Конда́к 1.

Избра́нных из среды́ ми́ра сего́ потопля́емаго в су́етнем мо́ре, и я́вльшихся ду́ш Жениху́ Христу́ неве́стами ве́рными да́же до кро́ве, восхваля́ем ва́с, де́вы и страстоте́рпицы Минодо́ро, Митродо́ро, Нимфодо́ро. Упова́юще на моли́твы, покрови́тельство и по́мощь ва́шу, зове́м ва́м:

Ра́дуйтеся, неве́сты Христо́вы Минодо́ро, Митродо́ро, Нимфодо́ро, о спасе́нии на́шем моли́твенницы преди́вныя.

И́кос 1.

А́нгельстей чистоте́ возревнова́вши, чистоту́ души́ и те́ла, я́ко да́р Тро́ице Святе́й, ре́вностно сохрани́ли есте́. И ны́не со А́нгелами и со все́ми святы́ми моли́теся за на́с, немощны́х и разсла́бленных, да воста́нем тве́рдо на пу́ть спаси́тельный, взыва́юще ва́м:

Ра́дуйтеся, измла́да себе́ Тро́ице Святе́й посвяти́вшия; ра́дуйтеся, чистоту́, любо́вь и ве́ру от роди́телей свои́х прия́вшия.

Ра́дуйтеся, от еди́ныя утро́бы роди́вшияся; ра́дуйтеся, во святе́м креще́нии Ду́хом сродни́вшияся.

Ра́дуйтеся, неве́сты Христо́вы Минодо́ро, Митродо́ро, Нимфодо́ро, о спасе́нии на́шем моли́твенницы преди́вныя.

Конда́к 2.

Ви́дя, ка́ко тру́дно, живя́ среди́ ми́ра гре́шнаго и прелюбоде́йнаго, сохрани́ти себе́ в чистоте́ для Жениха́ своего́, Христа́ Бо́га, после́довали есте́ Его́ призы́ву: «изыди́те от среды́ люде́й си́х и отлучи́теся, и нечистоте́ и́х не прикаса́йтеся, и А́з прииму́ вы́», непреста́нно пою́щия: Аллилу́иа.

И́кос 2.

Всего́ бо́лее возлюби́в де́вственную чистоту́ души́ и те́ла своего́, ви́дя, я́ко то́кмо сия́ чистота́ уго́дна Небе́сному Жениху́, оста́вили есте́ сре́ду люде́й, и́щущих себе́ плотски́я наслажде́ния, и потекли́ по приме́ру Го́спода, распя́вшагося «вне́ ста́на», в пусты́нное, возвы́шенное ме́сто, да и мы́, науче́ни ва́шим спаси́тельным побе́гом от собла́знов, возопие́м ва́м такова́я:

Ра́дуйтеся, свои́м наме́рением сохрани́ти себе́ в де́вственней чистоте́ Бо́гу угоди́вшия; ра́дуйтеся, свою́ чистоту́ Жениху́ Небе́сному посвяти́вшия.

Ра́дуйтеся, я́ко сле́дуя реше́нию сему́ спаси́тельному бежа́ли есте́ от суеты́; ра́дуйтеся, на хо́лме пусты́ннем яви́лися, я́ко благоуха́нныя цветы́.

Ра́дуйтеся, неве́сты Христо́вы Минодо́ро, Митродо́ро, Нимфодо́ро, о спасе́нии на́шем моли́твенницы преди́вныя.

Конда́к 3.

Дости́гнув сего́ пусты́ннаго ме́ста, я́ко не́коей оби́тели среди́ приро́ды, Бо́гом зда́нныя, украси́ли есте́ е́ свои́м житие́м во Христе́, непреста́нными моли́твами и посто́м любо́вь свою́ Бо́гу явля́я, пою́ще Ему́: Аллилу́иа.

