Конда́к 1.

Избра́нному защи́тнику, побори́телю и низложи́телю нече́стия, новоявле́нному му́ченику и честно́му во́ину Христо́ву, я́ко со́лнце Восто́чней Це́ркви возсия́вшему, и весе́лия ве́рных испо́лнившему, ны́не от всея́ души́ благода́рственная и похва́льная пе́ния прино́сим, с любо́вию пою́ще:

Ра́дуйся, Иоа́нне, великому́чениче Христо́в.

И́кос 1.

А́нгелом возлю́блено бы́сть богоуго́дное житие́ твое́, страда́ния Христо́ва нося́щу ти́, Иоа́нне. И́бо в телеси́ сы́й, житие́ а́нгельское на земли́ пожи́л еси́, ми́лостынями и непреста́нными моли́твами, та́же и страда́нии. Те́мже мы́ по достоя́нию сия́ похва́льная прино́сим ти́:

Ра́дуйся, я́ко поще́нии и непреста́нными твои́ми моли́твами уподо́бился еси́ А́нгелом; ра́дуйся, я́ко ми́лостынями и слеза́ми твои́ми ужаси́л еси́ де́монов.

Ра́дуйся, я́ко уте́шил еси́ скорбя́щия; ра́дуйся, я́ко помога́л еси́ боля́щим.

Ра́дуйся, я́ко в ме́ртвенном телеси́ показа́лся еси́ земны́й А́нгел; ра́дуйся, я́ко мудрова́нием бы́л еси́ челове́к небе́сный.

Ра́дуйся, я́ко от благове́рных роди́телей произше́л еси́; ра́дуйся, я́ко правосла́вную ве́ру в коне́ц сохрани́л еси́.

Ра́дуйся, от сла́внаго гра́да Трапезу́нда произра́стший; ра́дуйся, я́ко вся́кими доброде́телями соверше́нно удобри́лся еси́.

Ра́дуйся, я́ко купе́ц иску́сен на мо́ри показа́лся еси́; ра́дуйся, я́ко купе́чество твоея́ души́ до́бре упра́вил еси́.

Ра́дуйся, Иоа́нне, великому́чениче Христо́в.

Конда́к 2.

Ви́дя, му́чениче Христо́в, лука́вство диа́воле, инове́рным возни́кшее на тя́, во е́же бы удали́ти тя́ от правосла́вныя ве́ры, но да́нною ти́ от Бо́га прему́дростию, позна́л еси́ кова́рства волхва́, бла́гостию Вы́шняго не уловле́н о́ными, пребы́л еси́ и та́ко воспе́л еси́: Аллилу́иа.

И́кос 2.

Ра́зумом, просвеще́нным свы́ше, позна́вши, треблаже́нне, наноси́мую на тя́ еретико́м Реи́зом клевету́, к епа́рху Белгра́да язы́чнику, а́ки бы ты́ изво́лил отступи́ти от и́стинныя христиа́нския ве́ры; и а́ще о́ный вся́ким о́бразом преклоня́ше тя́, но ты́ ника́коже победи́м пребы́л еси́. Те́мже по достоя́нию слы́ши на́ми приноси́мая сия́:

Ра́дуйся, я́ко лжи́ваго Реи́за обличи́л еси́; ра́дуйся, подо́бно столпу́ непоколеби́м пребы́л еси́.

Ра́дуйся, я́ко ле́сти епа́рха нивочто́же вмени́л еси́; ра́дуйся, я́ко ве́рных в благоче́стии укрепи́л еси́.

Ра́дуйся, я́ко пожре́ти со́лнцу и денни́це не восхоте́л еси́; ра́дуйся, я́ко си́м нечести́вому жрецу́ поруга́лся еси́.

Ра́дуйся, я́ко Созда́теля си́х Еди́наго Бо́га в Тро́ице пропове́дал еси́; ра́дуйся, я́ко христиа́нския ве́ры не поху́лил еси́.

Ра́дуйся, я́ко о́ная свети́ла тва́рь бы́ти, а не бо́ги ре́кл еси́; ра́дуйся, сего́ ра́ди от тира́н уму́ченный.

