Канон предпразднству Преображения Господня

Припев: Слáва Тебé, Гóсподи, Слáва Тебé.

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 18 августа (05 августа ст. ст.)

Глас 4.

Пе́снь 1.

Ирмо́с: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Да облиста́ет до́ле све́т не́бо па́че со́лнца, и земля́ да слы́шит глаго́лы Жива́го Бо́га, сыновство́ преобразу́емаго: Оте́ц бо свиде́тельствует на горе́ Фаво́рстей.

Челове́к зри́мый, но Бо́г кры́емый, на Фаво́р Христо́с восхо́дит, Божества́ зарю́ обнажа́я, е́же па́че со́лнца, сла́вы светлостьми́.

Разу́мно ны́не предгряде́т яви́тися Моисе́ю Христо́с, сла́вы виде́ние показу́я на горе́ Фаво́рстей лице́м к лицу́ нехода́тайственною бесе́дою, ра́дующеся, дне́сь предпра́зднуем.

И́н, трипе́снец, гла́с то́йже.

Ирмо́с: Воспою́ Тебе́, Го́споди Бо́же мо́й, я́ко изве́л еси́ лю́ди из рабо́ты еги́петския, покры́л же еси́ колесни́цы фарао́новы и си́лу.

Се́й предпра́зднственный де́нь соверша́юще, ве́рнии, преображе́ния Христа́, Изба́вителя на́шего, воспле́щим пе́сньми.

Вхо́д пости́гши свята́го преображе́ния Христо́ва, и мы́ облиста́емся Боже́ственными измене́нии, сие́ облобыза́юще.

По ны́нешнем Христо́с дни́, пое́мь ученики́, на го́ру восхо́дит и, та́мо преобра́жся, облиста́ет Божество́м.

Го́ру Фаво́рскую, прииди́те вси́, дости́гше у́мно, Христа́ у́зрим, пред ученики́ Свои́ми стра́шно преобразу́ющася.

Я́ко Дави́д проро́к, вопие́м Ти́: Фаво́рская гора́ и Ермо́н о Твое́м И́мени, Христе́, возра́дуются, в преображе́нии Твое́м.

Го́ру превысо́кую — се́рдце, очище́но от страсте́й, иму́щии, у́зрим Христо́во преображе́ние, просвеща́ющее у́м на́ш.

Тро́ичен: Тро́ицу просла́вим правосла́вно, со Отце́м Сы́на и Ду́ха Свята́го, Еди́но Божество́, Еди́ницу Триипоста́сную.

Богоро́дичен: Ма́терь и Де́ву Тя́ правосла́вно испове́дуем, ве́рнии, неизрече́нно ро́ждшую Христа́ Бо́га на́шего, еди́наго Многоми́лостиваго.

Пе́снь 3.

Ирмо́с: Твоя́ песносло́вцы, Богоро́дице, живы́й и незави́стный Исто́чниче, ли́к себе́ совоку́пльшия, духо́вно утверди́, в Боже́ственней Твое́й сла́ве, венце́в сла́вы сподо́би.

Влады́чествуяй тва́рию все́ю, ви́ден бы́сть, зра́к раба́ прие́м, и́мже Божества́ непристу́пное сия́ние ученико́м показа́л е́сть, я́коже вмеща́ху зре́ти.

На го́ру и́дет облиста́ти сла́вы Со́лнце, Христо́с, и свы́ше сия́ющую денни́цу омрачи́ти све́том, Его́же заря́ми сия́юще, предпра́зднуим дне́сь.

Живота́ ве́чнаго исполня́я глаго́лы, предста́ Христо́с, показу́я в Себе́ ве́щи друго́м разуме́ти, я́коже благоволи́, Оте́ческую сла́ву блиста́ющую.

Богоро́дичен: Все́ мое́ жела́ние к Тебе́ дви́жу, Чи́стая Влады́чице, плотски́х похоте́й мя́ вско́ре премени́.

Пе́снь 4.

Ирмо́с: Седя́й в сла́ве на Престо́ле Божества́ во о́блаце ле́гце, прии́де Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й.

Небе́сный ли́к с земны́ми ра́дуется и предпра́зднует Светода́вца сия́ние, И́же несказа́нно облиста́ет, изменя́я челове́ческий зра́к на Фаво́ре, я́коже благоволи́.

Богочелове́чным прише́ствием челове́ком прибли́жився, чуде́с заре́ю ми́р та́йно просвети́л еси́, блиста́ющеюся же сла́вою Божества́ просия́л еси́ на Фаво́ре непристу́пным Све́том.

Иису́с, Нави́н сы́н, пе́рвее со́лнце уста́ви, прообразу́я де́нь Боже́ственныя стра́сти, Са́м же, Спа́се, пре́жде Честна́го Креста́ Твоего́, сия́ния скры́л еси́ со́лнца заря́ми Боже́ственными лица́ Твоего́.

Богоро́дичен: Равноси́льна, сопресто́льна родила́ еси́ Сло́ва Отцу́ и Ду́ху, Его́же моли́ спасти́ мя́, Пресвята́я Отрокови́це, Присноде́во.

Пе́снь 5.

Ирмо́с: Ужасо́шася вся́ческая о Боже́ственней сла́ве Твое́й: Ты́ бо, Неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м, воспева́ющим Тя́, ми́р подава́ющая.

