Конда́к 1.
Возбра́нный чудотво́рче и в ско́рбех ско́рый помо́щниче, святы́й великому́чениче Ми́но: хвале́бныя пе́сни от се́рдца прино́сим ти́ недосто́йнии; ты́ же, я́ко име́яй дерзнове́ние ко Го́споду, от вся́ких бе́д сохрани́ зову́щия Ти́:
Ра́дуйся, Ми́но, му́чениче многострада́льный.
И́кос 1.
А́нгел во пло́ти на земли́ яви́лся еси́, Ми́но пресла́вне, сло́во бо Христо́во душе́ю чи́стою прие́м в пусты́ню, и́дольскаго нече́стия бе́гая, удали́лся еси́, иде́же я́ко беспло́тен Бо́гови послужи́л еси́: мы́ же чу́дное житие́ твое́ помина́юще, с ра́достию пое́м Ти́:
Ра́дуйся, Це́ркви Христо́вы звездо́ пресве́тлая; ра́дуйся, со́лнца Пра́вды луче́ благода́тный.
Ра́дуйся, свети́льниче святы́й, житие́м твои́м ве́рныя просвеща́ющий; ра́дуйся, за́поведей Бо́жиих исполне́нию науча́ющий.
Ра́дуйся, правове́рным, благоче́стия христиа́нскаго о́браз явля́ющий; ра́дуйся, к све́ту Христо́ву заблу́ждшия наставля́ющий.
Ра́дуйся, неправомы́слящих вразумле́ние; ра́дуйся, сребролюби́вых серде́ц исправле́ние.
Ра́дуйся, ми́ром духо́вным, ду́ши на́ша услажда́ющий; ра́дуйся, в печа́лех при́сно на́с утеша́ющий.
Ра́дуйся, ско́рое от бе́д избавле́ние; ра́дуйся, злы́х по́мыслов на́ших отгна́ние.
Ра́дуйся, Ми́но, му́чениче многострада́льный.
Конда́к 2.
Ви́дяще госпо́дство многобо́жия язы́ческаго, во гра́де твое́м, Ми́но всесла́вне, душе́ю пра́ведною томи́лся еси́; посреде́ же тьмы́ грехо́вныя, я́ко свети́ло, житие́м доброде́тельным сия́юще, пе́л еси́ непреста́нно Го́сподеви: Аллилу́иа.
И́кос 2.
Ра́зум просвеще́н, за́поведей Бо́жиих исполне́нием име́я, страстоте́рпче Христо́в, непоро́чно житие́ твое́, посреде́ люде́й беззако́нных проводи́л еси́, де́нь и но́щь Го́сподеви служа́ще любо́вию, мы́ же укре́пльшаго тя́ Бо́га сла́вяще от се́рдца зове́м ти́ сицева́я:
Ра́дуйся, упова́нию христиа́нскому ве́рныя науча́ющий; ра́дуйся, ко́зни вра́жия предста́тельством твои́м разруша́ющий.
Ра́дуйся, сла́достию моли́тв твои́х ско́рби на́ша растворя́ющий; ра́дуйся, в ди́внем житии́ твое́м уны́лыя му́жества питие́м напая́ющий.
Ра́дуйся, за́поведей Госпо́дних блюсти́телю ве́рный; ра́дуйся, благоче́стия и ве́ры правосла́вныя ревни́телю тве́рдый.
Ра́дуйся, чту́щия тя́ любо́вию, покрыва́ющий; ра́дуйся, во искуше́ниях, при́сно на́м помога́ющий.
Ра́дуйся, ми́ра духо́внаго мирова́рнице сла́вная; ра́дуйся, сосу́де честны́й, благода́тию преиспо́лненный.
Ра́дуйся, то́ками чуде́с твои́х правове́рныя напая́ющий; ра́дуйся, я́звы ду́ш на́ших, еле́ем моли́тв твои́х умаща́ющий.