Ра́дуйся, я́ко епа́рха пред все́ми обличи́вый; ра́дуйся, того́ к благоче́стию преклони́ти тща́выйся.

Ра́дуйся, Иоа́нне, великому́чениче Христо́в.

Конда́к 3.

Си́лою благода́ти Свята́го Ду́ха укрепле́н сы́й, со мно́гим дерзнове́нием веща́л еси́ иге́мону, во́ине Иису́сов: не наде́йся, о тира́не, я́ко когда́-ли́бо от Христа́ моего́ отпаду́, и тва́ри па́че не́жели Созда́телю поклоню́ся! Да не бу́дет сие́, до́ндеже дыха́ние мое́ испущу́, те́мже ве́лиим гла́сом возопи́л еси́: Аллилу́иа.

И́кос 3.

Име́я в лице́ твое́м, страстоте́рпче Христо́в, весе́лие, егда́ глаго́лал еси́ к епа́рху сия́, и не бе́ в тебе́ опа́сства, ни боя́зни. О́н же не моги́й терпе́ти сего́, возгоре́ся я́ростию, повеле́ принести́ мно́гия па́лицы и обнажи́ти тя́; ты́ же я́ко и́н обре́лся еси́, сего́ ра́ди и мы́ вопие́м ти́ сия́:

Ра́дуйся, я́ко, егда́ уви́дел еси́ па́лицы, не убоя́лся; ра́дуйся, я́ко от виде́ния си́х па́че и па́че тира́ну воспроти́вился еси́.

Ра́дуйся, я́ко ве́тхия оде́жды на земли́ совле́клся еси́; ра́дуйся, я́ко в порфи́ру нетле́ния на небеси́ обле́клся еси́.

Ра́дуйся, я́ко сме́ртных муче́ний не устраши́лся еси́; ра́дуйся, я́ко небреже́нием о си́х мучи́тель зело́ му́чимь бы́сть.

Ра́дуйся, я́ко си́м его́ пред предстоя́щими обличи́л еси́; ра́дуйся, я́ко раба́ Бо́жия себе́ бы́ти испове́дал еси́.

Ра́дуйся, я́ко содержа́й оте́ческия уче́ния; ра́дуйся, я́ко же́ртвы иге́моновых бого́в не прия́л еси́.

Ра́дуйся, я́ко нечести́ву без закосне́ния му́чити тя́ ре́кл еси́; ра́дуйся, я́ко те́ми муче́нии в Ца́рство Небе́сное посла́ тя́.

Ра́дуйся, Иоа́нне великому́чениче Христо́в.

Конда́к 4.

Бу́рю страсте́й нанесе́ на тя́, о многострада́льче, егда́ изре́кл еси́, я́ко Творцу́ поклоню́ся, а не созда́нию, и, егда́ нечести́вый мучи́тель твоя́ глаго́лы услы́ша, е́же бы преклони́ти тя́ к своему́ хоте́нию отча́яся, ди́вным и юро́дивым гне́вом возгоре́ся и нача́т тя́ му́чити. Ты́ же, му́чениче Христо́в, му́жественне терпя́щи, укрепля́ющу тя́ Бо́гу с весе́лием пе́л еси́: Аллилу́иа.

И́кос 4.

Слы́шаша ве́рнии, я́ко бы́сть се́рдце твое́ адама́нтово, егда́ любве́ ра́ди Жела́емаго тобо́ю пострада́л еси́, блаже́нне му́чениче Христо́в, нивочто́же вмени́в муче́ния, благода́тию Христо́вою укрепля́ем, гне́в мучи́теля а́ки ядови́таго а́спида попра́в, и на тяжча́йшия муче́ния ра́достно поте́кл еси́; сего́ ра́ди слы́шиши от на́с сия́:

Ра́дуйся, я́ко растяго́ша тя́ на земли́ на муче́ния обнаже́нна; ра́дуйся, я́ко у́мныя о́чи горе́ на не́бо име́вый.

Ра́дуйся, егда́ сукова́тыми па́лицами без ми́лости бие́н бы́в, не изнемо́гл еси́; ра́дуйся, я́ко мучи́тели лю́те му́чившии тя́ ослабе́ша.