И́кос 3

Ели́ко се́рдце, испо́лненное любо́вию, и́щет уедине́ния с люби́мым и тишины́, та́ко и вы́ среди́ тишины́ се́й Бо́гом зда́нныя оби́тели непреста́нно труди́стеся се́рдцем и умо́м, дабы́ уедини́тися душе́ю с возлю́бленным и ва́с возлю́бшим Творце́м. Мы́ же, гре́шнии, а́ще и во уедине́нии от ми́ра нахо́димся: во хра́мех и оби́телех, в суете́ при́сно пребыва́ем, но на ва́шу жи́знь взира́юще, ду́шу вно́вь горе́ устремля́ем и со умиле́нием вопие́м:

Ра́дуйтеся, не люде́й, а су́етность и́х жи́зни отве́ргшия; ра́дуйтеся, не поко́й земны́й, а любо́вь Христо́ву обре́тшия.

Ра́дуйтеся, оби́тель, Бо́гом зда́нную, не оскверни́вшия суето́ю; ра́дуйтеся, не земну́ю любо́вь иска́вшии, а Бо́жию все́ю душе́ю.

Ра́дуйтеся, неве́сты Христо́вы Минодо́ро, Митродо́ро, Нимфодо́ро, о спасе́нии на́шем моли́твенницы преди́вныя.

Конда́к 4.

Изде́тска прия́вшия во святе́м креще́нии се́мена любве́ Христо́вы и сохрани́вшия зе́млю се́рдца своего́ чи́сту, не засоре́ну те́рнием похотли́вых жела́ний и не опале́ну зно́ем страсте́й, усе́рдно удобря́ете ю́ пита́тельнейшею пи́щею ра́йскою — Хле́бом Небе́сным. И в ню́же ме́ру укрепля́шеся в сердца́х ва́ших любо́вь Христо́ва, в ту́южде навыко́сте пе́ти от се́рдца Бо́гу: Аллилу́иа.

И́кос 4.

Госпо́дь на́ш, я́ко чадолюби́вый Оте́ц, пеку́щийся о спасе́нии ча́д Свои́х, явля́ет на́м, неразу́мным, о́браз ва́шего попече́ния о спасе́нии души́. Мы́ же, науча́яся от ва́с, де́вы святы́я, сему́ де́ланию, про́сим по́мощи ва́шея и пое́м ва́м:

Ра́дуйтеся, я́ко во креще́нии святе́м се́мена любве́ Бо́жия обре́тшия; ра́дуйтеся, я́ко и на́с к позна́нию о се́м бога́тстве, его́ же мы́ име́ем, приводя́щия.

Ра́дуйтеся, Хле́бом Небе́сным, сше́дшим с небе́с, пита́вшияся и сего́ ра́ди в душе́ возрасти́вшия дре́во ве́ры, наде́жды и любве́; ра́дуйтеся, я́ко ва́шими моли́твами и заступле́нием от сего́ гла́да духо́внаго бу́дем изба́влени и мы́.

Ра́дуйтеся, неве́сты Христо́вы Минодо́ро, Митродо́ро, Нимфодо́ро, о спасе́нии на́шем моли́твенницы преди́вныя.

Конда́к 5.

Ви́дя Госпо́дь ва́ша сле́зы и труды́, ра́ди Него́ ва́ми подъя́тыя, испо́лнил е́сть ва́ша се́рдца чрез кра́й Свое́ю любо́вию, и потекли́ от ва́с ре́ки чуде́с, исцеле́ний и утеше́ний, да вси́ ва́с ра́ди воспою́т Бо́гу: Аллилу́иа.

И́кос 5.

