Пе́снь 1.

Ирмо́с: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Колесни́цею благода́ти Твоея́, Го́споди, возвы́си на́ша по́мыслы от до́льних на Го́рняя и сподо́би восхвали́ти уго́дника Твоего́, святи́теля Алекси́я, пе́снь Тебе́, Бо́гу, воспева́юща.

Колесни́цею хода́тайств твои́х у́м на́ш, отягче́нный жите́йскими печа́льми, возвы́си от земны́х к Небе́сным и наста́ви восхвали́ти тя́ досто́йно, о́тче Алекси́е, пе́снь побе́дную Бо́гу воспева́юща.

Колесни́цу го́рдости ми́ра сего́ превозше́л еси́ смире́нием, и, взе́м кре́ст тво́й, после́довал еси́ Христу́ добро́тами, и, во приста́нище го́рняго селе́ния дости́г, пе́снь Бо́гу побе́дную воспева́еши.

Колесни́цею доброде́телей, я́ко Илия́ о́гненною, возше́л еси́ на Не́бо, отону́дуже моли́ Бо́га низпосла́ти я́ко ми́лоть благода́ть Ду́ха, уча́щую ны́ пе́снь побе́дную Бо́гу воспева́ти.

Богоро́дичен: Колесни́це огнеобра́зная, носи́вшая Бо́га Сло́ва, во чре́ве Твое́м воплоще́ннаго, моли́ Его́ приле́жно спасти́ся рабо́м Твои́м, к Тебе́ притека́ющим и побе́дную пе́снь Бо́гу воспева́ющим.

Пе́снь 3.

Ирмо́с: Небе́снаго кру́га Верхотво́рче Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, Еди́не Человеколю́бче.

Небе́снаго кру́га и всея́ тва́ри Госпо́дь, предве́дый тя́, о́тче Алекси́е, бу́дуща па́стыря добра́, вве́ри тебе́ па́ству слове́сную, я́ко Еди́н Человеколю́бец.

Небе́снаго кру́га возлюби́в Творца́, посто́м облегче́н, страсте́й мо́ре преше́л еси́ и, на безстра́стия ве́рх доброде́тельми возше́д, Бо́га узре́л еси́, Еди́наго Человеколю́бца.

Небе́снаго кру́га на высоту́ возше́д Богоразу́мием, уви́дел еси́ у́мно та́мо неизрече́нная и прия́л еси́ да́р чудотворе́ния от Бо́га Человеколю́бца.

Богоро́дичен: Небе́снаго кру́га Верхотво́рца, хотя́ща роди́тися из Тебе́, Пречи́стая, возвести́ Тебе́ Гаврии́л: ра́дуйся, Де́во, Госпо́дь с Тобо́ю, Еди́н Человеколю́бец.

Седа́лен, гла́с 4:

Благово́нною сло́ва Бо́жияго па́житию слове́сную па́ству Христо́ву Богоуго́дно воспита́нную, па́стырским Богодухо́вным исправле́ния жезло́м на пра́вую спасе́ния стезю́ путево́дствив я́ко до́брый па́стырь, удосто́ился еси́ нетле́нну ве́чныя жи́зни мзду́ восприя́ти в Го́рнем Сио́не от Пастыренача́льника Христа́ Бо́га. Его́же моли́, досточу́дне Алекси́е, на́м, твои́м овца́м слове́сным, сохрани́тися от неви́димых волко́в хи́щных.

Сла́ва: Ду́хом Боже́ственным пома́зася ве́рх тво́й свяще́нный, архиере́е Алекси́е, и сни́де на тя́ благода́ть бога́тно, и пребы́сть, я́ко ми́ро, на главе́ сходя́щее на браду́, браду́ Ааро́ню, и сходя́щая, я́ко роса́ аермо́нская, и ороша́ющая ка́плями благодея́ний твои́х притека́ющия к ра́це моще́й твои́х и зову́щия тебе́ усе́рдно: о́тче преподо́бне, моли́ Христа́ Бо́га грехо́в оставле́ние дарова́ти чту́щим досто́йно святу́ю па́мять твою́.

И ны́не: Повеле́нное та́йно прие́м в ра́зуме, в кро́ве Ио́сифове тща́нием предста́ безпло́тный, глаго́ля Неискусобра́чней: приклони́вый схожде́нием Небеса́ вмеща́ется неизме́нно ве́сь в Тя́, Его́же и ви́дя в ложесна́х Твои́х, прие́мша ра́бий зра́к, ужаса́юся зва́ти Тебе́: ра́дуйся, Неве́сто Неневе́стная.

Пе́снь 4.

Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча и на́шу нищету́ посети́в. Те́м с проро́ком Авваку́мом зову́ Ти́: си́ле Твое́й сла́ва, Человеколю́бче.