Ра́дуйся, Ми́но, му́чениче многострада́льный.
Конда́к 3.
Си́лою Бо́жиею наставля́ем, сла́ву мирску́ю и че́сть во́инскую, Христа́ ра́ди оста́вил еси́ и в пусты́нях, и гора́х Го́сподеви служи́ти изво́лил еси́, я́ко А́нгел непреста́нно Бо́гови зовя́: Аллилу́иа.
И́кос 3.
Иму́ще се́рдце ре́вностию о сла́ве Боже́ственней распаля́емо, со дерзнове́нием пред нечести́вым князе́м предста́л еси́, многострада́льче Христо́в, безу́мие и́дольское облича́юще; о́н же я́ростию распаля́емь и не терпя́ще сло́в благода́ти, из у́ст твои́х исходя́щих на му́ки мно́гия предаде́ тя́, мы́ же помина́юще по́двиг испове́дания твоего́ с любо́вию зове́м ти́ такова́я:
Ра́дуйся, те́рнием от ру́к беззако́нных изра́ненный; ра́дуйся, испове́дания ра́ди огне́м опаля́емый.
Ра́дуйся, разсече́ние удо́в твои́х претерпе́вый; ра́дуйся, те́ло твое́ и́глами о́стрыми иско́лотое име́вый.
Ра́дуйся, мла́том во главу́ лю́те ударя́емый; ра́дуйся, мно́гия ра́ны Христа́ ра́ди прие́мый.
Ра́дуйся, от трапе́зы по́двиг твои́х, му́жеством ве́рныя насыща́ющий; ра́дуйся, во искуше́ниях терпе́нию на́с науча́ющий.
Ра́дуйся, страда́ньми твои́ми мно́гия ко Христу́ обрати́вый; ра́дуйся, мучи́телей тве́рдостию ве́ры твоея́ победи́вый.
Ра́дуйся, в по́двизе твое́м о́браз кре́пости духо́вныя яви́вый; ра́дуйся, суету́ и́дольскаго нече́стия посрами́вый.
Ра́дуйся, Ми́но, му́чениче многострада́льный.
Конда́к 4.
Бу́ри гоне́ния на Це́рковь Христо́ву проше́дше во дни́ Константи́на Вели́каго, воздвиго́ша христиа́не во Александри́и це́рковь в че́сть сла́внаго и́мени твоего́, Ми́но всече́стне, иде́же и положи́ша честны́я мо́щи твоя́, и́мже и мы́ ны́не покланя́ющеся пое́м ди́вному во святы́х Бо́гу: Аллилу́иа.
И́кос 4.
Слы́ша о по́двизе испове́дания твоего́, му́чениче сла́вне, любо́вию те́плою воспева́ем тя́ и прославля́юще ди́вное терпе́ние твое́, со умиле́нием пе́сни прино́сим ти́ сицевы́я:
Ра́дуйся, нищету́ на́шу ве́рою обогаща́ющий; ра́дуйся, ми́лостивое предста́тельство твое́ ве́рным явля́ющий.
Ра́дуйся, сокро́вище ми́ра духо́внаго на́м открыва́ющий; ра́дуйся, гра́ды и ве́си в ни́х же и́мя твое́ почита́ется, покрыва́ющий.
Ра́дуйся, домо́в христиа́нских от о́гненнаго запале́ния охрани́телю; ра́дуйся, непра́ведно стра́ждущих уте́шителю.
Ра́дуйся, путеше́ствующих до́брый путеводи́телю; ра́дуйся, в мо́ре пла́вающих безбе́дное провожде́ние.
Ра́дуйся, от внеза́пныя сме́рти ве́рныя избавля́ющий; ра́дуйся, скорбя́щих предста́телю благода́тный.
Ра́дуйся, при́сно в печа́лех на́м помога́ющий; ра́дуйся, моли́твами твои́ми ско́рби на́ша на ра́дость прелага́ющий.
Ра́дуйся, Ми́но, му́чениче многострада́льный.
