Акафистник

Помочь сайту
·
·
·
·

Акафист святым Первоверховным апостолам Петру и Павлу

Память: 12 июля (29 июня), 29 (16) января

Не утвержден для общецерковного использования.

Конда́к 1.

Избра́ннии пропове́дницы А́гнца Непоро́чнаго, за ны́ закла́ннаго, Христа́ Бо́га, пресла́внии Апо́столи Пе́тре и Па́вле! Я́ко Богове́дением концы́ ми́ра озари́вшии и оби́льне струя́ми благода́ти напои́вшии, и ны́не с любо́вию при́зрите на чту́щия усе́рдно па́мять ва́шу. Испо́лните на́с ду́ха прему́дрости, сердца́ на́ша ве́рою утверди́те, да непреста́нно благода́рственная ва́м пое́м, со умиле́нием зову́ще:

Ра́дуйтеся, святи́и первоверхо́внии Апо́столи Пе́тре и Па́вле.

И́кос 1.

А́нгели благове́стницы яви́стеся на земли́, Апо́столи Пе́тре и Па́вле блаже́ннии, зане́ от Самаго́ Вино́вника спасе́ния на́шего на де́лание ва́ше призва́ни бы́вше, широту́ всея́ земли́ обтеко́сте, иуде́ом и е́ллином Христа́ распя́таго, Бо́жию Си́лу и Бо́жию Прему́дрость, пропове́дающе. Те́мже и мы́, све́том уче́ний ва́ших озаря́еми, се́рдцем и усты́ взыва́ем к ва́м сицева́я:

Ра́дуйтеся, зве́зды светоза́рныя, от восто́ка возсия́вшия и все́м лю́дем пу́ть ко Христу́ показа́вшия; ра́дуйтеся, Це́ркве Христо́вы утвержде́ние и столпи́ непоколеби́мии.

Ра́дуйтеся, вла́сть вяза́ти и реши́ти грехи́ на́ша от Христа́ прии́мшии; ра́дуйтеся, во святы́х писа́ниих ва́ших к ве́ре и упова́нию на Бо́га вся́ ны́ призыва́ющии.

Ра́дуйтеся, в житии́ ва́шем о́бразы обраще́ния согреша́ющим яви́вшии; ра́дуйтеся, высоту́ любве́ и́стинныя сло́вом и де́лом на́м показа́вшии.

Ра́дуйтеся, святи́и первоверхо́внии Апо́столи Пе́тре и Па́вле.

Конда́к 2.

Ви́дя тя́, апо́столе Пе́тре, на мо́ре Галиле́йстем вку́пе со Андре́ом, бра́том твои́м, вмета́юща мре́жи, Госпо́дь рече́ ва́м: «Гряди́та по Мне́, и сотворю́ вы́ ловца́ челове́ком». И а́бие, оста́вльше мре́жи, по Не́м идо́сте. Те́мже, красото́ Це́ркви вселе́нския, сотвори́ и на́с предста́тельством твои́м ско́ры бы́ти на де́лание за́поведей Бо́жиих, ко́сны же ко греху́, да, зло́бою младе́нствующе, дости́гнем вси́ в ме́ру во́зраста му́жа соверше́нна, пою́ще Бо́гови: Аллилу́иа.

И́кос 2.

Ра́зум Боже́ственный освети́ тя́, Па́вле, избра́нный сосу́де Бо́жий, егда́, ревну́я о оте́ческих преда́ниих, ше́ствовал еси́ в Дама́ск гони́ти Це́рковь Христо́ву. Тогда́ бо внеза́пу сия́ние Сла́вы Госпо́дни облиста́ тебе́ и гла́с бы́сть с Небесе́: «Са́вле, Са́вле, что́ Мя́ го́ниши?» Ты́ же, а́ще зре́нием плотски́м омрачи́лся еси́, но ду́хом узре́л еси́ Си́лу и Сла́ву Христа́ распя́та, тьму́ просвеща́юща и любо́вию Це́рковь Свою́ созида́юща, и того́ ра́ди плени́лся еси́ ду́хом, покая́ние и послуша́ние нося́ и глаго́ля: «Го́споди, что́ сотворю́?» Посе́м, восприи́м жре́бий апо́стольства от руки́ Госпо́дни и креще́ние водо́ю и Ду́хом от Ана́нии блаже́ннейшаго, яви́лся еси́ преди́вно сосу́д избра́нный благода́ти и свиде́тель немо́лчный Спаси́теля на́шего, от Него́же и мы́, просвеща́емии, пе́ти тебе́ навыко́хом сицева́я:

Ра́дуйся, све́тлосте церко́вная, от Све́та Неизрече́ннаго на пути́ пречу́дно во открове́ние язы́ков возжже́нная; ра́дуйся, зна́мения Си́лы Бо́жия в житии́ твое́м чу́дно яви́вый и те́м уста́ непокори́вым наве́ки загради́вый.

