Конда́к 1.

Избра́нным Десни́цею Госпо́днею от среды́ нечести́вых, вое́же чистото́ю пра́веднаго жития́ своего́ досто́йными подража́телями Христа́ Го́спода бы́ти и Тому́ да́же до сме́рти лю́тыя ве́рность свою́ сохраня́ти, святы́м му́ченицам Кондра́ту, Ви́ктору, Киприа́ну, Диони́сию, Па́влу со святы́ми жена́ми Гали́ною, Васили́сою, Феодо́рою и со мно́гими ины́ми, с ни́ми пострада́вшими, похва́льное пе́ние воспису́ем. Вы́ же, я́ко иму́щии ве́лие дерзнове́ние ко Христу́ Жизнода́вцу, моли́твами свои́ми от вся́ких на́с бе́д свободи́те да умиле́нными сердца́ми воспева́ем ва́м:

Ра́дуйтеся, святи́и му́ченицы Кондра́те, Ви́кторе и Гали́но, в страда́ниях тя́жких Христа́ прославля́вшии.

И́кос 1.

Арха́нгельския си́лы на небеси́ и Боголюби́вии лю́дие на земли́ удивля́хуся, зря́ще, ка́ко вы́, святи́и страда́льцы Христо́вы, ве́ру Христо́ву защища́я и ве́лия му́ки за Христа́ претерпева́я, да́же до сме́рти Го́споду ве́рными остава́лися есте́, с Ни́м же ны́не ра́йскую сла́дость вкуша́ете. Мы́ же, многострада́льными по́двигами ва́шими в ве́ре и в любви́ к Бо́гу утвержда́яся, зове́м такова́я:

Ра́дуйтеся, от мглы́ язы́ческия ко све́ту Христо́ву прише́дшии; ра́дуйтеся, све́том те́м сердца́ своя́ просвети́вшии.

Ра́дуйтеся, ду́ши своя́ муче́ниями за Го́спода очи́стившии; ра́дуйтеся, Ева́нгелие Христо́во неустраши́мо пропове́давшии.

Ра́дуйтеся, Ду́хом Святы́м очище́ннии; ра́дуйтеся, ду́ши своя́ Го́споду в жили́ще нетле́нное угото́вавшии.

Ра́дуйтеся, святи́и му́ченицы Кондра́те, Ви́кторе и Гали́но, в страда́ниях тя́жких Христа́ прославля́вшии.

Конда́к 2.

Ви́дя ма́ти твоя́ Руфи́на, блаже́нне Кондра́те, я́ко ве́лие гоне́ние бы́сть на христиа́ны, из гра́да Кори́нфа в го́ры бежа́ше и от пресле́дователей свои́х та́мо спаса́шеся. Та́м же и роди́, тя́, сы́на своего́, и вско́ре по рождестве́ твое́м ду́шу свою́ чи́стую Бо́гу предаде́. Про́мыслом Бо́жиим ты́ сохране́н бе́, свя́те Кондра́те, о́блако бо небе́сное сла́дкою росо́ю пита́ше тя́. Ты́ же, возраста́я и укрепля́яся, Бо́гу воспева́л еси́: Аллилу́иа.

И́кос 2.

Ра́зумом свои́м пости́гнути всего́ вели́чия Бо́жия не могу́щаго, к и́стинным христиа́ном приведе́ тя́ Госпо́дь, святы́й Кондра́те, да све́том и́стинныя ве́ры просвети́шися, по́слежде ученики́ своя́ науча́ти бу́деши, с ни́ми же приими́ от на́с пе́ние сие́:

Ра́дуйтеся, все́ю душе́ю Го́спода взыска́вшии; ра́дуйтеся, в сердца́ своя́ Го́спода прия́вшии.

Ра́дуйтеся, от пути́ ко Христу́ не уклони́вшиися; ра́дуйтеся, па́че все́х бла́г земны́х Го́спода возлюби́вшии.

Ра́дуйтеся, свои́м житие́м Творца́ прославля́вшии; ра́дуйтеся, на Го́спода Еди́наго упова́ние свое́ возлага́вшии.