Конда́к 5.
Боготе́чною звездо́ю проше́л еси́ житие́ твое́, Ми́но всехва́льне, де́нь и но́щь Го́сподеви любо́вию пла́менною рабо́тающе; те́мже и на коне́ц по́двигом му́ченическим ве́ру твою́ запечатле́л еси́ и вене́ц нетле́нныя сла́вы от Бо́га прие́м, на небесе́х с ли́ки святы́х пое́ши Ему́: Аллилу́иа.
И́кос 5.
Ви́дяще ско́рби и боле́зни на́ша, Ми́но блаже́нне, о на́с, пред Престо́лом Госпо́дним предстоя́ хода́тайствуеши и моли́твами при́сными от мно́гих бе́д и напа́стей чту́щих и́мя твое́ сохраня́еши. Те́мже и ны́не к предста́тельству твоему́ притека́ющих сохрани́, да вы́ну зове́м ти́ сицева́я:
Ра́дуйся, предста́тельство ве́рных непосты́дное; ра́дуйся, стра́ждущих изря́дный помо́щниче.
Ра́дуйся, ми́лостивый о на́с пред Бо́гом хода́таю; ра́дуйся, Зако́на Бо́жия тве́рдый ревни́телю.
Ра́дуйся, моли́твы к Бо́гу кади́ло благово́нное; ра́дуйся, сосу́де избра́нный Святы́я Тро́ицы.
Ра́дуйся, во вражде́ су́щия, моли́твами твои́ми, примиря́ющий; ра́дуйся, правове́рныя ми́ром и любо́вию огражда́ющий.
Ра́дуйся, пра́ведным житие́м твои́м благоче́стному жи́тельству науча́ющий; ра́дуйся, до́брых де́л при́сный споспе́шниче.
Ра́дуйся, покая́ния до́брый учи́телю; ра́дуйся, неусы́пный о на́с моли́твенниче.
Ра́дуйся, Ми́но, му́чениче многострада́льный.
Конда́к 6.
Пропове́дник пра́вды Бо́жия, евре́й не́кий, тобо́ю облагоде́тельствованный яви́ся, Ми́но пресла́вне; то́й бо ви́дев чу́до, и́мже христиа́нина, сокро́вища его́ утаи́ти беззако́нно восхоте́вшаго, обличи́л еси́, отве́ржеся нече́стия своего́ и ве́ру Христо́ву прие́м, воспе́ Бо́гу: Аллилу́иа.
И́кос 6.
Возсия́ в се́рдце евре́я о́наго све́т ве́ры христиа́нския, егда́ чу́дно возврати́л еси́, Ми́но добропобе́дне, сокро́вища его́, беззако́нно христиа́нином, дру́гом его́ утае́нное: предста́тельством бо твои́м зло́ во бла́го обрати́ся; евре́й у́бо креще́ние христиа́нин же греха́ проще́ние получи́ша. Мы́ же ди́вное сие́ премене́ние помина́юще, от се́рдца глаго́лем ти́:
Ра́дуйся, зло́ во бла́го, моли́твами твои́ми, претворя́ющий; ра́дуйся, и злотворя́щих к покая́нию обраща́ющий.
Ра́дуйся, страстьми́ ослепле́нных просвети́телю; ра́дуйся, пра́вды Бо́жия тве́рдый ревни́телю.
Ра́дуйся, пути́ небла́ги предста́тельством твои́м исправля́ющий; ра́дуйся, стопы́ на́ша к приста́нищу зако́на Госпо́дня наставля́ющий.
Ра́дуйся, Це́ркви Христо́вы изря́дное украше́ние; ра́дуйся, рабо́в Бо́жиих при́сное поможе́ние.
Ра́дуйся, неусы́пный о на́с моли́твенниче; ра́дуйся, Богода́нный в ско́рбех защи́тителю.
