Конда́к 1.
Возбра́нный Воево́до и Го́споди, ми́ра Созда́телю, с ве́рою и любо́вию припа́дающе к Тебе́ Гряду́щему, вопию́ Ти́:
Иису́се, Го́споди Гряду́щий, вни́ди в до́м души́ моея́.
И́кос 1.
А́нгелов ли́ки со стра́хом и тре́петом взира́ли на Тя́, Го́споди, егда́ во́лею на́с ра́ди распя́лся Еси́; мы́ же гре́шнии что́ возмо́жем глаго́лати? Но дерза́ем по сло́ву Твоему́ моли́тися Тебе́:
Иису́се, ра́досте на́ша, яви́ на́м ми́лость Твою́; Иису́се, любы́ неизрече́нная, да́руй на́м возлюби́ти Тя́ все́м се́рдцем и все́м помышле́нием.
Иису́се, жела́ние на́ше, не отри́ни на́с, и́щущих Тя́; Иису́се, Све́те Ти́хий, осия́й на́с све́том благода́ти Твоея́.
Иису́се, наде́ждо на́ша, не оста́ви на́с заблужда́ющихся; Иису́се, вопроша́ющий на́с: что́ твори́те вы́ на земли́? – да́руй на́м твори́ти Твоя́ повеле́ния.
Иису́се, не возбрани́вый име́ти о́браз Тво́й, да́руй на́м вы́ну име́ти о́браз Тя́ Гряду́щаго; Иису́се, входя́щий в до́мы люде́й Твои́х, вни́ди в мя́ и преобрази́ мя всего́.
Иису́се, да́руй ми́ разуме́ти, что́ е́сть блага́я во́ля Твоя́; Иису́се многоми́лостивый, не отступи́ от мене́ за нераде́ние мое́.
Иису́се, Го́споди Гряду́щий, вни́ди в до́м души́ моея́.
Конда́к 2.
Ве́м, я́ко ве́лие утеше́ние и́мам в после́довании Тебе́, Го́споди, да́руй ми́ николи́же отступа́ти повеле́ний Твои́х, да спаса́емый Тобо́ю зову́: Аллилу́иа.
И́кос 2.
Обеща́вый вечеря́ти с прие́млющим Тя́, соде́лай мя́ прича́стника ве́чери Твоея́ та́йныя.
Иису́се, стоя́й и толки́й у две́ри се́рдца моего́, да́руй ми́ уразуме́ти зо́в Тво́й; Иису́се, призыва́ющий на́с ко очище́нию, да́руй ми́ позна́ти нечистоту́ мою́.
Иису́се, Све́те и́стинный, просвети́ мя́, да возлюблю́ за́поведи Твоя́; Иису́се, и́щущий призва́ти гре́шных, отве́рзи слу́х мо́й ко услы́шанию глаго́ла Твоего́.
Иису́се, утружде́нный на пути́ Свое́м, не име́ющий где́ главу́ преклони́ти, не возгнуша́йся вни́ти в до́м мо́й; Иису́се, ве́м я́ко на́г е́смь, ни́щ и убо́г, но благода́тию Твое́ю покры́й мя́.
Иису́се, ми́лосте безконе́чная, не оста́ви мене́; Иису́се, О́гнь попаля́ющий, попали́ моя́ злы́я по́мыслы.
Иису́се, Врачу́, исцели́ я́звы страсте́й мои́х; Иису́се, вся́ моги́й, косни́ся оче́с мои́х, во е́же не ви́дети мне́ суеты́.
Иису́се преми́лостивый, очи́сти мя́ всего́ и спаси́.
Иису́се, Го́споди Гряду́щий, вни́ди в до́м души́ моея́.
Конда́к 3.
Глаго́лавый пречи́стыми уста́ми Твои́ми: е́й, гряду́ ско́ро, ами́нь! да́руй мне́ со возлю́бленным ученико́м Твои́м взыва́ти: е́й, гряди́, Го́споди Иису́се! Сего́ ра́ди в тре́пете ожида́я прише́ствия Твоего́, зову́ Ти́: Аллилу́иа.
И́кос 3.
Призва́вый апо́столов от сете́й ры́барских на служе́ние И́стине Твое́й, призови́ и мя́ от суеты́ жите́йской, да после́дую Тебе́, с весе́лием и любо́вию глаго́ля:
Иису́се, прости́вый ученику́ Своему́ трикра́тное отрече́ние, да́руй ми́ его́ покая́ние; Иису́се, со́весте моя́, да́руй ми́ го́рько пла́катися о гресе́х мои́х.