Ра́дуйся, я́ко раздробле́ние твоего́ телесе́ до́блественне стерпе́вый; ра́дуйся, я́ко си́м мучи́теля на гне́в подви́гнувый.

Ра́дуйся, я́ко от многобие́ния к па́лицам прилипа́ющая пло́ть твоя́ горе́ возноша́шеся; ра́дуйся, я́ко си́м собра́л еси́ на удивле́ние А́нгелов.

Ра́дуйся, кро́вию твое́ю зе́млю обагри́вый; ра́дуйся, сатану́ нога́ми попра́вый.

Ра́дуйся, за сие́ Влады́це Христа́ возблагодари́вый; ра́дуйся, я́ко О́н тя́ и на тяжча́йшия муче́ния укрепи́л е́сть.

Ра́дуйся, Иоа́нне великому́чениче Христо́в.

Конда́к 5.

Боготе́чней звезде́, путеводи́вшей дре́вле волхво́в к пра́ведному Со́лнцу, подо́бен бы́л еси́, великому́чениче Христо́в, приводя́ к позна́нию и́стиннаго Бо́га, Ему́же ты́ моли́лся еси́, мучи́тель же па́че гне́ва испо́лнися и лю́те тя́ му́чиша, я́ко и муче́ния му́жественне претерпева́я, из глубины́ се́рдца взыва́л еси́ Христу́: Аллилу́иа.

И́кос 5.

Ви́девше тя́ ве́рнии, по повеле́нию иге́монову, вери́гами свя́зана, во́ине Христо́в Иоа́нне, вве́ржена в темни́цу, оста́виша тя́ на тяжча́йшия муче́ния, и всю́ пло́ть твою́ от бие́ния раздробле́ну, ве́лиею ско́рбию объя́ти бы́вше, в други́й де́нь па́ки тя́ на су́д предста́виша и пред мучи́телем ста́л еси́ лице́м весе́лый, нечести́вый же зело́ удиви́ся и ужасе́ся, сего́ ра́ди и мы́ тя́ ублажа́юще зове́м:

Ра́дуйся, я́ко си́м диа́вола устраши́л еси́; ра́дуйся, я́ко в темни́це заключе́нный обита́вый.

Ра́дуйся, я́ко по си́х в пресве́тлый ра́й всели́лся еси́; ра́дуйся, я́ко, тяжча́йшими ра́нами по всему́ телеси́ ура́неный, весе́лый обре́лся еси́.

Ра́дуйся, я́ко неи́стовый мучи́тель сему́ удиви́ся; ра́дуйся, о исцеле́нии ра́н на твое́м телеси́ небреги́й.

Ра́дуйся, я́ко челове́к тво́й вне́шний разруши́ся; ра́дуйся, я́ко вну́тренний обнови́ся.

Ра́дуйся, я́ко тяжча́йшия муче́ния на тя́ мучи́телем вы́мысленна; ра́дуйся, о́ныя с любо́вию прие́мый.

Ра́дуйся, я́ко си́м душа́ твоя́ красне́йше процвете́.

Ра́дуйся, Иоа́нне великому́чениче Христо́в.

Конда́к 6.

Пропове́дал еси́, достосла́вне му́чениче Христо́в, хотя́щую приити́ на тя́ Бо́жию благода́ть, о не́й же мы́слию внима́я, до́блественне терпе́л еси́ страда́ния, строга́ние и растерза́ние пло́ти твоея́, сего́ ра́ди мно́жае испо́лнися гне́ва юро́див тира́н, я́ко ди́кий зве́рь воскрича́, повеле́ жесточа́йше му́чити тя́ и без ми́лости би́ти; сему́ же бы́вшу, вопия́л еси́ Бо́гу: Аллилу́иа.

И́кос 6.

