Конда́к 1.
Возбра́нный Воево́до и Созда́телю ми́ра, услы́ши на́с, гре́шных, моля́щихся Тебе́, Творцу́ и Промысли́телю на́шему. При́зри с высоты́ свята́го жили́ща Твоего́ на изсо́хшия от не́нависти сердца́ на́ша и обнови́ и́х благода́тию Пресвята́го Твоего́ Ду́ха, да и мы́ Благоде́телю и Влады́ке жи́зни на́шея зове́м Ти́:
Бо́же, Исто́чниче ми́ра и любви́, водрузи́ ми́р и любо́вь в сердца́х на́ших.
И́кос 1.
А́нгелов Тво́рче, вели́кий и всемогу́щий Бо́же на́ш, Ты́ покори́л под но́зи Свои́ вся́ стихи́и, Ты́ одни́м сло́вом Свои́м запрети́л бу́ре и повеле́л бы́ти тишине́ на е́зере Геннисаре́тсте. Дивя́щеся Твоему́ всемогу́ществу, Тебе́, Влады́це Ми́ра, взыва́ем такова́я:
Бо́же, Исто́чниче ми́ра и любви́, ороси́ ка́плею благода́ти Свята́го Твоего́ Ду́ха лю́тыя оледене́вшия сердца́ на́ша.
Бо́же, Исто́чниче ми́ра и любви́, возрасти́ в сердца́х люде́й Твои́х доброде́тель кро́тости и смире́ния.
Бо́же, Исто́чниче ми́ра и любви́, искорени́ в на́с многообра́зное лука́вство и лицеме́рие.
Бо́же, Исто́чниче ми́ра и любви́, водрузи́ ми́р и любо́вь в сердца́х на́ших.
Конда́к 2.
Вседержи́телю и Спаси́телю на́ш, не оста́ви на́с, сиро́т, но вонми́ моле́нию на́шему, с ве́рою зову́щих Ти́: Аллилу́иа.
И́кос 2.
Рече́ Госпо́дь Свои́м ученико́м: «За́поведь но́вую даю́ ва́м, да лю́бите дру́г дру́га; я́коже А́з возлюби́л ва́с, та́к и вы́ да лю́бите дру́г дру́га». И мы́ со умиле́нием взыва́ем Ти́:
Бо́же, Исто́чниче ми́ра и любви́, ми́р ми́рови Твоему́ да́руй.
Бо́же, Исто́чниче ми́ра и любви́, А́нгела ми́рнаго, ве́рнаго на́шего наста́вника, пошли́ лю́дям Твои́м.
Бо́же, Исто́чниче ми́ра и любви́, распали́ огне́м благода́тней любви́ и ми́ра ду́ши и сердца́ на́ши.
Бо́же, Исто́чниче ми́ра и любви́, во́лю на́шу напра́ви уклоня́тися от зла́ и твори́ти благо́е.
Бо́же, Исто́чниче ми́ра и любви́, водрузи́ ми́р и любо́вь в сердца́х на́ших.
Конда́к 3.
Си́лою облече́нныя свы́ше, святы́е ученики́ Твои́ и апо́столы, ше́дше в ми́р и пропове́дуя Свято́е Ева́нгелие Твое́ любви́ и ми́ра, с ра́достию взыва́ем Ти́: Аллилу́иа.
И́кос 3.
Име́я бога́тство любви́ и милосе́рдие неизрече́нное, Го́споди Бо́же на́ш, отврати́ раздо́ры от на́с, призыва́ющих и́мя Госпо́дне, и пода́й ско́рое примире́ние лю́дям Твои́м. Напо́лни сердца́ на́ши теплото́ю любви́ Твое́й, да и мы́, ра́ди сла́вы свята́го и́мени Твоего́, Тебе́, Спаси́телю и Бо́гу на́шему, прино́сим сицева́я:
Бо́же, Исто́чниче ми́ра и любви́, изба́ви на́с от за́висти, гне́ва и братоненавиде́ния.
Бо́же, Исто́чниче ми́ра и любви́, благода́ть Го́спода на́шего Иису́са Христа́ и любо́вь Бо́га и Отца́ да бу́дет с на́ми.
