Канон на Обрезание Господне

Припев: Слáва Тебé, Гóсподи, Слáва Тебé.

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 14 января (01 января ст. ст.)

Глас 2.

Пе́снь 1.

Ирмо́с: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися.

Осмери́ца дне́й, нося́щая о́браз бу́дущаго, Твое́ю, Христе́, просвеща́ется и освяща́ется во́льною нището́ю, в се́й бо зако́нно обре́зался еси́ пло́тию.

Обре́зание прие́млет осмодне́вное Христо́с Своего́ рождества́, и сего́ дне́сь се́нь спря́тает, све́т возсиява́я но́выя благода́ти.

Богоро́дичен: Кто́ изрещи́ Твое́ по досто́инству возмо́жет, е́же па́че сло́ва зача́тие? Бо́га бо родила́ еси́ пло́тию, Всечи́стая, на́м я́вльшася Спа́са и Го́спода.

Пе́снь 3.

Ирмо́с: Утверди́ на́с в Тебе́, Го́споди, Дре́вом умерщвле́й гре́х, и стра́х Тво́й всади́ в сердца́ на́с, пою́щих Тя́.

Сло́во вопло́щшееся Пресу́щественное в преста́тие зако́на обре́зася, нача́ток же Боже́ственныя благода́ти и жи́зни нетле́нныя на́м подаде́.

Зако́на исполни́тель, не я́ко сопроти́вен Бо́гу сы́й, Христо́с воплоти́выйся показа́ся и сподо́бися во́лею обре́затися осмодне́вен.

Богоро́дичен: Безсе́менно во чре́ве Бо́га зачала́ еси́ и ражда́еши несказа́нно воплоще́нна, на Него́же зре́ти не сме́ют, Чи́стая, Небе́сных си́лы, Присноде́во.

Седа́лен, гла́с 4.

Я́ко Сы́й бе́здна человеколю́бия, оде́ялся еси́, Влады́ко, в зра́к ра́бий и пло́тию обре́зался еси́, да́руя все́м челове́ком вели́кую Твою́ ми́лость.

Пе́снь 4.

Ирмо́с: Услы́шах, Го́споди, слу́х Твоего́ смотре́ния, и просла́вих Тя́, Еди́не Человеколю́бче.

Обре́зание преста́, отне́леже Христо́с во́лею обре́зася, язы́к мно́жество спаса́я благода́тию.

Бу́дущаго непреста́нную осма́го ве́ка жи́знь изобража́ет, в ню́же Влады́ка обре́зася пло́тию.

Богоро́дичен: Мо́лим Тя́, Чи́стая, я́же Бо́га безсе́менно заче́нши, при́сно моли́ти за рабы́ Твоя́.

Пе́снь 5.

Ирмо́с: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с, ра́зве бо Тебе́, ино́го бо́га не зна́ем.

Ты́, от Де́вы Ма́тере несказа́нно проше́д, Го́споди, и в челове́ческий ны́не сподо́бился еси́ оде́ятися о́браз, я́ко Младе́нец зако́нно зако́н испо́лнил еси́.

Но́щи уподо́бися, я́ко се́нь зако́нную лю́бящи Изра́иля, Ро́ждшая, из Нея́же облиста́вший Све́т ми́ра, Христо́с, яви́ся.

Богоро́дичен: Тебе́, ро́ждшей Христа́, все́х Соде́теля, зове́м: ра́дуйся, Чи́стая, ра́дуйся, Све́т возсия́вшая на́м, ра́дуйся, вмести́вшая Бо́га Невмести́маго.

Пе́снь 6.

Ирмо́с: Бе́здна мя́ мно́га грехо́вная окружа́ет, и вопию́ Ти, проро́ка подража́яй: от тли́ мя, Го́споди, возведи́.

Прия́т коне́ц зако́н, отне́леже Христо́с, младе́нствовав, исполни́тель зако́на Сы́й, обре́зание восприя́т и разреши́ зако́нную кля́тву.

Суббо́тство, обре́зание же шата́ния евре́йскаго я́вльшагося Христа́ манове́нием преста́, и возсия́ благода́ти весна́.

Богоро́дичен: Спаси́ от бе́д рабы́ Твоя́, Богоро́дице, я́ко вси́ по Бо́зе к Тебе́ прибега́ем, я́ко к Неруши́мей Стене́ и Предста́тельству.

Конда́к, гла́с 3.

