Конда́к 1.
Избра́нным от же́н Изра́илевых, Воскресе́ния Христо́ва благове́стницам, Па́сху Христо́ву пра́зднующе, с весе́лием возопии́м:
Ра́дуйтеся, све́тлыя жены́ мироно́сицы, Го́споду с любо́вию послужи́вшия.
И́кос 1.
А́нгелами просвеще́нныя и челове́ков просвеща́ющии яви́стеся пра́ведныя жены́ мироно́сицы, кра́сная ми́ра ни во что́же вмени́вшия и до́мы своя́ оста́вльшия, да после́дуете Сы́ну Челове́ческому, И́же не име́, где́ главы́ приклони́ти. Сего́ ра́ди хва́лим ва́с си́це:
Ра́дуйтеся, му́дрым ева́нгельским де́вам уподо́бившияся; ра́дуйтеся, во Сре́тение Жениху́ благовре́менно изше́дшия.
Ра́дуйтеся, еле́й сво́й в сосу́дах со свети́льники прия́вшия; ра́дуйтеся, немощьми́ пло́ти на́шея ле́гце воздрема́вшия.
Ра́дуйтеся, во́пль в полу́нощи: се́ Жени́х гряде́т, услы́шавшия; ра́дуйтеся, Красне́йшему от сыно́в челове́ческих уневе́стившияся.
Ра́дуйтеся, в черто́г Его́ на бра́к с Ни́м вше́дшия; ра́дуйтеся, в ма́лом де́лании ве́рныя Его́ служи́тельницы.
Ра́дуйтеся, ве́лиею сла́вою на Небесе́х от Него́ увенча́нныя; ра́дуйтеся, благово́нное ми́ро Христу́ прине́сшия.
Ра́дуйтеся, благода́ти еле́ем от Него́ пома́занныя.
Ра́дуйтеся, све́тлыя жены́ мироно́сицы, Го́споду с любо́вию послужи́вшия.
Конда́к 2.
Ви́дяще, ка́ко Ма́ти Иису́сова Пресвято́му Сы́ну Своему́ и Бо́гу служа́ше, словесе́м Его́ сла́дце внима́ющи, овогда́ же хито́н нешве́нный тка́вши, овогда́ же в Ка́не Галиле́йстей о вине́ лю́дем пред Ни́м предста́тельствовавши, поревнова́ху и сия́ нелицеме́рныя други́ни непоро́чному житию́ и любви́ Ея́ подража́ти, служа́ще Го́сподеви от всего́ име́ния своего́ и воспева́юще Ему́: Аллилу́иа.
И́кос 2.
Ра́зум же́н благочести́вых просвеща́я, в при́тчах свои́х изрече́ Соломо́н, я́ко му́драя жена́ устроя́ет до́м. Мы́ же к ва́м, богому́дрыя домострои́тельницы гра́да небе́снаго, взыва́ем с любо́вию си́це:
Ра́дуйтеся, Богома́тере усе́рдныя сподви́жницы; ра́дуйтеся, словесе́м Ея́ покорли́во внима́вшия.
Ра́дуйтеся, святе́йшим о́бразом жития́ Ея́ наста́вленныя; ра́дуйтеся, преи́скренния Ея́, всле́д Цари́цы к Царю́ приведе́нныя.
Ра́дуйтеся, чи́стое житие́ по за́поведем Госпо́дним соблюда́вшия; ра́дуйтеся, не вне́шняя телесе́, но вну́тренняя ду́ш свои́х украша́вшия.
Ра́дуйтеся, сокрове́ннаго се́рдца красоту́ челове́ка явля́ющия; ра́дуйтеся, нетле́ние кро́ткаго и молчали́ваго ду́ха сохрани́вшия.
Ра́дуйтеся, на Го́спода смире́нно упова́вшия; ра́дуйтеся, вся́чески все́м и ны́не благотворя́щия.
Ра́дуйтеся, а́лчущих пита́вшия и но́зе стра́нным умыва́вшия.
Ра́дуйтеся, све́тлыя жены́ мироно́сицы, Го́споду с любо́вию послужи́вшия.
Конда́к 3.