Ра́дуйся, чуде́с исто́чниче неоскудева́емый; ра́дуйся, чту́щих па́мять твою́ уте́шителю благода́тный.
Ра́дуйся, Ми́но, му́чениче многострада́льный.
Конда́к 7.
Хотя́ще яви́ти ми́ру исто́чники ми́лости своея́ неоскудева́ющия, Христе́ Бо́же на́ш, дарова́л еси́ на́м предста́телей и моли́твенников к тебе́ дерзнове́нных святы́х твои́х му́чеников, и́же тве́рдость ве́ры своея́, да́же до кро́ве пострада́вши засвиде́тельствоваша; В ни́хже Тя́, Еди́наго Блага́го Бо́га сла́вяще, уми́льно зове́м Тебе́: Аллилу́иа.
И́кос 7.
Но́ваго Заве́та благода́тию Ева́нгельскою се́рдце твое́ насыща́я, Ми́но великому́чениче, огне́м любве́ Боже́ственныя Го́сподеви всесоже́глся еси́ и лико́м святы́х му́чеников сочета́лся еси́, с ни́ми же Престо́лу Вседержи́теля предстоя́, моли́ся о чту́щих ве́рою па́мять твою́, ублажа́ющих пе́сньми тя́ таковы́ми:
Ра́дуйся, му́чениче Госпо́день пресла́вный; ра́дуйся, во́ине Христо́в добропобе́дный.
Ра́дуйся, ми́лостивый христиа́ном засту́пниче; ра́дуйся, при́сный о на́с моли́твенниче.
Ра́дуйся, неду́гов на́ших цели́телю милосе́рдый; ра́дуйся, от напа́стей многообра́зных изба́вителю святы́й.
Ра́дуйся, в борьбе́ со страстьми́ и прило́ги вра́жиими помо́щниче си́льный; ра́дуйся, моли́твами твои́ми от паде́ний грехо́вных на́с сохраня́ющий.
Ра́дуйся, сокро́вищнице Даро́в Бо́жиих Всебога́тая; ра́дуйся, ча́ше, утеше́ния духо́внаго преиспо́лненная.
Ра́дуйся, ско́рби на́ша моле́нием твои́м растворя́ющий; ра́дуйся, любо́вию к Бо́гу сердца́ на́ша запаля́ющий.
Ра́дуйся, Ми́но, му́чениче многострада́льный.
Конда́к 8.
Стра́нник на земли́ яви́лся еси́, Ми́но пресла́вне, се́рдцем чи́стым Го́спода вы́ну взыску́юще; те́мже вене́ц му́ченический прие́м, житие́ твое́ сла́вно сконча́л еси́; ны́не же в Ца́рствии Небе́снем водворя́яся со А́нгелы пе́снь вопие́ши Бо́гови: Аллилу́иа.
И́кос 8.
Ве́сь Бо́гови покори́выйся, Ми́но добропобе́дне, безвре́дно мо́ре искуше́ния земна́го проше́л еси́ и в приста́нище Боже́ственнаго поко́я дости́г во Оби́телех Отца́ Небе́снаго водворя́ешися. Те́мже и на́с, чту́щих па́мять твою́, у Престо́ла Бо́жия помина́й хва́лящих пе́сньми тя́ сицевы́ми:
Ра́дуйся, о́браз непоро́чнаго служе́ния Бо́гу яви́вый; ра́дуйся, мно́гих к по́двигу испове́дания укрепи́вый.
Ра́дуйся, и ны́не терпе́нию, житие́м твои́м на́с науча́ющий; ра́дуйся, коего́ждо к безро́потному несе́нию креста́ его́ наставля́ющий.
Ра́дуйся, нищеты́ духо́вныя учи́телю соверше́нный; ра́дуйся, све́том смире́ния сердца́ на́ша просвеща́ющий.
Ра́дуйся, правосла́вных христиа́н изря́дный побо́рниче; ра́дуйся, ве́рным лю́дем от напа́стей и зо́л огражде́ние.