Любо́вь Бо́жия — многоце́нный би́сер для души́. По сло́ву бо свята́го пра́веднаго Иоа́нна Кроншта́дтскаго, велича́йший да́р челове́ку — Бо́г в се́рдце. И кто́ взы́щет се́й би́сер, обрете́т ми́р, ра́дость, све́т, свобо́ду, жи́знь. Мы́ же, я́ко ни́щии, к ва́м, святы́я де́вы, бога́тым си́м да́ром, взыва́ем:

Ра́дуйтеся, еди́наго Бо́га возлюби́вшия, и посему́ Бо́жию любо́вь обре́тшия; ра́дуйтеся, Женихо́м Христо́м испо́лненный яви́лися есте́, я́ко исто́чницы чуде́с и исцеле́ний к нужда́ющимся и жа́ждущим поте́кшия.

Ра́дуйтеся, помози́те и на́м в свои́х сердца́х отве́ргнути суету́ и бы́ти ве́рными еди́ному Христу́; ра́дуйтеся, и к на́м, разсла́бленным и немощны́м, направля́ющия любве́ ва́шея живи́тельную, благода́тную струю́.

Ра́дуйтеся, неве́сты Христо́вы Минодо́ро, Митродо́ро, Нимфодо́ро, о спасе́нии на́шем моли́твенницы преди́вныя.

Конда́к 6.

Позави́довав кня́зь тьмы́, я́коже пре́жде Ада́му с Е́вою, ва́шей чистоте́ и жи́зни во Христе́, и име́я из среды́ люде́й, пре́данных ему́, науча́ет не́коего кня́зя мирска́го схвати́ти и му́чити ва́с, при́сно воспева́ющих Бо́гу: Аллилу́иа.

И́кос 6.

По рече́нному Го́сподом: «А́ще бы́ли от ми́ра сего́, ми́р у́бо свое́ люби́л бы, но я́ко А́з избра́х ва́с от ми́ра, сего́ ра́ди ненави́дит ва́с ми́р» и ва́с, возлю́бленныя а́гницы Христо́ва ста́да, возненави́де ми́р и в лице́ богоотсту́пников влече́ ва́с из возлю́бленныя оби́тели на нечести́вое суди́лище. Мы́ же, пребыва́юще в ми́ре се́м и по́чести и одобре́ние от него́ прие́млюще, со стыдо́м и стра́хом взыва́ем к ва́м:

Ра́дуйтеся, Бо́гом избра́нныя от ми́ра сего́ погиба́ющаго и сего́ ра́ди ми́ром возненави́денныя; ра́дуйтеся, от те́х, кто́ ме́ртв душе́ю, муче́ние Христа́ ра́ди прия́вшия.

Ра́дуйтеся, и на́м, во креще́нии Бо́гом избра́нным, о се́м избра́нии возревнова́ти помози́те; ра́дуйтеся, на́м, духо́вно разсла́бленным и в жите́йстем мо́ре потопля́емым, я́ко Христо́с Петру́, ру́ку по́мощи простри́те.

Ра́дуйтеся, неве́сты Христо́вы Минодо́ро, Митродо́ро, Нимфодо́ро, о спасе́нии на́шем моли́твенницы преди́вныя.

Конда́к 7.

Ви́дя ва́шу красоту́, на ли́ца ва́ша излия́вшуюся от се́рдца, уневе́щеннаго Христу́, вра́г на́гло жела́я ю́, намерева́шеся обольсти́ти ва́с обеща́нием вре́менных по́честей и удово́льствий, но ни в чесо́м же успе́в, посра́млен ю́ными де́вами яви́ся. Мы́ же, изде́тска сласте́м земны́м навыко́хом, и са́ми диви́мся, ка́ко еще́ не оста́вихом вма́ле воспева́ти Бо́гу: Аллилу́иа.

И́кос 7.

