Конда́к 1.

Избра́нному воево́де, к ли́ку святы́х сопричте́нному, свято́му Евста́фию Плаки́де пе́сни похва́льныя прино́сим ны́не. Ты́ же, великому́чениче, огне́м муче́ний в поко́й небе́сный вше́дый, от огня́ страсте́й и вся́ких на́с бе́д свободи́, со упова́нием тебе́ зову́щих:

Ра́дуйся, великому́чениче Евста́фие, моли́твенниче о душа́х на́ших.

И́кос 1.

А́нгелов Влады́ка и челове́ков Творе́ц хотя́й все́м спасти́ся и в ра́зум и́стины приити́, в ди́внем о́бразе яви́ся тебе́, Евста́фие, егда́ над главо́ю еле́ня Кре́ст и на не́м подо́бие распя́таго за ны́ Го́спода Иису́са Христа́ узре́л еси́. Ты́ же гла́с Христо́в: «Почто́ го́ниши Мя́, Плаки́до?» во изумле́нии слы́шав, в стра́се вопроша́л еси́: «Кто́ Ты́, Го́споди, ко мне́ реки́й?» И уве́дев, я́ко То́й е́сть Иису́с Христо́с, прише́дый гре́шныя спасти́, и́стинным Бо́гом Того́ испове́дал еси́. Мы́ же, таково́му твоему́ обраще́нию к ве́ре и́стинней чудя́щеся, взыва́ем си́це:

Ра́дуйся, из среды́ нечести́вых Го́сподем изведе́нный; ра́дуйся, на пу́ть спаси́тельный И́м наста́вленный.

Ра́дуйся, все́м се́рдцем Творца́ возлюби́вый; ра́дуйся, о́гнь страсте́й в себе́ угаси́вый.

Ра́дуйся, я́ко за и́мя Сладча́йшаго Иису́са страда́ния ве́лия претерпе́л еси́; ра́дуйся, я́ко ве́рен Ему́ да́же до сме́рти лю́тыя пребы́л еси́.

Ра́дуйся, венце́м му́ченическим главу́ свою́ украси́вый; ра́дуйся, ра́йския сла́дости со святы́ми вкуси́вый.

Ра́дуйся, великому́чениче Евста́фие, моли́твенниче о душа́х на́ших.

Конда́к 2.

Ви́дя Госпо́дь се́рдца твоего́ чистоту́ и ве́лие милосе́рдие ко все́м бе́дствующим и стра́ждущим, не оста́ви тя́ во мра́ке идолослуже́ния пребыва́ти, оба́че све́том ве́ры Христо́вы тя́ просвети́, да, позна́в и́стиннаго Бо́га, со все́ми пра́ведными воспое́ши Ему́: Аллилу́иа.

И́кос 2.

Ра́зум богопросвеще́н име́я и гла́сом Боже́ственным свы́ше наста́вленный, свя́те Евста́фие, я́ко му́драя глава́ до́му своему́, ко спаси́тельней ве́ре и свято́му Креще́нию приве́л еси́ вся́ живу́щия в не́м. Сего́ ра́ди восхваля́ем тя́, глаго́люще:

Ра́дуйся, и́стину Боже́ственную возлюби́вый; ра́дуйся, ми́лостыню Христа́ ра́ди твори́вый.

Ра́дуйся, о́браз жития́ пра́веднаго на́м показу́яй; ра́дуйся, ра́ны грехо́вныя иску́сно врачу́яй.

Ра́дуйся, я́ко ве́рных к прославле́нию Го́спода воздвиза́еши; ра́дуйся, я́ко любве́ к Бо́гу и бли́жним на́с науча́еши.

Ра́дуйся, сладкогла́сный Христо́в пропове́дниче; ра́дуйся, Го́рняго Ца́рствия со святы́ми насле́дниче.

Ра́дуйся, великому́чениче Евста́фие, моли́твенниче о душа́х на́ших.

Конда́к 3.

