Пе́снь 1.

Ирмо́с: Отве́рзу уста́ моя́ и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Да пое́т Тебе́, Влады́чице, движа́ свире́ль духо́вную, Дави́д, пра́отец Тво́й: послу́шай, Дщи́, ра́дованнаго гла́са от а́нгела, ра́дость бо возвеща́ет Тебе́ неизглаго́ланную.

А́нгел: Вопию́ Тебе́, веселя́ся, приклони́ у́хо Твое́, и вонми́ ми́, Бо́жие возвеща́ющу безсе́менное зача́тие, обрела́ бо еси́ благода́ть пред Бо́гом, ея́же никогда́же обре́те друга́я, Всечи́стая.

Богоро́дичен: Да разуме́ю, а́нгеле, твои́х глаго́л си́лу, ка́ко бу́дет, е́же ре́кл еси́, глаго́ли я́вственнейше? Ка́ко зачну́, Де́ва су́щи, Отрокови́ца? ка́ко же и Ма́ти бу́ду Зижди́теля Моего́?

А́нгел: Ле́стно мя́ веща́ти помышля́еши, я́ко мню́, и ра́дуюся, зря́ Твое́ утвержде́ние. Дерза́й, Влады́чице, Бо́гу бо хотя́щу, удо́бь сконча́ются и пресла́вная.

Пе́снь 3.

Ирмо́с: Твоя́ песносло́вцы, Богоро́дице, живы́й и незави́стный исто́чниче, ли́к себе́ совоку́пльшия, духо́вно утверди́, в боже́ственней Твое́й сла́ве, венце́в сла́вы сподо́би.

Богоро́дичен: Оскуде́ кня́зь от Иу́ды, вре́мя наста́ про́чее, в не́же яви́тся язы́ков наде́жда, Христо́с; ты́ же, ка́ко Сего́ рожду́, Де́ва су́щи, скажи́?

А́нгел: И́щеши от мене́ уве́дети, Де́во, о́браз зача́тия Твоего́, но то́й несказа́нен е́сть: Ду́х же Святы́й, зижди́тельною си́лою осени́в Тя́, соверши́т.

Богоро́дичен: Моя́ прама́ти, прие́мши ра́зум змии́н, пи́щи Боже́ственныя изгна́на бы́сть, те́мже и А́з бою́ся целова́ния стра́ннаго твоего́, стыдя́щися поползнове́ния.

А́нгел: Бо́жий предста́тель, по́слан е́смь боже́ственный пове́дати Тебе́ сове́т. Что́ мене́ бои́шися, Всенепоро́чная, па́че Тебе́ боя́щагося? Что́ благогове́еши мне́, Влады́чице, Тебе́ че́стно благогове́ющему?

Седа́лен, гла́с 8.

Сло́во Бо́жие на зе́млю ны́не сни́де, а́нгел предста́, вопия́ Де́ве: ра́дуйся, Благослове́нная, Я́же печа́тию еди́на сохра́ншися, во утро́бе прие́мши Предве́чнаго Сло́ва и Го́спода, да от пре́лести спасе́т, я́ко Бо́г, ро́д челове́ческий.

Сла́ва, и ны́не: По́слан бы́сть с небесе́ архистрати́г Гаврии́л от Бо́га, ско́ро предста́ ко одушевле́нному гра́ду, глаго́ля к Не́й я́вственно: Зижди́теля прии́меши, Де́во, во утро́бе и роди́ши Сего́ непрело́жне с пло́тию. Те́мже по́слан е́смь возвести́ти Тебе́ стра́нное Рождество́, Чи́стая, и стою́, зовя́ Тебе́: ра́дуйся, Неве́сто неневе́стная.

Пе́снь 4.

Ирмо́с: Седя́й в сла́ве на Престо́ле Божества́, во о́блаце ле́гце прии́де Иису́с Пребоже́ственный нетле́нною дла́нию и спасе́ зову́щия: сла́ва, Христе́, си́ле Твое́й.

Богоро́дичен: Свяще́нную не́кую Де́ву ражда́ющую слы́шах проро́ка, дре́вле Емману́ила проре́кша; хощу́ же разуме́ти, ка́ко Божества́ растворе́ние, естество́ челове́ческое претерпи́т?

