Конда́к 1.

Избра́нныя от Бо́га служи́тельницы но́выя благода́ти, пра́веднаго Ла́заря боголюби́выя сестры́, Ма́рфо и Мари́е, вы́ дея́нием и разуме́нием в ве́ре и любви́ Христу́ после́довали есте́ и ны́не с ли́ки святы́х же́н пребыва́ете, наслажда́ющеся ра́йских красо́т и весе́лия. Те́мже, я́ко иму́щия дерзнове́ние ко Го́споду, Того́ приле́жно моли́те от бе́д и скорбе́й и паде́ний грехо́вных изба́вити на́с, да и мы́, ва́ми научи́вшеся угожда́ти Христу́ Бо́гу, не преста́нем со умиле́нием взыва́ти ва́м:

Ра́дуйтеся, Ма́рфо и Мари́е, о́браз ве́ры и любве́ на́м показу́ющия.

И́кос 1.

А́нгелов и челове́ков Ца́рь и Госпо́дь, добро́ту ду́ш ва́ших прови́дев и до конца́ ва́с возлюби́в, во дни́ земно́й жи́зни Своея́ благослове́нный до́м ва́ш посеща́ше и бра́та ва́шего Ла́заря от ме́ртвых воскреси́. Мы́ же гре́шнии, таково́е человеколю́бное снисхожде́ние Его́ воспомина́юще, во умиле́нии серде́ц на́ших вопие́м ва́м та́ко:

Ра́дуйтеся, все́м се́рдцем, все́ю душе́ю и все́ю мы́слию ва́шею Бо́га возлюби́вшия; ра́дуйтеся, любо́вь ва́шу не сло́вом или́ язы́ком, но де́лом и и́стиною яви́вшия.

Ра́дуйтеся, любо́вию ве́ру во Христа́ Сы́на Бо́жия от Отца́ Небе́снаго сниска́вшия; ра́дуйтеся, ве́рою, послуша́нием, дела́ми любве́ и милосе́рдия Ему́ послужи́вшия.

Ра́дуйтеся, те́м Ца́рствие Небе́сное насле́довавшия; ра́дуйтеся, де́в непоро́чных и же́н целому́дренных похвало́ и украше́ние.

Ра́дуйтеся, Ма́рфо и Мари́е, о́браз ве́ры и любве́ на́м показу́ющия.

Конда́к 2.

Ве́дяще, пра́ведныя жены́, Ма́рфо и Мари́е, я́ко Госпо́дь, не имы́й где́ главы́ подклони́ти, и́мать приити́ к ва́м, потща́лися есте́ в дому́ ва́шем о́ва Его́, я́ко Боже́ственнаго Учи́теля, с ве́рою и любо́вию послу́шати и со усе́рдием мно́гим послужи́ти Ему́. Те́мже науча́ете и на́с Ему́, я́ко Бо́гу, на́с ра́ди воплоти́вшемуся, неле́ностно служи́ти и благогове́йно воспева́ти: Аллилу́иа.

И́кос 2.

Науча́я на́с и страннолю́бия не оставля́ти, и о сло́ве Бо́жием усе́рдно прилежа́ти, не о хле́бе бо еди́ном жи́в бу́дет челове́к, но о вся́ком глаго́ле Бо́жии, Госпо́дь и Учи́тель на́ш и слу́жбы Ма́рфы трудолю́бныя не отве́рже, и Мари́ино седе́ние при ногу́ Его́ попремно́гу ублажи́. Те́мже и мы́ боголюби́вей дво́ице о́ной воспои́м:

Ра́дуйся, Ма́рфо, Христа́, на́с ра́ди воплоти́вшагося, в дому́ твое́м прия́вшая; ра́дуйся, в служе́нии твое́м на потре́бу пло́ти Его́ не отве́рженная.

Ра́дуйся, и на́с де́лы милосе́рдия к бли́жним служи́ти Ему́ науча́ющая; ра́дуйся, Мари́е, при ногу́ Иису́сову сло́вом у́ст Его́ насыща́вшаяся.

