́дуйся, чистоты́ серде́чныя зерца́ло; ра́дуйся, всепроще́ния неоску́дное сокро́вище.

Ра́дуйся, преподо́бне о́тче Пи́мене, моли́твенниче о душа́х на́ших.

Конда́к 7.

Хотя́ пра́вый пу́ть покая́ния показа́ти, учи́л еси́, преподо́бне, я́ко не в числе́ дни́й, ни во мно́жестве де́л спасе́ние, но во и́стиннем от греха́ отвраще́нии. Те́мже не́коему бра́ту вопроси́вшему, а́ще довле́ет ми́ три́ ле́та на покая́ние, отвеща́л еси́, я́ко а́ще пока́ешися от всего́ се́рдца твоего́ и к тому́ не согреша́ти произволе́ние и́маши, и в три́ дни́ покая́ние твое́ прии́мет Бо́г, те́м же и мы́, благосе́рдие Того́ сла́вяще, пое́м Ему́: Аллилу́иа.

И́кос 7.

Ди́вно бя́ше житие́ твое́, преподо́бне, не да́л бо еси́ николи́же душе́ твое́й уны́ния сно́м воздрема́ти, но по вся́ дни́ на вя́щшия по́двиги простира́лся еси́, при́тчу о́ную воспомина́я: Кипя́щу сосу́ду не ко́снется му́ха; егда́ же остуди́тся сосу́д, вся́ции га́ди вни́дут в о́нь. Си́це и и́нока неради́ваго удо́бно низлага́ет вра́г, к горя́щему же ду́хом и тружда́ющемуся ника́коже прибли́зитися мо́жет. Сего́ ра́ди усе́рдно зове́м ти́:

Ра́дуйся, свети́льниче моли́твы неугаса́ющий; ра́дуйся, исто́чниче сле́з приснотеку́щий.

Ра́дуйся, я́ко из де́тска ле́ности не позна́л еси́; ра́дуйся, я́ко бде́ние и моли́тву в ча́сть жела́нную избра́л еси́.

Ра́дуйся, во о́бщем житии́ о́браз все́м себе́ показа́вый; ра́дуйся, в уедине́нии и затво́ре, я́коже звезда́, ми́рови возсия́вый.

Ра́дуйся, посто́м и воздержа́нием пло́ть твою́ ду́хови покори́вый; ра́дуйся, коле́на твоя́ от стоя́ний и покло́нов неисце́льными я́звами покры́вый.

Ра́дуйся, сердца́ бо уны́лых житие́м твои́м на по́двиги возбужда́ются; ра́дуйся, ру́це бо и неради́вых на де́лание устремля́ются.

Ра́дуйся, ра́бе Госпо́день ве́рный; ра́дуйся, уго́дниче Того́ нелицеме́рный.

Ра́дуйся, преподо́бне о́тче Пи́мене, моли́твенниче о душа́х на́ших.

Конда́к 8.

Стра́нно бо ви́дети, ка́ко вели́кий подви́жник, николи́же себе́ пощади́вый, осла́бу немощны́м и новонача́льным явля́ше. Вопроше́н бо бы́в, ка́ко подоба́ет пости́тися, запове́да на вся́к де́нь ма́ло вкуша́ти, сре́дний пу́ть, ца́рский, указу́я, я́ко удо́бнейший, и́мже и самоугожде́ние отсека́ется и у́м не возно́сится, безпреткнове́нно поя́ Бо́гу: Аллилу́иа.

И́кос 8.

Ве́сь бы́л еси́ в Бо́зе, преподо́бне, умиле́нным се́рдцем и сокруше́нною душе́ю Тому́ всегда́ предстоя́ и духо́вная ча́да твоя́ науча́я, от жите́йских попече́ний, мирски́я суеты́ и сла́вы удаля́тися, смире́ние же и самоукоре́ние в себе́ храни́ти и та́ко да́р умиле́ния стяжа́ти. Сия́ слы́шавше и от жития́ твоего́ те́мже поуча́ющеся, восхваля́ем тя́ си́це:

Ра́дуйся, вся́ оста́вивый, да Христа́ приобря́щеши; ра́дуйся, ничесо́же име́вый, да все́ми облада́еши.

