Пе́снь 1.

Ирмо́с: Помо́гшему Бо́гу во Еги́пте Моисе́ови, и те́м фарао́на со всево́инством погрузи́вшему, побе́дную пе́снь пои́м, я́ко просла́вися.

От на́с, о Ма́ти, ча́д Твои́х, ли́к святы́й Тво́й обстоя́щих, любо́вь на́шу и благода́рственную пе́снь ны́не приими́, и из глубины́ души́ приноси́мая воздыха́ния Ма́терски услы́ши, и вся́ на́ша печа́ли утоли́, ве́рно Тя́ велича́ющих, сла́вно бо просла́вишася Твоя́ чудеса́.

Всесвято́е лице́ Твое́, Де́во Чи́стая, я́ко ра́й све́тел рабо́м Твои́м яви́ла еси́, благода́тию и жи́знию ды́шущее все́м взира́ющим, и благогове́йно покланя́ющимся ему́ и Тя́ воспева́ющим: сла́вно бо просла́вишася Твоя́ чудеса́.

Го́ру Афо́нскую, ве́рнии, умы́ обы́мем вси́ усе́рдно, и у́зрим та́инство Бо́жия Ма́тере, на́с ра́ди бы́вшее: сла́вно бо просла́вишася на Горе́ се́й ди́вная Тоя́ чудеса́.

Богоро́дице Де́во, ра́досте и упова́ние на́ше! Ка́ко Небе́с Вы́шшая, на земли́ птенце́в Твои́х не оставля́еши, но я́ко ко́кош согрева́еши и́х и Небе́сныя пи́щи насыща́еши? Те́мже воспева́ем Тя́: сла́вно бо просла́вишася на Горе́ се́й ди́вная Твоя́ чудеса́.

И́н.

Ирмо́с: То́йже.

В зе́млю Святу́ю, Го́ру сию́ Боже́ственную, вни́ти мя́ сподо́била еси́, Богоро́дице, в не́йже кро́тцыи, смире́ннии и чи́стии се́рдцем то́кмо водворя́ются. Те́мже покая́нием мя́ очи́стив, подража́теля те́х сотвори́, я́ко да с ни́ми ра́дуяся непреста́нно пою́ Ти, сла́вно бо просла́вишася на Горе́ се́й ди́вная Твоя́ чудеса́.

От мирска́го пле́на повеле́нием Твои́м, Ма́ти Бо́жия, изыдо́х. Те́мже вы́шния рабо́ты де́лателя иску́сна, о Влады́чице Пречи́стая, и мене́ неиску́сна су́ща соде́лай, я́ко да то́ю просвеща́яся, ра́достно и а́з пою́ Твоя́ чудеса́.

Сла́ва: Ду́хом Святы́м от Отца́ исходя́щим и в Сы́не Твое́м почива́ющим, о Влады́чице Богоро́дице, просвети́ мя и у́м преста́вити к вы́шним сподо́би, да горе́ умо́м вы́ну водворя́яся, непреста́нно пою́ Твоя́ чудеса́, сла́вно бо просла́вишася.

И ны́не: Го́рдаго зми́я Рождество́м Твои́м, Всенепоро́чная, низложи́ла еси́: те́мже си́лою из Тебе́ Рожде́ннаго, и мене́ безси́льнаго на враги́ моя́ укрепи́, и на по́двиг зва́ния Твоего́ воста́ти сподо́би, да и а́з воспою́ ра́дуяся Твоя́ чудеса́, сла́вно бо просла́вишася.

Пе́снь 3.

Ирмо́с: Да утверди́тся се́рдце мое́ в во́ли Твое́й, Христе́ Бо́же, И́же над вода́ми Не́бо утвержде́й второ́е, и основа́вый на вода́х зе́млю, Всеси́льне.

Невмести́маго Бо́га во утро́бе Свое́й несказа́нно вмести́вшая, Де́во, и руко́ю Твое́ю носи́вшая дла́нию Содержа́щаго вся́, дне́сь и рабы́ Твоя́, под кро́в Тво́й прите́кшия, богоно́сцы соде́лай и сердца́, Иису́са нося́щая, и́м сотвори́.