Все́х Госпо́дь обре́зание терпи́т и челове́ческая прегреше́ния, я́ко Бла́г, обре́зует, дае́т спасе́ние дне́сь ми́ру. Ра́дуется же в Вы́шних и Созда́телев иера́рх, и светоно́сный, Боже́ственный таи́нник Христо́в Васи́лий.

Пе́снь 7.

Ирмо́с: О́бразу злато́му, на по́ле Деи́ре служи́му, трие́ Твои́ о́троцы небрего́ша. Безбо́жнаго веле́ния, посреде́ же огня́ вве́ржени, ороша́еми, поя́ху: благослове́н еси́, Бо́же оте́ц на́ших.

Све́тло и пресве́тло Рождество́ Христо́во, и бу́дущаго обновле́ния подписа́вшее та́инство дне́сь, я́ко зако́нным чи́ном Спа́с обре́зуется, не я́ко Бо́г, но я́ко Челове́к и зако́на исполне́ние.

Зако́н исполня́я, зако́на Творе́ц, пло́тию дне́сь во́лею обре́зуется, обре́зание содева́я грехо́вныя зимы́ и зва́ти да́руя: благослове́н еси́, Бо́же оте́ц на́ших.

Богоро́дичен: Тя́ купину́ Моисе́й в горе́ Сина́йстей огнепали́му, Чи́стая, прови́дяше, прие́мшую неопа́льно нестерпи́мую зарю́ Неизглаго́ланнаго Существа́, соедини́вшагося дебельству́ пло́ти еди́ныя в Не́м святы́х Ипоста́сей.

Пе́снь 8.

Ирмо́с: Неизрече́нною му́дростию соста́вльшаго вся́ческая Бо́га Сло́ва и от не су́щих во е́же бы́ти приве́дшаго, благослови́те, дела́, я́ко Го́спода, и превозноси́те во вся́ ве́ки.

Во осмы́й де́нь обре́зуется я́ко Младе́нец Влады́ка, Иису́са же прие́млет именова́ние, я́ко ми́ра е́сть Спа́с и Госпо́дь,

Ко Христо́ву Рождеству́ досто́йно осмы́й спряже́ся, святи́теля всесла́вная па́мять, ю́же почита́юще ве́рою, пое́м Го́спода и превозно́сим во ве́ки.

Богоро́дичен: Из Отца́, проше́дшаго пре́жде ве́к, и безле́тнаго Бо́га Сло́ва и в после́дняя возсия́вша из Де́вы, благослови́те, дела́ Госпо́дня, Го́спода.

Пе́снь 9.

Ирмо́с: Я́же пре́жде со́лнца свети́льника Бо́га возсия́вшаго, пло́тски к на́м прише́дшаго из боку́ Деви́чу, неизрече́нно воплоти́вшая, Благослове́нная, Всечи́стая, Тя́, Богоро́дице, велича́ем.

Припе́в: Велича́й, душе́ моя́, во осмы́й де́нь обре́зание прие́млюща.

Дне́сь Влады́ка обре́зуется пло́тию я́ко Младе́нец, исполня́я зако́н.

Припе́в: Велича́й, душе́ моя́, во осмы́й де́нь обре́зание прие́млюща.

Дне́сь Влады́ка пло́тию обре́зася, Иису́с нарече́ся.

Припе́в: Велича́й, душе́ моя́, во осмы́й де́нь обре́зание прие́млюща.

Преше́д преде́лы Христо́с челове́ческаго всего́ естества́, преесте́ственно из Де́вы ражда́ется и, писа́ние зако́нное я́коже повелева́ет, пло́тию обре́зается, и испо́лнитель зако́на явля́ется.

Припе́в: Велича́й, душе́ моя́, во осмы́й де́нь обре́зание прие́млюща.

Прииди́те, Влады́ки сла́вная Христо́ва именова́ния во святы́ни торжеству́им, Иису́с бо Боголе́пно нарече́ся дне́сь. С си́ми же и па́мять святи́теля велича́ем.

Вместо Сла́ва: Велича́й, душе́ моя́, украси́вшаго Христо́ву Це́рковь.

Превы́спренняя вода́ми покрыва́яй Еди́н Госпо́дь, возстязу́яй мо́ре, бе́здны же изсуша́яй, из Тебе́, Чи́стая, пло́ть восприе́мый, от Вифлее́ма тщи́тся ко Иорда́ну крести́тися пло́тию.