Ра́дуйся, в ру́бище походи́вый, да во оде́жду Ца́рствия облече́шися; ра́дуйся, вся́кий ви́д пи́щи презре́вый, да ра́йския сла́дости насы́тишися.

Ра́дуйся, отрече́нием земны́х веще́й небе́сная стяжа́вый; ра́дуйся, вме́сто вре́менных бла́г ве́чная улучи́вый.

Ра́дуйся, я́ко на земли́ еще́ живы́й, по́мыслом твои́м непреста́нно на Небеси́ пребыва́л еси́; ра́дуйся, я́ко превы́спренняя созерца́я и со А́нгелы обща́яся, самоукоре́ние в себе́ сохрани́л еси́.

Ра́дуйся, я́ко Бо́гом и челове́ки прославля́ем, нивочто́же себе́ вменя́л еси́; ра́дуйся, я́ко уничижи́в себе́, сла́ву ве́чную насле́довал еси́.

Ра́дуйся, ми́ра Го́рняго жи́телю; ра́дуйся, Христо́в сонасле́дниче.

Ра́дуйся, преподо́бне о́тче Пи́мене, моли́твенниче о душа́х на́ших.

Конда́к 9.

Вся́ по́мыслы к Бо́гу возводи́ти учи́л еси́, преподо́бне, того́ ра́ди и вопроше́н бы́в, что́ потре́бнейше е́сть ко спасе́нию: глаго́лати или́ молча́ти, отвеща́л еси́, я́ко обоя́ ра́вно достохва́льна, а́ще Бо́га ра́ди соверша́ются; глаго́ляй бо ра́ди Бо́га, сло́во Бо́жие возвеща́ет, Бо́га прославля́ет или́ бли́жняго ко спасе́нию наставля́ет, молча́й же ра́ди Бо́га в молча́нии усте́н и по́мыслов умо́м и се́рдцем вопие́т: Го́споди, Иису́се Христе́, Сы́не Бо́жий, поми́луй мя́, гре́шнаго. Те́мже потщи́мся и глаго́лати и молча́ти ра́ди Бо́га, да сподо́бимся со А́нгелы пе́ти: Аллилу́иа.

И́кос 9.

Вити́я Бо́гом умудре́нный бы́л еси́, преподо́бне, вся́ науча́я хра́мину духо́внаго жития́ на основа́нии смире́ния созида́ти, ве́рою, наде́ждою и любо́вию утвержда́ти, по́двигами моли́твы, слеза́ми и воздыха́ньми на высоту́ возводи́ти и, я́ко кро́вом, преда́нием себе́ в во́лю Бо́жию покрыва́ти. Те́мже и на́м си́лу и му́дрость к сему́ строе́нию стяжа́ти Го́спода умоли́, о́тче на́ш, да сия́ похвалы́ принесе́м Ти́:

Ра́дуйся, се́рдце твое́ во оби́тель Ду́ха Свята́го угото́вавый; ра́дуйся, всесоверше́нною любо́вию ко Го́споду ту́ю украси́вый.

Ра́дуйся, непрестаю́щими покая́ния слеза́ми ю́ омы́вый; ра́дуйся, из глубины́ воздыха́ньми ту́ю облагоуха́вый.

Ра́дуйся, мно́гими доброде́тельми ду́шу твою́ обогати́вый; ра́дуйся, вся́ пле́велы страсте́й всеконе́чне искорени́вый.

Ра́дуйся, я́ко чи́стым се́рдцем Бо́га зре́ти сподо́бился еси́; ра́дуйся, я́ко безстра́стным умо́м на высоту́ воспари́л еси́.

Ра́дуйся, а́нгеле, на земли́ с челове́ки пожи́вый; ра́дуйся, челове́че Бо́жий, а́нгельски Тому́ послужи́вый.

Ра́дуйся, венце́м сла́вы от Го́спода увенча́нный; ра́дуйся, предста́телю от Бо́га на́м дарова́нный.