Ра́дуйся, сосу́де избра́нный, ме́ньша от Апо́стол и пе́рваго от гре́шник себе́ сокруше́нно нареки́й; ра́дуйся, я́коже Херуви́м тайнозри́тель, да́же до тре́тияго Небесе́ ве́рою и любо́вию вознесе́нный.

Ра́дуйся, я́коже Серафи́м пла́менный, ре́вностию по Бо́зе непреста́нно снеда́емый и истаева́емый; ра́дуйтеся, Па́вле и Пе́тре, благове́стия трубы́ громогла́сныя, основа́ния ве́тхаго ми́ра, я́коже Иерихо́н вторы́й сокруши́вшия.

Ра́дуйтеся, святи́и первоверхо́внии Апо́столи Пе́тре и Па́вле.

Конда́к 3.

Си́ла Вы́шняго, в не́мощех познава́емая, излия́ на тя́, Па́вле, адама́нте ве́ры, благода́ть на благода́ть, зане́ нело́жно испове́довал еси́: «Вся́ могу́ о укрепля́ющем мя́ Иису́се». И вои́стину пропове́дал еси́ Ева́нгелие во явле́нии Ду́ха и си́лы, творя́ вели́кая и неизрече́нная, сла́вная же и ужа́сная, я́ко не ве́дущии Бо́га Богове́дению науча́хуся, сердца́ ожесточе́нная еле́ом милосе́рдия напая́хуся и вся́ о́вцы расточе́нныя во огра́ду Па́стыря Еди́наго отвсю́ду стека́хуся, Ему́же и пе́ти согла́сно научи́шася: Аллилу́иа.

И́кос 3.

Име́я дерзнове́нную любо́вь ко Го́споду, ше́ствовал еси́, Пе́тре, по вода́м воздвиза́емым, я́ко по су́ху. Но а́ще и потопле́нием бы́л еси́ устраша́ем и сомне́нием обурева́ем, не потопи́лся еси́ в пучи́не, поне́же просте́рл еси́ ру́це и о́чи ко Спа́су, вопия́ Ему́ из глубины́ серде́чныя: «Го́споди, спаси́ мя́». И в то́й ча́с ру́ку по́мощи восприя́л еси́ от Христа́, Изба́вителя на́шего. Та́ко и мы́ в се́й юдо́ли земне́й, беда́ми устраша́еми и волна́ми страсте́й потопля́еми, взира́юще на тече́ние твое́, к ти́хому приста́нищу до́бре на́с наставля́ющее, благода́рственно воспева́ем ти́ си́це:

Ра́дуйся, ка́меню ве́ры многоце́нный, от Ка́мене Краеуго́льна избра́нный и утвержде́нный; ра́дуйся, хра́ме Ду́ха Свята́го, многоразли́чными дарова́ньми от Того́ преизря́дно украше́нный.

Ра́дуйся, ры́барю препро́стый, прему́дрости Бо́жия испо́лненный, е́йже от челове́к никто́же проти́витися мо́жет; ра́дуйся, самови́дче вели́чия Бо́жия, па́че царе́й и сла́вных земли́ от Го́спода на вся́ ве́ки просла́вленный.

Ра́дуйся, ха́ртие одухотворе́нная, в ню́же о́гненными письмены́ сло́во Бо́жие вписа́ся; ра́дуйся, с Па́влом апо́столом свети́ло равноче́стное и незаходи́мое.

Ра́дуйтеся, святи́и первоверхо́внии Апо́столи Пе́тре и Па́вле.

Конда́к 4.

Бу́рю лю́тых искуше́ний воздви́же дре́вле человекоуби́йца, искони́ иски́й Це́рковь Бо́жию потреби́ти и ученики́ Спа́совы, я́коже пшени́цу, разсе́яти: но Госпо́дь моли́ся о тебе́, Пе́тре, да не оскуде́ет ве́ра твоя́. И та́ко, от Спа́са просвеща́емь и от Него́ в не́мощи укрепля́емь, вои́стину сокруши́л еси́ че́люсти вра́жия и обра́щся утверди́л еси́ бра́тию твою́, поя́ Бо́гу: Аллилу́иа.

И́кос 4.