Благоукраси́ся дне́сь оби́тель Ру́сская и приими́ Богоро́дицу Де́ву Всецари́цу. Та́ бо во смире́нии Свое́м па́че со́лнца сия́ющи к на́м яви́ся, Ю́же А́нгели незри́мо че́стне дорино́сят, да сердца́, Иису́са нося́щая, рабо́м Свои́м сотвори́т.

Боже́ственную сию́ ико́ну Твою́ отцы́ всечестни́и благогове́йне прия́ша, и ра́дующеся удивля́хуся: ка́ко ми́лость все́м Подаю́щая ми́лостыню от раба́ восприя́ла еси́? Те́мже мо́лим Тя́, Пречи́стая, ми́лости Твоея́ и на́с, ра́б Твои́х, не лиши́, но сердца́, Иису́са нося́щая, на́м сотвори́.

Цве́те прекра́сный, и воня́ пи́щная, облагоуха́еши, Богоро́дице Мари́е, вся́ Тебе́ вверя́ющияся, и спаса́еши, и от страсте́й исцеля́еши, и сердца́, Иису́са нося́щая, и́м сотворя́еши.

И́н.

Неве́сто нетле́нная, Чи́стая и сладча́йшая, Иису́са сладча́йшаго Ма́ти, ду́шу мою́ те́мную просвети́, и селе́ние чи́стое Го́споду и Сы́ну Твоему́, о Пречи́стая, покажи́, и пода́ждь ми́ моли́тву моля́щемуся Тебе́.

И́мя Твое́, Благода́тная Де́во, Мари́е Всечи́стая, вселе́нную всю́ озари́, ве́рных сердца́ просвеща́ющи: те́мже и се́рдце мое́ страстьми́ омраче́нное просвети́, и всади́ в него́ моли́тву моля́щемуся Тебе́.

Сла́ва: Не пре́зри, Го́споди, убо́гаго се́рдца моего́ двиза́ния ма́лаго, оскуде́ бо кре́пость моя́, ми́лость же Твоя́, Бо́же, я́коже Са́м ре́кл еси́, моли́твами Пречи́стыя Твоея́ Ма́тере, да помо́жет ми́ и пода́ст моли́тву моля́щемуся Тебе́.

И ны́не: Се́рдце Го́сподеви прилепле́но, Ма́ти Бо́жия, да́руй ми́, Пречи́стая, рабу́ Твоему́, красоту́ в не́м Боже́ственную напису́ющи, и моли́тву в то́е всели́ моля́щемуся Тебе́.

Седа́лен, гла́с 4.

Удиви́шася, Чи́стая, ли́цы А́нгельстии, ка́ко Прича́стница су́щи богате́йшия ра́дости Небе́сныя, во юдо́ли скорбе́й челове́ческих при́сно пребыва́еши, и на вся́кий во́пль моли́твы Ма́терски отвеща́еши и благода́ть раздае́ши неиждива́емую: больны́х исцеля́ющи и печа́льных утеша́ющи, Де́во Ма́ти Госпо́дня, и сокро́вище простра́ннейшее ми́лости Боже́ственныя?

Пе́снь 4.

Ирмо́с: На земли́ Твое́ смире́нное явле́ние узре́вше, чи́ни Небе́снии удиви́шася, милосе́рдие Твое́ хва́ляще, вся́ же тва́рь воспе́ Тя ра́дующися, и испо́лнишася вся́ Твоего́ хвале́ния, Чи́стая.

Сою́зом любве́ собра́ние светоза́рное рабо́в Твои́х, Богоро́дице, о Го́споде связу́емо, зло́бу всю́ и кова́рство зми́евы си́лою Твое́ю и благода́тию мужему́дренно низлага́ет. Сего́ ра́ди при́сно Тебе́ вопие́т: да испо́лнятся вся́ Твоего́ хвале́ния, Чи́стая!

Гора́ сия́ Свята́я нарече́ся, я́ко промышле́нием и чудесы́, и посеще́ньми Твои́ми при́сно, Де́во, красу́ется, в не́йже до́бле вси́ подвиза́ющиися стяжа́ша Тя́ ве́рную Хода́таицу и Храни́тельницу при́сную во все́м житии́ свое́м. Да испо́лнятся вся́ Твоего́ хвале́ния, Чи́стая!