Си́лою Боже́ственныя любве́ укрепля́еми, святи́и му́ченицы Евста́фие и Феописти́е, со смире́нием и терпе́нием вся́ бе́ды и напа́сти претерпе́ли есте́, упова́ние свое́ на еди́наго Го́спода возлага́я, с ве́рою пою́ще Ему́: Аллилу́иа.

И́кос 3.

Иму́щи в се́рдце свое́м жела́ние Еди́ному Го́споду ве́рно служи́ти, до́м тво́й оста́вил еси́, Евста́фие, и по мо́рю во Еги́пет со все́м семе́йством устреми́лся еси́. Таково́му смире́нию твоему́ и упова́нию на Про́мысл Бо́жий дивя́щеся, прино́сим ти́ похвалы́ сицевы́я:

Ра́дуйся, я́ко на́с ра́ди обнища́вшему Го́сподеви уподо́бился еси́; ра́дуйся, я́ко подража́яй Свято́му Семе́йству, во Еги́пет бежа́л еси́.

Ра́дуйся, ве́ру ве́лию во Христа́ в се́рдце свое́м име́вый; ра́дуйся, вся́ ско́рби му́жественно претерпе́вый.

Ра́дуйся, су́щим в ну́ждах и ско́рбех ско́рый помо́щниче; ра́дуйся, ду́ш на́ших до́брый наста́вниче.

Ра́дуйся, Кре́ст Христо́в в се́рдце свое́м начерта́вый; ра́дуйся, безро́потным несе́нием креста́ своего́ пу́ть спаси́тельный на́м показа́вый.

Ра́дуйся, великому́чениче Евста́фие, моли́твенниче о душа́х на́ших.

Конда́к 4.

Бу́рю лю́тых гоне́ний и бе́д воздви́же на тя́ вра́г ро́да челове́ческаго, великому́чениче Евста́фие: ты́ же, я́ко И́ов Многострада́льный, вся́ лише́ния низпосыла́емыя тебе́, безро́потно прие́мля, укрепля́вшему тя́ Бо́гу взыва́л еси́: Аллилу́иа.

И́кос 4.

Слы́ша Госпо́дь моли́твы твоя́ к Нему́ возноси́мыя, по́мощь и утеше́ние ми́лостиво подава́ше тебе́, Евста́фие; ты́ же, любо́вию к Бо́гу и бли́жним распаля́яся, ско́рбь о лише́нии супру́жницы и ча́д свои́х со смире́нием и кро́тостию претерпева́л еси́, за вся́ Бо́га благодаря́ще. Мы́ же, таково́му твоему́ терпе́нию удивля́яся, со умиле́нием воспева́ем ти́:

Ра́дуйся, ве́ры непоколеби́мый сто́лпе; ра́дуйся, христиа́н несокруши́мый щи́те.

Ра́дуйся, неоскудева́емое чуде́с сокро́вище; ра́дуйся, неисчерпа́емый исцеле́ний исто́чниче.

Ра́дуйся, я́ко ве́рных во благоче́стии укрепля́еши; ра́дуйся, я́ко вся́ ско́рби со смире́нием претерпева́ти науча́еши.

Ра́дуйся, вмести́лищем дарова́ний Бо́жиих на земли́ бы́вый; ра́дуйся, доброде́тельным житие́м Ца́рствие Небе́сное стяжа́вый.

Ра́дуйся, великому́чениче Евста́фие, моли́твенниче о душа́х на́ших.

Конда́к 5.

Боготе́чною звездо́ю, приводя́щею к позна́нию жития́ смиренному́дреннаго показа́лся еси́, великому́чениче Евста́фие: в стране́ чужде́й мно́гия ле́та, до́блестный воево́да сы́й, в услуже́нии господи́ну своему́ во смире́нии пребыва́л еси́, непреста́нно поя́: Аллилу́иа.

И́кос 5.

Ви́дяще ве́ру, терпе́ние и благодаре́ние твое́ за вся́, досточу́дне Евста́фие, умиля́емся и, чту́ще любо́вию святу́ю па́мять твою́, вопие́м ти́ си́це:

Ра́дуйся, земна́го оте́чествия му́жественный защи́тниче; ра́дуйся, небе́сных селе́ний досто́йный насле́дниче.