Христу́, ра́дующеся, ве́рно после́дуем: се́ бо и́дет к горе́, ученики́ лу́чшия с Собо́ю веды́й, пред ни́миже непристу́пною добро́тою возсия́в па́че со́лнца, показа́ сла́ву Свою́.

Да просвети́тся дне́сь не́бо светле́йше восхо́дом, е́же к горе́, отону́дуже облиста́ет Христо́с непристу́пным Све́том, со́лнечныя лучи́ сла́вою Божества́ омрача́я, я́ко све́та Пода́тель.

Та́инство показа́ Христо́с ученико́м на Фаво́ре, просия́в па́че зари́ лице́м, оде́ждою же ри́з Свои́х убели́вся све́тло, я́ко сне́г, одева́яйся, я́ко ри́зою, све́том псало́мски.

Богоро́дичен: Сло́во во утро́бе Твое́й, Чи́стая, воплоща́ется, безслове́сных плотски́х страсте́й ми́р избавля́я.

Пе́снь 6.

Ирмо́с: Боже́ственное сие́ и всечестно́е соверша́юще пра́зднество, Богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Черто́г сла́вы бу́дущия ра́дости друго́м гото́вя, восхо́дит на го́ру Христо́с, к житию́ Небе́сному от жи́зни, до́лу влеку́щия, возводя́ и́х.

Удивля́я ра́зум Христо́с ученико́в, небе́сное на земли́ сия́ние облиста́, зако́н и проро́ков раболе́пно представля́я нача́льники, и́миже ме́ртвым и живы́м свиде́тельствуется Бо́г.

Свети́льник яви́тися ны́не гряде́т, Христо́с, в те́мнем ме́сте сия́нием Боже́ственнаго блиста́ния, Его́же к сия́нию и́дем, пря́мо лицу́ Его́ ра́дующеся.

Богоро́дичен: Изсуши́вши сады́ зло́бы в Тебе́ прозябе́нием Сло́ва, Ма́ти Чи́стая, из ко́рене души́ моея́ лука́выя мы́сли отсецы́ и насади́ доброде́телей кра́сная, Де́во, прозябе́ния.

Конда́к, гла́с 4.

Боже́ственным дне́сь преображе́нием челове́ческое все́ естество́ просиява́ет боже́ственно, в весе́лии зову́щее: преобразу́ется Христо́с, спаса́яй вся́.

И́кос:

Преображе́нием Боже́ственным зра́к на́ш, и́же дре́вле тле́нием растле́нный во а́довых сокро́вищах пра́отца Ада́ма, дне́сь Зижди́тель из тли́ возведе́, обожа́ет на́ш ра́зум, пребыва́ет же Бо́г вку́пе и Челове́к, естества́ ка́яждо соедине́на нося́ непрело́жна же и неразде́льна. Те́мже ны́не на Фаво́ре несказа́нно сия́ет и из всея́ пло́ти дае́т лучи́ Божества́ Своего́, просвеща́я вопию́щия: преобразу́ется Христо́с, спаса́яй все́х.

Пе́снь 7.

Ирмо́с: Не послужи́ша тва́ри Богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

К преложе́нию от земли́, на высоту́ восходя́щему, учени́к избра́нию после́дуем, Христо́во смотря́юще стра́нное виде́ние. Уди́вльшеся же с ни́ми, возопие́м: Бо́же, благослове́н еси́.

Оскве́рншееся очи́стил еси́ естество́ челове́ческое водо́ю же и огне́м, Твое́ю пло́тию сего́ све́тлость показу́еши, Спа́се, лице́м Твои́м просия́в па́че со́лнца во о́браз бу́дущия сла́вы.

Взы́дем со Христо́м на го́ру святу́ю, возводя́щим Зеведе́евы сы́ны и Петра́ лу́чшаго, и́хже избра́ сла́ве Свое́й свиде́тели, зову́щия: Бо́же, благослове́н еси́.

Богоро́дичен: Но́во родила́ еси́ Отроча́, Его́же роди́ Оте́ц пре́жде ве́к, Богоро́дице Чи́стая. Ему́же вси́ воспева́ем: Бо́же, благослове́н еси́.

Пе́снь 8.

Ирмо́с: О́троки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Кто́ не удиви́тся, Всецарю́ сла́вы, великоле́пию сла́вы Твоея́, в не́же преобра́жся, показа́л еси́ друго́м Твои́м, Боже́ственными светлостьми́ облиста́в и́х? С ни́миже предпра́зднующих ве́рою уясни́ све́том Твои́м на́с, Тя́ пою́щих.

Высоту́ Небе́снаго жития́ и сла́вы присносу́щныя Боже́ственное сия́ние да́руй рабо́м Твои́м, ны́не предпра́зднующим Твоего́ преображе́ния све́тлое торжество́, в не́же Све́т облиста́я, уясня́еши Тя́ воспева́ющия, Христе́ Светода́вче.

Све́та Пода́тель и Све́т сы́й непристу́пен, Присносу́щне, Пребезнача́льне, одея́йся Све́том, я́коже ри́зою, све́т в ми́ре просия́л еси́, с пло́тию прише́д, и Све́т на горе́ облиста́еши, сла́вы О́тчия показа́в о́браз.

И́н.

Ирмо́с: Царя́ Христа́, Его́же испове́даша плене́ннии о́троцы, в пещи́ глаго́люще ве́лиим гла́сом: вся́ дела́, по́йте Го́спода.