Бо́г е́сть исто́чник красоты́, гармо́нии кра́сок и вели́чия. И вся́к, иму́щий в се́рдце Бо́га, прекра́сен, в ко́ем возрасте́ ни пребыва́л бы. Сия́ красота́ Бо́жия, на ва́с запечатле́нная, о́чи вра́жии ослепи́, я́ко све́том со́лнечным. Мы́ же, не иму́щии попече́ния о взыска́нии се́рдцем Бо́га, пеце́мся о вне́шней свое́й благови́дности, но вну́тренняя нечистота́ выступа́ет на на́ша ли́ца. Сознава́я сие́ на́ше го́рькое положе́ние, не зави́дя, а ревну́я о ва́шей небе́сней красоте́, зове́м ва́м:

Ра́дуйтеся, да́ром Бо́жиим — красото́ю, я́ко неве́сты, Христу́ укра́шенныя; ра́дуйтеся, в черто́ги Спа́совы прия́тыя и собо́ю Не́бо украси́вшия.

Ра́дуйтеся, я́ко ва́ша ли́ца прекра́сная на́шу неблагови́дность облича́ют; ра́дуйтеся, и на́м помози́те украси́тися ве́рою и любо́вию ко Христу́, и́бо сего́ на́ша ду́ши ча́ют.

Ра́дуйтеся, неве́сты Христо́вы Минодо́ро, Митродо́ро, Нимфодо́ро, о спасе́нии на́шем моли́твенницы преди́вныя.

Конда́к 8.

Тще́тны яви́шася поту́ги врага́ соблазни́ти ва́с смердя́щими уте́хами вре́менныя сея́ жи́зни. Да и ка́ко возмо́жно бе́ на сии́ собла́зны взира́ти сестра́м, при́сно вкуша́ющим сла́дость Небе́сную ве́чную и воспева́ющим Бо́гу: Аллилу́иа.

И́кос 8.

«Ка́я по́льза челове́ку, а́ще ми́р ве́сь приобря́щет, ду́шу же свою́ отщети́т» — сие́ измла́да уясни́ли есте́ себе́ сестры́-му́ченицы. Убежа́в посему́ от пре́лести и собла́знов ми́ра су́етнаго и отвраща́лися его́, я́ко душевре́днаго, храни́лися во оби́тели богозда́нней. Ви́дя ва́шу адама́нтову тве́рдость проти́в немощны́х стре́л — собла́знов вра́жиих, пое́м ва́м:

Ра́дуйтеся, непоколеби́мии столпи́ тве́рди церко́вныя; ра́дуйтеся, и на́м помози́те изба́витися жи́зни грехо́вныя.

Ра́дуйтеся, ору́жием любве́ к Бо́гу врага́ немощна́го низложи́вшия; ра́дуйтеся, и на́с, находя́щих всегда́ причи́ну не моли́тися, приме́ром ва́шея моли́твы к по́двигу сему́ подви́гшия.

Ра́дуйтеся, неве́сты Христо́вы Минодо́ро, Митродо́ро, Нимфодо́ро, о спасе́нии на́шем моли́твенницы преди́вныя.

Конда́к 9.

Ви́дя, я́ко мно́зии собла́зны, нестрое́ния и раздо́ры испо́лниша це́рковь Ру́сскую, и и́стинная ча́да ея́ в притесне́нии и поноше́нии и гла́де духо́внем пребыва́ют, Госпо́дь, я́ко Глава́ Це́ркви, яви́ ва́с, я́ко свети́льник, да указу́ет на́м пу́ть ко спасе́нию, да укрепи́т на́с, разсла́бленных в ве́ре, с упова́нием и благода́рностию взыва́ти Бо́гу: Аллилу́иа.

И́кос 9.

Я́ко свети́льник, я́ко сто́лп, и́же ука́зываше пу́ть дре́вле пешеше́ствующу Изра́илю, яви́лася в ны́нешнее после́днее вре́мя ико́на святы́х де́в-му́чениц в Росси́и. Мы́ же, ра́дуяся сему́ явле́нию, я́ко поводырю́ слепы́й, я́ко разсла́бленный ра́дуется носи́льщиком, пое́м ва́м:

Ра́дуйтеся, ико́ною ва́шею на́с вразумля́ющия; ра́дуйтеся, житие́м ва́шим на́с в малоду́шии и нераде́нии облича́ющии.