Вместо И ны́не: Велича́й, душе́ моя́, Честне́йшую Небе́сных во́инств, Де́ву Пречи́стую Богоро́дицу.

Недоуме́ет вся́к язы́к благохвали́ти по достоя́нию, изумева́ет же у́м и преми́рный пе́ти Тя́, Богоро́дице, оба́че Блага́я су́щи, ве́ру приими́, и́бо любо́вь ве́си Боже́ственную на́шу: Ты́ бо христиа́н еси́ Предста́тельница, Тя́ велича́ем.

Ирмо́с: О, па́че ума́ Рождества́ Твоего́ чуде́с! Неве́сто Всечи́стая, Ма́ти Благослове́нная, Е́юже получи́вше всесоверше́нное спасе́ние, досто́йно хва́лим я́ко Благоде́теля, да́р нося́ще пе́снь благодаре́ния.

Свети́лен.

Любому́дрия жела́нием обре́зал еси́, о́тче, души́ твоея́ покрыва́ло, и ми́ру показа́лся еси́, я́ко со́лнце, чудесы́, и ве́рных озари́л еси́ мы́сли, Богому́дре, Тро́ицы таи́нниче, о Васи́лие му́дре, и служи́телю Богоро́дицы.

Сла́ва, и ны́не: Пло́тию обре́зуется зако́н испо́лнивый, я́ко Младе́нец осмодне́вен, веко́в Зижди́тель, и пелена́ми повива́ется, я́ко Челове́к, и млеко́м пита́ется, И́же вся́ безме́рною кре́постию я́ко Бо́г содержа́й и манове́нием возводя́й.

Пѣ́снь а҃.

І҆рмо́съ: Грѧди́те лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре и҆ наста́вльшемꙋ лю́ди, ꙗ҆̀же и҆зведѐ и҆з̾ рабо́ты є҆гѵ́петскїѧ, ꙗ҆́кѡ просла́висѧ.

Ѻ҆смери́ца дне́й, носѧ́щаѧ ѻ҆́бразъ бꙋ́дꙋщагѡ, твое́ю, хрⷭ҇тѐ, просвѣща́етсѧ и҆ ѡ҆сщ҃а́етсѧ во́льною нището́ю: въ се́й бо зако́ннѡ ѡ҆брѣ́залсѧ є҆сѝ пло́тїю.

Ѡ҆брѣ́занїе прїе́млетъ ѻ҆смодне́вное хрⷭ҇то́съ своегѡ̀ ржⷭ҇тва̀, и҆ сегѡ̀ дне́сь сѣ́нь спрѧ́таетъ, свѣ́тъ возсїѧва́ѧ но́выѧ бл҃года́ти.

Бг҃оро́диченъ: Кто̀ и҆зрещѝ твоѐ по досто́инствꙋ возмо́жетъ, є҆́же па́че сло́ва, зача́тїе; бг҃а бо родила̀ є҆сѝ пло́тїю, всечи́стаѧ, на́мъ ꙗ҆́вльшасѧ сп҃са и҆ гдⷭ҇а.

Пѣ́снь г҃.

І҆рмо́съ: Оу҆твердѝ на́съ въ тебѣ̀, гдⷭ҇и, дре́вомъ ᲂу҆мерщвле́й грѣ́хъ, и҆ стра́хъ тво́й всадѝ въ сердца̀ на́съ, пою́щихъ тѧ̀.

Сло́во вопло́щшеесѧ пресꙋ́щественное, въ преста́тїе зако́на ѡ҆брѣ́засѧ: нача́токъ же бжⷭ҇твенныѧ бл҃года́ти, и҆ жи́зни нетлѣ́нныѧ на́мъ подадѐ.

Зако́на и҆сполни́тель, не ꙗ҆́кѡ сопроти́венъ бг҃ꙋ сы́й хрⷭ҇то́съ воплоти́выйсѧ показа́сѧ, и҆ сподо́бисѧ во́лею ѡ҆брѣ́затисѧ ѻ҆смодне́венъ.

Бг҃оро́диченъ: Безсѣ́меннѡ во чре́вѣ бг҃а зачала̀ є҆сѝ, и҆ ражда́еши несказа́ннѡ воплоще́нна: на него́же зрѣ́ти не смѣ́ютъ, чⷭ҇таѧ, нбⷭ҇ныхъ си̑лы, приснодв҃о.