Ты́ моя́ кре́пость, Го́споди, Ты́ моя́ и си́ла, — вопия́, о́тче Алекси́е, прия́л еси́ да́р теле́сныя неду́ги цели́ти и лука́выя ду́хи отгоня́ти от зову́щих Христу́: си́ле Твое́й сла́ва, Человеколю́бче.

Ты́ еси́ свети́ло Росси́йския земли́ и гра́ду Москве́ стена́ неруши́ма, на враги́ же победи́тель, и христоимени́тым лю́дем во бране́х посо́бник, зову́щим Христу́: си́ле Твое́й сла́ва, Человеколю́бче.

Ты́ Богосло́вил еси́ Еди́ницу несозда́нную, в Трие́х Ли́цех су́щую, неслива́ему же и неразде́льну, воумля́я па́ству твою́, о́тче Алекси́е, непреста́нно зва́ти: си́ле Твое́й сла́ва, Человеколю́бче.

Богоро́дичен: Ты́ моя́ кре́пость еси́ вои́стину и спасе́ние, Богоро́дице, и на Тя́ наде́жду мою́ возложи́х, спаси́ мя́, Де́во Чи́стая, и укрепи́ ро́ждшемуся из Тебе́ зва́ти: си́ле Твое́й сла́ва, Человеколю́бче.

Пе́снь 5.

Ирмо́с: Вску́ю мя́ отри́нул еси́ от лица́ Твоего́, Све́те Незаходи́мый, и покры́ла мя́ е́сть чужда́я тьма́, окая́ннаго? но обрати́ мя́ и к све́ту за́поведей Твои́х пути́ моя́ напра́ви, молю́ся.

Вску́ю проти́внии ополча́ются на ны́, иму́щия тя́ кре́пка побо́рника? Ты́, о́тче Алекси́е, де́рзость и́х низложи́ и во́инство на́ше моли́твою твое́ю стра́шно и́м покажи́.

Вску́ю уныва́ем, согнета́емии мно́жеством печа́лей, иму́ще ско́рбных уте́шителя — святи́теля Алекси́я, избавля́юща ны́ от бе́д и скорбе́й на́ших и от вра́г ви́димых же и неви́димых?

Вску́ю, о́тче Алекси́е, теле́сныя не́мощи нахо́дят на ны́, и беды́ окружа́ют ны́, врача́ тя́ иму́щия в боле́знех и уте́шителя в ско́рбех? изми́ у́бо ны́ от си́х моли́твами твои́ми.

Богоро́дичен: Вску́ю обурева́ют мя́ во́лны страсте́й, ко́рмчия Христа́ ро́ждшая, Де́во Всенепоро́чная? Ты́ Его́ моли́ си́х исхи́тити мя́ и к стези́ за́поведей Его́ пути́ моя́ упра́вити, молю́ся.

Пе́снь 6.

Ирмо́с: Очи́сти мя́, Спа́се, мно́га бо беззако́ния моя́ и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Очи́сти ны́, Спа́се, от мно́гих грехо́в на́ших и боле́зни отжени́ моли́твами святи́теля Твоего́ Алекси́я, и ми́р Це́рквам Твои́м пода́ждь и соедине́ние.

Очи́сти сердца́ на́ша и мы́сли хода́тайствы твои́ми, о́тче, и, прии́м от на́с приноси́мыя тебе́ моли́твы, испроси́ у Христа́ обрести́ на́м ве́лию ми́лость.

Очи́стив се́рдце твое́, о́тче Алекси́е, и тро́сть язы́ка твоего́ изостри́в Ду́хом, написа́л еси́ в сердца́х ве́рных сло́во Богоразу́мия уче́ньми твои́ми.

Богоро́дичен: Очище́нну Тя́ Ду́хом, Всенепоро́чная, Арха́нгел Гаврии́л позна́в, зовя́ше Тебе́: ра́дуйся, Де́во Мари́е, па́дших воззва́ние и кля́твы разреше́ние.

Конда́к, гла́с 8:

Боже́ственнаго и пречестна́го святи́теля Христо́ва, но́ваго чудотво́рца Алекси́я, ве́рно вси́ пою́ще, лю́дие, любо́вию да ублажи́м, я́ко па́стыря вели́каго, служи́теля же и учи́теля прему́дра земли́ Росси́йстей. Дне́сь, в па́мять его́ прите́кше, ра́достно возопие́м пе́снь Богоно́сному: я́ко име́я дерзнове́ние к Бо́гу, многообра́зных на́с изба́ви обстоя́ний, да зове́м ти́: ра́дуйся, утвержде́ние гра́ду на́шему.

И́кос.