Си́ла Вы́шняго даде́ ва́м кре́пость, а́ще и в немощны́х сосу́дех, противоста́ти хитросплете́ниям кня́зя возду́шнаго. Сего́ ра́ди помина́юще му́жественное терпе́ние ва́ше, на Голго́фе наипа́че я́вльшееся, егда́ апо́столи, пристра́шны су́ще, Учи́теля своего́ оста́виша. Вы́ же Го́спода не отверго́стеся, и мы́ с ва́ми воспева́ем Ему́: Аллилу́иа.
И́кос 3.
Иму́ще любо́вь, я́ко сме́рть кре́пкую, ни жесто́каго собра́ния Иуде́йскаго, ни Ри́мскаго военонача́лия не устраши́лися есте́, жены́ пламеннолю́бныя! Мы́ же ве́дяще, я́ко и вели́кия во́ды не погася́т любве́ духо́вныя, и рецы́ глубо́кия не потопя́т ю́, сла́вим ва́с си́це:
Ра́дуйтеся, свиде́тельницы страда́ний Христо́вых правдолю́бныя; ра́дуйтеся, Го́споду Распя́тому все́м се́рдцем свои́м соболе́зновавшия.
Ра́дуйтеся, го́рце о Не́м пла́кавшия и рыда́вшия; ра́дуйтеся, у Креста́ Его́ те́пле Пречи́стую Ма́терь утеша́вшия.
Ра́дуйтеся, со́лнцу поме́ркшу полу́дне от Со́лнца Пра́вды не отступи́вшия; ра́дуйтеся, и тру́су бы́вшу в ве́ре не поколеба́вшияся.
Ра́дуйтеся, и земли́ подви́гшейся любо́вь к Распя́тому не утра́тившия; ра́дуйтеся, за ве́ру сию́ Са́ррино благослове́ние унасле́довавшия.
Ра́дуйтеся, за любо́вь сию́, я́ко Реве́кка Иа́ковом, Го́сподом возлю́бленныя; ра́дуйтеся, доброде́ланиями Ли́и многоча́дней подража́вшия.
Ра́дуйтеся, благода́ть Рахи́ли святы́м целому́дрием стяжа́вшия.
Ра́дуйтеся, све́тлыя жены́ мироно́сицы, Го́споду с любо́вию послужи́вшия.
Конда́к 4.
Бу́рю вну́трь иму́ще помышле́ний сумни́тельных, ви́дяще Иису́са ра́спята, мимоходя́щии ху́ляху Его́, покива́юще глава́ми свои́ми, вы́ же, му́дрыя де́вы, взира́юще на Го́спода сла́вы, а́ще и на Кресте́ ви́сяща, все́м се́рдцем вопия́сте Ему́: Аллилу́иа.
И́кос 4.
Слы́шаще, ка́ко архиере́и со кни́жники, ста́рцы и фарисе́и руга́хуся, глаго́люще: Ины́я спасе́, Себе́ же не мо́жет спасти́, моля́хуся святы́я жены́ мироно́сицы за ми́р Распе́ншемуся, да спасе́т лю́ди согреша́ющия. Те́мже и мы́, ублажа́юще ве́ру ва́шу, хва́лим ва́с си́це:
Ра́дуйтеся, я́коже ма́ти Самуи́лова, не вино́м, ско́рбию упи́вшияся; ра́дуйтеся, я́ко Мариа́м проро́чица, побе́ду Христо́ву над сме́ртию воспе́вшия.
Ра́дуйтеся, я́ко вдови́ца Саре́птская, ве́ры и послуша́ния испо́лненныя; ра́дуйтеся, я́ко други́ни дще́ри Иеффа́евы, бра́к честны́й почита́ющия.
Ра́дуйтеся, Присноде́ву со святы́ми де́вами сла́вно прославля́вшия; ра́дуйтеся, я́ко Иуди́фь мы́сленнаго Олофе́рна, диа́вола, сокруши́вшия.
Ра́дуйтеся, я́ко Есфи́рь де́рзкаго Ама́на, кня́зя тьмы́, низложи́вшия. ра́дуйтеся, ма́тере Маккаве́ов со ча́ды в пра́ведности поревнова́вшия.
