Пе́снь 1.

Ирмо́с: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зныма Моисе́овыма рука́ма Амали́кову си́лу в пусты́ни победи́л е́сть.

Сердца́ я́коже ру́це вси́ предугото́вльше, приходя́ща дне́сь Христа́ чи́сте прии́мем и Того́ Ду́хом Боже́ственных дарова́ний наслади́мся.

Две́ри предотве́рзши дне́сь, и́же в зако́не хра́м, Законода́вцу и Соде́телю устроя́ет вхо́ды све́тлы и гото́вит честны́я да́ры Ему́ Боже́ственное хвале́ние.

Воспою́ Тебе́, Го́споди Бо́же мо́й, младе́нствовавшему пло́тию, и зако́ну повину́вшемуся, и спа́сшему челове́ка, его́же ра́ди бы́л еси́ Челове́к.

Богоро́дичен: Разуме́в ве́тхий, Пречи́стая, хра́м Тя́, Влады́чице, Влады́це все́х и Бо́гу жили́ще чи́сто ли́к пропове́даше, велича́я сла́ву Твою́.

Пе́снь 3.

Ирмо́с: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Взыгра́шася мы́сленно, я́же в дому́ Бо́жии ше́ствия, Царя́ Христа́ хотя́ща пло́тию прия́ти.

Я́ко честны́я Христу́ предугото́вльше дне́сь, ве́рнии, да́ры прия́тны, хвалу́, Сего́ с ра́достию усря́щем.

Ны́не пре́йде се́нь и преды́де и́стина, благода́ти прише́дши, ны́не подыми́ Христа́, Симео́не.

Богоро́дичен: Преста́ е́же в се́нех и обра́зных начерта́ниих веща́ние: И́стина бо, Чи́стая, Тобо́ю яви́ся конце́м.

Седа́лен, гла́с 1.

Сокро́вище ве́чное Жи́зни вся́ческих, мене́ ра́ди под зако́ном младе́нствовавый, дре́вле начерта́вый на скрижа́лех зако́н на горе́ Сина́йстей, да вся́ измени́ши от зако́нныя дре́вния рабо́ты, сла́ва благоутро́бию Твоему́, Спа́се, сла́ва соше́ствию Твоему́, сла́ва смотре́нию Твоему́, Еди́не Человеколю́бче.

Пе́снь 4.

Ирмо́с: Вознесе́на Тя́ ви́девши Це́рковь на Кресте́, Со́лнце пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

На о́блаце носи́мь светоно́снем пло́тски, я́ко Со́лнце Пра́вды, Боже́ственныя зари́ Своя́ предлага́ет дне́сь и предозаря́ет хра́м Сво́й.

Предпра́зднственную хвалу́ Влады́це Це́рковь дне́сь привноша́ет, и Сего́, я́ко Жениха́, прия́ти све́тло гото́вится, и с Симео́ном ра́дуется; чи́ни А́нгельстии ужасо́шася, зря́ще на рука́х ста́рческих со Отце́м и Ду́хом хвали́маго, я́ко Сы́на и Бо́га на́шего.

Богоро́дичен: Я́ко ски́нию, Тя́, Пресла́вная Богоро́дице, хотя́щи прия́ти зако́нная се́нь, зако́ну Го́спода на рука́х нося́щую, Твое́ю осия́шеся благода́тию.

Пе́снь 5.

Ирмо́с: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Тя́, Го́споди, пло́тию це́рковь хотя́щи прия́ти, Боже́ственною Твое́ю и неизрече́нною Божества́ заре́ю сла́вно просвеща́шеся.

Тя́, Го́споди, рука́ми душе́вными сподо́би прия́ти хва́лящия Твое́ смотре́ние, и на́с, ве́рою пою́щих Тя́, приими́, я́ко Человеколю́бец.

Тя́, Го́споди, ра́достною душе́ю прие́млющия, пло́тию на́с ра́ди хотя́ща приити́, сподо́би с Симео́ном благодари́ти Тя́.

Богоро́дичен: Изба́вльшеся Тебе́ ра́ди сено́вныя слу́жбы, Чи́стая, ра́зумом и́стинным и ве́рою тве́рдою досто́йно Тя́ сла́вим.

Пе́снь 6.

Ирмо́с: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися ра́ди ми́лости от ре́бр Твои́х исте́кшею кро́вию.

Пе́сни, я́коже цве́ты, испле́тше дне́сь, предугото́вим ве́рою благодаре́ния вене́ц Боже́ствен Влады́це, мы́сленно приити́ хотя́щему.

Ру́ки душе́вныя Бо́гу угото́вим, я́коже Симео́н ста́рец, и в хра́м Боже́ственныя сла́вы Его́ приходя́ща, Того́ с весе́лием восприи́мем.