Слы́шаще, Па́вле прему́дре, о ди́внем избра́нии твое́м, во е́же возвести́ти и́мя Го́спода Иису́са наро́дом и царе́м и сыно́м Изра́илевым, и ви́дяще тя́ в сло́ве, в житии́, в любви́, в ду́се, в ве́ре, в чистоте́, я́коже све́та язы́ком во спасе́ние и́х поста́влена, неве́рнии ве́рою просвеща́хуся, ве́рнии же, ликовству́юще, Го́спода прославля́ху. Те́мже и мы́, сора́доватися за́поведь прие́мше, прино́сим ти́ гла́сом ра́дования такова́я:

Ра́дуйся, ве́рный служи́телю Христо́в, вся́ сла́вная ми́ра я́коже со́р и пра́х вмени́вый и все́м себе́ порабо́тивый Христа́ ра́ди и Ева́нгелия; ра́дуйся, до́брый во́ине Христо́в, во вся́ ору́жия Бо́жия облече́нный и вся́ язы́ки в послуша́ние Христо́во покори́вый.

Ра́дуйся, же́ртво прия́тнейшая, Христу́ сораспе́ншаяся, Христа́ ра́ди по вся́ дни́ умира́ти приобы́кшая; ра́дуйся, се́ятелю слеза́ми мно́гими, у́зниче и испове́дниче пресла́вный, я́звы Го́спода Иису́са Христа́ на те́ле твое́м ра́достно носи́вый.

Ра́дуйся, сла́во и похвало́ Це́ркве Вселе́нския, позо́рище ми́рови бы́вый, гла́д, жа́жду, наготу́, бие́ние и поруга́ние за Христа́ многоча́стне претерпе́вый; ра́дуйтеся, Па́вле и Пе́тре, Апо́столов украше́ние, ми́ру благове́стницы, Це́ркве утвержде́ние.

Ра́дуйтеся, святи́и первоверхо́внии Апо́столи Пе́тре и Па́вле.

Конда́к 5.

Боготе́чная звезда́ яви́лся еси́, Па́вле, егда́ тече́ние твое́, пресве́тло наче́н от Дама́ска, да́же до Ри́ма просте́рл еси́ и, я́коже пре́жде звезда́ от восто́к научи́ волхвы́ кла́нятися Со́лнцу Пра́вды, си́це и ты́, Богому́дре, пу́ть ко Христу́ показа́л еси́ все́м, хотя́щим дости́гнути спасе́ния, взыва́я со дерзнове́нием мно́гим: «Подража́тели мне́ быва́йте, я́коже и а́з Христу́». Ему́же и пе́ти научи́л еси́ на́с еди́неми усты́: Аллилу́иа.

И́кос 5

Ви́дев на горе́ Фаво́рстей Сла́ву Единоро́днаго от Отца́, оде́яна Све́том, я́ко ри́зою, хотя́ща же за ны́ облещи́ся в ри́зу поруга́ния, глаго́лал еси́, Пе́тре, Иису́сови, прови́дя сла́ву несказа́нную искупле́нных Кро́вию А́гнца Непоро́чна Христа́: «Го́споди, добро́ е́сть на́м зде́ бы́ти». Сего́ ра́ди и мы́, ро́ди да́льнии, лише́ни чистоты́ светоза́рныя, а́ще и недосто́йни су́ще, оба́че твои́м а́нгельским гла́сом призва́ннии к насле́дию нетле́нну, чи́сту, неувяда́ему, соблюда́ему на Небесе́х, я́коже о́бщницы хотя́щей откры́тися Сла́ве, воспева́ем ти́ си́це:

Ра́дуйся, блаже́нне, от Присносу́щныя И́стины досто́йно «блаже́н» нарече́нный; ра́дуйся, би́сере предо́брый, от Го́спода при е́зере обрете́нный и све́том от Све́та осия́нный.

Ра́дуйся, от Самаго́ Искупи́теля ро́да челове́ча на про́поведь Ева́нгелия по́сланный; ра́дуйся, вои́стину лове́ц челове́ков яви́выйся, ты́ бо, я́коже и пре́жде, благода́тию влече́ши ду́ши омраче́нныя в чу́дный Све́т Христа́ Бо́га.

Ра́дуйся, исто́чниче животво́рный, от Исто́чника жи́зни ве́чныя истеки́й и от бога́тства даро́в Ду́ха Свята́го жа́ждущия ду́ши напоя́яй; ра́дуйтеся, Пе́тре и Па́вле, я́коже Серафи́ми шестокрила́тии, у Престо́ла Царя́ Сла́вы паря́щии и ко све́ту Та́ин Бо́жиих приница́ющии.

Ра́дуйтеся, святи́и первоверхо́внии Апо́столи Пе́тре и Па́вле.

Конда́к 6.

Пропове́дник немо́лчен и по сме́рти твое́й, Пе́тре Богоно́сне, яви́лся еси́, зане́ с не́ба мы́сленнаго, я́коже гро́м та́инственный, о зва́нии христиа́нстем многоразли́чне напомина́еши. Мы́ же, ве́дяще любо́вь твою́ николи́же отпа́дающу и моли́тву о на́с непреста́нно у Престо́ла Бо́жия де́ему, пое́м се́рдцем умиле́нным: Аллилу́иа.