Ра́дуйся, преподо́бне о́тче Пи́мене, моли́твенниче о душа́х на́ших.

Конда́к 10.

Спасе́ние все́м ища́й, преподо́бне, пресви́тера не́коего гневли́ваго вразуми́л еси́. То́й бо нераде́ние и́ноков ви́дя, а́бие гне́вом возгоре́вся и в собо́ре о́браз мона́шеский с те́х совлече́. Ты́ же, я́ко оте́ц ча́дом, терпе́нием и любо́вию исправля́ти согреша́ющия тому́ повеле́л еси́, вся́ подвиза́я Бо́гу пе́ти: Аллилу́иа.

И́кос 10.

Царя́ Небе́снаго Го́спода Иису́са кро́тости подража́я, добро́м зло́ побежда́л еси́, о́тче на́ш. Ста́рец бо не́кий, его́же духо́вныя ча́да оста́вльше, тебе́ после́доваша, за́вистию уязвля́емь, поноша́ше тя́. Ты́ же с да́ры прише́л еси́ к тому́ и мно́гое вре́мя пред дверьми́ его́ стоя́л еси́, зно́й дневны́й кро́тце претерпева́я, до́ндеже ста́рец о́ный, умили́вся се́рдцем, лобза́ние ми́ра даде́ тебе́ и от того́ часа́ бы́сть дру́г тво́й и́скренний. Такову́ю на диа́вола побе́ду твою́ пра́зднующе, тебе́ вопие́м:

Ра́дуйся, кро́ткому Иису́су подража́вый; ра́дуйся, Того́ благода́тию незло́бие стяжа́вый.

Ра́дуйся, зе́млю бо кро́тких насле́довал еси́; ра́дуйся, сердца́ бо мно́гих кро́тостию к себе́ привле́кл еси́.

Ра́дуйся, я́ко диа́волю зло́бу незло́бием победи́л еси́; ра́дуйся, я́ко того́ кова́рство простото́ю упраздни́л еси́.

Ра́дуйся, незло́бием твои́м врага́ в бра́та обрати́вый; ра́дуйся, того́ покая́нием Христа́ возвесели́вый.

Ра́дуйся, я́ко миротво́рец, сы́н Бо́жий нарече́нный; ра́дуйся, смире́ния ра́ди Сами́м Го́сподом возвели́ченный.

Ра́дуйся, я́ко врага́ своего́ возлюби́л еси́; ра́дуйся я́ко незло́бию и любви́ и на́с научи́л еси́.

Ра́дуйся, преподо́бне о́тче Пи́мене, моли́твенниче о душа́х на́ших.

Конда́к 11.

Пе́ний а́нгельских наслажда́ешися на Небеси́, преподо́бне, и́бо на земли́ не труби́л еси́ пред собо́ю, и премно́гая открове́ния в душе́ свое́й таи́л еси́, все́м смире́нно глаго́ля, я́ко а́з от ни́жних е́смь и то́чию стра́сти и не́мощи моя́ испове́м. Те́мже ны́не со А́нгелы и святы́ми пое́ши Бо́гу: Аллилу́иа.

И́кос 11.

Све́т небе́сный еще́ на земли́ живы́й зре́ти сподо́бился еси́, преподо́бне, пло́ть бо твою́ посто́м утончи́в и у́м тво́й ле́гок на моли́твенное де́лание сотвори́в, иногда́ у́бо в ра́йских селе́ниях со А́нгелы и святы́ми су́ща, иногда́ же на Голго́фе, у Креста́ Госпо́дня пла́чуща и пречи́стыя я́звы Его́ лобыза́юща зре́л еси́ себе́ в виде́нии. Те́м у́бо све́том озари́тися и на́м испроси́, уго́дниче Христо́в, да принесе́м ти́ похвалы́ сия́:

Ра́дуйся, та́ин Бо́жиих зри́телю; ра́дуйся, святы́х Его́ купножи́телю.

Ра́дуйся, умносерде́чною моли́твою Го́спода в се́рдце твое́м стяжа́вый; ра́дуйся, на свято́й Голго́фе мы́сленно Тому́ предстоя́вый.