Ра́дуйтеся, за́поведи Госпо́дни и в ско́рбех сохрани́вшия; ра́дуйтеся, приско́рбни бы́вши да́же до сме́рти, зако́нне суббо́тствующия.
Ра́дуйтеся, печа́ль о Христе́ уме́ршем наде́ждою ве́ры раствори́вшия.
Ра́дуйтеся, све́тлыя жены́ мироно́сицы, Го́споду с любо́вию послужи́вшия.
Конда́к 5.
Богоуби́йственныя дея́ния наро́да злонра́внаго и неблагода́рнаго ви́девше, ужаса́хуся жены́ мироно́сицы, серафи́мски закрыва́юще ли́ца своя́ и вопию́ще Бо́гу: Аллилу́иа.
И́кос 5.
Ви́дяще копие́, и́мже еди́н от во́ин прободе́ ребро́ Спа́сово, го́рце стеня́ху жены́ мироно́сицы, издале́ча зря́ще. При Кресте́ же Иису́сове стоя́ху Ма́терь Его́ и сестра́ Ма́тере Его́ Мари́я Клео́пова, и Мари́я Магдали́на, слеза́ми омыва́ющеся. Те́мже и мы́, поклоня́ющеся Кресту́ Честно́му, восхваля́ем ва́с си́це:
Ра́дуйтеся, Пречи́стому Те́лу, с дре́ва сне́мшемуся, тре́петно предстоя́вшия; ра́дуйтеся, Ио́сифу благообра́зному и Никоди́му после́довавшия.
Ра́дуйтеся, Гро́б и положе́ние в не́м Те́ла Христо́ва виде́вшия; ра́дуйтеся, пря́мо Гро́ба, Мари́е Магдали́но и друга́я Мари́е, сиде́вшия.
Ра́дуйтеся, опла́кавше Со́лнце, во гро́б заше́дшее, и па́ки Его́ узре́вшия; ра́дуйтеся, ве́рныя жены́ Галиле́йския и Иерусали́мския.
Ра́дуйтеся, Го́спода жива́го до́бльственне не оставля́вшия; ра́дуйтеся, Иису́су ме́ртвому, я́ко жи́ву Су́щу ми́ро прине́сшия.
Ра́дуйтеся, волхво́м, прине́сшим сми́рну, бога́тно уподо́бившияся; ра́дуйтеся, с па́стырьми и А́нгелы Христа́ славосло́вившия.
Ра́дуйтеся, Го́споду погребе́нну в верте́пе гро́бнем с ве́рою поклони́вшияся.
Ра́дуйтеся, све́тлыя жены́ мироно́сицы, Го́споду с любо́вию послужи́вшия.
Конда́к 6.
Пропове́дницы богоно́сныя яви́стеся, святы́я жены́ мироно́сицы, я́ко благоволи́ Христо́с Бо́г озари́ти ва́с све́том Воскресе́ния Своего́, егда́, яви́ся ва́м, ре́к: Ра́дуйтеся! Сего́ ра́ди ве́лия благода́ти испо́лненныя возопи́сте Ему́: Аллилу́иа.
И́кос 6.
Возсия́вшаго из Гро́ба, богому́дрыя жены́, да́же до дне́сь возвеща́ете, А́нгельскаго явле́ния удосто́ившияся. Те́мже и мы́, Воскресе́ние Христо́во ви́девше, сликовству́ем с ва́ми, глаго́люще:
Ра́дуйтеся, ко Гро́бу те́кшия, арома́ты и ми́ро угото́вавшия; ра́дуйтеся, жене́, пома́завшей но́зе Госпо́дни, любо́вию подража́вшия.
Ра́дуйтеся, гро́бныя пелены́ Его́ те́пле слеза́ми измы́вшия; ра́дуйтеся, Мари́и, излия́вшей ми́ро на главу́ Его́, до́бре поревнова́вшия.
Ра́дуйтеся, погребе́ния Госпо́дня уча́стницы благогове́йныя; ра́дуйтеся, Воскресе́ния Христо́ва пропове́дницы богоизбра́нныя.
Ра́дуйтеся, А́нгельским глаго́лом изумле́нныя и устраше́нныя; ра́дуйтеся, я́ко тре́пет и стра́х сво́й на ра́дость ско́ро премени́вшия.