И́кос 6.

Возсия́л еси́, Па́вле великоимени́те, зна́меньми и чудесы́ вско́ре, отне́леже Ду́х Святы́й во Антиохи́и повеле́ ти́ нача́ти превели́кое служе́ние Апо́стола язы́ков: та́же, дости́г Ки́пра, Ели́мы волхва́ зре́ние омрачи́л еси́ и Се́ргия проко́нсула све́том и́стины озари́л еси́. Сподо́би и на́с, све́та сего́ прича́щшихся, просла́вити ди́вная де́ла твоя́ в пе́снех и пе́ниих духо́вных и воспева́ти тебе́ такова́я:

Ра́дуйся, све́те серде́ц кро́тких и разу́мных, я́же, я́ко дои́лица, гре́еши и пе́стунствуеши писа́ньми твои́ми Богодухнове́нными; ра́дуйся, же́зле наказа́ния, сосу́ды лжи́ и льсти́ до конца́ сокруша́яй, сердца́ же сокруше́нная на недви́жимем ка́мени ве́ры воздвиза́яй.

Ра́дуйся, Христо́во Ева́нгелие в себе́ воплоти́вый и сего́ ра́ди превы́ше ви́димых вознесе́нный и просла́вленный; ра́дуйся, уста́ медото́чная, ра́дость мно́гую Апо́столом и ве́рным возвести́вшая, я́ко отве́рзе тобо́ю Госпо́дь две́рь спасе́ния все́м язы́ком.

Ра́дуйся, ревни́телю по Бо́зе, но́вый Илие́, не на чужде́м основа́нии созида́яй и ре́вностию твое́ю стра́ны да́льния обтека́яй; ра́дуйтеся, Па́вле и Пе́тре, ве́сь ми́р между́ ва́ми раздели́вшии, во е́же о́вому у́бо бы́ти Апо́столу язы́ков, друго́му же пропове́дати наро́ду избра́нному.

Ра́дуйтеся, святи́и первоверхо́внии Апо́столи Пе́тре и Па́вле.

Конда́к 7.

Хотя́ и́стину утверди́ти и ми́р Це́ркви огради́ти, прише́л еси́, Па́вле, побо́рниче пра́вды, во святы́й гра́д, в не́мже на собра́нии святы́х Апо́стол и ве́рных свиде́тельствовал еси́ вку́пе с Петро́м и Варна́вою, я́ко Ду́х Святы́й ды́шит, иде́же хо́щет, да́руя благода́ть Свою́ незави́стно иуде́ом и е́ллином и ве́рою вся́ спаса́я, а не ме́ртвенными де́лы ве́тхаго зако́на. И та́ко вои́стину вси́ ве́рнии, свобо́ду и ми́р получи́вше, сою́зом любве́ связу́еми, благода́рственно воспева́ют Бо́гови: Аллилу́иа.

И́кос 7.

Но́ваго арха́нгела, провозве́стника та́йны, от ве́ка сокрове́нныя, избра́ тя́, Апо́столе Пе́тре, Госпо́дь, егда́ вопроси́ ученики́ Своя́: «Вы́ же кого́ Мя́ глаго́лете бы́ти?» Ты́ же, от Отца́ Небе́снаго просвеща́ем, возвести́л еси́ несомне́нное основа́ние на́шея ве́ры, глаго́ля ко Спа́су: «Ты́ еси́ Христо́с, Сы́н Бо́га Жива́го». Того́ ра́ди и мы́, чту́ще тя́, я́ко наде́жду на́шего спасе́ния неприкрове́нно испове́давша, взыва́ем ти́ такова́я:

Ра́дуйся, Сина́ю но́вый, скрижа́ль спасе́ния лю́дем я́сно показа́вый и свобо́ду во Христе́ возвести́вый; ра́дуйся, первоположе́нный от Архите́ктона Небе́снаго ка́меню ве́ры и испове́дания, на не́мже Це́рковь Христо́ва необори́мо основа́ся.

Ра́дуйся, первопоста́вленный врата́рю вхо́да ра́йскаго, ему́же пе́рвее обеща́ся Госпо́дь да́ти ключи́ Ца́рствия Небе́снаго; ра́дуйся, судие́ пра́ведный, имы́й суди́ти с про́чими Апо́столы обемана́десяте коле́нома Изра́илевома.

Ра́дуйся, я́ко очеса́ и ушеса́ твоя́ блаже́нная Христа́ Спа́са на́шего, Его́же лицезре́ти проро́цы пла́менне жела́ху, во пло́ти су́ща на земли́ ви́деша и слы́шаша; ра́дуйтеся, Пе́тре и Па́вле, иму́щии но́ги благовествова́ния красне́йшия и сердца́ освяще́нная, вы́ бо Ева́нгелию послужи́сте и ева́нгельски пожи́сте.