Ра́дуйся, еди́ное на потре́бу, я́ко благу́ю ча́сть, избра́вшая; ра́дуйся, ре́вности ра́ди о слы́шании слове́с Госпо́дних со блаже́нными Сами́м Христо́м сопричте́нная.

Ра́дуйтеся, Ма́рфо и Мари́е, о́браз ве́ры и любве́ на́м показу́ющия.

Конда́к 3.

Си́лою Боже́ственною укрепля́еми, уны́нием не уязви́лися есте́, егда́ узре́ли бра́та ва́шего боле́знию лю́тою истаева́юща, но к Цели́телю неду́гов, Го́споду Иису́су, со упова́нием посла́ли есте́, глаго́люще: Го́споди, его́же лю́биши, боли́т. Си́м после́дующе, и мы́ во вся́ком обстоя́нии уны́нию да не предади́мся, со упова́нием Христу́ Бо́гу вопию́ще: Аллилу́иа.

И́кос 3.

Любля́ше Иису́с Ма́рфу и сестру́ ея́ и Ла́заря и, ве́ру и́х в гряду́щее Ца́рствие жи́зни ве́чныя испыту́я и утвержда́я, рече́: сия́ боле́знь не́сть к сме́рти, но к сла́ве Бо́жией, да просла́вится Сы́н Бо́жий ея́ ра́ди. Вы́ же, о боголюби́выя сестры́, а́ще и немощни́и сосу́ди пло́тию бы́вше, оба́че и пред лице́м сме́рти бра́та ва́шего ве́рою и любо́вию ко Христу́ ду́хом горя́ще, в Боже́ственней си́ле Его́ не усомни́лися есте́. Сего́ ра́ди приими́те от на́с похвале́ния такова́я:

Ра́дуйтеся, во уны́ние безнаде́жное во обстоя́нии и ско́рби не впа́дшия; ра́дуйтеся, обремене́нных скорбьми́ жите́йскими те́м ободря́ющия.

Ра́дуйтеся, в печа́ли ва́шей ко Врачу́ ду́ш и теле́с, Го́споду Иису́су, со смире́нным упова́нием по́мыслы своя́ обрати́вшия; ра́дуйтеся, лица́ Его́ не ви́дяще, во благо́й поко́рности Ему́ пребы́вшия.

Ра́дуйтеся, во испыта́нии се́м ве́ру кре́пку, я́ко Авраа́мову, яви́вшия; ра́дуйтеся, в злострада́ниях терпе́ние тве́рдое, я́ко И́ов, показа́вшия.

Ра́дуйтеся, Ма́рфо и Мари́е, о́браз ве́ры и любве́ на́м показу́ющия.

Конда́к 4.

Ве́дая, я́же хо́щет сотвори́ти, Всемогу́щий Госпо́дь и Спа́с на́ш, рече́ ученико́м Свои́м: Ла́зарь, дру́г на́ш, у́спе, но иду́, да возбужу́ его́; науча́я все́х во све́те лица́ Бо́жия ходи́ти и Пода́телю жи́зни воспева́ти: Аллилу́иа.

И́кос 4.

Мно́гии от иуде́й приидо́ша к Ма́рфе и Мари́и, да уте́шат и́х о Ла́заре, бра́те и́х. Сестры́ же, отбега́я и́х, я́ко не иму́щих о Христе́ Иису́се упова́ния. Ма́рфа к Еди́ному Уте́шителю стопы́ своя́ с ра́достию напра́ви, егда́ То́й Вифа́нии дости́же. Такову́ю кре́пкую любо́вь сесте́р Ла́заревых ко Христу́ и ве́ру и́х зря́ще, ра́достными гла́сы воспои́м и́м такова́я:

Ра́дуйтеся, добро́тою ду́ш ва́ших неве́рных иуде́ев окамене́нныя сердца́ покори́ти возмо́гшия; ра́дуйтеся, не су́етному уны́нию, но Бо́жию благоволе́нию себя́ преда́вшия.

