Пе́снь 1.

Ирмо́с: Изра́иля от рабо́ты изба́вил еси́, Го́споди, десни́цею Твое́ю держа́вною, я́ко о́наго спа́сл еси́, ны́не на́с спаси́.

Тро́ице Пресвята́я, пе́снь Тебе́ принести́ и досто́йными похвала́ми уго́дника Твоего́ святи́теля Гу́рия воспе́ти пода́ждь ми́, да, ра́дуяся, сла́влю Тя́ во ве́ки.

Повеле́нием Самоде́ржца, первопресто́льник церко́вный гра́ду новопросвеще́нному явля́ешися, и апо́стольски научи́л еси́ ве́ровати Тро́ице во Еди́ном Существе́.

Моли́твенный хра́м в дому́ твое́м име́я и в то́м многотру́дне подвиза́ся, всено́щная стоя́ния и моли́твы принося́ вы́ну Бо́гу.

Богоро́дичен: Бо́жия Ма́ти, ро́ждшая Еди́наго от Святы́я Тро́ицы, слове́сное ми́ недоуме́ние разреши́ и сло́во ми́ пода́ждь, и́мже Тя́ просла́влю.

Пе́снь 3.

Ирмо́с: Утвержде́й Сло́вом небеса́ и зе́млю основа́вый на вода́х мно́гих, утверди́ мя к пе́нию славосло́вия Твоего́, Го́споди.

Ада́ма дре́внейша, А́гнца Непоро́чнаго, Бо́жияго Сло́ва Соприсносу́щнаго, святи́телю Гу́рие, моли́, да пода́ст благочести́вому наро́ду на́шему здра́вие во благоде́нстве и на сопроти́вных побе́ду.

Его́же измла́да возлюби́л еси́, и вся́ тле́нная ми́ра сего́ в ничто́же вмени́л еси́, преходя́щая презре́в, да в бу́дущем утверди́шися сла́вити Го́спода.

Благове́рных зако́ну наказу́я благоче́стия, неве́рныя же науча́я позна́ти ве́ру благочести́ву и и́стинну и пе́ти с на́ми при́сно пе́снь, а́нгелы пева́ему в Тро́ице Бо́гу: Свя́т еси́, Го́споди.

Богоро́дичен: Под кро́в Тво́й держа́вный с ве́рою прибега́ем, Богоро́дице: покры́й и соблюди́, Госпоже́, моли́твами Твои́ми, и спаси́ от бе́д и от клеветы́ злы́х челове́к ра́б Твои́х, при́сно пою́щих Тя́.

Седа́лен, гла́с 4.

От земли́ Воззва́вый ва́с к ве́чным оби́телем соблюда́ет и по сме́рти телеса́ ва́ша, отцы́ преподо́бнии: вы́ бо в целому́дрии и чистоте́ житие́ по́жили есте́, Гу́рие богому́дре и Варсоно́фие преди́вне. Того́ ра́ди любо́вию почита́ем святу́ю па́мять ва́шу и мо́лим: моли́те Христа́ Бо́га спасти́ся на́м.

Богоро́дичен: Егда́ хощу́ предста́ти пред лице́м Созда́теля моего́ в де́нь пра́веднаго Суда́ Его́, тогда́, Влады́чице, предста́ни ми́ и му́ки изба́ви мя́ ве́чныя, моли́тву сотвори́вши о упова́ющем на Тя́, Свята́я Богоро́дице, да не сни́ду во а́д, но да спасу́ся Твои́м заступле́нием.

Пе́снь 4.

Ирмо́с: Из горы́ приосене́нныя, Сло́ве, проро́к, еди́ныя Богоро́дицы, хотя́ща воплоти́тися богови́дно усмотри́ и со стра́хом славосло́вяще си́лу Твою́.

Бла́г нра́в и послуша́ние к твоему́ наста́внику име́л еси́ и, во све́те Святы́я Тро́ицы свеселя́ся, с ни́м пое́ши: сла́ва си́ле Твое́й, Го́споди.

Благослове́нием кра́йняго святи́теля поставля́ешися па́стырь и учи́тель новопросвеще́нному гра́ду Каза́ни, и́же пре́лестию врага́ омраче́нныя лю́ди све́том богоразу́мия просвети́л еси́.

И́ова пра́веднаго терпе́нию подража́л еси́, в боле́зни слежа́, и на одре́, те́лом дручи́мь, изнемога́л еси́, поя́ Творцу́ твоему́ пе́ние непреста́нно.

Богоро́дичен: Богоневе́сто и Богома́ти, Плотоно́сца без боле́зни ро́ждши и по рождестве́ Де́ва я́вльшися, Того́ моли́, Влады́чице, да изба́вимся бе́д и скорбе́й.

Пе́снь 5.

Ирмо́с: Мра́к души́ моея́ разжени́, Светода́вче Христе́ Бо́же, началоро́дную тму́ изгна́в бе́здны, и да́руй ми́ све́т повеле́ний Твои́х, Сло́ве, да у́тренюя, сла́влю Тя́.