Ра́дуйтеся, святи́и му́ченицы Кондра́те, Ви́кторе и Гали́но, в страда́ниях тя́жких Христа́ прославля́вшии.

Конда́к 3.

Си́лою Вы́шняго укрепле́ннии и на по́двиги Творце́м благослове́ннии, святи́и Киприа́не, Диони́сие, Ане́кте, Па́вле и Криске́нте, в пусты́ню ко свято́му Кондра́ту приходи́ли есте́, иде́же о́н в пусты́нном безмо́лвии в моли́тве и Богомы́слии пребыва́ше. Вы́ же, вся́ наставле́ния его́ в сердца́х свои́х слага́я, Бо́гу воспева́ли есте́: Аллилу́иа.

И́кос 3.

Иму́ще ве́лию любо́вь к Бо́гу, святи́и жены́ Гали́но, Харие́ссо, Нуне́хие, Васили́со, Ники́е и Феодо́ро, ку́пно с мужа́ми благочести́выми, взе́мши кре́ст, за Христо́м после́довали есте́. Таково́е благоразу́мие ва́ше воспева́я, восхваля́ем ва́с:

Ра́дуйтеся, де́вы, неве́стами Христо́выми наименова́вшиися; ра́дуйтеся, жены́, благоче́стием испо́лненнии.

Ра́дуйтеся, Еди́ному Го́споду жи́зни своя́ посвяти́вшии; ра́дуйтеся, красоту́ ду́ш и теле́с ва́ших Творцу́ подари́вшии.

Ра́дуйтеся, чистото́ю непоро́чною ду́ши своя́ украси́вшии; ра́дуйтеся, венца́ми нетле́нными главы́ своя́ увенча́вшии.

Ра́дуйтеся, святи́и му́ченицы Кондра́те, Ви́кторе и Гали́но, в страда́ниях тя́жких Христа́ прославля́вшии.

Конда́к 4.

Бу́рею зло́бною ве́сь бы́сть испо́лнен нечести́вый Иа́сон, повелева́ющи ти́, свя́те Кондра́те, Го́спода своего́ отрещи́ся и и́долом ме́рзким же́ртву возда́ти. Ты́ же, да́же до сме́рти, Го́споду ве́рным оста́лся еси́, в страда́ниях свои́х Ему́ душе́ю воспева́я: Аллилу́иа.

И́кос 4.

Слы́шав от тебе́, му́чениче Христо́в Кондра́те, словеса́ прему́дрыя: не страши́тися муче́ний лю́тых и тве́рдо за ве́ру во Христа́ стоя́ти, ученицы́ твоя́ душе́ю укрепля́хуся, да безбоя́зненно страда́ния за Го́спода прии́мут. Сего́ ра́ди, ублажа́ем ва́с хвале́ньми си́ми:

Ра́дуйтеся, до́блии и неустраши́мии во́ини Христо́вы; ра́дуйтеся, гоне́ний тя́жких от враго́в не убоя́вшиися.

Ра́дуйтеся, в страда́ниях свои́х на Го́спода взира́вшии; ра́дуйтеся, укрепле́ние от Него́ получа́вшии.

Ра́дуйтеся, а́нгелами Бо́жиими охраня́емии; ра́дуйтеся, чрез муче́ния своя́ сла́дость ра́йскую позна́вшии.

Ра́дуйтеся, святи́и му́ченицы Кондра́те, Ви́кторе и Гали́но, в страда́ниях тя́жких Христа́ прославля́вшии.

Конда́к 5.

Богопроти́вное веле́ние нечести́ваго Иа́сона исполня́я, во́ины му́чеников Христо́вых на растерза́ние ди́ким звере́м броса́ху, оба́че зве́рие но́ги святы́м лиза́ху и зла́ и́м не творя́ху. Таково́е чу́до на ва́с ви́девше, восхваля́ем Бо́га: Аллилу́иа.

И́кос 5.