Сѣда́ленъ, гла́съ д҃.

Ꙗ҆́кѡ сы́й бе́здна чл҃вѣколю́бїѧ, ѡ҆дѣ́ѧлсѧ є҆сѝ, влⷣко, въ зра́къ ра́бїй, и҆ пло́тїю ѡ҆брѣ́залсѧ є҆сѝ, да́рꙋѧ всѣ̑мъ человѣ́кѡмъ вели́кꙋю твою̀ ми́лость.

Пѣ́снь д҃.

І҆рмо́съ: Оу҆слы́шахъ, гдⷭ҇и, слꙋ́хъ твоегѡ̀ смотре́нїѧ, и҆ просла́вихъ тѧ̀, є҆ди́не человѣколю́бче.

Ѡ҆брѣ́занїе преста̀, ѿне́лѣже хрⷭ҇то́съ во́лею ѡ҆брѣ́засѧ, ꙗ҆зы̑къ мно́жество спаса́ѧ бл҃года́тїю.

Бꙋ́дꙋщагѡ непреста́ннꙋю ѻ҆сма́гѡ вѣ́ка жи́знь и҆з̾ѡбража́етъ, въ ню́же влⷣка ѡ҆брѣ́засѧ пло́тїю.

Бг҃оро́диченъ: Мо́лимъ тѧ̀, чи́стаѧ, ꙗ҆́же бг҃а безсѣ́меннѡ заче́нши, при́снѡ моли́ти за рабы̑ твоѧ̑.

Пѣ́снь є҃.

І҆рмо́съ: Свѣ́та пода́телю и҆ вѣкѡ́въ тво́рче, гдⷭ҇и, во свѣ́тѣ твои́хъ повелѣ́нїй наста́ви на́съ: ра́звѣ бо тебє̀, и҆но́гѡ бо́га не зна́емъ.

Ты̀ ѿ дв҃ы мт҃ре несказа́ннѡ проше́дъ, гдⷭ҇и, и҆ въ человѣ́ческїй ны́не сподо́билсѧ є҆сѝ ѡ҆дѣ́ѧтисѧ ѻ҆́бразъ, ꙗ҆́кѡ младе́нецъ, зако́ннѡ зако́нъ и҆спо́лнилъ є҆сѝ.

Но́щи ᲂу҆подо́бисѧ, ꙗ҆́кѡ сѣ́нь зако́ннꙋю лю́бѧщи і҆и҃лѧ, ро́ждшаѧ, и҆зъ неѧ́же ѡ҆блиста́вшїй свѣ́тъ мі́ра хрⷭ҇то́съ ꙗ҆ви́сѧ.

Бг҃оро́диченъ: Тебѣ̀, ро́ждшей хрⷭ҇та̀, всѣ́хъ содѣ́телѧ, зове́мъ: ра́дꙋйсѧ, чⷭ҇таѧ, ра́дꙋйсѧ, свѣ́тъ возсїѧ́вшаѧ на́мъ: ра́дꙋйсѧ, вмѣсти́вшаѧ бг҃а невмѣсти́маго.

Пѣ́снь ѕ҃.

І҆рмо́съ: Бе́здна мѧ̀ мно́га грѣхо́внаѧ ѡ҆крꙋжа́етъ, и҆ вопїю́ ти, прⷪ҇ро́ка подража́ѧй: ѿ тли́ мѧ, гдⷭ҇и, возведѝ.

Прїѧ́тъ коне́цъ зако́нъ, ѿне́лѣже хрⷭ҇то́съ младе́нствовавъ, и҆сполни́тель зако́на сы́й, ѡ҆брѣ́занїе воспрїѧ́тъ, и҆ разрѣшѝ зако́ннꙋю клѧ́твꙋ.

Сꙋббѡ́тство, ѡ҆брѣ́занїе же шата́нїѧ є҆вре́йскагѡ ꙗ҆́вльшагѡсѧ хрⷭ҇та̀ манове́нїемъ преста̀, и҆ возсїѧ̀ бл҃года́ти весна̀.

Бг҃оро́диченъ: Спасѝ ѿ бѣ́дъ рабы̑ твоѧ̑, бцⷣе, ꙗ҆́кѡ всѝ по бз҃ѣ къ тебѣ̀ прибѣга́емъ, ꙗ҆́кѡ къ нерꙋши́мѣй стѣнѣ̀ и҆ предста́тельствꙋ.

