Пе́снь 1.

Ирмо́с: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты Еги́петския, я́ко просла́вися.

Я́ко река́ прему́дрости и ра́зума, святи́телю Евфи́мие, бы́л еси́, ка́плю и мне́ да́руй, да возмогу́ и а́з ма́лое руки́ моея́ хвале́ние твоему́ вели́честву принести́, блаже́нне.

Судо́м Бо́жиим и челове́ческим избра́нием архиере́йства ма́стию пома́зан бы́в, святи́телю Евфи́мие, па́стырь преизря́ден бы́л еси́, же́ртвы Бо́гу вся́чески принося́, свяще́нне.

Источа́ют прему́драя уче́ния устне́ твои́, святи́телю, боже́ственную сла́дость иму́ще, е́юже напита́вшеся, ча́да твоя́, тебе́ любо́вию непреста́нно почита́ем.

Богоро́дичен: И́же на́с ра́ди из Тебе́, Де́во, в челове́ка премно́гою бла́гостию облеки́йся, свяще́нных собо́ры, Того́ возлю́бльшия, просла́вил е́сть.

Пе́снь 3.

Ирмо́с: Утверди́ на́с в Тебе́, Го́споди, дре́вом умерщвле́й гре́х, и стра́х Тво́й всади́ в сердца́ на́с, пою́щих Тя́.

Житие́ по Бо́зе стяжа́в, святи́телю, в посте́ и моли́тве мно́го вре́мя пре́был еси́, вери́ги тя́жки нося́ на те́ле твое́м, я́же ны́не зря́ще, чуди́мся терпе́нию твоему́.

Де́лы и словесы́ Боже́ственными укра́шен бы́в, святи́телю Евфи́мие, Це́рковь Христо́ву благоче́стно упа́сл еси́, те́мже и ра́дости сподо́бился еси́ Го́спода твоего́, на́с помина́й, тебе́ сла́вящих.

Житие́ твое́, блаже́нне, доброде́тельми уясни́л еси́, те́мже твоя́ исправле́ния по мно́гим страна́м пропове́даются, о́тче, и, от земли́ преше́д, дости́гл еси́ е́же та́мо со святы́ми пребыва́ния.

Богоро́дичен: Пала́ту кра́сную неизрече́ннаго бога́тства, Де́во, зна́ем и по до́лгу Тя́ сла́вим, спа́сшиися Рождество́м Твои́м, Всенепоро́чная.

Седа́лен, гла́с 8.

У́мная очеса́, святи́телю, я́ко всегда́ име́я к Бо́гу просте́рта, у́жем желе́зным обложи́в себе́, блаже́нне, мно́гажды всю́ но́щь без сна́ пре́был еси́, удруча́я пло́ть твою́, преблаже́нне; вери́ги же, я́же на тебе́, не позна́ни бы́ша, да́же до исхо́да е́же отсю́ду. Те́мже и Христо́с, Его́же ра́ди жесто́кое житие́ претерпе́л еси́, да́рует тебе́ неболе́зненное е́же на небесе́х житие́. Того́ моли́, святи́телю Евфи́мие, согреше́ний оставле́ние дарова́ти, чту́щим любо́вию свяще́нную па́мять твою́.

Сла́ва, и ны́не, богоро́дичен: Я́ко де́ву и еди́ну в жена́х, Тя́, без се́мене ро́ждшую Бо́га пло́тию, вси́ ублажа́ем, ро́ди челове́честии: о́гнь бо всели́ся в Тя́ Божества́, и я́ко Младе́нца дои́ши Зижди́теля и Го́спода. Те́м, а́нгельский и челове́ческий ро́д, досто́йно сла́вим пресвято́е Рождество́ Твое́ и согла́сно вопие́м Ти́: моли́ Христа́ Бо́га согреше́ний оставле́ние дарова́ти покланя́ющимся ве́рою пресвято́му Рождеству́ Твоему́.

Пе́снь 4.

Ирмо́с: Прише́л еси́ от Де́вы, не хода́тай, ни а́нгел, но Са́м, Го́споди, вопло́щся, и спа́сл еси́ всего́ мя́ челове́ка. Те́м зову́ Ти́: сла́ва си́ле Твое́й, Го́споди.

Храни́тель бу́ди оте́честву твоему́ и лю́дем, святи́телю, избавля́я вра́г наше́ствия, гла́да же и па́губы, да, моли́твами твои́ми спа́сшеся, тебе́ вси́ я́ко засту́пника велича́ем.

Любому́дренно душе́вный кора́бль в ти́хое приста́нище управля́я, святи́телю, моли́твам и ми́лостыни прилежа́л еси́, тле́нное бога́тство в нетле́нное, богоблаже́нне, прелага́я. Те́мже и прия́л еси́ небе́сное бога́тство.