Ра́дуйтеся, святи́и первоверхо́внии Апо́столи Пе́тре и Па́вле.

Конда́к 8.

Стра́нное чу́до и неудо́бь разумева́емое яви́лся еси́, Пе́тре, му́дрствующим земна́я, я́ко незна́тна ми́ра и уничиже́на избра́ тя́ Госпо́дь, и посрами́л еси́ му́дрыя, одоле́л еси́ ца́рства, приве́л еси́ со́нмы омраче́нных ко Све́ту И́стины, и доны́не, я́коже сто́лп о́гненный, озаря́еши вся́ земноро́дныя, указу́я несомне́нный пу́ть во блаже́нное Оте́чество. Сего́ ра́ди, бога́тству благода́ти в тебе́ дивя́щеся, пое́м Бо́гу: Аллилу́иа.

И́кос 8.

Все́м бы́л еси́ вся́, Па́вле, любо́вию все́х объе́мля, сло́вом спасе́ния да́льних и бли́жних достиза́я, ве́рою вся́ превозмога́я: зане́ и в Фили́ппех, ми́р благовеству́я, а́ще и па́лицами бие́н бы́л еси́ лю́те и в темни́цу во око́вах вве́ржен, но воспе́л еси́ та́мо вку́пе с Си́лою пе́снь чу́дную хвалы́ и благодаре́ния Бо́гу, И́же и возгреме́ рабо́м Свои́м тру́сом ве́лиим, я́ко и основа́ния темни́чная поколеба́шася и две́ри отверзо́шася. Мы́ же, ви́дяще тя́, прему́дре, тьму́ узи́лища све́том Богове́дения озаря́юща и свобо́ду о Христе́ у́зником подаю́ща, воспева́ем ти́ сицева́я:

Ра́дуйся, у́зниче Христо́в, темни́цу во хра́м претвори́вый и у́зами твои́ми де́монов це́пи лю́дем разреши́вый; ра́дуйся, си́льне, не́мощи немощны́х понесы́й, не себе́, но бли́жним угожда́ти иски́й.

Ра́дуйся, пречу́дне, у́зами и скорбьми́ хвали́выйся, ра́доватися с ра́дующимися и пла́кати с пла́чущими научи́вый; ра́дуйся, уме́рый греху́, но при́сно живы́й Бо́гови, тебе́ бо жи́знь Христо́с и сме́рть приобре́тение.

Ра́дуйся, о́бразе неусы́пнаго де́лания, за́дняя забыва́яй, в пре́дняя простира́яйся и все́м помышле́нием к по́чести вы́шняго зва́ния теки́й; ра́дуйтеся, Па́вле и Пе́тре, да́же до сме́рти му́ченически Го́споду послужи́вшии и се́ю, я́ко венце́м, по́двиг ва́ш венча́вшии.

Ра́дуйтеся, святи́и первоверхо́внии Апо́столи Пе́тре и Па́вле.

Конда́к 9.

Вся́ ко Христу́ приводя́, возвести́л еси́, Па́вле, во Афи́нех мня́щимся му́дрым бы́ти Прему́дрость, свы́ше сходя́щую, да, ве́дяще су́етная, отсе́ле уве́дят Бо́га, неви́димаго и́м, и ося́жут Его́, о Не́м бо живе́м и дви́жемся и есмы́. Те́мже и мы́, благода́тию неизрече́нною ра́зум и́стины восприе́мше и се́рдцем нело́жно, я́ко бла́г Госпо́дь, пости́гше, пое́м Ему́ ве́рою тве́рдою, я́коже пе́рстом от Фомы́, осязу́ему: Аллилу́иа.

И́кос 9

Вити́йствовати не можа́ше язы́к челове́чь, егда́ Госпо́дь Си́л но́зе рабо́м Свои́м умыва́ше и ле́нтием отира́ше. Ты́ же, Пе́тре, стра́хом побежда́емь, а́ще возгласи́л еси́: «Не умы́еши ногу́ мое́ю вове́ки», но а́бие ве́сь в послуша́ние преложи́лся еси́, егда́ услы́шал еси́ глаго́л, рече́нный от Го́спода: «А́ще не умы́ю тебе́, не и́маши ча́сти со Мно́ю». И та́ко все́м се́рдцем возопи́л еси́: «Го́споди, не но́зе мои́ то́кмо, но и ру́це, и главу́». Мы́ же, ве́дяще тя́ в си́х, я́коже зла́то во огни́ искуше́ния, очища́ема и познава́юще от смире́ния к послуша́нию восхожде́ние твое́, та́инству Бо́жия промышле́ния покланя́ющеся, воспева́ем ти́ се́рдцем смире́нным такова́я:

Ра́дуйся, Пе́тре, очеса́ о́рля, и́миже зре́л еси́ Со́лнце Пра́вды — Христа́ Бо́га, Иу́де но́зе умы́вшаго и от него́ лобза́нием лука́вым пре́даннаго; ра́дуйся, наве́ки уневе́стивыйся Христу́, ты́ бо, А́гнцу Непоро́чну, я́коже а́гнец, после́дуя, до закла́ния твоего́ ве́рность соблю́л еси́.