Ра́дуйтеся, на еди́ную бла́гость Христо́ву в печа́ли ва́шей наде́жду возложи́вшия; ра́дуйтеся, в сре́тение Его́ со тща́нием стопы́ ва́ша напра́вившия.

Ра́дуйтеся, во упова́нии ва́шем от Могу́щаго спасти́ оправда́нныя; ра́дуйтеся, утеше́ния в ско́рбех не от люде́й, но от Бо́га иска́ти на́с науча́ющия.

Ра́дуйтеся, Ма́рфо и Мари́е, о́браз ве́ры и любве́ на́м показу́ющия.

Конда́к 5.

Ма́рфа блаже́нная, егда́ сре́те Го́спода, утеше́ния от Него́ и́щущи, рече́: Го́споди, а́ще бы Ты́ зде́ бы́л, не у́мерл бы бра́т мо́й. Но и ны́не ве́м, я́ко ели́ка а́ще попро́сиши от Бо́га, да́ст Тебе́ Бо́г. Ему́же от всея́ души́ на́шея и мы́ вопие́м: Аллилу́иа.

И́кос 5.

Боже́ственное Свое́ смотре́ние о на́шем спасе́нии показу́я, Госпо́дь Иису́с, я́ко жи́зни и сме́рти Влады́ка, благоволи́ рещи́ тебе́, блаже́нная Ма́рфо: воскре́снет бра́т тво́й. И па́ки: ве́руяй в Мя́, а́ще и у́мрет, оживе́т. Ве́риши ли сему́? – вопроси́ тя́. Ты́ же отвеща́ Ему́: е́й, Го́споди, ве́рую, я́ко Ты́ Христо́с Сы́н Бо́жий, гряду́щий в ми́р. Сего́ ра́ди, ве́ре во Христа́ Сы́на Бо́жия тобо́ю науча́емии, восхваля́ем тя́ си́це:

Ра́дуйся, блаже́нная Ма́рфо, обетова́ние о воскресе́нии бра́та твоего́ от Сама́го Жизнода́вца услы́шавшая; ра́дуйся, я́ко вопроше́нная от Него́ о ве́ре твое́й, не пло́ти и кро́ви, но гла́са Отца́ Небе́снаго послу́шавшая.

Ра́дуйся, я́ко от Него́ науче́нная, Христа́ Сы́на Бо́жия тве́рдо испове́дала еси́; ра́дуйся, я́ко те́м ка́мень ве́ры, на не́мже созда́ Госпо́дь Це́рковь Свою́, яви́вшая.

Ра́дуйся, во испове́дании твое́м Петру́, первоверхо́вному апо́столу, уподо́бившаяся; ра́дуйся, равноапо́стольнаго ублаже́ния вои́стину досто́йная.

Ра́дуйтеся, Ма́рфо и Мари́е, о́браз ве́ры и любве́ на́м показу́ющия.

Конда́к 6.

Тро́сти надло́мленныя не преломля́яй, Человеколю́бец Госпо́дь, егда́ ви́де Мари́ю и прише́дшия с не́й иуде́и пла́чущия, я́коже любля́ше Ла́заря, прослези́ся Са́м. Да и мы́ немощни́и, в ско́рбех су́ще, безтре́петно к Нему́ со слеза́ми притека́ем, вопию́ще Ему́: Аллилу́иа.

И́кос 6.

Вои́стину благослове́н о бра́те твое́м пла́ч тво́й, Мари́е, его́же ви́дя, прослези́ся Иису́с. Сего́ ра́ди со умиле́нием ублажа́ем тя́ си́це:

Ра́дуйся, боголюби́вая Мари́е, в серафи́мстей любви́ твое́й ко Го́споду и к сро́дником любве́ своея́ не угаси́вшая; ра́дуйся, пла́чем твои́м о Ла́заре на́с, во окамене́нии серде́чнем пребыва́ющих, обличи́вшая.