Госпо́дня све́тлаго преображе́ния настоя́щий де́нь облиста́в, ми́рови повелева́ет вопи́ти: вся́ дела́, по́йте и превозноси́те Его́ во ве́ки.

Мы́слию, ве́рнии, прииди́те, по́йдем к горе́ святе́й ви́дети преображе́ние Христо́во всесве́тлое: вся́ бо просвеща́ет, славосло́вящия сие́ во ве́ки.

Дне́сь Христо́ву преображе́нию чи́стым се́рдцем предусре́тение сотвори́м и возопии́м све́тло: вся́ дела́, Го́спода по́йте и превозноси́те Его́ во ве́ки.

Тро́ичен: В Ли́цех Тре́х Еди́ное Божество́ богосло́вим, Отца́ и Сы́на и Ду́ха Пресвята́го, ку́пно, вся́ дела́, по́йте и превозноси́те Его́ во ве́ки.

Богоро́дичен: Царя́ Христа́, Его́же на́м роди́ Де́ва Мари́я и по рождестве́ пребы́вши Де́ва Чиста́, вся́ дела́, по́йте и превозноси́те Его́ во ве́ки.

Пе́снь 9.

Ирмо́с: Вся́к земноро́дный да взыгра́ется, Ду́хом просвеща́емь, да торжеству́ет же Безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Ра́дуйся, не́бо, от земли́ возсия́ющаго ны́не прове́дый, Со́лнца Незаходи́маго, и сла́вою Боже́ственною покры́ти хотя́щаго со́лнечныя све́тлости; земля́ же да лику́ет све́тло, Небе́сною заре́ю и све́тлостию сия́ющи и све́т быва́ющи.

Поя́ Дави́д Твое́ преображе́ние, предвозгласи́: кто́ уподо́бится Тебе́, Го́сподеви, глаго́ля, в сыне́х Бо́жиих? Ты́ бо, прославля́яся в сове́тех святы́х, вели́к яви́лся еси́ су́щим о́крест Тебе́, стра́шен в сла́ве Боже́ственнаго зра́ка.

О, Сло́во Бо́жие, му́дрость, и си́ла, и о́браз Оте́ч! О, Бо́же, разумева́емый ве́рными, и Челове́че познава́емый! Твоего́ преображе́ния на́с сподо́би, соверши́ти све́тлое торжество́, во све́те до́брых де́л сия́ющих.

И́н.

Ирмо́с: Тя́, Неискусобра́чную Богоро́дицу, Небе́сный черто́г, ро́ждшую Нача́льника спасе́ния на́шего, пе́сньми велича́ем.

Се́й первовхо́дный де́нь Твоего́, Христе́, творя́ще пресла́внаго и всесве́тлаго преображе́ния, пе́сньми Тя́ велича́ем.

Усе́рдно, ве́дяще сла́вное преображе́ние Госпо́дне, озари́м духо́вно помышле́ния на́ша, сие́ велича́юще.

До́брым измене́нием изме́ньшеся, Христо́вым преображе́нием, обря́щемся светоявле́нни добродея́нии на́шими, сие́ велича́юще.

Тро́ичен: Тя́, Триипоста́сную Тро́ицу и Неразде́льное Существо́, Отца́ и Сы́на и Ду́ха Свята́го, пе́сньми велича́ем.

Богоро́дичен: Тя́, купину́, ю́же Моисе́й ви́де горя́щую и неопаля́емую, о́гнь прие́мшую Божества́, пе́сньми велича́ем.

Свети́лен.

Не́бо созда́вый и звезда́м све́т вложи́вый, дне́сь на го́ру Фаво́рскую возше́д, освеща́ет ученики́ заре́ю Божества́ Своего́.

Сла́ва, и ны́не: Дне́сь на Фаво́ре Христо́с Све́т облиста́, дне́сь свы́ше шу́м, гла́с Оте́ч, услы́шан бы́сть: Се́й е́сть, вопия́, Сы́н возлю́бленный Мо́й.

Пѣ́снь а҃.

І҆рмо́съ: Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ, свѣ́тлѡ торжествꙋ́ѧ, и҆ воспою̀, ра́дꙋѧсѧ тоѧ̀ чꙋдеса̀.

Да ѡ҆блиста́етъ до́лѣ свѣ́тъ нб҃о па́че со́лнца, и҆ землѧ̀ да слы́шитъ глаго́лы жива́гѡ бг҃а, сн҃овство̀ преѡбразꙋ́емагѡ: ѻ҆ц҃ъ бо свидѣ́тельствꙋетъ на горѣ̀ ѳавѡ́рстѣй.

Чл҃вѣ́къ зри́мый, но бг҃ъ кры́емый, на ѳавѡ́ръ хрⷭ҇то́съ восхо́дитъ, бж҃ества̀ зарю̀ ѡ҆бнажа́ѧ, є҆́же па́че со́лнца, сла́вы свѣтлостьмѝ.

Разꙋ́мнѡ ны́нѣ предгрѧде́тъ ꙗ҆ви́тисѧ мѡѷсе́ю хрⷭ҇то́съ, сла́вы видѣ́нїе показꙋ́ѧ на горѣ̀ ѳавѡ́рстѣй, лице́мъ къ лицꙋ̀ нехода́тайственною бесѣ́дою, ра́дꙋющесѧ дне́сь предпра́зднꙋемъ.

И҆́нъ, трипѣ́снецъ, гла́съ то́йже.