Конда́къ, гла́съ г҃.

Всѣ́хъ гдⷭ҇ь ѡ҆брѣ́занїе терпи́тъ, и҆ человѣ́чєскаѧ прегрѣшє́нїѧ, ꙗ҆́кѡ бл҃гъ ѡ҆брѣ́зꙋетъ, дае́тъ спасе́нїе дне́сь мі́рꙋ: ра́дꙋетсѧ же въ вы́шнихъ и҆ созда́телевъ і҆ера́рхъ и҆ свѣтоно́сный бжⷭ҇твенный таи́нникъ хрⷭ҇то́въ васі́лїй.

Пѣ́снь з҃.

І҆рмо́съ: Ѻ҆́бразꙋ злато́мꙋ, на по́лѣ деи́рѣ слꙋжи́мꙋ, трїѐ твоѝ ѻ҆́троцы небрего́ша безбо́жнагѡ велѣ́нїѧ, посредѣ́ же ѻ҆гнѧ̀ вве́ржени, ѡ҆роша́еми поѧ́хꙋ: благослове́нъ є҆сѝ, бж҃е ѻ҆ц҃ъ на́шихъ.

Свѣ́тло и҆ пресвѣ́тло ржⷭ҇тво̀ хрⷭ҇то́во, и҆ бꙋ́дꙋщагѡ ѡ҆бновле́нїѧ подписа́вшее та́инство дне́сь: ꙗ҆́кѡ зако́ннымъ чи́номъ сп҃съ ѡ҆брѣ́зꙋетсѧ, не ꙗ҆́кѡ бг҃ъ, но ꙗ҆́кѡ человѣ́къ, и҆ зако́на и҆сполне́нїе.

Зако́нъ и҆сполнѧ́ѧ, зако́на творе́цъ пло́тїю дне́сь во́лею ѡ҆брѣ́зꙋетсѧ, ѡ҆брѣ́занїе содѣва́ѧ грѣхо́вныѧ зимы̀, и҆ зва́ти да́рꙋѧ: бл҃гослове́нъ є҆сѝ, бж҃е ѻ҆ц҃ъ на́шихъ.

Бг҃оро́диченъ: Тѧ̀ кꙋпинꙋ̀ мѡѷсе́й въ горѣ̀ сїна́йстѣй ѻ҆гнепали́мꙋ, чⷭ҇таѧ, прови́дѧше, прїе́мшꙋю неѡпа́льнѡ нестерпи́мꙋю зарю̀ неизглаго́ланнагѡ сꙋщества̀, соедини́вшагѡсѧ дебельствꙋ̀ пло́ти, є҆ди́ныѧ въ не́мъ ст҃ы́хъ ѵ҆поста́сей.

Пѣ́снь и҃.

І҆рмо́съ: Неизрече́нною мꙋ́дростїю соста́вльшаго всѧ́чєскаѧ бг҃а сло́ва, и҆ ѿ не сꙋ́щихъ во є҆́же бы́ти приве́дшаго, бл҃гослови́те дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки.

Во ѻ҆смы́й де́нь ѡ҆брѣ́зꙋетсѧ, ꙗ҆́кѡ младе́нецъ, влⷣка: і҆и҃са же прїе́млетъ и҆менова́нїе, ꙗ҆́кѡ мі́ра є҆́сть сп҃съ и҆ гдⷭ҇ь.

Ко хрⷭ҇то́вꙋ ржⷭ҇твꙋ̀ досто́йнѡ ѻ҆смы́й спрѧже́сѧ, ст҃и́телѧ всесла́внаѧ па́мѧть, ю҆́же почита́юще вѣ́рою, пое́мъ гдⷭ҇а и҆ превозно́симъ во вѣ́ки.

Бг҃оро́диченъ: И҆з̾ ѻ҆ц҃а̀ проше́дшаго пре́жде вѣ̑къ, и҆ безлѣ́тнаго бг҃а сло́ва, и҆ въ послѣ̑днѧѧ возсїѧ́вша и҆з̾ дв҃ы, бл҃гослови́те, дѣла̀ гдⷭ҇нѧ, гдⷭ҇а.

Пѣ́снь ѳ҃.

І҆рмо́съ: Ꙗ҆́же пре́жде со́лнца свѣти́льника бг҃а возсїѧ́вшаго, пло́тски къ на́мъ прише́дшаго, и҆з̾ бокꙋ̀ дв҃и́чꙋ, неизрече́ннѡ воплоти́вшаѧ, бл҃гослове́ннаѧ всечⷭ҇таѧ, тѧ̀, бцⷣе, велича́емъ.