Ра́дуйся, углю́ неугаси́мый, от же́ртвенника Небе́снаго огне́м любве́ Боже́ственныя непреста́нно объя́тый; ра́дуйся, свети́льниче горя́й и светя́й, ро́ды родо́в све́том пра́вды озаря́яй.

Ра́дуйся, гро́зде многооби́льный виногра́да Христо́ва, на ра́дость ми́ра многопеча́льнаго возраще́нный; ра́дуйтеся, Пе́тре и Па́вле, Христа́ Бо́га в себе́ ве́рно вообрази́вшии.

Ра́дуйтеся, святи́и первоверхо́внии Апо́столи Пе́тре и Па́вле.

Конда́к 10.

Спасе́ния во Христе́ неизсле́димую пучи́ну и покая́ния мно́гую си́лу яви́л еси́ в себе́, Пе́тре, егда́ трикра́ты по предрече́нному отве́рглся еси́ Го́спода: «Не ве́м Челове́ка Сего́!» Егда́ кля́лся и роти́лся еси́ во дво́ре архиере́я, но а́бие, воспомяну́в глаго́л Иису́сов, вне́ те́кл еси́, пла́кася го́рько. Мы́ же, уми́льне взира́юще на пресве́тлый се́й о́браз сокруше́ния, в науче́ние и обличе́ние жестоковы́йных серде́ц на́ших дарова́нный, пое́м Го́споду, па́ки ди́вно возвели́чившему тя́: Аллилу́иа.

И́кос 10

Стена́ и ору́жие непобеди́мое бы́л еси́, Па́вле, проти́ву миродержи́телей тьмы́ ве́ка сего́, я́ко и ца́рство и́х в Кори́нфе, Ефе́се и ине́х гра́дех вселе́нныя сокруши́л еси́, тьму́ многобо́жия разгоня́я и ра́зум и́стины утвержда́я. Ты́ бо нело́жно показа́лся еси́ Бо́жий слуга́ в терпе́нии мно́зе, в ско́рбех, беда́х, в теснота́х, в ра́нах, темни́цах, в нестрое́ниих, труде́х, во бде́ниих, в поще́ниих, я́ко и у́м на́ш недоуме́ет изрещи́ бога́тство добро́ты твоея́, денноно́щныя по́двиги со слеза́ми мно́гими. Того́ ра́ди, зря́ще мо́ре любве́ твоея́, дерза́юще мо́лим: услы́ши на́с, убо́гих, гре́шными усты́ глаго́лющих сицева́я:

Ра́дуйся, уме́рый греху́ благове́стниче непобеди́мый, я́ко в себе́ пе́рвее ве́тхаго челове́ка победи́в, Христу́ сораспя́лся еси́; ра́дуйся, учи́телю многопло́дный и волко́в хи́щных обличи́телю, я́ко тобо́ю о́браз ве́рным показа́л еси́, при́сно бо́дрствуя и науча́я вся́ сугу́бо: сло́вом и житие́м по сло́ву.

Ра́дуйся, все́х обогати́телю, я́ко, пре́жде са́м обнища́в и ничто́же имы́й, вся́ содержа́л еси́; ра́дуйся, о христиа́нех пла́менный ревни́телю, обручи́вый я́ Христу́, я́ко де́ву чи́сту, непоро́чную неве́сту.

Ра́дуйся, утро́бо многоболе́зненная бы́вый о ча́дех твои́х в му́ках рожде́ния, до́ндеже вообразит́ся в ни́х Христо́с; ра́дуйтеся, Па́вле и Пе́тре, в Ду́се еди́нице согла́сная во еди́ном гра́де, ве́рность Христу́ кро́вию запечатле́вшии.

Ра́дуйтеся, святи́и первоверхо́внии Апо́столи Пе́тре и Па́вле.

Конда́к 11.

Пе́ти и ублажа́ти у́зы и страда́ния твоя́, Па́вле многострада́льне, досто́йно е́сть, я́ко не то́кмо в терпе́нии мно́зе, но и с ра́достию предрече́нныя ти́ от Ага́ва проро́ка у́зы восприя́л еси́, и Це́ркви Кесари́йстей свиде́тельствовал еси́ си́це: «Не то́чию свя́зан бы́ти хощу́, но и умре́ти гото́в е́смь за и́мя Го́спода Иису́са». Ему́же и мы́, ди́вному во святы́х Свои́х, пое́м пе́снь: Аллилу́иа.