Ди́внаго и пречестна́го чудотво́рца ви́дяще чудеса́, исцеле́ния подава́юща все́м, от души́ с ве́рою притека́ющим, и Христо́вы лю́ди неви́димо посеща́юща, и зе́млю Росси́йскую просвеща́юща, ра́достно от души́ вси́, вку́пе соше́дшеся к ра́це моще́й его́, слы́шаще же и ви́дяще чуде́с мно́жество и исто́чник исцеле́ний неисчерпа́емь, чи́стыми сердцы́ и просвеще́нными ра́зумы, я́ко благоуха́нно кади́ло, плоды́ доброде́тельны от души́ принося́ще и ра́дующеся, воззове́м ему́, глаго́люще: ра́дуйся, о́тче, честны́й на́ш учи́телю, я́ко прия́л еси́ трудо́в твои́х воздая́ние и в Вы́шних водворя́ешися, о на́с моля́ Человеколю́бца Бо́га. Чуде́с да́р прия́л еси́, земли́ Росси́йстей оте́ц и учи́тель, и святи́телем изря́дная похвала́, и во́инству на́шему во бране́х посо́бник кре́пок. Ра́дуйся, святи́телю Алекси́е, гра́ду на́шему утвержде́ние.

Пе́снь 7.

Ирмо́с: От Иуде́и доше́дше, о́троцы в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

От Иуде́и отроко́м поревнова́в, огнепа́льныя стра́сти угаси́л еси́, Христу́ при́сно поя́, блаже́нне Алекси́е: отце́в Бо́же, благослове́н еси́.

От Иуде́и о́троки подража́л еси́, живу́щею бо в тебе́ Ду́ха благода́тию просве́щься, воспе́л еси́ Христу́: отце́в Бо́же, благослове́н еси́.

От Иуде́и отроко́м ревну́ем, ви́дяще мо́щи твоя́ чудоточа́щия, любо́вию распаля́еми, Христу́ зове́м: отце́в Бо́же, благослове́н еси́.

Богоро́дичен: От Иуде́и о́троцы Твое́ прообрази́ша Рождество́, Де́во Всечи́стая, о́гнь бо в пещи́ не опали́ и́х, пою́щих: отце́в Бо́же, благослове́н еси́.

Пе́снь 8.

Ирмо́с: Царя́ Небе́снаго, Его́же пою́т во́и А́нгельстии, хвали́те и превозноси́те во вся́ ве́ки.

Царя́ Небе́снаго хвали́ти учи́л еси́ па́ству твою́, зовы́й: по́йте и превозноси́те Христа́ во ве́ки.

Царя́ Небе́снаго умоли́ о на́с, ча́дех твои́х, ра́достно пою́щих и превознося́щих Его́ во ве́ки.

Царю́ Небе́сному предстоя́, па́ству твою́ назира́й, пою́щую и превознося́щую Христа́ во ве́ки.

Богоро́дичен: Царя́ Небе́снаго родила́ еси́, Де́во, Его́же А́нгели пою́т и превозно́сят во вся́ ве́ки.

Пе́снь 9.

Ирмо́с: Вои́стину Богоро́дицу, Тя́ испове́дуем, спасе́ннии Тобо́ю, Де́во Чи́стая, с Безпло́тными ли́ки Тя́ велича́юще.

Вои́стину све́т ми́ру яви́лся еси́, светя́щ доброде́тельми, и па́стырь изря́ден твоего́ ста́да бы́л еси́, Христа́ велича́юща.

Вои́стину ве́мы тя́, о́тче, чудотво́рца вели́ка, точа́ща мно́га чудеса́ ве́рно к тебе́ приходя́щим и Христа́ велича́ющим.

Вои́стину све́тло па́мять пра́зднуют святи́теля Алекси́я архиере́и, и свяще́нницы, мона́си и вси́ лю́дие, Христа́ Бо́га велича́юще.

Богоро́дичен: Вои́стину Ты́ еси́ христиа́ном спасе́ние: Христа́ бо родила́ еси́, спаса́ющаго ны́, Де́ву Чи́сту Тя́ велича́ющия.

Свети́лен.

Благода́ть Свята́го Ду́ха, все́льшаяся в тя́, святи́теля тя́ показа́, Христо́с же ти́ вручи́ па́ству Свою́ па́ствити на па́житех духо́вных, Его́же ра́ди потща́лся еси́ наставля́ти лю́ди, и ны́не на Небесе́х, ра́дуяся, живе́ши.

Сла́ва, и ны́не, Богоро́дичен: По Бо́зе упова́ние иму́ще на Тя́, Пречи́стая Богоро́дице, мо́лим Ти́ ся́, ко и́же из Тебе́ Ро́ждшемуся мольба́ми невреди́мы на́с до конца́ сохрани́.