Ра́дуйтеся, я́ко ли́ца ва́ша Небе́сную отража́ют красоту́; ра́дуйтеся, я́ко и́х све́т мы́сли на́ша землере́тныя возво́дит на высоту́.

Ра́дуйтеся, неве́сты Христо́вы Минодо́ро, Митродо́ро, Нимфодо́ро, о спасе́нии на́шем моли́твенницы преди́вныя.

Конда́к 10.

Я́вльшаяся чу́дная ико́на сия́ Бо́жиим Про́мыслом доста́влена бя́ше на святу́ю го́ру Афо́н — уде́л Бо́жией Ма́тери. И́ноцы же с тре́петом и ра́достию, я́ко обре́тенному драгоце́нному би́серу, поклони́шася ико́не се́й и, узре́вши в се́м спаса́ющий пе́рст Бо́жий, воспе́ша: Аллилу́иа.

И́кос 10.

И́ноцы святы́я го́ры Афо́н, воззре́вши на ико́ну святы́х де́в-му́чениц, возра́довашася таково́му спаси́тельному смотре́нию Бо́жиему о Росси́и и все́м ми́ре христиа́нстем и, науче́ннии Ду́хом Святы́м, уми́льно воспе́ша:

Ра́дуйтеся, сестры́, о едине́нии все́х любо́вию Христо́вою моли́твенницы всеси́льныя; ра́дуйтеся, сестры́, о прекраще́нии раздо́ров и кровопроли́тных во́ин хода́таицы, Бо́гом явле́нныя.

Ра́дуйтеся, де́вы, в де́встве и чистоте́ пребыва́ющим по́мощь и укрепле́ние; ра́дуйтеся, де́вы, во страсте́х и по́хотех жи́знь провожда́ющим кре́пкое обличе́ние и вразумле́ние.

Ра́дуйтеся, неве́сты Христо́вы Минодо́ро, Митродо́ро, Нимфодо́ро, о спасе́нии на́шем моли́твенницы преди́вныя.

Конда́к 11.

Пра́веднаго Иоа́нна Кроншта́дтскаго, я́ко ве́рнаго дру́га Христо́ва, я́ко де́вственника, я́ко Росси́йскаго моли́твенника, дерзнове́ннаго и любвеоби́льнаго па́стыря и и́стиннаго собра́та ва́шего, посети́ли есте́, му́ченицы святы́я. И обре́тши в его́ оби́тели сердца́, сро́дная себе́, возжго́сте в сестра́х ре́вность о чистоте́ и моли́тве живе́й. Ты́я же, хотя́ и ма́лым число́м, воспе́ша Бо́гу: Аллилу́иа.

И́кос 11.

И потече́ сия́ ико́на, носи́мая на рука́х христиа́нския о́бщины, имену́емыя в че́сть святы́х му́чениц, во оби́тели святы́я Се́ргия Ра́донежскаго, Серафи́ма Саро́вскаго, Амвро́сия О́птинскаго и про́чия оби́тели, везде́ привлека́я к себе́ сердца́, ве́рныя Бо́гу. Все́ же, дивя́щеся и лобыза́юще о́браз де́в, воспе́ша и́м:

Ра́дуйтеся, я́ко со все́ми святы́ми ли́к моли́твенный ко Святе́й Тро́ице о ми́ре и любви́ соста́вившия; ра́дуйтеся, мона́хов и миря́н за ми́р погиба́ющий моли́тися подви́гнувшия.

Ра́дуйтеся, я́ко пу́ть ко Христу́ чрез едине́ние с Ни́м во Святе́м Причаще́нии пребыва́нием свои́м во оби́тели Кроншта́дтскаго па́стыря вно́вь указу́ющия; ра́дуйтеся, я́ко на се́й кратча́йший пу́ть к Бо́гу в на́ша после́дняя времена́, я́ко еди́ный с путе́м му́ченическим, указу́ющия.