Творца́ веко́в ста́рец я́ко Младе́нца прие́м, Бо́га Преве́чнаго разуме́ и Све́та язы́ков во сла́ву Изра́иля, Христа́.

Богоро́дичен: Пи́шуще Богови́дно тро́стию духо́вною Тя́, проро́цы, Де́во, хра́м, и се́нь, и Боже́ственный до́м Влады́це все́х, о Тебе́ украша́хуся.

Конда́к, гла́с 6:

Со Отце́м Сло́во Сы́й неви́димо, ны́не у́бо ви́димь е́сть пло́тию: неизрече́нно от Де́вы роди́ся и на руку́ ста́рчу дае́тся святи́телю. Поклони́мся Тому́ и́стинному Бо́гу на́шему.

И́кос:

Свяще́нная трапе́за предлага́ется, празднолю́бных собо́р дне́сь, предпра́зднственная нося́щи зна́мения, Го́спода четыредесятодне́вна, из Де́вы стра́шное рождество́, и ста́рца честна́го объя́тие, и че́стна страда́льца па́мять, предпра́зднственныя хвалы́ припева́юще и́стинному Бо́гу на́шему.

Пе́снь 7.

Ирмо́с: В пещи́ Авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Це́рковь, предукра́шшися заре́ю мы́сленною, любо́вию Влады́ки все́х и Творца́, восприя́ти Его́ гото́вится и ра́достная Сему́ плете́т восхожде́ния.

И́же в не́дрех неопи́санно су́ща Оте́ческих Сло́во, Сы́на Своего́ Единоро́днаго, Ма́тернии ру́це нося́щии в це́рковь пло́тию по зако́ну я́ко Младе́нца вно́сят.

Всели́выйся Бо́г во чре́во Де́вы на рука́х Симео́на, я́ко на престо́ле о́гненнем, дне́сь седи́т.

Богоро́дичен: Ви́деша сла́ву Твою́ язы́цы вси́, Еди́на Чи́стая, те́мже тва́рей все́х Тя́ благоче́стно Цари́цу ублажа́ют и Богома́терь па́че естества́ непреста́нно сла́вят.

Пе́снь 8.

Ирмо́с: Ру́це распросте́р, Дании́л льво́в зия́ния в ро́ве затче́: о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Ру́це распросте́р Симео́н и предочи́щ ду́шу Боже́ственными дея́ньми, младе́нствовавшаго Го́спода то́кмо за бла́гость прия́т, вопия́ с весе́лием Ему́: благослови́те, вся́ дела́ Госпо́дня, Го́спода.

Све́т благода́ти Христо́вы просия́ на́м, хотя́ ввести́ в хра́м Сво́й, всесено́вная начерта́ния претворя́я я́ко Обнови́тель вои́стинну вопию́щим: благослови́те, вся́ дела́ Госпо́дня, Го́спода.

Предве́чнаго Бо́га, благоволи́вшаго на́с ра́ди младе́нствовати и на рука́х прие́млема бы́ти ста́рца Симео́на, благослови́те, вся́ дела́ Госпо́дня, Го́спода.

Богоро́дичен: И́же за благосты́ню мно́гую вочелове́чся Христо́с из Тебе́, Пречи́стая, на́с ра́ди, прия́тна дне́сь Отцу́ приноша́ет очище́ния, Еди́н Сы́й Пречи́ст и Пренепоро́чен и Тя́ Еди́ну Чисте́йшую соблюда́я Пресвяту́ю.

Пе́снь 9.

Ирмо́с: Ка́мень нерукосе́чный от несеко́мыя горы́ Тебе́, Де́во, краеуго́льный отсече́ся, Христо́с, совокупи́вый разстоя́щаяся естества́; те́м, веселя́щеся, Тя́, Богоро́дице, велича́ем.

Душе́вными Тя́ рука́ми сподо́би мя́, Благоде́телю, восприя́ти, я́коже дре́вле Симео́н, и наслади́тися Твоея́ бла́гости: Ты́ бо еси́ Еди́н жела́ние и сла́дость, Превозжеле́нный.

Мы́сленно вже́гше вси́ доброде́телей свещи́, любо́вию с Симео́ном и А́нною свещено́сцы предусря́щем, Христу́ хотя́щу приити́ освяти́ти пою́щия Его́.

Дне́сь в хра́ме Симео́н ста́рец рука́ми прия́т Христа́, Бо́га на́шего, и возопи́, глаго́ля: ны́не отпуща́еши раба́ Твоего́, Влады́ко.

Богоро́дичен: Па́че су́щих восприя́т из Тебе́ пло́ть Сло́во Вы́шняго, Чи́ст Сы́й приноша́ет Безнача́льному Отцу́ очище́ние и очища́ет любо́вию Тя́, Бо́жию Ма́терь, велича́ющия.