Ра́дуйся, Христа́ Бо́га сле́зы о па́дшем созда́нии Свое́м источи́ти подви́гшая; ра́дуйся, в слеза́х Го́спода Иису́са, не́мощем на́шим состра́ждуща, еле́й утеше́ния все́м пла́чущим и боле́знующим показа́вшая.

Ра́дуйся, и сама́ в ско́рбех на́ших сострада́ти на́м могу́щая; ра́дуйся, с сестро́ю твое́ю Ма́рфою милосе́рдия сестра́м первонача́льница богоуго́дная.

Ра́дуйтеся, Ма́рфо и Мари́е, о́браз ве́ры и любве́ на́м показу́ющия.

Конда́к 7.

Всеве́дый по Божеству́ Своему́, челове́ческое естество́ показу́юще, о Ла́заре вопроша́л еси́, Го́споди Иису́се: где́ положи́сте его́. И ка́мень от гро́ба взя́ти повеле́л еси́, да возсмерде́нием сме́рти заградя́тся неве́рных уста́. Мы́ же, ве́рнии, со дерзнове́нием Тебе́, победи́ти сме́рть прише́дшему, вопие́м: Аллилу́иа.

И́кос 7.

Не́мощь естества́ челове́ческаго явля́ющи, сестра́ уме́ршаго, Ма́рфа, глаго́ла Иису́су: Го́споди, уже́ смерди́т: четверодне́вен бо е́сть. Мари́я же, зря́ще ка́мень отвале́н от гро́ба, в молча́нии пребыва́ше. Сему́ Мари́ину молча́нию со умиле́нием внима́юще, с Ма́рфою же малове́рие свое́ Го́споду дерзнове́нно испове́дующе, воззове́м к ни́м такова́я:

Ра́дуйся, Мари́е, я́ко ко гро́бу смердя́щаго в претре́петнем молча́нии за Христо́м прише́дшая; ра́дуйся, я́ко си́м все́х на́с в послуша́ние ве́ры ра́зум покоря́ти научи́вшая.

Ра́дуйся, Ма́рфо, я́ко не́мощь ве́ры на́шея превозмога́ти науча́ющая; ра́дуйся, я́ко все́м на́м: е́й, Го́споди, ве́рую, я́ко Ты́ Христо́с, Сы́н Бо́жий, глаго́лати указа́вшая.

Ра́дуйтеся, блаже́нныя сестры́, в не́мощех ду́ш и теле́с ва́ших от Христа́ не отступи́вшия и Ему́ любо́вию после́довавшия; ра́дуйтеся, на высоту́ благода́тнаго разуме́ния Сами́м Всеве́дцем возведе́нныя.

Ра́дуйтеся, Ма́рфо и Мари́е, о́браз ве́ры и любве́ на́м показу́ющия.

Конда́к 8.

Сла́ву Свою́, я́ко Единоро́днаго от Отца́, все́м ве́рным явля́я, хвалу́ Отцу́ Своему́ возда́в, Иису́с гла́сом вели́ким воззва́: Ла́заре, гряди́ во́н. И бездыха́нный, Даю́щаго дыха́ние послу́шав, от сме́рти возста́ и от гро́ба изы́де; да чу́до сие́ зря́ще, ку́пно и мы́ с ни́м Победи́телю сме́рти воспои́м: Аллилу́иа.

И́кос 8

Чу́до ве́лие и стра́шное сотвори́ Христо́с Бо́г на́ш, Ла́заря четверодне́внаго от ме́ртвых воздви́гнув. Да и на́с все́х ве́ру в Него́, я́ко Сы́на Бо́жия, утверди́т, безсме́ртие души́ и о́бщее все́х воскресе́ние уверя́я. Мы́ же, боже́ственное поклоне́ние Сотво́ршему сие́ воздаю́ще, ублажи́м сестры́ воскреше́ннаго И́м и воззове́м к ни́м сицева́я:

Ра́дуйтеся, пра́веднаго Ла́заря сестры́, Христа́ нелицеме́рне возлюби́вшия; ра́дуйтеся, Христо́м за ве́рность ва́шу возлю́бленныя.