Возсия́вый му́ченическим по́двигом, страстоте́рпче Христо́в Иоа́нне, та́ко бо бы́л еси́ му́чимь, я́ко и вну́тренняя разсе́деся, и изнемого́ша мучи́тели от неми́лостивых ударе́ний, еди́ны по други́м пременя́емы; ты́ же, до́блий во́ине, не премени́л еси́ ра́зума к рачи́телю своему́ Го́споду Иису́су, но па́че моли́лся еси́, да да́рует ти́ до конца́ терпе́ти. Мы́ же, моли́твами твои́ми защища́ющиеся, вопие́м ти́ сия́:

Ра́дуйся, я́ко ты́, за Христа́ без ми́лости му́чимый, не премени́лся еси́ в терпе́нии; ра́дуйся, я́ко бию́щии тя́ пременя́хуся.

Ра́дуйся, я́ко умо́м в Бо́зе, укрепля́ющем тя́, стоя́л еси́; ра́дуйся, я́ко Христо́с благода́тию Свята́го Ду́ха свы́ше посети́ тя́.

Ра́дуйся, я́ко вси́ на позо́рище собра́вшиися за суровство́ мучи́теля укори́ша; ра́дуйся, я́ко тебе́ с Небесе́ нерукотворе́нная оде́жда изтка́ся.

Ра́дуйся, я́ко и му́чащии тя́ мучи́тели изнемого́ша, ра́дуйся, я́ко ви́девшии тя́ мно́гия печа́ли испо́лнишася.

Ра́дуйся, я́звы Христо́вы на те́ле свое́м носи́вый; ра́дуйся, я́ко Христо́с неувяда́емь вене́ц на небеси́ тебе́ угото́ва.

Ра́дуйся, Иоа́нне великому́чениче Христо́в.

Конда́к 7.

Хотя́ше, треблаже́нне му́чениче, мучи́тель к своему́ хоте́нию приклони́ти тя́, не име́я же люте́йших муче́ний, повеле́ привести́ свире́паго коня́, и святы́я твоя́ но́зи ко о́шибу его́ кре́пко привяза́ти, и по все́х у́лицех гра́да влачи́ти. Тебе́ же, во́ине Христо́в, влачи́му бы́вшу, позо́р бы́л еси́ А́нгелом и челове́ком, пою́щим Бо́гу: Аллилу́иа.

И́кос 7.

Но́ваго тя́ по благоче́стии ревни́теля ви́дя нечести́вый, умы́сли необы́чну на тя́ му́ку, страстоте́рпче Христо́в: влачи́му бо ти́ бы́стро су́щу, ча́сти от телесе́ твоего́ на ка́менех отрева́еми, остава́хуся, глава́ сокруша́шеся; ве́рнии же, виде́вшия тя́, ве́лиим сожале́нием объя́ти бы́вше, ты́ же, горе́ у́м к Бо́гу име́яй, в та́йне моли́лся еси́. Сего́ ра́ди и мы́ раби́ твои́ удивля́шеся, сия́ похва́льная воспису́ем ти́:

Ра́дуйся, я́ко муче́нием твои́м бы́л еси́ пропове́дник Святы́я Тро́ицы, ра́дуйся, я́ко кре́пким терпе́нием твои́м бы́л еси́ благи́я ве́ры основа́ние.

Ра́дуйся, я́ко бы́л еси́ возже́н огне́м неизрече́нныя к Бо́гу любве́; ра́дуйся, я́ко Его́ ра́ди претерпе́л еси́ раздробле́ние твоея́ пло́ти.

Ра́дуйся, я́ко бы́л еси́ позо́р умиле́ния ве́рным; ра́дуйся, я́ко глава́ твоя́ влачи́ма, Христа́ ра́ди, о ка́мение сокруша́шеся.

Ра́дуйся, я́ко моли́твами твои́ми глава́ неви́димаго врага́ сотре́ся, ра́дуйся, я́ко исте́кшею ти́ кро́вию земля́ обагри́ся.

Ра́дуйся, я́ко Христо́с во Ца́рствии Небе́снем вене́ц нетле́ния тебе́ дарова́; ра́дуйся, я́ко Его́ ра́ди на земли́ пострада́л еси́.

Ра́дуйся, я́ко с Ни́м на Небеси́ ца́рствуеши.

Ра́дуйся, Иоа́нне великому́чениче Христо́в.