Ка́ко бре́нная рука́ пречи́стых дла́ней Твои́х не ужасе́ся? Ка́ко прикосну́тися к ни́м не вострепета́? Ка́ко ми́лостыню в ни́х положи́ти не устыде́ся? Вои́стинну, то́кмо повеле́нием Твои́м и изволе́нием, Чи́стая, да чу́до но́вое яви́тся и неизрече́нное, и испо́лнятся вся́ Твоего́ хвале́ния.

Ви́дя ста́рец вра́тарь явле́ние ди́вное, Де́ву Чи́стую, Ея́же и́мя от младе́нства своего́ призыва́ше, я́ко младе́нец диви́ся бы́вшему, оба́че я́ко послушли́в сы́й, ру́ку простре́ на подая́ние, вопия́: да испо́лнятся вся́ Твоего́ хвале́ния, Чи́стая!

И́н.

Ка́я ско́рбь обдержи́т мя́, егда́ в де́нь стра́шный о́ный ста́до Твое́ к Сы́ну Своему́ приведе́ши, глаго́лющи: се́, А́з, Влады́ко, и ча́да Моя́ и́хже да́л Ми́ еси́, се́й же кто́ е́сть не ве́м? Но молю́ Тя, Влады́чице: пощади́ мя, и внегда́ осужда́тися души́ мое́й, ми́лость Свою́ помяни́!

О, каковы́я сла́вы, окая́нный, са́м себе́ лиши́х! О, каково́ сыновство́ и насле́дие, стра́стный, са́м от себе́ отверго́х! Ри́зу све́тлу, ю́же свы́ше прия́х, зле́ низри́нух и обе́ты вся́ оскверни́х! Но молю́: Ма́ти Бо́жия, пощади́ мя, и внегда́ осужда́тися души́ мое́й, ми́лость Свою́ помяни́.

Сла́ва: Во смире́нии вели́каго, кро́ткаго же в пра́вде Го́спода на суди́щи стра́шнем, о Всеми́лостивая, ми́лостива и милосе́рда ми́ соде́лай. А́з бо ни еди́ныя за́поведи Его́ соблюдо́х, ни обе́тов свяще́нных испра́вих. Сего́ ра́ди молю́ Тя, Всечи́стая: внегда́ осужда́тися души́ мое́й, ми́лость Свою́ помяни́.

И ны́не: Хра́м Тя́ свя́т и пречи́ст ве́сь Бо́г Сло́во соде́ла. Сего́ ра́ди молю́ Тя, Всечи́стая: я́ко хра́м мя́ вельми́ оскверне́н па́ки ве́сь Тому́ обнови́, помяни́ ми́лость Свою́, да испо́лнюся и а́з Твоего́ хвале́ния, Чи́стая.

Пе́снь 5.

Ирмо́с: Све́т Тво́й незаходи́мый возсия́й, Влады́чице, в сердца́х ве́рно пою́щих Ти́, ми́р подава́й на́м па́че ума́: и́мже от но́щи неве́дения ко дню́ све́том Твои́м теку́ще, славосло́вим Тя́, Пренепоро́чная.

Со́лнце све́тлое, во смире́нии Твое́м блиста́ющее, возсия́ ико́на Твоя́, Богома́ти Всенепоро́чная, све́т Боже́ственный с любо́вию к Тебе́ притека́ющим излива́ющая и согрева́ющая сердца́ к подража́нию боголе́пнаго жития́ Твоего́, ве́рно призыва́ющих и́мя Твое́, Благода́тная.

Ме́чь Боже́ственный, и́мя сладча́йшее Сы́на Твоего́ Иису́са рабо́м Твои́м дарова́ла еси́, Богоро́дице, и́мже на́глость бесо́вская посека́ется и свире́пство пло́ти закала́ется, и победоно́сцы до́блии Христо́вы явля́ются, ве́рно имену́ющии и́мя Того́ благода́тное.

Све́тло возсия́ и вселе́нную всю́ озари́ и́мя Твое́, Благода́тная Де́во, Мари́е Всепе́тая, се́нь лука́вствия упраздни́вшее, омраче́ние серде́ц отъемлющее, ве́рно призыва́ющих Тя́, Благода́тная.

Боже́ственный Тво́й вертогра́д, я́ко ра́й изоби́лием щедро́т Твои́х присноцвету́щ, па́ки дне́сь от Богоподо́бныя добро́ты Твоея́ угобзи́ла еси́, и ми́лости Твоея́ неизглаго́ланныя и смире́ния арома́т во ве́сь ми́р облагоуха́ла еси́. Да пое́тся и́мя Твое́, Благода́тная!