А́нгел: Яви́ла е́сть купина́, неопа́льна пребы́вши, прие́мши пла́мень, обра́дованная Всепе́тая, на Тебе́ та́инства пресла́вное: по рождестве́ бо пребу́деши Чи́стая Присноде́ва.

Богоро́дичен: Освеща́емь сия́нием Бо́га Вседержи́теля, и́стины пропове́дниче, глаго́ли, Гаврии́ле, и́стиннейшая: ка́ко, нетле́нне бы́вши чистоте́ Мое́й, Сло́ва рожду́, с пло́тию Безпло́тнаго?

А́нгел: Со стра́хом Тебе́, я́ко ра́б Госпоже́, предстою́, с боя́знию, Отрокови́це, ны́не смотри́ти стыжду́ся Тебе́, я́ко бо до́ждь на руно́, сни́дет на Тя́ Сло́во О́тчее, я́ко благоволи́.

Пе́снь 5.

Ирмо́с: Ужасо́шася вся́ческая о Боже́ственней сла́ве Твое́й, Ты́ бо, Неискусобра́чная Де́во, име́ла еси́ во утро́бе над все́ми Бо́га и родила́ еси́ Безле́тнаго Сы́на, все́м воспева́ющим Тя́ ми́р подава́ющая.

Богоро́дичен: Разуме́ти не могу́ Твои́х слове́с изве́стия: чудеса́ бо бы́ша мно́жицею, Боже́ственною си́лою чудоде́йствуема, зна́мения и о́бразы зако́ннии, роди́ же де́ва неискусому́жне никогда́же.

А́нгел: Диви́т, Всенепоро́чная, и стра́нно бо чу́до Твое́, еди́на бо Ты́ все́х Царя́ прии́меши во утро́бе, воплоща́ема, и Тя́ прообразу́ют проро́ческая рече́ния, и гада́ния, и зако́ннии о́бразы.

Богоро́дичен: Все́ми Невмести́мый и все́ми Неви́димый, ка́ко Се́й мо́жет во чре́во деви́че всели́тися, е́же Са́м созда́? Ка́ко же и зачну́ Бо́га Сло́ва, собезнача́льна Отцу́ и Ду́ху?

А́нгел: К Твоему́ пра́отцу Дави́ду обеща́ся посади́ти от плода́ Твоего́ чре́ва на престо́ле ца́рства его́, Иа́ковлю Тя́ добро́ту, еди́ну избра́ в слове́сное селе́ние.

Пе́снь 6.

Ирмо́с: Возопи́, прообразу́я погребе́ние тридне́вное, проро́к Ио́на, в ки́те моля́ся: от тли́ изба́ви мя́, Иису́се, Царю́ си́л.

Богоро́дичен: Глаго́л твои́х, Гаврии́ле, гла́с ра́дованен прие́мши, весе́лия Боже́ственнаго испо́лнихся: ра́дость бо пове́даеши и весе́лие возвеща́еши безконе́чное.

А́нгел: Тебе́ даде́ся ра́дость, Богома́ти Боже́ственная, Тебе́, е́же ра́дуйся, вся́ тва́рь вопие́т, Богоневе́сто: Ты́ бо еди́на Ма́ти Сы́на Бо́жия пронарече́ся, Чи́стая.

Богоро́дичен: Е́вы Мно́ю ны́не да упраздни́тся осужде́ние, да возда́стся Мно́ю до́лг дне́сь, Мно́ю заи́мствование дре́внее да да́стся преиспо́лнено.

А́нгел: Обеща́ся Бо́г Авраа́му пра́отцу благослови́тися в се́мени его́ язы́ком, Чи́стая, Тобо́ю же коне́ц обеща́ние прие́млет дне́сь.

Конда́к, гла́с 8:

Взбра́нной Воево́де победи́тельная, я́ко изба́вльшеся от злы́х, благода́рственная воспису́ем Ти́, раби́ Твои́, Богоро́дице, но, я́ко иму́щая держа́ву непобеди́мую, от вся́ких на́с бе́д свободи́, да зове́м Ти́: ра́дуйся, Неве́сто неневе́стная.