Конда́к 8.

Стра́нную си́лу прокля́тый ро́д иуде́йский ви́дев в тебе́, му́чениче Христо́в, егда́ свире́пым ко́нем влача́ше тя́ по у́лице: еди́ни посмева́шася ти́, друзи́и скривля́ху лица́ своя́, е́же име́яху в рука́х мета́ша в тя́, о́вии же посмева́хуся, неподо́бныя де́яху. Ты́ же, до́блий во́ине Христо́в, со благодаре́нием терпе́л еси́, укрепля́ющему тя́ Бо́гу непреста́нно поя́: Аллилу́иа.

И́кос 8.

Всего́ Иису́са име́я в блаже́нней души́ и уме́ твое́м, страстоте́рпче, и наконе́ц тече́ния по́двига твоего́ дости́гши, еди́н от насмеха́ющихся тебе́ иуде́й потече́ во сво́й до́м, взе́м ме́ч обнаже́н и о́ным честну́ю и святу́ю главу́ твою́ отсече́ и си́м све́тлую твою́ ду́шу в ру́це тобо́ю рачи́маго Христа́ предаде́. Те́мже и от на́с слы́шиши сия́:

Ра́дуйся, я́ко от иуде́й посмея́ние и поруга́ния Христа́ ра́ди прия́л еси́; ра́дуйся, я́ко си́м поруга́нному и́ми Иису́су после́довал еси́.

Ра́дуйся, я́ко от иуде́й бы́л еси́ ударя́ем; ра́дуйся, я́ко же и Христо́с на́с ра́ди гре́шных, ты́ же Христа́ ра́ди му́ки до́бле терпе́л еси́.

Ра́дуйся, я́ко прокля́тый ро́д мече́м главу́ твою́ отсече́; ра́дуйся, я́ко Иису́с пресве́тлым венце́м главу́ твою́ увенча́.

Ра́дуйся, я́ко с му́ченицы ку́пно во оби́телех небе́сных прославля́ешися; ра́дуйся, я́ко мы́ ве́рнии име́ем тя́ при́снаго хода́тая к Бо́гу.

Ра́дуйся, я́ко моле́ния твоя́ су́ть прия́тна Бо́гу; ра́дуйся, я́ко па́мять твоя́ в Це́ркви Христо́вой честна́ е́сть.

Ра́дуйся, я́ко и́мя твое́ услажда́ет все́х, правосла́вную ве́ру почита́ющих.

Ра́дуйся, Иоа́нне великому́чениче Христо́в.

Конда́к 9.

Ви́девше ве́рнии по отсече́нии честны́я главы́ твоея́ и изше́ствии святы́я твоея́ души́ от те́ла, пресла́вне му́чениче, лежа́щую пло́ть твою́ со отсече́нною главо́ю, не погребе́нную и презира́емую, сожалева́ху; наста́вшей же но́щи пресла́внаго чудесе́, сто́лп до небесе́ над твои́ми святы́ми моща́ми ви́ден бы́сть: свещи́ горя́ху и му́жие в ри́зы бе́лыя облече́нни кадя́ще о́крест телесе́ твоего́, пою́ще неизрече́нныя и свяще́нныя словеса́, с ни́ми же и ты́ воспева́л еси́ Бо́гу: Аллилу́иа.

И́кос 9.

Вити́я красноречи́выя не мо́гут изрещи́ пе́ние, от А́нгел бы́вшее пое́мое о́крест святы́х твои́х моще́й, треблаже́нне му́чениче; еди́н же от иуде́й сие́ слы́шаще, помышля́ше земны́х бы́ти челове́к, напряже́ лу́к пусти́ стрелу́, но ничто́же у́спе окая́нный се́й, все́м бо бы́сть сожале́ния зре́лище. Те́м же и мы́ о сицево́м чудеси́ удиви́шеся зове́м ти́:

Ра́дуйся, досто́йне надгро́бнаго а́нгельскаго пе́ния; ра́дуйся, я́ко Христо́с с Небесе́ призре́ на святы́я твоя́ мо́щи.