Ра́дуйся, я́ко Го́спода Помо́щником вы́ну име́л еси́; ра́дуйся, я́ко жития́ твоего́ за дру́ги своя́ не щади́л еси́.

Ра́дуйся, пред Бо́гом на́ш те́плый хода́таю; ра́дуйся, о душа́х на́ших ско́рый предста́телю.

Ра́дуйся, у Престо́ла Бо́жия о на́с усе́рдно моля́йся; ра́дуйся, о призыва́ющих и́мя твое́ непреста́нно пеки́йся.

Ра́дуйся, великому́чениче Евста́фие, моли́твенниче о душа́х на́ших.

Конда́к 6.

Пропове́дник ве́ры во Христа́ сло́вом и де́лом яви́лся еси́, святы́й му́чениче, доброде́тельным житие́м свои́м мно́гия идолопокло́нники све́том и́стины Христо́вы просвеща́я и и́стинному Бо́гу пе́ти все́х науча́я: Аллилу́иа.

И́кос 6.

Возсия́ све́т ра́дости ве́лия, Го́сподем ми́лостивно тебе́ низпо́сланныя, Евста́фие сла́вне, егда́ по мно́зех ле́тех семе́йство твое́ па́ки вку́пе соедини́ся. Воспева́я ди́вное Промышле́ние Бо́жие, на тебе́ и сро́дницех твои́х явле́нное, зове́м ти́:

Ра́дуйся, благоче́стием твои́м Христу́ угоди́вый; ра́дуйся, ве́лие дерзнове́ние к Нему́ стяжа́вый.

Ра́дуйся, сугу́быя благода́ти от Царя́ сла́вы сподо́бивыйся; ра́дуйся, венце́м му́ченическим от него́ венча́нный.

Ра́дуйся, Святы́я Це́ркви би́сере драги́й; ра́дуйся, во́ине Христо́в непобеди́мый.

Ра́дуйся, бога́тства ми́ра сего́ ни во что́же вмени́вый; ра́дуйся, от Го́спода небе́сную сла́ву улучи́вый.

Ра́дуйся, великому́чениче Евста́фие, моли́твенниче о душа́х на́ших.

Конда́к 7.

Хотя́й нечести́вый Адриа́н же́ртву и́долом принести́, повеле́ ти́, Евста́фие, си́м поклони́тися, мня́ше бо, я́ко ти́и тебе́ побе́ду на враги́ дарова́ша; ты́ же отвеща́л еси́ ему́, я́ко христиа́нин еси́ и еди́ному и́стинному Бо́гу – Иису́су Христу́ ве́рно покланя́ешися, вы́ну воспева́я Ему́: Аллилу́иа.

И́кос 7.

Но́вое зло́ показа́ служи́тель врага́ ро́да челове́ческаго Адриа́н, егда́ в безу́мнем гне́ве свое́м повеле́ тя́ с жено́ю и ча́ды твои́ми на растерза́ние звере́м преда́ти; оба́че не возмо́же вре́да ва́м сотвори́ти: зве́рие бо лю́тии кро́тции соде́лашася, благода́тию Бо́жиею усмиря́еми. Сего́ ра́ди, прославля́я Го́спода, ди́внаго во святы́х Свои́х, с любо́вию вопие́м ти́:

Ра́дуйся, испове́данием Бо́га и́стиннаго нечести́выя посрами́вый; ра́дуйся, преще́ния мучи́теля ни во что́же вмени́вый.

Ра́дуйся, и́дольскаго служе́ния искорени́телю; ра́дуйся, христиа́нскаго благоче́стия насади́телю.

Ра́дуйся, пре́лесть бесо́вскую обличи́вый; ра́дуйся, по́двиг му́ченический до́бре соверши́вый.

Ра́дуйся, ду́шу свою́, во е́же спасти́ ю́, Христа́ ра́ди погуби́вый; ра́дуйся, во Ца́рствии Небе́снем насле́дие со святы́ми улучи́вый.

Ра́дуйся, великому́чениче Евста́фие, моли́твенниче о душа́х на́ших.

Конда́к 8.