И́н.

Се́ падо́х, Влады́чице, се́ умро́х. А́з бо враги́ моя́, я́коже Ты́ рекла́ еси́, до конца́ не изби́х, во́ли всеокая́нныя своея́ не пожро́х, пло́ти вселука́выя не закла́х. Но молю́ Тя, Всечи́стая, ре́вность Боже́ственную ма́нием Твои́м низпосли́ ми, да я́коже о́гнь с Небесе́ низходя́й, супоста́ты моя́ вся́ поя́ст.

И́мя Твое́, Благода́тная Мари́е, победи́тельно е́сть и всеси́льно, и́мже А́нгельстии ли́цы просвеща́ются, де́монская же стада́ го́рце попаля́ются, е́же призыва́ти и мене́, Богоро́дице, научи́, я́ко да о́гнь от него́ исходя́й, супоста́ты моя́ вся́ поя́ст.

Сла́ва: Удивля́ются ли́цы А́нгельстии, Де́ву Пресве́тлую, Све́т от Све́та на руку́ Свое́ю носи́вшую, и Све́т от Отца́ исходя́щий, и в душа́х ве́рных моли́тв Ея́ ра́ди возсиява́ющий зря́ще. Сего́ ра́ди и а́з окая́нный о́бразу Твоему́ припа́дая, умоля́ти дерза́ю: луче́ю еди́ною Божества́ Трисия́ннаго ду́шу мою́ просвети́, да о́гнь от нея́ исходя́й, супоста́ты моя́ вся́ поя́ст.

И ны́не: Чи́стая Де́во, Све́та жили́ще, И́мже ми́р ве́сь просвети́ла еси́, ду́шу мою́ грехми́ потемне́нную посеще́нием Твои́м озари́, да Све́т из Тебе́ исходя́й, супоста́ты моя́ вся́ поя́ст.

Пе́снь 6.

Ирмо́с: Проро́ка Ио́ну подража́я вопию́: живо́т мо́й, Бла́же, свободи́ из тли́, и спаси́ мя, Спа́се ми́ра, зову́ща: сла́ва Тебе́.

А́ще и сокрыва́ешися вма́ле, Де́во, смире́ния ра́ди вели́каго Твоего́, подо́бие рабо́в Твои́х убо́гое прие́мши, но Ду́х Всесвяты́й в сердца́х лю́бящих Тя́ о Тебе́ вопие́т: се́ Ма́ти Бо́га ва́шего! То́й ны́не поклони́теся, любо́вию зову́щи: сла́ва Тебе́.

Честно́е о́браза Твоего́ явле́ние зря́ще, хва́лим ве́рнии, словесы́ Тя́ воспева́юще, Чи́стая, я́ко Цари́цу, и воздыха́нии серде́чными блажа́ще глаго́лем: Ма́ти Бо́жия, сла́ва Тебе́.

Торжеству́ем вси́, любо́вию пою́ще Тя́, и явле́ние Твоего́ о́браза сла́вяще: не преста́й, Де́во, моли́твами Твои́ми спаса́ти рабы́ Твоя́ от вся́кия беды́, ве́рно призыва́ющия Тя́, Благода́тная, и зову́щия: Ма́ти Бо́жия, сла́ва Тебе́.

Ра́достни и престра́шни бы́ша раби́ Твои́, Чи́стая, дру́г ко дру́гу глаго́лаху: ка́ко о́чи на́ша держа́стася? Ви́дехом бо Тя́ посреде́ на́с про́сту и стра́нну, и ти́хо ходя́щую. Удиви́вшеся же и земли́ прекло́ньшеся, Тебе́, Влады́чице все́х, поклони́шася, зову́ще: Ма́ти Бо́жия, сла́ва Тебе́.

И́н.

Зве́рь мя́ раздра́, Всечи́стая, и́же пло́ть моя́ вселука́вая е́сть, ю́же гре́ях а́з и ласка́х, и пита́х, но сия́ мя внеза́пу низри́ну. Сего́ ра́ди зову́: Ма́ти Бо́жия, из истле́ния мя́ исхити́!