І҆рмо́съ: Воспою̀ тебѣ̀, гдⷭ҇и бж҃е мо́й, ꙗ҆́кѡ и҆зве́лъ є҆сѝ лю́ди и҆зъ рабо́ты є҆гѵ́петскїѧ, покры́лъ же є҆сѝ колесни̑цы фараѡ́новы и҆ си́лꙋ.

Се́й предпра́зднственный де́нь соверша́юще вѣ́рнїи, преѡбраже́нїѧ хрⷭ҇та̀ и҆зба́вителѧ на́шегѡ, воспле́щимъ пѣ́сньми.

Вхо́дъ пости́гши ст҃а́гѡ преѡбраже́нїѧ хрⷭ҇то́ва, и҆ мы̀ ѡ҆блиста́емсѧ бжⷭ҇твенными и҆змѣне́нїи, сїѐ ѡ҆блобыза́юще.

По ны́нѣшнемъ хрⷭ҇то́съ днѝ пое́мь ᲂу҆ченикѝ, на го́рꙋ восхо́дитъ, и҆ та́мѡ преѡбра́жсѧ, ѡ҆блиста́етъ бжⷭ҇тво́мъ.

Го́рꙋ ѳавѡ́рскꙋю, прїиди́те всѝ, дости́гше ᲂу҆́мнѡ, хрⷭ҇та̀ ᲂу҆́зримъ предъ ᲂу҆ч҃никѝ свои́ми стра́шнѡ преѡбразꙋ́ющасѧ.

Ꙗ҆́кѡ дв҃дъ прⷪ҇ро́къ вопїе́мъ тѝ: ѳавѡ́рскаѧ гора̀ и҆ є҆рмѡ́нъ ѡ҆ твое́мъ и҆́мени, хрⷭ҇тѐ, возра́дꙋютсѧ въ преѡбраже́нїи твое́мъ.

Го́рꙋ превысо́кꙋю, се́рдце ѡ҆чище́но ѿ страсте́й и҆мꙋ́щїи, ᲂу҆́зримъ хрⷭ҇то́во преѡбраже́нїе, просвѣща́ющее ᲂу҆́мъ на́шъ.

Трⷪ҇ченъ: Трⷪ҇цꙋ просла́вимъ правосла́внѡ, со ѻ҆ц҃е́мъ сн҃а и҆ дх҃а ст҃а́го, є҆ди́но бж҃ество̀, є҆ди́ницꙋ трїѷпоста́снꙋю.

Бг҃оро́диченъ: Мт҃рь и҆ дв҃ꙋ тѧ̀ правосла́внѡ и҆сповѣ́дꙋемъ вѣ́рнїи, неизрече́ннѡ ро́ждшꙋю хрⷭ҇та̀ бг҃а на́шего, є҆ди́наго многоми́лостиваго.

Пѣ́снь г҃.

І҆рмо́съ: Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ, дꙋхо́внѡ ᲂу҆твердѝ, въ бж҃е́ственнѣй твое́й сла́вѣ, вѣнцє́въ сла́вы сподо́би.

Влады́чествꙋѧй тва́рїю все́ю, ви́дѣнъ бы́сть зра́къ раба̀ прїе́мъ: и҆́мже бж҃ества̀ непристꙋ́пное сїѧ́нїе ᲂу҆ченикѡ́мъ показа́лъ є҆́сть, ꙗ҆́коже вмѣща́хꙋ зрѣ́ти.

На го́рꙋ и҆́детъ ѡ҆блиста́ти сла́вы сл҃нце хрⷭ҇то́съ, и҆ свы́ше сїѧ́ющꙋю денни́цꙋ ѡ҆мрачи́ти свѣ́томъ: є҆гѡ́же зарѧ́ми сїѧ́юще, предпра́зднꙋимъ дне́сь.

Живота̀ вѣ́чнагѡ и҆сполнѧ́ѧ глаго́лы, предста̀ хрⷭ҇то́съ, показꙋ́ѧ въ Себѣ̀ вє́щи дрꙋгѡ́мъ разꙋмѣ́ти, ꙗ҆́кѡже благоволѝ ѻ҆те́ческꙋю сла́вꙋ блиста́ющꙋю.

Бг҃оро́диченъ: Всѐ моѐ жела́нїе къ тебѣ̀ дви́жꙋ, чⷭ҇таѧ влⷣчце, плотски́хъ похоте́й мѧ̀ вско́рѣ премѣнѝ.

Пѣ́снь д҃.

І҆рмо́съ: Сѣдѧ́й въ сла́вѣ на престо́лѣ бжⷭ҇тва̀, во ѻ҆́блацѣ ле́гцѣ прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щыѧ: сла́ва, хрⷭ҇тѐ, си́лѣ твое́й.

Нбⷭ҇ный ли́къ съ земны́ми ра́дꙋетсѧ, и҆ предпра́зднꙋетъ свѣтода́вца сїѧ́нїе, и҆́же несказа́ннѡ ѡ҆блиста́етъ, и҆змѣнѧ́ѧ человѣ́ческїй зра́къ на ѳавѡ́рѣ, ꙗ҆́коже благоволѝ.