Ра́дуйся, при́сное стра́ждущим поможе́ние; ра́дуйся, боля́щим ми́лостивое исцеле́ние.
Ра́дуйся, страда́льче Христо́в пречестны́й; ра́дуйся, засту́пниче, от Го́спода на́м дарова́нный.
Ра́дуйся, Ми́но, му́чениче многострада́льный.
Конда́к 9.
Вся́кую сла́дость мирску́ю от души́ твоея́ отри́нул еси́, Му́чениче Пребога́те, те́мже и че́сть во́инскую оста́вив, во́ин Царя́ Небе́снаго яви́лся еси́ тве́рдостию ве́ры и му́жеством пра́ведным просия́в. Ны́не же на Небесе́х, Подвигополо́жник Христу́ предстоя́, вопие́ши со А́нгелы: Аллилу́иа.
И́кос 9.
Вети́я многовеща́нныя не возмо́гут позна́ти си́лу Христо́ву, е́юже я́ко ору́жием обле́клся еси́, Ми́но пресла́вне, и мучи́телей беззако́нных в терпе́нии твое́м победи́л еси́. Мы́ же се́рдцем смире́нным и душе́ю сокруше́нною, по́двиг тво́й восхваля́юще, со умиле́нием пе́сни ти́ зове́м таковы́я:
Ра́дуйся, непра́ведно стра́ждущих утеше́ние; ра́дуйся, оби́дящих вседе́йственное вразумле́ние.
Ра́дуйся, земле́ блага́я, пло́д доброде́телей возрасти́вшая; ра́дуйся, честны́ми твои́ми страда́ньми зе́млю Сири́йскую освети́вый.
Ра́дуйся, мно́гая пресла́вная чудеса́ по сме́рти твое́й яви́вший; ра́дуйся, кри́не святы́й, посреде́ и́дольскаго нече́стия процве́тший.
Ра́дуйся, я́ко зла́то в горни́ле скорбе́й искуси́выйся; ра́дуйся, све́том пра́вды Ева́нгельския просия́вший.
Ра́дуйся, те́плыми луча́ми моли́тв твои́х, притека́ющия к тебе́, согрева́ющий; ра́дуйся, от неча́емых зо́л, чту́щия тя́ покрыва́ющий.
Ра́дуйся, Святы́я Горы́ Афо́нския похвале́ние; ра́дуйся, правосла́вным лю́дем при́сное защище́ние.
Ра́дуйся, Ми́но, му́чениче многострада́льный.
Конда́к 10.
Спасе́ние ди́вно дарова́л еси́ купцу́ на поклоне́ние к ме́стным твои́м моще́м иду́щему; то́й бо от сребролю́бца беззако́ннаго сме́рть претерпе́, тобо́ю же воскреше́нный, Бо́гу воспе́: Аллилу́иа.
И́кос 10.
Стена́ и засту́пник те́плый яви́лся еси́ купцу́ о́ному, Ми́но Свя́те; того́ бо за зла́то убие́ннаго воскреси́в, уби́йцу непра́веднаго обличи́л еси́; мы́ же чу́до сие́ помина́юще уми́льно пое́м ти́:
Ра́дуйся, чудотво́рче пресла́вный; ра́дуйся, предста́телю благода́тный.
Ра́дуйся, злотворя́щих гро́зное обличе́ние; ра́дуйся, чту́щих тя́, при́сное защище́ние.
Ра́дуйся, купца́ убие́ннаго воскреси́вый; ра́дуйся, сребролю́бца и уби́йцу к покая́нию обрати́вший.
Ра́дуйся, жертвода́телей благи́й споспе́шниче; ра́дуйся, от се́рдца даю́щих те́плый предста́телю.
Ра́дуйся, пред ико́ною твое́ю смире́нно моля́щихся ско́рый послу́шателю; ра́дуйся, от ко́зней лука́ваго и люде́й злы́х, ве́рным храни́телю.