Оскверни́х преслуша́нием обновле́ния ри́зу, ю́же от Тебе́, о Влады́чице моя́, иногда́ восприя́х. В ро́в уны́ния низпадо́х и лише́н доброде́тели, но с Ио́ною Тебе́ вопию́: Ма́ти Све́та! Очи́сти, испра́ви мя́, Чи́стая, и из ти́ны страсте́й исхити́.

Сла́ва: Се́, при две́рех сме́рть, душе́ моя́, предстои́т и во чре́во а́дово низвести́ тя гото́ва е́сть. Воспряни́, о душе́, возопи́й: пощади́, пощади́ мя, Влады́ко, и моли́твами Ро́ждшия Тя́ от зве́ря сего́ исхити́.

И ны́не: Заблуди́х, Госпоже́ моя́, отпадо́х от стези́ спаси́тельныя, по пути́ бо во́ли своея́ всегда́ хожда́х. Но молю́: пощади́, взыщи́ и наста́ви мя́, Чи́стая, и от конца́ всепоги́бельнаго исхити́.

Конда́к, гла́с 2.

О, неизрече́ннаго и благосе́рдаго Твоего́ смотре́ния, честне́йшая Херуви́м и сла́внейшая без сравне́ния Серафи́м! О́браз Тво́й Светоявле́нный, и самоизображе́нный свиде́тельство яви́ся Твоея́ неизрече́нныя любве́ и милосе́рдия, почита́ем то́й, лобыза́юще.

И́кос:

Уверя́ющи челове́ком та́йну Своего́ Богома́терняго промышле́ния и первосказа́нное Свое́ обетова́ние уде́лу Своему́ земно́му подтвержда́ющи, светописует нерукотворе́нный о́браз Сво́й Влады́чица в вертогра́де Святы́я Горы́ Афо́нския, в оби́тели ру́сских мона́хов, во утеше́ние и спасе́ние все́х нужда́ющихся и призыва́ющих Ея́ Боже́ственное предста́тельство, то́йже объе́млюще душе́ю и се́рдцем, почита́ем, лобыза́юще.

Пе́снь 7.

Ирмо́с: В гремя́щую пе́щь сни́де А́нгел Госпо́день к су́щим о Аза́рии отроко́м, и не прикосну́ся и́х отню́д о́гнь. Тогда́ трие́ воспева́юще глаго́лаху: благослове́н еси́, Бо́же оте́ц на́ших.

О́браз Тво́й святы́й отцы́ узре́вше, благода́тию Боже́ственною зело́ уязви́шася, та́же любо́вию Бо́жиею распали́шася, в пре́дняя простира́ющеся, за́дняя вся́ оставля́юще. Благода́тию Твое́ю и на́с, ли́ку Твоему́ покланя́ющихся, Ма́ти Бо́жия, уязви́, ве́рою Ти́ пою́щих: ра́дуйся, отце́в на́ших Боже́ственная похвало́.

У́м вся́к ужаса́ется, благоутро́бие Твое́ мно́гое, Де́во Чи́стая, зря́й. Ты́ бо снизхожде́нием Твои́м Ма́тернее попече́ние показа́ла еси́ все́м во жре́бии Твое́м живу́щим, и́мже помышле́ния рабо́в Твои́х от смуще́ния и ско́рби к богомы́слию возве́дши но́вый ли́к и богогла́сный певце́в Твои́х яви́ла еси́. С ни́миже и мы́ Тебе́ дне́сь вопие́м: ра́дуйся, отце́в на́ших Боже́ственная похвало́.

Дне́сь Богоро́дица на Горе́ Афо́нстей посреде́ друго́в Свои́х яви́ся, я́коже обеща́ николи́же оставля́ти и́х, но во все́м бы́ти и́м Помо́щница и Храни́тельница, та́ко и ны́не сотвори́. Ю́же восхваля́юще вси́ возопии́м: ра́дуйся, отце́в на́ших Боже́ственная похвало́.

Чу́до сие́ зря́ще, помяни́те вся́ ели́ка ва́м обетова́х: я́ко бу́ду ва́м Пита́тельница и Промысли́тельница, Икономи́сса и Млекопита́тельница, бе́д Предвозвести́тельница и враго́в Бори́тельница, Врачева́тельница и смире́нная Врата́рница, и во вся́ких ну́ждах ско́рая и наде́жная ва́ша Послу́шательница. Да на Небесе́х умо́м вы́ну пребыва́юще, Сы́ну Моему́ еди́ному собесе́дуете, при́сно вопию́ще: отце́в и на́ш Бо́же, благослове́н еси́.