Бг҃очеловѣ́чнымъ прише́ствїемъ, человѣ́кѡмъ прибли́живсѧ, чꙋде́съ заре́ю мі́ръ та́йнѡ просвѣти́лъ є҆сѝ: блиста́ющеюсѧ же сла́вою бжⷭ҇тва̀ просїѧ́лъ є҆сѝ на ѳавѡ́рѣ непристꙋ́пнымъ свѣ́томъ.

І҆исꙋ́съ наѵи́нъ сы́нъ, пе́рвѣе со́лнце ᲂу҆ста́ви, проѡбразꙋ́ѧ де́нь бжⷭ҇твенныѧ стрⷭ҇ти: са́мъ же, сп҃се, пре́жде честна́гѡ крⷭ҇та̀ твоегѡ̀, сїѧ̑нїѧ скры́лъ є҆сѝ со́лнца, зарѧ́ми бжⷭ҇твенными лица̀ твоегѡ̀.

Бг҃оро́диченъ: Равноси́льна, сопресто́льна родила̀ є҆сѝ сло́ва ѻ҆ц҃ꙋ̀ и҆ дх҃ꙋ: є҆го́же молѝ спⷭ҇тѝ мѧ̀, прест҃а́ѧ ѻ҆трокови́це приснодв҃о.

Пѣ́снь є҃.

І҆рмо́съ: Оу҆жасо́шасѧ всѧ́чєскаѧ ѡ҆ бж҃е́ственнѣй сла́вѣ твое́й: ты́ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.

Хрⷭ҇тꙋ̀ ра́дꙋющесѧ вѣ́рнѡ послѣ́дꙋемъ: сѐ бо и҆́детъ къ горѣ̀, ᲂу҆ч҃никѝ лꙋ́чшыѧ съ собо́ю веды́й, предъ ни́миже непристꙋ́пною добро́тою возсїѧ́въ па́че со́лнца, показа̀ сла́вꙋ свою̀.

Да просвѣти́тсѧ дне́сь нб҃о свѣтлѣ́йше, восхо́домъ є҆́же къ горѣ̀, ѿѻнꙋ́дꙋже ѡ҆блиста́етъ хрⷭ҇то́съ непристꙋ́пнымъ свѣ́томъ, со́лнєчныѧ лꙋчѝ сла́вою бжⷭ҇тва̀ ѡ҆мрача́ѧ, ꙗ҆́кѡ свѣ́та пода́тель.

Та́инство показа̀ хрⷭ҇то́съ ᲂу҆ч҃никѡ́мъ на ѳавѡ́рѣ, просїѧ́въ па́че зарѝ лице́мъ: ѻ҆де́ждою же ри́зъ свои́хъ ᲂу҆бѣли́всѧ свѣ́тлѡ ꙗ҆́кѡ снѣ́гъ, ѡ҆дѣва́ѧйсѧ ꙗ҆́кѡ ри́зою свѣ́томъ ѱало́мски.

Бг҃оро́диченъ: Сло́во во ᲂу҆тро́бѣ твое́й, чⷭ҇таѧ, воплоща́етсѧ, безслове́сныхъ плотски́хъ страсте́й мі́ръ и҆збавлѧ́ѧ.

Пѣ́снь ѕ҃.

І҆рмо́съ: Бжⷭ҇твенное сїѐ и҆ всечестно́е соверша́юще пра́зднество, бг҃омꙋ́дрїи, бг҃ома́тере, прїиди́те, рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.

Черто́гъ сла́вы бꙋ́дꙋщїѧ ра́дости дрꙋгѡ́мъ гото́вѧ, восхо́дитъ на го́рꙋ хрⷭ҇то́съ, къ житїю̀ нбⷭ҇номꙋ ѿ жи́зни до́лꙋ влекꙋ́щїѧ возводѧ̀ и҆̀хъ.

Оу҆дивлѧ́ѧ ра́зꙋмъ хрⷭ҇то́съ ᲂу҆ч҃никѡ́въ, нбⷭ҇ное на землѝ сїѧ́нїе ѡ҆блиста̀, закѡ́нъ и҆ прⷪ҇ро́кѡвъ раболѣ́пнѡ представлѧ́ѧ нача́льники: и҆́миже мє́ртвымъ и҆ живы̑мъ свидѣ́тельствꙋетсѧ бг҃ъ.

Свѣти́льникъ ꙗ҆ви́тисѧ ны́нѣ грѧде́тъ хрⷭ҇то́съ, въ те́мнѣмъ мѣ́стѣ сїѧ́нїемъ бжⷭ҇твеннагѡ блиста́нїѧ, є҆гѡ́же къ сїѧ́нїю и҆́демъ, прѧ́мѡ лицꙋ̀ є҆гѡ̀ ра́дꙋющесѧ.

Бг҃оро́диченъ: И҆зсꙋши́вши сады̀ ѕло́бы, въ тебѣ̀ прозѧбе́нїемъ сло́ва, мт҃и чⷭ҇таѧ, и҆зъ ко́рене дꙋшѝ моеѧ̀ лꙋка̑выѧ мы̑сли ѿсѣцы̀, и҆ насадѝ добродѣ́телей кра̑снаѧ, дв҃о, прозѧбє́нїѧ.

Конда́къ, гла́съ д҃.

Бжⷭ҇твеннымъ дне́сь преѡбраже́нїемъ, человѣ́ческое всѐ є҆стество̀ просїѧва́етъ бжⷭ҇твеннѡ, въ весе́лїи зовꙋ́щее: преѡбразꙋ́етсѧ хрⷭ҇то́съ, спаса́ѧй всѧ̑.