Ра́дуйтеся, о́бщее воскресе́ние пре́жде страсте́й Христо́вых в ве́ре узре́вшия; ра́дуйтеся, ве́рою ва́шею и на́шу ве́ру укрепля́ющия.

Ра́дуйтеся, ученицы́ Христо́вы достосла́вныя; ра́дуйтеся, ли́ка апо́стольскаго и́стинныя прича́стницы.

Ра́дуйтеся, Ма́рфо и Мари́е, о́браз ве́ры и любве́ на́м показу́ющия.

Конда́к 9.

Сы́ны тьмы́, зря́ уме́ршаго и гла́сом Бо́жиим от тле́ния возста́вшаго, в ожесточе́нии серде́ц не ве́роваша Христу́ да́же до сего́ дне́, во ослепле́нии су́ще. Мы́ же, си́х безу́мию не прилага́ющеся, но в о́бщее воскресе́ние по гла́су Сы́на Бо́жия ве́рующе, Ему́, я́ко Жизнода́вцу, велегла́сно и вседу́шно возопии́м: Аллилу́иа.

И́кос 9.

Пресла́вная и стра́шная в Вифа́нии сотвори́в, Иису́с, пре́жде шести́ дне́й Па́схи, па́ки прии́де в ве́сь сию́. И сотвори́ша Ему́ ве́черю, и бе́ Ла́зарь еди́н от возлежа́щих с Ни́м. Вы́ же, присноблаже́нныя сестры́, Пода́телю вся́ческих благода́рни су́ще, Ма́рфа служа́ше Ему́ всеусе́рдне, Мари́я же ми́ро на но́зе Его́ возлия́. Сего́ ра́ди, в ра́дость ва́шу вни́ти жела́юще, и мы́ со умиле́нием зове́м ва́м:

Ра́дуйтеся, богому́дрыя жены́, хвалы́ и благодаре́ния благоде́ющему Го́споду преиспо́лненныя; ра́дуйся, Ма́рфо трудолю́бная, се́ уже́ други́й ра́з на ве́чери Го́споду послужи́вшая.

Ра́дуйся, в благода́рнем служе́нии се́м Го́сподом ми́лостивно прия́тая; ра́дуйся, Мари́е, Сладча́йшему Иису́су но́зе ми́ром многоце́нным пома́завшая.

Ра́дуйся, во обличе́ние Иу́диных злохуле́ний похвале́ния Иису́сова сподо́бившаяся; ра́дуйся, я́ко многоце́ннаго ми́ра на но́зе Христо́вы возлия́нием и на́с благоле́пие до́му Бо́жия люби́ти и о то́м прилежа́ти поуча́еши.

Ра́дуйтеся, Ма́рфо и Мари́е, о́браз ве́ры и любве́ на́м показу́ющия.

Конда́к 10.

Ма́рфе и Мари́и, ве́рнии, подража́юще, ки́йждо во свое́м чи́ну, ко Христу́ Спа́су припаде́м и, прося́ще от Того́ исцеле́ния не́мощей на́ших и от сна́ грехо́внаго воскреше́ния, благода́рными усты́ воспои́м Ему́: Аллилу́иа.

И́кос 10.

Ве́рнии до конца́ во служе́нии ва́шем Христу́ во дне́х пло́ти Его́ пребы́вшия и самови́дцы страсте́й Его́ бы́ти сподо́бившияся, к погребе́нию Воскреси́теля Ла́зарева, сла́вныя Ма́рфо и Мари́е, посреде́ мироно́сиц яви́лися. С ни́ми предстоя́ще ны́не престо́лу сла́вы Бо́жия, моли́твами ва́шими к песнопе́нному те́х ли́ку совокупи́те и на́с, ва́ши по́двиги прославля́ющих:

Ра́дуйся, Ма́рфо, в твое́м Христу́ многопопечи́тельном служе́нии, я́коже и во испове́дании, поревнова́вшая; ра́дуйся, странноприи́мницам и милосе́рдия сестра́м подвигополо́жница.