Ра́дуйтеся, честны́я апо́столов Христо́вых сподви́жницы; ра́дуйтеся, святы́х А́нгелов Госпо́дних сослужи́тельницы.
Ра́дуйтеся, всю́ зе́млю про́поведию Воскресе́ния Христо́ва просвети́вшия.
Ра́дуйтеся, све́тлыя жены́ мироно́сицы, Го́споду с любо́вию послужи́вшия.
Конда́к 7.
Хотя́й ско́ро ученицы́ Своя́ уте́шити, сре́те и́х Иису́с, глаго́ля: Ра́дуйтеся! Они́ же, присту́пльше, я́ша за но́зе Его́ и поклони́шася Ему́. С ни́ми же и мы́ возопии́м Ему́: Аллилу́иа.
И́кос 7.
Но́вый Иерусали́м ны́не ликовству́ет и Сио́н весели́тся, мироно́сиц благове́стие прие́мше. Того́ ра́ди Мари́ю Магдали́ну изря́днейшую и Хузы́ подру́жие Иоа́нну блаже́нную, с ни́ми же и Соломи́ю, сыно́в Гро́мовых роди́тельницу, в пе́снех восхва́лим та́ко:
Ра́дуйтеся, повеле́нное от Го́спода испо́лнившия; ра́дуйтеся, вя́щшаго вразумле́ния от Христа́ не тре́бовавшия.
Ра́дуйтеся, благода́ть Бо́жию с ра́достию любо́вию прие́мшия; ра́дуйтеся, ра́йскою ра́достию от Спаси́теля ми́ра обра́дованныя.
Ра́дуйтеся, Го́спода на́шего Иису́са Христа́ послу́шницы смире́нныя; ра́дуйтеся, зве́зды немерца́ющия не́ба первохристиа́нскаго.
Ра́дуйтеся, о́вцы безгла́сныя, до́брым Па́стырем упасе́нныя; ра́дуйтеся, кри́ны се́льныя, на па́жити церко́вней процве́тшия.
Ра́дуйтеся, све́тлыя жены́ мироно́сицы, Го́споду с любо́вию послужи́вшия.
Конда́к 8.
Стра́нное явле́ние Христо́во ви́девши и я́ко вертогра́даря Его́ мня́щи, о телеси́ Иису́сове Того́ вопроша́ше. Слы́шавши же зо́в Госпо́день: Мари́е!, ю́ нарица́ющий, возопи́ пла́менне: Раввуни́! Мы́ же вопие́м Ему́: Аллилу́иа.
И́кос 8.
Ве́сь собо́р Апо́стольский не я́т ве́ры ва́шему благовествова́нию, жены́ светоно́сныя. Мы́ же, дивя́щеся явле́нию ва́м Воскре́сшаго, восхваля́ем ва́с си́це:
Ра́дуйтеся, же́н ветхозаве́тных пра́ведное соверше́ние; ра́дуйтеся, Це́ркви Христо́вы дще́ри перворо́дныя.
Ра́дуйтеся, за́поведей Моисе́евых тве́рдыя блюсти́тельницы; ра́дуйтеся, свобо́ды христиа́нския свети́льницы возжже́нныя.
Ра́дуйтеся, в плащани́цу Обви́таго среди́ ме́ртвых иска́вшия; ра́дуйтеся, Па́сху всечестну́ю всему́ ми́ру благовествова́вшия.
Ра́дуйтеся, а́да разруше́ние собо́рне испове́довавшия; ра́дуйтеся, сме́рти умерщвле́ние всегда́ пра́здновавшия.
Ра́дуйтеся, дще́ри, благоволе́ние Отца́ Небе́снаго прие́млющия; ра́дуйтеся, ученицы́ Христо́вы, Того́ восхожде́ния ко Отцу́ до́брыя прия́телища.
Ра́дуйтеся, све́тлыя жены́ мироно́сицы, Го́споду с любо́вию послужи́вшия.
Конда́к 9.