Архиере́й сы́й, архиере́ем на́шим в моли́твах спосо́бствуй, да возмо́гут гра́ду Каза́ни, благоче́стия содержи́телю, и всему́ христиа́нскому наро́ду испроси́ти у Христа́ ми́ра и ве́лия ми́лости.

Ны́не, преблаже́нне Гу́рие, душа́ твоя́ почива́ет на небесе́х, предстоя́ престо́лу Христо́ву: честны́я же твоя́ мо́щи нетле́нием почте́ны, даю́т исцеле́ния приходя́щим с ве́рою.

Дре́вле помраче́нный зми́евою пре́лестию, ны́не же просвеще́нный Христо́вою благода́тию гра́д Каза́нь, ви́дя в себе́ нетле́нны мо́щи твоя́, ра́дуется. Мы́ же, ча́да твоя́, чудесы́ обогаща́еми, весели́мся, Христа́ сла́вяще, зове́м: спаси́ на́с, Го́споди.

Богоро́дичен: Богоро́дице, все́х Цари́це, благочести́вому наро́ду на́шему на враги́ побе́ду да́руй и сопроти́вных сове́ты разори́, и от междоусо́бныя бра́ни изба́ви, и клеветнико́в че́люсти сокруши́, Влады́чице, и от все́х бе́д моли́твами Твои́ми спаси́ на́с.

Пе́снь 6.

Ирмо́с: Я́ко во́ды морски́я, Человеколю́бче, волна́ми жите́йскими обурева́юся, те́мже, я́ко Ио́на, та́ко вопию́ Ти́: возведи́ от тли́ живо́т мо́й, благоутро́бне Го́споди.

Утеша́я скорбя́щия, заступа́я оби́димыя, накормля́я а́лчущия и вся́ все́м подава́я неоску́дно, Гу́рие святи́телю, Христа́ Бо́га моли́ спасти́ся на́м.

Бо́жиим смотре́нием и святи́тельским благослове́нием, и ца́рским повеле́нием, руко́ю мое́ю недосто́йною приноси́мое ва́шим трудо́м похвале́ние, преподо́бнии чудотво́рцы, не отри́ните, но приими́те и моли́те Христа́, да изба́вит мя́ шу́ияго стоя́ния.

Тече́ние восприя́ и пу́ть соверши́, и зе́млю непло́дну моли́твами твои́ми добропло́дну показа́: и о мне́, принося́щем тебе́ пе́ние сие́, святи́телю, моли́ Христа́, да принесу́ и а́з покая́ния пло́д, да изба́вит мя́ ве́чнаго муче́ния.

Богоро́дичен: Богоблаже́нная и от а́нгел покланя́емая, и от земны́х всегда́ славосло́вимая, Творца́ Твоего́ и Бо́га, Его́же родила́ еси́, Пресвята́я Де́во, моли́ спасти́ся на́м.

Конда́к, гла́с 4:

Чу́вственныя стра́сти победи́в, чистото́ю, я́ко со́лнце, возсия́л еси́, чи́сто житие́ до конца́ сохрани́в, и от неве́рия в ве́ру мно́гих ко Христу́ приве́л еси́, и Того́ ра́ди от Бо́га нетле́нием почте́н бы́л еси́ и чудесы́ удивля́емь. Мо́лим тя́, святи́телю Гу́рие, моли́твами твои́ми от бе́д изба́ви на́с, да зове́м ти́: ра́дуйся, о́тче преди́вный, гра́ду Каза́ни похвала́ и утвержде́ние.

И́кос:

Пе́рвый се́ятель бы́л еси́ духо́вных доброде́телей и пе́рвый па́стырь и Це́ркви нача́льник, пе́рвый архиере́й и учи́тель христиа́нскому зако́ну в новопросвеще́нном гра́де Каза́ни, ве́рныя лю́ди кормя́ хле́бом уче́ния благода́тнаго зако́на, напая́я пи́вом духо́вныя благода́ти, неве́рныя же уча́ позна́ти и́стину и крести́тися святы́м креще́нием, и мно́жество наро́да от неве́рия в ве́ру ко Христу́ приве́л еси́, и чи́стым житие́м Бо́гу угоди́ти наста́вив и́х. Сего́ ра́ди Христо́с свято́му и трудолюбе́зному твоему́ те́лу дарова́ нетле́ние и да́р чудотворе́ния. Приходя́щии бо с ве́рою к цельбоно́сным твои́м моще́м прие́млют неоску́дная страсте́й премене́ния и боле́зней исцеле́ние, и грехо́в проще́ние твои́ми, свя́те, ко Христу́ моли́твами, да зове́м ти́: ра́дуйся, о́тче преди́вный, гра́ду Каза́ни похвала́ и утвержде́ние.

Пе́снь 7.

Ирмо́с: О́троцы богочести́вии в Вавило́не, о́бразу злато́му не поклони́шася, но посреде́ пе́щи о́гненныя, ороша́еми, пе́снь воспева́ху, глаго́люще: превозноси́мый отце́в и на́с Бо́же, благослове́н еси́.