Ра́дуйся, Мари́е, возлю́бленному ученику́ Христо́ву Иоа́нну в пла́менней любви́ к Тому́ уподо́бившаяся; ра́дуйся, непоро́чных де́в, Христу́ в житии́ свое́м уневе́стившихся, руководи́тельница нело́жная.

Ра́дуйтеся, боголюби́выя сестры́, и де́ятельным житие́м, и внима́нием серде́чным после́дования Христу́ ревни́тельницы изря́дныя; ра́дуйтеся, на обои́х си́х путя́х угожде́ния Го́споду жи́ти бра́тии вку́пе му́дре на́с науча́ющия.

Ра́дуйтеся, Ма́рфо и Мари́е, о́браз ве́ры и любве́ на́м показу́ющия.

Конда́к 11.

Ки́й глаго́л довле́ет по достоя́нию воспе́ти Воскресе́ния Христо́ва ра́дость всеми́рную, ея́же вы́, со про́чими жена́ми мироно́сицами, в се́й ве́лий и святы́й де́нь причасти́лися есте́; те́мже и мы́, Воскресе́ния Христо́ва вели́чие боголе́пное сла́вяще, пои́м Христу́: Аллилу́иа.

И́кос 11.

Вся́кое искуше́ние преити́ моля́щися и живо́т ве́чный улучи́ти хотя́щи, я́ко ве́рныя ученицы́ Христо́вы, ка́яждо во свое́м пути́, оба́че еди́ным ду́хом ве́ры и любве́ Ему́ порабо́тали есте́, отону́дуже и ра́достей во Ца́рствии Его́ сподо́билися есте́. Сего́ ра́ди, труды́ и по́двиги ва́ша воспомина́юще и сла́ве ва́шей во Ца́рствии Христо́вом ра́дующеся, воспева́ем ва́м такова́я:

Ра́дуйтеся, ве́рныя ученицы́ Христо́вы, не челове́ком, но Бо́гу в житии́ ва́шем угоди́вшия; ра́дуйтеся, нището́ю духо́вною Ца́рствие Небе́сное стяжа́вшия.

Ра́дуйтеся, ду́хом кро́тости зе́млю обетова́ния насле́довавшия; ра́дуйтеся, милосе́рдия дела́ми ми́лостей от Го́спода во Ца́рствии Его́ сподо́бившияся.

Ра́дуйтеся, се́рдцем чи́стым Бо́га Сло́ва зря́щия; ра́дуйтеся, испове́дницы ве́ры Христо́вы, мзду́ мно́гу на небесе́х прия́вшия.

Ра́дуйтеся, Ма́рфо и Мари́е, о́браз ве́ры и любве́ на́м показу́ющия.

Конда́к 12.

Благода́тию Всеми́лостиваго Бо́га прия́ли дерзнове́ние ве́лие к Нему́, о блаже́нныя сестры́. Моле́ния ва́ша и проше́ния о на́с гре́шных к престо́лу сла́вы Его́ вознеси́те, да спаса́еми предста́тельством ва́шим, Воскре́сшему и вся́ с Собо́ю воскреси́вшему а́нгельскую пе́снь воспои́м: Аллилу́иа.

И́кос 12.

Пою́ще ны́не со все́ми небе́сными си́лами трисвяту́ю пе́снь ди́вному во святы́х Свои́х Бо́гу, о преблаже́нныя сестры́ Ла́заревы, при́зрите с высоты́ небе́сныя на на́с гре́шных, волна́ми мо́ря жите́йскаго обурева́емых, ти́хаго приста́нища жа́ждущих и ва́с си́це любо́вию велича́ющих:

Ра́дуйтеся, на небеси́ во сла́ве со а́нгелы и все́ми святы́ми ца́рствующия; ра́дуйтеся, и на земли́ в Це́ркви Христо́вой пе́сненно прославля́емыя.