Ра́дуйтеся, неве́сты Христо́вы Минодо́ро, Митродо́ро, Нимфодо́ро, о спасе́нии на́шем моли́твенницы преди́вныя.

Конда́к 12.

Благода́тных даро́в Ду́ха Свята́го кла́дезь преиспо́лненный яви́ ва́с Госпо́дь чрез ва́шу святу́ю, му́ченицы, ико́ну. Да взира́юще на ню́, и мы́ возревну́ем о жи́зни богоуго́дней и прича́стницы си́х даро́в яви́мся. И ве́дуще, я́ко жде́т Госпо́дь на́шего покая́ния и исправле́ния на́шея жи́зни во Христе́, воспое́м Ему́: Аллилу́иа.

И́кос 12.

Воспева́юще ва́шу чуде́сную жи́знь и честна́я, сла́вная страда́ния Христа́ ра́ди и явле́ние ико́ны, мо́лим ва́с, святы́я де́вы-му́ченицы Минодо́ра, Митродо́ра, Нимфодо́ра, вознеси́те ва́ша моли́твы к Бо́гу за на́с немощны́х, разсла́бленных и неради́вых, и помози́те жи́знь на́шу испра́вити. И на стра́шнем суде́ Бо́жием не оста́вьте на́с хода́тайством ва́шим, да спаса́емы ва́шими моли́твами та́ко ва́м воззове́м:

Ра́дуйтеся, богоизбра́нныя, чистото́ю ва́шею на́с жи́ти богоуго́дно побуди́вшия; ра́дуйтеся, я́ко мироточе́нием оби́льным ико́ны ва́шея на́с возвесели́вшия.

Ра́дуйтеся, благоуха́нныя цветы́ ра́йския, ду́ши на́ша ми́ром и любо́вию исполня́ющая; ра́дуйтеся, местонахожде́ние ико́ны ва́шея о́бразом жи́зни ва́шея указу́ющия.

Ра́дуйтеся, неве́сты Христо́вы Минодо́ро, Митродо́ро, Нимфодо́ро, о спасе́нии на́шем моли́твенницы преди́вныя.

Конда́к 13.

О, святы́я му́ченицы-сестры́, де́вы Минодо́ро, Митродо́ро, Нимфодо́ро, на́ша моли́твенницы немо́лчныя и наста́вницы жи́зни чи́стыя, святы́я, богоуго́дныя — жи́зни во Христе́! Приими́те ны́нешнее на́ше моле́ние и помози́те на́м досто́йно прейти́ сию́ вре́менную жи́знь и дости́гнути Ца́рствия Бо́жия, воспева́я с ва́ми Бо́гу: Аллилу́иа.

Этот конда́к читается трижды, затем и́кос 1-й и конда́к 1-й.

И́кос 1.

А́нгельстей чистоте́ возревнова́вши, чистоту́ души́ и те́ла, я́ко да́р Тро́ице Святе́й, ре́вностно сохрани́ли есте́. И ны́не со А́нгелами и со все́ми святы́ми моли́теся за на́с, немощны́х и разсла́бленных, да воста́нем тве́рдо на пу́ть спаси́тельный, взыва́юще ва́м:

Ра́дуйтеся, измла́да себе́ Тро́ице Святе́й посвяти́вшия; ра́дуйтеся, чистоту́, любо́вь и ве́ру от роди́телей свои́х прия́вшия.

Ра́дуйтеся, от еди́ныя утро́бы роди́вшияся; ра́дуйтеся, во святе́м креще́нии Ду́хом сродни́вшияся.

Ра́дуйтеся, неве́сты Христо́вы Минодо́ро, Митродо́ро, Нимфодо́ро, о спасе́нии на́шем моли́твенницы преди́вныя.

Конда́к 1.