Ра́дуйся, к животворя́щему Его́ Кресту́ духо́вно припада́вый; ра́дуйся, пречи́стыя я́звы Его́ уми́льно лобыза́вый.

Ра́дуйся, любо́вь бо Бо́жия в се́рдце твое́ излия́ся; ра́дуйся, печа́ль бо земна́я дале́че от тебе́ отгна́ся.

Ра́дуйся, со Ио́сифом бо и Никоди́мом Го́спода Твоего́ мы́сленно во гро́бе полага́л еси́; ра́дуйся, с мироно́сицами бо Воскре́сшаго ра́достно срета́л еси́.

Ра́дуйся, у́ме, зря́й Бо́га; ра́дуйся, во пло́ти серафи́ме.

Ра́дуйся, преподо́бне о́тче Пи́мене, моли́твенниче о душа́х на́ших.

Конда́к 12.

Благода́тию от Бо́га почте́нный боля́щия исцеля́ти и де́монов прогоня́ти, се́рдце твое́ сокруше́нно и смире́нно соблю́л еси́, о́тче на́ш. Во о́гнь бо ве́чный с сатано́ю вве́ржену бы́ти себе́ досто́йна вменя́л еси́. Те́мже и на́с, доброде́тели лише́нных и моли́твы не стяжа́вших, па́че же фарисе́я вознося́щихся, твое́ю моли́твою исцели́, да в сокруше́нии пожи́вше, ку́пно с тобо́ю Го́сподеви воспое́м: Аллилу́иа.

И́кос 12.

Пою́ще Твое́ ангелоподо́бное житие́, восхваля́ем тя́, преподо́бне о́тче Пи́мене; в ю́ности бо бы́л еси́ о́браз жития́ ю́ношам, в му́жестве – пра́вило ве́ры муже́м, в ста́рости – учи́тель ста́рцев, на́м же все́м и всегда́ моли́твенник и предста́тель. Сего́ ра́ди вопие́м ти́:

Ра́дуйся, измла́да все́м се́рдцем Христа́ возлюби́вый; ра́дуйся, от ю́ности Тому́ послужи́вый.

Ра́дуйся, любве́ ра́ди Его́ в пусты́ню всели́выйся; ра́дуйся, Того́ ра́ди от ми́ра удали́выйся.

Ра́дуйся, молча́ние возлюби́вый, да со Го́сподом ве́чно бесе́дуеши; ра́дуйся, пло́ть твою́ стра́ху Бо́жию пригвозди́вый, да диа́волу не послу́жиши.

Ра́дуйся, ве́лий по́ст на себе́ возложи́вый, да Еди́наго Христа́ наслади́шися; ра́дуйся, вся́кия лише́ния претерпе́вый, да Христа́ не лиши́шися.

Ра́дуйся, се́рдце твое́ сосу́д благода́ти сотвори́вый; ра́дуйся, и те́ло твое́ безстра́стием украси́вый.

Ра́дуйся, диа́вола посрамле́ние; ра́дуйся, Це́ркви Святе́й похвало́.

Ра́дуйся, преподо́бне о́тче Пи́мене, моли́твенниче о душа́х на́ших.

Конда́к 13.

О преподо́бне и богоно́сне о́тче на́ш Пи́мене, при́зри на на́с, немощны́х, во мно́гия согреше́ния по вся́ дни́ впа́дающих, и богоприя́тным твои́м хода́тайством изба́ви на́с от вся́каго искуше́ния проти́вника и стра́х Бо́жий всели́ в сердца́ на́ша, да в доброде́тели и во смире́нии пожи́вше в ве́це се́м, блаже́нныя о́ныя жи́зни сподо́бимся и со все́ми в ра́дости несконча́емей воспое́м: Аллилу́иа, аллилу́иа, аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

Ангелоподо́бное житие́ возлюби́в, преподо́бне, ма́терь, и до́м, и вся́ стяжа́ния твоя́ оста́вил еси́ и вку́пе с двема́ бра́тома твои́ма, ми́ра бе́гая, во еди́ну от оби́телей вели́кия пусты́ни Еги́петския всели́лся еси́; те́мже зря́ще твоего́ ду́ха горе́ние и бра́тий твои́х ю́ных ко Христу́ прилежа́ние, с ра́достию тебе́ вопие́м:

Ра́дуйся, из де́тска у́м и ду́шу твою́ Го́сподеви преда́вый; ра́дуйся, от ю́ности пло́ть твою́ чи́сту соблюды́й.