Ра́дуйся, напа́сти жите́йския, моле́нием твои́м разруша́ющий; ра́дуйся, ско́рби на́ша, ми́ром духо́вным растворя́ющий.
Ра́дуйся, Ми́но, му́чениче многострада́льный.
Конда́к 11.
Пе́ние похва́льное прино́сим ти́, му́чениче доброхва́льне, устне́ се́рдца смире́ннаго любо́вию отверза́юще: прославля́ем ди́вное житие́ твое́ и сла́вим му́ченическую кончи́ну твою́, Бо́гу укрепля́ющему тя́ зовя́: Аллилу́иа.
И́кос 11.
Све́том явле́ния чудесе́ сла́внаго, се́рдце Евтро́пия, сребролю́бием омраче́нное просвети́л еси́, Свя́те, то́й бо блю́до сре́бряное со и́менем твои́м в да́р тебе́ угото́ванное помы́слив себе́ оста́вити, раба́ возлю́бленнаго и блю́до о́ное, в пучи́не морсте́й потопля́ема узре́; но оба́че предста́тельством твои́м спасе́на раба́ па́ки восприи́м, благода́рная ти́ воспе́ пе́ния; мы́ же чу́до сие́ восхваля́юще, уми́льно зове́м тебе́ такова́я:
Ра́дуйся, се́рдце Евтро́пия к покая́нию премени́вый; ра́дуйся, того́ раба́ в пучи́не морсте́й сохрани́вый.
Ра́дуйся, явле́нием чудесе́ твоего́ печа́ль в ра́дость претвори́вый; ра́дуйся, слугу́ ве́рнаго от потопле́ния спа́сший.
Ра́дуйся, пра́вых се́рдцем при́сный споспе́шниче; ра́дуйся, о чту́щих и́мя твое́ к Бо́гу хода́таю.
Ра́дуйся, от злы́х напа́стей на́с сохраня́ющий; ра́дуйся, по́мощь твою́, правосла́вным лю́дем явля́ющий.
Ра́дуйся, правди́вому и честно́му житию́ науча́ющий; ра́дуйся, благи́х начина́ний исполне́нию помога́ющий.
Ра́дуйся, от собла́знов грехо́вных на́с огражда́ющий; ра́дуйся, проше́ния на́ша во бла́го, ко спасе́нию исполня́ющий.
Ра́дуйся, Ми́но, му́чениче многострада́льный.
Конда́к 12.
Благода́ть ми́лостиваго твоего́ заступле́ния, Ми́но пресла́вне, жена́ не́кая, и́менем Софи́я, позна́, та́ бо ше́дши в це́рковь твою́ на поклоне́ние, тобо́ю от безче́стия во́ина беззако́ннаго спа́сшеся, благода́рно Бо́гови возопи́: Аллилу́иа.
И́кос 12.
Пою́ще мно́гая чудеса́ твоя́, всехва́льне великому́чениче, помина́ем хрома́го и нему́ю, и́же в це́ркви твое́й усе́рдно моли́вшихся; те́м бо яви́вся, ди́вным о́бразом исцели́л еси́; мы́ же чу́до сие́ помина́юще усе́рдно мо́лим тя́: и на́ша, беззако́ньми мно́гими разсла́бленныя, но́зи укрепи́ и устне́ серде́чныя отве́рзи досто́йно пе́ти пе́сньми тя́ сицевы́ми:
Ра́дуйся, но́зи разсла́бленнаго укрепи́вый; ра́дуйся, у́зы нема́го язы́ка разреши́вый.
Ра́дуйся, благосе́рдый враче́бник мно́гим яви́выйся; ра́дуйся, неве́рных мно́жество чудеса́ми пресла́вными к ве́ре приведы́й.
Ра́дуйся, боголю́бцев весе́лие и похвале́; ра́дуйся, стра́нных приста́нище и утеше́ние.