Избра́нных из среды́ ми́ра сего́ потопля́емаго в су́етнем мо́ре, и я́вльшихся ду́ш Жениху́ Христу́ неве́стами ве́рными да́же до кро́ве, восхваля́ем ва́с, де́вы и страстоте́рпицы Минодо́ро, Митродо́ро, Нимфодо́ро. Упова́юще на моли́твы, покрови́тельство и по́мощь ва́шу, зове́м ва́м:

Ра́дуйтеся, неве́сты Христо́вы Минодо́ро, Митродо́ро, Нимфодо́ро, о спасе́нии на́шем моли́твенницы преди́вныя.

Моли́тва пе́рвая.

О, святы́я му́ченицы Минодо́ро, Митродо́ро и Нимфодо́ро! К ва́м ны́не со усе́рдною моли́твою притека́ем. Умоли́те у́бо Го́спода, да в ско́рбех и напа́стех неизрече́нною благода́тию Свое́ю покры́ет на́с, рабо́в Свои́х, и сохрани́т, и Свою́ сла́ву, я́ко со́лнце незаходи́мое, зре́ти да сподо́бит. Споспешеству́йте на́м во смире́нных моле́ниих на́ших, да прости́т Госпо́дь Бо́г грехи́ и беззако́ния на́ша и да поми́лует на́с, гре́шных, и щедро́т Свои́х да сподо́бит на́с Христо́с Бо́г, Ему́же сла́ву возсыла́ем со Безнача́льным Его́ Отце́м и Пресвяты́м и Благи́м и Животворя́щим Его́ Ду́хом, ны́не и при́сно и во ве́ки веко́в. Ами́нь.

Моли́тва втора́я.

О, тро́ице святы́х му́чениц, Минодо́ро, Митродо́ро, Нимфодо́ро! О, тричи́сленный ли́к му́дрых де́в! Вы́, презре́в всю́ су́етную пре́лесть погиба́ющаго ве́ка сего́, посвяти́ли се́рдце свое́ Жениху́ Христу́. Небе́сным Хле́бом пита́еми и сего́ ра́ди Боже́ственною любо́вию исполня́емы, благода́тию Бо́жиею, преложи́вшею ва́ше кро́вное родство́ в сою́з ду́ш о Христе́, неразлу́чны яви́лися есте́ во уедине́нии ва́шем от суеты́ мирски́я и в злострада́ниях. И ны́не, в черто́зех небе́сных Жениха́ Христа́ водворя́еми, ку́пно со все́ми святы́ми и со святы́м пра́ведным Иоа́нном Кроншта́дтским, яви́вшим на́м приме́р ва́шего восхожде́ния в Го́рняя, моли́теся о все́х на́с, имена́ ва́ша на по́мощь призыва́ющих! О, святы́я де́вы-му́ченицы! Я́вльшияся в ны́нешняя после́дняя времена́ в Росси́и, после́днем опло́те Правосла́вия, ви́дите, я́ко вра́г-супоста́т возве́л богобо́рчество, его́ ду́х исполня́ет се́рдца мно́гих па́стырей, не допуска́ющих па́ству соединя́тися со Христо́м, лука́во и лицеме́рно уводя́ от пи́щи ра́йския — Хле́ба Небе́снаго, дабы́ все́ на́ши по́двизи в де́ле спасе́ния души́ обрати́шася в суету́. Ва́ша лица́ да возбу́дят в на́с жела́ние кра́йнейшее все́м се́рдцем взыска́ти Го́спода, все́ю мы́слию возлюби́ти Христа́. А ва́ша моли́твы да низведу́т на на́с, погиба́ющих, сугу́бую ми́лость Бо́жию и си́лу, да обря́щем Ца́рствие Бо́жие на́шими сердца́ми и да удержи́м любо́вь Христо́ву в душа́х на́ших. Помоли́теся, святы́я де́вы-му́ченицы Минодо́ро, Митродо́ро, Нимфодо́ро, да вся́к, и́же и́скренне призове́т ва́с, спасе́тся и́миже Госпо́дь ве́си судьба́ми! Ами́нь.