Чи́сто о́ко душе́вное име́я, зри́тельно небе́снаго восхо́да, те́мже на земли́ жи́знь твою́ до́бре упра́вил еси́, святи́телю. Сего́ ра́ди це́рковь Бо́га Жива́го, Евфи́мие, бы́л еси́.

Богоро́дичен: Бо́г, из Тебе́ роди́вся, Госпоже́ Всенепоро́чная, от облада́юща врага́ ми́р Тебе́ ра́ди изба́ви, святи́тельский же ли́к, же́ртву Тому́ принося́щий, возвели́чи.

Пе́снь 5.

Ирмо́с: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем.

Блаже́нную жи́знь, святи́телю Евфи́мие, на земли́ пожи́л еси́ и отсю́ду к небе́сному житию́ сла́вно преше́л еси́. Те́мже, и по преставле́нии твое́м ра́ку твою́ обстоя́ще и любе́зно покланя́ющеся тебе́, свяще́ние почерпа́ем.

Преосвяще́нствован душе́ю и те́лом, о́тче, бы́л еси́, све́тло Влады́чней трапе́зе предстои́ши, Же́ртву Тому́ Безкро́вную принося́. Те́мже я́ко священнотаи́нник приле́жно о на́с моли́ся.

Дре́вняго Корни́лия моли́тве и ми́лостыни подо́бяся, ми́лостив к тре́бующим, о́тче, бы́л еси́, те́м от Христа́ Бо́га досто́йно слы́шиши: моли́твы твоя́ и ми́лостыни взыдо́ша предо Мно́ю. Сего́ гла́са и на́м услы́шати, блаже́нне, помоли́ся.

Богоро́дичен: Свяще́нными гла́сы Тя́, добро́ту Иа́ковлю, пое́м, пло́тски ро́ждшую ми́рови Све́т, И́же от Све́та, просвеща́ющий архиере́йския собо́ры.

Пе́снь 6.

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Сы́н све́та и дне́, святи́телю, бы́л еси́, те́мже и всели́лся еси́, иде́же све́т невече́рний и поко́ища пра́ведных, того́ све́та моли́ получи́ти все́м, па́мять твою́ пра́зднующим.

Свяще́нныя и пречестны́я хра́мы в сла́ву святы́х мно́гия воздви́гл еси́, те́мже и мно́гия святы́я име́л еси́ хода́таи, промышля́ющия тебе́ поле́зная, но, я́ко с ни́ми водворя́яся, о на́с моли́ся.

Све́тло лице́ в жи́зни име́я, блаже́нне, потща́лся еси́ светле́йшу и ду́шу твою́ Христу́ предста́вити, е́же и получи́л еси́, Евфи́мие. Те́мже бу́ди те́плый моли́твенник, я́ко святи́тель о чту́щих тя́.

Богоро́дичен: Во утро́бу Твою́ всели́вся, все́ челове́ческое существо́ обожи́ и святи́телей ли́к мно́жество свяще́нно привлече́ сла́вити Тя́, Богоневе́сто.

Конда́к, гла́с 8.

Я́ко архиере́ем сопресто́льник и святи́телем изря́дный побо́рник бы́л еси́, святи́телю Евфи́мие, не преста́й сохраня́я оте́чество твое́, гра́д же и лю́ди, и́же тебе́ ве́рою почита́ющия и честны́м моще́м твои́м покланя́ющияся, да велегла́сно тебе́ вси́ вопие́м: ра́дуйся, святи́телю богому́дре.

И́кос:

Ева́нгельскому словеси́ вня́т, преподо́бне, душе́вный ра́зум впери́в к просвеще́нию светолу́чныя зари́, душетле́нныя стра́сти до конца́ потреби́л еси́. Доброде́тельным же житие́м а́нгелом и челове́ком преди́вен показа́лся еси́. И сего́ ра́ди вели́каго Нова́града архиере́йства сподо́бився, Це́рковь украси́л еси́, лю́ди просвети́л еси́ и до конца́ в правосла́вии утверди́л еси́, да вси́ велегла́сно вопие́м ти́: ра́дуйся, Евфи́мие, святи́телю богому́дре.

Пе́снь 7.

Ирмо́с: Те́лу злато́му прему́дрыя де́ти не послужи́ша, и в пла́мень са́ми поидо́ша, и бо́ги и́х обруга́ша, среди́ пла́мене возопи́ша и ороси́ я́ а́нгел: услы́шася уже́ у́ст ва́ших моли́тва.