Ви́дяще врази́ ва́ша, святи́и му́ченицы, я́ко не можа́ху ва́ма ничесо́же зве́рие сотвори́ти, но́зи ва́ша к колесни́це привяза́ху и по гра́ду за колесни́цами влача́ху. Вы́ же, главы́ своя́ об ка́мение ударя́я, Главе́ Це́ркви, Иису́су Христу́, в же́ртву святу́ю себе́ приноси́ли есте́, да лю́дие во умиле́нии серде́чнем воспою́т ва́м си́це:

Ра́дуйтеся, страда́ниями свои́ми Христа́ прославля́вшии; ра́дуйтеся, муче́ниями свои́ми а́нгельския ли́ки умиля́вшии.

Ра́дуйтеся, я́ко по́двигами свои́ми сла́быя в ве́ре укрепля́ли есте́; ра́дуйтеся, я́ко венцы́ от Го́спода стяжа́ли есте́.

Ра́дуйтеся, защи́тницы на́ши необори́мии; ра́дуйтеся, помо́щницы на́ши незри́мии.

Ра́дуйтеся, святи́и му́ченицы Кондра́те, Ви́кторе и Гали́но, в страда́ниях тя́жких Христа́ прославля́вшии.

Конда́к 6.

Пропове́дницы и́стины Христо́выя яви́лися есте́, до́блии му́ченицы Христо́вы, посреди́ неве́рных, и́дольским све́том ослепле́нных, све́т и́стинныя ве́ры источа́я, да у́зрят вся́ концы́ вселе́нныя Пода́теля Све́та невече́рняго, и́же просвеща́ет вся́ язы́цы, и воспою́т Ему́ пе́снь сла́вы: Аллилу́иа.

И́кос 6.

Возсия́ли есте́, я́ко зве́зды пресве́тлии, драгоце́ннии му́ченицы на́ша, егда́ на ме́сте ка́зни моли́тве предава́хуся и главы́ своя́ прекра́сныя под мечи́ мучи́телей склоня́ху. Таково́е ве́лие му́жество ва́ше зря́ще, просла́ви ва́с Госпо́дь: иде́же бы́сть земля́ обагре́на свято́ю кро́вию ва́шею, яви́ся исто́чник чи́стыя воды́, от него́ же мно́зии исцеле́ние прия́ша. Сего́ ра́ди, приими́те похвалы́ сия́ от на́с:

Ра́дуйтеся, безбоя́зненно за Го́сподом ше́дшии; ра́дуйтеся, те́сным путе́м в Ца́рствие Небе́сное вше́дшии.

Ра́дуйтеся, Еди́ному Го́споду в ми́ре се́м потруди́вшиися; ра́дуйтеся, мзду́ ве́лию от Того́ за труды́ своя́ прия́вшии.

Ра́дуйтеся, жемчу́жину дража́йшую, Христа́ Го́спода, наше́дшии; ра́дуйтеся, па́че все́х бога́тств земны́х Творца́ возлюби́вшии.

Ра́дуйтеся, святи́и му́ченицы Кондра́те, Ви́кторе и Гали́но, в страда́ниях тя́жких Христа́ прославля́вшии.

Конда́к 7.

Хотя́ Го́споду своему́ подража́телями в страда́ниях Его́ бы́ти, ини́и ученицы́ твоя́, свя́те Кондра́те, за Христа́ та́кожде пострада́ху, да с тобо́ю ку́пно в Ца́рствии Небе́снем воспою́т Ему́ немо́лчно: Аллилу́иа.

И́кос 7.

Но́вых му́чеников яви́ ва́с Христо́с лю́дем Свои́м, да страда́ниями ва́шими, му́ченицы пресла́внии, вси́ су́щии и ны́не в ве́ре правосла́вней укрепля́ются, восхваля́я ва́с зва́ниями си́ми:

Ра́дуйтеся, Ви́кторе, Виктори́не и Ники́форе, в ка́менней сту́пе сме́рть свою́ прия́вшии; ра́дуйтеся, то́ю сме́ртию жесто́кою спасе́ние стяжа́вшии.

Ра́дуйтеся, Папи́е и Леони́де, в волна́х морски́х уто́плении; ра́дуйтеся, мо́ре страсте́й страда́ниями свои́ми иссуши́вшии.