І҆́косъ:

Преѡбраже́нїемъ бжⷭ҇твеннымъ, зра́къ на́шъ, и҆́же дре́вле тлѣ́нїемъ растлѣ́нный, во а҆́довыхъ сокро́вищахъ пра́ѻтца а҆да́ма, дне́сь зижди́тель и҆зъ тлѝ возведѐ, ѡ҆божа́етъ на́шъ ра́зꙋмъ: пребыва́етъ же бг҃ъ вкꙋ́пѣ и҆ чл҃вѣ́къ, є҆стества̀ ка́ѧждо соедине́на носѧ̀, непрелѡ́жна же и҆ нераздѣ́льна. тѣ́мже ны́нѣ на ѳавѡ́рѣ несказа́ннѡ сїѧ́етъ, и҆ и҆зъ всеѧ̀ пло́ти дае́тъ лꙋчѝ бж҃ества̀ своегѡ̀, просвѣща́ѧ вопїю́щыѧ: преѡбразꙋ́етсѧ хрⷭ҇то́съ, спаса́ѧй всѣ́хъ.

Пѣ́снь з҃.

І҆рмо́съ: Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆ц҃є́въ гдⷭ҇ь и҆ бг҃ъ, благослове́нъ є҆сѝ.

Къ преложе́нїю ѿ землѝ, на высотꙋ̀ восходѧ́щемꙋ, ᲂу҆ч҃ни̑къ и҆збра́нїю послѣ́дꙋемъ, хрⷭ҇то́во смотрѧ́юще стра́нное видѣ́нїе. ᲂу҆ди́вльшесѧ же съ ни́ми возопїе́мъ: бж҃е, бл҃гослове́нъ є҆сѝ.

Ѡ҆скве́рншеесѧ ѡ҆чи́стилъ є҆сѝ є҆стество̀ человѣ́ческое водо́ю же и҆ ѻ҆гне́мъ: твое́ю пло́тїю сегѡ̀ свѣ́тлость показꙋ́еши, сп҃се, лице́мъ твои́мъ просїѧ́въ па́че со́лнца во ѻ҆́бразъ бꙋ́дꙋщїѧ сла́вы.

Взы́демъ со хрⷭ҇то́мъ на го́рꙋ ст҃ꙋ́ю, возводѧ́щимъ зеведе́євы сы́ны, и҆ петра̀ лꙋ́чшагѡ, и҆̀хже и҆збра̀ сла́вѣ свое́й свидѣ́тели, зовꙋ́щыѧ: бж҃е, бл҃гослове́нъ є҆сѝ.

Бг҃оро́диченъ: Но́во родила̀ є҆сѝ ѻ҆троча̀, є҆го́же родѝ ѻ҆ц҃ъ пре́жде вѣ̑къ, бцⷣе чⷭ҇таѧ. є҆мꙋ́же всѝ воспѣва́емъ: бж҃е, бл҃гослове́нъ є҆сѝ.

Пѣ́снь и҃.

І҆рмо́съ: Ѿтроки бл҃гочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть, тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.

Кто̀ не ᲂу҆диви́тсѧ, всецр҃ю̀ сла́вы, великолѣ́пїю сла́вы твоеѧ̀, въ не́же преѡбра́жсѧ показа́лъ є҆сѝ дрꙋгѡ́мъ твои̑мъ, бжⷭ҇твенными свѣтлостьмѝ ѡ҆блиста́въ и҆́хъ; съ ни́миже предпра́зднꙋющихъ вѣ́рою ᲂу҆ѧснѝ свѣ́томъ твои́мъ на́съ, тѧ̀ пою́щихъ.

Высотꙋ̀ нбⷭ҇нагѡ житїѧ̀, и҆ сла́вы присносꙋ́щныѧ бжⷭ҇твенное сїѧ́нїе да́рꙋй рабѡ́мъ твои̑мъ, ны́нѣ предпра́зднꙋющымъ твоегѡ̀ преѡбраже́нїѧ свѣ́тлое торжество̀: въ не́же свѣ́тъ ѡ҆блиста́ѧ, ᲂу҆ѧснѧ́еши тѧ̀ воспѣва́ющыѧ, хрⷭ҇тѐ свѣтода́вче.

Свѣ́та пода́тель, и҆ свѣ́тъ сы́й непристꙋ́пенъ, присносꙋ́щне, пребезнача́льне, ѡ҆дѣѧ́йсѧ свѣ́томъ ꙗ҆́коже ри́зою, свѣ́тъ въ мі́рѣ просїѧ́лъ є҆сѝ, съ пло́тїю прише́дъ: и҆ свѣ́тъ на горѣ̀ ѡ҆блиста́еши, сла́вы ѻ҆́ч҃їѧ показа́въ ѻ҆́бразъ.

И҆́нъ.

І҆рмо́съ: Цр҃ѧ̀ хрⷭ҇та̀, є҆го́же и҆сповѣ́даша плѣне́ннїи ѻ҆́троцы, въ пещѝ глаго́люще ве́лїимъ гла́сомъ, всѧ̑ дѣла̀ по́йте гдⷭ҇а.

Гдⷭ҇нѧ свѣ́тлагѡ преѡбраже́нїѧ, настоѧ́щїй де́нь ѡ҆блиста́въ, мі́рови повелѣва́етъ вопи́ти: всѧ̑ дѣла̀ по́йте, и҆ превозноси́те є҆го̀ во вѣ́ки.