Бо́же, Исто́чниче ми́ра и любви́, умири́ на́шу жи́знь и умири́ ми́р Тво́й и поми́луй на́с.
Бо́же, Исто́чниче ми́ра и любви́, водрузи́ ми́р и любо́вь в сердца́х на́ших.
Конда́к 4.
Бу́рю я́рости и негодова́ния отгони́ от на́с, Человеколю́бче Го́споди, и научи́ на́с еди́ными уста́ми и еди́ным се́рдцем взыва́ти Тебе́: Аллилу́иа.
И́кос 4.
Слы́ша святы́е ученики́ Твои́ глаго́лы из Пречи́стых у́ст Твои́х: «Име́ющий за́поведи Мои́ и соблюда́ющий и́х то́т е́сть лю́бящий Меня́, а лю́бящий Меня́ возлю́блен бу́дет Отце́м Мои́м». Мы́ же, удивля́ющеся неизрече́нной любви́ и за́поведям Твои́м, дерза́ем пе́ти Тебе́:
Бо́же, Исто́чниче ми́ра и любви́, очи́сти и на́с от грехо́в на́ших, изсуша́ющих в на́с и́скреннюю любо́вь.
Бо́же, Исто́чниче ми́ра и любви́, те́плую любо́вь к Тебе́ пода́ждь на́м и и́скреннюю в на́с благода́ть Пресвята́го Ду́ха.
Бо́же, Исто́чниче ми́ра и любви́, во́ду из ка́мня в пусты́ни источи́вый, источи́ из серде́ц на́ших человеколю́бие и милосе́рдие.
Бо́же, Исто́чниче ми́ра и любви́, от все́х душе́вных страсте́й невреди́мо соблюди́ на́с.
Бо́же, Исто́чниче ми́ра и любви́, водрузи́ ми́р и любо́вь в сердца́х на́ших.
Конда́к 5.
Спа́се на́ш, Бо́г ми́ра и любви́, ми́р оста́вивший лю́дям, посети́ на люде́й Твои́х ми́ром, да благодари́м Тя́, все́м се́рдцем зову́ще: Аллилу́иа.
И́кос 5.
Влады́ко Небеси́ и земли́, чу́дный Бо́же, О́тче щедро́т, приста́нище милосе́рдия и человеколю́бия, неистощи́мый Исто́чниче прему́дрости, все́ содержа́щий в десни́це Свое́й, Дыха́ние все́х живы́х, Его́же послу́шают и зве́зды, Ты́ у́бо, Со́лнце ми́ра и любви́, пощади́ насле́дие Твое́, при́зри на люде́й Твои́х согреши́вших и из глубины́ се́рдца зову́щих:
Бо́же, Исто́чниче ми́ра и любви́, да́руй на́м ны́не возлюби́ти Тебя́ все́м се́рдцем и все́ю душе́ю.
Бо́же, Исто́чниче ми́ра и любви́, да́руй на́м возлюби́ти дру́г дру́га сло́вом и и́стиною.
Бо́же, Исто́чниче ми́ра и любви́, смири́ окамене́вшия сердца́ на́ша в нелицеме́рней любви́ дру́г к дру́гу.
Бо́же, Исто́чниче ми́ра и любви́, да́руй на́м в любви́ и благоче́стии пожи́ти вся́ дни́ жи́зни на́шей.
Бо́же, Исто́чниче ми́ра и любви́, водрузи́ ми́р и любо́вь в сердца́х на́ших.
Конда́к 6.
Поми́луй на́с, Го́споди, поми́луй на́с, взыва́ющих к Тебе́: Аллилу́иа.
И́кос 6.
Вели́кий еси́ Го́споди, Ты́ возлюби́л ми́р, я́ко Сы́на Своего́ Единоро́днаго да́л еси́, да вся́кий ве́рующий в Него́ не поги́бнет, но име́ет жи́знь ве́чную. Мы́ же, упова́я на неизрече́нную любо́вь и Твое́ милосе́рдие, дерза́ем пе́ти Тебе́ такова́я:
Бо́же, Исто́чниче ми́ра и любви́, пода́й на́м милосе́рдие и долготерпе́ние.