Вся́кое коле́но земно́е от сме́рти свободи́ся си́лою Воскресе́ния Христа́ Жизнода́вца. Его́же жены́ богому́дрыя све́тло пропове́даша. Те́мже и мы́, сме́ртию сме́рть Попра́вшаго велича́юще, с ва́ми Ему́ вопие́м: Аллилу́иа.
И́кос 9.
Вети́и умолча́ша и ра́зум испраздни́ся: ва́ше же благове́стие Воскресе́ния Христо́ва николи́же отпа́дает. Ве́рующе сему́ несумни́тельному глаго́лу, боговдохнове́нно хва́лим ва́с та́ко:
Ра́дуйтеся, Мари́е Магдали́но и други́я Мари́и, де́вы пречу́дныя; ра́дуйтеся, Суса́нно и Мари́е Иоси́ева, жены́ благослове́нныя.
Ра́дуйтеся, Иоа́нно и Саломи́е, сыно́в Зеведе́овых ма́ти; ра́дуйтеся, Мари́е Иа́ковля и Мари́я Клео́пова со ины́ми други́нями.
Ра́дуйтеся, немо́лчныя уста́, Воскресе́ние Христо́во провещава́ющия; ра́дуйтеся, стопы́ неле́ностныя, Иуде́ю и Ри́мскую держа́ву проше́дшия.
Ра́дуйтеся, ру́це трудолюби́выя, Це́рковь первохристиа́нскую че́ствовавшия; ра́дуйтеся, ушеса́ доброслы́шавшия, от слу́ха зла́ не убоя́вшияся.
Ра́дуйтеся, очеса́ недре́млющия, вся́кое искуше́ние прозрева́ющия; ра́дуйтеся, сердца́ очище́нная, Зако́н Бо́жий па́че зла́та возлюби́вшия.
Ра́дуйтеся, телеса́ свяще́нныя, хра́мы Свята́го Ду́ха соде́лавшияся.
Ра́дуйтеся, све́тлыя жены́ мироно́сицы, Го́споду с любо́вию послужи́вшия.
Конда́к 10.
Спасти́ хотя́ вся́ язы́ки, распя́тие претерпе́л еси́, Христе́ Бо́же, но а́дову разруши́л еси́ си́лу, жена́м мироно́сицам веща́вый: Ра́дуйтеся! Сме́ртию же и тле́нием возве́л еси́, да вси́ вопие́м: Аллилу́иа.
И́кос 10.
Сте́ны верте́па гро́бнаго потрясо́шася, егда́ А́нгел, приступи́в, отвали́ ка́мень от две́рий Гро́ба. Жены́ же святы́я мироно́сицы, ви́дяще сия́, ско́ро теча́ху, возвести́ти Воскресе́ние Христо́во ученико́м Его́. Мы́ же со тща́нием и ра́достию воспои́м благове́стниц блаже́нных си́це:
Ра́дуйтеся, ве́рою и любо́вию стра́х в сердца́х свои́х препобеди́вшия; ра́дуйтеся, а́нгельскому гла́су повину́вшеся, от сле́з преста́вшия.
Ра́дуйтеся, учени́цы благи́я и ве́рныя, в ра́дость Го́спода вше́дшия; ра́дуйтеся, невече́рняго Ца́рствия Небе́снаго прича́стницы непоро́чныя.
Ра́дуйтеся, в нетле́ния благоле́пие всепра́зднственно облече́нныя; ра́дуйтеся, но́ваго виногра́да рожде́ния, Ца́рствия Бо́жия приобщи́вшияся.
Ра́дуйтеся, жены́, в ми́ре пожи́вшия, я́ко ми́ра не тре́бовавшия; ра́дуйтеся, сосу́ды ми́лости к сла́ве Бо́жией приугото́ванныя.
Ра́дуйтеся, служи́тельницы возлю́бленныя, усе́рдно о Го́споде потруди́вшияся; ра́дуйтеся, сестры́ и ма́тери на́ши, те́пле о на́с моля́щияся.
Ра́дуйтеся, си́льныя упова́нием, не́мощи немощны́х нося́щия.
Ра́дуйтеся, све́тлыя жены́ мироно́сицы, Го́споду с любо́вию послужи́вшия.
Конда́к 11.