Иису́се, ни еди́ным сло́вом, но воззре́нием то́кмо на ученика́ Своего́ приведы́й его́ к Себе́, да́ждь и мне́ сле́зы покая́ния, косни́ся души́ моея́, да раска́юся о непра́вде мое́й; Иису́се, взира́яй на произволе́ние серде́чное, поми́луй мя́.
Иису́се, реки́й апо́столу Петру́: гряди́ по Мне́! повели́ и мне́ Тебе́ после́довати; Иису́се, глаго́лавый: блаже́н еси́, Си́моне, ва́р Ио́на, я́ко испове́да Мя́ Сы́ном Бо́жиим,– да́руй и мне́ его́ испове́дание и́стинное.
Иису́се, разреши́вый сему́ ученику́ идти́ по вода́м во сре́тение Твое́, да́руй и мне́ си́лу благода́тную не убоя́тися во́лн жите́йских; Иису́се, просте́рший ру́ку к Петру́ утопа́ющему, простри́ и мне́ ру́ку по́мощи; Иису́се, реки́й: кто́ не со Мно́ю, то́т проти́в Меня́,– да́руй ми́ пребы́ти с Тобо́ю.
Иису́се, Го́споди Гряду́щий, вни́ди в до́м души́ моея́.
Конда́к 4.
Возлюби́вый, Го́споди, ве́сь ро́д челове́ческий, научи́ и мя́ возлюби́ти бли́жних мои́х, да просветле́н и обоже́н Тобо́ю, вы́ну зову́ Ти́: Аллилу́иа.
И́кос 4.
Призыва́яй все́х тружда́ющихся и обремене́нных ко упокое́нию, да́руй ми́ потруди́тися ра́ди и́мени Твоего́ свята́го, не убоя́вшись зно́я полу́деннаго: не ве́даю бо егда́ де́нь мо́й к ве́черу преклони́тся; и да вопию́ Ти́:
Иису́се, Све́те святы́й, освяти́ повседне́вный тру́д мо́й; Иису́се, Уте́шителю, да́руй ми́ николи́же возскорбе́ти о тя́гости труда́ сего́.
Иису́се, Ра́дование мое́, да́руй ми́ понести́ вся́ку ско́рбь ра́ди и́мени Твоего́. Иису́се, да́руй ми́ позна́ти Ца́рство Бо́жие внутри́ себя́.
Иису́се, Го́споди Гряду́щий, вни́ди в до́м души́ моея́.
Конда́к 5.
Се́ прихожду́ к Безсме́ртному Царю́ и Бо́гу моему́, вопия́: Аллилу́иа.
И́кос 5.
Ве́м, Го́споди, я́ко скорбя́ми, неду́гами и разли́чными печа́льми боле́зни ду́ш на́ших врачу́еши. Со слеза́ми вопию́ Ти́:
Иису́се, Го́споди, Ты́ Са́м гони́мый из хра́мов Твои́х, да́ждь на́м си́лу терпе́ти ско́рби за и́мя Твое́; Иису́се, Стра́нником в ми́ре явля́ющийся, помози́ на́м во изгна́нии и стра́нствии на́шем.
Иису́се, А́гнче Бо́жий, взе́мляй грехи́ ми́ра, возьми́ бре́мя грехо́в на́ших; Иису́се пречу́дный, страда́ния за ми́р претерпе́вый, утоли́ на́ши многоразли́чныя ско́рби.
Иису́се, Стра́нниче в ми́ре утомле́нный, да́руй поко́й утомле́нней душе́ мое́й; Иису́се, ученико́в призва́вый, да́руй и мне́ небоя́зненно тещи́ за Тобо́ю.
Иису́се Го́споди Предве́чный, благослови́ все́х к Тебе́ стремя́щихся. Иису́се, вся́ ве́дущий, Ты́ ве́си я́ко люблю́ Тя́;
Иису́се, вся́ моги́й, помози́ ми́ и прости́ мя́.
Иису́се, Го́споди Гряду́щий, вни́ди в до́м души́ моея́.
Конда́к 6.