Припѣ́въ: Велича́й, дꙋшѐ моѧ̀, во ѻ҆смы́й де́нь ѡ҆брѣ́занїе прїе́млюща.

Дне́сь влⷣка ѡ҆брѣ́зꙋетсѧ пло́тїю, ꙗ҆́кѡ младе́нецъ, и҆сполнѧ́ѧ зако́нъ.

Припѣ́въ: Велича́й, дꙋшѐ моѧ̀, во ѻ҆смы́й де́нь ѡ҆брѣ́занїе прїе́млюща.

Дне́сь влⷣка пло́тїю ѡ҆брѣ́засѧ, і҆и҃съ нарече́сѧ.

Припѣ́въ: Велича́й, дꙋшѐ моѧ̀, во ѻ҆смы́й де́нь ѡ҆брѣ́занїе прїе́млюща.

Преше́дъ предѣ́лы хрⷭ҇то́съ человѣ́ческагѡ всегѡ̀ є҆стества̀, преесте́ственнѡ и҆з̾ дв҃ы ражда́етсѧ: и҆ писа́нїе зако́нное ꙗ҆́коже повелѣва́етъ, пло́тїю ѡ҆брѣ́заетсѧ, и҆ и҆спо́лнитель зако́на ꙗ҆влѧ́етсѧ.

Припѣ́въ: Велича́й, дꙋшѐ моѧ̀, во ѻ҆смы́й де́нь ѡ҆брѣ́занїе прїе́млюща.

Прїиди́те, влⷣки сла̑внаѧ хрⷭ҇тѡ́ва и҆менова̑нїѧ во свѧты́ни торжествꙋ́имъ: і҆и҃съ бо бг҃олѣ́пнѡ нарече́сѧ дне́сь. съ си́ми же и҆ па́мѧть ст҃и́телѧ велича́емъ.

Вмѣ́стѡ Сла́вы: Велича́й, дꙋшѐ моѧ̀, ᲂу҆краси́вшаго хрⷭ҇то́вꙋ цр҃ковь.

Превы́спрєннѧѧ вода́ми покрыва́ѧй є҆ди́нъ гдⷭ҇ь, возстѧзꙋ́ѧй мо́ре, бє́здны же и҆зсꙋша́ѧй и҆зъ тебє̀, чⷭ҇таѧ, пло́ть воспрїе́мый, ѿ виѳлее́ма тщи́тсѧ ко і҆ѻрда́нꙋ крⷭ҇ти́тисѧ пло́тїю.

Вмѣ́стѡ И҆ ны́нѣ: Велича́й, дꙋшѐ моѧ̀, чⷭ҇тнѣ́йшꙋю нбⷭ҇ныхъ во́инствъ, дв҃ꙋ пречⷭ҇тꙋю бцⷣꙋ.

Недоꙋмѣ́етъ всѧ́къ ѧ҆зы́къ благохвали́ти по достоѧ́нїю, и҆з̾ꙋмѣва́етъ же ᲂу҆́мъ и҆ премі́рный пѣ́ти тѧ̀, бцⷣе. ѻ҆ба́че, бл҃га́ѧ сꙋ́щи, вѣ́рꙋ прїимѝ: и҆́бо любо́вь вѣ́си бжⷭ҇твеннꙋю на́шꙋ: ты́ бо хрⷭ҇тїа́нъ є҆сѝ предста́тельница, тѧ̀ велича́емъ.

І҆рмо́съ: Ѽ па́че ᲂу҆ма̀ ржⷭ҇тва̀ твоегѡ̀ чꙋде́съ! невѣ́сто всечⷭ҇таѧ, мт҃и бл҃гослове́ннаѧ, є҆́юже полꙋчи́вше всесоверше́нное спасе́нїе, досто́йнѡ хва́лимъ, ꙗ҆́кѡ благодѣ́телѧ, да́ръ носѧ́ще пѣ́снь благодаре́нїѧ.

Свѣти́ленъ.