И́н.

Заблуди́х, о Ма́ти Бо́жия, отпадо́х, и добро́ту души́ моея́, ю́же ми́ дарова́ла еси́, в ро́в страсте́й, окая́нный, безсты́дно низри́нух. Но молю́: до конца́ не отри́ни мя́, Всечи́стая, житие́ уны́ло иму́щаго, но всего́ мя покая́нием па́ки очи́сти и о́гненных слу́г Твои́х соприча́стника сотвори́, моли́тв бо ра́ди отце́в мои́х на Тя́, о Пречи́стая, упова́ю.

Преслуша́ние дерзнове́ния мя́ обнажи́ и стыжду́ся: ка́ко пред лице́ Твое́ прииду́? Ки́има очи́ма на Тя́ воззрю́? Ка́ко о́бразу Твоему́ честно́му дне́сь поклоню́ся? Но молю́ся благоутро́бию Твоему́: ри́зу ми́, о Всеми́лостивая, пе́рвую да́руй и я́ко Упра́вительница мя́ спаси́, моли́тв ра́ди отце́в мои́х на Тя́, о Пречи́стая, упова́ю.

Сла́ва: О́гнь любве́ Боже́ственныя вну́трь себе́ нося́ща сотвори́ раба́ Твоего́, Ма́ти Безневе́стная, о́гнь Божества́ во утро́бе Свое́й неопа́льно вме́щшая. Си́м у́бо ми́ зе́льне распаля́ему, хвра́стное страсте́й мои́х потреби́тся мно́жество, моли́тв бо ра́ди отце́в мои́х на Тя́, о Пречи́стая, упова́ю.

И ны́не: Нетле́нное Сло́во, тле́ния на́с изба́вльшее, па́че сло́ва родила́ еси́. Сего́ ра́ди и мене́, молю́ся, от страсте́й очи́сти, да возсле́дую все́м се́рдцем Тебе́ и бою́ся Сы́на Твоего́ и лица́ Его́ вы́ну взыщу́, моли́тв бо ра́ди отце́в мои́х на Тя́, о Пречи́стая, упова́ю.

Пе́снь 8

Ирмо́с: Пе́снь Тебе́ прино́сим безпло́тных, я́коже о́троцы в пещи́, и пою́ще глаго́лем: благослови́те, вся́ дела́ Госпо́дня, Го́спода.

Ста́до слове́сное я́ко Па́стыря Ма́ти в жре́бии апо́стольскаго служе́ния Твоего́ собрала́ еси́, благода́ть Христо́ву в не́м при́сно пропове́дающи, ниже́ в Писа́ниих, ни в словесе́х, но в сами́х сердца́х со вла́стию и си́лою Боже́ственною мно́гою о Ду́се Свя́те, Де́во, известву́ющи. Да́р бо се́й, я́ко Ма́тери Христо́вой, Ду́хом дарова́ся Ти́, и́мже просвети́ и на́с, да превозно́сим и пое́м Тебе́ во ве́ки.

Боже́ственною благода́тию в покая́нии держа́вно оде́явшеся и свещи́ ве́ры возжже́нныя нося́ще, врага́ низложи́ти си́лу потщи́мся, да венцы́ прии́мем от Христа́ Бо́га по достоя́нию, я́ко избра́нницы и таи́нницы Пречи́стыя Его́ Ма́тере, пою́ще и благословя́ще Ю́ во ве́ки.

Дне́сь о чудесе́х Твои́х, Влады́чице, на Горе́ Святе́й се́й бы́вших, благодаре́ния Тебе́ прино́сим. Те́мже Ти́ моля́щияся облагодати́, и житие́ испра́ви, и спасе́ние ду́ш на́ших испроси́, да превозно́сим и пое́м Тебе́ во ве́ки.

Зри́м Тя́, я́ко дре́вле Моисе́й, во огни́ Ду́ха Всесвята́го благода́тию блиста́ющую, е́юже души́ лю́бящих Тя́ согрева́еши, те́рния страсте́й вся́ попаля́еши и слуги́ Твоя́ я́ко пла́мень о́гненный явля́еши, с ни́миже и на́с, рабо́в Твои́х, сопричти́, да превозно́сим и пое́м Тебе́ во ве́ки.