Вели́кий Но́вград, и́же в себе́ тебе́ стяжа́вый, ра́достию ра́дуется, святи́телю Евфи́мие: тя́ бо, я́ко сте́ну име́я тве́рду и сто́лп необори́м, Христа́ воспева́ет, тебе́ сему́ дарова́вшаго.

И́же пре́жде тебе́ бы́вшим архиере́ом красота́ бы́л еси́, блаже́нне, святи́телей удобре́ние, мона́хов о́браз, Христо́вы же Це́ркве преизря́дный па́стырь яви́лся еси́, богоблаже́нне о́тче Евфи́мие.

Илиину́ ре́вность восприи́м, святи́телю, те́мже ни преще́ния, ни моле́ния согреша́ющих возмого́ша увеща́ти тя́, е́же те́х о согреше́ниих не облича́ти. Ты́ же не преста́л еси́, до́ндеже коне́чнее о́нех испра́вил еси́.

Богоро́дичен: Кра́сную обре́т и до́брую в жена́х Тя́, Пречи́стая, прекра́сное Сло́во всели́ся в пречи́стое чре́во Твое́, вся́ ли́ки святи́телей освя́щ, зову́щия: благослове́н Бо́г оте́ц на́ших.

Пе́снь 8.

Ирмо́с: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки.

Судо́м Бо́жиим и всенаро́дным избра́нием отню́дуже при́зван бы́л еси́, преподо́бне, на престо́л вели́кия Це́ркве, та́мо па́ки отхо́диши промышле́нием твоего́ Влады́ки, да отню́дуже сия́ прия́л еси́, па́ки та́мо чи́ста того́ с душе́ю Бо́гу преда́си.

Пречестна́я ра́ка, богоблаже́нне, иде́же положено́ бы́сть честно́е те́ло твое́, святи́телю, благово́ние и освяще́ние все́м, ве́рою приходя́щим, испуща́ет, от души́ Христу́ вопию́щим: благослови́те, вся́ дела́, Го́спода и превозноси́те Его́ во ве́ки.

Христо́с тя́ святи́теля избра́, я́ко не́кое свети́ло, могу́ща тве́рдь церко́вную просвеща́ти и свои́ми уче́ньми лю́ди, тебе́ вруче́нныя, наставля́ти Творцу́ вопи́ти: благослови́те, вся́ дела́, Го́спода и превозноси́те Его́ во ве́ки.

Богоро́дичен: Уны́л име́я по́мысл и ду́шу, сластьми́ отягче́ну, к Тебе́ прибега́ю, Богороди́тельнице Чи́стая, и вопию́ Ти́: воздви́гни и спаси́ мя́, окая́ннаго и осужде́ннаго.

Пе́снь 9.

Ирмо́с: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии, единому́дренно пе́сньми велича́ем.

Оби́тель, в не́йже сподо́бился еси́ яре́м Христо́в прия́ти, та́мо вся́ дни́ твоя́ ве́рою и ду́хом кроме́ телесе́ неразлу́чен, о́тче, пре́был еси́, те́мже и по преставле́нии та́мо повелева́еши положи́тися, иде́же и чуде́с дарова́ния от Го́спода, святи́телю Евфи́мие, прия́л еси́.

Руко́ю мое́ю недосто́йною приноси́мое тебе́ с трудо́м хвале́ние, святи́телю Евфи́мие, не пре́зри, но приими́ и моли́ Творца́ твоего́ и Влады́ку та́мошняго мя́ изба́вити ве́чнаго муче́ния, тебе́ ве́рою почита́юща.

Певцы́ твоя́, тебе́ и́скренно воспева́ющия и твою́ па́мять честну́ю, святи́телю Евфи́мие, ве́рою прославля́ющия, освяти́ и просла́ви и от бе́д избавля́й, и напа́стей, и та́мо ве́чнаго муче́ния, да тебе́ всегда́ воспева́ют.

Богоро́дичен: Пощади́ мя́, Го́споди, пощади́, егда́ хо́щеши ми́ суди́ти, и не осуди́ мене́ во о́гнь, да не я́ростию обличи́ши мене́, мо́лит Тя́ Де́ва, Тебе́ ро́ждшая, Христе́, а́нгельстии собо́ри и святи́телей совокупле́ния.

Свети́лен.

Дне́сь святи́теля Евфи́мия све́тлая наста́ па́мять, ве́рныя просвеща́ет и тму́ пре́лести разоря́ет, ве́рою приходя́щим к честны́м того́ моще́м.

Богоро́дичен: Све́т возсия́ безле́тный от Отца́ пре́жде ве́к, в ле́то ны́не напосле́док, из Тебе́, Де́во, яви́ся на спасе́ние ми́ра. К Нему́же не преста́й о лю́дех Твои́х моля́щися.