Ве́м, Го́споди, я́ко те́сными врата́ми, мно́гими скорбя́ми подоба́ет вни́ти в Ца́рствие Небе́сное,– укрепи́ стопы́ на́ша, да не возврати́мся вспя́ть ми́ром побежда́емии, но да зове́м Ти́: Аллилу́иа.
И́кос 6.
На ве́чери в дому́ Си́мона Прокаже́ннаго не отри́нул еси́ гре́шницу, прише́дшую с ми́ром многоце́нным пома́зати но́зи Твоя́, но ре́кл еси́: отпуща́ются греси́ ея́ мно́зи, я́ко возлюби́ла мно́го.
Иису́се благи́й, реки́ и о мои́х гресе́х та́кожде; Иису́се, Па́стырю До́брый, призови́ мя́ я́ко заблу́ждшую о́вцу.
Иису́се, Судие́ Пра́ведный, судо́м Твои́м вразуми́ мя́; Иису́се, и́миже ве́си судьба́ми спаси́ мя́.
Иису́се, пости́выйся в пусты́не и напосле́док взалка́вый, да́руй ми́ и́стинное алка́ние пра́вды Твоея́; Иису́се, бы́в искуше́н вся́чески, помози́ ми́ во искуше́ниях мои́х.
Иису́се, реки́й: не мо́жет челове́к твори́ти ничесо́же, а́ще не бу́дет дано́ ему́ свы́ше,– пошли́ ми́ по́мощь Твою́ с небеси́; Иису́се, не уклони́ се́рдце мое́ в словеса́ лука́вствия.
Иису́се, По́мощь моя́, Засту́пниче мо́й, Ра́дование мое́, спаси́ мя́.
Иису́се, Го́споди Гряду́щий, вни́ди в до́м души́ моея́.
Конда́к 7.
Повеле́л еси́, Го́споди, бы́ть му́дрыми, искупу́юще вре́мя, я́ко дни́е лука́ви су́ть и вре́мя сокраще́но; вразуми́ мя́, да спаса́емый Тобо́ю, вопию́ благода́рне: Аллилу́иа.
И́кос 7.
Слы́ша Тайнови́дец апо́стол Иоа́нн гла́с с небеси́ глаго́лющий: напиши́: блаже́ни ме́ртвии, умира́ющия о Го́споде отны́не. Е́й, глаго́лет Ду́х, да почи́ют от трудо́в свои́х: дела́ бо и́х хо́дят всле́д с ни́ми. Слы́ша си́и слова́ и а́з ужаса́юся – не и́мам бо де́л ко оправда́нию и ничто́ же благо́е сотвори́х. Сего́ ра́ди от се́рдца вопию́ Ти́:
Иису́се, Судие́ Пра́ведный, не осуди́ мя́ по дело́м мои́м; Иису́се преми́лостивый, ви́ждь нераде́ние мое́ и зло́, соде́ланное мно́ю, но поми́луй мя́.
Иису́се, не возгнуша́йся вни́ти в оскверне́нный хра́м души́ мое́й; Иису́се Наста́вниче, научи́ мя́.
Иису́се, Сы́не Бо́жий, да́ждь ми́ ни́щему Твое́ бога́тство неиждива́емое; Иису́се, соде́лай мя́ рабо́м Твои́м.
Иису́се, пу́сто изжи́х вре́мя многоце́нное, да́нное ми́ для спасе́ния; Иису́се, приими́ мя́, я́ко в единонадеся́тый ча́с прише́дшаго, и научи́ мя́ оправда́нием Твои́м.)
Иису́се, Го́споди Гряду́щий, вни́ди в до́м души́ моея́.
Конда́к 8.
Зри́ши, Го́споди, я́ко вели́кою ско́рбию сердца́ челове́ческия исполня́ются о зле́ неве́рия во дни́ на́ши су́щаго; сего́ ра́ди, да́руеши благода́тное обновле́ние ико́н святы́х в зна́мение обновле́ния ду́ха на́шего; позна́в в се́м всеблаго́е промышле́ние Твое́, благода́рственно вопие́м Ти́: Аллилу́иа.
И́кос 8.