Стра́нно бе́ ви́дети и слы́шати неве́рующим во Христа́ и неве́дущим си́лы Бо́жия, ка́ко в не́мощнем челове́честем телеси́ таковы́я му́ки за Христа́ претерпева́ти возмо́жно: бы́л бо еси́, многострада́льне Евста́фие, по повеле́нию нечести́ваго иге́мона, вве́ржен с супру́жницею и ча́дами в раскале́ннаго ме́днаго вола́, в не́мже вы́, му́ки тя́жкия претерпева́я, воспева́ли есте́ Бо́гу: Аллилу́иа.

И́кос 8.

Ве́сь ра́дости боже́ственныя испо́лнился еси́, святы́й му́чениче, и, любо́вию ко Христу́ Го́споду горя́, на сме́рть за и́мя Христо́во му́жественне поте́кл еси́. Мы́ же, страда́ния твоя́ и при́сных твои́х воспомина́юще и ве́лие терпе́ние ва́ше похваля́юще, глаго́лем:

Ра́дуйтеся, и́стиннаго Бо́га пропове́дницы; ра́дуйтеся, те́плии к Бо́гу моли́твенницы.

Ра́дуйтеся, ве́рою кре́пкою Христу́ после́довавшии; ра́дуйтеся, сме́ртию му́ченическою Христо́ви спогре́бшиися.

Ра́дуйтеся, в ра́дость Го́спода своего́ вше́дшии; ра́дуйтеся, скорбьми́ мно́гими живо́т ве́чный насле́довавшии.

Ра́дуйтеся, я́ко ра́йския две́ри ва́м отверзо́шася; ра́дуйтеся, я́ко в селе́ниих пра́ведных на ве́ки водвори́шася.

Ра́дуйся, великому́чениче Евста́фие, моли́твенниче о душа́х на́ших.

Конда́к 9.

Ви́девше ве́рнии, я́ко телеса́ ва́ша, му́ченицы всехва́льнии, невреди́мы во огни́ обрето́шася, восхвали́ша Бо́га, прославля́ющаго святы́я Своя́, и припа́дающе ко святы́м моще́м ва́шим, пе́снь надгро́бную воспе́ша: Аллилу́иа.

И́кос 9

Вети́и многовеща́ннии не возмо́гут досто́йныя похвалы́ изрещи́ ва́м, святи́и му́ченицы, и позна́ти си́лу Христо́ву, е́юже вы́, я́ко броне́ю облеко́шася. Мы́ же, похваля́я по́двиги страда́ний ва́ших, и́хже за ве́ру Христо́ву му́жественне претерпе́ли есте́, воспева́ем ва́м такова́я:

Ра́дуйся, Евста́фие, семе́йств благочести́вых укрепле́ние; ра́дуйся, дома́шния це́ркви утвержде́ние.

Ра́дуйся, Феописти́е, же́н и ма́терей похвало́; ра́дуйся, бра́ка христиа́нскаго диади́мо.

Ра́дуйся, Ага́пите, роди́телей доброде́тельных утеше́ние; ра́дуйся, целому́дреннаго жития́ украше́ние.

Ра́дуйся, Феописти́е, с при́сными твои́ми на пи́р Госпо́день при́званный; ра́дуйся, с ни́ми Царе́м сла́вы венце́м му́ченическим увенча́нный.

Ра́дуйся, великому́чениче Евста́фие, моли́твенниче о душа́х на́ших.

Конда́к 10.

Хотя́й Госпо́дь Иису́с Христо́с просла́вити ва́с, святи́и му́ченицы Евста́фие, Феописти́е, Ага́пите и Феописти́е, внуши́ свято́му Константи́ну це́рковь на ме́сте му́ченическия кончи́ны ва́шея созда́ти, да вси́ притека́ющии к многоцеле́бным моще́м ва́шим, по́мощь ско́рую от ва́с восприи́мут, вопию́ще Бо́гу: Аллилу́иа.

