Пе́снь 1.

Ирмо́с: Я́ко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Непло́дствующия души́ моея́ помышле́ния непло́дная исто́ргни, непло́дныя прозябе́ние благохвали́ти начина́ющу, твое́ во утро́бе ма́терни свято́е зача́тие.

Свяще́нный Заха́рия, в хра́м вше́д, ви́де Боже́ственнаго А́нгела, ему́ я́ве возвеща́юща: сы́на в ста́рости, свяще́нниче, прии́меши Предте́чу.

Свети́льник Со́лнца сла́вы светоза́рен во чре́ве зачина́ется возсия́ти ма́терни, и́мже тьма́ разреша́ется страсте́й и непло́дствия у́зы, вели́кий Предте́ча.

Богоро́дичен: Во чре́ве Твое́м Влады́ку, в Ма́терни носи́ма, Богоро́дице Пречи́стая, чре́ве, ви́дев, взыгра́ся я́ве Иоа́нн, я́ко су́щий Того́ Предте́ча.

Пе́снь 3.

Ирмо́с: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Непло́ды дне́сь пло́д свяще́нный зачина́ет, и́же напосле́док все́ непло́дие ду́ш секи́рою мы́сленною отсещи́ хотя́щ, благода́тию.

Огло́хнув вну́трь хра́ма, Заха́рия вели́кий гла́с Сло́ва возвеще́нием стра́шным прие́млет и све́тло велича́ет Го́спода благоутро́бнаго.

Показа́вый стезю́ тве́рду ве́рным покая́ния, повеле́нием А́нгела во чре́ве ма́терни прозябе́, Боже́ственным Сове́том па́че наде́жди, сла́вный Предте́ча.

Богоро́дичен: Во чре́ве носи́маго Христа́ Де́вы я́ко позна́, и́же из непло́дове, взыгра́ся, провозвеща́я ра́дость, прише́дшую на зе́млю се́тования вся́ изба́вити.

Седа́лен, гла́с 4.

Кадя́щу в хра́ме Заха́рии свяще́нному, Гаврии́л с Небесе́ предста́, глаго́ля к нему́: я́ко в ста́рости твое́й возыме́еши пло́д благосла́вен, и непло́дство пе́рвое Елисаве́ти ны́не разреши́тся а́бие, и непло́дства рожде́ние; и заче́нши, роди́т пропове́дника Иису́сова же и Предте́чу. Те́х мольба́ми, Спа́се ми́ра, спаси́ ду́ши на́ша.

Богоро́дичен: Чи́стая, Всенепоро́чная и Неискусобра́чная, еди́на Безле́тнаго Сы́на и Сло́во Бо́жие в ле́те ро́ждшая, Того́ со святы́ми и честны́ми апо́столы, му́ченики и проро́ки, преподо́бными, моли́ дарова́ти на́м очище́ние и ве́лию ми́лость.

Пе́снь 4.

Ирмо́с: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.

Гла́с А́нгелов тя́, су́що А́нгела Христо́ва прише́ствия, свяще́ннику свяще́нно провозвести́, из чре́ва непло́днаго прозяба́ти, блаже́нне Предте́че.

Пре́жде безча́дная и неражда́ющая, ны́не весели́ся, непло́ды, я́ко Христо́ва Крести́теля и Предте́чу плодороди́ши всесла́вно, Елисаве́то досточу́дная.

Секи́рою, Предте́че, твоея́ моли́твы страсте́й мои́х те́рние и помышле́ний исто́ргни преткнове́ния и плодоно́сен мо́й у́м доброде́тельми, всеблаже́нне, сотвори́.

Богоро́дичен: Чре́во Тя́ ноша́ше, вся́ нося́щаго, Де́вы, егда́ Крести́тель, во утро́бе носи́мь, Тебе́ поклони́ся, Христе́, и игра́я веселя́шеся.

Пе́снь 5.

Ирмо́с: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, И́стиннаго Бо́га, от мра́ка грехо́внаго взыва́юща.

Иду́щу вну́трь святи́лища и зако́нныя Творцу́ слу́жбы принося́щу яви́ся проро́ку святы́й А́нгел, возвеща́я Предте́чи боже́ственное зача́тие.

Ка́ко бу́дет сие́ мне́? Явле́нно е́смь бо ста́рец, я́ко ви́диши, и непло́дну сопру́жницу и́мам, рече́ Заха́рия ко Арха́нгелу: естества́ проти́вныя мне́ глаго́леши глаго́лы.

К Са́рре воззри́ Авраа́мове и ви́ждь, ка́ко она́ Исаа́ка в ста́рости роди́, челове́че, и глаго́лемым пра́ведно ве́руй, ста́рцу приглаша́ше вели́кий Арха́нгел.

Богоро́дичен: Благослове́нна в жена́х Ты́, Богора́дованная, я́ве Елисаве́т вопия́ше Тебе́, егда́ ражда́ющу безму́жно позна́ Тя́, еди́ну по рождестве́ нетле́нну пребы́вшу.

Пе́снь 6.

Ирмо́с: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти́: возведи́ от тли́ живо́т мо́й, Многоми́лостиве.

Сомне́нно и́мам помышле́ние а́з, и не ве́рую словесе́м твои́м, Арха́нгелу рече́ свяще́нник: люде́й бо спасе́ния, не от мои́х чре́сл плода́ прошу́.

Созда́тель естества́, А́нгелов Ца́рь, служи́тель отвеща́, прише́ствия Своего́ А́нгела благоволи́ роди́ти тебе́; мои́м словесе́м не не ве́руй, челове́че.

Ви́д тво́й о́гнен, и взо́р тво́й стра́шен, и чу́дно сло́во твое́, Заха́рия рече́ служи́телю: но у́бо не ве́рую тебе́, па́че естества́ глаго́лющу ми́ стра́нныя глаго́лы.