Ра́дуйся, ни́щих пита́телю благода́тный; ра́дуйся, вдо́в и сиро́т засту́пниче непосты́дный.
Ра́дуйся, правове́рным от напа́стей и зо́л избавле́ние; ра́дуйся, чту́щим тя́ тве́рдое огражде́ние.
Ра́дуйся, в беда́х су́щих уте́шителю благи́й; ра́дуйся, в ско́рбех жите́йских помо́щниче святы́й.
Ра́дуйся, Ми́но, му́чениче многострада́льный.
Конда́к 13.
О, святы́й и пресла́вный великому́чениче Христо́в Ми́но, приими́ ны́не ма́лое сие́, от усе́рдия приноси́мое ти́ пе́ние, и покры́й моли́твами твои́ми притека́ющих ко святе́й ико́не твое́й и любо́вию почита́ющих честну́ю па́мять твою́, да предста́тельством твои́м вы́ну от злы́х покрыва́еми в ми́ре и благоче́стии про́чее вре́мя живота́ на́шего поживе́м, хва́ляще ди́внаго во святы́х свои́х Бо́га, пе́снь пою́ще А́нгельскую: Аллилу́иа.
И́кос 1.
А́нгел во пло́ти на земли́ яви́лся еси́, Ми́но пресла́вне, сло́во бо Христо́во душе́ю чи́стою прие́м в пусты́ню, и́дольскаго нече́стия бе́гая, удали́лся еси́, иде́же я́ко беспло́тен Бо́гови послужи́л еси́: мы́ же чу́дное житие́ твое́ помина́юще, с ра́достию пое́м Ти́:
Ра́дуйся, Це́ркви Христо́вы звездо́ пресве́тлая; ра́дуйся, со́лнца Пра́вды луче́ благода́тный.
Ра́дуйся, свети́льниче святы́й, житие́м твои́м ве́рныя просвеща́ющий; ра́дуйся, за́поведей Бо́жиих исполне́нию науча́ющий.
Ра́дуйся, правове́рным, благоче́стия христиа́нскаго о́браз явля́ющий; ра́дуйся, к све́ту Христо́ву заблу́ждшия наставля́ющий.
Ра́дуйся, неправомы́слящих вразумле́ние; ра́дуйся, сребролюби́вых серде́ц исправле́ние.
Ра́дуйся, ми́ром духо́вным, ду́ши на́ша услажда́ющий; ра́дуйся, в печа́лех при́сно на́с утеша́ющий.
Ра́дуйся, ско́рое от бе́д избавле́ние; ра́дуйся, злы́х по́мыслов на́ших отгна́ние.
Ра́дуйся, Ми́но, му́чениче многострада́льный.
Конда́к 1.
Возбра́нный чудотво́рче и в ско́рбех ско́рый помо́щниче, святы́й великому́чениче Ми́но: хвале́бныя пе́сни от се́рдца прино́сим ти́ недосто́йнии; ты́ же, я́ко име́яй дерзнове́ние ко Го́споду, от вся́ких бе́д сохрани́ зову́щия Ти́:
Ра́дуйся, Ми́но, му́чениче многострада́льный.
Моли́тва.
О, страстоте́рпче святы́й му́чениче Ми́но! Взира́юще на ико́ну твою́ и помина́юще цельбы́, тобо́ю подава́емыя все́м, с ве́рою и благогове́инством к тебе́ притека́ющих, припа́даем ти́ и, прекло́нше коле́на серде́ц на́ших, от всея́ души́ на́шея мо́лим тя́, бу́ди на́м хода́тай пред Го́сподом и Спа́сом на́шим Иису́сом Христо́м о не́мощех на́ших, сопу́тствуй и утеша́й на́с во вре́мя скорбе́й на́ших, да́руя на́м па́мять о гресе́х на́ших, помога́й в напа́стех и треволне́ниих ми́ра сего́, и во все́х беда́х, в се́й юдо́ли плаче́вней на́с постига́ющих. Ами́нь.