И́кос:

А́нгел предста́тель с небесе́ по́слан бы́сть рещи́ Богоро́дице: ра́дуйся! и, со безпло́тным гла́сом, воплоща́ема Тя́ зря́, Го́споди, ужаса́шеся и стоя́ше, зовы́й к Не́й такова́я: Ра́дуйся, Е́юже ра́дость возсия́ет; ра́дуйся, Е́юже кля́тва исче́знет. Ра́дуйся, па́дшаго Ада́ма воззва́ние; ра́дуйся, сле́з Е́виных избавле́ние. Ра́дуйся, высото́, неудобовосходи́мая челове́ческими по́мыслы; ра́дуйся, глубино́, неудобозри́мая и а́нгельскима очи́ма. Ра́дуйся, я́ко еси́ Царе́во седа́лище; ра́дуйся, я́ко но́сиши Нося́щаго вся́. Ра́дуйся, звездо́, явля́ющая Со́лнце; ра́дуйся, утро́бо Боже́ственнаго воплоще́ния. Ра́дуйся, Е́юже обновля́ется тва́рь; ра́дуйся, Е́юже покланя́емся Творцу́. Ра́дуйся, Неве́сто неневе́стная.

Пе́снь 7.

Ирмо́с: Не послужи́ша тва́ри богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

Богоро́дичен: Све́т невеще́ственный пове́дая, в веще́ственне телеси́ совокупля́емь за милосе́рдие мно́гое, све́тлое благове́щение, Боже́ственная пропове́дания, ны́не взыва́еши Ми́: благослове́н, Всечи́стая, Пло́д Твоего́ чре́ва.

А́нгел: Ра́дуйся, Влады́чице Де́во, ра́дуйся Пречи́стая, ра́дуйся, прия́телище Бо́жие, ра́дуйся све́щниче Све́та, Ада́мово воззва́ние, Е́вы избавле́ние, горо́ свята́я, прея́вственное свяще́ние и черто́г безсме́ртия.

Богоро́дичен: Ду́шу очи́сти, те́ло освяти́, це́рковь сотвори́ Мя вмести́тельну Бо́га, ски́нию богоукра́шену, одушевле́н хра́м наи́тием Пресвята́го Ду́ха и Жи́зни чи́стую Ма́терь.

А́нгел: Я́ко многосве́тлую свещу́, и богоде́ланен черто́г, ви́жу Тя́ ны́не, я́ко зла́т киво́т, зако́на Пода́теля приими́, Богоневе́сто, благоизво́лившаго челове́ческое изба́вити Тобо́ю тле́нное существо́.

Пе́снь 8.

Ирмо́с: Слы́ши, Отрокови́це, Де́во чи́стая, да рече́т у́бо Гаврии́л, сове́т Вы́шняго дре́вний и́стинный: бу́ди к прия́тию гото́ва Бо́жию, Тобо́ю бо Невмести́мый с челове́ки поживе́. Те́м и, ра́дуяся, вопию́: благослови́те, вся́ дела́ Госпо́дня, Го́спода.

Богоро́дичен: У́м вся́к побежда́ется земны́х, — отвеща́ Деви́ца, — и́щущи, я́же Мне́ веща́еши, пресла́вная: слы́шах твоя́ словеса́, но бою́ся, ужаса́ющися, да не ле́стию Мя́, я́ко Е́ву, дале́че по́слеши от Бо́га. Но оба́че се́ вопию́: благослови́те, вся́ дела́ Госпо́дня, Го́спода и превозноси́те Его́ во ве́ки.

А́нгел: Се́ Тебе́ недоуме́нное разреши́ся, — глаго́лет к си́м Гаврии́л, — до́бре бо рекла́ еси́, ве́щь неудобопости́жна. Словесе́м Твои́х усте́н повину́ющися про́чее, не сумни́ся, я́ко ле́сти, я́коже ве́щи, ве́руй. А́з бо, ра́дуяся, вопию́: благослови́те, вся́ дела́ Госпо́дня, Го́спода и превозноси́те Его́ во ве́ки.

Богоро́дичен: Зако́н се́й от Бо́га е́сть челове́ком, — Непоро́чная а́бие глаго́лет, — от о́бщия любве́ рождество́ происхо́дит. Не ве́м супру́жника сла́сти всеконе́чно, ка́ко у́бо глаго́леши, я́ко рожду́? Бою́ся, еда́ ле́сть глаго́леши? Но оба́че се́ вопию́: благослови́те, вся́ дела́ Госпо́дня, Го́спода и превозноси́те Его́ во ве́ки.