Мы́слїю вѣ́рнїи прїиди́те по́йдемъ къ горѣ̀ ст҃ѣ́й, ви́дѣти преѡбраже́нїе хрⷭ҇то́во всесвѣ́тлое: всѧ̑ бо просвѣща́етъ, славосло́вѧщыѧ сїѐ во вѣ́ки.

Дне́сь хрⷭ҇то́вꙋ преѡбраже́нїю, чи́стымъ се́рдцемъ пред̾ꙋсрѣ́тенїе сотвори́мъ, и҆ возопїи́мъ свѣ́тлѡ: всѧ̑ дѣла̀ гдⷭ҇а по́йте, и҆ превозноси́те є҆го̀ во вѣ́ки.

Трⷪ҇ченъ: Въ ли́цѣхъ тре́хъ є҆ди́ное бжⷭ҇тво̀ бг҃осло́вимъ, ѻ҆ц҃а̀ и҆ сн҃а и҆ дх҃а прест҃а́го, кꙋ́пнѡ всѧ̑ дѣла̀ по́йте, и҆ превозноси́те є҆го̀ во вѣ́ки.

Бг҃оро́диченъ: Цр҃ѧ̀ хрⷭ҇та̀, є҆го́же на́мъ родѝ дв҃а марі́а, и҆ по рождествѣ̀ пребы́вши дв҃а чⷭ҇та̀, всѧ̑ дѣла̀, по́йте, и҆ превозноси́те є҆го̀ во вѣ́ки.

Пѣ́снь ѳ҃.

І҆рмо́съ: Всѧ́къ земноро́дный да взыгра́етсѧ дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее свѧще́нное торжество̀ бг҃ома́тере, и҆ да вопїе́тъ: ра́дꙋйсѧ, всебл҃же́ннаѧ бцⷣе, чⷭ҇таѧ приснодв҃о.

Ра́дꙋйсѧ, нб҃о, ѿ землѝ возсїѧ́ющаго ны́нѣ провѣ́дый, сл҃нца незаходи́маго, и҆ сла́вою бжⷭ҇твенною покры́ти хотѧ́щаго со́лнєчныѧ свѣ́тлѡсти: землѧ̀ же да ликꙋ́етъ свѣ́тлѡ, нбⷭ҇ною заре́ю и҆ свѣ́тлостїю сїѧ́ющи, и҆ свѣ́тъ быва́ющи.

Поѧ̀, дв҃дъ твоѐ преѡбраже́нїе предвозгласѝ: кто̀ ᲂу҆подо́битсѧ тебѣ̀ гдⷭ҇еви, глаго́лѧ, въ сынѣ́хъ бж҃їихъ; ты́ бо прославлѧ́ѧсѧ въ совѣ́тѣхъ ст҃ы́хъ, вели́къ ꙗ҆ви́лсѧ є҆сѝ сꙋ́щымъ ѻ҆́крестъ тебє̀, стра́шенъ въ сла́вѣ бжⷭ҇твеннагѡ зра́ка.

Ѽ сло́во бж҃їе, мꙋ́дрость и҆ си́ла, и҆ ѻ҆́бразъ ѻ҆́ч҃ь! ѽ бж҃е разꙋмѣва́емый вѣ́рными, и҆ чл҃вѣ́че познава́емый! твоегѡ̀ преѡбраже́нїѧ на́съ сподо́би, соверши́ти свѣ́тлое торжество̀, во свѣ́тѣ до́брыхъ дѣ́лъ сїѧ́ющихъ.

И҆́нъ.

І҆рмо́съ: Тѧ̀ неискꙋсобра́чнꙋю бцⷣꙋ, нбⷭ҇ный черто́гъ, ро́ждшꙋю нача́льника спасе́нїѧ на́шегѡ, пѣ́сньми велича́емъ.

Се́й первовхо́дный де́нь твоегѡ̀, хрⷭ҇тѐ, творѧ́ще пресла́внагѡ и҆ всесвѣ́тлагѡ преѡбраже́нїѧ, пѣ́сньми тѧ̀ велича́емъ.

Оу҆се́рднѡ вѣ́дѧще сла́вное преѡбраже́нїе гдⷭ҇не, ѡ҆зари́мъ дꙋхо́внѡ помышлє́нїѧ на̑ша, сїѐ велича́юще.

До́брымъ и҆змѣне́нїемъ и҆змѣ́ньшесѧ, хрⷭ҇то́вымъ преѡбраже́нїемъ, ѡ҆брѧ́щемсѧ свѣтоѧвле́нни добродѣѧ̑нїи на́шими, сїѐ велича́юще.

Трⷪ҇ченъ: Тѧ̀ трїѷпоста́снꙋю трⷪ҇цꙋ, и҆ нераздѣ́льное сꙋщество̀, ѻ҆ц҃а̀ и҆ сн҃а и҆ дх҃а ст҃а́го, пѣ́сньми велича́емъ.

Бг҃оро́диченъ: Тѧ̀ кꙋпинꙋ̀, ю҆́же мѡѷсе́й ви́дѣ, горѧ́щꙋю и҆ неѡпалѧ́емꙋю, ѻ҆́гнь прїе́мшꙋю бжⷭ҇тва̀, пѣ́сньми велича́емъ.