Бо́же, Исто́чниче ми́ра и любви́, отыми́ от на́с за́висть, го́рдость и помышле́ния о зле́.
Бо́же, Исто́чниче ми́ра и любви́, искорени́ в на́с гнездя́щуюся па́губу самолю́бия – ко́рень все́х зо́л – и ове́й на́с ти́хим и ра́достным чу́вством братолю́бия.
Бо́же, Исто́чниче ми́ра и любви́, да́руй на́м зре́ти согреше́ния на́ши и смиря́ти себя́ пред Тобо́ю; бра́та николи́же осужда́ти, но люби́ти его́, я́ко сами́х себя́.
Бо́же, Исто́чниче ми́ра и любви́, водрузи́ ми́р и любо́вь в сердца́х на́ших.
Конда́к 7.
Хвали́те И́мя Госпо́дне, хвали́те раби́ Го́спода. Приими́, Го́споди, моли́твы Тебя́ велича́ющих и взыва́ющих Тебе́: Аллилу́иа.
И́кос 7.
«Да лю́бите дру́г дру́га; я́ко же А́з возлюби́л ва́с, да вы́ лю́бите». Та́кожде велича́ху Твою́ неизрече́нную любо́вь, дерза́ем Тебе́ взыва́ти такова́я:
Бо́же, Исто́чниче ми́ра и любви́, связа́вый Твои́х апо́столов сою́зом любви́, свяжи́ и на́с люби́ти нелицеме́рно дру́г дру́га.
Бо́же, Исто́чниче ми́ра и любви́, распали́ пла́менем любви́ сердца́ на́ши к Тебе́, Христе́ Бо́же на́ш, да мы́слею и все́ю кре́постию на́шею возлю́бим Тебя́ и и́скренняго своего́, я́ко сами́х себя́.
Бо́же, Исто́чниче ми́ра и любви́, к братолю́бному доброжела́тельному жи́тельству наста́ви на́с.
Бо́же, Исто́чниче ми́ра и любви́, сподо́би на́с в согла́сном единомы́слии сла́вити и благодари́ти Тя́, Человеколю́бца.
Бо́же, Исто́чниче ми́ра и любви́, водрузи́ ми́р и любо́вь в сердца́х на́ших.
Конда́к 8.
Сотвори́ со мно́ю зна́мение во бла́го, и да ви́дят ненави́дящие меня́ и постыдя́тся, я́ко Ты́, Го́споди, помо́г мне́. Тебе́, Промысли́телю на́шему и Пода́телю бла́г ве́чных, вопие́м: Аллилу́иа.
И́кос 8.
Возлюблю́ Тя́, Го́споди, Кре́посте моя́. Госпо́дь утвержде́ние мое́ и прибе́жище мое́. К Тебе́, Бо́гу моему́ и Све́ту И́стинному, воспева́ем си́це:
Бо́же, Исто́чниче ми́ра и любви́, ороси́ на́с ка́плями Твоего́ милосе́рдия и возвесели́ сердца́ на́ша.
Бо́же, Исто́чниче ми́ра и любви́, разбуди́ со́весть, спя́щую в на́с, и укрепи́ гла́с ея́.
Бо́же, Исто́чниче ми́ра и любви́, да́ждь да́м позна́ти си́лу любви́ Твое́й к па́дшему челове́ку.
Бо́же, Исто́чниче ми́ра и любви́, умудри́ на́с бы́ти провозве́стниками любви́ Твое́й для бра́тьев на́ших.
Бо́же, Исто́чниче ми́ра и любви́, укра́си на́с цвета́ми и плода́ми благи́х чу́вств.
Бо́же, Исто́чниче ми́ра и любви́, водрузи́ ми́р и любо́вь в сердца́х на́ших.
Конда́к 9.
Возлю́бим дру́г дру́га, да единомы́слием вопие́м Тебе́: Аллилу́иа.
И́кос 9.
Вити́и многовеща́нныя, я́ко же ры́бы безгла́сныя не мо́гут глаго́лати слове́с Твои́х: «А́ще за́поведи мои́ соблюде́те, пребу́дите в любви́ Мое́й, я́ко же и А́з за́поведи Отца́ Моего́ соблюдо́х и пребава́ю в любви́ Его́». Мы́ же воспева́ем пе́снь любви́ Твое́й:
Бо́же, Исто́чниче ми́ра и любви́, все́м на́м ми́р подая́й.