Пе́ние А́нгельское и глаго́лы челове́ческия воспева́ют Па́сху всепра́зднственную, в не́йже и сама́ тва́рь свободи́ся от рабо́ты нетле́ния в свобо́ду сла́вы ча́д Бо́жиих. Мы́ же ку́пно с жена́ми мироно́сицами вопие́м Христу́: Аллилу́иа.
И́кос 11.
Светоза́рная сия́ и спаси́тельная но́щь провозвещена́ е́сть жена́ми мироно́сицами, я́же ни свети́льника, ниже́ со́лнечнаго све́та тре́бует, я́ко Са́м Госпо́дь просвеща́ет ю́. Мы́ же, словеса́ ва́ша в сердца́х содержа́ще, велича́ем ва́с си́це:
Ра́дуйтеся, Христа́ пла́менне возлюби́вшия; ра́дуйтеся, бу́ии о Бо́зе пред апо́столы я́вльшияся.
Ра́дуйтеся, Го́спода Иису́са в ве́це се́м не постыди́вшияся; ра́дуйтеся, Спаси́телем пред А́нгелы Его́ испове́данныя.
Ра́дуйтеся, сады́ сенноли́ственныя, Отце́м Небе́сным насажде́нныя; ра́дуйтеся, ро́ждие пресла́дкое Лозы́ Безсме́ртныя.
Ра́дуйтеся, зе́рна гору́шныя, Ца́рство Бо́жие ре́вностно возрасти́вшия; ра́дуйтеся, кри́ны се́льныя и древеса́ светлоплодови́тыя.
Ра́дуйтеся, свети́льницы всено́щныя, Ду́ха не угаса́ющия; ра́дуйтеся, моле́ния, я́ко фимиа́м кади́льный принося́щия.
Ра́дуйтеся, ру́це своя́ преподо́бныя к Бо́гу всегда́ воздева́ющия.
Ра́дуйтеся, све́тлыя жены́ мироно́сицы, Го́споду с любо́вию послужи́вшия.
Конда́к 12.
Благода́ть служе́ния Це́ркви Христо́вой восприя́сте, жены́ смиренному́дренныя, ку́пно прославля́емыя. Мы́ же, ве́дяще, а́ще что́ добро́ или́ что́ красно́ е́сть, но е́же жи́ти бра́тии вку́пе, рце́м Бо́гу, воеди́но ва́с собра́вшему: Аллилу́иа.
И́кос 12.
Пою́ще Воскресе́ние Христо́во, ро́д челове́ческий обновля́ющее, единоду́шно и единому́дренно спасе́ния сподо́билися есте́, святы́я жены́ мироно́сицы, сего́ ра́ди велича́ем ва́с си́це:
Ра́дуйтеся, де́вам целому́дренным до́брыя наста́вницы; ра́дуйтеся, же́н благочести́вых сове́тницы пречу́дныя.
Ра́дуйтеся, честны́х ста́риц, в ве́ре отше́дших, на Небеси́ срета́ющия; ра́дуйтеся, Го́спода Христа́ в напа́стех не оста́вльшия.
Ра́дуйтеся, моле́нию жены́ Ханане́йския те́пле подража́вшия; ра́дуйтеся, ле́птою вдови́цы че́стне веселя́щияся.
Ра́дуйтеся, свиде́тельницы ве́рныя жены́ кровоточи́выя; ра́дуйтеся, воскреше́нию дще́ри Иаи́ровы а́нгельски сора́довавшияся.
Ра́дуйтеся, со вдово́ю Наи́нскою Го́спода благословля́вшия; ра́дуйтеся, Ма́рфы и Мари́и, сесте́р Ла́заревых други́ни свяще́нныя.
Ра́дуйтеся, све́тлыя жены́ мироно́сицы, Го́споду с любо́вию послужи́вшия.
Конда́к 13.
О святы́я жены́ мироно́сицы! Блаже́нны очеса́ ва́ша, Воскре́сшаго Христа́ пе́рвыми узре́вшия, блаже́нны ру́це ва́ша, пречи́стых но́г Его́ косну́вшияся, блаже́нны сердца́ ва́ша, Го́спода возлюби́вшия, я́ко пребыва́яй в любви́, в Бо́зе пребыва́ет. Помоли́теся и о на́с, ча́дех ва́ших, да и мы́ весе́лыми нога́ми потече́м во сле́д Христу́ Бо́гу, свято́е Воскресе́ние Его́ ку́пно с ва́ми прославля́юще: Аллилу́иа.