Любомꙋ́дрїѧ жела́нїемъ ѡ҆брѣ́залъ є҆сѝ, ѻ҆́ч҃е, дꙋшѝ твоеѧ̀ покрыва́ло, и҆ мі́рꙋ показа́лсѧ є҆сѝ, ꙗ҆́кѡ со́лнце, чꙋдесы̀, и҆ вѣ́рныхъ ѡ҆зари́лъ є҆сѝ мы̑сли, бг҃омꙋ́дре, трⷪ҇цы таи́нниче, ѽ васі́лїе мꙋ́дре, и҆ слꙋжи́телю бцⷣы!

Сла́ва, и҆ ны́нѣ: Пло́тїю ѡ҆брѣ́зꙋетсѧ зако́нъ и҆спо́лнивый, ꙗ҆́кѡ младе́нецъ ѻ҆смодне́венъ, вѣкѡ́въ зижди́тель: и҆ пелена́ми повива́етсѧ, ꙗ҆́кѡ человѣ́къ: и҆ млеко́мъ пита́етсѧ, и҆́же всѧ̑ безмѣ́рною крѣ́постїю, ꙗ҆́кѡ бг҃ъ, содержа́й, и҆ манове́нїемъ возводѧ́й.

Обрезание в качестве обряда посвящения Божеству существовало у многих народов, в том числе и у египтян. В еврейском понимании кровь священна, так как «кровь есть душа», кровь, текущая из органа, дающего жизнь, означает посвящение Богу жизни, принятой как дар. У израильтян этот обряд стал знаменовать вступление в союз-завет Авраама и избранного народа с Богом и должен был напоминать народу о вытекающих из этого обязательствах.

Православная Церковь отмечает 14 января праздник Обрезания Господня. Во всех храмах в этот день пройдут праздничные богослужения.

Евангельское предание гласит, что на восьмой день после Рождения Иисус Христос, по ветхозаветному закону, прошел обряд обрезания. Обряд был установлен для всех младенцев мужского пола в знак завета Бога с праотцом Авраамом и его потомками.

При совершении этого обряда Божественному Младенцу было дано имя Иисус (Спаситель), произнесенное архангелом Гавриилом еще в день Благовещения Деве Марии.

По толкованию отцов Церкви, Бог-Сын принял обрезание, чтобы показать людям пример неукоснительного исполнения Божественных установлений и чтобы никто впоследствии не мог усомниться в том, что Он был истинным Человеком, а не носителем призрачной плоти, как учили некоторые еретики.

В Новом Завете обряд обрезания уступил место таинству Крещения, прообразом которого он и являлся.

Свидетельства о праздновании Обрезания Господня в Восточной Церкви восходят к IV веку.

Праздник Обрезания Господня продолжается один день и соединяется с празднованием памяти святого Василия Великого, архиепископа Кесарии Каппадокийской, отчего в народе он известен под именем Васильева дня.

 

ИЗ БОГОСЛУЖЕБНЫХ ПЕСНОПЕНИЙ
в современном русском переводе


Тропарь Обрезанию, глас 1:
Ты, Иисус, сидящий в небесах на огневидном престоле с Безначальным Отцом и Божественным Твоим Духом, благоволил родиться на земле от Девы, не познавшей мужа, Матери Твоей; поэтому и был обрезан, как человек, на восьмой день. Слава всемилостивой воле Твоей, слава промышлению Твоему, слава снисхождению Твоему, Единый Человеколюбец!


Кондак Обрезанию и Святителю, глас 3:

Господь всех (всего) терпит обрезание и, будучи Благодетелем, обрезывает человеческие прегрешения, дарует сегодня спасение миру; радуется же на Небесах и божественный таинник (греч. мист.) Христа Василий, светоносный иерарх [нашего] Создателя.


Тропарь Святителю, глас 1:
Проповедь твоя прошла по всей земле, принявшей твое слово, которым ты изложил достойные Бога истины веры (догматы), разъяснил природу всего существующего, улучшил (украсил) человеческие нравы. Ты, царственное священство, преподобный отец наш [Василий], моли Христа Бога даровать нам великую милость.


Кондак Святителю, глас 4:
О, преподобный Василий! Открывающий небесные тайны, наделяющий всех людей неотъемлемым сокровищем и запечатлевающий его своим учением, – ты стал непоколебимым основанием Церкви.
Величание Обрезанию: Прославляем Тебя, Христос, Податель Жизни, и почитаем пречистой Твоей Плоти законное обрезание.


Величание Святителю:
Прославляем тебя, Святитель, отец наш Василий, и почитаем святую твою память, ибо ты молишься за нас Христу – нашему Богу.