Дано́ бы́сть виде́ние возлю́бленному ученику́ Твоему́, я́ко под олтаре́м избие́нных за сло́во Бо́жие и за свиде́тельство е́же име́яху, возопи́ша гла́сом ве́лиим, глаго́люще: доко́ле, Влады́ко Святы́й и И́стинный, не су́диши и не мсти́ши кро́ви на́шея от живу́щих на земли́. И даны́ бы́ша коему́ждо и́х ри́зы белы́, и рече́но бы́сть и́м да почи́ют еще́ вре́мя ма́ло, до́ндеже сконча́ются и бра́тия и́х иму́щии избие́ны бы́ти я́ко же и ти́и. Слы́шав сие́, возношу́ Ти́ ско́рбный гла́с мо́й:
Иису́се Святы́й, утоли́ на земли́ на́шей ско́рби вели́кия; Иису́се Пра́ведный, укрепи́ испове́дников святы́я ве́ры, ны́не лю́те стра́ждущих.
Иису́се, по все́й земли́ Росси́йстей проходя́щий, очи́сти ю́ Свои́ми стопа́ми; Иису́се, утомле́нный на пути́ Твое́м, укрепи́ наро́д, от гла́да и боле́зней погиба́ющий.
Иису́се, Са́м в нищете́ сы́й, укры́й от хла́да и нищеты́ бра́тию на́шу; Иису́се, услы́ши во́пль и пла́ч наро́да ру́сскаго.
Иису́се, приими́ фимиа́м моли́тв святы́х, в та́йне Тебе́ подвиза́ющихся; Иису́се, ра́ди си́х пра́ведных, поми́луй на́с.
Иису́се, ве́м я́ко ви́диши вся́кую ка́плю сле́з на очесе́х на́ших; Иису́се, да́руй на́м в терпе́нии понести́ кре́ст на́ш.
Иису́се, ве́м я́ко слы́шиши ка́ждое воздыха́ние ско́рби на́шей, приими́ ю́ во очище́ние ду́ш на́ших; Иису́се, ве́м я́ко вме́сто разру́шенных хра́мов на земли́ Росси́йстей созида́еши хра́мы нерукотворе́нныя ду́ш челове́ческих, и́ми же да украси́тся Ца́рствие Бо́жие.
Иису́се, Го́споди Гряду́щий, вни́ди в до́м души́ моея́.
Конда́к 9.
Жа́жду просвеще́ния Твоего́, Го́споди, да́руй ми́ жа́ждущему ка́плю благода́ти Твоея́, да вопию́ Ти́: Аллилу́иа.
И́кос 9.
А́нгельския си́лы, серафи́мы и херуви́мы и вся́ во́инства небе́сныя со стра́хом и благогове́нием взира́ют на вели́кое смире́ние твое́; Ты́ бо Го́споди Си́л, Ца́рь ца́рствующих, Госпо́дь госпо́дствующих, смири́в Себя́ и зра́к ра́бий прии́м, по земли́ на́шей ско́рбней ше́ствуеши из гра́да в гра́д, из ве́си в ве́сь, все́х созыва́я Са́м на ве́черю, Тобо́ю угото́ванную:
Иису́се Благослове́нный, благослови́ все́х призыва́ющих Тя́; Иису́се Благи́й, ко гре́шным прише́дый, призови́ не и́щущих Твоея́ по́мощи.
Иису́се, Све́те незаходи́мый, просвети́ се́рдце наро́да на́шего во тьме́ неве́рия су́щаго; Иису́се, Све́те и́стинный, осия́й страну́ ру́сскую.
Иису́се, не возбрани́вый де́тем приходи́те к Тебе́, просвети́ дете́й неви́нных, в безве́рии воспита́нных; Иису́се, в та́йном по́двизе на вся́ком ме́сте, в леса́х и ве́сех Тебе́ подвиза́ющихся – сохрани́.
Иису́се, Вели́кий Архиере́ю, иере́ев ве́рных му́ченическую кончи́ну Тебе́ ра́ди прие́млющих – укрепи́; Иису́се, све́том благода́ти Твоея́ возсия́й в сердца́х гони́телей, да позна́ют Тя́, Бо́га И́стиннаго.
Иису́се, к вели́кому всенаро́дному покая́нию на́с призови́; Иису́се, состра́ждущий на́м, го́ре наро́дное, гла́д, ну́жду, тьму́ духо́вную разве́й невече́рним све́том Твои́м.
Иису́се, призови́ и мя́ убо́гаго, не дерза́ющаго приступи́ти к Черто́гу Твоему́; Иису́се, просвети́ одея́ние души́ моея́, да вни́ду в о́нь.