Ра́дуйтеся, Кла́вдие, Серафио́не и Диони́сие, чрез ме́чное посече́ние и но́жное заколе́ние жи́знь ве́чную улучи́вшии; ра́дуйтеся, му́ки претерпе́вшии, в ни́х же ко́зни злолука́выя посе́кшии.

Ра́дуйтеся, святи́и му́ченицы Кондра́те, Ви́кторе и Гали́но, в страда́ниях тя́жких Христа́ прославля́вшии.

Конда́к 8.

Стра́нно ви́дети ва́с, му́ченицы Христо́вы, вы́ бо за Го́спода кро́вь свою́ пролива́я и жития́ своего́ не жале́я, стопа́ми свои́ми в Ца́рствие Бо́жие небоя́зненно вошли́ есте́, воспева́я Царю́ Христу́: Аллилу́иа.

И́кос 8.

Ве́сь Сладча́йший Иису́с Христо́с сла́дость и жела́ние ва́м бы́сть, святы́я жены́, за Него́ же ку́пно с мужа́ми свои́ми тя́жкия страда́ния претерпе́ли есте́. Сего́ ра́ди, му́жество ва́ше восхваля́я, славосло́вим ва́с:

Ра́дуйтеся, Харие́ссо и Нуне́хие, всле́д за мужа́ми на муче́ния поте́кшии; ра́дуйтеся, ку́пно с те́ми сла́ву себе́ стяжа́вшии.

Ра́дуйтеся, Васили́со и Ни́ко, доброво́льно кро́вию свое́ю телеса́ своя́ обагри́вшии; ра́дуйтеся, то́ю кро́вию души́ своя́ от скве́рны очи́стившии.

Ра́дуйтеся, Гали́но и Га́ли, Христу́ себя́ в же́ртву непоро́чную прине́сшии; ра́дуйтеся, то́ю же́ртвою вся́ своя́ прегреше́ния искупи́вшии.

Ра́дуйтеся, святи́и му́ченицы Кондра́те, Ви́кторе и Гали́но, в страда́ниях тя́жких Христа́ прославля́вшии.

Конда́к 9.

Все́ естество́ а́нгельское возра́довася зело́, ви́дяще ско́ль ве́лие число́ ду́ш пра́ведных на небеси́ водворя́ется и Творцу́ поклоня́ется, воспева́я Ему́ сла́дце: Аллилу́иа.

И́кос 9.

Вети́и многовеща́ннии не возмо́гут досто́йно восхвали́ти ва́ша за Христа́ страда́ния и све́тлую кончи́ну ва́шу, му́ченицы преблаже́ннии. Мы́ же, свои́ми нечи́стыми уста́ми дерза́ем воспева́ти ва́м сицева́я:

Ра́дуйтеся, на́ши те́плии пред Го́сподем хода́таи; ра́дуйтеся, при́сно за на́с Творца́ моля́щии.

Ра́дуйтеся, в Ца́рствие Небе́сное на́м вхо́д отворя́ющии; ра́дуйтеся, свои́м предста́тельством на́с от бе́д защища́ющии.

Ра́дуйтеся, ду́ши на́ша и телеса́ безме́здно врачу́ющии; ра́дуйтеся, в разли́чных обстоя́ниях на́с укрепля́ющии.

Ра́дуйтеся, святи́и му́ченицы Кондра́те, Ви́кторе и Гали́но, в страда́ниях тя́жких Христа́ прославля́вшии.

Конда́к 10.

Спасти́ся хотя́щим благи́й приме́р подае́те, му́ченицы кре́пции, терпе́нием бо ва́шим в перенесе́нии страда́ний за и́мя Бо́жие, укрепля́емся и восхваля́ем Го́спода: Аллилу́иа.

И́кос 10.

Царю́ Небе́сному Еди́ному угоди́ти жела́я, ду́ши своя́ святы́я в ру́це Его́ всеце́ло преда́ли есте́, святи́и му́ченицы. Сего́ ра́ди приими́те от на́с похвалы́ сия́:

Ра́дуйтеся, Го́спода Еди́наго возлюби́вшии; ра́дуйтеся, ду́ши своя́ Ему́ уневе́стившии.

