Пе́снь 1.

Ирмо́с: Пе́снь побе́дную пои́м вси́ Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися.

Кре́ст предгряды́й Боже́ственный испуща́ет зарю́ благода́ти и просвеща́ет вся́, покланя́ющияся ему́ и воспева́ющия благоче́стно распе́ншагося Христа́.

Креста́ поклоня́ние возвыша́ет любо́вию и ве́рою сла́вящия я́ко Бо́га и Го́спода, пострада́вшаго пло́тию и назда́вшаго на́с Боже́ственными страда́нии.

Креста́ поклоня́ние источа́ет благово́ние дарова́ний, и вся́, я́же Христа́ сла́вящия, объюха́ет при́сно, и смра́д ду́ш отъе́млет ве́сь.

Богоро́дичен: Позна́вше Го́спода, вопло́щшагося из Тебе́, Богоневе́сто, и Кре́ст и сме́рть прие́мша, пое́м Его́, Изба́вителя, Тя́ ублажа́юще.

Пе́снь 3.

Ирмо́с: Да утверди́тся се́рдце мое́ в во́ли Твое́й, Христе́ Бо́же, И́же над вода́ми не́бо утвержде́й второ́е и основа́вый на вода́х зе́млю, Всеси́льне.

И́же во о́бразех проначерта́емый, соверша́я пресла́вная чудеса́, ны́не покланя́емый Кре́ст де́йствует чу́днейшая, освяща́я и просвеща́я Зижди́теля сла́вящия.

И́же во бране́х Боже́ственная побе́да, Кре́ст Христо́в покланя́емь, ополче́ния враго́в побежда́яй, подава́ет лю́дем правосла́вным кре́пкия побе́ды.

Же́зл Госпо́день предположе́нный, Кре́ст во хра́мех и жили́щах основа́ния незы́блема си́х соблюда́ет и вся́к прило́г и кова́рство сопроти́вных побежда́ет.

И́же Госпо́день покланя́емый Кре́ст благоче́стно Боже́ственныя благода́ти и каже́ния мы́сленна исполня́ет покланя́ющияся ему́ и о́блаки напа́стей отъе́млет и скорбе́й.

Богоро́дичен: От глубины́ ле́стныя извлече́ челове́чество из Тебе́ Рожде́йся дре́вом кре́стным, Богоро́дице, и возвы́си к разуме́нию Своему́ благоче́стно Тя́ сла́вящия.

Седа́лен, гла́с 4.

Све́тло не́бо показу́ется па́че со́лнца све́том Кре́стным, просвеща́ет вся́ческая заре́ю свое́ю. Те́мже Ты́, Человеколю́бче, Спа́се вся́ческих, просвети́ у́м на́ш его́ ра́ди и чу́вства: мы́ бо и́мамы того́ ору́жие ми́ру, непобеди́мую побе́ду.

Пе́снь 4.

Ирмо́с: Ду́хом прови́дя, проро́че Авваку́ме, Словесе́ воплоще́ние, пропове́дал еси́, вопия́: внегда́ прибли́житися ле́том – позна́ешися, внегда́ приити́ вре́мени – пока́жешися. Сла́ва си́ле Твое́й, Го́споди.

Вообража́емь, Боже́ственный и Честны́й Кре́ст тьмы́ нача́льника отгоня́ет тве́рдо от возду́ха, и благода́ти лучи́ вообража́ющим простира́ет, и озаря́ет си́х, пою́щия Христа́ Бо́га.

Вообража́емь, Боже́ственный и пречестны́й Кре́ст в сердца́х мо́ре утиша́ет страсте́й, и уставля́ет бе́д треволне́ния, и в тишину́ прево́дит пра́вости вся́, любо́вию вообража́ющия того́.

Я́коже у́глие, испуща́я, Честны́й Кре́ст де́йствия вся́ попаля́ет вра́жия, и отго́нит си́лу, и облегча́ет мно́гия в ве́ре, хва́лящия и пою́щия любо́вию на не́м пригво́ждшагося Христа́.

Всечестны́й и Боже́ственный Кре́ст, ве́рою покланя́емь, источа́ет струи́ мы́сленныя дарова́ний и во́ды исцеле́ний и напая́ет непреста́нно сему́ покланя́ющияся и чту́щия.

Богоро́дичен: Я́ко все́х Цари́цу и Влады́чицу на́шу Тя́ любо́вию сла́вим, Пресвята́я Чи́стая, просве́щшиися страстьми́ Сы́на Твоего́ и позна́вшии Сего́ все́м Благоде́теля: сла́ва благода́ти Его́.

Пе́снь 5.

Ирмо́с: Све́тлый на́м возсия́й Све́т Присносу́щный, у́тренюющим о судьба́х за́поведей Твои́х, Влады́ко Человеколю́бче, Христе́, Бо́же на́ш.

Держа́вному на́шему и недви́жимому ору́жию предлежа́щу, ны́не покланя́ющеся пресвято́му Кресту́ ве́рою, си́лу непобеди́му на враги́ прие́млем.

Вообража́емаго и несеко́маго ка́мене сотво́рша во́ду источи́ти ны́не держа́ще и покланя́ющеся Честно́му Кресту́, исто́чник дарова́ний прие́млем.

Златосия́нен на́м Кре́ст Христо́в явля́яся, дарова́ния душа́м подава́ет благода́тию, покланя́ющимся ему́ и Го́спода и Бо́га пою́щим при́сно.

Богоро́дичен: Же́зл си́лы, Богоневе́сто, ве́рою держа́ще, Сы́на Твоего́ и Бо́га на́шего Кре́ст, пое́м Тя́, Цари́цу все́х, ублажа́юще.