И́н.

Ви́ждь, о Ма́ти Всесвята́я, се́рдца моего́ печа́ль, ви́ждь и обраще́ние души́ моея́, ви́ждь и сле́зы, и не отврати́ мене́, но обыми́ мя па́ки, е́смь бо отроча́ Твое́, и испра́ви безобра́зие мое́, и по кончи́не со отцы́ мои́ми сопричти́, пою́ща и превознося́ща Тя́ во ве́ки.

И помышле́ньми поползну́вся и де́лы прегреши́в, рыда́ю и стеню́, и вопию́: Ма́ти Бо́жия, спаси́ мя, и злосмра́дие грехо́в во благоуха́ние духо́вное претвори́, и по кончи́не со отцы́ мои́ми сопричти́, пою́ща и превознося́ща Тя́ во ве́ки.

Сла́ва: Све́тлыми моли́твами Твои́ми, Де́во, мы́сленная моя́ очеса́, омраче́нная зло́бою, просвети́ молю́ся, и на пу́ть покая́ния наста́ви мя́, прошу́ Тя́: я́ко да до́лжно Тя́ песносло́влю, па́че сло́ва Сло́во воплоти́вшую, поя́ и превознося́ Тя́ во ве́ки.

И ны́не: Богороди́тельнице Чи́стая, низве́рженных исправле́ние еди́но, испра́ви и мене́, вся́кими страстьми́ сокруше́ннаго всего́ и да́же до а́да низве́ргшагося, грехопаде́ний мои́х ра́ди. Но молю́: рукописа́ние грехо́в безсту́дных мои́х разори́, и со отцы́ мои́ми сопричти́, пою́ща и превознося́ща Тя́ во ве́ки.

Пе́снь 9.

Ирмо́с: Светоно́сный о́блак, во́ньже все́х Влады́ка, я́ко до́ждь с Небесе́ на руно́ сни́де, и воплоти́ся на́с ра́ди, бы́в Челове́к, Безнача́льный, велича́ем вси́ я́ко Ма́терь Бо́га на́шего Чи́стую.

Припе́в: Велича́й, душе́ моя́, явле́ние чу́дное и пресла́вное Пречи́стыя Влады́чицы.

Припе́в: Велича́й, душе́ моя́, явле́ние чу́дное и пресла́вное Пречи́стыя Влады́чицы.

Ка́ко очеса́ на́ша измени́ша на́м? Ка́ко ви́дяще Тя́, Ма́терь Све́та, не позна́хом? Си́це бо, Влады́чице, уве́дехом, я́ко не́сть возмо́жно вся́кому сие́. А́ще у́бо не смири́м себе́, о бра́тие, ли́к смире́нный Де́вы Чи́стыя ни в жи́зни се́й, ни в бу́дущей узре́ти возмо́жем, и́мя бо Ея́ то́кмо в се́рдце чи́стом и смире́нном досто́йно велича́ется.

Припе́в: Велича́й, душе́ моя́, Преблагослове́нныя Цари́цы о́браз Светопи́санный.

Припе́в: Велича́й, душе́ моя́, Преблагослове́нныя Цари́цы о́браз Светопи́санный.

Пе́сни Тебе́ благода́рственныя вси́ мы́, в Горе́ Твое́й живу́щии, прино́сим, Ма́ти Бо́жия, я́ко спаса́еши на́с при́сно от вся́каго обстоя́ния, пита́еши, гре́еши и промышля́еши, на враги́ спобо́рствующи. Но мо́лим Тя́: и Боже́ственнаго Ца́рствия со отцы́ на́шими по кончи́не сподо́би, да в безконе́чныя ве́ки су́щую Богоро́дицу и мы́ Тебе́ велича́ем.

Припе́в: Велича́й, душе́ моя́, ко рабо́м Свои́м прише́дшую Влады́чицу.

Припе́в: Велича́й, душе́ моя́, ко рабо́м Свои́м прише́дшую Влады́чицу.

Госпожу́ Пречи́стую воспои́м усе́рдно, бра́тие, Я́же, я́ко Ма́ти на руку́ Свое́ю на́с при́сно нося́щи, духо́вне при́сно на́с пита́ет. Е́йже все́м житие́м угоди́ти потщи́мся, да во Ца́рствии Сы́на Ея́ во ве́ки Ю́ велича́ем.