Ра́дуйтеся, я́ко зве́зды небе́сныя во тьме́ ве́ка сего́ доброде́тельми ва́шими сия́ющия; ра́дуйтеся, Бо́гом да́нныя на́м в житии́ на́шем наста́вницы.

Ра́дуйтеся, милосе́рдия служе́нием Христу́ первонача́льницы; ра́дуйтеся, те́плыя о на́с к Бо́гу моли́твенницы.

Ра́дуйтеся, Ма́рфо и Мари́е, о́браз ве́ры и любве́ на́м показу́ющия.

Конда́к 13.

О преди́вная боголюби́вая дво́ице, ве́рныя ученицы́ Христо́вы, Ма́рфо и Мари́е пресла́вныя, о́гнь любве́ и ве́ры в душа́х ва́ших возже́гшия и си́х ра́ди в Ца́рство сла́вы си́лою Воскре́сшаго вше́дшия, испроси́те на́м у Христа́ Бо́га на́шего по́мощи путьми́ ва́шими зде́ на земли́ жи́тельствовати, да во оби́тели Отца́ Небе́снаго всели́вшеся, ку́пно с ва́ми и все́ми святы́ми и мы́ на престо́ле сла́вы Седя́щему воспои́м а́нгельскую пе́снь: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгелов и челове́ков Ца́рь и Госпо́дь, добро́ту ду́ш ва́ших прови́дев и до конца́ ва́с возлюби́в, во дни́ земно́й жи́зни Своея́ благослове́нный до́м ва́ш посеща́ше и бра́та ва́шего Ла́заря от ме́ртвых воскреси́. Мы́ же гре́шнии, таково́е человеколю́бное снисхожде́ние Его́ воспомина́юще, во умиле́нии серде́ц на́ших вопие́м ва́м та́ко:

Ра́дуйтеся, все́м се́рдцем, все́ю душе́ю и все́ю мы́слию ва́шею Бо́га возлюби́вшия; ра́дуйтеся, любо́вь ва́шу не сло́вом или́ язы́ком, но де́лом и и́стиною яви́вшия.

Ра́дуйтеся, любо́вию ве́ру во Христа́ Сы́на Бо́жия от Отца́ Небе́снаго сниска́вшия; ра́дуйтеся, ве́рою, послуша́нием, дела́ми любве́ и милосе́рдия Ему́ послужи́вшия.

Ра́дуйтеся, те́м Ца́рствие Небе́сное насле́довавшия; ра́дуйтеся, де́в непоро́чных и же́н целому́дренных похвало́ и украше́ние.

Ра́дуйтеся, Ма́рфо и Мари́е, о́браз ве́ры и любве́ на́м показу́ющия.

Конда́к 1.

Избра́нныя от Бо́га служи́тельницы но́выя благода́ти, пра́веднаго Ла́заря боголюби́выя сестры́, Ма́рфо и Мари́е, вы́ дея́нием и разуме́нием в ве́ре и любви́ Христу́ после́довали есте́ и ны́не с ли́ки святы́х же́н пребыва́ете, наслажда́ющеся ра́йских красо́т и весе́лия. Те́мже, я́ко иму́щия дерзнове́ние ко Го́споду, Того́ приле́жно моли́те от бе́д и скорбе́й и паде́ний грехо́вных изба́вити на́с, да и мы́, ва́ми научи́вшеся угожда́ти Христу́ Бо́гу, не преста́нем со умиле́нием взыва́ти ва́м:

Ра́дуйтеся, Ма́рфо и Мари́е, о́браз ве́ры и любве́ на́м показу́ющия.

Моли́тва пе́рвая.