И́кос 11.

Све́том ра́дости неизрече́нныя и Боже́ственныя любве́ осия́н бы́л еси́, Пе́тре, егда́ Госпо́дь по воскресе́нии пе́рвее про́чих апо́стол яви́ся тебе́, скорбе́вшему. По си́х же па́ки я́влься, Влады́ка жи́зни вопроси́ тя́ трикра́ты: «Си́моне Ио́нин, лю́биши ли Мя́?» Ты́ же, огне́м Боже́ственныя любве́ опаля́ем, отвеща́л еси́ те́пле: «Го́споди, Ты́ ве́си, я́ко люблю́ Тя́». Того́ ра́ди и мы́, обнища́вшии ду́хом, помяну́вше преизоби́льныя то́ки сле́з и любве́ твоея́, и́хже ра́ди воззва́ тя́ Госпо́дь на пре́жний сте́пень апо́стольства, благогове́йне взыва́ем ти́ сицева́я:

Ра́дуйся, учи́телю покая́ния, слеза́ми го́рькими высоту́ смире́ния стяжа́вый и Воскре́сшим от гро́ба к ра́дости неизглаго́ланней на ве́ки приобще́нный; ра́дуйся, прему́дрости глубино́, смиренному́дрия высото́, пла́меню любве́, о́браз жития́ все́м ве́рным себе́ яви́вый.

Ра́дуйся, дру́же Го́спода Иису́са, и́го благове́стия ре́вностно понесы́й, над насле́дием Бо́жиим госпо́дствовати не восхоте́вый, но послуша́нию власте́м научи́вый; ра́дуйся, Апо́столе Христо́в, му́дрость змии́ну и чистоту́ голуби́ну в себе́ сочета́вый и о́бразом сме́рти твоея́ на кресте́ кра́йнее смиренному́дрие показа́вый.

Ра́дуйся, ра́бе Го́спода ве́рный, умно́живый да́нный тебе́ тала́нт и в ра́дость Го́спода вше́дый; ра́дуйтеся, Пе́тре и Па́вле, сердца́ не те́сная, ве́сь ми́р любо́вию вмести́вшая и концы́ вселе́нныя просвети́вшая.

Ра́дуйтеся, святи́и первоверхо́внии Апо́столи Пе́тре и Па́вле.

Конда́к 12.

Благода́ть Ду́ха Уте́шителя, излия́вшаяся на главы́ ве́рных во о́бразе язы́ков о́гненных, ско́ро излия́ся из у́ст твои́х, Пе́тре, глаго́лом о́гненным, во е́же благовести́ти с си́лою мно́гою Христа́ распя́та не то́чию поги́бшим овца́м до́му Изра́илева, но и язы́честей неплодя́щей це́ркви, да плодоно́сит и сия́ Бо́гови нетле́нный кри́н чистоты́ и покая́ния. Испроси́ и на́м, Апо́столе достоблаже́нне, ми́лость Го́спода, творя́щаго тобо́ю вели́кая и чу́дная, руко́ю твое́ю ме́ртвыя воскреша́юща и сме́ртию твое́ю на кресте́ ме́ртвенную любо́вь на́шу воспламеня́юща, да непреста́нно пое́м Ему́: Аллилу́иа.

И́кос 12.

Пою́ще пресве́тлую па́мять твою́, Па́вле, досто́йно ублажа́ем неизрече́нныя по́двиги, боле́зни и труды́, я́же во бде́ниих, во алчбе́ и жа́жде, в поще́ниих, в зиме́ и наготе́ поне́сл еси́. Кто́ бо изочте́т ра́ны, ско́рби и беды́ твоя́ во гра́дех, в пусты́ни, в мо́ри, беды́ от разбо́йник, беды́ от сро́дник, беды́ от язы́к и лжебра́тии? Кто́ подо́бен тебе́? Па́че все́х Апо́стол потруди́лся еси́. Те́мже мо́лим: не возгнуша́йся на́с, гре́шных, моля́щихся тебе́, но я́коже все́м бы́л еси́ вся́, и ны́не услы́ши немощны́м гла́сом приноси́мая ти́ сицева́я:

Ра́дуйся, у́зниче Христо́в, из темни́цы све́т распространи́вый, сло́вом и посла́нием во у́зах мно́го потруди́выйся, зане́ вои́стину сло́во Бо́жие не вя́жется; ра́дуйся, неизсле́димая пучи́но любве́, по бра́тии твое́й отлуче́н бы́ти от Христа́ преи́скренне восхоте́вый.

Ра́дуйся, подви́жниче преди́вный, по́двигом до́брым подвиза́выйся, тече́ние соверши́вый и кро́вию твое́ю Це́рковь украси́вый; ра́дуйся, источа́яй мо́ре чуде́с, я́ко главотя́жи и убру́сцы твои́ неду́ги исцеля́ху и де́моны прогоня́ху.