Иису́се, Го́споди Гряду́щий, вни́ди в до́м души́ моея́.
Конда́к 10.
Ты́ ре́кл еси́, Го́споди: Побежда́ющему да́м се́сти со Мно́ю на престо́ле Мое́м, я́ко претерпе́вши до конца́, то́й спасе́н бу́дет. Прие́мля се́й глаго́л Тво́й в се́рдце мое́, в ра́дости духо́вной благода́рственно вопию́ Ти́: Аллилу́иа.
И́кос 10.
Ви́де апо́стол Иоа́нн наро́д мно́г, его́же исчести́ никто́ не мо́жет от вся́каго язы́ка, стоя́щ пред Престо́лом Бо́жиим, и люде́й облече́нных в ри́зы белы́ и слы́ша гла́с глаго́лющий: си́и су́ть, и́же приидо́ша от ско́рби вели́кия и испра́виша ри́зы своя́ и убели́ша и́х в кро́ви А́гнца.
Иису́се, Весе́лие И́стинное, возвесели́ ду́шу мою́; Иису́се, сподо́би и мя́ послужи́ти Тебе́, я́коже си́и искупле́ннии от земли́ слу́жат Ти́ де́нь и но́щь в Це́ркви Твое́й.
Иису́се, Тво́рче мо́й, сотвори́, да бу́дет ми́ ве́сь ми́р хра́мом Твои́м; Иису́се, научи́ мя́, да бу́дет се́рдце мое́ престо́лом Тебе́, и та́инство жи́зни Твоея́ да соверша́ется в не́м.
Иису́се Спаси́телю, приими́ от мене́ немощно́е славосло́вие сие́, я́ко «же́ртву хвале́ния»; Иису́се, во свято́м причаще́нии Те́ла и Кро́ви Твоея́ освяти́ мя́.
Иису́се, Ра́досте моя́, да́руй ми́, да в се́рдце мое́м благода́рственно поклоня́юся Тебе́.
Иису́се, Го́споди Гряду́щий, вни́ди в до́м души́ моея́.
Конда́к 11.
В не́мощи челове́чей си́ла Бо́жия соверша́ется: а́з не́мощен и ду́хом и те́лом; но укрепи́ мя́ и обо́дри мя́ благода́тию Свое́ю, да позна́в ми́лость Твою́, ра́достно воспою́: Аллилу́иа.
И́кос 11.
Ре́кл еси́ ученико́м Свои́м и все́м ве́рующим: в ми́ре ско́рбни бу́дете, но ско́рбь ва́ша в ра́дость бу́дет. Ве́м бо, Го́споди, Тобо́ю рече́нное и вопию́ Ти́:
Иису́се, ми́р Тво́й да́руй душе́ мое́й. Иису́се, помози́ ми́, да оста́влю все́ ра́ди Тебе́.
Иису́се, да́руй ми́ у́зкими врата́ми приити́ к Тебе́; Иису́се, Све́те Ти́хий, угото́ви се́рдце мое́ на ве́черю Твою́.
Иису́се, да́ждь ми́ все́ дни́ жи́зни моея́ послужи́ти Тебе́; Иису́се Благи́й, научи́ мя́ кро́тости и смире́нию, научи́ мя́ разуме́ти ну́жду бли́жняго.
Иису́се, не хоте́нию своему́, но благо́й во́ле Твое́й да после́дую; Иису́се, ско́рби ми́ра сего́ во спасе́ние да послу́жат ми́.
Иису́се, Го́споди Гряду́щий, вни́ди в до́м души́ моея́.
Конда́к 12.
Умиле́нным се́рдцем и ду́хом ра́достию о Тебе́ испо́лненным предстою́ пред ли́ком Твои́м, поклоня́юся милосе́рдию Твоему́ и вопию́: Аллилу́иа.
И́кос 12.
К го́рнице Сио́нской на та́йной ве́чери глаго́лал еси́ ученико́м Свои́м: ми́р оставля́ю ва́м, ми́р Мо́й даю́ ва́м, не я́коже ми́р дае́т, А́з даю́ ва́м. Да не смуща́ется се́рдце ва́ше, ни устраша́ет. Слы́шав сие́ рече́нное Тобо́ю, вопию́ Ти́:
Иису́се, укрепи́ мя́ на бра́нь не с кро́вию и пло́тию, но с нача́лами и с миродержи́телями тьмы́ ве́ка сего́; Иису́се, научи́ мя́ прия́ти вся́ ору́жия Бо́жия, да возмогу́ проти́витися в де́нь лю́т.