И́кос 10

Сте́ну заступле́ния от вся́ких бе́д и напа́стей, обре́тше ва́с, всехва́льнии му́ченицы, Отцу́ Небе́сному благодаре́ние усе́рдно возсыла́ем за вся́ благодея́ния Его́, ва́ми на́м, недосто́йным, явля́емая; ва́м же, те́плым моли́твенником на́шим, сицево́е прино́сим пе́ние:

Ра́дуйтеся, Це́ркви Христо́вы столпи́ непоколеби́мии; ра́дуйтеся, любо́вию Христо́вою соедине́ннии.

Ра́дуйтеся, А́нгелов Бо́жиих на небесе́х собесе́дницы; ра́дуйтеся, призыва́ющих ва́с на земли́ ско́рии помо́щницы.

Ра́дуйтеся, Ца́рствия Христо́ва наде́жнии на́м хода́таи; ра́дуйтеся, те́плии о на́с к Бо́гу предста́телие.

Ра́дуйтеся, и по сме́рти ва́шей на́с не оставля́ющии; ра́дуйтеся, на пути́ спасе́ния на́с руково́дствующии.

Ра́дуйся, великому́чениче Евста́фие, моли́твенниче о душа́х на́ших.

Конда́к 11.

Пе́ние всеумиле́нное, ны́не на́ми приноси́мое, приими́те, му́ченицы святи́и, вы́ бо, в же́ртву благоуха́нную Го́сподеви себе́ прине́сши, воспева́ли есте́ ему́ до после́дняго издыха́ния ва́шего пе́снь: Аллилу́иа.

И́кос 11.

Светоза́рныя зве́зды яви́лися есте́ на не́бе церко́внем, му́ченицы всехва́льнии, среди́ ко́их и ты́, Евста́фие всехва́льне, све́тло сия́еши; сего́ ра́ди приими́ от на́с похвалы́ сия́:

Ра́дуйся, я́ко сла́ву Трисия́ннаго Божества́ лице́м к лицу́ зри́ши; ра́дуйся, я́ко и на́м све́том Боже́ственныя и́стины просвети́тися тщи́шися.

Ра́дуйся, ве́рныя на пу́ть спасе́ния направля́яй; ра́дуйся, гре́шныя на покая́ние наставля́яй.

Ра́дуйся, я́ко моща́ми твои́ми чудеса́ источа́еши; ра́дуйся, я́ко в хра́мех, созда́нных на прославле́ние и́мене твоего́, незри́мо обита́еши.

Ра́дуйся, стра́нствующих неви́димый спу́тниче; ра́дуйся, все́х призыва́ющих тя́ ско́рый помо́щниче.

Ра́дуйся, великому́чениче Евста́фие, моли́твенниче о душа́х на́ших.

Конда́к 12.

Благода́ть, да́нную ти́ от Бо́га, ве́дуще, страстоте́рпче Христо́в Евста́фие, с благогове́нием и любо́вию покланя́емся многоцеле́бным моще́м твои́м, от ни́хже в неду́зех исцеле́ние и в ско́рбех утеше́ние прие́млем: те́мже и по достоя́нию прославля́ем тя́, засту́пника на́шего небе́снаго, воспева́я о тебе́ Го́сподеви: Аллилу́иа.

И́кос 12.

Пою́ще мно́гая и пресла́вная чудеса́ твоя́, великому́чениче Евста́фие, ублажа́ем тя́ ку́пно с супру́жницею и ча́ды твои́ми, я́ко засту́пников и моли́твенников на́ших пред Бо́гом, и мо́лим тя́: бу́ди на́м во все́м ко бла́гу помо́щник, усе́рдно взыва́ющим ти́:

Ра́дуйся, му́чеников высо́кая похвало́; ра́дуйся, испове́дников многопе́тая сла́во.

Ра́дуйся, разли́чныя боле́зни исцеля́яй; ра́дуйся, в неду́зех облегче́ние да́руяй.

Ра́дуйся, братолю́бия наста́вниче; ра́дуйся, покая́ния пропове́дниче.

Ра́дуйся, с небе́с на на́с призира́яй; ра́дуйся, неви́димо на́м помога́яй.

Ра́дуйся, великому́чениче Евста́фие, моли́твенниче о душа́х на́ших.

Конда́к 13.