Не то́кмо у́бо те́ло твое́ нетле́нием просла́вил е́сть Бо́г, святи́телю Гу́рие, но и погреба́льная вся́ и до ны́не пребыва́ют но́вых крепча́йше. Мы́ же, си́м дивя́щеся, зове́м: благослове́н Бо́г отце́в на́ших.

По́двигов твои́х ра́ди и трудо́в, преподо́бне, те́ло твое́ нетле́нно показа́ Бо́г: гро́бу бо и ри́зам вме́сто тле́ния кре́пость дарова́, благослове́н Бо́г отце́в на́ших.

Не еди́но у́бо те́ло твое́, святи́телю, тле́нию бы́сть неприча́стно, но и погре́бшихся с ве́рою во еди́ной гробни́це с тобо́ю, моли́твами твои́ми дву́ мона́хов нетле́нием одари́ Бо́г, Ему́же зове́м: благослове́н еси́, Го́споди, Бо́же отце́в на́ших.

Богоро́дичен: О, Всепе́тая и Всенепоро́чная Влады́чице, моли́ Сы́на Твоего́, Христа́ Бо́га на́шего, да изба́вит на́с ве́чнаго муче́ния, да пое́м: благослове́н Бо́г отце́в на́ших.

Пе́снь 8.

Ирмо́с: Покрыва́яй вода́ми превы́спренняя Своя́, полага́яй мо́рю преде́л песо́к и содержа́й вся́, Тя́ пое́т со́лнце, Тя́ сла́вит луна́, Тебе́ прино́сит пе́снь вся́ тва́рь, я́ко Соде́телю все́х во ве́ки.

Пречестна́я ра́ка, иде́же положено́ честно́е те́ло твое́, святи́телю Гу́рие, ми́ра благоуха́нна преиспо́лнена бы́сть. И́же с ве́рою ма́жущиися неоску́дна исцеле́ния прие́млют, зову́ще: да благослови́т вся́ тва́рь Го́спода и превозно́сит Его́ во ве́ки.

Новопросвеще́нному гра́ду Каза́ни первопресто́льник посыла́ешися и мно́жество неве́рных к твоему́ Влады́це Христу́ приве́л еси́, пою́щих Ему́: благослови́те, по́йте и превозноси́те Го́спода во ве́ки.

Па́стырский же́зл прие́м, святи́телю, но́вым лю́дем учи́тель бы́л еси́, пресла́вне Гу́рие, и мно́ги лю́ди ага́рянска язы́ка святы́м креще́нием обнови́л еси́, да вси́ с тобо́ю зове́м: благослови́те, по́йте и превозноси́те Го́спода во ве́ки.

Богоро́дичен: Богоизбра́нная, еди́на Всенепоро́чная, Пречи́стая Богоневе́сто и Богома́ти, приими́ мольбы́ ве́рою упова́ющих на Тя́ и сотвори́ моле́ние ко Святе́й Тро́ице изба́витися на́м от все́х бе́д, Тя́ сла́вящим и превознося́щим Го́спода во ве́ки.

Пе́снь 9.

Ирмо́с: Сне́дию дре́ва ро́ду прибы́вшая сме́рть Кресто́м упраздни́ся дне́сь, и́бо прама́терняя всеро́дная кля́тва разруши́ся Прозябе́нием Чи́стыя Богома́тере, Ю́же вся́ си́лы небе́сныя велича́ют.

Прия́л еси́ от Христа́ Боже́ственное Его́ дарова́ние: от мно́гих бо ле́т сокрове́ны честны́я твоя́ мо́щи в три́десять же второ́е ле́то обрето́шася невреди́мы ничи́мже, исцеле́ния разли́чна подава́юща.

Па́мять обре́тения честны́х моще́й твои́х наста́ на́м све́тло пра́зднество, пречу́дный святи́телю Христо́в, прехва́льне Гу́рие, в ню́же чуде́с благода́ть прия́л еси́ от все́х Царя́ Христа́ Бо́га. Те́мже зове́м: изба́ви на́с от враго́в на́ших.

Благода́рственныя пе́сни принесе́м Христу́ Бо́гу на́шему, такова́го на́м святи́теля дарова́вшему, Це́ркви Свое́й пречестно́е удобре́ние и гра́ду Каза́ни вели́кое утвержде́ние.

Богоро́дичен: Умири́ ми́р, Христе́, мольба́ми Чи́стыя Богоотрокови́цы, и низложи́ вра́жия си́лы, и тишину́ неизглаго́ланну устро́й и во ве́ки сохрани́.

Свети́лен.

Егда́ у́бо честны́я ва́ша и святы́я мо́щи нетле́нны обрето́шася, тогда́ благоуха́ние от гробо́в ва́ших изноша́шеся, исцеля́ющее неду́ги и отгоня́ющее ду́хи лука́выя.

Богоро́дичен: Вознеси́, Богоро́дице, ро́г Це́ркви, и наро́ду на́шему пода́ждь на враги́ одоле́ние и кре́пость, и це́рковь, Чи́стая, утверди́, и лю́ди Твоя́ поми́луй, да Тя́ вся́к язы́к христиа́нский велича́ет.