Припе́в: Велича́й, душе́ моя́, Присноблаже́нныя Богоневе́сты ли́к самоизображе́нный.

Припе́в: Велича́й, душе́ моя́, Присноблаже́нныя Богоневе́сты ли́к самоизображе́нный.

В жи́зни се́й потруди́тися вси́ да потщи́мся, да печа́ть Богома́терняго избра́ния и сыновства́, богоподо́бною красото́ю и добро́тою сия́ющи, в душа́х на́ших вообрази́тся, и позна́ти на́с Ма́ти Бо́жия в де́нь о́н стра́шный возмо́жет тогда́, да во Ца́рствии Сы́на Ея́ безконе́чно Ю́ велича́ем.

И́н.

Припе́в: Велича́й, душе́ моя́, погиба́ющих спасе́ния Взыску́ющую.

Припе́в: Велича́й, душе́ моя́, погиба́ющих спасе́ния Взыску́ющую.

Се́, падо́хом, о душе́ моя́, и грехо́м сме́ртне уязви́хомся. Се́, умро́хом для жи́зни Небе́сныя и отста́хом до́брыя дружи́ны бра́тий на́ших. Оба́че, душе́ моя́, воспряни́, воста́ни! Се́ бо Живота́ Роди́тельница, я́ко Ма́ти ми́лостивно ру́це живи́тельнеи свы́ше ти́ подае́т, да и ты́, о душе́ моя́, су́щую Богоро́дицу Ю́ велича́еши.

Припе́в: Велича́й, душе́ моя́, Де́ву Чи́стую, Горы́ Афо́нския Игу́мению.

Припе́в: Велича́й, душе́ моя́, Де́ву Чи́стую, Горы́ Афо́нския Игу́мению.

Ри́зу све́тлу да́руеши обновле́ния благода́тию Ду́ха священноистка́нную, Богоро́дице, во дворе́ Твое́м рабо́тати приходя́щим, ю́же и мне́, Де́во Чи́стая, в покая́нии, о Всеми́лостивая, обнови́, да и а́з со отцы́ воспою́ пе́снь досто́йно, су́щую Богоро́дицу Тя́ велича́я.

Припе́в: Велича́й, душе́ моя́, Триипоста́снаго Божества́ держа́ву.

Припе́в: Велича́й, душе́ моя́, Триипоста́снаго Божества́ держа́ву.

Гла́с Арха́нгелов Тебе́, Пречи́стая, и а́з недосто́йный со отцы́ мои́ми дне́сь приношу́: ра́дуйся, обра́дованная и преблагослове́нная! Ра́дуйся, Всепе́тая, Госпо́дь с Тобо́ю! О Влады́чице пресве́тлая, пе́снь сию́ не пре́зри, но во Ца́рствии Триипоста́снаго Бо́га на́шего, я́коже Сама́ изво́лиши, нищету́ мою́ помяни́.

Припе́в: Велича́й, душе́ моя́, честне́йшую го́рних во́инств Де́ву Пречи́стую Богоро́дицу.

Припе́в: Велича́й, душе́ моя́, честне́йшую го́рних во́инств Де́ву Пречи́стую Богоро́дицу.

О Всепе́тая Ма́ти! Пе́снь досто́йную воспе́ти Ти́ недоуме́ю. Но оба́че се́ дерза́ю и благодарю́ Тя́, я́ко сподо́била мя́ еси́ немощна́го ли́ку Твоему́ свято́му и светоявле́нному послужи́ти. Приими́, о Всесвята́я, дерзнове́ние убо́гое сие́, и жития́ моего́ оста́ток в непоро́чности, молю́ Тя, сохрани́. В де́нь же стра́шный исхо́да окая́нныя моея́ души́ грехо́в мои́х рукописа́ние, о Всеми́лостивая, раздери́, да во Ца́рствии Сы́на Твоего́ со отцы́ мои́ми и а́з недосто́йный су́щую Богоро́дицу во ве́ки Тя́ велича́ю.

Свети́лен.

Избра́ннии от коне́ц земны́х, совоку́пльшеся зде́, во уде́ле святе́м Мое́м, возвели́чити и́мя Мое́. И Ты́, Сы́не и Бо́же Мо́й, низпосли́ и́м с высоты́ све́т Тво́й.