О всехва́льный великому́чениче Христо́в Евста́фие, приими́ от на́с похвалы́ сия́, с любо́вию тебе́ приноси́мыя, и предста́тельством твои́м у Престо́ла Го́спода Вседержи́теля испроси́ на́м от все́х неду́г душе́вных и теле́сных, от вра́г ви́димых и неви́димых и му́к ве́чных избавле́ние, да ку́пно с тобо́ю в бу́дущем ве́це воспое́м Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгелов Влады́ка и челове́ков Творе́ц хотя́й все́м спасти́ся и в ра́зум и́стины приити́, в ди́внем о́бразе яви́ся тебе́, Евста́фие, егда́ над главо́ю еле́ня Кре́ст и на не́м подо́бие распя́таго за ны́ Го́спода Иису́са Христа́ узре́л еси́. Ты́ же гла́с Христо́в: «Почто́ го́ниши Мя́, Плаки́до?» во изумле́нии слы́шав, в стра́се вопроша́л еси́: «Кто́ Ты́, Го́споди, ко мне́ реки́й?» И уве́дев, я́ко То́й е́сть Иису́с Христо́с, прише́дый гре́шныя спасти́, и́стинным Бо́гом Того́ испове́дал еси́. Мы́ же, таково́му твоему́ обраще́нию к ве́ре и́стинней чудя́щеся, взыва́ем си́це:

Ра́дуйся, из среды́ нечести́вых Го́сподем изведе́нный; ра́дуйся, на пу́ть спаси́тельный И́м наста́вленный.

Ра́дуйся, все́м се́рдцем Творца́ возлюби́вый; ра́дуйся, о́гнь страсте́й в себе́ угаси́вый.

Ра́дуйся, я́ко за и́мя Сладча́йшаго Иису́са страда́ния ве́лия претерпе́л еси́; ра́дуйся, я́ко ве́рен Ему́ да́же до сме́рти лю́тыя пребы́л еси́.

Ра́дуйся, венце́м му́ченическим главу́ свою́ украси́вый; ра́дуйся, ра́йския сла́дости со святы́ми вкуси́вый.

Ра́дуйся, великому́чениче Евста́фие, моли́твенниче о душа́х на́ших.

Конда́к 1.

Избра́нному воево́де, к ли́ку святы́х сопричте́нному, свято́му Евста́фию Плаки́де пе́сни похва́льныя прино́сим ны́не. Ты́ же, великому́чениче, огне́м муче́ний в поко́й небе́сный вше́дый, от огня́ страсте́й и вся́ких на́с бе́д свободи́, со упова́нием тебе́ зову́щих:

Ра́дуйся, великому́чениче Евста́фие, моли́твенниче о душа́х на́ших.

Моли́тва.

О пресла́вный, святы́й и многострада́льный великому́чениче Христо́в Евста́фие! Услы́ши на́с гре́шных и недосто́йных, святу́ю па́мять твою́ пра́зднующих. Испроси́ на́м у Го́спода многомо́щными моли́твами твои́ми благода́ть, я́же ко спасе́нию, и все́х грехо́в, соде́янных на́ми, проще́ние, земли́ благопло́дие, ми́ру ми́рное устрое́ние и от лю́тых диа́вольских ко́зней свобожде́ние, христиа́нскую кончи́ну жития́ на́шего и немяте́жное чрез возду́шныя мыта́рства к небеси́ прехожде́ние, ты́ бо прия́л еси́ благода́ть сию́ от Го́спода, е́же моли́тися за ны́, и а́ще восхо́щеши по́мощи на́м, почита́ющим свяще́нную па́мять твою́, вся́ мо́жеши сотвори́ти. Не пре́зри у́бо на́с, недосто́йных, страстоте́рпче святы́й, и испроси́ от Го́спода вся́ блага́я и поле́зная душа́м на́шим, я́ко да и мы́ сподо́бимся сла́вити и воспева́ти всесвято́е и великоле́пое и́мя Его́ во преми́рном Ца́рствии Небе́снем, иде́же е́сть все́х святы́х жили́ще, во ве́ки веко́в. Ами́нь.