Ра́дуйся, я́ко ви́ден бы́сть над твои́ми святы́ми моща́ми сто́лп о́гненный до небесе́; ра́дуйся, я́ко се́й мно́гих ужаси́.

Ра́дуйся, я́ко о́ный иуде́й Бо́жиим мще́нием нака́зан бы́сть; ра́дуйся, я́ко сие́ в ве́лию сла́ву святы́х твои́х моще́й соде́яся.

Ра́дуйся, я́ко лю́дие на позо́р о́наго иуде́я стеко́шася; ра́дуйся, я́ко по испове́дании его́ пред все́ми от наказа́ния спасе́ся.

Ра́дуйся, я́ко уве́давши мучи́тель о чудеси́ се́м, зело́ ужасе́ся; ра́дуйся, я́ко христиа́ном сего́ ра́ди погребсти́ тя́ повеле́.

Ра́дуйся, я́ко це́рковь прия́т погребе́нное, честно́е те́ло твое́; ра́дуйся, я́ко свята́я душа́ твоя́ во оби́телех небе́сных всели́ся.

Ра́дуйся, Иоа́нне великому́чениче Христо́в.

Конда́к 10.

Хотя́шеся, многострада́льне му́чениче Христо́в, оклевета́телю и преда́телю твоему́ честно́е и многострада́льное те́ло твое́ похи́тити и во свое́ оте́чество принести́, но ты́, во́ине Христо́в, ско́ро иере́ю о́ныя це́ркви во сне́ яви́лся и о се́м возвести́л еси́ ему́; о́н же к це́ркви прите́к и честны́я твоея́ мо́щи из ру́к его́ отъя́т, с ра́достию поя́: Аллилу́иа.

И́кос 10.

Егда́, му́чениче Христо́в, честны́я и святы́я твоя́ мо́щи от иноро́дных Бо́жиим про́мыслом спасо́шася, во олтаре́ поста́влени бы́ша бли́з святы́я трапе́зы, иде́же А́гнец всегда́ за спасе́ние на́ше жре́тся, Ему́ же и ты́ же́ртва жива́я принесла́ся еси́. Ве́рнии же о се́м уве́давше, просла́виша всеще́драго Бо́га, прославля́ющаго святы́я Своя́, с ни́ми же и мы́ похва́льныя пе́ния си́и прино́сим ти́:

Ра́дуйся, я́ко святы́я твоя́ мо́щи неукра́дены и невреди́мы пребы́ша; ра́дуйся, я́ко инове́рный посра́млен и то́щ прогна́ся.

Ра́дуйся, я́ко иере́ями Це́ркви честны́я твоя́ мо́щи во олтари́ положены́ бы́ша; ра́дуйся, я́ко о се́м возра́довашася ве́рнии.

Ра́дуйся, я́ко и́ми непреста́нно чудеса́ содева́ются; ра́дуйся, я́ко и́ми и де́моны от мно́гих изгони́мы быва́ют.

Ра́дуйся, я́ко сто́лп о́гненный с небесе́ над ни́ми явля́шеся; ра́дуйся, я́ко снисходи́ша к ни́м А́нгелы.

Ра́дуйся, мно́жицею благоуха́ние от о́ных исхо́дит; ра́дуйся, я́ко вся́кия боле́зни тобо́ю исцеля́ются.

Ра́дуйся, я́ко о содева́емых тобо́ю чуде́с ве́сть повсю́ду про́йде; ра́дуйся, я́ко до коне́ц земли́, Бо́гу та́ко благоволи́вшу, твоя́ ве́сть дости́же.

Ра́дуйся, Иоа́нне великому́чениче Христо́в.

Конда́к 11.

Пе́ния похва́льнаго не́сть по достоя́нию похвали́ти благоле́пие благода́ти чуде́с, я́коже от честны́х и святы́х твои́х моще́й быва́ют, достосла́вне му́чениче Христо́в; не то́чию бо лю́дие, но и цари́ и кня́зи чту́т и поклоня́ются и лобыза́ют тя́ с любо́вию. Ты́ же, я́ко имы́й дерзнове́ние к Бо́гу и Влады́це все́х, испроси́ на́м все́м в се́й жи́зни теле́снаго здра́вия, в бу́дущем же ве́це душе́внаго спасе́ния, любо́вию с тобо́ю пою́щим Бо́гу: Аллилу́иа.