Ра́дуйтеся, чи́стым житие́м Бо́гу угожда́вшии; ра́дуйтеся, пути́ ина́го, кроме́ те́снаго, не зна́вшии.

Ра́дуйтеся, во́лю свою́ во́ле Го́спода подчиня́вшии; ра́дуйтеся, с Го́сподом ничесо́же не боя́вшиися.

Ра́дуйтеся, святи́и му́ченицы Кондра́те, Ви́кторе и Гали́но, в страда́ниях тя́жких Христа́ прославля́вшии.

Конда́к 11.

Пе́ние а́нгельское ны́не слы́шите на небеси́, всехва́льнии му́ченицы, зря́ще на Престо́ле сидя́щим Творца́ Жизнода́вца и вопию́ще Ему́: Аллилу́иа.

И́кос 11

Све́та Пода́тель – Госпо́дь и Творе́ц в Ца́рствии Свое́м, я́ко дру́ги Своя́, ва́с, му́ченицы сла́внии, трапе́зою небе́сною пита́ет. Моли́теся за ны́, да и мы́ сподо́бимся со Го́сподом вкуша́ти от щедро́т Его́, вы́ же приими́те моле́ния на́ша:

Ра́дуйтеся, Кондра́те и Ники́форе, да и мы́ ра́дости ва́шея прича́стницы бу́дем; ра́дуйтеся, Ви́кторе и Виктори́не, да и мы́ с ва́ми в любви́ Го́спода пребу́дем.

Ра́дуйтеся, Папи́е и Леони́де, да и мы́ с ва́ми вни́дем в ра́дость Го́спода своего́; ра́дуйтеся, Кла́вдие и Серафио́не, да и мы́ с ва́ми бу́дем Го́спода непреста́нно восхваля́ти.

Ра́дуйтеся, Киприа́не и Диони́сие, да и мы́ с ва́ми насле́дия небе́снаго сподо́бимся; ра́дуйтеся, Криске́нте и Диодо́ре, да и мы́ с ва́ми Пресвяте́й Тро́ице бу́дем при́сно покланя́тися.

Ра́дуйтеся, святи́и му́ченицы Кондра́те, Ви́кторе и Гали́но, в страда́ниях тя́жких Христа́ прославля́вшии.

Конда́к 12.

Благода́ть, да́нную ва́м от Бо́га, неду́жныя исцеля́ти, немощны́я врачева́ти, ско́рби утоля́ти, све́дущии, к моли́твенному заступле́нию ва́шему, святи́и му́ченицы, неуста́нно прибега́ем и вопие́м Христу́: Аллилу́иа.

И́кос 12.

Пою́ще чудеса́ и ми́лости ва́ша, святи́и му́ченицы Бо́жии, хва́лим ва́с вси́, я́ко усе́рдных моли́твенников за на́с пред Престо́лом Бо́жиим, благода́рно покланя́емся ва́м, и умиле́нно вопие́м:

Ра́дуйтеся, Харие́ссо и Нунехи́я, на Го́спода смире́нно упова́вшия; ра́дуйтеся, за любо́вь ко Творцу́, Го́сподом возлю́бленнии.

Ра́дуйтеся, Васили́со и Ни́ко, за́поведи Госпо́дни и в ско́рбех сохрани́вшии; ра́дуйтеся, благода́ть Бо́жию с ра́достию и любо́вию прие́мшии.

Ра́дуйтеся, Гали́но и Феодо́ро, благоволе́ние Отца́ Небе́снаго прия́вшии; ра́дуйтеся, усе́рдно о Го́споде потруди́вшиися.

Ра́дуйтеся, святи́и му́ченицы Кондра́те, Ви́кторе и Гали́но, в страда́ниях тя́жких Христа́ прославля́вшии.

Конда́к 13.