Ра́дуйся, Го́спода все́м се́рдцем твои́м возлюби́вый; ра́дуйся, любо́вию к Тому́ и ю́ных бра́тий твои́х воспламени́вый.

Ра́дуйся, любве́ ра́ди ко Го́споду до́м оте́ческий оста́вивый; ра́дуйся, от собла́знов ми́ра и бра́тию твою́ изба́вивый.

Ра́дуйся, ве́рою и любо́вию измла́да укра́шенный; ра́дуйся, мно́гими слеза́ми и воздыха́ньми очище́нный.

Ра́дуйся, в сла́бом телеси́ ве́лию си́лу душе́вную яви́вый; ра́дуйся, во Христе́ Иису́се все́ ра́дование твое́ положи́вый.

Ра́дуйся, разсужде́ния да́ром почте́нный; ра́дуйся смире́нием на высоту́ вознесе́нный.

Ра́дуйся, преподо́бне о́тче Пи́мене, моли́твенниче о душа́х на́ших.

Конда́к 1.

Избра́нный уго́дниче Христо́в и преди́вный чудотво́рче, преподо́бне о́тче Пи́мене, по́двиги твои́ми А́нгелы возвесели́вый и челове́ки мно́гия из глубины́ грехо́вныя возведы́й, прославля́юще просла́вльшаго тя́ Го́спода, хвале́бное сие́ пе́ние прино́сим ти́, недосто́йнии. Ты́ же, предстоя́ в со́нме пра́ведных Престо́лу Вседержи́теля, при́зри ми́лостивым твои́м о́ком на на́с, любо́вию зову́щих ти́:

Ра́дуйся, преподо́бне о́тче Пи́мене, моли́твенниче о душа́х на́ших.

Моли́тва.

О ди́вный уго́дниче, преподо́бне о́тче на́ш Пи́мене, недоуме́ем мы́, гре́шнии, по до́лгу восхвали́ти тя́. Бы́л бо еси́ мона́хов о́браз, исцеле́ний пода́тель, пусты́ни жи́тель, безмо́лвия рачи́тель, страсте́й искорени́тель и вся́кия доброде́тели учи́тель. Сего́ ра́ди уми́льно к тебе́ припа́даем и смире́нно про́сим: от сокро́вищницы твоея́ пода́ждь и на́шему убо́жеству. Смире́нием твои́м на́шу горды́ню низложи́; безстра́стием на́ши стра́сти попали́; бо́дрствованием ду́х ле́ности от на́с отжени́; сле́зными то́ки на́ше нечу́вствие пробуди́; бде́нием от нераде́ния на́с возста́ви; моли́твами в на́с пла́мень моли́твы возжги́; любо́вию на́с братолю́бны сотвори́; пода́ждь же на́м ду́х кро́тости и смире́ния, ду́х чистоты́ и благоче́стия; от страсте́й у́бо на́с свободи́ и ко и́стинному покая́нию приведи́. Ты́ бо во уме́ твое́м непреста́нно име́л еси́ на Кресте́ распя́таго за на́с Сы́на Бо́жия. Того́ сладча́йшее И́мя во уме́ и се́рдце непреста́нно име́ти и на́м, окая́нным, пода́ждь, да любо́вию Тому́ горя́ще и грехи́ на́ша помышля́юще, стра́шный о́ный Де́нь су́дный сре́тити угото́вимся и в Ца́рствие Небе́сное вни́ти с тобо́ю и все́ми святы́ми сподо́бимся, сла́вяще Отца́ и Сы́на и Свята́го Ду́ха во ве́ки веко́в. Ами́нь.