Богоро́дичен: Свети́льник Со́лнца во о́блаце Ма́терни утро́бе скрыва́ема, позна́в, сы́й в те́мнем ложесна́ селе́нии, поклони́ся, ра́дуяся, и игра́ше.

Конда́к, гла́с 1.

Весели́тся све́тло Заха́рия вели́кий со всесла́вною Елисаве́тию сопру́жницею, досто́йно зачина́юще Иоа́нна Предте́чу, его́же Арха́нгел благовести́, ра́дуяся, и челове́цы достодо́лжно почти́м, я́ко таи́нника благода́ти.

И́кос:

Свяще́нное Ева́нгелие разгне́м, е́же Лука́ на́м написа́, свяще́нный и чу́дный, и Предте́чево у́зрим зача́тие, све́тлое и честно́е. Глаго́лет бо: я́ко вни́де ста́рец и пра́ведный Заха́рия во Свята́я Святы́х, е́же покади́ти во вре́мя чреды́, предста́ ему́ Гаврии́л, благовеству́я и глаго́ля: возыме́еши сы́на, священнонача́льниче, в ста́рости, проро́ка же и Предте́чу, гла́са же и пропове́дника присносве́тлаго, и таи́нника благода́ти.

Пе́снь 7.

Ирмо́с: Росода́тельну у́бо пе́щь соде́ла А́нгел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.

Не ве́ровав мои́м глаго́лом, оглохнове́ние приими́ явле́ннейше, и ражда́емь егда́ у́зриши гла́с Сло́ва, восприими́ гла́с, благослове́н еси́, вопия́, Изра́илев Бо́же.

Луне́ Елисаве́ти примеша́яся, многосве́тлый, я́ко со́лнце, Заха́рия светоно́сна свети́льника све́та породи́, светя́ща на́м, су́щим во тьме́ страсте́й, держи́мым лю́те.

Игра́ния я́ко глаго́лы употреби́в, Христе́, вели́кий Предте́ча поклони́ся Тебе́ в чре́ве де́вственнем, са́м носи́мь утро́бою Елисаве́тиною, Иису́се; отце́в на́ших Бо́же, благослове́н еси́.

Богоро́дичен: Луна́ Елисаве́т, вну́трь нося́щи звезду́, боже́ственнаго Предте́чу, поклони́ся све́тлому о́блаку, Мари́и, Со́лнце нося́щей, Христа́, плотоноси́ма от Нея́ на спасе́ние на́ше.

Пе́снь 8.

Ирмо́с: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Женихо́в дру́г предуготовля́ется, гла́с же Сло́ва нача́ло прие́млет, и в непло́дней ны́не утро́бе пита́ется, Всецаря́ вели́кий во́ин.

Непло́дным сердца́м де́латель процвете́, страсте́й секи́ра уже́ куе́тся, теле́ц честны́й воздержа́ния пита́ется, Предте́ча вели́кий: лю́дие, весели́теся.

У́зы я́коже дре́вле непло́дныя, моего́ помышле́ния си́це окамене́ние разреши́, Крести́телю, и плоды́ покая́ния мя́ сотвори́ возраща́ти, и жи́ти во ве́ки.

Богоро́дичен: Чревоно́сную Тя́, Отрокови́це, я́ко Елисаве́т ви́де, боже́ственне возра́довася, вну́трь ея́ младе́нцу взыгра́вшуся, я́ко позна́вшу своего́ Влады́ку.

Пе́снь 9.

Ирмо́с: Бо́га челове́ком невозмо́жно ви́дети, на Него́же не сме́ют чи́ни а́нгельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с Небе́сными во́и, Тя́ ублажа́ем.

Христо́в вели́кий и боже́ственный Предте́ча, непло́дная ны́не врата́ отве́рз, водворя́ется, я́ко во ца́рских, в боку́ ма́тере: да я́ко во́ин произы́дет, Всецаря́ пути́ уготовля́я.

Бо́жий проро́че, ста́рче, лику́й, роди́ши бо сы́на, его́же бо́льший в челове́цех не воста́, Иоа́нна, Госпо́дня Предте́чу, взыгра́й, Елисаве́т, земля́ вся́, — ра́дуйся, — хвалу́ все́х Творцу́ Бо́гу принося́щи.

На́с, ве́рою благохва́лящих тя́, помяни́ ны́не, Госпо́день проро́че и Предте́че, от душе́вных страсте́й избавля́я: спаса́й ны́ от бе́д, к Небе́сней стези́ путево́ждствуя боголе́пно, присноблаже́нне.

Богоро́дичен: Чи́стую Ма́терь я́ве позна́ Тя́, непло́дных у́з Елисаве́т я́ко ощути́ разреше́ну себе́ и нося́щу Предте́чу во утро́бе Твое́й Все́льшагося, Чи́стая Де́во, Мариа́м Богора́дованная.

Свети́лен.

Предте́чево сла́вное зача́тие предвозвеща́ет из Де́вы хотя́щаго роди́тися Царя́, я́ко се́й от Елисаве́ти непло́дныя и безча́дныя, ста́рца же и иере́я Заха́рии вели́каго. И́хже моли́твами, и Богоро́дицы, и Иоа́нна Крести́теля Твоего́, Го́споди, спаси́ и уще́дри вся́.

Сла́ва, и ны́не: Сотвори́ я́ко и́стинно с Тобо́ю вели́чия Сы́н предве́чный сове́том Оте́ческим, Жи́знь бо безсме́ртную безстра́стно родила́ еси́, и пребыла́ еси́ я́ко пре́жде рождества́, ма́терских избе́гши, и Де́ва по рождестве́ пребыла́ еси́, Де́во.