Пе́снь 6.

Ирмо́с: Проро́ка Ио́ну подража́я, вопию́: живо́т мо́й, Бла́же, свободи́ из тли́, и спаси́ мя́, Спа́се ми́ра, зову́ща: сла́ва Тебе́.

Пречестны́й Кре́ст, покланя́емый ны́не, воскресе́ния ра́дость провозвеща́ет Христо́ва, и сме́рть злонача́льника благовеству́ется.

Водрузи́л еси́ на земли́ Честны́й Кре́ст, ле́ствица быва́ет ве́рным мы́сленна к Небеси́ и возше́ствие покланя́ющимся ему́ и чту́щим.

И́же посреде́ земли́ насади́выйся, Честны́й Кре́ст и ны́не ве́тви простира́ет дарова́ний в себе́ и вся́ осеня́ет, покланя́ющияся ему́.

Пресеки́й Чермно́е, пропису́емь, Кре́ст, покланя́емь ны́не, бе́д и страсте́й мо́ре пресека́ет, и спаса́ет покланя́ющияся ему́.

Богоро́дичен: От земли́ привлече́ на́с Сы́н Тво́й и Бо́г к Небе́сней жи́зни, возше́д на Кре́ст, любо́вию Тя́, Ма́терь Сего́, вои́стинну чту́щих.

Пе́снь 7.

Ирмо́с: Су́щим в пещи́ отроко́м Твои́м, Спа́се, не прикосну́ся, ниже́ стужи́ о́гнь. Тогда́ трие́, я́ко еди́неми усты́, поя́ху и благословля́ху, глаго́люще: благослове́н Бо́г оте́ц на́ших.

И́же честно́ю кро́вию Христо́вою Кре́ст Его́ напои́вся, источа́ет ре́ки сия́нии мы́сленных дарова́ний и напая́ет вся́, покланя́ющияся и воспева́ющия его́ ве́рно.

И́же сме́рть и враги́ низло́жь Кре́ст Христо́в и вереи́ сокруши́ мы́сленныя, и ны́не тому́ чи́стою ве́рою и любо́вию покланя́ющимся все́м две́ри отверза́ет жи́зни и нетле́нныя пи́щи.

И́же покланя́ющеся любо́вию Кресту́, огражда́ются си́лою сего́, и враги́ мы́сленныя и ви́димыя отго́нят, и невреди́мы соблюда́ются песносло́вящии Христа́.

Богоро́дичен: Кре́пость на́м и держа́ва на враги́ дарова́ся — Кре́ст Христа́, Сы́на Твоего́, прия́тным и ма́терним Твои́м дерзнове́нием, и́мже, Богоневе́сто, прило́ги вра́жия побежда́ем.

Пе́снь 8.

Ирмо́с: Его́же ужаса́ются А́нгели и вся́ во́инства, я́ко Творца́ и Го́спода, по́йте, свяще́нницы, просла́вите, о́троцы, благослови́те, лю́дие, и превозноси́те во вся́ ве́ки.

Его́же водрузи́ сме́рть, поста́вленный Кре́ст, ны́не покланя́ема зря́ще, мы́сленная вра́жия ополче́ния скрыва́ются под земле́ю, и покланя́ющиися ему́ обновля́ются.

Его́же, дре́вле прообразу́ема, на высоте́ Небе́сней Христо́с показа́, пресве́тлаго Креста́, тому́ ны́не покланя́ющеся, благоче́стно ве́рнии возвыша́ются и сего́ уясня́ются заре́ю.

Его́же дре́вле пропове́даша проро́цы нело́жно, е́же Христо́ву подно́жию яви́тися Креста́, ему́же ны́не мы́ и́стинно покланя́ющеся ве́рно, того́ бога́тых даро́в наслажда́емся.

Богоро́дичен: И́же стра́стию безстра́стие источи́в земны́м, Сы́н Тво́й и Госпо́дь, Де́во, Тобо́ю на́с, Тя́ любо́вию пою́щия, при́сно обновля́ет, я́ко Благоде́тель.

Пе́снь 9.

Ирмо́с: Светоно́сный о́блак, в о́ньже все́х Влады́ка, я́ко до́ждь с Небесе́ на руно́, сни́де и воплоти́ся на́с ра́ди, бы́в Челове́к, Безнача́льный, велича́ем вси́ я́ко Ма́терь Бо́га на́шего Чи́стую.

Безсме́ртия то́чит и нетле́ния незави́стны ка́пли Честны́й Кре́ст кла́няющимся ему́, оживля́ет, очища́ет, и обновля́ет, и сла́вы лу́чшия и благода́ти сподобля́ет воспева́ющия на то́м пригво́ждшагося Иису́са.

Де́йства испуща́я, я́коже пресве́тлы зари́, всечестны́й Кре́ст тому́ покланя́ющияся любо́вию и ве́рою чи́стою к све́ту непристу́пному и невеще́ственному, озаря́я, направля́ет, воспева́ющия все́х Творца́.

Освяти́вый Дре́во пресвята́го Креста́ Твоего́ честно́ю кро́вию Твое́ю, Преблаги́й Сло́ве, де́йством его́ на́с просвети́ и освяти́, тому́ кла́няющияся и воспева́ющия Влады́ку вся́ческих.

Богоро́дичен: Па́че со́лнца все́м просия́вшая благода́ть о́блаки бе́д и страсте́й отго́нит, Де́во, и Богоразу́мия све́том просвеща́ет любо́вию Тя́ сла́вящия и пою́щия непреста́нно Сы́на Твоего́, я́ко Влады́ку все́х.