А́нгел: Глаго́лы, я́же мне́ веща́еши, Чи́стая, — а́нгел па́ки глаго́лет, — обы́чая е́сть рождества́ челове́ков сме́ртных; и́стинно Бо́га Тебе́ обещава́ю, па́че сло́ва же и смы́сла воплоща́ема, я́ко ве́сть, из Тебе́. Те́мже и, ра́дуяся, вопию́: благослови́те, вся́ дела́ Госпо́дня, Го́спода и превозноси́те Его́ во ве́ки.

Богоро́дичен: Явля́ешися Мне́ и́стины веща́тель, — рече́ Де́ва, — ра́дости бо о́бщия прише́л еси́ благове́стник. Ду́шу у́бо очи́стих с те́лом, и по глаго́лу твоему́ бу́ди Мне́, да всели́тся Бо́г в Мя́, к Нему́же вопию́ с тобо́ю: благослови́те, вся́ дела́ Госпо́дня, Го́спода и превозноси́те Его́ во ве́ки.

Пе́снь 9.

Ирмо́с: Я́ко одушевле́нному Бо́жию киво́ту, да ника́коже ко́снется рука́ скве́рных. Устне́ же ве́рных, Богоро́дице, немо́лчно, гла́с а́нгела воспева́юще, с ра́достию да вопию́т: ра́дуйся, Благода́тная, Госпо́дь с Тобо́ю.

Па́че смы́сла заче́нши Бо́га, естества́ обы́чая утаи́ся, Отрокови́це! Ты́ бо в Рождестве́ ма́терскаго избежа́ла еси́ тле́ннаго естества́ и превы́шши су́щи. Те́мже досто́йно слы́шиши: ра́дуйся, Благода́тная, Госпо́дь с Тобо́ю.

Ка́ко то́чиши млеко́, Де́во Чи́стая, не мо́жет изрещи́ язы́к зе́млен; стра́нну бо естества́ показу́еши ве́щь, зако́ннаго рождества́ уста́в прехо́диши. Те́мже досто́йно слы́шиши: ра́дуйся, Благода́тная, Госпо́дь с Тобо́ю.

Та́йно во свяще́нных писа́ниих глаго́лася о Тебе́, Ма́ти Вы́шняго, ле́ствицу бо дре́вле Иа́ков Тя́ образу́ющую, ви́дев, рече́: степе́нь Бо́жия сия́. Те́мже досто́йно слы́шиши: ра́дуйся, Благода́тная, Госпо́дь с Тобо́ю.

Чу́дное священноявле́нному Моисе́ю купина́ и о́гнь показа́ чу́до, ища́й же конца́ в прехожде́нии време́н, во Отрокови́це чи́стей, рече́, узрю́. Е́йже, я́ко Богоро́дице, да рече́тся: ра́дуйся, Благода́тная, Госпо́дь с Тобо́ю.

Дании́л Тя́ го́ру нарече́ мы́сленную, роди́тельницу же Бо́жию Иса́ия, ви́дит же я́ко руно́, Гедео́н, Дави́д же свяще́ние глаго́лет, две́рь же Тя́ и́н. Гаврии́л же Тебе́ взыва́ет: ра́дуйся, Благода́тная, Госпо́дь с Тобо́ю.

Свети́лен.

А́нгельских си́л архистрати́г по́слан бы́сть от Бо́га Вседержи́теля к Чи́стей и Де́ве благовести́ти стра́нное и неизрече́нное чу́до: зане́ Бо́г, я́ко Челове́к, из Нея́ младоде́йствуется без се́мене, назида́яй ве́сь челове́ческий ро́д. Лю́дие, благовести́те обновле́ние ми́ра.

Сла́ва, и ны́не: Е́же от ве́ка дне́сь познава́ется та́инство Бо́жие: Бо́г Сло́во Сы́н Де́вы Мари́и за милосе́рдие быва́ет, и ра́дость благове́щения Гаврии́л провещава́ет; с ни́мже возопие́м Е́й: ра́дуйся, Ма́ти Госпо́дня.