Иису́се, препоя́ши чре́сла моя́ и́стиною и облецы́ мя́ в броню́ пра́вды; Иису́се, обу́й но́зи моя́ во угото́вание благовествова́ния ми́ра.
Иису́се, научи́ мя́ восприя́ти щи́т ве́ры и шле́м спасе́ния; Иису́се, помози́ ми́ моли́тися моле́нием на вся́ко вре́мя ду́хом.
Иису́се, умудри́ мя́ пребыва́ти бдя́щим во вся́ком терпе́нии; Иису́се, помози́ ми́ не угаси́ти свети́льника души́ моея́.
Иису́се, да́руй ми́ со свети́льником возжже́нным вни́ти в сре́тение Твое́.
Иису́се, Го́споди Гряду́щий, вни́ди в до́м души́ моея́.
Конда́к 13.
О, Иису́се Христе́, Све́те Ти́хий, осия́й мя́ И́стиною Твое́ю, да услы́шав зо́в Тво́й, со свети́льником горя́щим иду́ во сре́тение Тебе́, гряду́щему вни́ти в до́м души́ моея́, поя́ Ти́: Аллилу́иа.
И́кос 1.
А́нгелов ли́ки со стра́хом и тре́петом взира́ли на Тя́, Го́споди, егда́ во́лею на́с ра́ди распя́лся Еси́; мы́ же гре́шнии что́ возмо́жем глаго́лати? Но дерза́ем по сло́ву Твоему́ моли́тися Тебе́:
Иису́се, ра́досте на́ша, яви́ на́м ми́лость Твою́; Иису́се, любы́ неизрече́нная, да́руй на́м возлюби́ти Тя́ все́м се́рдцем и все́м помышле́нием.
Иису́се, жела́ние на́ше, не отри́ни на́с, и́щущих Тя́; Иису́се, Све́те Ти́хий, осия́й на́с све́том благода́ти Твоея́.
Иису́се, наде́ждо на́ша, не оста́ви на́с заблужда́ющихся; Иису́се, вопроша́ющий на́с: что́ твори́те вы́ на земли́? – да́руй на́м твори́ти Твоя́ повеле́ния.
Иису́се, не возбрани́вый име́ти о́браз Тво́й, да́руй на́м вы́ну име́ти о́браз Тя́ Гряду́щаго; Иису́се, входя́щий в до́мы люде́й Твои́х, вни́ди в мя́ и преобрази́ мя всего́.
Иису́се, да́руй ми́ разуме́ти, что́ е́сть блага́я во́ля Твоя́; Иису́се многоми́лостивый, не отступи́ от мене́ за нераде́ние мое́.
Иису́се, Го́споди Гряду́щий, вни́ди в до́м души́ моея́.
Конда́к 1.
Возбра́нный Воево́до и Го́споди, ми́ра Созда́телю, с ве́рою и любо́вию припа́дающе к Тебе́ Гряду́щему, вопию́ Ти́:
Иису́се, Го́споди Гряду́щий, вни́ди в до́м души́ моея́.
Моли́тва.
Го́споди Иису́се Христе́, Сы́не Бо́жий,– покланя́емся О́бразу Твоему́, любви́ Твое́й и Про́мыслу Твоему́ о на́с, гре́шных и недосто́йных рабе́х Твои́х; услы́ши моли́тву на́шу, с ве́рою Тебе́ приноси́мую, прииди́ к на́м, благода́тию Ду́ха Твоего́ Свята́го научи́, умудри́ пребыва́ти в Тебе́, я́ко же Ты́ пребыва́еши в на́с; научи́ на́с, Благи́й, моли́тве, добру́ и терпе́нию; да́руй на́м ду́х сокруше́ния, ду́х покая́ния; отыми́ от на́с ду́х пра́здности, ду́х уны́ния и неве́дения. О, Иису́се Христе́, Многоми́лостивый, Гряду́щий к на́м, поми́луй на́с и спаси́, моли́твами Пречи́стыя Твоея́ Ма́тери, а́нгелов и апо́столов и все́х святы́х Твои́х, от ве́ка Тебе́ угоди́вших. Ами́нь.