Бо́же, Исто́чниче ми́ра и любви́, не терпя́й вражду́, примири́ на́с все́х, да в ра́дости Твое́й пребу́дем.
Бо́же, Исто́чниче ми́ра и любви́, в пусты́не насы́тивый наро́д пя́ть. хле́бами, насы́ти и на́с ми́ром и любо́вию.
Бо́же, Исто́чниче ми́ра и любви́, претворя́я во́ду и вино́ на бра́ке в Ка́не Галиле́йстей, претвори́ не́нависть в любо́вь в охладе́вших сердца́х на́ших.
Бо́же, Исто́чниче ми́ра и любви́, водрузи́ ми́р и любо́вь в сердца́х на́ших.
Конда́к 10.
Спаси́, Бо́же, лю́ди Твоя́ и благослови́ достоя́ние Твое́ Тебе́ зову́щих: Аллилу́иа.
И́кос 10.
Царю́ Си́л, чистоты́ и целому́дрия, Иису́се Христе́, росо́ю свы́ше погаси́ пла́мень страсте́й на́ших, да чи́стым се́рдцем вопие́м Тебе́ хвале́бную пе́снь сию́:
Бо́же, Исто́чниче ми́ра и любви́, руко́ю свята́го А́нгела Твоего́ отста́ви от на́с ду́ха горды́ни и за́висти.
Бо́же, Исто́чниче ми́ра и любви́, очи́сти сердца́ на́ши от мы́слей не́нависти.
Бо́же, Исто́чниче ми́ра и любви́, огради́ на́с святы́ми Твои́ми а́нгелами и кре́пким и́х ополче́нием.
Бо́же, Исто́чниче ми́ра и любви́, отыми́ се́рдце ка́менное от пло́ти на́шей и да́ждь на́м се́рдце, пыла́ющее любо́вию.
Бо́же, Исто́чниче ми́ра и любви́, водрузи́ ми́р и любо́вь в сердца́х на́ших.
Конда́к 11.
Преклони́, Го́споди, у́хо Твое́ и услы́ши на́с, из глубины́ се́рдца взыва́ющих Тебе́: Аллилу́иа.
И́кос 11.
«Сла́ва в вы́шних Бо́гу и на земли́ ми́р!» – воспе́ли а́нгелы Тебе́, Рожде́нному Царю́ ми́ра и любви́, Спа́су ду́ш на́ших. И мы́ дерза́ем пе́ти Тебе́ сицева́я:
Бо́же, Исто́чниче ми́ра и любви́, из пла́мени ро́су источи́вый, источи́ ро́су любви́ из серде́ц на́ших.
Бо́же, Исто́чниче ми́ра и любви́, пода́ждь на́м ми́р и тишину́ в житии́ на́шем.
Бо́же, Исто́чниче ми́ра и любви́, глаго́ляй Свои́м ученико́м «Ми́р ва́м!», пошли́ и на́м ми́р Тво́й.
Бо́же, Исто́чниче ми́ра и любви́, посли́ на́м непрекраща́емыя струи́ любви́ Твое́й.
Бо́же, Исто́чниче ми́ра и любви́, водрузи́ ми́р и любо́вь в сердца́х на́ших.
Конда́к 12.
Го́споди Иису́се Христе́ Бо́же на́ш, Исто́чниче ми́ра и любви́, благослови́ ми́ром люде́й Твои́х, из глубины́ покая́нных серде́ц взыва́ющих к Тебе́: Аллилу́иа.
И́кос 12.
Пе́рвую и наибо́льшую за́поведь да́л на́м, е́же люби́ти Тя́, Бо́га и Творца́ на́шего, от все́й души́, мы́сли и кре́пости на́шей; и втору́ю, подо́бную е́й, е́же люби́ти бли́жняго, я́ко сами́х себя́. На си́х дву́х за́поведех зи́ждется ве́сь Зако́н и Проро́ки. Вне́млюще се́рдцем вели́кую благода́ть слове́с Твои́х, зове́м Тебе́ сицева́я:
Бо́же, Исто́чниче ми́ра и любви́, да́вый позна́ти на́м наибо́льшую за́поведь о любви́, да́й же позна́ти на́м наибо́льший и тягча́йший гре́х – не́нависть.