И́кос 1.
А́нгелами просвеще́нныя и челове́ков просвеща́ющии яви́стеся пра́ведныя жены́ мироно́сицы, кра́сная ми́ра ни во что́же вмени́вшия и до́мы своя́ оста́вльшия, да после́дуете Сы́ну Челове́ческому, И́же не име́, где́ главы́ приклони́ти. Сего́ ра́ди хва́лим ва́с си́це:
Ра́дуйтеся, му́дрым ева́нгельским де́вам уподо́бившияся; ра́дуйтеся, во Сре́тение Жениху́ благовре́менно изше́дшия.
Ра́дуйтеся, еле́й сво́й в сосу́дах со свети́льники прия́вшия; ра́дуйтеся, немощьми́ пло́ти на́шея ле́гце воздрема́вшия.
Ра́дуйтеся, во́пль в полу́нощи: се́ Жени́х гряде́т, услы́шавшия; ра́дуйтеся, Красне́йшему от сыно́в челове́ческих уневе́стившияся.
Ра́дуйтеся, в черто́г Его́ на бра́к с Ни́м вше́дшия; ра́дуйтеся, в ма́лом де́лании ве́рныя Его́ служи́тельницы.
Ра́дуйтеся, ве́лиею сла́вою на Небесе́х от Него́ увенча́нныя; ра́дуйтеся, благово́нное ми́ро Христу́ прине́сшия.
Ра́дуйтеся, благода́ти еле́ем от Него́ пома́занныя.
Ра́дуйтеся, све́тлыя жены́ мироно́сицы, Го́споду с любо́вию послужи́вшия.
Конда́к 1.
Избра́нным от же́н Изра́илевых, Воскресе́ния Христо́ва благове́стницам, Па́сху Христо́ву пра́зднующе, с весе́лием возопии́м:
Ра́дуйтеся, све́тлыя жены́ мироно́сицы, Го́споду с любо́вию послужи́вшия.
Моли́тва.
О святы́я жены́ мироно́сицы, всехва́льныя Христо́вы учени́цы! К ва́м мы́, гре́шнии и недосто́йнии, ны́не усе́рдно прибега́ем и во умиле́нии серде́ц на́ших мо́лимся. Вы́ па́че все́х бла́г земны́х Сладча́йшаго Го́спода Иису́са возлюби́сте и Тому́ чрез все́ житие́ до́бре после́довасте, Боже́ственным уче́нием Его́ и благода́тию души́ своя́ пита́юще и мно́жество челове́к к чу́дному све́ту Христо́ву приводя́ще. Испроси́те и на́м у Христа́ Бо́га благода́ть просвеща́ющую и освяща́ющую на́с, да е́ю осеня́емы, в ве́ре и благоче́стии в по́двизех любви́ и самоотверже́ния преуспева́ти бу́дем, и Христу́ в бли́жних Его́ служи́ти неле́ностно потщи́мся. О святы́я жены́! Вы́ бо́дренно благода́тию Бо́жиею житие́ на земли́ препроводи́вше и во оби́тели Небе́сныя ра́достно отше́дше, притеко́сте. Моли́те у́бо Христа́ Спа́са, да и на́с сподо́бит стра́нствие на́ше земно́е, во вре́меннем се́м ве́це непреткнове́нно соверши́ти, и в ми́ре и покая́нии житие́ на́ше сконча́ти, да та́ко во святы́ни на земли́ пожи́вше, ве́чныя и блаже́нныя жи́зни на Небеси́ сподо́бимся, и та́мо с ва́ми и со все́ми святы́ми вку́пе восхва́лим Тро́ицу Единосу́щную и Неразде́льную и воспои́м еди́но Божество́, Отца́ и Сы́на и Всесвята́го Ду́ха и и́стее благода́ти Бо́жия прича́стники бу́дем в невече́рнем дни́ Ца́рствия Его́ во ве́ки веко́в. Ами́нь.