Ра́дуйся, любве́ Бо́жия неразлу́чный прича́стниче, го́рняя му́дрствуяй, а не земна́я, зане́ и от пло́ти разреши́тися и со Христо́м бы́ти возжела́л еси́; ра́дуйтеся, Па́вле и Пе́тре, ве́ры христиа́нския насади́телие, благоче́стия вода́ми напои́телие и ко приста́нищу ве́чному ве́рнии води́телие.

Ра́дуйтеся, святи́и первоверхо́внии Апо́столи Пе́тре и Па́вле.

Конда́к 13.

О всехва́льнии благове́стницы Пе́тре и Па́вле! Внемли́те воздыха́нием серде́ц на́ших, моля́щиеся за ны́, мно́го бо мо́жет моли́тва пра́ведных пред Бо́гом: потщи́теся и ны́не воспомина́ти на́м о небе́снем зва́нии и христиа́нстей кончи́не жи́зни на́шея, привлецы́те на́с ко сла́дости ева́нгельския и́стины, свяжи́те у́зами любве́ Христо́вы, да мы́ вси́, отве́ргшеся нече́стия и мирски́х по́хотей, вни́дем в ра́дость Го́спода на́шего, пою́ще Ему́ со А́нгелы и с ли́ки святы́х: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгели благове́стницы яви́стеся на земли́, Апо́столи Пе́тре и Па́вле блаже́ннии, зане́ от Самаго́ Вино́вника спасе́ния на́шего на де́лание ва́ше призва́ни бы́вше, широту́ всея́ земли́ обтеко́сте, иуде́ом и е́ллином Христа́ распя́таго, Бо́жию Си́лу и Бо́жию Прему́дрость, пропове́дающе. Те́мже и мы́, све́том уче́ний ва́ших озаря́еми, се́рдцем и усты́ взыва́ем к ва́м сицева́я:

Ра́дуйтеся, зве́зды светоза́рныя, от восто́ка возсия́вшия и все́м лю́дем пу́ть ко Христу́ показа́вшия; ра́дуйтеся, Це́ркве Христо́вы утвержде́ние и столпи́ непоколеби́мии.

Ра́дуйтеся, вла́сть вяза́ти и реши́ти грехи́ на́ша от Христа́ прии́мшии; ра́дуйтеся, во святы́х писа́ниих ва́ших к ве́ре и упова́нию на Бо́га вся́ ны́ призыва́ющии.

Ра́дуйтеся, в житии́ ва́шем о́бразы обраще́ния согреша́ющим яви́вшии; ра́дуйтеся, высоту́ любве́ и́стинныя сло́вом и де́лом на́м показа́вшии.

Ра́дуйтеся, святи́и первоверхо́внии Апо́столи Пе́тре и Па́вле.

Конда́к 1.

Избра́ннии пропове́дницы А́гнца Непоро́чнаго, за ны́ закла́ннаго, Христа́ Бо́га, пресла́внии Апо́столи Пе́тре и Па́вле! Я́ко Богове́дением концы́ ми́ра озари́вшии и оби́льне струя́ми благода́ти напои́вшии, и ны́не с любо́вию при́зрите на чту́щия усе́рдно па́мять ва́шу. Испо́лните на́с ду́ха прему́дрости, сердца́ на́ша ве́рою утверди́те, да непреста́нно благода́рственная ва́м пое́м, со умиле́нием зову́ще:

Ра́дуйтеся, святи́и первоверхо́внии Апо́столи Пе́тре и Па́вле.

Моли́тва.

О пресла́внии апо́столи Пе́тре и Па́вле, ду́ши за Христа́ преда́вшии и кро́вию ва́шею па́жить Его́ удобри́вшии! Услы́шите ча́д ва́ших моли́твы и воздыха́ния, се́рдцем сокруше́нным ны́не приноси́мыя. Се́ бо беззако́ньми омрачи́хомся и того́ ра́ди беда́ми, я́коже ту́чами, обложи́хомся, еле́я же до́браго жития́ обнища́хом зело́. О си́льнии! Понеси́те не́мощи на́ша, не отлуча́йтеся ду́хом от на́с, да не разлучи́мся вконе́ц от любве́ Бо́жия, но кре́пким заступле́нием ва́шим на́с защити́те, да поми́лует Госпо́дь все́х на́с моли́тв ва́ших ра́ди, да истреби́т же рукописа́ние безме́рных грехо́в на́ших и да сподо́бит со все́ми святы́ми блаже́ннаго Ца́рствия и бра́ка А́гнца Своего́, Ему́же че́сть, и сла́ва, и благодаре́ние, и поклоне́ние во ве́ки веко́в. Ами́нь.

Yandex Metrika