И́кос 11.

Светоприе́мная свеща́ су́ть честны́я и святы́я твоя́ мо́щи, многострада́льне му́чениче Христо́в Иоа́нне, на све́щнице Це́ркви Христо́вы поста́влени, просвеща́ющия мно́гое вре́мя ме́сто, на не́мже страда́л еси́, та́кже благослове́нием Бо́жиим, тща́нием же благочести́ваго господа́ря пренесе́нна в Молдовлахи́ю, непреста́нно све́тят, и все́м с ве́рою и любо́вию прибега́ющим ко о́нем лучи́ чуде́с излива́ют. Мы́ же сия́ благода́ти прича́стницы бы́вше, прино́сим ти́ сия́:

Ра́дуйся, луче́ невече́рняго и мы́сленнаго све́та; ра́дуйся, я́ко всю́ поднебе́сную просвеща́еши.

Ра́дуйся, пресве́тлыя денни́це невече́рняго дне́; ра́дуйся, я́ко и от на́с изволе́нием Бо́жиим бы́л еси́ удале́нный.

Ра́дуйся, я́ко и та́мо мно́гое вре́мя луча́ми благода́ти Христо́вы просвеща́л еси́; ра́дуйся, я́ко смотре́нием Бо́жиим обра́тно па́ки к на́м прише́л еси́.

Ра́дуйся, сми́рно, Це́рковь Христо́ву облагоуха́ющая: ра́дуйся, я́ко все́х приходя́щих к святы́м твои́м моща́м небе́снаго твоего́ благоуха́ния сподобля́еши.

Ра́дуйся, сосу́де ми́ра Христо́ва неистоща́емь и неизче́тных боле́зней врачева́ний содержа́щь; ра́дуйся, все́м прося́щим бла́г изоби́льных пода́телю.

Ра́дуйся, я́ко благода́ть и сла́ва Царя́ Небе́снаго на тя́ излия́ся; ра́дуйся, я́ко и ты́ благода́ть исцеле́ний от все́х боле́зней изоби́льно все́м подае́ши.

Ра́дуйся, Иоа́нне великому́чениче Христо́в.

Конда́к 12.

Благода́ть прия́л еси́ от Бо́га, всехва́льне и многострада́льне му́чениче, исцеля́ти вся́кия боле́зни и неду́ги душе́вные и теле́сные. Те́м же ны́не предстоя́щи Христу́, во страда́ниях твои́х укрепи́вшему тя́, не преста́ни хода́тайствовати все́м на́м прося́щи теле́снаго здра́вия и душе́внаго спасе́ния, со благогове́нием и любо́вию чту́щих святу́ю па́мять твою́, пою́щим Бо́гу: Аллилу́иа.

И́кос 12.

Пое́м, почита́ем, сла́вим, ублажа́ем многоболе́зненныя страда́ния твоя́, терпе́ние до конца́, до́блественне, подъе́м и тве́рдость адама́нтову несравне́нно превзоше́д, я́же показа́л еси́ в телеси́ твое́м, за ня́же подвигополо́жник Христо́с Госпо́дь на земли́ и на Небеси́ просла́ви и на́м недосто́йным дарова́ тя́, свя́те победоно́сче, великому́чениче Христо́в Иоа́нне, вопию́ще ти́, треблаже́нне, сия́:

Ра́дуйся, я́ко и на ме́сте пребыва́еши и обита́еши с во́и небе́сными; ра́дуйся, я́ко провожде́н бы́л еси́ десни́цею Царя́ Христа́ со сла́вою и че́стию пресла́вно венча́лся еси́.

Ра́дуйся, я́ко по многострада́нии твое́м прия́ тя́ Госпо́дь во упокое́ния ве́чная; ра́дуйся, я́ко сокро́вище некра́домое на Небеси́ приобре́л еси́.

Ра́дуйся, я́ко мзда́ твоя́ мно́га во све́тлостех святы́х тебе́ угото́вася; ра́дуйся, во искуше́ниях и ну́ждах те́плый предста́телю.