Свѣти́ленъ:

Нб҃о созда́вый, и҆ ѕвѣзда́мъ свѣ́тъ вложи́вый, дне́сь на го́рꙋ ѳавѡ́рскꙋю возше́дъ, ѡ҆свѣща́етъ ᲂу҆ч҃ники̑ заре́ю бж҃ества̀ своегѡ̀.

Сла́ва, и҆ ны́нѣ: Дне́сь на ѳавѡ́рѣ хрⷭ҇то́съ свѣ́тъ ѡ҆блиста̀, дне́сь свы́ше шꙋ́мъ, гла́съ ѻ҆́ч҃ь ᲂу҆слы́шанъ бы́сть: се́й є҆́сть, вопїѧ̀, сн҃ъ возлю́бленный мо́й.

Во Имя Отца и Сына и Святого Духа!

Преображение! Какой это замечательный праздник: он свидетельствует о духовном прообразе человека, о его духовном совершенстве.

Одна из предпраздничных стихир призывает верующих измениться лучшим изменением, чтобы достойными взойти на гору Фаворскую и видеть славу Преображения. "Но как это возможно? - спросим мы.- Можно ли за короткий срок предпразднства настолько изменить себя?" И гора Фавор - далеко, и одним посещением ее невозможно достичь совершенства. Церковь зовет нас, братья и сестры, к духовному восхождению на гору Фаворскую,- восхождению нравственному, восхождению сердцем и благой христианской мыслью.

Почему необходимо измениться лучшим изменением? Потому что быть на Фаворе со Христом, даже мысленно, может не каждый. Потому что не каждый достоин видеть славу Божию.

Господь взошел на гору Фаворскую, как говорит евангелист, чтобы помолиться, и взял с Собой только трех Своих учеников (Мф.17,1-2). Евангелист перечисляет последовательно Петра, Иакова и Иоанна. Петр был взят на Фавор, как камень веры. Господь сказал ему: ... на сем камени созижду Церковь Мою, и врата адова не одолеют ей (Мф.16,18). Апостола Иоанна Богослова по достоинству называют Апостолом любви, и можно назвать его камнем любви. Сам он имел любовь и любовь проповедовал: "...Любите не словом или языком, но делом и истиною" (1Ин.3,18). Апостол Иоанн Богослов настолько проникся добродетелью любви, что усмирял ею врагов. Любовь помогала ему везде в течение всей его жизни и особенно в изгнании на острове Патмос. Третьим камнем Фаворской горы был апостол Иаков - образец терпения. Итак, чтобы удостоиться видеть светозарное Преображение Господне, надо быть или столпом веры, или носителем любви, или уметь терпеливо принимать то, что посылается в жизни. Эти добродетели могут сделать нас достойными восхождения на Фаворскую гору.

Святая Церковь, дорогие братья и сестры, зовет нас изменить свой образ жизни, и изменить в короткое время. Святитель Иоанн Златоуст говорит, что никогда из нашей памяти не должен выходить образ благоразумного разбойника, который во едином часе раеви сподобился. Он смог уже на кресте изменить себя лучшим изменением. Нам же всегда содействует и помогает благодать Святого Духа, особенно в нашем стремлении к духовному совершенствованию. Поэтому, если ты жесток, стань милосердным: это будет доброе изменение. Если ты любишь только самого себя, научись любить своего ближнего, как самого себя. Это будет достойной переменой. Если жизнь приносит тебе скорби и печали и ты с большим трудом переживаешь ее бремя, то вспомни слова Господа нашего Иисуса Христа: В мире скорбни будете, но дерзайте... (Ин.16,33). Только дерзая, мы научимся терпению.

Если мы сумеем изменить себя лучшим изменением, то есть изменимся к лучшему, то мы, несомненно, окажемся достойными мысленно взойти на Фаворскую гору и видеть славу Преображения Господня.

Однако вы знаете, что изменения могут быть разными. О Преобразившемся Господе сказано, что вид лица Его изменился и одежда Его сделалась белою, блистающею (Лк.9,29). Мы иногда полагаем, что одеть себя в хорошие одежды и так изменить свой образ - этого достаточно. А иногда, к чему особенно любят прибегать женщины, считается достаточным изменить свое лицо с помощью косметических средств. Несомненно, не о таком изменении говорит Святая Церковь, и не к такому изменению мы призваны. Святая Церковь зовет нас к чистоте души и тела. Она призывает нас к тому, чтобы мы своим светлым лицом и добрыми очами радовали наших ближних, находящихся, может быть, в большей скорби, чем мы сами.

Праздник Преображения Господня зовет нас прежде всего к изменению нашего внутреннего образа. Сейчас это особенно удобно, потому что пост есть время покаяния. Этот пост посвящается Богородице, и Сама Пресвятая Дева Мария станет Помощницей нам в нашем духовном совершенствовании. Соделаем же себя достойными видеть Фаворский Свет через Таинство Покаяния, через очищение себя от грехов и вместе с Церковью воскликнуть: Да возсияет и нам, грешным, Свет Твой присносущный, молитвами Богородицы, Светодавче, слава Тебе.

К таким мыслям, дорогие братья и сестры, пусть устремляется ваше сердце и разум. И Господь, Преобразившийся во славе, по молитвам Пресвятой Девы Марии окажет Свою всесильную помощь в нашем духовном совершенствовании и очищении. Аминь.

Патриарх Пимен (Извеков)

18 августа 1978 года
Москва, Богоявленский собор