О, святи́и и достохва́льнии му́ченицы Христо́вы, Кондра́те, Ви́кторе и Гали́но, и и́же с ва́ми ку́пно за Христа́ пострада́вшии! Приими́те сие́ хвале́бное пе́ние на́ше и благоприя́тными ва́шими моли́твами изба́вите на́с от вся́ких бе́д и обстоя́ний, от муче́ний ве́чных сохрани́те и бы́ти досто́йными Ца́рствия Бо́жия Го́спода умоли́те, да воспева́ти Ему́ бу́дем: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

Арха́нгельския си́лы на небеси́ и Боголюби́вии лю́дие на земли́ удивля́хуся, зря́ще, ка́ко вы́, святи́и страда́льцы Христо́вы, ве́ру Христо́ву защища́я и ве́лия му́ки за Христа́ претерпева́я, да́же до сме́рти Го́споду ве́рными остава́лися есте́, с Ни́м же ны́не ра́йскую сла́дость вкуша́ете. Мы́ же, многострада́льными по́двигами ва́шими в ве́ре и в любви́ к Бо́гу утвержда́яся, зове́м такова́я:

Ра́дуйтеся, от мглы́ язы́ческия ко све́ту Христо́ву прише́дшии; ра́дуйтеся, све́том те́м сердца́ своя́ просвети́вшии.

Ра́дуйтеся, ду́ши своя́ муче́ниями за Го́спода очи́стившии; ра́дуйтеся, Ева́нгелие Христо́во неустраши́мо пропове́давшии.

Ра́дуйтеся, Ду́хом Святы́м очище́ннии; ра́дуйтеся, ду́ши своя́ Го́споду в жили́ще нетле́нное угото́вавшии.

Ра́дуйтеся, святи́и му́ченицы Кондра́те, Ви́кторе и Гали́но, в страда́ниях тя́жких Христа́ прославля́вшии.

Конда́к 1.

Избра́нным Десни́цею Госпо́днею от среды́ нечести́вых, вое́же чистото́ю пра́веднаго жития́ своего́ досто́йными подража́телями Христа́ Го́спода бы́ти и Тому́ да́же до сме́рти лю́тыя ве́рность свою́ сохраня́ти, святы́м му́ченицам Кондра́ту, Ви́ктору, Киприа́ну, Диони́сию, Па́влу со святы́ми жена́ми Гали́ною, Васили́сою, Феодо́рою и со мно́гими ины́ми, с ни́ми пострада́вшими, похва́льное пе́ние воспису́ем. Вы́ же, я́ко иму́щии ве́лие дерзнове́ние ко Христу́ Жизнода́вцу, моли́твами свои́ми от вся́ких на́с бе́д свободи́те да умиле́нными сердца́ми воспева́ем ва́м:

Ра́дуйтеся, святи́и му́ченицы Кондра́те, Ви́кторе и Гали́но, в страда́ниях тя́жких Христа́ прославля́вшии.

Моли́тва.

О, пресла́внии уго́дницы Христо́вы: Кондра́те, Киприа́не, Диони́сие, Ане́кте, Па́вле, Криске́нте, Диони́сие (други́й), Ви́кторе, Виктори́не, Ники́форе, Кла́вдие, Диодо́ре, Серафио́не, Папи́е, Леони́де и святи́и де́вы и жены́ Гали́но, Харие́ссо, Нуне́хие, Васили́со, Ники́е, Га́ли, Феодо́ро и ины́я мно́гия ку́пно с ва́ми Го́спода житие́м и по́двигами свои́ми прославля́вшии и ве́ру правосла́вную среди́ ми́ра язы́ческаго утверджа́вшии! Восхваля́я труды́ и по́двиги ва́ша, мо́лим ва́с неуста́нно, не престава́йте умоля́ти за на́с Го́спода на́шего Иису́са Христа́, да бу́дет ми́лостив ко все́м не́мощем и сла́бостем на́шим, проще́ние все́х прегреше́ний на́м ще́дро да́рует, на пу́ть и́стиннаго покая́ния на́с наста́вит и во все́м на́м споспешеству́ет, да и мы́ причтены́ бу́дем к све́тлому ли́ку святы́х и в ра́дости неизрече́нней с Творцо́м всегда́ пребу́дем, Ему́ же че́сть и сла́ва подоба́ет во ве́ки веко́в. Ами́нь.