Ра́дуйся, ра́дости и ве́чныя сла́вы всеще́дрейший на́м хода́таю; ра́дуйся, я́ко тобо́ю наде́емся получи́ти ве́чная бла́га.

Ра́дуйся, Иоа́нне великому́чениче Христо́в.

Конда́к 13.

О, многострада́льче святы́й, великому́чениче и победоно́сче Христо́в Иоа́нне. Приими́ сие́ от скве́рных усте́н на́ших со умиле́нием приноси́мое Ти́ моле́ние и от все́х неду́г душе́вных и теле́сных, от вра́г ви́димых и неви́димых, и от ве́чныя му́ки, благоприя́тными моли́твами Твои́ми на́с изба́ви, да с тобо́ю ку́пно в бу́дущем ве́це во оби́телех святы́х пое́м Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгелом возлю́блено бы́сть богоуго́дное житие́ твое́, страда́ния Христо́ва нося́щу ти́, Иоа́нне. И́бо в телеси́ сы́й, житие́ а́нгельское на земли́ пожи́л еси́, ми́лостынями и непреста́нными моли́твами, та́же и страда́нии. Те́мже мы́ по достоя́нию сия́ похва́льная прино́сим ти́:

Ра́дуйся, я́ко поще́нии и непреста́нными твои́ми моли́твами уподо́бился еси́ А́нгелом; ра́дуйся, я́ко ми́лостынями и слеза́ми твои́ми ужаси́л еси́ де́монов.

Ра́дуйся, я́ко уте́шил еси́ скорбя́щия; ра́дуйся, я́ко помога́л еси́ боля́щим.

Ра́дуйся, я́ко в ме́ртвенном телеси́ показа́лся еси́ земны́й А́нгел; ра́дуйся, я́ко мудрова́нием бы́л еси́ челове́к небе́сный.

Ра́дуйся, я́ко от благове́рных роди́телей произше́л еси́; ра́дуйся, я́ко правосла́вную ве́ру в коне́ц сохрани́л еси́.

Ра́дуйся, от сла́внаго гра́да Трапезу́нда произра́стший; ра́дуйся, я́ко вся́кими доброде́телями соверше́нно удобри́лся еси́.

Ра́дуйся, я́ко купе́ц иску́сен на мо́ри показа́лся еси́; ра́дуйся, я́ко купе́чество твоея́ души́ до́бре упра́вил еси́.

Ра́дуйся, Иоа́нне, великому́чениче Христо́в.

Конда́к 1.

Избра́нному защи́тнику, побори́телю и низложи́телю нече́стия, новоявле́нному му́ченику и честно́му во́ину Христо́ву, я́ко со́лнце Восто́чней Це́ркви возсия́вшему, и весе́лия ве́рных испо́лнившему, ны́не от всея́ души́ благода́рственная и похва́льная пе́ния прино́сим, с любо́вию пою́ще:

Ра́дуйся, Иоа́нне, великому́чениче Христо́в.

Моли́тва.

Святы́й, сла́вный и всехва́льный великому́чениче Христо́в Иоа́нне, несумне́нный хода́таю на́шего спасе́ния. Мо́лим тя́ раби́ твои́, собра́нии дне́сь в Боже́ственнем твое́м хра́ме и ра́це святы́х моще́й покланя́ющияся; ми́лостив бу́ди я́коже на́м, та́ко и дале́че отстоя́щим и на по́мощь тя́ призыва́ющим и му́ченическия твоя́ страда́ния похвала́ми ублажа́ющим. Испроси́ на́м все́м у многоми́лостиваго Го́спода Бо́га и Спа́са на́шего Иису́са Христа́ проще́ния и оставле́ния грехо́в, до сего́ дне́ и часа́ соде́янных на́ми. Сохрани́ на́с невреди́мых от все́х ко́зней лука́ваго и ненаве́тну жи́знь на́шу соблюди́ от все́х зо́л душе́вных и теле́сных, всегда́, ны́не и при́сно и во ве́ки веко́в. Ами́нь.