О святы́я и всехва́льныя ученицы́ Христо́вы, Боголюби́выя Ма́рфо и Мари́е! Умоли́те возлю́бленнаго ва́ми и ва́с возлюби́вшаго Сладча́йшаго Иису́са, Его́же вы́ испове́дали есте́, Христа́, Сы́на Бо́жия, да да́ст и на́м гре́шным, грехо́в, оставле́ние, в ве́ре пра́вой нелицеме́рное и тве́рдое стоя́ние. Всели́те в се́рдца на́ша ду́х стра́ха Бо́жия, смире́ннаго на Бо́га упова́ния, терпе́ния и к бли́жним милосе́рдия. Изба́вите на́с моли́твами ва́шими от искуше́ний жите́йских, бе́д и напа́стей, да ти́хое и ми́рное житие́ пожи́вше зде́, с по́мыслы непоро́чными и се́рдцем чи́стым, с дерзнове́нием ве́ры и упова́ния предста́нем на о́ный Стра́шный Су́д и, до́брый отве́т на не́м возда́вше, ра́дости ве́чныя в Ца́рствии Небе́снем сподо́бимся. Ами́нь.

Моли́тва втора́я

О блаже́нныя и святы́я жены́, ве́рою и любо́вию Христу́ Бо́гу после́довавшия и во оби́тели Отца́ Небе́снаго всели́вшияся! К ва́м ны́не а́з, гре́шная, (и́мярек) прибега́ю и смире́нно молю́: научи́те мя́ и помози́те ми́ ходи́ти пред Бо́гом путьми́ ва́шими непреткнове́нно и ве́чную ку́пно с ва́ми жи́знь насле́довати.

О Ма́рфо пра́ведная, тве́рдым испове́данием ве́ры твоея́ Христу́ угоди́вшая, укрепи́ сла́бую ве́ру мою́. О слу́жбе Го́споду и бра́тиям нелицеме́рне и всеусе́рдне прилежа́вшая, помози́ и мне́ служе́ние мое́ безро́потне и вседуше́вне проходи́ти. Сестру́ твою́ иногда́, в ско́рби су́щу, ко Христу́ воззвала́ еси́, отая ре́кши: Учи́тель прише́л е́сть и глаша́ет тя́. Ны́не у́бо предста́ни мне́ в тру́дный ча́с испыта́ния ве́ры и любве́ моея́ и в глубине́ се́рдца возвести́ ми́, я́ко Госпо́дь Иису́с незри́мо гряде́т, да путе́м испыта́ний привлече́т мя́ к Себе́! Испроси́ мне́, о ма́ти свята́я, у Го́спода на́шего си́лу и кре́пость, да воста́вши ско́ро, притеку́ к Нему́, поклоню́ся Ему́ и в смире́нней любви́ Его́ ми́р и спасе́ние души́ мое́й обря́щу.

И ты́, о Боголюби́вая Мари́е, у но́гу Иису́сову еди́ное на потре́бу обре́тшая, помоли́ся Ему́ благу́ю ча́сть спаса́емых и мне́, гре́шней, улучи́ти. Ми́ро благово́нное в да́р благодаре́ния Христу́ Жизнода́вцу прине́сшая, умоли́ ны́не Его́ и души́ мое́й пода́ти ми́ро моли́твы и покая́ния сле́зы, чистоты́ и до́брых де́л благоуха́ние, та́ко да во обновле́нное все́ми си́ми се́рдце мое́ Госпо́дь прии́дет и оби́тель Себе́ сотвори́т.

К ва́м, о святы́я пра́ведныя жены́, Ма́рфо и Мари́е, припа́даю и смире́нно молю́: не оста́вите мя́ в дни́ тя́жких испыта́ний, да не соблазню́ся тле́нными и кра́сными ми́ра сего́, наипа́че же в ча́с го́рький разлуче́ния души́ моея́ с те́лом, предста́ните мне́ и о́бщаго Влады́ку на́шего умоли́те, да при́зрит на мя́ во оскуде́нии си́л мои́х ми́лостивным о́ком и, прости́в вся́ прегреше́ния моя́, возста́вит мя́ к жи́зни несконча́емей во блаже́нных оби́телех Отца́ Небе́снаго. Ами́нь.