Бо́же, Исто́чниче ми́ра и любви́, угаси́ пла́мень не́нависти и пререка́ния на́шего.
Бо́же, Исто́чниче ми́ра и любви́, омо́й прока́зу вражды́ и очи́сти сердца́ на́ши.
Бо́же, Исто́чниче ми́ра и любви́, водрузи́ ми́р и любо́вь в сердца́х на́ших.
Конда́к 13.
О, Всемогу́щий Бо́же, Промысли́телю на́ш, Исто́чниче жи́зни и бла́г Пода́телю! Приими́ от всего́ се́рдца сие́ моле́ние и благодаре́ние на́ше, Тебе́ приноси́мое. Услы́ши моли́тву на́шу и утоли́ раздо́ры, не́нависть, братоненавиде́ние в душа́х на́ших. Пода́ждь ми́р, тишину́, любо́вь, примире́ние лю́дям Твои́м, да в ра́дости Тебе́, Бо́гу на́шему и Исто́чнику всего́ ми́ра и любви́, зове́м: Аллилу́иа.
И́кос 1.
А́нгелов Тво́рче, вели́кий и всемогу́щий Бо́же на́ш, Ты́ покори́л под но́зи Свои́ вся́ стихи́и, Ты́ одни́м сло́вом Свои́м запрети́л бу́ре и повеле́л бы́ти тишине́ на е́зере Геннисаре́тсте. Дивя́щеся Твоему́ всемогу́ществу, Тебе́, Влады́це Ми́ра, взыва́ем такова́я:
Бо́же, Исто́чниче ми́ра и любви́, ороси́ ка́плею благода́ти Свята́го Твоего́ Ду́ха лю́тыя оледене́вшия сердца́ на́ша.
Бо́же, Исто́чниче ми́ра и любви́, возрасти́ в сердца́х люде́й Твои́х доброде́тель кро́тости и смире́ния.
Бо́же, Исто́чниче ми́ра и любви́, искорени́ в на́с многообра́зное лука́вство и лицеме́рие.
Бо́же, Исто́чниче ми́ра и любви́, водрузи́ ми́р и любо́вь в сердца́х на́ших.
Конда́к 1.
Возбра́нный Воево́до и Созда́телю ми́ра, услы́ши на́с, гре́шных, моля́щихся Тебе́, Творцу́ и Промысли́телю на́шему. При́зри с высоты́ свята́го жили́ща Твоего́ на изсо́хшия от не́нависти сердца́ на́ша и обнови́ и́х благода́тию Пресвята́го Твоего́ Ду́ха, да и мы́ Благоде́телю и Влады́ке жи́зни на́шея зове́м Ти́:
Бо́же, Исто́чниче ми́ра и любви́, водрузи́ ми́р и любо́вь в сердца́х на́ших.
Моли́тва Го́споду Бо́гу на́шему о ми́ре и любви́.
О, Влады́ка Небеси́ и земли́, О́тче щедро́т и милосе́рдия, неизсле́димая пучи́на любви́!
Ты́ Свои́м про́мыслом содержи́ши всю́ тва́рь. Преклони́ се́рдце Твое́, О́тче пра́ведный, к моле́нию на́шему, обнови́ сердца́ на́ши любо́вию Твое́ю и водрузи́ ми́р и ра́дость в житии́ на́шем.
О, Со́лнце Ми́ра и Любви́! Разсе́янный у́м на́ш просвети́, очи́сти на́с от грехо́в и беззако́ний на́ших, напра́ви на́с на пу́ть и́стиннаго смире́ния. Охладе́вшия сердца́ на́ша согре́й любо́вию Твое́ю, да источа́т они́ милосе́рдие, и сохрани́ ду́ши на́ша. Да́руй на́м, Го́споди, ми́р Тво́й и спаси́ на́с, я́ко бла́г и Человеколю́бец. Ами́нь.